الفصول المدرسية..هو كله ضرب مافيش شتيمة ؟؟

التعليم في مصر خازوق موجه من مدفع اربيجيه نحو جيل كامل..
أساليب التعذيب فيه كتير جدا بصرف النظر عن تعذيب العيلة كلها في امتحانات الثانوي..وترجيع الطلبة في وسط الامتحان من خوفهم لحسن ربع في المية يضيع مستقبلهم
انما العذاب بقي جوه الفصول نفسه ليه اشكال والوان لا تعد بيخترع المدرسين كل يوم اسلوب جديد تعالوا نستعرض اهم اساليب الجوانتنامو المصري جوة الفصول :



1- سن المسطرة :

اسلوب قريشي متين تفرد صوابعك لقدام بشكل مستقيم وهي طبعا بتترعش من خوفك من التعذيب وينهال عليها المدرس بسن المسطرة علي ضهر ايديك لحد ما تعلم في ايديك او صوابعك تجيب دم غالبا
دي بتكون في احقر مدارس غالبا وبيكون المدرس مقهور ومتعذب عذاب السنين



2- الخرطوم السحري:

في نوعين من الخراطيم في المدراس المصرية خرطوم في الحوش بيرش الارض وخرطوم سحري جوة الفصل بيكون محشي بخرطوم تاني وغالبا بيضرب بيه المدرس علي جنب الطالب او رجله اما يكون مش عايز يفتح ايده عشان ينضرب بالعصايا
يعني هو بيهددك بالعصاية فانت بتتاخر في مد ايدك فيضربك علي رجلك بالخرطوم لحد ما تفتح ايدك يعني المدرس بيكون عامل زي ابرهة داخل علينا بالفيل بتاعه



3- شارك ولو بضربة :

المدرس هنا بيقوم بدور الرقيب يعني يخلي كل طالب يدي زميله اللي جنبه علطول بالقلم او بالقفا غالبا عشان هو المدرس بيكون عامل زي صلاح نصر او الممثل محمود عبدالغني في فيلم احنا بتوع الاتوبيس بيستمتع بالتعذيب اللي هو شايفه قدامه ان كل واحد بيضرب زميله عشان الفصل مش حافظ المنهج كويس



4- الخرزانة اللولبية :

بيكون في خرزانة معينة بيجيبها طالب معين في الفصل ويلزقها بكل انواع اللزق عشان تلسع صح والطالب اللي بيتبرع ويجيب الخرزانة دي بيكون هو معفي من الضرب يعني رشوة واضحة عشان عمل الخرزانة وصرف فيها بتاع عشرين تلاتين جنيه فالمدرس بيعتبر ده نشاط ويزوده في اعمال السنة !!!
يزوده في الدرجات عشان ساهم في نفخ زمايله الطلبة ونعم الروح والمشاركة ههههه



5- الشتيمة :

دي اقل اساليب التعذيب رغم انها كلها اهناة لكن الطالب بقي جبلة خلاص او زي ما بيقولوا جتته نحست فالشتيمة اكيد مش هتجيب اي نتيجة يعني هو بيتمني الشتيمة اساسا من زمان ويقول للمدرس "هو كله ضرب ضرب مافيش شتيمة" ؟
وبيحاول المدرس القاء كل انواع الشتايم في الحصة لحد ما الجرس بيضرب وبتتمثل قدامه صورة مراته في البيت في كل طالب فبيشتم بضمير يعني .




6- التمليص :

وده سبب كبير ان ناس كتير في الشعب المصري ودانها طويلة شوية من كتر التمليص وهم صغيرين ..بييجي المدرس جنبك كده واول ما تغلط يملص ودانك ويشدها لفوق وانت بتطلع فوق معاها وكأنه تمرين رياضي والمدرس يضحك ضحكة الافلام الشريرة وهو شايفك في قمة الالم



7- المد :


ده بقي بيسبقه مرحلة "العبط" يعني لازم واحد يقوم "يعبطك" عشان المدرس يعرف يمدك علي رجليك صح ولازم تلسع زي عذاب الافلام الهندي اما بيشموا واحد علي قزاز مكسر لحد ما يصوت برضه المدرس لازم يسمع صريخك عشان يتطمن انه قام بدوره صح
امال يعني هو ليه اسمه "مربي الاجيال" ..؟؟ ما هو عشان لازم يربيهم ويهريهم كمان..!



8- المنع :

ده بقي ممكن يجيلك مدرس رخم قوي يعمل عليك حظر تجول يعني يمنعك من كل حاجة ويعتبر كل حاجة تمثيل منك
يعني لو عايز تدخل الحمام مش هيسمحلك لانه فاهم انك بتمثل عليه طبعا
وغالبا في المدارس المعفنة اللي فيها اساليب الضرب دي كلها مبيقولوش "عايز ادخل الحمام" ولكن للاسف بيقولوا اللفظ الشهير "انا عايز اتصير يا استاذ" !!!
او ممكن "ممكن افك ميا يا استاذ؟ " ..والفاظ من هذا القبيل طبعا
امال هي مدرسة فيها التعذيب ده ليه ماهو عشان هي مدرسة بنت ستين ..





9- النغز :

ده بيكون وانت واقف وبتسمع وعشان يستعمل معاك اسلوب يخليك تقول اللي عندك بسرعة رهيبة وتنجز ورا كل كلمة "بينغزك"
او يديك بالبوكس في صدرك كل ما تقف في وسط الكلام عشان تطلع تلميذ نجيب قوي يعني !
لازم تسمع كل حاجة قصة او تاريخ او حتي جغرافيا ده انت تسمع الخريطة حتي وتقول البلد دي فين من غير ما تشوفها حتي ولو وقفت تاخد بوكس هديةز




10- التشريفة :

دي بقي في السجون موجودة وهي مرحلة استقبال للمسجون بالضرب بالقفا من كل فرد واقف يعني المحصلة بتطلع متين قفا كده ع السريع يعني
انما في المدرسة مش كده هو المدرس بيناديك وانت قاعد ورا ويقول للعيال "يلا يا رجالة"..يقوم العيال عارفين دورهم وطول ما الطالب ده ماشي يدوله بالقفا
يعني كل ما يعدي ما بين دكة ودكة ياخد قفا او اتنين لحد ما يوصل للمدرس يكون هلكان ع الاخر فالمدرس يكمل عليه ويديله القاضية الصح بقي.




11- عقاب العمل التطوعي :

بيطلب منك المدرس لوحة للفصل ولو انت قلت هاجيبها يبقي هتجيبها اما لو مجيبتهاش فجزائك هيبقي جزاء شديد اوي وهتشوف الامرين فعلا
يعني رغم انه عمل تطوعي بس انت كده كأنك ضحكت ع المدرس ده فهو هيردلك جزاء الاهانة دي كانك في سجن فيدرالي امريكي ومش بعيد تنضف الحمام !!




12- الدق ع العضم :

واحد هيقول ايه يا عم هو احنا في فيلم حرب طروادة ؟؟ولا المدرس ده "فامبير" مثلا ؟؟
اقوله لا يا سيدي انا قصدي عضم الصوابع
يعني بتقلب ايدك وهو بيجيب مسطرة خشب طويلة قوي ..اطول من اصابع الاستاذ ايمن اللي كانت صوابعه بتسبقه للفصل !!!
ويبدأ يديك علي العضم اللي في صوابعك بدقة متناهية وساعات الطلبة بتجيب دم من المناطق المحيطة بمنطقة الضرب .






هااا؟ أكمل ولا كفاية جوانتنامو لحد كده ؟؟
طبع بعض الناس في المدارس الخاصة هيقول هو في كده ؟؟
لا في اكتر من كده في المدارس الافقر والاقل مستوي من دي كمان ..الواحد سمع قصص تشيب في بعض المدارس
بس كفاية لحسن الاستاذ ايمن انا حاسس انه هيخش عليا حالا يضربني بصوابعه ..لان صوابعه نفسها كانت عقاب ايام المدرسة ..!