في احد البيوت المصرية ولكن قبل ثورة 25 يناير بفترة :
الباب بيخبط :
محمود: ازيك يا طنط..هو مجدي جوة ؟؟
ام مجدي: اه جوة يا حبيبي اتفضل هتلاقيه في اوضته
محمود: ازيك يا مجدي ايه الاخبار
مجدي: كويس انت جيت في وقتك انا عندي فكرة عايز اعملها انما هبلة قوي
محمود: وايه الجديد؟ ده انت الهبل كله
مجدي: بص الصفحة دي
محمود: لا لا لا الا كده يا مجدي احترم دقني يا اخي
مجدي: يا عم دقنك ايه هاقوم انتفهالك يعني ؟؟ انا مش بقولك اتفرج ع الصور انا بقولك ع الفكرة
محمود: فكرة ايه يا عم انت انت اتجننت ؟
مجدي: كل الدول الاوروبية بيعملوا جايزة كل سنة لاحسن جسم واحسن مؤخرة مثلا
محمود: انا ماشي يا عم انت عايز توقعني انا في حاجة زي دي ؟ لااااا
مجدي: اهدي بس احنا هنعملها بتهريج ..يعني هنحط صور ناس مستحيل يكسبوا الجايزة مش صور اباحية ولا حاجة
محمود: ازاي يعني وانت عايز تعمل تصنيف احسن زفت
مجدي: يا سيدي ايوه بس الكلمة بس انما الصور لناس محترمة جدا هتشوف..بص خليك معايا انا بعمل الصفحة اهو
محمود: ههههههههه ده انت مجهز الصور كمان
مجدي: خلاص كده عملت الصفحة ع الفيس بوك ومستني الناس تدخل وتقيم بقي
محمود: ايه اللي انت حاططهم دول ؟؟ ده ولا واحدة فيهم تكسب ولا حتي في الكونغو
وكانت الفكرة تهريج فقط من مجدي لانه حط شخصيات كوميدية بالنسبة للاستفتاء اللي هو عامله لانه حط في الاختيارات "انعام سالوسة وعيشة الكيلاني و بعض الممثلات "ولكن للاسف كانت غلطة عمره انه حط في الاختيارات دي بتهريج كامل "سيدة مصر"..."الأولي" !!!!
وبعد يومين تلاتة في بيت محمود :
مجدي: ولا يا محمود اصحي يلا..
محمود: ايه يا ابني انت دخلت ازاي ؟ متاخد مفتاح الشقة احسن
مجدي: يا عم فوق بس شوفت اللي حصل ؟
محمود: ايه اللي حصل ؟
مجدي: الصفحة اللي عملتها جابت لحد دلوقتي نص مليون مصري وعربي
محمود: يا نهار ازرق ده الموضوع دخل في الجد بقي
مجدي: ومش هتصدق مين اللي مكتسحة في التصنيف
محمود: مين يا اخويا
مجدي: الست سوزي هههههههه
محمود: يا نهار اسود..ده انا كنت لسه هاكلمك النهاردة عشان موضوع انك تشيل صورتها ضروري لحسن الموضوع يقلب بجد
مجدي: بجد ايه انت عبيط ده تهريج في تهريج
وفي القصر الرئاسي :
صفوت : زي ما بقولك يا ريس مكتسحة في جايزة احسن مؤخرة..الشعب المصري كله اختارها
الريس: اخرررررس متقولش الشعب هو الشعب كان شافها فين من ورا..دي من المكتبة ع البيت ومن البيت للبنك تحط فلوس
صفوت: يا باشا بقولك ييجي نص مليون مصري اختارها متفوقة علي انعام سالوسة يا باشا
الريس: يا فضيحتك يا حسني وياريتها متفوقة علي غادة عبد الرازق مثلا لا دي كمان انعام سالوسة يعني حتي الجايزة فالصو يعني موت وخراب ديار
صفوت: بس هي جامدة فعلا يا افندم
الريس: اه من ناحية جامدة ماشي انا معاك يا صفوت بس ...اييييه؟؟ اخررررررررس يا كلب متجيبش السيرة دي علي لسانك.
صفوت: احم انا اسف يا فندم انا بس بقول راي الشخصي
الريس: رايك ده تقوله في بيتكوا ولا تشترك في الصفحة يا حيوان..المهم هاتوا الواد اللي عامل الصفحة يد من تحت الارض حالااااااااا
وفي بيت مجدي :
ام مجدي: خير يارب مين اللي بيخبط كده
ظابط: افتحوا بدل ما نكسر الباب
ام مجدي: خير يا حضرة الظابط
ظابط: فين مجدي ؟
ام مجدي: معاك اذن نيابة بالتفتيش ؟
ظابط: اه انتي حفظالي حتة من الافلام العربي..هو انا قولتلك هافتش اساسا .عالم حافظة وخلاص
ام مجدي: وعايزه في ايه ؟
ظابط: هنروح دريم بارك نلعب الصاروخ هناك
ام مجدي: يا مجدي تعالي كلم يا ابني
مجدي: يا نهار ازرق مين دول ؟
الظابط: احنا اللي جايين نشوف المؤخرة موضوعها ايه ؟
ام مجدي: ايه قلة الادب دي ؟ في ظابط يتهجم علي بيوت الناس عشان يشوف حاجة زي كده ؟ معاك اذن تفتيش ؟
الظابط : مش بقولك حافظة وخلاص..اتفضل معانا يا سي مجدي
مجدي: طيب هالبس هدومي
ام مجدي: هتلبس هدومك يعني انت عارف الموضوع؟؟ عملت ايه يا مجدي ؟؟
مجدي: لا يا ماما هي مشكلة كبيرة شوية ربنا معايا ..المؤخرة رئاسية للأسف
وفي القسم :
الظابط : اللي بعده
مجدي: ايوه يا باشا
الظابط: انت اللي جاي في ايه ؟بتاع المخدرات ده ياعسكري ؟
مجدي: لا يا باشا انا جاي فطيس
الظابط: جاي في ايه يا اخويا ؟
مجدي: مش عايز اقولها قدام الناس دي هاقولك في ودنك..انا جاي في ط...
الظابط: اخرررررس يا كلب اترزع ع الكرسي..جاي في ايه ده ياعسكري ؟
العسكري: ده بتاع المؤخرة الاولي في مص يافنددددم
الظابط: حلااااوتك ده انت الريس موصي عليك قوي
مجدي: يا باشا انا كنت بهرج انا معملتش حاجة
الظابط: خده يا عسكري
وفعلا اتغمي عين مجدي وراح مكان ميعرفوش وفجأة سمع صوت يعرفه وهو مغمي عينه :
الريس: انت بقي مجدي ؟
مجدي: سعادة الريس ؟؟ مرة واحدة ؟؟
الريس: عرفتني ازاي
مجدي: من صوتك يا ريس مين ميعرفوش ده ولا صوت حمادة هلال في وداني
الريس: حمادة هلال ؟؟ يخربيت ذوقك..انت اللي عملت الصفحة دي بقي ؟؟ بتجيب سيرة سوزي ليه يا مجدي قدام نص مليون
مجدي: يا باشا اقسم بالله تهريج انا يعني مبتعجبنيش مؤخرة مرات حضرتك اصلا و
الريس: اسسسكت خالص متجيبش سيرة الموضوع ده ولا تفتح بقك فيه فاهم ؟
مجدي: اسف يا باشا..طيب متشيل البتاعة الل علي عيني دي يا باشا يعني مش ههرب اكيد من مكان فيه حضرتك يعني
الريس: طيب يا سيدي اهي
مجدي: ااااه براحة يا غبي
الريس: اييييييه؟؟
مجدي: قصدي براحة يا ريس معلش اصلها وجعتني شوية
الريس: انت فاكر اننا هنعمل ايه فيك دلوقتي ؟
مجدي: ابدا اكيد هتعذبني زي فيلم الكرنك ؟
الريس: لا لا انت حبيبنا يا مجدي..انت عندك نص مليون مصري ع الصفحة ومحتاجين همتك معانا
مجدي: ازاي يعني عايزني احط مؤخرة حضرتك كمان ؟
الريس: لا يا عم العبقري انا عايزك تظبط صورة جيمي ابني في عيون النص مليون دول وعايز دعاية من العالية يعني
مجدي: لااااا حمررررا
الريس: حمراااا؟ يا كلب ؟ بتقول لريسك حمراااا ؟؟؟
مجدي: بصراحة يعني اتسجن احسن ما ابقي كلب للنظام وكده انا هايف اه بس عندي مبدأ
الريس: عندك مبدأ ؟؟ دلوقتي عرفت حكايتك مع حمادة هلال بقي
مجدي: ايه العسل ده يا ريس ؟
الريس: اخررررررررس..خدوه تاني وعايز اقصي عقوبة علي الكلب ده
وفي القسم:
الظابط: اهلا يا اخويا شرفت تاني ؟؟
مجدي: محمود ؟؟ هم جابوك انت كمان ؟؟
محمود: جابوا الشلة كلها يا اخويا اتبسطت بالمؤخرة ؟؟
مجدي: انا مكنتش اعرف انها هتوصل لكده
الظابط: اديهم يا ابني خمستاشر يوم ع الماشي
واثناء الخمستاشر يوم داخل الزنزانة :
مجدي: ايه اللي بيحصل برة ده ؟؟
محمود: يا نهار اسود القسم بيتحرق ولا ايه ؟؟
مجدي: لا مش هنموت عشان المؤخرة الرئاسية لاااااااا
وتفتح ابواب السجون ولكن المكان كله محاط بناس بتحدف ملتوف
مجدي: احنا بتوع المؤخررررررررة يا اخوانننننننا
محمود: احنا ملناش ذنب في حاجة سيبونا نخرج ..الظباط جريوا
مجدي: مؤخرة السيدة الاولي يا جدعاااان حد سمع عن القضية دي..؟؟ احنا معاكم احنا ضد النظام..سيبونا نخرج
وبعد شهر :
برنامج عمرو اديب :
عمرو اديب: ايه الفيديو العجيب ده ؟؟ واحد بيزعق وبيقول مؤخرة السيدة الاولي ؟؟ههههه وده كان هيموت عشان القضية دي ؟؟انت ده يا مجدي ؟؟
مجدي: ايوه يا استاذ عمرو انا
عمرو اديب: انت بطل دلوقتي يا مجدي متعيطش ارفع راسك
مجدي: دي مش غلطتي واللهي العظيم ما غلطتي ..دي غلطت كل واحد مسك المؤخرة دي وكان متبت فيها
عمرو اديب: احم..كت يا ابني ..انت بتقول ايه الله يخربيتك ..مسك المؤخرة ايه يا عم ..عموما كلهم اتحبسوا متقلقش قول اللي في نفسك بس متجيبش السيرة دي تاني
وفي الصحف تاني يوم :
الاهرام : "بطل موقعة المؤخرات..يقرر انشاء حزب جديد : "حزب المقدمة" "
الوفد : "المؤخرات تصنع ابطالا ..مجدي ضحية المؤخرة الرئاسية "
واصبح مجدي رئيسا لحزب المقدمة وياريت تنضموا معانا..!!
Posts
1 comment:
رووووووووووووعة
Post a Comment