رايح تزحف ؟؟ رايح غزة فعلا وسايب مصر دلوقتي في وضعها ده ؟
انا معاك ان القضية الفلسطينية من اهم اولويات حياتنا كعرب مش مختلفين في ده ولكن مختلفين فقط في التوقيت.
لازم اللي رايح يعمل حاجة يحط في دماغه كل الاحتمالات الممكنة ومنهم مثلا احتمال انها تقلب بحرب !
لا دي مش مبالغة ممكن جدا تقلب بحرب لان ده اسرائيل هتعتبره تعدي عليها واضح لو دخل الزاحفون وعملوا شغب جوة هي هتضطر تدافع عن وجودها وبعدين تبدأ بقي مناوشات في سينا وحجج من الجانب الاسرائيلي ثم ضرب لمصر .
عشان كده عايز اقول لو فعلا عايزين ناخد حقوقنا يبقي لازم عنصر التوقيت يكون في اعتبارنا جدا
ولازم يكون الاستعداد لاي ظرف في اعتبارنا ..التوقيت عامل الحسم في كل المعارك .
ولازم يكون الاقتصاد المصري اللي علي وشك الانهيار في اعتبار وقلب كل واحد فينا ..مصر فين في خريطة قلوبنا..! مصر رايحة علي فين هو ده السؤال مش احنا رايحين علي فين !
يعني اقصد ان الحرب خدعة مش جرأة
الحرب استعداد ومعرفة امكانيات مش مجرد جمهرة
الحرب قدرة عسكرية مش جرعة عاطفية
الحرب عقل مش قلب
وده في اي حرب او تخطيط لهجوم ..في ناس بتقول ده مش هجوم دي مجرد احتجاجات..ولكن اللقاءات التليفزيونية تظهر عكس ده تماما يعني المذيع اما بيسال اي واحد في اللي راحين يقوله راحين نحرر القدس ! يعني هم راحين ومش ناويين علي مجرد تظاهر او ابداء رأي !
نحرر القدس محدش مختلف معاك ولكن امتي ! وازاي ! دي اهم اسئلة ..هي الحروب دلوقتي بقت بالعدد ولا بالتخطيط ! بالهجوم العشوائي اللي عمره ما خلي طرف ينتصر في حرب !
فين المكر والدهاء واحنا بنقولهم جايين الساعة كذا يوم كذا ؟
ولو عايزين نشوف المكر والدهاء والخديعة في الحروب عموما يبقي نشوف بعض الامثلة عبر التاريخ :
الرسول صلي الله عليه وسلم وقصة الخندق العبقري اللي اتعمل ايامه مش ده كان تخطيط ؟ وخطة جبل احد ده مش كان تخطيط ؟ وصلاح الدين الايوبي اللي كان بيفكر دايما في موضوع قطع امدادات المياه مش ده كان تخطيط ؟
السادات اما قال للصحافة تنشر ان الظباط رايحين الحج وهو اصلا ناوي ع الحرب ..وسحب الخبراء السوفييت عشان اسرائيل تتطمن تماما ان مصر نايمة ومش هتعمل حاجة مش ده كان تخطيط وذكاء !
استعمال اللغة النوبية في اللاسلكي ايام الحرب عشان العدو ميفهمش الاشارات مش دي كانت عبقرية !
الجيش الامريكي واستعمال خطة الجيش الشبح
ghost army
مش ده كان ذكاء منهم واستعمال تكنيك مختلف في الحروب بذكاء وعبقرية !
جورج واشنطن اما استعمل قائد فرنسي شاب عشان يضمن تحالف فرنسا معاه في الحرب المهمة رغم عدائهم لفرنسا واعتراض الجميع ولكن هو كان شايف ان في الوقت ده لازم يكسب تحالف فرنسا مش ده كان استخدام للعدو بذكاء !
شجرة الدر مش عملت خطة للاغتيال لعدوها قبل ما تموت ؟
هو مش القرأن بيقول "وأعدوا لهم ما استطعتم من قوة ومن رباط الخيل ترهبون به عدو الله وعدوكم "
يعني لازم نستعد اولا ولا نروح كده عشوائيا بدون اي اعداد ولا امدادات ولا اي حاجة غير الشجاعة وبس ؟
من رايكم نبني سيف نحارب بيه ولا نروح نحارب بصدر مفتوح وكام علم ؟؟؟
والرأي ده مش غريب لان تبناه عدد كبير من الشخصيات سواء شخصيات اعلامية او اكتاب وممثلين او ادباء وغيرهم ان دلوقتي مش وقت الزحف لان البناء اولا والبناء يبدأ من الداخل
نواجههم بقوتنا مش نفتحلهم الباب لضعفنا
وزي ام قال نزار قباني :لم يدخل اليهود الينا من حدودنا .....بل تسربوا كالنمل في عيوبنا
يعني فعلا احنا دلوقتي عندنا عيوب كتير قوي ..فتنة وانهيار اقتصادي وبلطجة وميت حاجة مش عارفين نواجهه لسه دي اللي هتسرب لينا اسرائيل بسهولة يا جماعة.
نبني مصر اولا واخيرا ..ثم نفعل ما نشاء بعد ذلك..نكون اقوياء ثم نفعل ما نشاء
مافيش حرب انتصر فيها الخصم الضعيف الا بمعجزة..وزي ما بيقولوا زمن المعجزات انتهي .
Posts
No comments:
Post a Comment