الحرق بالجاز في ليالي الجواز..الجزء العشرون..بيان الزوج للفيس بوك

زوج غيور قوي ..شاف مراته ع الفيس بوك وكان لازم يقدم ليها الورقة دي اللي فيها الوصايا بتاعة الفيس بوك من زوج غيور الي زوجة فيسبكاوية :



"ايتها الزوجة العزيزة..نظرا لما يمر به الفيس بوك والبلاد من تغيرات جذرية ..فقد قررت الاتي ..بيان رقم واحد :



أولا : ممنوع الشات الا مع اقارب الدرجة الاولي الي التالتة وتقسمي الاصدقاء الي مجموعات هي "اقارب" "اغراب" "اغراب قوي" "معرفهمش اساسا" "مين دول"
علي انك تكلمي بس المجموعة الاولي اللي هي "اقارب"


ثانيا : اذا عملك "بوك" اوعي تردي عليه البوك الا لو بنت لانه كده زغزغك وانتي قبلتي الزغزغة وقولتي "هئ هئ" وانا مراتي متتزغزغش من راجل غريب


ثالثا : التعليق علي الصورة لو قال "ايه الحلاوة دي" او "ايه الجمال ده" يتمسح فورا ويتعمله بلوك وياريت الصور تبقي متغطية فيها تماما ومش باين غير اللي حواليكي زي برنامج "خلف الاسوار"


رابعا : سأشرف اشراف كامل زي الاشراف القضائي علي الانتخابات علي جميع الكومنتات في صفحتك ويتم فلترتها حسب الطلب


خامسا: اللايك يكون بحساب ومتعمليش لايك لاي حاجة لازم يكون فيها مثلا "اطفال" او "اغنية وطنية" وميتعملش لايك ابدا لاغاني نجم الجيل


سادسا : لا تختلي ابدا بصديقك في "المزرعة" حتي لو طلب منك الانضمام تبقي جارته في المزرعة او حتي لقي البقرة بتاعتك او الخروف او حتي عرض عليكي زراعة الفراولة لا تسمحي بده لان الحكاية هتبدأ بجيرة في المزرعة وبعدين يا عالم هتوصل لفين


سابعا : اقعدي في صفحتك وفي "وولك" واقفلي عليكي بابك ومتخرجيش برة تشوفي وولات الناس ..من خرج من ووله اتقل مقداره


ثامنا : الاستيتس تكون متفلترة للبنات بس مش لكل اللي ع الوول الا لو كانت لها غرض ديني او سياسي فافتحيها للجميع ..يعني "حجبي" الاستيتس بتاعك


تاسعا : دايما اما تخشي اللينك او الاستيتس بتاعة واحد غريب خدي معاكي "محرم" انا مثلا او اخوكي لو انا مش موجود ..وسبيه هو يعلق الاول وانتي وراه لان الخلوة في الاستيتس والفيديو مش حلوة


عاشرا : في البروفايل بتاعك حاولي تكتبي اسرتك كاملة وتحطي بروفايلاتهم عشان اللي عايز يعاكس يحس ان ليكي سند في الفيس بوك وليكي ضهر ووراكي رجالة


حادي عشر : اما تحطي صورة البروفايل حاولي تنقي اوحش صورك او تشوفي صورة ليكي وانتي حولة او ياريت تحطي صورة كارتون احسن زي معظم البنات بيحطوا كارتون مش عارف ليه


ثاني عشر : ممنوع تماما المنافسة في الالعاب علي تكسير الهاي سكور بتاعي بالذات لان هيبقي منظري وحش وماليش كلمة قدام مراتي وهي بتكسر الهاي سكور بتاعي كل يوم


ثالث عشر : ممنوع فتح الوول لوضع الاعلانات والكومنتات من الاغراب ولا حد يعملك تاج الا البنات صاحباتك.. لان التاج من الولد كأنه بيحط ايده علي كفتك .


رابع عشر : لازم تشيلي جميع الحاجات اللي هي فيها اسئلة عنك زي مثلا "هل هي سعيدة" والحاجات دي لان هو لو جاوبها يبقي عارف كل حاجة عنك وهو لو يعرف كل حاجة عنك يبقي انا البس جيبة بقي.


خامس عشر : عدد الاصدقاء لا يزيد عن 40 علي الا يقل عدد الاقارب فيهم عن عشرين


سادس عشر : دايما حطي صورك وانتي صغيرة وممنوع الصور وانتي كبيرة ومبقلظة


سابع عشر : ممنوع تماما الدخول علي وولات اصحابي انا بالذات لاما هادخل عند صحباتك كلهم وهاضيفهم كلهم


ثامن عشر : بالنسبة للولاد اللي هتضيفيهم فالافضل يكونوا سلفيين او اخوان او ليهم انتماءات سياسية ومنكوش شعرهم مش شباب جاي يظبط يعني


تاسع عشر : اي "دعوة" تيجي ليكي لحضور حاجة معينة من اي ولد ارفضيها لان كده بكرة يدعوكي ع العشا ويعمل "ايفنت" خاص !


عشرون : ممنوع مصاحبة البنات اللي كاتبة
"it's complicated"
او
"in relationship"



واحد وعشرون : كل اسبوع حطي صورة البروفايل بتاعتك صورة دينية ده بيردع الناس اللي ليها اهواء خاصة وبيثبتهم وتكون الصورة "مانع للتظبيط" او زي "الصاعق الكهربائي" للي بيعاكسوا


ثاني وعشرون : ممنوع الدخول ع الفيس بوك وانا مسافر لفترة وتكلميني ع الماسنجر بس وبلاش شات الفيس بوك


ثالث وعشرون : ياريت تلمعي صورتي كزوج يعني وتهديلي اغنية رومانسية كل فترة كده او تقولي اني زوج فاجر وكده


رابع وعشرون : ممنوع الدخول ع الفيس بوك بعد الساعة 12 بليل لان بيبقي اكنك ماشية في الشارع الساعة 12 لوحدك او دخلتي في حتة مقطوعة


خامس وعشرون : ممنوع الاشتراك في اي صفحة او جروب الا باذن رسمي مني حسب نوعية الصفحة والتأكد من الاحترام فيها مني





"واي مخالفة للتعليمات سيتم حرمانك من الفيس لفترة شهر والله الموفق "