حسني وقائمة ارقامه المفضلة

عصر مبارك كان مليان بالانجازات..انجازات ؟؟؟ مش كلمة غريبة شوية علي العصر ده ؟؟
ايوه بس انا هاكلمك بلغة الارقام..انجازات من نوع خاص جدا..
هو مش انجاز هو حرق بجاز يعني..
قسم بقي وسمعني يا معلم..حاضر هاسمعك..





رقم 1 :

حسني كان بيحب قوي رقم واحد..يعني بيحب يحطنا في الاحصائيات بتاعته كأننا من دول العالم الاول دايما وان معدلات النمو دايما بتزيد ماشاء الله يعني
كان هو رقم واحد في كل حاجة هو وجيمي ..ومجلس الشعب رقم واحد برضه وسيد قراره..لكن نظرا لان حسني كان بيحب الاسكواش قوي
فكنا دايما بنحب نبقي رقم واحد في الاسكواش
وطبعا حسني هو "بابا" ! فمن شابه اباه فما ظلم .
طبعا غير ان رقم واحد بيمثل بيع المتر في الاراضي لرجال اعمال بجنيه من كتر الفساد او من رخص الارض المصرية في نظر مبارك !




رقم 3 :


حسني برضه بيحب رقم تلاتة جدا..هو معاه الفلوس ومصر عندها الامكانيات اللي تخلينا عالم اول بس هو عشان بيعز رقم تلاتة فكان بيحب يحتفظ بالرقم ده قدام عنيه دايما
عشوائيات ومقالب زبالة في الشوارع ومجاري ومطبات ومستشفيات متهالكة يعني العالم التالت بكل قوته عندنا.
بس جاب نظيف وقريته الذكية او الغبية وحاول يخلينا عالم اول بالانترنت بس..قال يعني في دولة ممكن تتحول بالانترنت من غير بنية اساسية
قعد يشتري كابلات بحرية وساب المجاري طافحة !!!
ده بالاضافة لانه كان بيمثل الايد التالتة اللي بتزرع الفتنة في مصر .




رقم 10 :

بيعز قوي الرقم عشرة مستر حسني..يعني دايما بتلاقينا في اول عشر دول من بتوع عدم الشفافية
شفافية ايه ماهو طبعا معندناش شفافية ده اساسي..ده موازنات الشركات مضروبة وشركات القطاع العام مش موجودة اساسا تقريبا
وتقارير الحكومة لا تعبر عن اي ارقام حقيقية وطبعا دايما قاعدين ياكلوا لب في المجلس وسايبين التقارير الحقيقية تتحرق بجاز.
وعمرنا ما دخلنا في قايمة اول عشرة في اي حاجة تقريبا الا شرب الشاي بس !
لا وكمان كنا من اول عشر دول اصابة بمرض السكر في احصائية !!!




رقم 12 :

ده بقي رقم مفضل برضه وفضيحة مدوية من اكبر فضايح عهد حسني مبارك
12 مليار جنيه مديون بيهم ماسبيرو حتي صفوت اعترف بكده الومين دول
12 مليار خساير قطاع واحد بس نهش فيه الفساد لحد ما فتت لحمه وعضمه
هو في كده ؟؟..التليفزيون المصري والمبني ده كله اللي شغال خلية نحل ليل نهار عمال يخسر كل يوم بالمليون جنيه في جيوب الباشوات زي انس الفقي وصفوت وغيره اللي خلوه اعلام اصفر وبعدين اعلام احمر كمان .
الاعلام المصري لا يكذب ولكنه يتجمل ..لا هو بيكذب وبينافق ويتجمل في نفس الوقت وتلاقي كل مذيعة عندها اراضي وشاليهات وزفت وكل رئيسة قناة كانها رئيسة مصر فلوس بالعبيط داخلة خارجة في المبني ده والسرقة ملهاش حدود.





رقم 13 :

رقم نحس..بس برضه كان بيعشقه مبارك بيه اصملي عليه..
حب يستخدم الرقم ده في خدمة وطنه مصر فقام عملايه بقي ؟؟ خلي في مصر 13 مليون امي..!
ماشاء الله رقم عالمي مش موجود حتي في موزمبيق..يعني في الدول اللي فيها مجاعات حتي تلاقي الناس متعلمة من المنظمات الدولية اللي بتتبرع بتعليمهم وتطعيمهم انما مصر بكل الامكانيات اللي عندها دي ومع ذلك عندها 13 مليون امي !!
يعني تخيل الرقم ده ..كأن القاهرة بالكامل مثلا مبتعرفش تقرا ..يا نهار ازرق يا حسني
انت عملت في شعبك ايه ؟؟ ده عشان ميسألوش علي حقهم ؟؟ عايز تخليهم اميين ليه يا حسني وكنت تقدر بسهولة تعلمهم كلهم ؟؟
عشان تصنع الفتنة اللي هي نتيجة الجهل ؟؟ عشان توقع المسلمين في المسيحيين ؟؟
رقم 13 نحس زي وشك يا حسني.




رقم 30 :


30سنة حكم ؟؟
في اي شرع واي بلد ده ؟؟ هو نظام ملكي مستبد ولا نظام جمهوري ولا نظام مباركي خالص ؟؟
حد يقعد علي كرسي تلاتين سنة ؟؟ ياراجل ده الواحد بيقعد ع الكنبة ساعتين بيبقي زهق وعايز يتقلب علي جنبه التاني او يقوم يتمشي شوية !
وكمان كنت عايز تورث الحكم ؟ يعني تضرب تلاتين سنة كمان مثلا لحد ما ابنك يعجز ؟؟
ايه الصبر ده بس عادي ما هو مرتبك يعمله عشرين تلاتين مليون في الشعر مثلا يبقي ليك حق مع اني معرفش بتصرفهم في ايه !





رقم 99 :


مرتب الناس في تكنولوجيا المعلومات 99 جنيه في الشهر
يعني المرتب من الاخر كده تكمل عليه جنيه وتجيب كارت شحن ..
زي اعلان الكتروستار ..تلاجة يا عبد الستار من غير اوضة نوم..
اهو يجيب كارت شحن من غير ما يدفع مياه ولا اكل ولا كهربا ولا اي حاجة للبيت هو بس يكلم الناس يشكيلهم غلبه بالكارت !




رقم 500 :


د بقي كان فضيحة الفضايح..الرقم ده ليه ذكريات سيئة مع المصريين في عهد مبارك ..مصر بكل جامعاتها العريقة دي زي جامعة القاهرة متدخلش في قايمة افضل 500 جامعة علي مستوي العالم
ودول بتسبقنا افريقية كمان وطبعا اسرائيل نفخانا في التقييم ده بشكل كبير جدا ..اصل اسرائيب مافيهاش سرقة زي مصر ..تخيل اسرائيلي اشرف يكتير واطهر من حسني مبارك فبيصرف صح علي البلد ويطلع علماء وجامعات علي مستوي مرموق.




رقم الف :

رقم الف في عهد مبارك كان بيمثل اللي بيغرقوا في العبارات وكمان بتوع حوادث الطرق
يعني من اكتر الدول في العالم بيحصل فيها حوادث طرق وبيروح ضحيتها كذا الف في السنة في مصر ومافيش عمود واحد يتركب او طريق يترصف بعد الحادثة حتي !
الطرق عاملها حسني بنظام قشر البيض تقريبا وهو شايف ان الحادثة دايما قضاء وقدر يا اخي..اللهم قوي ايمانك يا شيخ حسني .






رقم مليون :

مليون ده كان اسهل رقم في مصر..يعني كل رجل اعمال اقل واجب خالص لو كان مفلس تلاقي معاه 100 مليون مثلا
وكان اكبر فضيحة في رقم ملايين اما اكتشفوا ان مخالفات العربيات الهيئات الدبلوماسية بس في مصر ملايين الجنيهات ..!!
مجرد مخالفات عربيات عاملة رقم ملايين الجنيهات في مصر ..اهو فساد وفي نفس الوقت شوف مرور مصر العظيم اللي انت تبقي ماشي في المنصورة تلاقي مخالفة عليك في الاسماعيلية !!






مليار :

ده رقم رجال الاعمال..الكود السري لكل رجل اعمال في مصر هو رقم مليار..الحكومة كانت عبارة عن نادي مليارديرات وبيلعبوا قمار علي الشعب المصري..
ناس بتاخد ملاليم في الشهر وناس معاها مليار من قوتهم ورزقهم..
اراضي بمليارات بتتسحب دلوقتي لانها كانت بعقود وهمية وعقود مع الشيطان بمعني اصح ..
كل ما يكشفوا وزير جديد يلاقوا ثروته بالسبعة والتمانية مليار..هو المليار ده كان زي الميت جنيه كده في ايد المواطن العادي ؟؟
يعني لو كل يوم هتشتري عربية جاجوار مش هيخلص طالما بيجيب فايدة ملايين من البنك






يعني حسني كان غاوي ارقام كتير قوي وبيعتز بيها طول فترة حكمه
واهو جاله يوم وبقي رقمه المفضل سبعة
لما الشعب نزله لسابع ارض