فـــــــودو الحـــــــب

قمر واحد..ونجماية..
حقيقة ليل..
ونص الدنيا مرايتها..
وزهر جبيني فكرتها..
في عز الليل..
حكاية البحر ده مالحة..
وعذبها عذوبة روح..
ونص البحر ده انتي ونصه جروح..
ولو فكرتي في التاني..
انا التاني..
وانا التالت..
انا في الدنيا اه واحد..
لكن في الحب ميت واحد..
وفيا حياتي شخصية..
وفيا الموت بشخصية..
مريض بيكي..
لكن هأشفي..
ومهما بردتي أنا هأدفي..
حضنت الصيف..
وبوست ايديه يخلصني من التخاريف..
كوابيسك ..وأحلامك..
هأدني بجرحي قدامك..
انا يوسف..
تقطعلي كده ايديا..
وتفضل قمرة في عنيا ..
ونفس النظرة سفاحة ..
ودمي يسيل في تفاحة ..
عشان يوسف..
ده مش نفسي ..
انا مش حلو بالمرة..
ولكن ده انا التاني..
هتفتكريه ..وتحلمي بيه..
وانا الأولي بتستغرب..
علي حبك..
غريب طبعك..
مكنت بنفسي قدامك..
ويوسف ليه حداشر أخ..
واي مصير!..
رموني في بير..
عشان عينك بتوحشهم..
ده اول شخص بيخونك..
وتاني شخص مجنونك ..
وانا في البير..
وتالت شخص للأخر..
فيه الطبع الأصيل ساخر..
وبعشقهم..
وبنساكي..
هألم أشخاصي جوايا..
وأعيش نفسي..
أنا مفصوم..
ومش معصوم..
عن الغلطة..
وحبك كان أكيد غلطة..
لا مش غلطة..
لا كان غلطة..
حداشر شخص يحتاروا..
ده كان غلطة !
هأشوف بليل..
في عز الحلم لو تبقي لثانية الصدق..
ولكن حيروا عينك عشقتي الكذب..
لان فصامي كان لعنة..
و"فودو" الحب قطعني..
وسامع منه تعويذة..
وحاسس منه تعويذة..
وبعد سنين..
تقولي عاشقة اشخاصك..
لكن انت !!مش عارفة..
انا عارف..
لأني لسه تحت السيل..
ولسه مختفي في البير..