"ميكروسوفت والريس حنتيرة"
كان الأستاذ حنتيرة اسم من دهب ..فعلا من دهب ..اللي ما يعرفه يجهله واللي يجهله ما يعرفش حد..
استاذ حنتيرة كان فلتة في الكمبيوتر 7 دكتوراة في الشط داون وبيحضر استاذية في الريستارت وعبقري في استخدام الماوس ومكلمكش بقي عن كتابته علي الكي بورد برجليه الاتنين!
وكان له نظرياته الخاصة في استخدام الكمبيوتر فكان دايما بيزعق لبنته ويقولها "متقعديش ع الكمبيوتر وانتي واكلة فول" او "متمسكيش الماوس وانتي لابسة بنص كم"
كانت كل الحارة بتسمع لكلام الريس حنتيرة علي الكمبيوتر وهي مذهولة ومقتنعة بعبقريته الفذة ..وكانت كل الحارة معتبراه فلتة مصرية في الكمبيوتر والانترنط زي ما كانوا بيقولوا عليه انترنط..واما حبوا يختاروا واحد لترشيحه في المحليات اختاره حنتيرة رمز الماوس..ونجح في الانتخابات وفتح مركز لتعليم الريستارت وزرار الباور..وذاع صيته في كل الدنيا وفجأة حصلت المفاجأة ..
راجل مجهول دخل الحارة وخبط علي كتف حنتيرة وقاله:انت الريس حنتيرة ملك الريستارت؟
قال حنتيرة: أنا بلا فخر ملك السي بي يو
رد عليه الراجل: اتفضل معانا وجهز شنطتك
قاله حنتيرة : علي فين يا استاذ ؟
قاله: انا مندوب من شركة مايكروسوفت ومحتاجينك هناك..
وانطلقت الزغاريد في كل الحارة والهتافات حنتيرة حنتيرة ..واحتفل الناس للصبح وشربوا الساقع وانطلق حنتيرة في رحلته وخد كيسته معاه وماوسه الحبيب..
انبهر حنتيرة من اللي شافه جوة المكان وقال لنفسه يااااه كل دي اجهزة هاعملها ريستارت؟
وحاول حنتيرة يفتح جهاز مين فريم عملاق كان فاكره تلاجة وانطلق الانذار في كل مكان وجري العمال بسرعة لانقاذ الموقف وفجأة دخل بيل جيتس انبهر حنتيرة ولكن مش ببيل جيتس لانه ميعرفوش اصلا ولكن انبهر بجزمته وقال ياه الجزمة دي جامدة جدا
بيل جيتس: ايه يا ريس حنتيرة متعرفنيش؟
حنتيرة: لا والله محصليش الشرف
بيل جيتس: انا بيل جيتس رئيس الشركة دي
حنتيرة :بجد ده شرف ليا واللهي فين شغلي هنا بقي؟
بيل جيتس: بص يا ريس حنتيرة احنا سمعنا عنك كتير ومهاراتك الرهيبة في الكمبيوتر وسمعنا عنكم يا مصريين في الموضوع ده انكم مش ممكن استخدام الكمبيوتر عندكم درجة اولي
حنتيرة: امال اله ده انا اقطعك في الفيفا
بيل جيتس: ها ها ها ها ..لكن عايزين نسمع مقترحاتك عن شركتنا وايه اللي ممكن نضيفه عندنا ونضيفه للناس؟
حنتيرة: بص يا باشا ..دلوقتي بالصلاة علي النبي الجهاز معدش بيكفي اي حاجة يعني اسطب الالعاب يادوب ع الهارد وملاقيش مساحة تانية للافلام اعمل ايه فياريت تضيفولنا مساحات جديدة عشان نتحكم اكتر
وكانت المفاجأة في كل المكان ..اكتشاف مذهل مساحة جديدة للهاردات وفعلا صرخ بيل جيتس وقال لحنتيرة انت عبقري ي ي ي ي!!!!!
لازم فعلا نضيف المساحة حالا ..وكان كلام حنتيرة اللي مالوش فايدة اكبر فضل علي بيل جيتس وبعد مرور سنين انطلقت الهاردات الجديدة باسم جديد مش جيجا بايت ولا ميجا بايت ولكن "حنتيرة بايت" واللي تم اختصارها في النهاية لكلمة "تيرا بايت " انما اصل الكلمة مصري مية مية من الريس حنتيرة العبقري طبعا ولسه لحد دلوقتي بيل جيتس بيحلف بالمصريين وعبقريتهم ولسه الريس حنتيرة بيعمل ريستارت بس جاب هارد تيرا بايت جديد وبقي مستمتع جدا في حياته
وكانت اخر قواعده "يا بنتي متزعقيش جنب الشاشة عشان الألوان بتهرب"
حنتيرة الفرعون المصري
Posts
No comments:
Post a Comment