هتعمليلي حزب يا حلوة هاعملك ائتلاف

بعد الثورة طبعا شعراء المزاج والكيف برضوا إتأثروا بكل احداثها زي ما كل واحد مصري اتأثر..
ع القهاوي وع النواصي وفي كل حتة تلاقي كلام هن الثورة ونتائج الثورة حتي في العلاقات الغرامية..يعني واحد رياح يسأل مذيعة ياتري ايه تاثير الثورة علي الصحة الجنسية
واحب اقوله "ما بلاش حجج بقي " ههههه




يعني لو واحد بيقول لحبيبته انه جامد ومش هفأ يقول :

لو جيبتي ابوكي حتي
ومعاه عشرين ومية
لو جيبتي حماتي تولع
ومعاها مية ولية
انا عمري ما كنت هاسكت
يا حبيبتي انا مش هفية
تعملي في بيتي وقفة
هأعملك مليونية



طبعا ده من تاثير الثورة علي البيوت المصرية ومهما عملتي هاعملك مليونية واوقفك عند حدك !




واحد بقي خطيبته بتتكسف وكده وهو عايز يقولها فكيها شوية يعني :

يا حبيبي التقل صنعة
لكن حبك مناولة
اديني بوسة واحدة
مش برضه خطيبك اولي ؟
لكن تعملي سلفي..
هأعملك امن دولة





واحد بقي بيهدد مراته في البيت وبيزعقلها ويقول :

مش طايق كل اكلك
مكرونتك او حمامك
واللهي لاقول لاهلك
ومعاهم اشوف حسابك
لو دوقت منه تاني
هاطلب اسقاط نظامك





اما الزوجة العنيفة جوزها بيحاول يهديها بطريقة الثورة برضه :


يا مراتي يا نور لياليا
بالذوق او بالحنية
هاعملك كل مطالبك
بالراحة شوية عليا
لكن كسرتي الفازة
مش قولتي انها سلمية ؟؟






واحد بقي بيهدد مراته بحكاية "احمد فريد " صاحبه اللي طلق مراته وبيقولها يعني انه ممكن يعمل زيه :


انا اخش البيت الاقي..
اكلك جامد شديد..
لو يوم قولتيلي "تونة"..
هارفص طبقك بعيد..
لو يوم ما طبختي خالص..
"كلنا احمد فريد" ..!






اما واحد بقي بيعذبه الحب بالفاظ الثورة :

ملتوف حبك حرقني..
هرب مساجين جناني..
حبك زي البازوكا..
طحنت صفين سناني..
ولجان شعبية تحمي..
قلبي وحبي وحناني..





وواحد تاني بيقول لحبيبته :

حبك بلطج عليا..
ثبتني ما بين مشاعري..
سنجة رمشك تعلم..
خلتني اشد شعري..
والامن في قلبي غايب..
من حبك عايز اجري..






واحد بقي متأثر ببقايا الحزب الوطني :


يا حبيبتي مش معقول..
ليه البنطلون مبلول ؟
ليه دايما مهملاني..
ومافيش ابدا حلول..
هو انتي يعني ثورة..
وانا واحد م الفلول ؟؟





واحد بيقول لمراته انه هيسيطر ع البيت ومافيش كلمة فوق كلمته :


ليه دايما سايبة بيتك..
بيني وبينك خلاف..
بتروحي قوام لجارتك..
تحكيلها علي الخلاف..
عملتوا عليا حزب..
ما انا برضه ائتلاف ..





وده كان بعض تاثير الثورة علي البيوت المصرية.