انما للنت حدود يا حبيبي

عملوا لكل حاجة قواعد واخلاقيات وبتاع وسابوا الانترنت كده يعني ماشي حافي !!
لأ احنا لازم نحط قواعد واتيكيت لاستخداما لانترنت والفيس بوك عشان العملية كده بقت سداح مداح قوي يعني ولازم وقفة .




وصايا لاستخدام الانترنت والفيس بوك :


أولا : وانت بتبحث علي الانترنت ياريت تبحث عن كلام منطقي يعني متحاولش تبحث عن كلمات غريبة عشان هيطلعلك نتايج غريبة شوية يعني واحد مثلا يدخل يبحث عن كلمة "مؤخرتي"
يقوله الجوجل "لم يفلح بحثك عن مؤخرتي" اظن جملة محرجة قوي ..!! يعني الجوجل بيقولك مانتاش شايفها لو عملت ايه ده انا الجوجل ياد !!
ومثلا متعملش زي لاني كنت ببحث مرة علي جملة في اغنية قديمة بدور عليها وجملة في الاغنية بتقول "عطية يحب القلقاس" طبعا ده كان في فيلم اسمه "تحت الصفر" ومش لاقي الاغنية ابدا
وكنت في سايبر يعني اللي ييجي يقعد ورايا علطول ويدور هيلاقي اخر حاجة تم البحث عنها الجملة دي ويكون مذهول شوية من اللي الناس بتعمله !!



ثانيا : لو غاوي منتديات وبتاع يبقي جهز ملف وورد كده صغير حط فيه الردود عشان الناس الرخمة الللي تقولك "مش هتشوف الموضوع الا اما ترد" ردت المية في زورك يا اخي طب ما نيش هارد وهاشوف اي منتدي تاني تلاقي المنتدي التاني برضه بيقولك لازم ترد يا برنس يبقي تضطر ترد بقي وتجهزر الردود المتداولة في عالم المنتديات يعني تكتب مثلا "مشكور اخوي الغالي" لو منتدي خليجي او "شكرا يا برنس الليالي" لو منتدي مصري او "جزاكم الله خيرا" لو في منتدي اسلامي او كده يعني !!




ثالثا : متدخلش ابدا علي الفديوهات اللي هي مكتوب عليها "فتاة ابكت الملايين" او "البطة التي ابهرت العالم" لانها بتكون حاجات فاكسة والراجل بيحاول يعملها سوق يعني ..بطة ايه اللي ابهرت العالم يا عم الحاج ..ليه بتتكلم لغات ؟؟؟ ولا بتشرب ريد بول وطلعلها جوانح زيادة ؟؟؟


رابعا : الفديوهات اللي هي من نوعية "ممنوع لاصحاب القلوب الضعيفة" دايما خش رخم علي صاحبها وقوله انا من اصحاب القلوب الضعيفة بس هاشوف الفيديو ومجهز الدوا جنبي والجلوكوز كمان عشان لو الموضوع زاد قوي عن حده ..وهي اصلا بتكون فيديوهات ولا فيها تخويف ولا نيلة برضه مجرد عنوان مثير والفيديو اصلا تلاقيه كوميدي او اغنية والراجل بيستهبل.



خامسا : في بقي فيديوهات ممكن تلاقي مكتوب عليها "مشهد مثير للفنانة..." او "الفنانة...بالبكيني" تيجي تفتح المشهد يطلعلك حاجة دينية وتلاقي التعليقات تحت ايه بقي "جزاك الله خيرا يا اخي"
يعني اللي رافع الفيديو عامل كده قولنا ماشي انما اللي معلق تحت ده بيستهبل ؟؟ ما هو كان داخل يشوف البكيني واتفاجأ ..اكتبله علطول في الرد "ايه تبت يعني حالا بروح اهلك ؟؟؟"


سادسا : اما تخش ع الفيس بوك وتكون بتكلم حد وفجأة تقوله انا ماشي بقي او رايح في مكان يعني متخشش علي فيديو او لينك تاني تعلق تحته عشان كده بتتكشف وممكن يرجعلك يقولك "ممشيتش يعني؟؟" ويعرف انك بتحلقله ويبقي منظرك مش تمام خصوصا لو بينكم فريندز مشتركة..فاول ما تقول انا ماشي يبقي امشي فعلا او خش علي اي حاجة بس متعلقش عند حد الا بعدها بفترة منعا للاحراج !



سابعا : اذا لاحظت انخفاض ملحوظ في اعداد الكومنتات واللايكات فدي ظاهرة طبيعية في اي وول اصلها مواسم كده ! يعني ساعات تلاقي زحمة قوي علي وولك وساعات ولا كومنت ويسيبوك طفلة الحشرة مهما رفعت من فيديوز او اي حاجة تشيرها عموما فحاول تقلل اللينكات لتحظي بالكومنتات ..الافراط في اي حاجة وحش حتي لو كان مجرد لينك !
ومن العيب قوي انك تعمل لايك لنفسك لان كده منظرك زي حبل الغسيل مالكش لازمة !!
اللي يعمل لايك لنفسه زي اللي يحط دبلة في ايده وهو مش خاطب !


ثامنا : ممكن تخش في جروب مش تمام وتقول لواحد علي فكرة انا شوفتك في جروب كذا يا قليل الادب تحت الصورة الفلانية يبقي انت كده اتكشفت يا برنس لان اول سؤال "وانت ايه اللي وداك هناك ؟؟؟؟"



تاسعا : متحاولش تقعد كتير في وول غيرك لان الزيارة اما بتقل بتقلب بضلمة يعني يا بخت من زار وخفف.
يعني كل فترة انما مش طول النهار اعلانات علي وول غيرك.."يا باني في وول غيرك يا مربي في غير ولدك" !
ولما تلاقي مجموعة اصحاب اتلموا علي صاحب الوول وانت متعرفهمش متتحشرش في وسطهم زي الفاسوخة انت متعرفهمش ولا هم يعرفوك يبقي روح لوول اصحابك احسن !



عاشرا : متسألش حد ابدا "انت ليه مش بتيجي علي وولي" لان دي حرية شخصية لان منظرك بيبقي صعب وكأنك المفروض تبعت شكوتك لفقرة اسالوا رجاء !
عادي ان اي حد ميجيش علي وول حد دي مسالة تعود مش مهمة يعني ومش معني ان واحد مش علي وول واحد انه مخاصمه مثلا ولكن هو اتعود علي كده واتعود علي صفحات معينة !



حادي عشر : الاخوة اللي بيتصوروا ببدلة كاملة ع الفيس بوك ده مش خط "الخاطبة" او ده مش جواز سفر سعادتك يعني !
لابس بدلة كاملة عشان تتصور للفيس بوك ؟؟ يا راجل مزمز ميراندا وفكها شوية !!


ثاني عشر : متشتغلش نفسك ابدا وتملي صفحتك اصدقاء من الفنانين لانك مالكش علاقة باي حد فيهم هم بيقبلوك لانهم بيقبلوا الكل وخلاص واهي زيطة



ثالث عشر : حاول توازن الوول بتاعك يعني مش كله سياسة ولا كله هنتريش يعني ولا تبقي فهمي هويدي ولا تبقي الشاب مامي


رابع عشر : لو بتعمل شات حاول متستعملش جملة "ممكن نتعرف؟" لانها اتهرست في ميت فيلم عربي !!!


خامس عشر : لو واحد قالك "اوعي تتفرج علي الفيديو ده" متتفرجش عليه فعلا لان هو قصده خش اتفرج عليه فاخنق عليه زي ما هو خنق عليك


سادس عشر : متحاولش تعمل شير لحاجة علمانية او ليبرالية في وول اخوانجي ! او حاجة للزمالك في وول اهلاوي ..او حاجة لعمرو دياب في وول تمراوي ! او العكس برضه لانها بتقلب بما لا يحمد عقباه وحروب كومنتات ! يعني تقدر تقول "الكيف مناولة والشير مناولة"


سابع عشر : متحاولش تزود قوي جرعة الشير اليومي لان "الاوفر دوز" بتقلب عليك ب "هايد" و "ديليت" في الاخر وانت حر بقي في وولك .


ثامن عشر : وانت فاتح الشات متكلمش اكتر من اربعة في وقت واحد لانهم بيعرفوا وبتبان انك مش مركز معاهم والافضل تكلم واحد واحد الدنيا مش هتطير يعني .


تاسع عشر : لو بتعمل شات بالصوت اتاكد اما تخلص انك قفلت البرنامج عشان متسيبش المايك جنب الكمبيوتر وتبقي عامل زي الشيخ حسني في فيلم "الكيت كات" وتقول فضايح اون لاين !


عشرون : حاول وانت ع النت دايما تكون في وضع محدش يبص عليك من ورا لان ساعات بتكون قاعد عادي جدا واول محد يبص علي شاشتك من ورا يكون حظك ان في اعلان طلع "بوب اب" مرة واحدة مش سليم فيهموك غلط ياولداه .


حادي وعشرون: لو بتقعد علي البورصة او كده حاول تكون جنبك عضاضة او مساكة بتاعة تمارين الايد عشان تهدي نفسك شوية او خمسين كيلو لبان زي مدربين الكورة .


ثاني وعشرون : اعمل مجموعة اما تيجي تقسم الاصدقاء وسميها "عالم ولاد ..." عشان تبقي عارف انت بتعمل شات مع مين !




وسهرة سعيدة ع الفيس بوك واوعي ايدك وزرار "الهايد" .

لماذا تدافعون عن الذئب ؟؟؟؟؟

اريد ان أسأل "إيفلينكو" المصري ماهي جناية هؤلاء الأطفال الذين تضع عليهم نصل سيفك البطار ؟؟
هذا المدرس المصري صاحب الفيديو الشهير الذي انتشر علي الفضائيات وهو يضرب الاطفال بلا رحمة..
ماذا عن الطفولة ؟؟ ماذا عن أحلام هؤلاء الأطفال؟؟ هل سمعت عن شئ يسمي "البراءة" ؟؟
هل سمعت أيها الحيوان المقزز عن شئ يسمي "الرفق" ؟؟
هل سمعت يا عبد الشيطان عن حديث الرسول عن الرفق في الامر كله !!
هل سمعت عن من لم يرحم صغيرنا ويوقر كبيرنا؟؟ انه ليس منا ..وبالطبع انت ليس منا..
لأنك أكل لحوم البشر..لأنك "زومبي" ليالي الجوع وقرص البرد..
لأنك لا تسمع صراخ الطفل أمامك لأن "أصفاد" الجهل في يديك وفي أذنك وقر الرجعية !
لابد أن يحاكم من شوه سمعة مصر أمام العالم..
من جعل عناوين جريدة "الديلي ميل" البريطانية عن العنف المصري والتعليم في مصر ووضع نقطة سلبية لمصر ونقطة سوداء ما بعد الثورة..
لابد أن يحاكم هذا الذئب البشري الذي لا يغتصب الا "أحباب الله" ..ويقتل فيهم كل أمنية وكل نظرة لمستقبل كريم..
لابد أن تضاف لمبارك الجبان تهمة أخري فوق تهمه علي معايير اختيار مدرسين مصر
معايير اختيار مربي الاجيال..او كما يسمي هذا المدرس "مرعب الاجيال" !
ومحاسبة مبارك علي ظروف حياة هذا الذئب ولماذا ظل في مختبرات تجارب الفقر كفأر تجارب حتي خرج الينا "مسخا" يأكل في حبال الرحمة وأوصال البشر..


"إيفلينكو" هو فيلم عن مدرس كان يغتصب الأطفال ثم يقتلهم ويتلذذ بهذا وكان الفيلم ملئ بالأمراض النفسية والصراع النفسي للبطل مع ذاته ومحاولة تبرير ما كان يفعله امام العدالة..
كان الفيلم يمتلئ بصخب العنف ورائحة الدماء كما هو الحال في مشهد تعذيب الطلبة علي يد هذا الجزار ولكنه يقتل ما بداخلهم ويغتصب برائتهم هذا هو الاختلاف الوحيد عن الفيلم
وان كنت اظنه افظع..لانه يترك طفل مشوه نفسيا أما ايفلينكو فانه يقتل ضحاياه دائما وينظف مكان جريمته !!


لابد من معاقبة كل مشوه لسمعة مصرنا العظيمة في جميع المجالات ومن يوصلنا الي الصحف العالمية ببقعة سوداء..
لابد من محاسبة المسئولين عن جعل هؤلاء المدرسين يعملون بدون اختبارات نفسية دورية كل سنة ..
لابد من ردع من يروع الأمنين في كل مكان ولو داخل فصول مغلقة ..
ما الفرق بين هذا "الايفلينكو" المصري واي بلطجي يحمل ملتوف في الشارع ويروع امن الناس ؟
ما الفرق بين هذا الايفلينكو المصري وبين اي ذئب يغتصب النساء علي الطريق الصحراوي او اي مكان خالي من البشر ؟؟
انها الفرصة سيدي !!!
هذا الكلب لو واتته الفرصة وجاء اليه العرض المناسب لفعل كل هذا ولكنه لا يجد الفرصة فقط او العرض المناسب
انها نفسية المجرم كما رايناها في عدد من الافلام مثل "ستارك ويزر" القاتل المريض الذي يبتسم بعد كل جريمة قتل ويقبل حبيبته بكل برود بل وهي تبتسم ايضا دون ادني خوف..
انها نفسية المجرم التي راينها في افلام كثيرة جدا ولكن اسمي من علي شاكلة هذا المدرس بإسم الفيلم الشهير
Natural Born Killers
نعم ان هذا المدرس يستحق بجدارة ان يكون بطل هذا الفيلم بسبب اجرامه وعداوته مع نفسه ومع كلمة "البراءة"
في الفترة الاخيرة رأينا عدد من الجرائم في الغرب مثل الام التي قتلت طفلها اثناء انشغالها علي الفيس بوك
والام التي ذبحت اولادها الثمانية ووزعت جثثهم في اماكن متفرقة
ومدرسة في البرازيل تعرضت لهجوم وحشي بمدفع رشاش علي الطلبة الابرياء من مختل عقليا
والرجل الذي ذبح ملكة جمال امام سوبر ماركت لكي يحتفظ برأسها ..
حوادث عدة نسمع عنها في الغرب ولا اظنها افظع من المشهد الذي رايناه امام اعيننا من هذا الوحش يضرب بلا رحمة وبلا انسانية
هذه الحوادث تحدث في العالم نعم ولكن المحاسبة وتصفية هؤلاء وعزلهم واجبة جدا كي لا نخرج اجيال تعبد العنف وتسير علي درب هذا الكلب..


والغريب والمستفز جدا ان تجد من يدافع عن هذا الذئب ويقولون في قول بارد" ما هو التعليم هو الضرب" في فيديو علي قناة اون تي في
يخرج أهالي هؤلاء الاطفال ليدافعوا عن الذئب ويقولوا ارحموه
انها نفس افكار من يدافعون عن مبارك..
لماذا ايها المصريون تدافعون عن الذئب ؟؟؟
ألم يأكل اولادكم مثلما هي الرواية التي كنا نرويها للاطفال ! ألم تخرجوا الي الشارع لتعودوا فتجدوا اولادكم تأكلهم مخاوف المستقبل ورهبة العنف في المدارس وغيرها
ألم يأكل حسني الذئب ثلاثة عشر مليون مصري في بطن "الأمية" ؟؟
ألم يأكلكم سرطانا وقهرا ومرضا وضعفا وافتقارا وفقرا وهوانا وتخلفا وما تحت الحضيض ؟
لماذا ايها المصريون تدافعون عن الذئب ؟؟
هل جعل منا حسني مبارك اشخاص "ماسوشيين" يعشقون تعذيب انفسهم ويتلذذون بالعذاب ؟؟؟
هل هي حرب "ساديين" امام "ماسوشيين" ؟؟؟؟
فكر معي لو كانت هذه الحادثة في "امريكا" اليس هذه الرجل كان سيكون في سجن فيدرالي الان ومكبل فمه كما فيلم "هانيبال" ؟؟؟؟
كانت هذه ستكون اخطر قضية رأي عام وستفرد لها اوبرا حلقات او "الين دي جينرس" واخرون
امريكا الذين يعقدون اجتماعات مدرسية وحكومية لمناقشة "اوقات الفسحة" المدرسية وتاثيرها علي المراهقين وتحديد مدتها اللازمة !!!!!
الذين يرفعون قضايا علي شركات تبغ عملاقة وياخذون تعويضات رهيبة نظير ان التدخين قد افقدهم ذويهم !!!!
ماذا كان سيكون رد فعل الشارع الامريكي واهالي الاطفال لو كان هذا الذئب في امريكا ؟؟؟؟
ماذا سيكون رد جمعيات حقوق الانسان في العالم امام جبروت هذا الحيوان ؟؟
ولن يكون الفقر مبرر ابدا لارتكاب جريمة..بل اننا كنا نقول ان الفقراء "بتوع ربنا" ومحترمين
لا يكون الفقر مبرر لخلق وحش ادمي لان هناك شئ يسمي "الدين" لتنظيم سلوك البشر وزرع الرحمة فيهم والانسانية
"ولو كنت فظا غليظ القلب لانفضو من حولك" فما بالك بعنف هذا المدرس الخنزير..


يالله يالله حرر مصر من اشخاص بلا قلب ولا رحمة وحرر مصر من قيود مبارك الفاسد
وستأتي مصر الحرة وسنراها بأعيننا ولكن دعونا ننتظر قليلا ونأخذ فرصة لالتقاط الانفاس من "اتون الفساد المباركي" في عهد نظام مبارك
فلنحاسب ونعاقب ونردع كل من يسئ لسمعة مصر
وكل من يهين طفل او شاب او كهل مصري من الان فصاعدا
فها قد عادت الكرامة ولا تنازل عنها بعد ذلك ولن نرضي عنها بديلا.

عــالم منـــظم جدا من الابرة للصاروخ

كل الناس تحلم ان منظر دولابها يبقي زي الصورة اللي فوق دي كده
حاجة تفتح النفس لو الدولاب كان شكله كده فعلا

العالم كله بيهتم بأمر التنظيم..تنظيم كل حاجة من اول اشارة المرور لحد اصغر اوضة في البيت والفرق الكبير اللي ممكن تلاحظه بين دولة نامية ودولة متقدمة جدا هو التنظيم في كل امورها
تبقي عارف هتركب المترو الساعة كام وعارف هتنزل الساعة كام وبالدقيقة كمان مش بطريقة "البركة" !
برامج كتير جدا ظهرت علي الشبكات العالمية ومثلا في قنوات زي استايل وغيرها زي برنامج
Dress My Nest
او برنامج
clean house

او البرنامج الشهير
peter perfect

البرامج دي كل شغلها علي تنظيم كل حاجة من الداخل للناس اللي بيوتهم في حالة فوضي تامة بيستعينوا بفرق عمل البرنامج لتنظيم البيت سواء وضع الاثاث او تنضيفه بالكامل وبيحسوا بابهار شديد اما يلاقوا بيتهم بالشكل ده بدل الفوضي العارمة اللي كانت في كل مكان في البيت واللي اثبتت دراسات كتير جدا ان الفوضي او الحاجات المترمية دي اللي اسمها
clutter
ليها اثار سلبية جدا علي الناس وعلي الاطفال اللي بيتربوا في بيئة فوضوية جدا.
برنامج "بيتر" هو بيروح للمحلات بقي مش للبيوت وبينظم المحل بشكل كامل من الاول لانه شايف ان ده زي ما بيقول كلمته الشهيرة بيدي
image
للمحل وعلامة مميزة وبيسبب سهولة في عملية الشراء اما يكون منظم بالموديل او رقم الصنف مش في حالة فوضي وفعلا الناس بتزدحم في المحل بعد تغيير شعاره وتغيير كل حاجة جواه وتنظيمه بمبدأ
less is more
يعني ازالة الحاجت اللي ملهاش لازمة والتركيز علي الحاجات الهامة بالداخل عشان المحل نفسه توسع مساحته ويبقي شكله
more welcoming


وكتير جدا من المواقع بتركز علي اهمية التنظيم داخل البيت او مكان العمل وفيديوهات كتير للموضوع ده زي الموقع مثلا بتاع
expert village

من اول تنظيم البيت لحد تنظيم الكمبيوتر والدولاب والحمام وكل مكان عشان تعرف ايه اللي مالوش استخدام وبيقولوا من فوائد التنظيم :


1- انتاجية اكبرفي العمل :لانك بتكون مش مشتت ومش كل همك تعيد ترتيب المكان ولكن الانتاج وبعد كده التنظيم بيسهل عليك الوصول في ثواني للي انت عايزه يعني توفير كبير جدا للوقت

2- توفير المال: طبعا اما ترتب دولابك سواء بالموديل او اللون او غيره بيخليك اما تيجي تشتري مش بتقعد تشتري نفس الحاجة تاني ويبقي نفس القميص او غيره مكرر ولكن بتكون منظمها صح وبتوفر فلوسك وتدفعها في المكان الصح

3- وقت اكتر : بيكون عندك كل الوقت انك تقضيه مع اصحاب او مع اسرتك لان كل حاجة بتعملها او ملف منظم وعارف مكانه فمش بتقعد تضيع وقت في الترتيب الدائم والبحث عن الاشياء من جديد كل يوم

4- راحة نفسية : الفوضي بتسبب مشاكل نفسية كتير جدا والعيشة لمدة طويلة في مكان كل الهدوم فيه مترمية ع الارض او بتدور علي حاجتم مش بتلاقيها بيسببلك احباط دائم


وطبعا مزايا تانية كتير جدا وبيقولوا دايما في الجملة الشهيرة

Easy on the Eyes, Easy on the Mind


يعني اما يبقي المشهد قدامك جميل ومنظم ومهندم بيكون اسهلك في كل شئ والقعدة في وسط المكان يعيطك حالة من الصفاء.




وهل الدين الاسلامي اتكلم عن الموضوع ده ؟ اكيد طبعا الكون نفسه مخلوق بنظام وامعان ودقة متناهية وكل حاجة بحساسات ونظام شديد جدا بلا ادني خلل ..قدرة الخالق سبحانه وتعالي.
شوف فصول السنة الاربعة وتأمل في الطبيعة نفسها والذرة وانت تعرف اهمية النظام
وحسب المواقع الاسلامية ما قالت ان في ايات كتير جدا بتتكبم عن التنظيم سواء في الكون او في الصلاة وفي كمان الاية " إِنَّ اللَّهَ يُحِبُّ الَّذِينَ يُقَاتِلُونَ فِي سَبِيلِهِ صَفّاً كَأَنَّهُمْ بُنْيَانٌ مَرْصُوصٌ"
والاية الكريمة "وجاء ربك والملك صفا صفا‏"
قوله صلى الله عليه وسلم في الصحيحين :
"سووا صفوفكم فإن تسوية الصفوف من إقامة الصلاة"
بالاضافة لايات عن الكون مثل :

"الشمس والقمر بحسبان"

"كل في فلك يسبحون"

يعني التنظيم في كل شئ في الحياة سواء الكون كله لحد اصغر مكان .





ونشوف بعض الامثلة من الدول المتقدمة علي التنظيم واهميته :



1- حلقة كاملة في برنامج اوبرا وينفري عن تنظيم الغرف الكتير جدا في القصر الملكي وازاي تنظيمها وان في واحد مخصوص لتنظيم شنط الضيوف ووضعها في الدولاب بشكل متناسق وواحد مخصوص مشرف علي خريطة العزومات وانه بدقة شديدة يخلي كل واحد قاعد جنب التاني يكون ليه علاقة بيه مش يكون غريبة عنه وبياخد الاعداد وقت لتنظيم كل امور الحفلة حتي دخول الضيوف محسوب وقته وهيقعدوا امتي علي الطرابيزة !

2- الافراح الملكية وزي ام شوفنا الفرح الملكي الاخير وازاي قالوا ان الاعداد للحفلة خد تدريبة وبروفة 30 مرة متكررة عشان يوصلوا لمرحلة الاتقان وميبقاش فيه غلطة واحدة


3- حفلة الاوسكار وازاي بيتم تنظيمها واللجان المشرفة علي تنظيمها من اول السجادة الحمراء لحد الغرفة الخضاء اللي جوة واللي اهتموا بيها لدرجة انهم جابوا مصمم في غرف البيت الابيض عشان يعملها بشكل محترف ومنظم.


4- ساعة حقن انفلونزا الخنازير والتطعيم في هولندا الموضوع مخدش اكتر من نص ساعة لتطعيم اعداد مهولة من الاطفال لانه كان منظم في استاد هناك وكان التنظيم هو السبب الرئيسي في الانجاز وسرعة الحقن.


5- صندوق المهملات برة بيكون نوعين صندوق للاجزاء الصلبة وصنوق للماكولات او للمناديل والحاجات العادية


6- تنظيم اولمبياد الصين والمشرف العام علي تنظيم الحفلة قال احنا كنا عايزين نصل بالتنظيم لدرجة رهيبة من الابداع ولكن لسه في احسن ..رغم انها كانت مبهرة جدا


7- المدارس في اليابان والبيوت اليابانية كدرس كبير جدا في النظام من الصغر والتدريب عليه وبيخلوهم يخلعوا الاحذية وهم داخلين المدرسة واماكن خاصة لعبور اطفال الحضانة !


8- واحد في اليابان عدي في وقت مش بتاع عبور المشاة عملوا عليه دراسة وكلموه في التليفون عشان يعرفوا ليه عمل كده وهل كان عايز ينتحر ! لانهم مش متخيلين ان في حد ممكن يجري في الطريق في غير وقت العبور السليم.


9- اسلوب تنظيم كل المكتبات واشهر اسلوب لتنظيم المكتبات اللي هو اسمه
Dewey Decimal Classification (DDC

ساعد كتير في الوصول للكتب بسهولة حسب الموضوع ورقم الكتاب واسم المؤلف وحاجت تانية تنظيمية كتير جدا للتيسير علي الناس



10- الشركات العملاقة كلها تلجأ للتنظيم شوف مثلا موقع امازون او اي باي او اي موقع لبيع المنتجات حتي لو شركة صغيرة هتلاقيها منظمة بدرجة عالية واحترافية شديدة حسب نوع الحاجة اللي هتشتريها وكل تصنيف تلاقي تحته تصنيفات كتير جدا لان ده بيحققلهم مبيعات اكتر لان الناس بتوصل بدقة اكبر للي هي عايزاه
وجميع مواقع الفيديو هيخليك تعمل "ليست" او قايمة وتسميها زا ما انت عايز وترتبها من جوه حسب ترتيبك الخاص
وطبعا المطاعم والقايمة بتاعتها شوف ازاي التنظيم فيها من المقبلات والوجبة الرئيسية او المشروبات وتقسيمها المتعدد

او اساليب البحث من الاقدم او حسب الكلمة والموضوع في محركات البحث كانت تبقي مشكلة رهيبة لو الواحد بيبحث كده بظروفها عن اللي هو عايزه في النت يعني علي ما تدور علي فيلم مثلا تاخدلك تلات سنين لو مافيش اساليب لتنظيم الامور علي الانترنت
وطبعا تقسيم البرامج كمان حسب هي برامج فيديو ولا صور ولا انترنت ولا ايه نظامها واهتمام شركة مايكروسوفت جدا بالنظام وترتيب الملفات حسب "الاسم او التاريخ او النوع" او حاجات كتير جدا تانية
وكمان موضوع "التاج" اللي كل المواقع بتعمله انك تعمل تاج للصورة باسم معين لسهولة بحثك عنها بعد كده يعني دي من اهم اساليب التنظيم

ومواقع الاغاني وتقسيم فنون الغناء "بوب روك كانتري ميتال" وغيرهم وكل مطرب تحت فئة معينة بنظام شديد حسب "الجينرز"
وقاعدة بيانات الافلام وترتيبها حسب النوع والمخرج وغيره
وطبعا الصحف العربية والعالمية كلها ازاي بتتقسم لاقسام وكل قسم ليه مديره وصحفيين خاص بيهم
والجامعات وتقسيمها حسب الفروع والاختصاصات




11- اشارات المرور تخيل لو مكانش في اشارت مرور كان ازاي يبقي التعامل او مافيش تنظيم داخل البنوك بالارقام يبقي شوف الوقت اللي هتقضيه جوة بالساعات
بالاضافة لان اي عمل فني هتلاقيه منظم زي الاوركسترا مثلا او اي استعراض رائع او رقصة باليه لازم تكون منظمة ومتدربين عليها كتير او حتي قصيدة شعر وشوف بقي الوزن والقافية والحاجات اللي بتحكمها لكي تكون عمل متناسق حتي في كمان "موسيقي البيت الشعري" والحرف بيفرق جدا
وطبعا النظام في الجيش وفي الحروب من ايام زمان جدا مرورا بعصر صلاح الدين وعبقريته التخطيطية والتنظيمية اللي بتخليه ينتصر دايما



12- جسم الانسان نفسه والنظام المحكم اللي جواه وكل حاجة محسوبة باقل من الثانية كمان وعدد النبضات وانفاس الانسان وكل حاجة محسوبة بمعجزة الخالق المسماة "الجسد".
حتي الابتسامة بتحرك عدد عضلات معين والحزن يحرك عدد مختلف تماما بالاضافة لامور تنظيمية كبري ومعجزات طبعا في جسم الانسان وازاي اصغر خلية تقوم بدورها جوة الجسم وكل حاجة متمشيش بنظامها تسبب خلل كبير داخل الجسد.



13- تنظيم الافكار والعقل
mind mapping
اهتموا جدا بخرايط الافكار وازاي ان تنظيم الافكار بالطريقة دي بيساعد في تبسيط الامور جدا والنظرة للاشياء نظرة سليمة والتحليل العقلي السليم للافكار
وبدأوا في بعض الدول يعلموا العلم ده وطريقة الخرايط دي للاطفال لانها بتساعدهم جدا في الدراسة
وطبعا "توني بوزان" هو الرائد الكبير في الموضوع ده وليه كتبه ودراساته فيها وكتب ايضا عن اهمية تنظيم الوقت وغيره من ادوات التنظيم الفكري.





يعني التنظيم سنة من سنن الكون وافضل كتير لاي انسان انه يرتب كل حاجة في حياته سواء مواعيده او حتي دولابه وغرفته لانها بتفرق كتير جدا في حياته.
grouping
classifications
categories

كل دي كلمات بتستخدم دايما وبتدل علي امور تنظيمية لان عملية التنظيم داخلة في كل حاجة في حياتنا بلا استثناء.

إمرأة تنام علي نوتة موسيقية

مذكرتي العزيزة

تأخرت عليك قليلا منذ أخر نبضة.."شمسية" كانت أو.."قمرية"..او بدون حروف التعريف كحال عشقي..
دثريني بين صفحاتك قلبا يرتجف وأيادي مرتعشة وطفل يتغني بين حدائق حروفك..
همهمي في أذني بإسم حبيبتي ومشطي لي شعري بمشط من سطور الكلمات..
وإسجنيني في عنبر حب قضبانه البنفسج وعذابه الياسمين والحارس رمش عيون لا يكتحل الا بأنيني..
أحتاج لأن اخرج من بين سطورك بقصيدة او بعض حروف كي اشرب منك نبيذ العشاق.."الحروف"..

عضيني في يداي كما الأطفال كي أجد في معصمي "ساعة" منك..أري فيها تقويم العشاق وفجر وجودهم وغروب شموسهم..
عطري قلمي بحبر الربيع كي أكتب عنها زهورا وعن عينيها غابات مسك وفيح حضور..
وأقرأي علي عينيها السلام..
وبلغيها من نبضي السلام..
وقولي لها بعامية اللغة "نبضي واخد علي خاطره منك" اذا كنتي "فص قلب وداب" !

اعصري أحلامي زيوت جمال ملائكية تتعطر منها ست الحسن فتصبح أحلامي وجود وكيان..
ودعيني اتنزه بين صفحاتك مع حروف اسمها كي نقع سويا في "مثلث برمودا" العشق الابدي بلا عودة !
واعذريني ان لم اكتب تاريخ فوق حروفي العاشقة..فالحب له الحاضر والحياة ولكنه بلا تاريخ لانه يملك التاريخ..
فلن اقول يوم كذا أحببت..ويوم كذا ايقنت..ولكن اقول "في يوم من ذات الايام عشقت" !

عشقت ولن أحتمي بالسماء من العشق..فالسماء لها كيوبيد والف سهم..
ولن أحتمي بالأرض من العشق..فالارض أسيرة جن الحب والف سندريلا..
ولكن أحتمي بضلوع الأوراق..قلب رقيق هش..وبيت صغير من قش..وحلم وديع كطفل بين بياض الصفحة البرئ..!

بداخلي ملاك..يريد الحرية منذ عشرون عاما..
لم تمنحه الحرية طفولتي..ولم تمنحه الحرية شبابي..
فأمنحيه الحرية في عينيك ولو ساعة..يتحمم فيها من نهر القديسات في أخر رمشة منك..
وأمنحيه الأبدية في عذب حديثك وقلادة القمر بجمال عينيك..

مذكرتي العزيزة

أشتاق لقدرتك في شق انفاسي لكي تجدي أخر طيب حديث عنها وسط شقائق نعمان النبض العاشق ونهاوند أنوثتها..
أشتاق لضمة حضن الصفحة حتي أري بين صفحاتك "كرمشة" أوراق..وقلم يشطب سطره ما بين تردد وجنون عاشق..
وأشتاق لأن تحكي لي عن نفسك..كما أحكي لكي عن نفسي ..
وأحتاج لجلسة تنويمك بين كل حرف وحرف حتي اعترف بما اخفيته في حديث أخر لقاء..!


أجعلي من سطورك سرير مصنوع من "نوتة موسيقية"..
كي تنام عليه ملهمتي..
فيصير اللحن داخلي أرقي..ويصير عذابي رغم صعوبته..بطعم "القيثارة"..
ويصير الحب موسيقارا يحرك عصاه في وجهي..فأنحني احتراما وأكمل العزف علي السطور !


اجعلي من قلبي "بروازا"..
لأخر ضحايا الحب بشريط أسود رقيق..
ليكون عبرة لكل حرف عاشق..
فتصير كلماتي بطعم الشجن وبرائحة الفناء..
كي تتعلم لغة الخلود في قلب ملكتي..

لفيني بحزام ورود"ناسف"
وإمرأة كالقنبلة "مسيلة للدموع".."ومثيرة كالدموع"..
وحفلة غجريات مما تنبت أرض المشعوذين..
كي أرقص بين الورق ببدلة بيضاء..
وأعود برسالة حب جديدة من بقايا همجية الحفلة..!


خذيني في رحلة مجنونة ل "طقاطيق العشق"..
واخسفي بي "سابع عشق"..
واحكي للناس عني اني "كأن العشق انشق وبلعه"..!


لا تغفري لي خطايا الصفحات ابدا..
حاسبيني اذا تحدثت امام حضرة الاوراق بغير خشية ورهبة..
واشعلي في قلبي النار حريقا لا ينتهي ان لم اذكر اسمها في مذكراتي..
واجعلني خط فاصل ما بين الرهبة والرغبة..ورائحة عطر تثمل من مقدرات الهوي..


مذكرتي العزيزة

أنتي سجينتي
وحبيسة ادراجي
ولكني اخشاكي كما اخشي الحب
ومن الغريب ان يخشي السجان سجينه
ولكنك من رائحة عينيها..
ولهذا الخوف له طعم أخر بين صفحاتك..!

منتجات نظام مبارك..للبيع جملة وقطاعي والتوصيل لحد باب طرة

ازاي نكسب من النظام السابق ؟؟ اهو ناخد حاجة من وشه ..الحكومة بقي تتعاون مع مصانع الالعاب ونعمل "فوانيس رمضان النظام "..
واحد يقول هو احنا يعني طايقين وشهم..! اقوله لا ما هو فانوس يشتم فيهم هي جت ع الفانوس ما هو كل الدنيا بتشتم وتسب ليهم !



1-

اقوي عرض في رمضان فانوس مبارك وسوزي
الفانوس بالشحن من غير بطارية
تفتح الفانوس يغني
"فاسدين من يومنا والله..وجيوبنا مهيصة..
ومعانا احلي صحبة لعيشتكوا منغصة..
يا جمال قرب شوية..
ع الصحبة الحلوة دية..ده حرااااامي..علينا غااالي..ده حررااااامي علينا غالي"
ويمكن تغيير نغمات الفانوس حسب الطلب
سعر الفانوس جنيه واحد فقط زي سعر متر الارض للفاسدين في النظام السابق
الحق احجز دلوقتي وساعد اقتصاد بلدك



2-

الفانوس الجديد جدا "بوجي وطمطم ومبارك"
والاغنية الشهيرة
"حرمت يا حسني ؟؟ حرررررمت
حررمت ترمرم ؟؟ حررررمت
كل الزعماء قبلك سرقوا
اااه ااااه
حرمت يا حسني ؟؟ حررررمت
حرمت السرقة ؟؟ حررررمت "
والمفاجأة فيل "فلافيلو" العجيب علي شكل "انس الفقي".



3-

سجادة حمام حجم دبل عليها صورة كل افراد النظام..
امسح جزمتك فيها قبل الدخول وبعده كمان
قابلة لاستخدام كل العيلة وسهلة الطي عشان تاخدها معاك اي مكان يدوسهوا اصحابك عليها
كل ما تشتري اتنين هتاخد سجادة حمرا كبيرة عليها صورة "عز" لوحده وهو ماسك حتة حديد
لو لفيت السجادة الحمرا وجيت تتنيها هتلاقي حتة الحديدة دخلت في..احمد عز
ومفاجأة سارة للعرسان والعرايس قميص نوم "العادلي" مع قطعة بشكيرهدية عليها



4-

مفاااجاة حكومية لكل بيت مصري
اشتري "مج النظام" واشرب احلي شاي
المج عليه صورة سوزي وهي قاعدة فوق كتب القراءة للجميع
اول ما تصب الشاي في المج..صورة سوزي تنور وسوزي تقول "أح" من سخونية الميا
عذب سوزي زي ما انت عايز في "مج النظام"
والأن ايضا غلاية النظام وخلي النظام كله يقول "أح"




5-

مشتاق للفساد؟؟ مشتاق ترجع ايام الفساد تاني ؟؟ انت من الفلول؟؟
بتعيط بليل وتقول "فينك يا بابا حسني؟؟"
يبقي انت اكيد محتاج "بلح الفلول"
بلح رمضان نزل من دلوقتي وهنعملكم بلح "الفلول"
اجمد من البلح اللي حسني مدفعش عليه ضرايب !!!!
بلح الفلول طعمه واااو مش معقول
بلح بطعم النظام وايام فساد زمان
كل بلح الفلول ودوق طعم الفساد الاصلي من تاني
البلح منتهي الصلاحية ..لاحساس بالفساد الكامل




6-

موبايل لعبة جديد للاطفال
فانوس "نظامك ايه؟"
موبايل فيه عدة نغمات حكومية جامدة

النغمة الاولي :
"قولي عملك ايه ؟؟ حسني
حسني اللي انت كاويه ؟
وانت
انت الغالي عليه الغالي عليه قولي"

النغمة الثانية :

"وزير مجنون يصحي من النوم
بيسرق شعبه وينزل لعب
حكومي يهب ..هوبا يشب
ياخد في رشاوي وهات يا لعب..
جدو حسني عنده ايه ؟
ايا ايا اوووه "

النغمة التالتة "نغمة هيفاء لسوزان" :

يدن الديك اصحي قوام
اسرق واجري في شعبي قوم
امال ؟
ده انا ..بنت بلد قوي..
امال ..ده انا ..شاطرة وفاسدة قووووي "


النغمة الرابعة "بهاء سلطان" :

اقول يا حكومة متردش..
ياعم وزيرنا
ميردش
يا عم المجلس..ميردش
اعمله اييييه؟


النغمة الخامسة "سلام وطني الفلول" :

"بلادي بلدي بلاااادي
لكي دررررجي وفسااااادي
مصر ييييا ام البلاااااااد
احنا جينا كالذئااااااب
نسرق الشعب الكريييييم
ونرشي في كل الاياااادي..
بلاااادي بلااااااادي
لكي دررررجي وفسااااادي"





7-

اريال تليفزيون انما ماركة معتبرة لكل بيت
اريال "صفوت"
يجيب معاك كل القنوات لان الاريال "صفوت" علي طول "رافعهم"
لكل قنوات البورنو اللي تحبها قطعة خاصة ماركة "موافي" تجيبلك كل القنوات اللي بالك فيها
مع صفوت ....اكيد هتتظبط..وانت فاهمني !!




8-

الان لعبة القرية الذكية علي كل تليفون
اتصل وحمل لعبة "القرية الذكية"
اللعبة بسيطة جدا
متاهة المطلوب منك ان توصل الوزراء الاغبياء لمكان القرية الذكية
والوزراء الاغبياء في "القرية الغبية"
وياريت توصل "نظيف" للمدام..!!



9-


برواز "عصابة القناع الاسود"
برواز كبير تعلقه ع الحيطة
فيها صورة عم دهب علي شكل "احمد عز"
ومحظوظ" جمال"
وهم قاعدين في وسط الدهب
وعصابة القناع "باقي النظام" كله
برواز شيك جدا لمحبي الشخصيات الكارتونية.





10-

الان "طرة" تقدم
صور نفسك مع مسجونين النظام
الصورة بعشرة جنيه بس
تعالي زور طرة واتمتع واتصور مع كلاب النظام
عرض خاص جدا للرحلات والحفلات وهم هيخدموا عليك
اكتب اسمك واسم من تحب علي حبة رمل من توشكي هيعملهالك "المغربي" !




11-

الان ..لاول مرة..بدلة "مبارك"
خدمة مبارك "بدلتك باسم حضرتك"
اكتب اسمك علي بدلتك بالطول والعرض زي مبارك
خصم خاص للنرجسيين والمرضي النفسيين
يلا قوام اكتب اسمك في كل مكااان



ويلا بسرعة واللي ما يشتري يتفرج ع النظام..او يتفرج علي طرة

لقاء مدونة "بيس يا مان" مع إئتلاف شباب الثورة

مصر اللي عايزينها..مصر اللي مادة ايديها لينا مصر اللي بتستنانا من سنين
قدر المصريين يوصلولها اخيرا بعد ما غابوا عن بعض سنين وسنين بسبب الخفافيش من مبارك ونظامه
وبعد أول فجر..واول شمس تطل علي مصر وهي بتضحك..انطلقت شعلة الحرية كأجمل العاب نارية احتفالا بمصر وهي بتقعد علي عرشها الجديد..
"ثورة ثورة حتي النصر..ثورة في كل شوارع مصر..حرية في كل شوارع مصر..فرحة في كل شوارع مصر"
مصر بتقولكم يا مصريين من سنين .."الحرية قدر..والثورة قدرة"



ظهرت عدة احزاب في الفترة الاخيرة في مناخ الحرية الحالي وعدة ائتلافات كان ابرزها "ائتلاف شباب الثورة" الذي نتحاور معه اليوم
ونستضيف أحد اعضاء شباب ائتلاف الثورة ليجيبنا عن عدد من الاسئلة الهامة التي تتعلق بمستقبل مصر والمحافظة علي الثورة المجيدة
كان هذا اللقاء لمدونة بيس يا مان مع الاستاذ حسام مؤنس من شباب ائتلاف الثورة :





أولا : عرفنا عن ائتلاف شباب الثورة وازاي اتكون وهل بتفكروا في انشاء حزب بنفس الاسم من شباب الاحزاب المختلفة ؟



حسام مؤنس : ائتلاف شباب الثورة تشكل فى البداية أثناء الاعتصام فى ميدان التحرير فى ايام الثورة ال18 من 5 مجموعات هى : شباب حركة العدالة والحرية - شباب حزب الجبهة - شباب 6 ابريل - شباب الاخوان - شباب حملة البرادعى .. وبعد حوارات مع عدد من الاطراف السياسية التى لعبت دورا هاما فى الدعوة لمظاهرات 25 و28 يناير وفى الثورة أثناء التواجد فى التحرير تم توسيع الائتلاف ليضم أيضا : شباب حزب الكرامة - وهم من اتشرف بتمثيلهم فى الائتلاف - واتحاد الشباب التقدمى بحزب التجمع واتحاد شباب حزب الغد وشباب حزب الوفد . بالاضافة لعدد من الشباب المستقلين .
ولعب الائتلاف مع باقى القوى الوطنية دورا مهما فى الثورة سواء ميدانيا او سياسيا او اعلاميا ، وربما كانت من ابرز مواقفه اثناء اعتصام ميدان التحرير رفض التفاوض قبل تنحى مبارك وهو الموقف الجذرى الذى تبناه الثوار ، كما لعب الائتلاف دورا مهما فى مرحلة ما فى الحوار مع المجلس العسكرى ، وفى اسقاط حكومة شفيق واقتراح د. عصام شرف كأحد الاسماء لتولى موقع رئاسة الحكومة الانتقالية ، بالاضافة لدوره المتواصل حتى الآن - رغم بعض الانتقادات عليه وبعضها محق - فى متابعة واستمرار أهداف الثورة واستكمالها .
أما فكرة تأسيس حزب لشباب الائتلاف فهو أمر غير وارد لأنهم كما يبدو من أحزاب وتيارات سياسية مختلفة ، وبعضهم ممن لم يكن حزبيا قبل الثورة انتمى وساهم فى تأسيس بعض الأحزاب الجديدة .. والائتلاف هو شكل من أشكال الجبهة السياسية المؤقتة الملتقية على أهداف الثورة ودوره ينتهى بتحقيق كافة أهداف الثورة والمرحلة الانتقالية ، وربما يكون ما يفكر فيه الائتلاف حاليا من تبنى ترشيح بعض الشباب باسمه فى انتخابات مجلس الشعب المقبل فى اطار قائمة وطنية واسعة يتبناها الائتلاف مع عدد اخر من القوى الوطنية هو الخطوة المقبلة التى تجعله يواصل دوره كجبهة ولكنه ابدا لا يمكن ان يتحول الى حزب سياسى




ثانيا : مصر بعد الثورة لسه في حاجات كتير جدا متغيرتش فيها زي مثلا البورصة وبعض قيادات الشرطة واتحاد الكرة الرياضي وقيادات القطاع الصحي فمتي تتوقع تغيرات جذرية في هذه القطاعات ؟


حسام مؤنس: مصر بعد الثورة تغيرت تماما وجذريا ، صحيح أن هناك قطاعات متعددة لا تزال قياداتها فى مواقعها واغلبهم - ولا اقول كلهم - محسوبين على النظام السابق وحزبه الفاسد ، وصحيح أن الصف الثانى فى أغلب الوزارات وأجهزة الدولة أيضا لا يزالوا فى أماكنهم ، ونعلم أن تغيير هؤلاء قد يستغرق بعض الوقت ، لكن ما نريده هو الاحساس بخطى متسارعة نسبيا فى الاطاحة بكل من انتمى لنظام الفساد والاستبداد والتبعية الذى سقط بثورة 25 يناير .. واعتقادى أن هذه المرحلة لن تنتهى تماما بالتخلص من كل الوجوه والأيدى الفاسدة الا مع انتهاء المرحلة الانتقالية وانتخاب برلمان ورئيس جديد ليواصلا استكمال مهام التطهير التى نأمل أن ينجز القدر الأكبر منها خلال المرحلة الانتقالية




ثالثا : بصفتك ايضا من قيادات حملة الاستاذ حمدين صباحي فايه رايك او اي نقطة انت شايفها هي ميزة كبيرة لحمدين صباحي علي باقي المرشحين ؟


حسام مؤنس: رأيى فيما يخص حمدين صباحى مرشحا لرئاسة مصر - وهو أمر لا علاقة له بكونى عضوا فى ائتلاف شباب الثورة وانما يتعلق بوجهة نظرى الشخصية وقناعاتى الفكرية التى لا تمثل الائتلاف بالضرورة - هو أن حمدين هو أفضل من يمكن أن يقود مصر فى المرحلة المقبلة .. ليس فقط لأنى انتمى إلى نفس التيار السياسى والفكرى الذى ينتمى له ، ولا لعضويتى بنفس الحزب الذى يعد صباحى مؤسسه ومن أبرز قياداته ، ولا حتى لأن حمدين الأفضل بين المرشحين .. فحمدين فى رأيى هو الأفضل على الاطلاق بين كل من رشحوا أنفسهم ومن طرحت أسمائهم ومن لم يطرحوا أصلا .
مصر فى اعتقادى تحتاج فى المرحلة المقبلة بعد الثورة الى قائد ثورى بطبعه وتاريخه ، وتحتاج إلى رئيس ينتمى للأغلبية الساحقة من الشعب الذى عانى الأمرين فى عهدى السادات ومبارك .. مصر تحتاج إلى شخص عاش بين العمال والفلاحين والصيادين والفقراء ، رجل دافع عنهم وانحاز لمصالحهم منذ كان طالبا جامعيا وربما قبل ذلك .. رجل قدم الكثير من التضحيات فى سبيل ما يؤمن به .. والأهم أنه رجل يؤمن بقدرة هذا الشعب ويعتبره بحق لا بالقول فقط القائد والمعلم ، وربما يكون هو واحدا من القلائل ولا اريد ان اقول الوحيد الذى ظل منذ السبعينيات وحتى قبل 25 يناير مؤمنا بقدرة الشعب على الثورة والتغيير .. هذا فى ذاته يمنحه ميزة كبرى ، الايمان بالشعب وقدرته على الثورة هو نفسه الايمان بالشعب وقدرته على النهضة .. وهذا ما تحتاجه مصر ، نهضة كبرى تليق بثورة كبرى ، نهضة تقوم على الديمقراطية السياسية والعدالة الاجتماعية والكرامة والاستقلال الوطنى ، وتلك هى محاور برنامج صباحى التى طرحها منذ تقدمه كبديل عن نظام مبارك فى فبراير 2010 أى قبل الثورة بعام كامل .. وهى نفس الملامح الرئيسية لبرنامجه الانتخابى الذى يعده حاليا مجموعة من الخبراء والمتخصصين الوطنيين ، لنقدم من خلاله إطار خطة قائمة على تلك المحاور لتحقيق نهضة كبرى لمصر سياسيا واقتصاديا واجتماعيا .
باختصار ، ربما تتشابه بعض البرامج ، وربما يشتبه على البعض المواقف السياسية ، لكن التاريخ النضالى والانحيازات الفكرية والاجتماعية ليست محل لبس ، وادعو الجميع للمقارنة بين تاريخ ونضال وتضحيات كل مرشح ومدى اتساقها مع ما يدعو له الآن وما يتبناه من افكار وبرامج .
لكل هذا وغيره ادعم حمدين صباحى ، الذى لديه مواصفات اخرى فضلا عن نضاله وافكاره ، فهو مثقف موسوعى ، وذو حس فنى رفيع ، وموهبة شاعر مدفونة ، وانسان حقيقى بكل ما تحمله الكلمة من معنى





رابعا : هل للحرية نتائج سلبية ؟ يعني هل دلوقتي اي حاجة بالاضراب والاعتصام والوقوف امام المحاكم والتأثير علي حكم القضاء ؟ طبعا ده نتيجة لقمع مبارك ولكن ايه الحل في كتر الاعتصامات في مصر ؟ وهل شايف تاثيرها علي الاقتصاد المصري ولا دي فزاعة جديدة عشان عدم المطالبة ببقية الحقوق ؟


حسام مؤنس: لا توجد حرية بلا ضوابط .. لا يوجد شئ فى الدنيا مطلق حتى الحرية ، والحرية تتوقف عندما تضر حرية الآخر .. لكن ما يعتبره البعض الآن فوضى أو ما شابه هو فى رأيى مقصود فى بعض جوانبه .. فهناك دفع للاحساس بأن مصر تعيش فوضى نتيجة الثورة ، وهو أمر غير صحيح ، حالة الحرية الراهنة لها علاقة بانفجار ما كان مكبوتا منذ أكثر من 30 عام ، الناس وجدوا أمامهم مساحة واسعة لممارسة كل شئ مما كان ممنوعا عنهم من قبل .. وأظن أن تلك مرحلة مؤقتة ستنتهى قريبا جدا وسيتعلم الجميع قواعد انضباط ومسئولية الحرية .. وأعرف أن الكثير قلق من كثرة الاعتصامات والاضرابات التى يسمونها فئوية ، وقد يكون لدى بعضهم الحق ، لكن على الجانب الآخر هناك ملايين المواطنين الذين حرموا من أبسط حقوقهم فى فرص العمل والسكن اللائق والأجر العادل لسنوات طويلة ، والآن من حقهم أن يطرحوا مطالبهم .. المشكلة فقط أن تلك مرحلة انتقالية فى اعتقادى لن تشهد تحقيق انجازات وانما مجرد انتقال من مرحلة لأخرى .. لذا فأنا مع حق المعتصمين والمتظاهرين فى المطالبة بحقوقهم ومع الاستجابة لما يمكن منها الآن .. لكن أيضا مع وعيهم وادراكهم لأنه ليس ممكنا تحقيق كل المطالب دفعة واحدة وأن هذا دور النظام المقبل الذى سينتخبه الشعب المصرى .
أما من يقولون أن الاعتصامات تهدد الاقتصاد المصرى ، فأظن أن تلك أحد الشائعات المتعمدة فى اطار الحرب النفسية ضد الشعب ليكره الثورة ويخشى نتائجها ، فالاضرابات فى تراجع مقارنة بالايام الاولى بعد تنحى مبارك ، ومن يريد أن يتحدث عن الانهيار الاقتصادى فليحدثنا اولا عن تأثير الفساد والنهب المنظم على مدار 30 سنة وأكثر منذ بداية عهد السادات على الاقتصاد الوطنى ، وتأثير الاحتكار وصفقات الخصخصة وتزاوج رأس المال مع السلطة .. ثم ليقارن ذلك بالاقتصاد حاليا ويخبرنا أين كنا وإلى أين نتجه .. وكلى ثقة ويقين أن مجرد التخلص من النظام السابق معناه أن اقتصادنا فى طريقه للنمو والتصاعد والتطور



خامسا : دور الاعلام حاليا في اثارة الفتن الطائفية بابراز بعض القضايا عمدا كيف يتم تطهير الاعلام بشكل كامل وتطبيق نظم للمحاسبة فيه ؟



حسام مؤنس: مشكلة الاعلام كما مشكلة الكثير من القطاعات فى الدولة .. الثورة نجحت بالفعل فى جزء كبير ، لكن المشكلة أن تلك الثورة لم تصل إلى السلطة بعد بمعنى أنها لم يكن لها قيادة ولم تنجح فى بلورة قيادة جماعية محل توافق جماعى سياسيا وشعبيا لتولى شئون الحكم .. وبالتالى فالقائمين على ادارة شئون البلاد حاليا - مجلس عسكرى وحكومة - لا زالوا كثيرا ما يفكرون بنفس الطريقة القديمة ولا يزالوا يستعينون بنفس المنهج والرجال .. التغيير الجذرى الذى هو المرادف لمعنى الثورة لم يصل بعد لكل القطاعات ، وبالتالى فهناك تهويل أحيانا فى الاعلام ، وهناك حجب لبعض الآراء ووجهات النظر ، وهناك توجيه لما يظنه مسئولى الاعلام صالح من يقومون بادارة شئون البلاد ، واحيانا يظهر بعض التقديس لهم وكأننا أزحنا ديكتاتور لنصنع غيره .. لكن على أى حال يبقى أن تطهير الاعلام وتغيير مفاهميه واستقلاله عن السلطة أمر سيحتاج لبعض الوقت لكن لا بد من البدء فيه من الآن بخطوات جادة ، وأظن أنه سيكتمل وسينتهى مع تولى نظام جديد بانتخاب حر مباشر من المصريين للبرلمان والرئيس القادمين






سادسا : ازاي لسه قيادات في قطاع الداخلية لسه زي ما هي رغم ان دي ثور مش مجرد اعتصام او اضراب مثلا ؟


حسام مؤنس: الداخلية وأجهزتها وقطاعاتها لديها مشكلة أكبر من مجرد تغيير قياداتها وهى خطوة رئيسية وضرورية .. لكن المشكلة أننا سنواجه ما هو أعمق ، ثقافة الشرطة أصلا فى مصر ظلت لفترات طويلة بما فيها ما يتم تعليمهم إياه فى الكليات وتربيتهم عليه هو التعامل مع المواطن على أنه عبد لديهم وأن رجال الشرطة هم الأسياد . وطبعا من دخل كليته برشوة أو وساطة ، وتعلم وتربى بهذه الطريقة ، سيحتاج فترة طويلة حتى يعيد التأقلم والتكيف مع وضع جديد بعد ثورة جزء رئيسى مما فعلته أنها أسقطت سيطرة وسطوة جهاز الأمن على المواطن الشريف .. ولا اقصد هنا أبدا اسقاط هيبة رجل الأمن الشريف ودوره ضد المجرمين والبلطجية .. لكن البعض الآن يتعمد تحويل الأمر إلى تشفى فى الشعب الذى ثار بترك البلطجية يصولون ويجولون ، ورغم علمى ايضا ان الحديث غن البلطجة كثيرا ما يتم تهويله والمبالغة فيه كجزء من الحرب النفسية ضد الشعب المصرى ، لكن ايضا حتى الآن الشرطة لم تعد للقيام بدورها بشكل فاعل وحقيقى .. وهو أمر سيحتاج وقت أطول ، وسيحتاج تغيير فى منهج تفكير رجال الشرطة ، وسيحتاج لعلاج نفسى واعادة تأهيل لعدد كبير منهم ، وسيحتاج أيضا لتخريج دفعات جديدة بمناهج تربية وتدريب وتعليم مختلفة تماما .
فى ذات الوقت فمطلبنا باقالة قيادات التعذيب والبلطجة والاتاوات والفساد وانتهاك كرامة المصريين قائمة ومستمرة ، ومطلبنا بمحاكمة كل من تورط فى جرائم قتل الشهداء واصابة المصابين لا تنازل عنها




سابعا : هل انت خايف من حكم الاخوان وهل تتوقع انهم بالقوة فعلا انهم ياخدوا معظم مقاعد البرلمان وايه اللي هيحصل لو مسكوا البلد ؟


حسام مؤنس: ليس مطروحا بالنسبة لى على أى نحو أن الاخوان سيحكمون مصر .. صحيح هناك نغمة تعالى وقوة متصاعدة نسبيا فى خطاب الاخوان عقب الثورة ، لكن شخصيا لا اخشى اطلاقا من انفرادهم لا بالحكم ولا حتى بنسبة الاغلبية المطلقة فى البرلمان .. الاخوان الاقوى تنظيميا بالتأكيد من بين القوى السياسية الحالية ، لكنهم ليسوا بالضرورة الأكثر شعبية .. وكما أن هناك كثيرون منضمون وأنصار للاخوان ، فهناك أيضا الكثيرين الرافضين لانفرادهم بالحكم أو متخوفين منهم .. الاخوان كانوا القوى الأبرز - فضلا عن تنظيمهم وامكانياتهم المادية وتاريخهم الطويل منذ عشرينيات القرن الماضى - لأنهم كانوا فى مواجهة سلطة مستبدة تقمعهم وتسجنهم .. أما الآن فذهبت تلك السلطة ، وبقى أن يواجه الاخوان قوى سياسية أخرى كلها محل اختبار الآن بما ستطرحه من أفكار وبرامج وممارسة .. واعتقدى الشخصى أن الاخوان سيحصدون نسبة لن تزيد عن 25 - 30 % فى الانتخابات المقبلة ، وهى نسبة قد تبدو الأكبر مقارنة بأى تيار سياى آخر ، لكنها لا توفر لهم أغلبية ، واعتقادى أيضا أن تلك النسبة ستقل فى اقرب انتخابات تالية لها








ثامنا : كثرة الاحزاب في مصر بشكل مبالغ فيه ما هو تاثيره السلبي لو زادت عن الحد ؟ وما دور الشباب الان في تكوين احزاب في ظل قانون مباشرة العمل السياسي ؟


حسام مؤنس: لا توجد اى مشكلة على الاطلاق فى كثرة أعداد الأحزاب والواقع سيفرز من منها القوى الذى سيستطيع الاستمرار والتواجد وبناء قواعد وشعبية .. ومن منها سيكون مجرد موضة وستنتهى سريعا .. طبعا أحد المشاكل أن كثير من يريد ممارسة عمل عام ممن انفتحت أمامهم طاقات الأمل بعد الثورة يقرر انشاء حزب سياسي ، دون التفكير فى النظر للاحزاب القائمة التى قد تكون قريبة منه ومن فكره ، ودون وعى كافى ودراسة حقيقية لطبيعة الحزب السياسى ودوره وبرنامجه واهدافه .. وربما كثيرون يريدون ممارسة عمل عام لكن الانسب لهم ان يتحركوا فى أطر العمل النقابى أو التنموى أو الاهلى او الحقوقى .. لكن تلك مسألة اعتبرها طبيعية فى اطار مناخ الحرية الذى لا زلنا نستنشق أولى نسماته .. ومن حق من شاء أن يؤسس حزبه والتجربة وحدها ستحدد من سيستمر ومن سينتهى .. لكن تبقى أحد مشاكل القانون الجديد وهو ما يحجم طاقات كثيرة وأفكار حقيقية وجادة فى بناء الأحزاب هو اشتراط التوثيق ل5000 توقيع بتكلفة مالية مرتفعة للكثيرين من ابناء الشعب المصرى ، ثم الاعلان عن تأسيس الحزب فى صحيفتين على الاقل ، وهو ما يعنى عمليا ان أى حزب لكى يؤسس نفسه يحتاج على الاقل الى مليون جنيه حد أدنى فقط ليستكمل تلك الاجراءات ناهيك عن تاسيس مقراته وغيرها من مصروفات الاحزاب الجديدة .. واظن ان تلك شروط مبالغ فيها بعض الشئ وتحتاج لمراجعة







تاسعا: : كام في المية شايف ان الثورة حققته ؟

حسام مؤنس: الثورة حققت اكثر من 80 % من اهدافها ، فقد اسقطت رؤوس النظام الفاسد والمستبد ، وكسرت الى الابد حاجز خوف المصريين ، واثبتت اننا امام شعب حى وجيل شاب قادر على التغيير والنهضة .. وباقى نسبة تقارب 20 % او تزيد قليلا تتعلق بادارة المرحلة الانتقالية واستجابتها لتحقيق باقى اهداف الثورة وتسليم السلطة لمؤسسات منتخبة تستكمل تطهير البلاد وبناء النظام الجديد للنهضة بالوطن



عاشرا : هل شايف ان مصر ممكن ترجع تاني منارة العرب والعروبة في ظل حلم حمدين وطموحه الناصري وفكره للقومية العربية ؟


حسام مؤنس: مصر اعادتها بالفعل لقلب امتها العربية ولقلب قارتها الافريقية ولدورها ومكانتها دوليا .. وثورة مصر تأتى فى سياق ثورات عربية متوالية وستستمر حتى تحرير الأمة من حكامها الطغاة التابعين .. وهو تأكيد جديد على وحدة هذه الأمة وترابط مصيرها وتأثرها الشديد بما يجرى فى مصر .. واعتقادى أن مصر ستعود لقيادة أمتها العربية وقد بدأت فى ذلك بمجرد ثورتها .. وبغض النر عن انتخاب حمدين او غيره ، فلا يوجد أى حاكم قادم أيا كان سيستطيع تجاهل اطار مصر وانتمائها العربى ، لكن طبعا يبقى الفارق أن من يؤمن بالقومية كمشروع قومى ونهضوى مرتبط بمصر ومستقبلها وأمنها القومى هو أكثر من يستطيع اعادة بناء دور مصر القومى وريادتها عربيا وتكاملها مع أمتها




حادي عشر : من تري في هؤلاء رئيسا يستطيع ان يعطي مصر حلمها المشروع ويحققه لها بالاضافة لحمدين : عمرو موسي -البرادعي-ايمن نور-البسطاويسي-حتاتة- مرتضي منصور ام غيرهم ؟


حسام مؤنس: للاسف ومع احترامى للكثير من المرشحين ، لكنى لا اجد منهم ابدا اى من يستطيع لا بفكره ولا بتاريخه ولا بقدراته ان يحقق لمصر ما احلم لها به سوى صباحى ، وهذا ليس انحيازا لشخص وانما لمشروع وتجربة وافكار .
ومع ذلك افرق تماما بين اسماء مثل البسطويسى واضيف اليه عبد المنعم ابو الفتوح باعتبارهم مرشحين وطنيين حقيقيين لهم مواقف واضحة ضد النظام السابق وقدموا بدرجات متفاوتة تضحيات ، ومن بينهم أيضا ايمن نور والبرادعى رغم ملاحظاتى العديدة عليهم واختلافى مع تيارهم الفكرى فضلا عن حواجز جديدة اراها بين البرادعى وبين المواطن المصرى العادى البسيط ، وبين اسماء مثل عمرو موسى أو مرتضى منصور .. هذه اسماء لا يجوز لها اصلا ان تفكر فى حكم مصر بعد الثورة فى ظل انتمائها لنظام سابق ودفاعها المستميت عنه رغم ما يبدو من بعضهم من انقلاب على احاديثه السابقة ودفاعه عن نظام مبارك .. أما الفريق مجدى حتاتة فهو لا يزال غامضا حتى الآن قد يكون رجلا محترما وصاحب تجربة ورؤية لكنه لا يزال بعيدا جدا عن الشارع والمنافسة على الرئاسة وان كنت اعتقد ان الاهم هو أن مصر تحتاج لرئيس مدنى وليس عسكرى حتى وان كان عسكرى سابق




ثاني عشر : ازاي تم دعوة رموز الوطني للحوار الوطني ومين المسئول عن ده ؟


حسام مؤنس: دعوة رموز من الحزب الوطنى عار على من دعوهم ونظموا مهزلة الحوار الوطنى ، والحقيقة أن ما جرى فى الحوار الوطنى يشبه الى حد كبير دعاوى الحزب الوطنى السابقة للحوار مع احزاب المعارضة ، ولهذا رفضنا الاستمرار فيه وكنا نفكر فى الانسحاب منه قبلها لكننا اردنا ان نثبت ان الحوار غير جاد وان نفضح مشاركة شخصيات حرضت ضد الثورة ووقفت ضدها ولا مكان لها فى حوار وطنى جاد حول مستقبل مصر الثورة .. وعلى أى حال فاعتقادى أنهم تلقنوا درسا واجبا وأن الحوار قد فشل تماما وأنه لم يعد ممكنا قبول حوارات شكلية لاستكمال الديكور بينما ينفرد طرف أيا كان بالقرار فى المرحلة المقبلة





ثالث عشر: اول يوم نزلت فيه التحرير كنت شايف النور جاي والفجر هيشقشق وهنشوف مصر الام من تاني مش مصر المغتصبة ؟ولا كان عندك بعض تخوف ان الثورة متنجحش ؟

حسام مؤنس: أول يوم وصلنا التحرير يوم 25 لم أكن مصدقا ما يجرى حولى .. شاهدنا شباب يشارك لأول مرة وحماس غير طبيعى واخلاص وانتماء وقدرة على التضحية لم نراها طوال حياة جيلنا .. ويومى 26 و27 تأكدت أن الأمر هذه المرة مختلف فقد كانت هناك مظاهرات تتجول فى احياء ومحافظات مختلفة دون سابق تنظيم وترتيب وبشكل تلقائى وعفوى جدا .. وفى يوم 28 تأكدت أنها الثورة ، مصر خرجت عن بكرة أبيها فى كل مكان .. وبالتأكيد ساورتنى أحيانا لحظات قلق واحباط خاصة فى ظل الحرب النفسية التى حاول النظام السابق استخدامها لافساد الثورة .. لكن ميدان التحرير وكل ميادين وشوارع مصر أكدت وأثبتت أن الشعب المصرى بحق هو القائد والمعلم .




رابع عشر : في النهاية ..اسعدني الحوار معاك وبالتوفيق دايما وياتري شايف مصر راحة للنور بعد كام سنة من خروجها من النفق ؟ واي اغنية بتحبها من اغاني الثورة العظيمة ؟


حسام مؤنس : مصر بدأت فى طريقها للنور ويقينى أن الشعب قادر على النهوض بالوطن فى سنوات قليلة جدا مقارنة بما قضاه النظام السابق من سنوات لافساده .. أما الاغنية الاجمل فهى التى ستغنى عندما تكتمل الثورة وتنتصر وتبدأ مرحلة بناء النظام الجديد .. لكن حتى الآن فأجمل ما سمعت من أغانى الثورة هى أنغام ورامى جمال وعزيز الشافعى .. وطبعا لا ننسى أغنية ازاى لمحمد منير

الحرق بالجاز في ليالي الجواز..الجزء العشرون..بيان الزوج للفيس بوك

زوج غيور قوي ..شاف مراته ع الفيس بوك وكان لازم يقدم ليها الورقة دي اللي فيها الوصايا بتاعة الفيس بوك من زوج غيور الي زوجة فيسبكاوية :



"ايتها الزوجة العزيزة..نظرا لما يمر به الفيس بوك والبلاد من تغيرات جذرية ..فقد قررت الاتي ..بيان رقم واحد :



أولا : ممنوع الشات الا مع اقارب الدرجة الاولي الي التالتة وتقسمي الاصدقاء الي مجموعات هي "اقارب" "اغراب" "اغراب قوي" "معرفهمش اساسا" "مين دول"
علي انك تكلمي بس المجموعة الاولي اللي هي "اقارب"


ثانيا : اذا عملك "بوك" اوعي تردي عليه البوك الا لو بنت لانه كده زغزغك وانتي قبلتي الزغزغة وقولتي "هئ هئ" وانا مراتي متتزغزغش من راجل غريب


ثالثا : التعليق علي الصورة لو قال "ايه الحلاوة دي" او "ايه الجمال ده" يتمسح فورا ويتعمله بلوك وياريت الصور تبقي متغطية فيها تماما ومش باين غير اللي حواليكي زي برنامج "خلف الاسوار"


رابعا : سأشرف اشراف كامل زي الاشراف القضائي علي الانتخابات علي جميع الكومنتات في صفحتك ويتم فلترتها حسب الطلب


خامسا: اللايك يكون بحساب ومتعمليش لايك لاي حاجة لازم يكون فيها مثلا "اطفال" او "اغنية وطنية" وميتعملش لايك ابدا لاغاني نجم الجيل


سادسا : لا تختلي ابدا بصديقك في "المزرعة" حتي لو طلب منك الانضمام تبقي جارته في المزرعة او حتي لقي البقرة بتاعتك او الخروف او حتي عرض عليكي زراعة الفراولة لا تسمحي بده لان الحكاية هتبدأ بجيرة في المزرعة وبعدين يا عالم هتوصل لفين


سابعا : اقعدي في صفحتك وفي "وولك" واقفلي عليكي بابك ومتخرجيش برة تشوفي وولات الناس ..من خرج من ووله اتقل مقداره


ثامنا : الاستيتس تكون متفلترة للبنات بس مش لكل اللي ع الوول الا لو كانت لها غرض ديني او سياسي فافتحيها للجميع ..يعني "حجبي" الاستيتس بتاعك


تاسعا : دايما اما تخشي اللينك او الاستيتس بتاعة واحد غريب خدي معاكي "محرم" انا مثلا او اخوكي لو انا مش موجود ..وسبيه هو يعلق الاول وانتي وراه لان الخلوة في الاستيتس والفيديو مش حلوة


عاشرا : في البروفايل بتاعك حاولي تكتبي اسرتك كاملة وتحطي بروفايلاتهم عشان اللي عايز يعاكس يحس ان ليكي سند في الفيس بوك وليكي ضهر ووراكي رجالة


حادي عشر : اما تحطي صورة البروفايل حاولي تنقي اوحش صورك او تشوفي صورة ليكي وانتي حولة او ياريت تحطي صورة كارتون احسن زي معظم البنات بيحطوا كارتون مش عارف ليه


ثاني عشر : ممنوع تماما المنافسة في الالعاب علي تكسير الهاي سكور بتاعي بالذات لان هيبقي منظري وحش وماليش كلمة قدام مراتي وهي بتكسر الهاي سكور بتاعي كل يوم


ثالث عشر : ممنوع فتح الوول لوضع الاعلانات والكومنتات من الاغراب ولا حد يعملك تاج الا البنات صاحباتك.. لان التاج من الولد كأنه بيحط ايده علي كفتك .


رابع عشر : لازم تشيلي جميع الحاجات اللي هي فيها اسئلة عنك زي مثلا "هل هي سعيدة" والحاجات دي لان هو لو جاوبها يبقي عارف كل حاجة عنك وهو لو يعرف كل حاجة عنك يبقي انا البس جيبة بقي.


خامس عشر : عدد الاصدقاء لا يزيد عن 40 علي الا يقل عدد الاقارب فيهم عن عشرين


سادس عشر : دايما حطي صورك وانتي صغيرة وممنوع الصور وانتي كبيرة ومبقلظة


سابع عشر : ممنوع تماما الدخول علي وولات اصحابي انا بالذات لاما هادخل عند صحباتك كلهم وهاضيفهم كلهم


ثامن عشر : بالنسبة للولاد اللي هتضيفيهم فالافضل يكونوا سلفيين او اخوان او ليهم انتماءات سياسية ومنكوش شعرهم مش شباب جاي يظبط يعني


تاسع عشر : اي "دعوة" تيجي ليكي لحضور حاجة معينة من اي ولد ارفضيها لان كده بكرة يدعوكي ع العشا ويعمل "ايفنت" خاص !


عشرون : ممنوع مصاحبة البنات اللي كاتبة
"it's complicated"
او
"in relationship"



واحد وعشرون : كل اسبوع حطي صورة البروفايل بتاعتك صورة دينية ده بيردع الناس اللي ليها اهواء خاصة وبيثبتهم وتكون الصورة "مانع للتظبيط" او زي "الصاعق الكهربائي" للي بيعاكسوا


ثاني وعشرون : ممنوع الدخول ع الفيس بوك وانا مسافر لفترة وتكلميني ع الماسنجر بس وبلاش شات الفيس بوك


ثالث وعشرون : ياريت تلمعي صورتي كزوج يعني وتهديلي اغنية رومانسية كل فترة كده او تقولي اني زوج فاجر وكده


رابع وعشرون : ممنوع الدخول ع الفيس بوك بعد الساعة 12 بليل لان بيبقي اكنك ماشية في الشارع الساعة 12 لوحدك او دخلتي في حتة مقطوعة


خامس وعشرون : ممنوع الاشتراك في اي صفحة او جروب الا باذن رسمي مني حسب نوعية الصفحة والتأكد من الاحترام فيها مني





"واي مخالفة للتعليمات سيتم حرمانك من الفيس لفترة شهر والله الموفق "

انت مختلف اذا انت ضدي

العنصرية والاضطهاد والتعنيف بسبب تصريحات مخالفة لرأيك موجودة في العالم كله..دايما نسمع عن حوادث وتصريحات عنصرية او افعال عنصرية لدين او طائفة او لون اخر من البشر.
في المهرجان اليومين دول "كان" طردوا المخرج الدنماركي "لارس فون ترير" بسبب تصريح قال فيها وهو بيهزر انه بيتعاطف مع "ادولف هتلر" واعلن كمان رفضه لاسرائيل واعتبرها مصدر ازعاج او زي ما قال انها بتصيبه بالقرف !!

تصريح زي ده اعتبروا فيه عنصرية لانه بيشتم اسرائيل وتم طرده من المهرجان رغم انه مخرج شهير جدا وكان استقباله حار في مهرجان كان ولكن تقريبا كل ده حصل مش عشان موضوع هتلر ولكن عشان تصريح اسرائيل اكيد..والغريبة ان الراجل ده يهودي وعملوا فيه كده امال لو كان دين اخر وشتم اسرائيل كانوا هيعملوا فيه ايه ؟؟

من الحوادث العنصرية الشهيرة ايضا طبعا القس جونز وموضوع حرق المصحف وكان عايز يعمل يوم كل سنة لحرق المصحف وطبعا ده قمة العنصرية والقذارة ولكن حتي قرايبه اعلنوا انه افعاله غريبة وتصيبهم بالخزي والعار في تصريحات ليهم وطلع في برامج كتير جدا وحاول يقاوح وميعتذرش عن اللي قاله لدرجة انه تم القبض عليه في ادي المرات اما بدأ موضوعه ده ينتشر قوي وبدأت الناس تحس انه مجنون وعنصريته وحشية .

من اشهر الحوادث العنصرية ايضا موضوع "تيلو زاراتسين" الراجل ده عضو إدارة البنك المركزي الألماني وعضو بارز في الحزب الاشتراكي عمل كتاب اسمه "المانيا تلغي نفسها" وفي الكتاب ده شتم المسلمين والاقليات كلها في المانيا وقال بأن المجتمع الألماني يتحول شيئاً فشيئاً إلى مجتمع حيواني بسبب تزايد ولادات المسلمين وكمان قال تصريح ليه بأن الأجانب في ألمانيا ليست لهم سوى وظيفة إنتاجية واحدة هي بيع الخضروات والفاكهة.
الكتاب ده اثار ضجة كبيرة جدا في المانيا وغضب عارم من المسلمين وخصوصا رئيس المجلس الاسلامي في المانيا وقال ان "تيلو زاراتسين" غوغائي وعنصري وله اكثر من تصريح ضد المسلمين والاقليات



ايضا اشهر حوادث هزت العالم الاسلامي كانت فضيحة الرسوم الدنماركية والتهكم علي الرسول وقد تم التهجم علي الرسام العنصري في احد المؤتمرات من قبل بعض الاشخاص لغضبهم الذي اثار حفيظة العالم الاسلامي كله لدرجة انهم عملوا حملات لمقاطعة البضائع الدنماركية ووزعوا ورق لكل بضاعة دنماركية لان الراجل ده اتساب حر طليق ولم تتم معاقبته باسم الحرية !

وكمان الحادثة العنصرية الشهيرة داخل قاعة المحكمة اللي تم قتل فيها الضحية المصرية في المانيا من الماني من اصل روسي كان كل مشكلته انها ارهابية لابسة الحجاب وتم التعدي عليها داخل المحكمة وطعنها في فوضي عارمة اثارت الرأي العام الألماني والعالمي.

اما في فرنسا فاشتكي موظفين كتير جدا من بتوع "خدمات التليفون" لعرض المنتجات انه اما بيقول اسمه ويكون فيها اسم مسلم زي محمد او غيره من الاسماء المسلمة ساعات الناس بتقفل في وشه لان البعض عنصري ومبيحبش المسلمين هناك وحتي في الوظايف في فرنسا نفس المشكلة لدرجة ان البعض بيغير اسمه او بيشرتط عليه المدير تغيير اسمه عشان يدخله الوظيفة !

كمان تم طرد اشهر مذيع امريكي في احد المحطات لتصريحاته المعادية بشدة للاسلام ونفس الموقف حصل في برنامج "ذا فيو" والمذيعات استائت جدا من تصريحات احد ضيوفها ضد المسلمين وسابوله الحلقة ومشيوا.


في الفترة الاخيرة كانت جلسات استماع امريكية لعدد من الشخصيات البارزة حكوميا لمناقشة خطر الاقليات المسلمة ومدي تهديدهم لسلامة امريكا واعتبرها المجتمع الامريكي قمة العنصرية وانها خطوة تزيد من الحساسية بين المسلمين والغرب واستاء العالم الاسلامي وادان بشدة جلسات الاستماع دي اما في فرنسا فعملوا قانون يحرم لبس النقاب واعتبره البعض اجراء امني عام والبعض الاخر اعتبره عنصرية ضد الاقلية المسلمة وضد الاقليات لدرجة ان ظابط وقف واحدة يديها مخالفة وعايز يحبسها عشان لابسة النقاب اهل فرنسا نفسهم نزلوا له ومنعوه لانهم ضد القانون اللي شايفينه عنصري ده.


في الفيلم الاحنبي
i love you man
كان في مشهد قمة في العنصرية والوقاحة اما جاب كلب سماه "انور السادات" فسأله صاحبه قاله سميته كده عشان بتحب السادات ؟؟
قاله "لا طبعا عشان شبه السادات"
وكان البعض فكر في انه يرفع قضية علي الفيلم ولكن دون جدوي.



وحتي بعد الثورة في حادثة عنصرية غريبة كان الكلب البوليسي اللي معاهم في عملية قتل بن لادن اسمه "القاهرة" ! وده خبر مؤسف قوي للمصريين ان الامريكيين وتصرفاتهم العنصرية بتثير الاستياء يوم بعد يوم وطبعا مش الامريكيين نفسهم منعا للتعميم ولكن الادارة الامريكية.


اما عن عنصرية البيض للسود فحدث ولا حرج واكتر فيلم ناقش القضية دي هو
the people speak
وكان تجمع عدد من ابطال هوليود السود بيقروا في تاريخ اضطهاد السود في امريكا سواء قاصائد تصف الاضطهاد او بيقروا من كتب التاريخ بعض الاحداث العنصرية اللي حصلتلهم وعمليات القتل بناءا علي اللون في امريكا رغم ان القصة دي خفت قوي اليومين دول بعد ان اصبح رئيس امريكا نفسه اسود ولكن لسه في بعض العنصرية القائمة علي اللون والعرق ايضا .

دليلك في الانتماء لمصر.."فور داميز"

سلسلة كتب بتنزل عن اي موضوع وبيكون في نهاية عنوانها
for dummies

وهي سلسلة شهيرة جدا برة وفي العالم كله وعشان كده قولت اكتب الانتماء "فور داميز" او اللي بيقولوا مافيش حاجة اسمها انتماء اصلا



قال الشاعر العظيم احمد شوقي :
وطني لو شُغلت بالخُلدِ عنه... نازعتني إليه بالخُلدِ نفسي


كتير جدا من شبابنا في الوطن العربي عموما فقدوا حس الانتماء..فقدوا القدرة علي حب وطنهم..وفقدوا معاها معاني التضحية والوفاء اللي مرتبطة بالانتماء وحب الوطن..
البعض فقدوا وحاسس بالزعل وبيقول مش عارف احب مصر..والبعض جاهل وبيكابر ويقول مافيش حاجة اسمها حب مصر اصلا..والجملة اللي هي دليل الحماقة الاول "هي مصر عملتلي ايه ؟ " !!!

اي انسان وحتي الحيوان عنده غريزة الانتماء..اما اللي بينكر الغريزة دي فهو لا يعتبر كائن حي ..لان الكائن الحي متأصل فيه الانتماء حتي الحيوانات وده ظهر في مجموعة من الافلام الوثائقية الكتير جدا علي البي بي سي وغيرها عن هجرة الحيونات والطيور المهاجرة واحساس الحيوان بالانتماء لمكان والعودة اليه مرة اخري رغم الهجرة وزي كمان ما قال مظفر النواب "حتي الطير لها اوطان"..!
وانتماء الحيوان لقطيع معين واحساسه بالحب والوفاء للقطيع موجود منذ بداية الحياة.

في العهد الفرعوني ظهرت قصص كتير جدا لحب الوطن ومنها قصة احمس البطل الشهير ومدي حبه لوطنه وانتمائه..جهز جيوشه وهو في سن 19 سنة وطارد الهكسوس حتي في عاصمتهم وهزمهم شر هزيمة للدفاع عن اراضي مصر لدرجة انهم مظهروش تاني في التاريخ ابدا .
وفي الثورة الفرنسية ايضا قصة حب للوطن واخراج الفاسدين منها وخصوصا قصة "سجن الباستيل" والمرأة الشهيرة التي اشارت للسجن وتبعها الباقين لتحرير ارض فرنسا الغالية من الفساد والظلم.

ومن اشهر القائدين الذين اظهروا حبا للوطن وعشقا له هم غاندي ومصطفي كامل واخرين وكان غاندي رائد التجربة السلمية ومصطفي كامل صاحب المقولة العبقرية "لو لم اكن مصريا لوددت ان اكون مصريا".

اما قصة عرابي الشهيرة ومدي حب المصريين لوطنهم فتقول القصة :

"كان عرابي حامي الديار مارا ذات يوم في خط النار بجهة كفر الشيخ فاستوقف نظره شيخ هرم قد حنت الايام ظهره فاستدعاه اليه وقال له : يا ابت انا اري شيبك لا يسمح بوجودك بين صفوف المقاتلين فلك ان تستريح كما تشاء قال له الرجل كيف تحرمني من ان اجود بدمي فدية عن بلادي من المغيرين عليها وانا وان كان كل اولادي هنا ايضا في ميدان القتال وكلني اود ان اشترك معهم فقبله عرابي وسأله عن اسمه فقال :جرجس بقطر من اهالي مركز ملوي بالمنيا"


وكان احمد لطفي السيد دائما ما يقول ""أن أول معنى للقومية المصرية هو تحديد الوطنية المصرية، نريد بها الوطن المصرى او الاحتفاظ به "
وكان ابن خلدون ايضا يحن الي اوطان عندما قال في القاهرة مثلا ( لم أر فى البادية أو الحاضرة مدينة زاهرة مثل القاهرة )

اما عن الرسول صلي الله عليه وسلم فله قصص واحاديث في حب الاوطان ايضا والانتماء وكان الرسول بيقول في الرقية "((باسم الله، تُرْبَةُ أَرْضِنا، ورِيقَةُ بَعْضِنا، يَشْفَى سقيمُنا بإذن ربنا))

وايضا قال الرسول "من مات دون ارضه فهو شهيد ومن مات دون عرضه فهو شهيد ومن مات دون ماله فهو شهيد"
وقصة اخري تقول قدم أصيل الغفاري على رسول الله صلى الله عليه وسلم من مكة قبل أن يضرب الحجاب على أزواج رسول الله صلى الله عليه وسلم؛ فقالت له عائشة :كيف تركت مكة ؟قال: اخضرت أجنابها وابيضت بطحاؤها واعذق أذخرها وانتشر سلمها الحديث وفيه، فقال رسول الله صلى الله عليه وسلم: حسبك يا أصيل لا تحزنا .

وهنا الرسول بيقول وهو خارج من مكة :

وقف على حدودها، والتفت إليها وقال: (ما أطيبك من بلد وأحبك إلي، ولولا أن قومي أخرجوني منك ما سكنت غيرك).
و قال النبي صلى الله عليه وسلم ايضا في جملة معروفة: ويهاً يا أصيل دع القلوب تقر

ومن طريق الأصمعي سمعت أعرابياً يقول: إذا أردت أن تعرف الرجل فانظر كيف تحننه إلى أوطانه وتشوقه إلى إخوانه وبكاؤه على ما مضى من زمانه.

ومن طريق الأصمعي أيضاً قال قالت الهند: ثلاث خصال في ثلاثة أصناف من الحيوان :الإبل تحن إلى أوطانها وإن كان عهدها بها بعيداً، والطير إلى وكره وإن كان موضعه مجدباً، والإنسان إلى وطنه وإن كان غيره أكثر نفعاً. " من موقع الحبيب علي الجفري"


وقال الجاحظ: "كانت العرب إذا غزَتْ، أو سافرتْ، حملتْ معها من تربة بلدها رملًا وعفرًا تستنشقه".



ومن اشعار الجاهلية :

وبالنسبة للعصر الجاهلي او للعصور القديمة

قصة امرئ القيس ورحلته لقيصر و قال بعد تجربة بعده عن وطنه باكيا


ألا أبلغ بني حُجر بن عمرو وأبلغ ذلك الحيَّ الحديدا

بأني قد هلكت بأرض قوم بعيداً من دياركم بعيدا

ولو أني هلكت بأرض قومي لقلت الموت حقٌ لا خُلودا



وده شاعر بيتكلم عن شوق الحيوانات الابل يعني ايمهم لاوطانها

بان الأحبة بالعهد الذي عهدوا فلا تَمالُكَ عن أرضٍ لها عمدوا

وراد طرفك في صحراء ضاحية فيها لعينيك والأظعان مطرد

واستقبلت سربهم هيف يمانية هاجت نزاعاً وحاد خلفهم غرد


وطبعا بيت الشعر الاشهر

نقل فؤادك حيث شئت من الهوى ما الحب إلا للحبيب الأول. كـم منزل في الأرض يألفه الفتى وحنينه دومـاً لأول منزل


اما الموضوع المتعارف عليه دايما في الكلام عن الانتماء فهو قصة القومية العربية ولا الاسلام وطبعا الاسلام اولي ولكن العروبة لا تعني شيئا وانها دعوة جاهلية والكلام المعروف ده وهنا يرد البنا نفسه ويقول " أن الإسلامَ لا ينكر أن يعمل كل إنسان لخير بلده أو أن يقدمَه على غيره، فيقول في رسالة (دعوتنا): "إن الإسلام قد فرضها فريضةً لازمةً لا مناصَ منها، وأن يعمل كل إنسان لخير بلده، وأن يتفانَى في خدمته، وأن يقدم أكثر ما يستطيع من الخير للأمة التي يعيش فيها، وأن يقدم في ذلك الأقرب فالأقرب رحمًا وجوارًا، والإسلام أيضًا لا ينكر فضل العرب أو خيريتهم، فالإسلام نشأ عربيًّا ووصل إلى الأمم الأخرى عن طريق العرب وجاء القرآن بلسان عربي مبين، وجاء في الأثر "إذا ذل العرب ذل الإسلام"


وايضا يقول البنا :-

1 -لا بأس أن يعمل كل إنسان لوطنه ويقدمه على ما سواه.***

2- ثم يؤيد الوحدة العربية باعتبارها الحلقة الثانية في النهوض.

3- ثم العمل للجامعة الإسلامية؛ باعتبارها السياج الكامل للوطن الإسلامي العام.

4- ويرى البنا أن كل نوع يشد أزر الآخر

***"من موقع عن حياة الشيخ البنا"


وتقول عائشة التاج في مقالة لها :

إذا لم يقدم لنا وطننا شيئا فماذا قدمنا له نحن ؟ سؤال غاية في الأهمية .
الوطن ليس فقط حقوقا نتمتع بها وإن كانت ذات أهمية بالغة في مرتكزات الشعور بالمواطنة .
الوطن أرض وماء وتاريخ وجغرافيا و إرث حضاري ووجدان جماعي وعديد من الأشياء الثمينة والباهظة والمقدسة حتى .
من يختزل الوطن في حكومة قاصرة فنظره قاصر لأن الحكومة وأعضاؤها آيلون للزوال لا محالة . والشعوب المسؤولة لا تسقط في فخ كراهية اوطانها نتيجة لآثام بعض مسيري الشأن العام ،بل تبحث عن الفعل اللازم لإزاحة هؤلاء وتعويضهم بمن هم أكثر جدارة وأخلاقا
فهؤلاء مهما خلدوا آيلون للزوال ونحن أيضا ,
فقط بصماتنا جميعا تبقى على هذه الأرض أو هذا الفضاء إن تمكنا من تثبيتها بشكل من الأشكال .
العلاقة بالوطن تفاعلية وجدلية وتطورية أيضا . وبقد ما تحب وطنك سيحبك إن آجلا أو عاجلا
من يريد أن يأخذ عليه أن يعطي ، من وقته وعمله وإخلاصه ومشاعره .""



ولهذا كان جان جاك روسو يقول: "لن نصبح بشرا إلا إذا أصبحنا مواطنين".

وطبعا الطاعة للوطن زي طاعة الام والاب يعني مش لازم تنتظر منهم حاجة عشان تحبهم وتقول هم عملولي ايه يعني فكرة التضحية زي قصة اسماعيل مثلا وازاي سلم نفسه لابوه وياريت كل واحد فعلا يقول لبلده "يا وطني افعل ما تؤمر" زي ما قال "يا ابت افعل ما تؤمر" وطاعة الاب ايضا شئ مامور به في الاسلام "انت ومالك لابيك" .


فكرة الانتماء وحب الوطن هي اللي خرجت ابطال زي غاندي وسعد زغلول ومصطفي كامل وجورج واشنطن وسيمون بوليفار وغيرهم.



اما عن الغرب فحدث ولا حرج عن الانتماء اللي هم عايزينا نوصل للمرحلة دي وهم اصلا منتمين ومتعصبين كمان ومطفشوش من فرنسا عشان ازمة المعاشات بل بالعكس ساندوا المتضررين حتي وهم مش متضررين ويوم عيد الاستقلال الامريكي ياريت نشوف الشعب بيحتفل ازاي وبيحب بلده ازاي لان الغرب تحس انه بيحب جدا فكرة اننا نخرج من جذورنا ومنحبش اوطاننا علي اساس انهم كده برضه وهم بيعشقوا اوطانهم بجنون كمانوجتي نلاحظ ده في الافراح الملكية وازاي الشعب بيلتف في الظروف دي وينادي شعارات للملكة وللبلد نفسها.

وازاي هوليود بتطلع افلام حربية كل شوية عن حب الوطن زي انقاذ الجندي رايان و فيلم
the flags of our fathers
وافلام كتير جدا من النوعية دي اللي بتعزز قيمة الانتماء للوطن والتضحية زي كمان فيلم
the messanger
انتاج 2009 اللي بيتكلم عن اللي بيبعتوه لاهالي الضحايا عشان يبلغهم بوفاة ابنهم في الحرب وكان فيلم دارمي رائع.



وكان في قصة جميلة قوي عن الانتماء عن العالم الرائع والمثقف احمد زويل اللي طبعا عارف قيمة الانتماء زي اي انسان بيفكر ..نشوف القصة بتقول ايه :

كان حامل جائزة نوبل فى الفيزياء قد طلب لقاء محمود وائل، الطفل المصرى النابغة وأسرته. محمود هو أذكى طفل فى العالم، ويبلغ معدل قياس معدل الذكاء عنده 155، وكان قد كتب رسالة لزويل منذ عام،
عرض عليه فيها ما توصل إليه فى علم الرياضيات، وبدأها بعب...ارة «أنا طفل مصرى أبلغ من العمر 10 سنوات»، كما يروى زويل، مضيفا أنه حاول دون جدوى الحصول على تليفون والده.
ثم نجحت السفارة الأمريكية فى ترتيب اللقاء خلال زيارة د.أحمد زويل للقاهرة وفى نهاية اللقاء طالب زويل والدى محمود بعدم الضغط عليه، وإعطاءه فرصة للنمو بطريقة طبيعية. وقال ردا على سؤال والدته اذا كان يجب أن ترسله للدراسة فى الخارج: أعتقد أن السنوات الأولى فى تكوين الإنسان مهمة فى حضن ثقافته الأصلية. لو محمود ابنى، اتركه فى هذه المرحلة يرتبط مصر ويتعلم الانتماء

شئ عظيم من عالم عبقري زي زويل لانه مدرك طبعا لقيمة حب الوطن والانتماء في تكوين شخصية الانسان بدل ما تطلع شخصية مهلهلة مالهاش وطن ولا اصل واللي مالوش وطن ولا اصل يبقي ايه ؟



كل الامثلة عن الاشخاص الذين يمثلون ايقونات في الانتماء والاخلاص ستجدهم ابطالا اما الامثلة علي عدم الانتماء والدعوة الي عدم الانتماء ستجدهم يمرون بمشاكل نفسية او كتاب سوداويين او لهم قيم وافكار ملحدة مثل كولن ولسون الذي يدعو كتابه بوضوح "اللامنتمي" الي الوجودية والالحاد..او نيتشة الذي يقول ان الاله قد مات ولابد للانسان السوبر مان ان يحل محله بالطبع..ودي نظرية شهيرة مضحكة لنيتشة كعادة افكاره زي مقولته "اود ان اغسل يداي كلما صافحت رجلا متدينا" ..!!!

ودائما ستجد الدعوة لعدم الانتماء جاية من المدرسة الوجودية بكتابها كلهم وفلاسفتها المشهورين ولكن لازم اما ناخد افكار كاتب يبقي مناخدش سطر ونسيب سطر يعني التأثر بكاتب يكون تاثر بالكاتب وليس بسطرين !!

مثلا عندك كيرك جارد من المدرسة الوجودية ومن كبار المدرسة دي بيقول "ان اللي بيختار اليأس بيختار نفسه في اعلي قيمة ليها"
كل المدرسة الوجودية اللي حاولت تحل العقل مكان الدين بالكامل افكار سوداوية ويائسة لابعد الحدود وكلها نظريات مضحكة جدا وغير منطقية لمعظم الناس وطبعا ليهم انتقادات بالجملة من كتاب كتير جدا.


يعني هم مش بيكرهوا الانتماء للوطن بس وناخد الحتة دي لا ..لازم نكمل السطر هتلاقيهم بيقولوا "نكره الانتماءات الكاذبة كلها..دين او اوطن او حزب".
والمدرسة الوجودية اهم نقطة فيها انهم " يعتقدون بأن الإِنسان أقدم شيء في الوجود وما قبله كان عدماً وأن وجود الإِنسان سابق لماهيته" "ويكيبديا"


لكن بتطلع الوف الشباب ويقولك "مافيش حاجة اسمها انتماء وان ده كلام فارغ" وطبعا احنا اتعودنا علي المقولات الفارغة دي من زمان كل فترة بيطلع واحد يقولك "مافيش حاجة اسمها حب" وواحد تاني يقولك "مافيش حاجة اسمها اله" وهكذا بدون اي كلام منطقي موضوعي انما مجرد راي سطحي..وانا دايما شايف انك طالما بتقول راي فلا قيمة له الا بادلة مسندة وكتير كمان في اي موضوع مافيش حاجة اسمها ده راي اصل انا حر..
في كلمة شهيرة بتقول "انت حر مالم تضر" بالاضافة لجملة "حريتك تقف عند حرية الاخرين"
يعني مش اشتم الرسول مثلا واقول دي راي يا اخي او اشتم الوطن واقول انا حر..!


في ناس تطلع تقولك انا هاجيب مقولات بتتكلم عن عدم الانتماء..وهنا لنا رد واضح وصريح ان المقولات ليست ادلة لاني استطيع اني اجيب مقولات عن اي موضوع في الدنيا حتي الكفر بل وعشرات المقولات ولكن الاثبات يكون بادلة دامغة من قصص ابطال وشخصيات تاريخية مثلا مش من بعض الكتاب الروائيين لان في مقولة مثلا تقولك " لقد خلقنا الله عريايا والانبياء علمونا الخجل" دي دليل علي ايه يعني ؟؟
والوف المقولات من النوع ده ولهذا فالنوع ده مطاط جدا ويتحمل اي معني.




طيب تعالي نقول ماذا يحدث لو..يعني لو قولنا مافيش حاجة اسمها انتماء لمصر تعالي نشوف مع بعض النتيجة الحتمية :



اولا:

اختفاء جميع الشخصيات الوطنية الغيورة علي بلدها مثل مصطفي كامل وغيره واختفاء حتي قصص البطولات

ثانيا:

تهرب الناس من جيوشهم العربية بحجة ان ده لا يخدم مصلحتهم حيث ان مصلحتهم فقط في اعلاء كلمة الدين وليس الوطن

ثالثا :

: انهيار كامل للدول العربية بهجرة جميع شبابها بعقولهم الي الغرب علي اساس اعلاء كلمة الدين


رابعا :

اختفاء السلام الوطني والاعلام للدول بحجة ان الدين بس ومافيش حاجة اسمها ولاء لارضي المهم ديني فين

خامسا :

وبعض الدول تدي مصر علي قفاها وبعض الشباب من فكرك يقول مش مهم ماهم مسلمين يدونا علي قفانا بلا غيرة علي مصر

سادسا:

تفكك العلاقات الوطنية المصرية بين المسلمين والمسيحيين بحجة ان الولاء فقط للدين انا هاسيب ناسي وارضي وشارعي واروح حيث الدين في البرازيل ومش مهم الناس دي ولا الارض دي

سابعا :

انهيار القيم والعادات العربية والاسلامية ايضا حيث ان الدين الاسلامي سيصبح مهلهل مشتت في كل ارجاء الارض بلا اوطان من حوله بل هم حفنة مسلمين في كل البقاع ولكن بلا اوطان

ثامنا :

نخر العادات الاوروبية في كل العائدين الي اوطانهم حتي تصبح مصر قطعة من اوروبا بالسلبيات المنقولة والمتبقية بين صراع بين الدين وبين العادات الغربية وتعود بمن المنتصر الي ارضك الدين ام العادات

تاسعا :

تواري العلماء المصريين وانكارهم لارضهم ويقولوا في المحافل فقط انا عالم مسلم وليس عالم مسلم مصري ورجوعنا الي عصر الكهوف

عاشرا :

لن تجد البلاد ما تفتخر به من علماء حيث ان كل شئ منسوب فقط للاسلام وليس الدول حتي الفرق الكروية والرياضية سننسبها الي الاسلام وليس الي ارضها الام

حادي عشر :

اهمال التاريخ المصري وبطولاته لان الحديث فقط سيكون عن التاريخ الاسلامي فلن تجد مصر ايضا ما تفتخر به في تاريخها حيث سننسب كل شئ للاسلام وهذا مالايحدث في اي دولة اوروبية حيث ان لكل

دولة تاريخها الخاص وفخرها الخاص وسلامها الوطني الخاص

ثاني عشر :

اغلاق كافة المتاحف الاثرية في كل الدول العربية لان سيكون فقط متحف واحد اسلامي وبهذا يموت التاريخ الفرعوني العظيم ايضا الذي يفتخر به كل مصري في الخارج





وطبعا لو واحد ولع علم مصر قدامي في فرنسا وهو مسلم انا مغيرش لانه مسلم زي بقي..وطبعا دي وجهة نظر من الحماقة انها ميتردش عليها.


وبقول لكل انسان في العالم عايز يقول رايه بحرية من تحت جملة "انا حر"
يا جماعة افهموا معني الحرية التي وهبنا اياها الخالق والدولة وحقوق الانسان
افهموا الحرية كويس الحرية مكفولة للجميع ولكنها لمكفولة لكي يعبث بها الجميع
الحرية ليست في القيل والقال ولكن في الخطابة وحسن المقال
الحرية لازم نتقدم بيها مش نرجع بيها ميت سنة ورا
الحرية مش من بقي ولكن من عقلي
الحرية مش بصر دي بصر وبصيرة
الحرية مش اني اقول اي حاجة لمجرد العناد
الحرية مش كلمة مجردة ولكنها وصفة مجربة
الحرية مش مجرد استعمار فكري
الحرية مش اني احاول انال م الاخر وخلاص
الحرية مش اني احاول ابلغ ثقافيا او انضج ثقافيا علي حساب ما بناه الناس من قبل
الحرية شمعة ننور بيها مش نحرق بيها وننشر افكارنا الهدامة
الحرية معرفة
الحرية سيف حطه في غمده ومتستعملوش عمال علي بطال لانه هيخلي سمعتك محارب للهواء
الحرية هبة وليس هواية
الحرية انفتاح وليست انغلاق
الحرية مش اني اقول ولكن اني افهم وافهم الناس
الحرية مسئولية وليست مسودة لافكارنا السوداء




وفي النهاية عايز اقول..الانتماء الانتماء الانتماء يا شباب مصر اولا واخيرا ..
والمجد للوطن..العزة للوطن..

متلازمة السبع خطـوات..قصة قصيرة

من منكم لا يعرفها فهي "الإسم الحركي" لقلبي..أو شبح أحتاج اليه كي اخاف قليلا واشتاق الي طعم الخوف..أو حلم أناجيه ويناجيني في محراب النبض وساعة سكينة.
عروسة بحر دمائي ..جنسيتها "أنا"..لا تشعر معها انك تحتاج لشيئا الا كسرة خبز وكأس نبيذ وعينيها وشمعة !
في يوم من ايام شتاء بارد في صباح لا يعرف الا لغة الصقيع وضبابية الاحلام وبعض الزخات كان اول لقاء لعيوننا وشعرت بأن عينيها أوفي صديق .
شعرت بأن الموقف بالكامل حولي مغزول من يدها كي يتدثر قلبي من برد صباح لا يدرك احساسي.
ولم ادرك الوقت ولم اعرف الا "سبعة خطوات" تفصلني عنها وأنا اقترب وكأني اقول للزمن "ذرني ومن عشقت وحيدا"..
في "سبعة خطوات" موسيقية عشقية تشكل عمري وكياني واحساسي لاول مرة بالامتلاك..
فكيف كانت تلك الخطوات الي الجنة ؟

في الخطوة الأولي تختفي الاشياء..تختفي معالم الجدران والوان الزيت عليها وابواب المبني وكل شئ..لا أعرف دليل غير الوصول لعينيها..ولا اعرف نور يهديني الا ما بين يديها..

في الخطوة الثانية اري كل شيئا من الماضي واضح امامي ..اشخاص من ماضي حياتي او من طفولتي يتشبثون في ذيل قميصي ..مدرب كرة السلة وخادمة المنزل وبعض الاصدقاء القدامي وبعض من اقاربي وكانهم يحذرونني بأصوات لا أسمعها..أصوات تختلط في عقلي بصوت الموقف الذي اراه الان فتتكون "حالة"..حالة "نيرفانا" كاملة لا ادركها ولكن تدركني ..والحب هو "سيد الموقف"..
ابعدهم عني واحدا تلو الاخر ..اهرب منهم واشد بطرف قميصي بعيدا عنهم فيتساقطون بعيدا وهم يصيحون "احذر" بصوت بعيد اسمعه وله صدي صوت عجيب..

في الخطوة الثالثة رأيت الشمس والقمر امامي لا اعرف هل هذا طبيعي ام هي من "اهوال يوم العشق" ؟ رايت الشمس والقمر وليس هم فقط بل رايت احد عشر كوكبا كانوا لي مبتسمين..!
لم ادري هل هذه الاوهام حقيقة ام هي من رهبة اقترابي للخطوات الاخيرة !

في الخطوة الرابعة وجدت كيوبيد أمامي بسهامه وابتسامته ويقول لي "أبشر"..لم اعرف بماذا يبشرني هل حقا يبشرني بجنة عينيها ..هل انا "عاشق عينيها المختار" ؟ هل انا من ستعطيه الدنيا "سندريلا" بدون حذاء تفقده او حفلة منتصف الليل وعربة خيالية ؟

في الخطوة الخامسة أحسست بشئ يتفجر داخلي ..بركان يعتصر القلب ويخرج بعض "اللافا" علي سطح ضلوعي..كي ينصهر الموقف في ضلوعي ويشكل سيفا ادخل به بخبث في عينيها كمعركة طروادة..
سيف سحري اقتل به الخوف وانتصر به في تلك الحرب العشقية المقدسة.."هرمجدون" مشاعري لن تقف الان ..كل ما احتاجه سلاح سحري..

في الخطوة السادسة..إنحني لي الزهر ..تشكل المكان حديقة وازها تتعطش للندي من دمعة تفر من عيوني ودمعة تفر من قلبي..حتي ان التقا الدمعتان تشكل منهما نهر عشق طاهر وأصيل من خمر صافي..
ولكن لم يسكر الزهر بل سكر المكان وسكر الزمان في تلك اللحظة..لحظة الخطوة الاخيرة ولحظة الحقيقة..

في الخطوة السابعة والاخيرة..خرجت كل صفاتي من داخلي امامي لاول مرة..لعمل حلقة "زار" ..صوفية الموقف اخرجت مني صفاتي ورأيت لاول مرة في حياتي "طمعي" يراقص "طيبتي"
و "جنوني" يراقص "دهشتي" و "تمردي" يراقص "كبريائي" و"عنادي" يراقص "هدوئي"...
ولكن الكل تشاجر كي يحصل منها علي الرقصة الاخيرة..
ثم وصلت في النهاية الي "سدرة منتهي" الجمال..

وقفت ولم اقل لها شيئا في اول لقاء لاني لم اكن اتأمل عينيها ولكن كنت اسمع صوت الحكمة من "فينوس" حين كلمتني لاول مرة وقالت "هذه اجمل ابداعاتي" قلت بصوت عالي "صدقتي والله"..
نظرت لي في استغراب وتأملت نظرتي الغريبة والقريبة وابتسمت..و..

لماذا اروي كل هذا ؟؟
رأيتها منذ ايام ولهذا ذهبت الي الموقف عابثا طفلا ورجلا وكهلا ..ذهبت هناك حاضر بكامل وعي كما "تأثير الفراشة"..
لم اشعر بنفسي الا في البيت ومازال المرض يتملكني ومازالت المتلازمة تعصف بي رغم سنين البعد..
ومازالت في متلازمة "السبع خطوات" ذهابا وايابا في حيرة ..لا اعرف الا عض اناملي وفرك عيوني كي اشعر اني لست في حلم اخر..
ومازالت هي لا تخرج مني..
ومازالت في نفس "المتلازمة" وجعا ولغة اكتمال بدر..!
ورأيت من الشباك أم تسير بابنها الصغير وتقول "تاتا..خطي العتبة"..وتعد له خطواته
ولكن قبل الخطوة السابعة اغلقت الشباك بعنف كي لا أتأمل طفل يتعذب..
وكأني مؤمن بمتلازمة السبع خطوات في كل شئ وفي كل مكان حتي لطفل صغير
وياللدهشة اذ نظر الي الطفل وابتسم..
حينما اكمل خطوته السابعة..
كابوس ؟؟؟

الريس سنه كبير قوي يا جماعة مش كده ؟؟

ده سنه كبير ..ارحموه..سيبوا الرئيس في حاله كفاية..
جملة كتير بنسمعها من ناس كتير جدا في مصر ..كأن السن شافع للحق او للتنازل عنه .
كأن الطاغية أما شعرها تشيب بتحول لون الظلم الاسود للون العدل الابيض حسب لون شعره.
كأن اللي ماتوا من السرطان في مصر مكانوش كبار كانوا بس أطفال ولو حتي كانوا بس اطفال ده سبب كافي اننا ناخد بالثأر.
تخيلوا لو كان الرسول عايش وشاف حسني ده حاكم علي امارة اسلامية كان هيقول عنه ايه ؟
لو كان الرسول عايش وشاف حسني بيشرب الناس مجاري والناس بتبيع كليتها من الفقر رغم ان عمر بن الخطاب كان خايف يتحاسب لو تعثرت دابة اثناء حكمه !!
وعايزين ترحموه !! "من لا يرحم لا يُرحم" كما قال الرسول..
يعني ايه احنا اسفين يا ريس ؟؟؟ ايه معني الجملة دي ؟؟
احنا اسفين يا ريس انك قتلت ولادنا وفي الاخر بنيتلهم مستشفي سرطان او قبر جماعي يلمهم وبفلوس تبرعات كمان مش فلوس انت شفطتها يا حرامي .
احنا اسفين يا ريس ان الناس سكنت شقوق الصخور والميا بتتسرب ليهم بليل وهم نايمين والعقارب والتعابين بتمشي في دواليبهم.
احنا اسفين يا ريس اننا كنا بنغتصب في المعتقلات من مجموعة مرضي نفسيين انت موظفهم في اجهزة الدولة .

انا عايزكم يا بتوع"احنا اسفين" والشعب المصري كله يقول :

احنا اسفين ياالله علي اننا بضعفنا وقلة حيلتنا رفعنا من شان حسني وخليناه يطغي فوق رقاب البلاد والعباد
احنا اسفين يا الله اننا سمحنا ليه يقتل اطفالنا واحلامنا وموقفناش ولا غيرنا المنكر ولا باضعف الايمان
احنا اسفين يا الله ان الراجل ده بجبروته حكمنا 30 سنة واحنا مكناش بنعمل اي حاجة غير الدعاء وانت يارب قولت اعملوا وخدوا بالاسباب.

نرجع بقي لموضوع السن بتاع مبارك ولو حتي عمره قرن كامل هنكتب ايه ؟ عمره "قرن من الفساد"..!
كل دول العالم بتاخد حقها بعد الثورات او عموما من غير ثورات من اي شخص فاسد مهما كان سنه ..مافيش حاجة اسمها عمرك كام في حاجة اسمها عمر فسادك كام !
عمرك 80 ؟؟ طيب بس عمر فسادك يا حسني "30" يعني راجل يافع..شاب كبير فاسد ماسك سيفه فوق الكل وبيقتل وبيهلك في بدنا وقوتنا.





وللي بيطلب رحمة مبارك عشان سنه بس لكم في الامثلة دي مثل وقدوة :




** جاك شيراك مش هو سنه كبير ؟ ليه بقي بيحاكموا جاك شيراك بتهمة إساءة استخدام المال العام أثناء رئاسته بلدية باريس..!
يعني بيحاكموه كمان علي حاجة قديمة هو ارتكبها من زمان جدا مش حتي اثناء فترة رئاسته ..الناس دي مبتسيبش حقها حتي لو بعد عشرين تلاتين سنة ولو هفوة بسيطة ده مجرد اختلاس يا جماعة مش قتل وهتك اعراض في الاقسام وناس بتشرب سم هاري في مصر.
مجرد اختلاس فتح عليه النار وبدأ الكل يطالب بمحاكمته وعلي فكرة محدش قال "هانت عليكم العشرة" والكلام الفارغ ده لان شيراك برضه كان علي عشرة مع الشعب الفرنسي جميلة وكان بيحضر ماتشات كاس العالم ويهيص معاهم ويسقفوله زي جمال كده في ماتشات مصر لكن ده ميشفعش للفساد..احتفل معاك اه انما تسرقني لأ وستين لأ.




**مدير عام صندوق النقد الدولي اليومين دول لسه الحادثة جديدة اسمه "دومينيك ستراوس" ده متهم في قضية اغتصاب ..هل نسيبه بقي عشان سنه او نقول عن البنت اكيد كذابة ومش ممكن ستراوس يعمل كده ؟ ولا نحقق ونطبق العدل ونشوف ايه اللي حصل ؟
الراجل جابوه من ع الطيارة وهيدفع مليون غرامة عشان يقيم اقامة جبرية عقابا ليه عشان التهمة دي رغم انها مجرد اغتصاب عاملة غرفة ملابس هجم عليها واصابها بكدمات وهو عاري تماما !!
دي تهمة اغتصاب واحدة يا عالم مش تهمة اغتصاب وطن يا ناس يا هوه
دي تهمة اغتصاب بنت مش تهمة اغتصاب علم مصر !



**برلسكوني عملوله جلسة لسحب الثقة محدش قال اصل الراجل عشرة معانا وكده لا كل كلام ايطاليا عن فساده سواء في المدونات او في وسائل الاعلام وعن علاقاته الحريمي اللي ملهاش حصر وفضايحه الجنسية وبيتحقق معاه في حوادث وبيروح القسم زي اي فرد من الشعب محدش بيخطف البنت اللي بتتهمه او يهددها بشريط جنسي مثلا زي الاستاذ القواد صفوت باشا بتاعنا !
برلسكوني كان في احد الزيارات واحد الشباب اداله بالبوكس في وشه وخلاه يجيب دم وكان رد فعل الناس انهم مبسوطين جدا من ضرب برلسكوني الفاسد ويتمنوا اقالته ايضا.
محدش قال انهم اسفين عشان سنه لان اهم حاجة عندهم معاقبة المفسدين.



** شاوشيسكو في روما كأكبر مثال واقربهم لحسني ..في ناس هتقول يا عم حرام ازا يحسني زي شاوشيسكو..بصراحة انا مش شايف فرق ده قتل الوف وده قتل ملايين بالفقر ايه الفرق بينهم ؟
وحتي في ايام الثورة قتل وجرح الوف المصريين بالامن الفاسد بتاعه.
حكموا في رومانيا علي شاوشيسكو بالاعدام هو ومراته سنة 1989 بسبب تهم القتل والسرقة من اموال الشعب والاختلاس.
وتحس بالتقارب بينه وبين حسني ومراته اما تعرف ان برضه كانت مراة الطاغية ده كانت اسمها "ام الطفولة والامومة" اما الطاغية نفسه كان مسمي نفسه "دانوب الافكار" من نهر الدانوب يعني لانه كان شايف نفسه عبقري ومافيش زيه ودي دايما سمة من سماة الطغاة والمرضي النفسيين علي حد سواء ودايما بيكون العكس صحيح انهم لا يملكوا عشر هذه العبقرية بل ممكن يكونوا في قمة الجهل !



** بعد الثورة البلشفية قتلوا القيصر الظالم وجميع الاسرة الملكية بالرصاص ونقلوهم للمقابر وقتلوا حتي الاطفال والنساء في الاسرة الملكية كمان يعني زي ما القيصر مرحمش فيهم كبير ولا صغير هم كمان ردوا عليه بنفس المبدأ ومرحموش ولا كبير ولا صغير ابدا في الاسرة الملكية كان عندهم روح انتقامية رهيبة لانهم عاشوا في الحرمان والقمع سنين لحد ما خدوا حريتهم.
يعني بيتخلصوا من الظلم من جذوره مش بس من مجرد الزعيم او الريس يعني زي الحال عندنا والناس عايزة تشفع للريس كمان مما يثير العجب !




**طيب ماري انطوانيت ؟؟ احنا دايما بنتكلم عن السن الكبير ليه مبنتكلمش ان برضه ماري انطوانيت كانت صغيرة حرام لسه العمر قدامها المفروض نقول احنا اسفين يا ماري ونطلع عند ماسبيرو وكده..لا كان عقابها وعقاب ظلمها اليم جدا ..عربية مكشوفة دارت بيها في شوارع باريس ورماها الناس بالاوساخ والزبالة وحطوها تحت المقصلة وقطعوا راسها جزاء ظلمها وفسادها وحتي ولي العهد الطفل رموه في السجن لحد ما مات !!
لاحظ انهم مكانوش بيرحموا حتي الاطفال والنساء وبيقتلوهم وبيصفوهم يبقي احنا ازاي عايزين نرحم الفاسد الكبير؟؟
ده يحمد ربنا ان الشعب مقتلوش زي الثورات التانية وصفوا عيلته بالكامل ده هو كده في نعيم ويبوس ايده بجد وش وضهر..كمان عايز يطلع براءة ؟؟؟؟؟




ازاي هتسيبوا حقوقكم ؟؟ ازاي هنسامح في اللي قتل ولادنا ؟؟
زي ما قال مصطفي كامل "ان من يتسامح في حقوق بلاده ولو مره واحده يبقي ابد الدهر مزعزع العقيده سقيم الوجدان"
واحنا متسمحناش مرة ده احنا اتسمحنا مئات المرات مع النظام الفاسد ده.

ونقول لكل شهيد مات عشان مصر تعيش زي ما قال الشاعر لجيفارا :


يمكن ضحك..أو ابتسم.. أو ارتعش..أو انتشى

يمكن لفظ آخر نفس

كلمة وداع لجل الجياع

يمكن وصية للي حاضنين القضية

بالصراع

صور كتير ملو الخيال

و ألف مليون احتمال

لكن أكيد ولا جدال

جيفارا مات موتة رجال





كلمة وداع لجيل الجياع ..كلمة وداع لجيل الجياع..كلمة وداع لجيل الجياع..
حسني فعلا ساب جيل من جياع..
وساب مصر في حالة فقدان وعي وضياع..
احنا اسفين يا ريس..اننا مثورناش عليك من عشرين تلاتين سنة ..!

اخلاقيات غربية جدا

اخبار كتير بنسمعها الايام دي من المجتمعات الغربية بتؤكد للناس ان المجتمعات دي فيها جانب كبير محافظ مش زي ما الناس فاكرة من واقع الافلام والاغاني بتاعتهم ان حياتهم كلها انحلال اخلاقي.

كتير من الناس يقولك "ده بيعملوا اللي هم عايزينه" ايوه هم ليهم مطلق الحرية فعلا يعملوا اللي هم عايزينه ولكن كمان مننساش دور الاهالي اللي عايزين يحافظوا علي ولادهم اخلاقيا ويحافظوا عليهم كمان من خطر المخدرات والوقوع في علاقات فاسدة او انهم يقعوا في شرك المخدرات.
في دول شايفة ان مبدأ المنع ده مش مظبوط زي مثلا "هولندا" كانت عاملة اباحة لبيع المخدرات وسايبة كل واحد لضميره لانها بتقول لو منعناها هتدخل برضه وهتنتشر اكتر لاحساس الناس بالمنع انما لو متاحة ومرمية في اي حتة مش هيشربها الا اللي بيحتاجوها بس ومش هيبقي في شوق لتجربتها علي اساس الممنوع مرغوب يعني ودي فكرة عجيبة برضه.

ودول كتير في اوروبا بتسمح تماما بمحلات لبيع الادوات الجنسية في الشوارع بشكل طبيعي جدا بل وافلام جنسية كمان للتاجير او للشراء في اي محل بل واكتر من كده ارقام تليفونات لاغراض زي دي في كل كباين التليفونات ..يمكن كل العوامل دي بتدينا فعلا ايحاء ان دي مجتمعات منحلة بالكامل ولكن برضه مش كلهم والتعميم خطأ.

مش كل المجتمع زي مثلا افلام
Havoc
او
Charlie Bartlett
او
Van Wilder




وغيرهم كتير من الافلام اللي بتصورلنا الغرب انه كباريه كبير في صورة مدن..او اماكن وبقع ع الخريطة للفساد الاخلاقي الكامل .
لكن في بعض النقاط اللي ظهرت في الفترات الاخيرة وبتؤكد لينا ان في ناس كتير خايفة علي ولادها من الاخلاقيات دي في المجتمعات دي وبتحاول تقومهم بشتي السبل.


ونشوف بعض الامثلة علي محافظة المجتمع الغربي في بعض الحاجات :



**من فترة ظهرت المطربة بيونسيه في اعلان واعترض الاهالي من تكرار الاعلان بشكل مبالغ فيه وانها كانت تتعمد الاثارة وان الاعلان غير مناسب للمراهقين تماما وحتي لوحاته علي المباني بل وكمان تم منع عرض الاعلان لانه حسب المجتمع الانجليزي قالوا انه "ساخن" جدا واترفض ومنع من العرض بعد كام مرة من عرضه.


**اعتراض الاهالي علي المطربة "مايلي سيرس" اللي قالوا انها بدأت تتجه للاثارة بعد ما كانت مطربة فئة المراهقين الاولي بدأ الاهالي يقولوا انها دخلت مراحل الاسفاف والاثارة اما كبرت شوية وبداوا يصرفوا الاطفال عن اغانيها بعد ما كانت محبوبة الاطفال كمان نتيجة مسلسلها الشهير "هانا مونتانا" .


** الممثل "شارلي شين" فده بقي كانت فضايحه مغطية ع المواقع الفترة الاخيرة لدرج ان متصفح فايرفوكس حذف اسمه من نتايج البحث من "اضافة" للمتصفح عشان سوء اخلاق الممثل وانه لا يمثل قدوة للبحث عنه !!


** المطربة بريتني سبيرز اما كانت حامل رفضوا وضع صورتها في طوكيو علي الاتوبيسات عشان قالوا عن الصورة انها مستفزة ومثيرة جدا لفئة الشباب والمراهقين ومش اخلاقية !


** من اهم الحاجات المنتشرة برة في مبيعات الشرايط او السي دي ان دايما في بعض فئات الاغاني في نسخة بتكون منقحة من الالفاظ الخادشة لسن معين وبيستبدلوا اللفظ الجارح للعائلة او للاطفال بصوت صفارة او ان ميكونش في صوت في مكان اللفظ .وكتير جدا من الاهالي بيفضل النسخة المنقحة لولاده عشان الفاظ مطربين "الراب" تحديدا وفي ناس بتمنع ولادها من سماع الراب في سن معين .


**من فترة برضه كان المذيع الامريكي اللي هاجم الاسلام علي الهوا وتم طرده من المحطة لانهم اعتبروا ده سوء اخلاق وعنصرية كمان رغم انه كان من اشهر المذيعين عندهم .


**اما المطربة كاتي بيري فكانت من فترة عملت اغنية في "عالم سمسم" للاطفال بس النسخة الاصلية الغربية وكانت لابسة لبس غير مناسب تماما لاي طفل انه يشوفه فاعترض الاهالي بشدة وكان الموضوع ده قالب الدنيا والصحافة ان ازاي برنامج اطفال تجيبوا فيه اللبس ده .


** ومن فترة ظهر علينا عنوان "بنات بريطانيا هتاخد دروس في العفة" وقالوا ان عضوة في مجلس العموم البريطاني طلبت أن مناهج التعليم الإلزامي يبقي فيه دروس للفتيات من سن 13 إلى 16 عاماً في كيفية الامتناع عن إقامة علاقات جنسية مع شبان. وجه القرار بالاغلبية بعد تاييد معظم النواب.


** مناقشة قوانين منع الماريجوانا بشكل كامل في امريكا وبعض اشكال المخدرات ووضع قوانين حازمة وحاسمة ليها بسبب انتشارها بشكل مبالغ فيه بين الشباب

** انتحار فتاة امريكية بسبب تسرب صور ليها علي كاميرات زمايلها وهي في وضع غير لائق وقد يظن البعض ان دي امريكية فلا تهتم بشئ زي ده لان المجتمع كله كده ولكن ده غير صحيح وفي ناس بتهتم جدا بسمعتها لان المجتمع مش كله يعني "بريتني" او "ليندسي لوهان" المخمورة .

**تقييم الافلام عندهم هام جدا عشان حياء الاطفال وتلاحظ ان مش بس سن معين للفيلم لا ده لازم كل فيلم يقول في وصفه هل فيه الفاظ خادشة ولا لأ وفيه مشاهد مش مقبولة ولا لأ وايه كمية العنف اللي فيه كمان لان دي معايير مهمة جدا للاهالي عشان اولادهم قبل ما يشوفوا الفيلم .


يعني مش كل فئات الشباب او مش معظم المجتمعات الغربية بهذا السوء الي شايفه البعض ولكن عندهم برضه اخلاقيات وبيحاولوا يحافظوا عليها رغم كمية المفاسد الاخلاقية اللي حواليهم واباحة كل شئ في المجتمع من منطلق الحرية الشخصية.

افلام عربي..بس هل فعلا ام الاجنبي ؟

الأفلام المصرية ولا تقولي فيلم هندي ولا باكستاني دي افلام شكل تاني ..

في كل فيلم عربي لازم تلاقي حاجات عجيبة جدا في الفيلم زي مثلا العربية اللي بتمشي لوحدها يقولك اصل الفرامل سابت وكأن العربية هتفضل تمشي للابد عشان الفرامل سابت ومبتقفش كمان لحد ما العربية تنفجر !

لازم تلاقي جملة ثابتة في كل الافلام العربي من اب لابنه "انت بتتحداني يا ولد؟" طخخ ويديله قلم او شلوت حتي فالواد يا عيني يشرد في الشوارع من ضربة واحدة.
في افلام كمان تلاقي كله بيولد بسهولة قوي زي اما واحدة تولد يقولها نروح المستشفي تقوله لاااا هات مية سخنة بسرعة وتعالي ولدني وكل الولادة دليفري في البيت في الافلام العربي وكان مافيش لازمة للمستشفيات اساسا ولا يمكن المولود عايز كوباية شاي عشان كده مية سخنة بسرعة.

في كل فيلم واحد ييجي يقرا الرسايل تلاقي الصوت طلع علطول من الرسالة وحسب انفعالات اللي بيقوله كمان يعني ساعات صوت بيضحك وساعات بيعيط.
دايما اللي بيغني في الافلام في الشارع الموسيقي بتطلع لوحدها علطول وتلاقي فرقة جت من ورا وبقي استعراض في الشارع !

دايما في الافلام العربي تلاقي واحد بقي تاه في الدنيا وكده فيروح لشيخ الجامع يقعد معاه ويقوله "انقذني يا مولانا" وتتغير حياته بعدها مع ان مولانا مقالوش حاجة اصلا قاله اتكل علي الله يا ابني بس.
دايما كمان يلحقوا الحبيب او الحبيبة في اخر لحظة في المطار وتلاقيهم بيندهوا من بعيد قوي عليه "احممممممد" وينزل من الطيارة ازاي متعرفش ويرجعوا تاني لبعض وتقريبا بيسيب شنطته ع الطيارة وينزل ويمشوا علطول ويخلص الفيلم .


في افلام عربي القديمة تلاقي استعراض شغال علي مسرح والعصابة بتجري في وسط المسرح ورا بعض علي اساس انهم جزء من الاستعراض وتقريبا ده بيتكرر في كل الافلام العربي القديمة ده غير التنكر الغريب في شكل واحدة رغم ان الراجل بشنب واضح زي انور وجدي مثلا .

كل الافلام بتوحيلك ان اليوم 88 ساعة وان كل حاجة بتتعمل في يوم واحد ومافيش حاجة اسمها شغل اصلا في حاجة اسمها قصور بس وممتلكات وعربيات زي فيلم السلم والتعبان اللي تقريبا كان البطل في شبه اجازة دايمة.

كل الافلام العربي بتلاقي واحدة رجعت لواحد بعد 25 سنة وفي النهاية وتقوله انت متعرفش انا مين يا احمد انا امك يا ضنايا وتشتغل الموسيقي ويخلص الفيلم في عدم حبكة تماما.


كل الافلام العربي عبارة عن ناس واصلة بتضرب مصالح ناس واصلة بحرق فيلل وشاليهات واماكن عمل وغيره وكأن مصر كلها عبارة عن رجال اعمال ولاد ستين كلب وعندهم عصابات وبلطجية.
الافلام العربي شوف بقالها كام سنة ولسه مش عارفين نعمل مشهد انفجار عربية بشكل حقيقي ودايما بيكون الجرافيك "فضيحة" .

علي عكس افلام هوليود دايما افلام الرعب العربي عبارة عن اشباح او جن وكأن مافيش نوع تاني من الرعب او مافيش حاجة بتخوف غير دول تقريبا !
المواليد في الافلام العربي دايما بتتولد بشعر كثيف وده لانهم متغذيين بط وفراخ تماما اكيد فبيطلعوا بشعرهم كامل وطويل كمان مش عارف ازاي !

اللي بيتقتل في الافلام العربي دايما بيقع متاخر وكأنه بيحمل الاول الرصاصة وبعدين علي ما يعرف ويدرك انه اتضرب فعلا بالرصاص.
دايما في المسلسلات والافلام العربي تلاقي الهام شاهين في الجامعة ونرمين الفقي لسه مخطوبة وكانها عندها 16 سنة !

في الافلام العربي اللي بيروح اوكرانيا وهو مصري دايما بيبقي هو الزعيم في الاخر لان المصري طبعا معروف راجل شهم واصيل وعلطول بيخش الكار والمهنة ويبيع البودرة في اوكرانيا لا ويمسك منصب كمان هناك !

مشاهد الاكل والشرب علي الطرابيزة في كل مسلسل عربي بتاخد تقريبا ربع حلقات المسلسل لو جمعتها علي بعض في المشهد المكرر كل حلقة "بابا جه يا ولاد يلا نحضر الغدا" !
في كل مسلسل لازم واحد يتشل عشان غني والناس تاخد فيه عظة وعبرة وكأن مافيش فقرا بيتشلوا !
في الافلام الناس بتلاقي الديلر بسهولة قوي بتاع المخدرات وكانه فاتح دكانة علي اول الشارع وكاتب حشيش للبيع !

في كل الافلام تلاقي الزوجة تسال "كنت فين يا محمود" وكان كل الزوجات شكاكة وكل الازواج بيخونوا في مشهد اساسا يكرهك في الجواز ويحسسك انك متراقب !
كل واحد عنده ضمير في مسلسل يظهروه انه راجل قديم ومن العصر البائد وان الناس بتسخر منه رغم ان في كتير عندهم ضمير في البلد !

دايما صفقات رجال الاعمال في المسلسلات بتم في يوم علطول وتلاقي المشروع اشتغل في الحلقة التانية وجاب عمالة علطول !
كل الطلبة في المسلسلات يا اما من الاوائل لاما سقطوا ومافيش طالب عادي في النص ابدا تلاقيه !

دايما في الافلام تلاقي صاحب القهوة مصاحب المنطقة كلها بالكامل وعارفهم واحد واحد حتي لو مليون بشري في الحي الشعبي ده يعني صاحب القهوة احسن من امن الدولة بقي !
دايما في الافلام تلاقي مطرب نازل مبسوط من بيته فيلعب كورة مع ولاد المنطقة ويلعبلهم في شعرهم ويغني مع ان لو واحد في الحقيقة خد منهم الكورة هيعملوا معاه الدنيئة !

دايما في الافلام الهانم الغنية بتحب واد فقير هلفوت وبتشوفه احسن من الغني اللي عايز يخطبها ودايما اللي عايز يخطبها ده فاسد مش عارف ليه !


يعني الافلام العربي بتهجص علينا كتير قوي هي والمسلسلات تصدق والتركي كمان !