رد الجميل للفسيخ المصري في شم النسيم

ادي الربيع عاد من تاني علي راي الاغنية والنهاردة شم النسيم اللي مختلف تماما عن اي شم نسيم فات علينا قبل كده..السنة دي شم النسيم من غير ريحة "زفارة سياسية" ..
الفسيخ مصري مية في المية الواحد كان في عصر النظام السابق كان يشك ان حتي الفسيخ مش بعيد يكون اسرائيلي عميل ..!
شم النسيم السنة دي من خارج "المطبخ السياسي" ..الهوا ريحته انضف بكتير بالفسيخ من ريحة الهوا العادي في ايام النظام ..لان ريحة الفساد كانت تعمي .
وفي كل شم نسيم وكالعادة هيطلع نفس الحاجات اياها بتاعة كل سنة :


1- هتطلع وزارة الصحة تقول مسكنا مش عارف كام طن فسيخ فاسد السنة دي وتحذر وتقول لو حصلك تسمم كل كذا واشرب كذا بسرعة وتحسس الناس ان الفسيخ دائما به سم قاتل..
انا معاكم ان في فسيخ فعلا فاسد وكتير منه فاسد بس ريحوا بالكوا مافيش حد هيبطل !
ادمان الفسيخ يوم شم النسيم مش هيبطله ولا جرنان ولا مقالة ولا حتي لو مسكتوا عشرين طن فسيخ مسموم الا بقي لو عملتوا زي السجاير وحطيتوا صورة واحد ميت مثلا فوق ورق الفسيخ وتكتبوا انه ضار جدا بالصحة وبرضه الناس هتاكلوا ماهم بيشربوا السجاير حتي لو حطيتولهم صورة واحد مات عشرين مرة قبل كده !



2- دايما في المناسبات دي بيطلع عمرو اديب بيحاول يطلع فايدة للفسيخ ويقولك حتي لو مالوش فايدة كفاية "السعادة" اللي بيديهالنا الفسيخ كل سنة في اليوم ده اللي هتعوضنا عن الضرر بتاعه لو كان ليه ضرر
عمرو اديب مدمن اكل بدرجة قدير جدا كرشه ياخد اربع نجمات من خمسة في تقييم الكروش العالمي ..
لكن ايوه يا عمرو الفسيخ اكيد ليه اضرار وكفاية الملح اللي فيه .



3- احساس غريب قوي للفراخ في اليوم ده لو واحد قدام مزرعة فراخ عمال يلون البيض ..!
طبعا الفراخ بتقول "البشر اتهبلوا يا جدعان..بياخدوا بيضنا يلونوه وبعدين ياكلوه..قمة التعذيب والتمثيل بالجثة " !!!



4- بالنسبة للنظام اللي محبوس في طرة كان بياكل ايه في يوم زي ده ؟؟ اكيد مش فسيخ زي الشعب ..تلاقيهم كانوا بيشاركوا الشعب باكل حاجة شبه الفسيخ فبيجيبوا كمية من الكافيار وياكلوه بعيش بلدي ابو شلن !
واهو نوع من المشاركة برضه يعني واهو الكافيار ميفرقش قوي عن تمن الفسيخ بالنسبة للعالم دي دي شوية فكة يعني .



5- عشان مبنحبش المنظر يبقي كامل كشعب مصري فالناس بتروح بدل ما تشم الورد في الجناين ده لو كان في ورد اساسا اللي هو من غير ريحة ده المصري
بياكلوا الفسيخ جنب الورد عدل فلو واحد رايح يستمتع في اليوم ده بشكل عاطفي بقي وبتاع جنب الورود للاسف مش هيشم غير فسيخ ومش هيشوف غير زبالة ع الارض
الجناين في اليوم ده المفروض تقفل اصلا او يمنعوا الناس تدخل بمأكولات زي ما العالم بيعمل حفاظا علي الجنينة يعني واحتراما لادمية الناس واحتراما للزهور وعبيرها حتي يا اخي او احتراما للربيع .




6- طبعا هيطلع بعض الناس من انصار الموضوع كله حرام في حرام واللي هيعمل كده هيروح في داهية وبتاع وده بيحصل كل سنة .
كأن الفسيخ هو الشيطان بعينه وهو اللي هيرميهم في النار يعني ..يا جماعة هي مجرد عادة مش اكتر ولا الناس بتعملها لغرض ديني مثلا ولا حاجة ومحدش بيعبد الفسيخ عموما محدش يقلق
ومافيش حتي ايام الفراعنة اله الفسيخ او اله البصل دي مجرد عادة في يوم جميل مشرق مش اكتر فمش معقول كل سنة يقولوا ويوصلوا الموضوع لدرجة "الكفر" !!!



7- هيطلع "حزب الرنجة" يقولك ياااي انا بكره الفسيخ وريحته ايه القراف ده ازاي تاكلوا الحاجات دي وبتاع ...
علي اساس ان الرنجة مثلا عليها كريم كراميل مع انها مش فارقة حاجة عن الفسيخ ..بل الفسيخ اغلي منها كمان !



8- في بعض القري بيطلع بعض الشباب من الارياف تلاقيه حتي في اليوم ده بيعمل زي اعيد الكبير ويلبس طرطور ويركب حصان !
مش عارف ايه حكاية الحصان في كل عيد او مناسبة لكن انا بسميه "بيتش باجي الغلابة"..!
هو فعلا بالنسبة للغلابة زي البيتش باجي للاغنيا في مارينا ودايما اللي بيركب الحصان بيلبس طرطور مش عارف ايه الحكمة يمكن كان في غزوة ليها علاقة بالطرطور او حاجة زي موقعة الجمل كده بتاعة الثورة !



9- كان المفروض يطلع الجمعة الجاية بمناسبة شم النسيم "جمعة الفسيخ" واهو يوم من المشاركة الشعبية في الاحتفال وفي نفس الوقت عشان بقالنا كتير مسمعناش عن جمعة ولا مناسبة لعقد جمعة في التحرير فممكن نعملها "جمعة رد الجميل للفسيخ" !



10- كل شم نسيم بييجي نفس الافلام خصوصا فيلم "الدنيا ربيع" بتاع سعاد حسني بس انا عايز اوجه نظر المسئولين لحاجة ان الفيلم ده مش قايمة قصته علي موضوع الربيع يعني دي مجرد اغنية !
ده فيلم عادي وليه قصة وابطال وكل حاجة مش اوبريت عن الربيع يعني
يعني هو مش نفس وجه الشبه اما تجيب فيلم "واسلاماه" في سنة هجرية جديدة..لان فيلم واسلاماه ليه علاقة مباشرة انما فيلم سعاد حسني ده ملوش اي علاقة الا بحتة اغنية في النص فمش معقول الفيلم ميجيش الا في اليوم ده وبس ومبيجيش اصلا طول السنة !





وربيع جديد عليكي يا مصر وريحة ورد وفل علي كل مصري
وريحة حرية ويوم جديد بلون الحب ولون البنفسج يصبح علي ولادك يا بلدي .