عـــلي فـــكرة التــي شــيرت ده هـــيريح

البياعين في المحلات أشكال والوان منهم الدحلاب ومنهم الأمين ومنهم الرسيم ومنهم المنافق..
وأفظعهم السئيل الرخم زي مثلا:
البائع: أي خدمة يا أفندم
الزبون:لا أنا بتفرج بس
البائع:طب ممكن أساعدك
الزبون:طيب في مين ده مقاسي
البائع:لا مافيش الرصاصي واللهي ميديم تاخد الأحمر لارج
الزبون: !!!!!!!!!!!!!!

المنافق بقي ليه إجابتين علي نفس التي شيرت:
لو الزبون رفيع وسألك التي شيرت ده بيكش ولا لأ قوله طبعا يا افندم كله بيكش "لأنه رفيع"
لو الزبون تخين وسألك قوله لا طبعا حاجتنا مبتكشش

الرسيم الكداب بقي ليه جمله الخاصة:
دي هتنطق عليك"نطقت عليك عقربة يا اخي"-
مرسومة عليك بالمقاس"رسمك عزرائيل علي بابه يا اخي"
-متفصلة عشانك"عقبال تفصيلة كفنك"-
أنا مش هأتكلم المرايا هي اللي هتتكلم"انت بتتكلم من مراخيرك اصلا"-
ده انت ذوقك جميل جدا ما شاء الله خدت أجمد حتة في المحل"أمك قرعة و أبوك طبال"
إسأل صاحبك أكيد هتعجبه"اللي زيك بيطلعوا في قناة انيمل بلانيت"-
لايق جدا علي اللي إنت لابسه"انت خارج من بطن أمك بكفالة أساسا"

الأمين بقي غالبا بيطرد في أول شهر ليه بسبب:
الزبون:التي شيرت ده في منه أحمر؟
البياع الأمين: لا واللهي ما فيش ولو في مش هييجي مقاسك "هي البلد ناقصة خ......."
الزبون:طيب في منه أصفر؟
البياع الأمين:ولا أصفر واللهي "أنا دلوقتي زي بتاع الحلاوة وأنا عندي جوة "

أسهل كلمة "التي شيرت ده هيريح" طيب يا أخي ميلصقوا عليه من ورا أحترس التي شيرت يرجع إلي الخلف بالمرة طالما بيريح..ولما يريح بيخبط حد ولا هو بيريح ع الأريكة ويستمتع بأبو تريكة ولا ايه؟
ولو اشتريت جزمة برضه بتريح كل حاجة بتريح هي الدنيا برضه ساعات بتريح وتلاقي الشوارع إختلفت عن انبارح يقولك الدنيا ريحت..

مرة بياع قاللي "مافيش رصاصي بس الحتة البنفسجي دي جامدة" قولتله" اكني عند فكهاني وقاللي ما فيش جوافة تاخد خرشوف؟ أو بقال مافيش سجاير تاخد توفي؟ ايه يا عم هو اي كلام بيتقال؟"

وساعات بقي صاحب المحل ييجي بنفسه فإنت تنقي حتة يقولك صاحب المحلة "واللهي برافو عليك أنا واخد منها"..ما تاخد منها ولا تاخد ف..... أنا مالي تقولش توم ابن عم كروز ولا حتي حمدي الأية..يا عم انا مالي بيك متخدها هو انا صاحبك..

أوضة البروفة بقي اشبه بمعتقل نازي لتحويلك لصابونة..حر والبنطلون ضيق اساسا بسبب بياع تاني قاللي هيريح وهو اللي انسان مريح اساسا علي ما تفك البنطلون الضيق في الحر بالإضافة للجزمة المربوطة عشان تقيس بنطلون بالإضافة لضغط الراجل الغتت برة "أجيبلك الأكبر؟" كل 10 ثواني تبقي عايز تعلق حبل وتنتحر جوة..

النصاب بقي في فترة السيلات ينقي حتة يقولك بعد ما تعجبك "لا واللهي الحتة دي بالذات مش عليها سيل"..يلا يا شرابة الخرأ يا بغل الليالي .."مامتك علي الدائري علي فكرة"

العلاقة طردية بين غتاتة صاحب المحلات وقلة المبيعات أكيد..
وعلي فكرة الموضوع ده نفسه بيريح فحاسب ع البلوج..