لماذا اخترت حمدين صباحي ؟

المرحلة الجاية مرحلة اختيار وقرار..
مرحلة صوت حر وشريف ونزيه..مرحلة مصرية جدا..!
المرحلة الجاية موقف وكيان جديد بللد عاني كتير من الظلم من اللي هم المفروض انهم ولاده..
"كلاب النظام" هبشوا لحم مصر..لكن ولادها جايين يداوا الجروح بالحرية..ويداوا العذاب بالحب لمصر..
المرحلة الجاية عايزة "واحد مننا"..

كل واحد مننا ليه الحق في اختيار مرشح بس اهم حاجة يكون بعد قراءة برنامجه كامل ومعرفة تاريخه السياسي وتطلعاته للمستقبل..
انا اخترت "حمدين صباحي" وبحترم راي كل واحد اختار اي مرشح تاني ولينا جميعا مطلق الحرية ولكن انا احب بس اوضح ليه انا اخترته وياريت كل واحد اختار مرشح دايما يقول للناس اسبابه في اختيار المرشح.





أسباب الاختيار لحمدين صباحي :


أولا : واحد مننا :

الكلمة دي مش غريبة او سطحية في اختيار المرشح لان لازم كلنا نعرف ان مصر فيها كام مليون تحت خط الفقر وكام مليون امي !
يعني الكلمة المتداولة عن بعض المرشحين انهم ميعرفوش كتير عن مصر دي مش كلام فاضي ..بل هي امر واقع.
ومش المقصود انهم ميعرفوش كتير عن مصر انهم جهلة بتاريخ مصر ولكن الفكرة ان الناس هتفضل حاسة في اي قرار يتاخد ان القرار ده مش بيخدم مصالحهم وهيفضلوا يقولوا "اه ما انتوا جايبين رئيس من المريخ يحكم مصر" وكلام زي ده حتي لو كلام غلط لكن بيجسد الواقع..واقع ملايين المصريين

وقبل ما حد يقول وده في اي دولة ان شاء الله حصل الكلام ده اقولك انا لاني مبحبش موثقش كلامي.
في الانتخابات الامريكية الاخيرة بين اوباما وماكين كأقرب مثال يعني ايه هي النقط المطروحة واللي ضربوا بعض بيها تحت الحزام ؟؟
اوباما قال علي ماكين انه مبيعرفش حتي يبعت بريد اليكتروني !
وقال عليه كمان ده ميعرفش موقع اسبانيا فين علي الخريطة !
اما ماكين فقال عن اوباما قدام الناس "اوباما هيعرض امن امريكا للخطر " !
وقال علي اوباما كمان "مبيعرفش يتعامل مع الجيش ومالوش خبرة فيه" !


طيب ايه النقط دي ؟ مش دي شبيهة لموضوع "الراجل ده بعيد عن مصر ومش مننا" ! طيب ليه بتتهموا اللي يقول كده بان ده كلام فارغ رغم انه كان محور الانتخابات الامريكية بل وكلام ابسط من كده كمان زي موضوع البريد الاليكتروني !
الكلام ده حقيقي يا جماعة كل نقطة بتفرق وممكن تقربك وتبعدك عن الانتخابات والفوز بيها ..موضوع قريب او بعيد عن البلد ده مش حاجة تافهة او سطحية دي حقيقة مش عشان هي مهمة للمثقفين ولكن عشان مهمة لملايين الفقراء والغير متعلمين احساسهم انك جايبلهم حسب كلامهم "راجل كبارة" بالفلاحي يحكم البلد ومش هيحس بالغلابة.
انما لازم اللي يحكم يكون فعلا دمه اختلط سنين بدم الشعب ده والناس كلها تعرف ده عشان تكون مستريحة ليه.

"واحد مننا" هي الحاجت دي بتفرق مع الناس ؟
اه طبعا بتفرق في العالم كله عندك ملكة بريطانيا الغت عيد ميلادها عشان ازمة مالية في انجلترا عشان تكسب نقطة انها واحدة منهم .
عندك رئيس شيلي شوفت ايام موضوع "الحفار" وانقاذ العمال ؟ حس العالم كله انه انسان عظيم لانه واحد منهم .
طيب شوفت اوباما وهو بيكلم مطرب عشان يقابل بنت حلم حياتها انها تقابل المطرب وطلع اوباما في نص الخطاب يتكلم عن الموضوع ده ..والناس حست اكتر انه واحد منهم .
واوباما فرق معاه جدا كمان ان لونه "اسود" في الانتخابات رغم ان دي ممكن يشوفها الناس نقطة ساذجة مثلا ولكن حصدتله شعبية اكتر واصوات اكتر .





ثانيا: البرنامج علي ارض الواقع :


كل واحد تقوله برنامج حمدين صباحي ممتاز يقولك ماهو كل البرامج شبه بعض يا عم.
وده كلام مش حقيقي تماما..وياريت نقرا برامج كل اللي اترشحوا لحد دلوقتي انا مش بتكلم عن الخطوط العريضة زي مثلا كلمة "عدالة اجتماعية" فعلا دي جملة اتقالت في كل البرامج لكن المهم السطور اللي تحت البند ده وازاي هيطبقها.
حمدين صباحي هو الوحيد لحد دلوقتي اللي بدأ فعليا اتخاذ خطوات لبرنامجه وكأنه خلاص اصبح رئيس يعني راجل عملي جدا مش بتاع كلام وشعارات.

قابل عدد من وقود دول امريكا اللاتينية عشان يناقش معاهم "التجربة البرازيلية" اللي هي حلم ليه عايز يطبقه في مصر لان اقتصاد البرازيل من اقوي اقتصادات العالم نتيجة عدة عوامل ومقومات منها اعتمادها علي خاماتها والتصدير وتصنيع المواد اللي عندهم فيها "ميزة تنافسية" عالية وغيره من الاسباب بالاضافة للقوي العاملة الوطنية.
فعلا بدأ يشوف ازاي البرازيل بتطبق الكلام ده عن طريق الوفود اللي جت مصر ويشوف هل مصر قابلة لده وفي كام سنة بالظبط .






ثالثا: تاريخه السياسي :

هل دي نقطة مهمة ؟..دي نقطة في منتهي الخطورة كمان ..امال الناس بتحكم بايه غير التاريخ السياسي والبرنامج ؟؟
واحد يقولك لا انا اخد عالم يا عم ..وكأننا مش داخلين انتخابات رئاسة وكانها انتخابات معمل او بنحضر لتجربة علمية !!
وياريت نشوف الدول اللي حوالينا ونفسي اسمع عن عالم مسك دولة ..! انه التخصص سيدي .
ولو كان الموضوع كده خلاص نقصر الانتخابات القادمة علي ..زويل والبرادعي وفاروق الباز ومحمد النشائي ومجدي يعقوب ..!!!

يا جماعة فرقوا تماما بين كلمة رئيس جمهورية وسياسي وكلمة عالم او شخصية شهيرة في العالم.
والا كان كل اللي مسك امريكا شخصيات بقي من اللي خدت نوبل وما اكترهم في امريكا ولكن ولا واحد منهم مسك البلد ولا اترشح اساسا لن الناس فاهمة هي بتدي صوتها لمين حسب تاريخه السياسي.
وفي كتاب اصدرته كامبريدج عن كيفية اعطاء الاصوات في الشعب الامريكي قالك 40 في المية من الناس بيدي الصوت حسب تاريخ المرشح سياسيا ومدي كفائته .
وكان الكتاب مقسم الناس مجموعات في اللي بيدي علي اساس حقيقي وفي اللي بيستني راي الناس ويكون حكم وفي اللي بيدي علي حسب هيعمل ايه للاقتصاد بس.

يعني موضوع اصله عالم فذ دي بصراحة يعني ....مش في محلها تماما من واقع العالم حوالينا .
وطبعا حمدين صباحي وتاريخه السياسي لا غبار عليه من ايام السادات وشجاعته في خطابه ليه وقبل كده كمان وياما اتسجن في عصر الفساد والظلمات ولكن الغريب ان واحد تاني يتشهر من سجنه مرة واحدة ويصبح شهيد !! رغم ان حمدين اتسجن ييجي 17 مرة في تاريخه النضالي !!






رابعا : يقينه وايمانه بالشعب المصري :


لانه عاش وسطنا وهو فعلا واحد مننا هو عارف كل احلام الشعب المصري وتطلعاته من افقر واحد لاغني واحد.
ودايما في خطبه هتلاقيه بيتكلم عن الشعب انه "القائد والمعلم".
حمدين صباحي محبوب جدا في دايرته ومعشوق الجماهير هناك ولكن في واحد ممكن يقول "انا معرفش مين حمدين ده"..
الجملة دي في منتهي الغرابة في اي مرشح عموما مش بس لحمدين.
هي كلمة "معرفش" دي تعيب حمدين ولا تعيب السائل ؟؟
لو متعرفش شخصية وتاريخ سياسي اقرا عنه وافهم هو عمل ايه طوال تاريخه بدل ما تفضل تقول مين حمدين ده او مين بسطاويسي ده او مين ايمن نور ده .
الفكرة في قراية تاريخه السياسي والسي في الخاص بيه وبعدين تحكم لان مش هينفع نمشي بورق الجرايد يعني عشان واحد شهير وبيطلع في الجرايد يبقي هو ده مرشحي وخلاص اصله مشهور !!!






خامسا: جمال عبد الناصر الجديد :


في كل جملة بيقولها وكل برنامج بيرسم ملامحه بتحس انك قدام جمال عبد الناصر الجديد..
مين مننا ميحلمش ب جمال عبد الناصر يحكم مصر ؟
ناصري الهوية والهوي حمدين صباحي..عاشق لمصر كما عشق مصر جمال..
كل حلمه ميبقاش فقير واحد في مصر وعلي ارضها لانه بيقول الشعب العظيم ده يستحق اكتر من كده واطهر من كده..

ثقتنا ملهاش حدود انه هيطهر مصر من كل مفسد وكل لص وسفاح..
ثقتنا ملهاش حدود انه هيرجع لمصر عروبتها ودورها الاقليمي ونخوتها وعظمتها ودورها الاستراتيجي اللي ضاع في عهد مبارك الفاسد..
ثقتنا ملهاش حدود انه هيرجع مصر لقوميتها العربية وهيرجعلنا هويتنا العربية الحقيقية علي طريقة جمال وحلم جمال عبد الناصر..

وده جزء من برنامجه الانتخابي بالنص " ولا استقلال لمصر ولا نهضة للأمة الا باعادة صياغة العلاقات المتشابكة مع أمريكا ، تقوم على أساس الندية والمساواة ، وتنحاز لمبدأ (نصادق من يصادقنا ونعادى من يعادينا) ، وتنتصر للحقوق العربية وتعادى السياسات الأمريكية المنحازة للكيان الصهيونى والمحتلة للعراق والمحاصرة لإرادة أمتنا العربية والمتآمرة ضد شعبنا العربى فى سوريا ولبنان والسودان وغيرهم"

انها الكرامة كما سمي الحزب الذي يرأسه "الكرامة"..لو لخصت حمدين في كلمة واحدة لقلت "الكرامة" !






سادسا : عدو الفساد الأول :

تاريخ حمدين في مجلس الشعب ومكافحته للفساد طوال عمره كفيل بان يجعلني اختار هذا الرجل لاني اراه بكل حيادية "عدو الفساد الاول" في مصر.
يقف بجرأة امام المجلس ويقول "يسعدني ان ارفض بيان الحكومة"..يقف بجرأة ويتحدث عن الذين افسدوا في البلاد وخربوها ويواجه رئيس المجلس بهذا وغيره.
واول من كشف موضوع الغاز الاسرائيلي في المجلس "من تاريخه السياسي"..

ومن تاريخ السياسي ايضا في هذه النقطة من علي الفيس بوك "حملة دعم حمدين صباحى لجمع 30 ألف توقيع لترشيحه للرئاسة" نضع ما يلي من اهم نقط ما فعله وواجه به الفساد والمفسدين :


1981ـ اعتقال حمدين صباحى وايداعه فى سجن ليمان طرة وكان حمدين الأصغر سنا فيمن شملتهم حملات اعتقال السادات الشهيرة للرموز الوطنية قبل اغتياله في حادث المنصة

1994- كسر الحصار المفروض على الشعب العراقي الشقيق بأول مبادرة مصرية عربية شجاعة ، تحدت جبروت أمريكا عقب العدوان على العراق .

1997-اعتقاله لخروجه على رأس آلاف الفلاحين المنددين بالقانون السبه ( قانون العلاقة بين المالك والمستأجر ) فيما يعرف بقانون الأراضي الجائر 92 لسنة 1996.

2000-- نجاحه بجدارة فى انتخابات مجلس الشعب وتتويجه نائبا شرعيا للشعب المصرى ، وإتباعه لمنهج برلماني أدهش الجميع حكومة ومعارضة ، حيث اتبع أسلوباً موضوعياً رصيناً يقوم على تسليط الضوء على القضايا دون شخصنتها ودون صخب في الممارسة ، وفجر على مدار أكثر من 10 سنوات كان فيها نائبا للشعب المصرى الكثير من القضايا الوطنية والشعبية ، ورفض بيانات الحكومة السنوية ، وكان أول من كشف عن صفقة تصدير الغاز للكيان الصهيونى داخل المجلس

2003-- رفض جميع أعضاء البرلمان أغلبية ومعارضة مناقشة رفع الحصانة عنه جملة وتفصيلاً ، لتحقق معه النيابة بكامل حصانته في سقطة دستورية غير مسبوقة بتهمة قيادته لمظاهرات الغضب العارم ضد الأنظمة الخانعة والحصار الجائر والعدوان الآثم ضد العراق الشقيق





ودي اسباب اختياري لحمدين صباحي واحترم كل المرشحين الاخرين وبرامجهم ولكن اري هنا البرنامجا لاقوي والشخصية السياسية الاقوي والاجدر بالمنصب
شعاره "واحد مننا" وهو بحق واحد مننا ومش شعبنا ومن طين ارضنا .