نيــــرفــــانا

سقيتي الفجر من نهرك..
ووضاني بندي توبه..
رويتي القلب من ضيك..
بذنب العشق وذنوبه..
وعششتي في هدوء حلمي..
خلقني الحب شئ تاني..
بقت روحي اللي مش مني..
أسيرة قلب بيعاني..
وبصيتي علي عيوني..
بقت روحي حتت سكر..
مشوفتش شمس حواليا ولا ضلمة..
دي نظرة عين كانت ظالمة..
وخدنا الحب ودانا..
لحالة غريبة "نيرفانا"**....
تأمل موتي في رموشك..
مافيش منك هوي يحوشك..
حالة غربة..
أكيد صعبة..
خروج عن عالم "العادي"..
لعالم حب مش عادي..
دي مش أرض اللي تحتيا..
بساط طاير..
دي مش شمس اللي في عنيا..
ده شوق فاير..
ده مش اسمي..ده مش جسمي..
دي كانت لحظة الميلاد..
لقلب جديد علي استعداد..
يموت والرمش ده يضحك..
يموت والقلب ده يضحك..
ومن يومها وأنا يومها..
وليلها وصبحها ونورها..
ده حلمي وكل أحلامي..
وبرضه عذابي وألامي..
بسلطان الهوي الواحد..
كان الحب في طرف واحد..


**النيرفانا:هي حالة الانطفاء الكامل التي يصل اليها الانسان بعد فتره طويله من التأمل العميق ...