فنـــــجـــــان

فنجان بيقراني
شاف الهوي ممدد
ماهو زي داء الأمل
من جرحي يتجدد
عرافتي مقتولة
علي لحن خطوتها
من خط عمر الكف
خطت شقاوتها
سابت ضفايرها للحب يتمرجح
رجع الهوي بيتي تايه بيترنح
وقاللي لو في الهوي تعشق علي قدك
لكن بتعشق سما والأرض مش تحتك
وأهو فص قلب وداب
من شهد أحبابه
لحن الهوي الكداب
زينله من سابه
لو عايز إستشهد
لكن غرامك مات
هتصيح وتستنجد
مش راجع اللي فات
اصرخ في ودن الهوي
قلبي مالوش تاني
والحب ده سكتي
وماليش حبي تاني
اول حبيب في الهوي
هيدنه سجاني
دنيا الهوي ضلمة
ومشوفت غير نورها
سجنالك في حضن الهوي
عالي اوي سورها
ماشية وهستناك
دلوقتي مش عاشقاك
هربوا صبايا الحور
طاروا وسابوا النور
وانت اتعميت بالنور
في الضلمة كنت أبصر
في النور بتتعثر
كسر كده الفنجان
وهتحيا عرافتك
تنسي الهوي اللي كان
واديني عرفتك
سر الهوي المدهش
صمت القلوب يدوش
متكسر الفنجان
قوم كسر الفنجان