اليومين دول وبعد الثورة زي قبلها بالنسبة لغباء الاعلانات بتاعة النغمات وغيرها يعني من بعد "شاي سعيد حساسين" وهو بالمناسبة اعلان لممدوح فرج عن شاي تخسيس وهو اغبي اعلان في المجرة كلها الا اذا كان في اعلان مريخي غبي زيه او كان عندهم في زحل ممدوح فرج برضه !!
الهبل زاد بجد بقي وعرفت معني كلمة "الهبل في الجبل" اليومين دول بالذات اما يعمل اعلان عن انك تنزل نغمة بتاعة بياع الفول وبتقول النغمة "المدمممممس " ..
طيب ليه هحط علي الموبايل نغمة صوت بياع الفول ؟؟ للدرجة دي حد بيعشق الفول وبياعه فعلا ؟؟ وهل اللي بيعشق الفول لدرجة الجنون ده هيحط النغمة كمان فول ع الموبايل؟؟ طب منظره ايه قدام الناس اما الموبايل يرن ؟ ايه تبريره يعني للنغمة دي ؟؟
ونغمة تانية في نفس الاعلان عن بياع الكشري واحدة تالتة عن بيع العرقسوس..ده علي اساس اني هحط الموبايل لفوق واصب منه يعني زي بياع العرقسوس ماهو هبل بقي ..امال اللي هينزل النغمة دي ويدفع فيها فلوس هيكون ايه يعني ..يا اهبل يا اهبل !!
واللي طالعلنا في البخت فعلا بقي موضوع "كلمني وهارد عليك انا بنفسي" ..ايه موضوع "انا بنفسي " دي ؟؟ هو انت يعني محمد حماقي ؟؟ ده انت عبدون بتاع المحور ايه الشئ الرهيب يعني اما ترد عليا انت بنفسك ؟ ومين قالك انك هتحل مشكلتي اساسا ؟؟
يعني انا لو عندي مشكلة اروح لسماح انور لو محلتهاش افوت علي رجاء الجداوي ولو محلتهاش اشوف بقي عبدون !! ايه اللفة بنت ال..دي ؟؟
ويطلعلك خط جديد اليومين دول اسمه "جوزني شكرا" ..الجواز بقي بجنيه ونص للدقيقة وتعالي بص !
وكل عروسة ليها كود معين ورقم المنتج او علي ضهرها "بار كود" وطبعا بعد الجواز هيبعتولك رسالة "تم انجاز المهمة بنجاح"..يعني كانك بتشتري عسلية مثلا او طبق رز بلبن !
هو الخط المهم اليومين دول نظرا لكثرة الخلافات الزوجية لو يعملوا "طلقني شكرا" ويجيبوا صف محاميين خلع يردوا عليك بنفسهم برضه !!
وأسوأ حاجة بقي الخطوط النصابة اللي علي حق يعني بتاعة "اعرف حظك من رقمك" والكلام الهجص ده واللي يضايق قوي انها بتستمر يعني معني كده ان في الوف بيتصلوا والخدمة بتكسب فعلا والدليل انها بتيجي كل يوم يعني فعلا بتكسب الخدمة دي من علي قفا الناس !
لا ويقولك وظيفتك المستقبلية وحياتك الزوجية وكل حاجة في المستقبل من خلال رقم معين في تاريخ ميلادك يعني بجد ضحك ع الدقون للصبح..نلاقي صاحب الخدمة اما يرد علي واحد من دول بيقول "اااه زبون جديد اهبل اصطدته اهو اما نديله بقي كام كلمة وهو هيصدق زي الدغف" !
والتاني بتاع "اعرف شخصيتك من خلال اكلتك" يعني تقوله اكلة معينة بتحبها يقوم يقولك حاجات في شخصيتك !!
بالذمة ده كلام يعني ..طب علي كده كل الناس متناقضة بقي يعني انا مثلا بحب الجمبري وبحب البصارة برضه اكيد ده تناقض كبير في الشخصية مثلا !!
او الناس اللي بتحب الكافيار وفي نفس الوقت بتحب الفول !!
ناقص يقولوا "اعرف شخصيتك من خلال تفتك"..ما هو كل شوية يطلع اعلان اعرف شخصيتك من خلال حاجة جديدة !!
وطبعا اكتر اعلان مستفز هو اعلان اللحاف بتاع الثورة ..للدرجة دي المتاجرة بالقضية ؟؟
دي متاجرة بجد بالمعني الحرفي..بيع وشراء..يعني هو ده تعريق جملة "متاجرة بالقضية" اللي هي الثورة..!
يعمل لحاف ويسميه لحف الثورة ويبيعه للناس ويناموا تحت علم مصر قال يعني جابوا جديد ماهو الشعب كله كان نايم فعلا تحت علم مصر ولا حد بيعمل حاجة اساسا لمصر !
وواحد تاني في اعلان سخيف في جرنان عن العمرة بيقولك ايه في الاعلان "عرض العمرة الجديد..سعر خاص جدا..الشعب يريد اسقاط الذنوب" !!
حاجة مستفزة للصبح يعني وتجيب مرض الاستبحس النفساني علي راي عادل امام ..
ولا الاستعباط في الالعاب عيني عينك بقي وبيسموها اي حاجة علي مزاجهم يقولك "الحق حمل علي موبايلك لعبة 6 اكتوبر" ومافيش اساسا لعبة اسمها 6 اكتوبر ولا نيلة ولكن هم خدوا لعبة اجنبية واعادوا تسميتها حسب مزاج الزبون يعني وخلاص وهي اصلا لعبة عالمية ويبجيلك الشركة اللي نتجت اللعبة في الاول هتلاقيها امريكية !!
وكل حاجة في الاعلان تلاقيها تبدأ بكلمة "الحق..مفاجأة..اقوي..اجمد..يلا بسرعة" يعني تحس من الكلمات دي ان يعني اللعبة هتطير قال يعني طوابير واقفة هتاخدها الحق ايه بس يا ست الحاجة دي لعب قديمة وبنت تيييييت !
وطبعا كل مطرب خد نصيبه من الكعكة وعمل نغمة للثورة عشان تتحمل ع الموبايلات من الخدمات دي ويكسب الوف من ورا الموضوع ده طبعا ..المطربين دول الفئة الوحيدة اللي مبتخسرش ولا في ثورة ولا في غير ثورة !
طيب الفترة دي المفروض يعملوا نغمات "طرة لاند" او سجن المزرعة عشان المساجين اللي جوة يحملوها وكده ..تكون اصوات تعذيب او صوت مساجين وهم بيكسروا الحجارة او حاجة زي دي عشان العادلي يتسلي ويحملها علي موبايله في السجن !
بلد نغمات صحيح !
Posts
No comments:
Post a Comment