انت السبب فيها يا مبارك انت ونظامك

كل ما يحصل موضوع الفتنة الطائفية وتتجدد المشاكل من النقطة دي نرجع نسأل عن السبب ونتكلم عن الاحتقان تاني وايه اسبابه ويطلع الشيوخ في التليفزيون تاني ونعمل يوم مصالحة وطنية وكلام معاد ومكرر ويمكن الوحيد اللي عارف الاسباب هو حسني مبارك لانه هو السبب في كل حاجة خاصة بالفتنة الطائفية واقولكوا ازاي بصرف النظر عن اللي كان بيعمله لاحداث الفتنة لكن في اسباب اكتر كمان هو متسبب فيها كلها :



1 - حصة الدين في المدرسة اللي بنطلع فيها الطلبة المسيحيين او حصة الدين المسيحي الي بيطلعوا فيها برة الطلبة المسلمين باسلوب غبي ومهين يرسخ في الاطفال ان دول اعداء مثلا وان اختلاف الدين هو بمثابة كارثة وان دول مش لازم نقعد معاهم في اي مكان..اي طفولة دي اللي بتقوم علي عنصرية وكره ؟؟ ليه ميعدوش مع بعض ده يسمع احيانا معلومات عن دين ده والعكس صحيح .


2- ملايين ..جيوش من الاميين اللي مبيعرفوش يقروا ويكتبوا بفضل مبارك القذر ازاي هيقروا احاديث عن الرسول لحسن معاملة الاخوة المسيحيين وان كل واحد حر في دينه ؟ ازاي هيقروا احاديث ولا قرأن حتي عشان يعرفوا دينهم ؟؟ كل اللي هيعرفوه هو التعصب ولغة التعصب اللي قدام عيونهم مش محتاجة علم هي محتاجة بس "جهل وامية" !



3- اختيار المدرسين في عصر مبارك للاسف كارثي وفي منهم كل الاتجاهات ومنهم المتعصب ضد الدين الاخر بل وحتي الفكر الاخر وبيحاول يزرع ده في الطلبة عشان يطلع جيل جديد من اشكاله اللي مليئة بالحقد والجهل والتعصب الاعمي لدرجة ان في بعض المدارس المتشددة ممكن يقولولهم سدوا ودانكوا عشان جرس الكنيسة..اي جهل ده وحقارة ؟؟


4- القنوات الدينية اللي ملهاش اي شروط واللي تطلع سداح مداح سواء مسيحية او مسلمة مكانش ليهم اي وقفة في عصر مبارك وكانه فرحان باللي بيحصل وبالكلام اللي ع الهوا كل يوم يزود نار الفتنة من الطرفين ويخلي كل البلد تقع في بعضها بسبب بعض العلماء اللي هم مش علماء ابدا ولا هم داعية وبيطلقوا الالقاب علي نفسهم جزافا.


5- عدم الانتماء السياسي بسبب الجهل والفقر والمرض بيخلق الحاجة لانتماء اخر ومافيش غيره وهو الانتماء المتعصب للدين بس ومافيش انتماء تاني جنبه ولا حتي انتماء للبلد وده بيخلق جيوش من المتعصبين اللي كل قضيتهم في الحياة هي المحافظة علي الدين من الاديان الاخري وكانهم اعداء.


6- كلمة "اقلية" اللي بيتعمد يقولها الاعلام في عهد مبارك بتزيد من التعصب والكره من الطرفين ولازم متتقالش الكلمة دي مافيش اقلية وملا في ضيوف كلنا مصريين


7- قانون بناء الكنائس في عهد مبارك اللي خلي كل ما حد يبني كنيسة كأنها كارثة رغم انه حق اصيل للمسيحيين عشان يتعبدوا في اماكن مخصصة ليهم وحق من حقوق الانسان ولكن مبارك جعل الموضوع سايب ومحاولش يحكموا عشان الناس تتلهي فيه بدل الفساد المتلتل


8- فزاعات الدين والاخوان والسلفيين وغيرهم اللي خليتهم كارهين لكل حاجة بسب محاصرتهم وقهرهم فترة زمنية طويلة جدا وكتير منهم هيطلع الكبت ده عنصرية وكره للاخر ورفض للحوار علي اساس ان هم بس الصح لانهم خرجوا من حبس وقهر تلاتين سنة.



9- بعض الامهات للاسف لو ابنها سالها "ماما هو المسيحي حلو ؟" هتجاوبه لكل جهل "لا يا حبيب متقعدش معاهم دول مش زينا" ..وهي مقرتش كتاب واحد في التربية او في الدين او عن الدين الاخر حتي لان في عصر مبارك مافيش وقت للقراية ولكن كل الوقت للكد والعرق لان المرتب ميكفيش عيش حاف



10- الظلم من بعض الجهات والفساد الاداري في الشركات والبنوك وغيره اللي بيعين حسب الديانة يعني لو مدير مسيحي يعين الموظف المسيحي حتي لو المسلم اكفأ..ولو مدير مسلم يعين الموظف المسلم حتي لو المسيحي أكفأ..هو بس بيعين حسب خانة الديانة ومالوش دعوة بالكفاءة.


11- الواحد في عصر مبارك عمره ما كان يقدر يقول رايه بصراحة فبيخرج يقول رايه المتعصب علي الانترنت واللي كتير بيكون مبني عن جهل وتلاقي في معظم الفديوهات للاسف ع اليوتيوب وغيره كل التعليقات شتايم بين مسلمين ومسيحيين وغالبا في سن المراهقة لان التعليم هو المسئول الاوحد والاساسي في عملية الفتنة.



12- كلمات العنصرية اللي بتققال في الشوارع واللي لازم يعاقب عليها القانون زي كلمة "دول كفطس يا عم" ... "دول تلاتة ريشة" وكل الكلمات اللي بتشير باستهانة الي اي دين اخر لازم تتمحي من القاموس المصري



13- عادات القرية للاسف كتير بتسبب الفتنة واللي كانت شئ ايجابي ان كل واحد عارف جاره في القرية اصبحت كارثة وشئ سلبي وبتعتبر تدخل في شئون الغير زي اما مسلم يتجوز مسيحية يتدخل القرية كلها ويولعوها نار رغم انه مش شأن اي حد طالما الطرفين موافقين


14- البحث عن قضية ..للاسف بكل جهل يتدخل الجميع للبحث عن كاميليا ولا وفاء ولا زفت الطين بدون ادني سبب وعايز يدور عن قضية بس بدون هدف من الوصول حتي لكاميليا وكانها هتزود الدين واحد يعني !



15- احداث هدم الكنائس والاشاعات الفاسقة اللي بتطلع في بعض وسائل الاعلام ان الكنائس فيها اسلحة وبتاع تولع البلد وتخلي الناس تطلع تولع في الكنيسة يعني الاعلام دوره اساسي واحيانا بيكون ليه دور في اشعال الفتنة هو ومبارك طبعا.



16- امن الدولة السابق ودوره المعروف في اشعال الفتنة بين الطرفين بل وكان مسئول عن بعض اعمال الحرق وتفجير الكنائس بكل كفر ودناءة..


17- السير ورا بعض الشيوخ او القساوسة كان كلامهم مقدس او معصومين من الخطأ للاسف رغم انهم بيغلطوا كتير في الكلام وليهم تصريحات مستفزة جدا والناس بتاخد كلامهم علي اساس انه كلام من عند الله مثلا رغم انه لا يمثل الا ارائهم الشخصية يعني عمليه "التقديس" من اسباب الفتنة.





دي كانت معظم اسباب الفتنة في مصر واللي كل شوية تطلع وتطفو علي السطح من وقت لاخر وربنا يحفظ مصر منها ومن شرها
ومش هتختفي ابدا اللي اما نقضي تماما علي ملايين الاميين اللي في مصر واصلاح التعليم واختيار المدرسين بعناية بناءا علي من يصلح وبناءا علي ثقافتهم ووعيهم.