المصــري سوبر مــان

كلنا فخورين اننا مصريين..بس الفكرة اللي كان زارعها فينا حسني مبارك المبالغ فيها دي لازم نشيلها من حياتنا دلوقتي..فكرة ايه ؟؟..فكرة ان المصري دايما احسن انسان في العالم اجمع !!
ليك الحق انك تفخر بمصريتك وكل حاجة ولكن عشان نبدأ صح ونوصل بجد اننا نكون احسن ناس في العالم لازم نعمل لده مش بالكلام يعني زي ما حسني كان مصورلنا الدنيا..
وانا احب اقول لكل مصري حاجات مهمة قوي عشان تشجعه مش عشان تثبطه لكن لازم كلنا نعرف الحقيقة :




أولا : انت مش حلم العالم :

دايما المصري رايح دولة اوروبية فاكر ان هو حلم العالم وان كل الناس ملهوفة عشان تكلمه عشان هو مصري ومن الفراعنة بقي وكده ..ده علي اساس انه لسه بيكتب علي البرديات القديمة !
وانه اول ما ينزل من المطار هيلاقي الدنيا كلها بتجري وراه زي احمد عز في مسلسل الادهم كده اما اوحالنا ان اي مصري ينزل اوكرانيا يبقي هو زعيم المخدرات هناك وكأن مافيش جنسيات تانية في العالم او ان المصري جامد في تجارة المخدرات علي مستوي العالم مثلا !
وده مش معناه ان المصري وحش مثلا لا هو معناه انه زيه زي اي جنسية فيه الوحش وفيه الحلو بلاش فكرة الانسان الخارق المصري اللي زرعها فينا حسني عشان ننشغل عن المهم.




ثانيا : لا يا عم انت مش فحل :

بعض السذج بيتكلم عن الاجانب علي اساس انهم "دمي جنسية" ويقولك "سمعت يلا ان المصري هو الاقوي جنسيا بيقولك الاجانب بيحلموا بينا وهو نايمين " !!!
مش عارف منين الاعتقاد ده رغم اننا عندنا كمية عجز وضعف جنسي رهيييبة من الاكل المهبب اللي بناكله ساعات ولاسباب اخري علي العكس بقي الاجانب عندهم تجارة البورنو مزدهرة ومش محتاجين ايد مصرية تساعد !!




ثالثا : عندك محمد سعد عندهم جيم كاري :

يقولك المصري اخف دم في العالم ..برضه معرفش الاحصائيات دي بتطلع منين داهية بالظبط..الغرب عندهم كل سنة كميات تمثيليات وافلام كوميدية لا تعد ولا تحصي واحنا يادوب نطلع فيلمين كوميدين بالعافية وبطلوع الروح بالاضافة لكمية برامج المقالب والبرامج الترفيهية اللي هي اضعاف مضاعفة ولا مجال للمقارنة .
ولا عشان نانسي عجرم غنت للمصري يعني في النقطة دي بقينا خلاص ..امال جيم كاري بيعمل ايه ؟؟ هو مصري ولا ايه ؟؟ والاستاند اب كوميدي في المسارح عندهم برة من كام سنة ؟؟ واحنا لسه يدوب بنحبو وبنقلدهم دلوقتي .
المصري لذيذ وكل حاجة بالنسبة لبعض الدول ولكن ياريت عدم احتلال المركز الاول في العالم دايما بدون سبب .




رابعا : منتخبك محدش بيحفي عليه :


بعد ما ناخد بطولة افريقية يجي اتحاد الكورة يوهمنا بقي ان منتخبنا العالم بيحفي عليه وكله لسانه مدلدل عشان يلاعب مصر ويقعد يطلع في عروض وهمية يتضح انها مش حقيقية والدول دي معرضتش اللعب معانا ..يعني زي ما منتخب مصر عظيم في برضه منتخبات اعظم يعني مصر مش البرازيل ولا من اعظم عظماء الكرة في العالم عشان تبقي حلم الدول كلها مجرد اللعب معاها ..اتحاد الكورة كالعادة بيعملنا م البحر طحينة .




خامسا : ولا المهن دي كمان :

يقولك الطبيب المصري او المدرس المصري وبعض المهن برضه هم الامهر في العالم ..قعدت ادور علي الحقيقة دي باي احصائيات واي ارقام لقيتها خرافة كالعادة..!
من وسط اعظم الف طبيب علي مستوي العالم شوف في كام مصري ! اصل يعني المنهج هنا مش عبقري عن امريكا واوروبا عشان دايما نقول ان الطب المصري الاعظم رغم ان اصلا الطبيب المصري بيطلع يتزود بالعلم الاوروبي ويرجع عشان يبقي دكتور عظيم !! وكمان المدرسين وكان كليات التربية هنا تعليمها مثلا مريخي مختلف عن دول العالم فبنطلع مدرسين من عالم اخر
ولا اي مهنة.احنا عايزين فعلا نكون رقم واحد وعشان كده لازم نتخلي عن الخزعبلات دي ونبدأ فعلا نسعي للهدف ده




سادسا : حكمة السيد الرئيس :

دايما بنفس الاساليب اللي فاتت دي بنتكلم عن حكمة السيد الرئيس وكأنه لابس جلابية وعامل نفسه غاندي الجديد بروح امه .
مش عارف ليه دايما حكمة السيد الرئيس هي اللي هتحل مشاكل فلسطين وهتحل كل مشاكل العالم وان يعني الرئيس الامريكي شايف ان دايما حكمة السيد الرئيس هي اللي هتخلي الشرق الاوسط اعظم منطقة في العالم !
اهو قعد يضحك علينا بحكمته كده طوال السنين عشان يسرق مليارات عم الحكيم ده بحكمته وذكائه ..حكيم ولا حرامي ؟؟؟ ولا هو حكيم ولا سعد الصغير حتي .
انما وهم موجود برضه زي الاوهام اللي فاتت كده





سابعا : الاجانب مبهورين بمصر :

ايوه طبعا لازم ينبهوروا وكل حاجة ده احنا عندنا معظم اثار العالم..بس هم برضه بينبهروا بفرنسا وايطاليا ودول افريقية تانية ..يعني لو كان الموضوع كده كنت شوفت عندنا اكبر عدد سياح في العالم ودي مش حقيقة طبعا..
مصر جنة من جنات الارض بس مش هي الجنة الوحيدة ..يعني الاجنبي بينبهر جدا بلبنان وتونس الخضراء ودول كتير عربية والمغرب كمان ودول كتير حول العالم..
انما حسني كان زارعلنا فكرة ان الغرب كله ماشي فاتح بقه من مصر بس لانها احسن دولة في العالم..
احنا نفسنا نكون كده فعلا بس مش بالكلام يا عم حسني مش كفاية الاثار اللي سوزي كانت بتسرقها !!





ثامنا : الست المصرية اعظم زوجة :

ليه يا سيدي ؟..بتعمل ايه يعني ؟؟ بتمشي ع الحيطة ؟؟ طيب ما هو سوريا بتقول نفس الكلام ان الزوجة السورية هي الاعظم وتونس بتقول نفس الكلام وتلاقي دول اوروبية كتير بتقول نفس الكلام..كل بلد عندها "اساطيرها وخرافتها الخاصة" اللي مش مبنية علي اي حقايق..!
الست المصرية عظيمة علي عيني وراسي انما ليه اعظم زوجة في العالم ؟؟ مالها الصينية او اليابانية ؟؟ ست بيت بريمو ومبتتكسرش !
ولا عشان محشي ورق العنب عندنا يعني ؟ طيب ما هم عندهم في اليابان بياكلوا بشوكتين رفيعتين كده وحاجة في قمة الدقة وبيطبخوا ضفادع كمان يعني ستات نفسها حلو في الاكل..
ولا عشان احنا عندنا شهقة الملوخية يعني ؟؟ طيب ما هو اكيد فيه شهقة اوروبية برضه !




تاسعا : المصري والظروف :

دايما يقولك المصري لو اتوفرتلهالظروف المناسبة هيكون الاعظم..
تاني رجعنا لكلمة الاعظم..انا شايف ان اي حد هتتوفرله الظروف المناسبة القوية هيكون عظيم مش شرط مصري ممكن سوداني او فرنسي او اي جنسية ..المناخ الجيد بيخلق اشخاص جيدين..
انما ليه كلمة الاعظم في كل حاجة ؟؟ يا جماعة مصر ام الدنيا ..لبنان بتقول انها ست الدنيا..وفيه اقارب كتير للدنيا يعني غير مصر..
عارف ان 7000 سنة حضارة محدش في العالم كله يقدر ينكر ..لكنانا بتكلم عن الحاضر احنا عايزين نرجع الحضارة دي بقي تاني مش بالكلام برضه.





عاشرا : اسطورة الطرب المصري :

مش عارف ليه مصورين ان ام كلثوم وعبد الحليم كل الغرب عارفهم..علي فكرة ملايين ميعرفهومش لان الناس دي برضه عندهم طرب قديم جداااا واقدم من كده بزمان ..!
فهم يعني مش من قلة المطربين اللي عندهم اللي بالالوف هيروحوا يسمعوا ام كلثوم بس وهينبهروا..ماهو فيه عندهم كتير مطربين مبهرين قديم وجديد..
بيقولوا ام كلثوم صوتها قوي ايوه ما هو سيلين ديون حاليا صوتها قوي برضه وغيرها بالمئات مش هي بالذات يعني..
لاحظ ان العرب دايما هم اللي بيشتروا اسطوانات اجنبية مش العكس !




الموضوع وما فيه ان الاوهام دي زرعها فينا حسني علي مر العصور من كتر الاغاني المصرية الي بتتعمل ان المصري هو الاعظم في كل حاجة..
المصري انسان عظيم بس نفسنا نشوفه الاعظم فعلا نفسنا نعمل حتي عربية زي الصين او نعمل نقلة زي نمور اسيا او نعمل اي حاجة انما مش هنقعد نغني عن عظمة المصري طول اليوم !
المصري لازم يسعي للعظمة مش يقعد يتكلم ويحكي عنها ..ولا ايه يا عمو حسني ؟؟ ياللي اخترناه اخترناه وحنا معاه ما شاء الله..مين دول اللي اختروك يا عم ؟؟ اهو ده في حد ذاته اكبر وهم !