لون السمـــا

أنا نفسي أكون لون السما..
وقلبي يحضن رغبتي..
عايز أنام وسط الدفا..
والعشق فرض في همستي..
ونفسي ليه؟
ما انا السما..
وساعات في رعدي وسط برقي نشوتي..
وساعات بمطري ونوحي بفرض قوتي..
وساعات بكون..لحن الصدف..
عجيب غريب صوت الصدف..
اللحن عارفه ويعزفه..
مزهقش منه بيعزفه..
مع انه منه ويعرفه..
البحر ده أكبر حكيم..
عقله الشروق..
حزنه الغروب..
دافي وقديم..
نفسي أبقي بحر..
ونفسي ليه؟..
ما أنا أصلي بحر..
في شروق غروب هأفضل كبحر..
وهادني أسمع صوت صدف..
صوت نفسي فيه..
وانا مش هأمل..
قصيدتي موجي ..
مصيري شمس..
وشعوري همس ..
ساعة الغروب بشرب دموع..
ساعة الشروق بصحي وبجوع ..
وأشتاق لدمع..
عشاق كتير علي أولي..
أخري الغروب..
ده شئ مخيف..
لمصير حبيب..
عاشق رقيق..
باني القصور علي رملتي..
هيشوف غروبي في أخرتي..
يفتكره حلم..
غروب لحلم..
أشيله الهم بشروقي..
وأفصله الهوي في توبي..
هأفضل أنا ..
مش عايز أكون بحر وسما..
مش عايز أكون..