السبكـــي فــي هولــيود

في أحد مكاتب هوليود دار هذا الحديث السري:

مستر جونز: ايه يا سبكي معقول بعد كل الدعم ده لسه مافيش فايدة؟
السبكي: أعمل ايه بس يا افندم ..الفكرة نفسها مش نافعة عندنا في مصر..
مستر جونز:يا سبكي عايزين افلام شخصيات ..قولتلك ميت مرة احنا هنا قدرنا نعمل سبايدر مان وسوبر مان وبات مان والرجل الحديدي وكل الهنتريش ده وانتوا لسه ولا شخصية؟
السبكي:اجنا يا افندم عملنا زمان تاريخنا يشهد اننا عملنا اسماعيل يس في الأسطول وغيره ومستر اكس بتاع فؤاد المهندس..
مستر جونز:تويز يا سبكي انا عايز ابيع تويز..احنا هنا في المحلات بنبيع العاب علي شكل الشخصيات دي وبناكل من وراها الشهد ازاي ابيع عروسة بوش اسماعيل يس بتاعك ده الناس تقول عليا ايه..عايزين السوق المصري يجري يشتري عروسة لعبة لشخصية شهيرة..
السبكي:ممكن عروسة ماما نونة لو انتجناها تسمع جاند وتجيب ارباح ياما..
مسترجونز:برضه هيقولي نونا وكلام فاضي..انا عايز حاجة تتشهر عندكم والناس تجري تشتريها زي ما هنا بيجروا علي سبايدر مان اول ما بينزل في محلات الألعاب انت فاهم..
السبكي:حاضر يا افندم هأحاول..


وذهب السبكي واخذ يفكر في الموضوع بحرص وكيف يتقبل الشعب المصري أحمد السقا يطير أو كريم عبد العزيز بيطلع نار ..مستحيل ..محدش هيدخل الفيلم كده..


وفي مكتب السبكي :

السبكي:مين ؟
السكرتير:دي انسة زينة يا افندم ع الباب كان عندها تصوير وعايزة حضرتك..
السبكي:دخلها..
زينة:ازيك يا سبكي..مالك مكشر كده..
السبكي:هوليود يا ستي مصرة علي موضوع الشخصيات ده اللي قولتلك عليه..
زينة:انا عندي فكرة..ما نبيع عرايس تامر حسني ونملا صدرها شعر اللي الناس بتحبه ده ده جامد جدا والعروسة كل البنات هتشتريها وممكن نعمل عرض ع الشعر كمان ونزوده لما تشتري عروستين..
السبكي:شعر؟شعر ايه بس يا زينة عايزين حاجة علي وزن سبايدر مان وسوبر مان ..
زينة:انا ممكن أعمل المرأة القطة..
السبكي:انتي بتهيسي انتي كمان ؟مرأة قطة ايه وضفدعة ايه؟مين الأهبل اللي هيخش فيلم لزينة وهي بتطير .المشكلة اننا مش مقتنعين بكده ومش هنقتنع زي برة..يمكن برضه السبب في الجرافيك المقنع..واحنا هنا مش عارفين نعمل مشهد انفجار واحد صح..
زينة:طيب ممكن ادوارد يعمل الرجل الأخضر مثلا ..
السبكي:اطلعي برة يا زينة ..انا ايه اللي يخليني اخد رأيك الغبي ده..برررة



ومازال السبكي حائرا ومرت سنوات وجاء موعد الإطمئنان من هوليود علي الموضوع المكلف به السبكي..



مستر جونز:تلات سنين اهو سايبك عملت ايه بقي؟
السبكي:كسرنا الدنيا يا باشا..ومش انا بس انا وأصحابي كمان..
مستر جونز:عملتوا افلام شخصيات؟
السبكي:طبعا يا افندم والعرايس هتنزل قريب كمان..
مستر جونز:شخصيات عالمية ممكن؟ولا محلية بس
السبكي:شخصيات ملهاش حل يا افندم وادي التقرير والبوسترات بتاعة الافلام
مستر جونز:عوكل-بوحة-كابتن هيما-سيد العاطفي-علي سبايسي-اللمبي-خالتي أطاطا
السبكي:تمام يا افندم ده ثمار ابداعنا
مستر جونز:ابداعكم؟ انتوا فعلا معملتوش حاجة عدلة الا اللبان السحري زي ما قالولي وكان بيغير لونه بسرعة ..ده ابداع ده يا سبكي؟خالتي أطاطا يا سبكي؟أبيعها فين دي في الحمامات العمومية؟
السبكي:صدقني يا افندم دي شخصية مسمعة جدا ..وكابتن هيما بينافس شخصية هانكوك بتاعة ويل سميث بس مش بيطير..بيحرق الناس بأشعة من شعر صدره..
مستر جونز:وايه ده كمان؟
السبكي:ده بالتعاون مع وزارة الرياضة يا افندم عملنا عروسة للكابتن ممدوح فرج وكرم جابر بس عرايس بغلة شوية يا افندم
مستر جونز:مين فرج ده؟
السبكي:ازاي يا فندم متعرفوش ده عالمي وخد بطولة العالم قبل كده
مستر جونز:نعم يا اخويا ..انا رئيس اتحاد المصارعة صاحبي وعمري ما سمعت في تاريخ المصارعة عن ممدوح فرج بتاعك ده شكل الموضوع في لعبة ما
السبكي:ده بيقول انه كان بياخد بطولات ايام هوجان هو من جيل هوجان..
مستر جونز:ها هاهاهاها هوجان اه..طيب كشكشها متعرضهاش يا سبكي ..الله يخربيت فرج عي اطاطا علي كل الشخصيات الوهمية بتاعتك دي ضيعت الشركة..


ومازال السبكي وشركات اخري تحلم بالعالمية ولم تيأس حتي اخرجت للعالم أفلام شخصيات جديدة "بوشكاش ونمس بوند" ..يارب تنافس سبايدر مان