كل سوشي واضربها سبايكي ولا يهزك

الشعب المصري عنده اسباب غريبة قوي في بعض المواقف وحجج اغرب ساعات مش بتبقي مناسبة للراجل الشرقي التقليدي سواء مصري او عربي

يعني مثلا واحد يقول للتاني "شعرك منكوش ليه كده يا عم ؟ "
يقوله " منكوش ؟؟ لاااا ده سبايكي قصة كده يعني" .
واحد تاني يقولك لا لا عربيتي مش متربة او وسخة ده تقدر تقول عليه "ديرتي استايل" ..!
يا عم ما هي كلها تراب قدام عيوني اهي "ديريتي استايل" ايه يعني ؟ اجيبلك شوية طين تزودهم ع العربية عشان تبقي اخر موضة يعني ولا ايه ؟؟
ممكن واحد يقول لمراته "انتي يا ست هانم ..انتي جايبالي الأكل من المزرعة للطرابيزة ولا ايه ؟؟ جايبة اكل ني ؟؟ "
تقوله "ني ؟؟ لا يا حبيبي ده سوتيه "

تاني يوم "جايبالي المرة دي سمك ني ؟؟ هو كل يوم اكل ني؟؟ "
تقوله "لا يا حبيبي ده سوشي" ..!
هو فعلا مش اكل ني ولا حاجة بس قدام العين والواقع بيقول انه اكل ني لو متعرفش السوشس او السوتيه يعني ..بالمنطق كده هو ني !

وساعات الستات تحب تهرب من الاكل التقليدي زي المحشي مثلا وتروح لاكلات صعبة من القنوات اللي ع الدش قال يعني متربية في المطبخ الاسباني بقي وبتاع الله يرحم قيام ما كانت بتستحمي ع النملية !
يقول الراجل "ايه الاكل ده ؟؟ ده واقع من الجيران ولا ايه ؟؟ "
تقوله "لا يا حبيبي دي وصفة مكسيكية من قناة فتافيت "
يقولها "اه طب ثانية واحدة اروح البس مكسيكي واجيلك اهو..ده انا اللي هاخليكي فتافيت ".

اما الموضات الجديدة بقي ممكن ناس متعرفش عنها كتير زي الامريكان ستايل في الشقق او الحاجات دي بصراحة قدام العين هي عبارة عن "مطبخ في الصالة" او اي كلام بس هي شيك.
واحد ممكن يقول لصاحبه "ايه ده يا عم انت انت حاطط الكابينيه في الصالة ؟؟ "
يقوله "كابينيه ؟؟؟ ده استايل امريكي يا مغفل "
يقوله "ستايل امريكي انك تعمل قدام الضيوف يعني ولا ايه؟؟ وهم بيصقفولك ويشجعوك بقي وانت بتعمل ولا بيروحوا اوضة تانية ؟؟ ههههههه "


واحد شايف صاحبه لابس ابيض في ابيض "ايه يا سيدي انت طالع عمرة قريب ولا ايه ؟؟"
يقوله "عمرة؟ ده انا لابس زي عمرو دياب في عودوني هو اي ابيض يبقي عمرة ؟؟ يعني هو حد هيروح عمرة بالملابس الداخلية عشان لونها ابيض مثلا ؟ "

واحد تاني يقول "الحق يا عم الواد سايب اللباس برة خالص ومش واخد باله متقوله يا عم ده منظره وحش قوي"
يقوله" لباس ؟؟ ده بوكسر ..وبعدين دي موضة ان البنطلون يبقي ساقط "
يقوله " معلش مكنتش علي ايامي ان البوكسر يبقي برة المرة الجاية هسقط البوكسر نفسه "

او يقوله "يا ساتر يارب ايه يا عم شكمانك بايظ ولا ايه متروح تظبطه "
يقوله "لا ده تربو الشكمان مية مية "


واحد يقول في ساقية الصاوي قدام فرقة غنائية "ايه يا عم الاغاني المقرفة دي دي اصوات تقرف "
يقوله "دي الفن الجديد يا استاذ ده شئ رائع الفرق الغنائية دي "
يقوله " يا سيدي ما هو قدامك اهو معندهمش صوت خالص "
يقوله " مش مهم الصوت دلوقتي " !!


في وسط الهوجة دي كلها معادش في حاجة اسمها "معفن" زي زمان ..!
يعني كان زمان تلاقي واحد شعره منكوووش جدااااا والبوكسر طالع من البنطلون تقول ايه الشاب "الهليهلي المعفن" ده ؟
دلوقتي خلاص ده اسمه شاب مثقف..ومكانه مش الخانكة لا مكانه ساقية الصاوي كمان !!

حتي كلمة محشش فقدت معناها تماما ودخلت في اطار كوميدي !
يعني زمان قوي كان اللي يشر حشيش كاااارثة واهله تنفخه..دلوقتي يقولك ايه يعني انا بشرب زي سلطان الطرب ومنير كمان ده الحشيش ده لكبار الشخصيات !

واصبح اللخبطة اللغوية اسمها "فن مختلف" يعني ابوظ اللغة واقول "احبج " بدل "احبك" واقول اصله فن خليجي..كأنهم مش عرب مثلا طب ما هي نفس اللغة !!
خلاص انا هاغير كام كلمة انا كمان واعمل فن موزمبيقي واقول "احبن يا عيوني " بدل احبك ويبقي فن خاص بيا !

وتعمل اي اغاني عن العنب والحشيش وتقول "فن شعبي "..اصله بيوصل اكتر للجماهير فهو مهم
لا هو مش مهم ومش اي حاجة بتوصل اكتر للجماهير اعملها المفروض اوصلهم الفن الحقيقي.

لكن عصر متناقض جدا في كل شئ حتي تلاقي معظم اللي بيتكلموا عن التنمية البشرية معقدين !
واللي بيتكلموا عن العلاقات متجوزوش او مدخلوش في اي علاقة اصلا !

يعني اعمل اللي انت عايزه بس المهم تصنفه اليومين دول ..
اقطع بنطلونك من قدام وخليه مرقع ..زمان كانوا يقولوا عليك متسول..دلوقتي يقولوا "شاب كوووول " عشان بنطلونك مترقع !!

حتي الحباية الزرقا كان اللي ياخدها يتكسف ويخبي دلوقتي ممكن تشوفها في التليفزيون عادي !
والاطفال اللي كان بيعنيلهم عفاف راضي دلوقتي بيغنيلهم نانسي وهيفاء بس !!

ايام وبنعيشها يا عم الحاج زي ما الهضبة قال..كل حاجة ليها مسمي وتصنيف حتي لو كانت اي هنتريش .