هـــــالة فـــــلسفة

أجساد تموت..
والناس بتحيا للأبد..
عايشين في دمعة..
أو نور في شمعة..
جوة القلوب..
زي الزهور..
ما هي لما تدبل برضه عايشة..
سايبة ذكري لقلب حب..
زي العطور..
ما هي لما تنضح برضه عايشة..
سايبة طعم جديد لقلب..
يعني مافيش كلمة "نموت"؟
لأ في أكيد..
اللي مات من غير ما حب..
واللي عاش من غير دموع..
اللي عاش ولا قلبه حن..
واللي راح من غير رجوع..
انا كل يوم ..
قبل أما أنام..
بروي دمعي من القصيد..
وأحبي فوق شهقة نشيد..
للعشق ده..
وأروي أرض الضلمة نور..
وأمشي حافي علي البخور..
في القلب ده..
وفي كل ليلة الناس بتسأل..
الشمس فين؟
بتكون في ايدي..
الشمس دي بتجري في وريدي..
عشان أعيش..
انا مش أناني ..
بس يعني سالفها منكم حبتين..
أنا قولت يعني ممكن أمسح دمعتين..
وفي كل صبح الناس بتسأل ع القمر..
هي السبب..
أنا مش هالومكم ع العجب..
قالت هزيد فيه الجمال..
خلخالها دق وفوقه نام..
نام القمر..
سكران جمال..
وهو نايم سرحتله..
غنتله ميت اغنية حلوة بشهدها..
ولما راح من عندها ..
طلع الهلال..
مقدرش يطلع كله مرة...
لأنه لسه سكران جمال..
هو اللي عارف زي أنا..
هو اللي فاهم زي أنا..
إن عينيها أرض الهزيمة..
يا ما حاربنا انا والقمر..
ومعانا الليل والمطر..
ولا في إنتصار..
كله إحتضار..
بنحارب ايه ؟
هنعدي هالة فلسفة؟
هنموت هناك..
حسب الميعاد..
مكتوبلنا ..محسوبلنا..
العمر فوق رمش القمر..
مش عين ملاك..
مش عين ملاك..
دي عينيها بتدمع ملايكة في كل يوم..
وقت اللزوم ..
وقت اللي عاش فيه القدر..
قدري بعطره اللي بريحتها جاي وليد..
والحب لسه في قلبي عيد..
أنا مش هأموت..
لأني عيشت علي القمر..
ولأني حبيت القدر..