التكبر والخطيئة الكبري

اللوحة اللي فوق دي لوحة فنية لرسام شهير اسمها "التكبر"


قعدت قبل كده مع حد "متكبر" او بمعني اصح "جاهل " ؟؟
كتير مننا شاف النوعيات دي من الناس والتكبر والجهل فعلا ايد واحدة ..غالبا ما بتكون شخصية المتكبر خالية من مزايا كتير هو نفسه يملكها فعلا فبيدخل فيما اشبه بالانكار انه لا يملك المزايا دي ويبدأ يفرض علي الناس او يحاول يفرض انه يملكها..
شخصية المتكبر ليها تحليلات كتير جدا في علم النفس ومفرود ليها كتب وصفحات كتير جدا


ولكن الملامح العامة للمتكبر او "المصطنع" للتكبر ده هي :

1- جهل
2-محاولة الهروب من واقعه الي واقع لا يري فيه الا نفسه "حسب كلام العلماء"
3- فرد مساحات كثيرة في وسط الحديث عن نفسه فقط
4- تكرار الفكرة اكثر من مرة لانه عارف انك مش مصدق انه يستاهل هذا التكبر فيحاول يكرر مئات المرات نفس الموضوع عن نفسه
5- ذم الاخرين باستمرار لكي تشعر بمزاياه
6- التحدث عن مغامرات وهمية باستمرار له لمحاولة كسب مساحة علي ارض الخصم "في معظم التحليلات بيشيروا انه بيعامل الاخر كخصم ليه ويحاول الخروج فائزا"
7- بيكون خارج من مرحلة سيئة في حياته الي مرحلة معقولة فيحاول الهروب من الماضي باعطار هالات علي واقعه الحاضر


دي بعض السمات المعروفة عن المتكبر ..وهنا لا نتحدث عن الثقة بالنفس ولكن التكبر او الغطرسة او في العامية المصرية "الأرننة" !



من بعض ما قيل عن الشخصية دي اللي اكيد كل واحد مننا قابلها في حياته في مقولة بتقول (( المغرور كالواقف على الجبل يرى الناس صغارا ويرونه صغيرا ))

فعلا دي حقيقة وان كان الشخص ده بيكون فاكر انه بيكبر في عين الاخرين ولكن ده مبيحصلش بل بالعكس كل ما يتكلم من المنطلق الجاهل بتاعه بيزيد صغر في عيون الناس


والتكبر شئ سئ في كل الاديان السماوية وحتي البوذية وبعض العقائد الاخري.
فمثلا في الدين الاسلامي : قال رسول عليه الصلاة والسلام ( قال الله تعالى العز إزاري والكبرياء ردائي فمن ينازعني في واحد منهما فقد عذبته )
قال صلى الله عليه وسلم (لا يتكبر أحدكم إلا من ذلة يجدها في نفسه)

وايضا هناك في العهد القديم في سفر الامثال اصحاح 6 :

"هذه الستة يبغضها الرب
وسبعة هي مكرهة نفسه :
عيون متعالية..لسان كاذب..أيد سافكة دما بريئا..قلب ينشئ فافكارا رديئة..ارجل سريعة الجريان الي السوء..شاهد زور يفوه بالاكاذيب..وزارع خصومات بين اخوة.."

لاحظ ان اول حاجة اتقالت "عيون متعالية".




اما بقي بعض الفلاسفة زي ارسطو ازاي شافوا الموضوع ده ؟
ارسطو كان ليه نظرية جميلة جدا بتقول ان الانسان عايز يوصل دايما للسعادة وشاف ان السعادة في الفضائل والفضائل في الوسطية وسموها الوسط الذهبي "قراءات عن ارسطو علي الانترنت"
يعني حالة وسط بين كل حالتين ..ازاي ؟

قالك الكرم مثلا بين الاسراف والبخل..واما جه يجيب سيرة الثقة بالنفس قال انها وسط بين الغرور والمسكنة !
يعني شاف ان السعادة انك تكون وسطي بين الغرور والمسكنة لان الغرور جالب للتعاسة في النهاية.



وفي مقولة شهير جدا عن التواضع بتقول


Avoid putting yourself before others and you can become a
leader among men
LAO-TZU




وزي ما ممكن تشوفوا في موسوعة ويكيبديا ان تاريخ التكبر كبير جدا يعني كان بيرمز ليه في الكتب السماوية ب "عاهرة بابل" وقديما جدا عرف عن التكبر انه كان بيترمز ليه ب "الطاووس".

وفي فيلم زي فيلم
devil's advocate


كان في مقولة شهيرة للشيطان انه بيقول
vanity is his favourite sin"


وطبعا دي اجمل جملة يحبها الشيطان لان من صفاته الرئيسية التكبر والاستكبار من بداية حياته زي ما بتقول الاية الكريمة :

""وإذ قلنا للملائكة اسجدوا لآدم فسجدوا إلا إبليس أبى واستكبر وكان من الكافرين""



فيلم كمان اتكلم عن خطيئة الزهو او الاحساس بالتفرد مثلا او الكبرياء
pride

هو فيلم
seven
الشهير بطولة براد بيت ومورجان فريمان وهو من اشهر الافلام اللي اتكلمت عن الخطايا السبعة.


والخطايا السبعة دي حسب اسمها الاصلي اللي متقسمه بيه

seven deadly sins



وكان "بيتر بينسفيلد" في قرون ماضية قسم الشياطين انواع حسب نوع كل خطيئة من الخطايا السبعة وحط اسم "لوسيفير" لخطيئة التكبر والاحساس الزائد بالنفس.


وفي "جحيم دانتي" كان بيخلي التائبين يمشوا شايلين حجارة عشان يحسوا بالاهانة ويتواضعوا وطبعا دانتي ياما اتكلم عن خطيئة التكبر في "الكوميديا الالهية" الرائعة اللي كتبها

وقصة شهيرة قوي لجورج واشنطن انه كان بيحرج اما حد بينادي في بداية الاجتماع ويتقال عنه "سيادة الرئيس" لدرجة انه كان بيروح بدري عشان مينادوش عليه وهو داخل باللقب ده !! ودي طبعا اولي صفات القيادة والحكمة هي التواضع.



دي بعض الادلة علي ان التكبر او الكلام عن النفس الزائد عن اللزوم شئ مقزز سواء دينيا او اجتماعيا منذ قديم الازل وهي شخصيات بتكون منبوذة جدا لانه بيشوف نفسه محور الكون غالبا حتي مع عدم اهتمام الاخرين تماما
ولكن جهله بيهيأ ليه اكتر من كده طبعا بل ان الاشخاص دي حسب ما صورت بعض الاساطير قديما انه بينام وبيحلم بنفسه كمان عشان محدش يشاكه في الحلم !!
ربنا يحمي الجميع من هذه الافة المجتمعية القذرة ويبعدكم عن سكة هؤلاء الاشخاص اللي بيضيعوا نفسهم بامتلاكهم لهذه الافة .