طبع حـــسنك

حاولت ألخص مشاعري كلها في قصيدة واحدة عايز أفجر بيها كل اللي جوايا ..والحمد لله القصيدة دي لاقت صدي جامد مع الناس اللي قريتها ويارب تعجبكم كمان هنا..وشكرا ليكم:

الليل علي ضيك جنون..
وقصيدة شربت حسنها..
واللحظة بتبوس في العيون..
دفيت في قوة بردها..
وفي كل يوم..
نبضي بيحضن نبضتك..
وملامحي من غيرك ورق..
وعيوني ساكنة في قوتك..
وطريقي في عيونك غرق..
ومشاعري بتغمض عيونها..
وكأنها بتنكرني ليه!
وبتمشي وبتعلن جنونها..
كأنها مش عارفة ليه..
سيبيني يا مشاعري الغريبة..
الليلة رقصة وحدتي..
الغربة في عيونك حبيبة..
أنا هأمشي عاشق غربتي..
جملت نفسي بشهد خدك..
وخلقتني إسمي "الحياة"..
ولو إنتحرت ما بين ملامحك..
أنا عمري ما أحتاج النجاة..
أجمل ما فيكي "وحشتني"..
والدمعة نازلة علي الشفايف..
والنظرة دي بتهدني..
لأ ابعديها بجد خايف..
وعملت من نفسي "القمر"..
لمعة دموعك جوة قلبي منورة..
سايبة السما واهي فوق صفاتي مصورة..
وعملتني "ورقة شجر"..
سيبيها مرة مابين كتابي ..
دبلت وهي في عزها..
صليت عليها وبوستها..
رجعت تحن..
رجعت تفتحلك عيونك..
صحت ملايكة يدندنوا..
وفوق جفونك أذنوا..
لصـــلاة جمـــال..
ده بجد كان لحن الكمــال..
وبقيت أنا للوهم نور..
طيف عدي غني غلي البحور..
ضاع الربيع كده مرتين..
مرة في عيونك زهرته..
مرة فقد حريته..
وتاه ما بين كل الغصون..
مابقاش غير الليل والعيون..
وجمالك الحر الجرئ..
"صوفي" قوي..
عايش علي قوت العبادة..
وأنا عيني تتنمني الشهادة..
في نظرتك..
نظرات عيونك دي سيوف..
ونهاري يصبح فيلسوف..
يمسك بقلمه يغمسه في الشمس يكتب..
يمسك بشمسه يضمها للنور بتكتب..
مطرك حنان ..
سحرك وجود..
أنا قلبي داق طعم السجود..
علي غنوتك..
علي خطوتك.
عاشقك بموت..
عاشقك وجود..
عاشقك أكون أو لا أكون..
عاشقك أمير..
ببساط حرير..
كلي الهوي..
بعضي الهوي..
سايبك أمانة لدنيتي..
وموصي طيرها وجنها..
ومحني قلبي بدمعتي..
شايف ملامحك شمسها..
أنا كل دمعة في قصتك..
أنا كل صفحة في رقتك..
لكتاب حياة..
شعره البنفسج والزهور..
عطره التمرد والظهور..
وطنه في وريدي من الجذور..
قلمه الشتا..
لونه المطر..
طعم الكلام فيه القمر..
و"ليالي قدري" في رمشتك..
أنا إمتي هأصبح غنوتك..
أنا إمتي هأغرق في العبير..
وأشرب حرير وألبس حرير..
أيوه في عيونك مملكة..
ملكتها إنتي وملكها..
وضلامها انتي وضيها..
وسلامها انتي وحربها..
وأنا بس من عندك رسول..
طالب سلام..
خبي عيونك عني لحظة..
أشوف حقيقتي..
مش كل لحظة في دنيتي..
مكتوب حبيبتي..
الحر في عيونك أسير..
شعرك سلاسل من حرير..
فيكي الجمال نبض الياقوت..
عايش علي الليل والوجود..
صابغ حياتي بنظرتك..
واهب لضعفي قوتك..
مهما راح أكتب مش هأقول..
دي المينا أبعد م الوصول..
مكتوبلي في القدر السفر..
مغزولة من مسك الخيال..
ملفوفة في الشعر العجيب..
موصوفة لليل والجمال..
مخلوقة للعشق الرهيب..
كل القصايد فيكي "لأ"..
إنتي "نعم"..
فيكي القصيدة مشيطنة..
وفي وادي عبقر رمشتك..
وف قلبي بنبض حكمتك..
أنا طعمي حب..
أنا ريحتي حب..
دوقي مشاعري ودوقيها لبسمتك..
هتدوب قوي..
أنا مش نبي..
لكن رسول..
ورسالتي حب..
واهاتي حب..
محبوس ما بين رجعة ووصول..
هأوصل اكيد ..
من بعد ما أحيا في ميت سراب..
خمرة حياتي سكرتها..
هي الي سكرت مش أنا..
حبي رقيق..
حبي إنعدام..
أنا عمري حلم بدون منام..
كوني حياتي عشان أكون..
اتكلمي لغة العيون..
وسيبيني احيالك بشر..
مش عايز أعيش دايما قمر..
ده الليل حزين..
أنا عايزاكون فيكي الحياة..
أنا عايزاكونلك الحياة..
أكون طفولتك أو ضفايرك..
أو عيد ميلاد..
أنا اصبح يوم ميلاد..
وخط عمرك والقدر..
ضحكة صباكي مع المطر..
أو مدرسة..او سنة واقعة في بحر شمس..
عشان تعود..
انا والوجود..
جايين بنشرق من بعيد..
ونشوف عيونك ألف عيد..
وبنحيا شمس منورة..
خدك شروقها وحلمها..
وفي طبع حسنك مغربي..
وفي لون عيونك زهرتي..
قلبي بيكتب قصتي..
عمري القلم..
إنتي الحكاية..
من أوله لحد النهاية..
بكتب خلودي بلمستك..
يضحك ربيعي في بسمتك..
والدنيا لو فتحت عيونها بنظرتك..
تشرق جمال..
لو مطرت..
برضه الجمال لمس المطر..
زغرد في أوراق الشجر..
من لمستك..
تنضح مشاعر من ندي..
والشعر سافر في المدي..
يكتب وجوه..
يرسم وجوه من كلمتك..
شبك الورق وهيرسمك..
قال الورق أنا مش سما..
فكرت ليه ترسم قمر..
إرسم علي صفحة سما مش صفحتي.
ارسم علي الليل الحزين مش قسمتي..
اني أعيش مدبوح جمال..
وأنبض بلابل او حمام..
اني اعيش قدري القمر..
أنا بتولد..
في اللحظة ميت غيري أنا..
في مكاني بتنفس بلاد..
في عنيكي ميت لحظة ميلاد..
في عنيكي كان كحل النسيم..
والزهر متعطر نعيم..
وجمالي زاد من نظرتك..
واهات ملايكة في خطوتك..
وبرغم ريحة الانتحار..
كان موتي بيغني إنتصار..
لأن موتي في رقتك..
كان الحياة..