لقيت نفسي في ملكوتك..

أغنية كنت بغنيها وبلحنها ويارب تعجبكم..ربما ستكون قصيدة ترحب بضيفة شرف البلوج واول ما ستقرأه ..


لقيت نفسي في ملكوتك..
لقيت صوتي اللي في سكوتك..
غريق شاف غربته عني..
وتاه وسط اللي قتلوني..
عيونك..حيرتي وجنوني..
وخد تاره اهو مني..
ده ليل نايم علي عيونك..
وعطر جنوني فوق توبك..
بيكتب قدرته بيا..
وعمر الليل ما سهرني..
ولا قمره محيرني..
وضارب رمح نور فيا..
جمالك هلته بدري..
ودمعة روحي من بدري..
بتروي العشق جوايا..
ورغم العتمة قدامي..
بشوفك ضي أيامي..
ونورس مينتي وسمايا..
شهيد إسمي علي لسانك..
بحارب ضي لو خانك..
ومات بين رقة وضفيرة..
خلقتي الشمس من ليلي..
غسلتي فرحتي بويلي..
خلقتي العشق بالحيرة..
جمالك مني ليه أكبر..
ده عمري يفوت ولا بكبر..
سايب عمري في أحضانك..
وراسم مهدي في جفونك..
زهور حلمي اللي بتصونك..
تفكر في الشذي وتسهر..
صفاتي وكل شئ فيا..
رهينة لكل أغنية..
بتتغني علي جبينك..
وكوثر رملتي الحرة..
بيتهادي علي درة..
في تاج العمر وسنينك..
قصيدة فرح اهي بتبكي..
في بحر لموجه ده بيشكي..
وراسم قلبه في غروبها..
سفينة روح بلا مرسي..
ومينا الحب دي بتنسي..
بخمرة وهم من توبها..
يارب هاديني رقتها..
دي لما بتدعي دعوتها..
بتشرق دنيا وتغني..
ويسبح في السما نورها..
وتشتي نجوم علي بحورها..
وبتبارك وبتهني..