"صعيدي في اللجنة التنفيذية"

في حجرة ما في قارة ما في مجرة ما تكمن احداث هذه القصة وان تشابهت احداثها مع الواقع عادي جدا وان لم تتشابه وايه المشكلة برضه هاحكيها..

مستر جون:مش ممكن يا ابراهام احنا لازم نتصرف..

ابراهام:وهنعمل ايه يا مستر جون هم مش راضيين ابدا علي عرضنا ده وبيقولوا مش هيستلموا الجايزة الا لما يستهلوها قال يعني عندهم نزاهة قوي..

مستر جون: لازم مصر تاخد اي جايزة عالمية نلهي بيها الناس سلطانية صغيرة يعني عشان نشتغل احنا ونتكتك..

ابراهام: انا مش لاقي يا فندم الجايزة بالظبط ي اي مجال بس بنحاول ..عرضنا عليهم جوايز ثقافية مش راضيين لانها من طرفنا ..اللجنة الدولية هي الحل يا افندم

مستر جون صائحا: اه فعلا اللجنة الدولية هي الحل هي اللي هتنفذ كل تعليماتنا من غير ما هم يعرفوا ولازم ياخدوا جوايز كتير كتير مش كل شوية الشعب المقرف ده هيتكلم عن المعاناة لا لازم ياخدوا احسن اقتصاد واحسن كل حاجة عشان مش طالبة الناس تصحي ولا ايه يا ابراهام..

ابراهام في خبث:هههه طبعا يا افندم انت حبيبي يا مستر جون..

مستر جون:بس انا سمعت كمان ان في واحد في اللجنة اسمه "الجلف"وده المصري الوحيد في اللجنة وبيقولوا صعيديهل هيستبعدوه من اللجنة يا ابراهام علي اساس انه هيبقي متحيز..

ابراهام:لا ما اظنش يا مستر جون هي اللجنة فيها واحد من ويلز وبرضه اما قيموا ويلز راح معاهم..

مستر جون:لازم اللجنة دي تشوف شغلها بقي لازم..

وفعلا اعطي مستر جون الامر للجنة وبدات في التحرك من مقرها لمصر لتقييم الاوضاع في شتي النواحي..

وكانت اللجنة مكونة من "مستر تربياني من ايطاليا ومستر الجلف من الصعيد ومس كلير من امريكا"

وعند هبوط الطائرة ..

ااااه اااااه ايه ده انتوا بهايم ده هبوط ده العيال كلها بترجع دول دخلوا طيران بالذمة..صاحت احد الركاب:يا اختي ما احنا قاعدين وزي الفل اهو انتوا اللي مقرفين وبتقولوا يا فقس افقس..

وبدات مشاجرة حريمي عنيفة في الطائرة لم تنتهي الا بعد نزول السلالم ..وهبطت اللجنة ارض المطار وكانت جملة في الاستقبال "اخلوها" بسلام امنين..وقام مستر تربياني باخراج جهاز صغير للترجمة وعندما قام بالترجمة وجد جملة الاستقبال غريبة للغاية"leave it safely

وعندما سأل مستر الجلف بصفته مصري قاله لا يا عم هي ادخلوها مش اخلوها بس حرف ناقص يعني واحنا بنخمنه ..

مس كلير:بس ده حرف يقلب المعني ودي جملة استقبال ..

الجلف: لا ده حرف مش مشكلة وبعدين لو هتدققوا ع الحرف يبقي يلا بينا من دلوقتي لاننا داخلين نشوف البدع اساسا انتوا جايين تتكلموا علينا من اولها ..

مستر تربياني: بص يا جلف احنا مجرد بنسال بس انما احنا اصلا جايين هنا وعايزين ندي لمصر اي...

مس كلير غاضبة من تربياني موجهة حديثها للجلف:هو يقصد عايزين ندي مصر جايزة يعني لو تستحقها طبعا حسب التقييم اللي هنعمله

الجلف:طبعا طبعا احنا ارض الشرق ولازم هناخد جوايز امال ايه ده احنا ماشفناش الجوايز دي من ايام بم بم والشمعدان واللهي..

وفي صالة الاستقبال ..مس كلير:هي الشنط بتتاخر كده علطول ؟

الجلف:وهي دي قوة تحمل المصري انه بعد رحلة طويلة زي دي لازم يصبر لما يلاقي شنطته وتتفتش كمان تفتيش مبرح لحد ميبانلها صاحب عشان نتعلم الصبر وكل حاجة هنا ليها حكمة

ثم توجه مستر تربياني للكافتيريا وكانت المفاجأة..خرج العامل من حجرة صغيرة بعد فترة بالشبشب الزنوبة وهو يتثائب وسأل تربياني :عايز ايه يا عم الكتكوت؟

وقام تربياني مسرعا باخراج الجهاز للترجمة ليجد المعني

What do you want uncle little chicken

وقال ربما تكون جملة مصرية للترحيب فقال له تربياني في مصري مكسر :شاي..واحد شاي

العامل:اه ده انت مش مصري بقي والله انا قلت برضه النضافة دي مش ممكن تكون مصري طيب هاروح اتهبب اجيبلك الخرة اللي عايز تشربه ووجه حديثه لتربياني مبتسما اوك سير..

وكلما ترجم تربياني بجهازه الخاص يجد العجب فكلها جمل استهجان وهجوم حاد علي تربياني ولكن قال لنفسه ربما هو ود زائد وحرارة ترحيب لاختلاف الثقافة المصرية..

وبعد شرب الشاي والحساب واللذي منه ظل المصري العامل يردد في شحاتة tips tips tips please tips tips

حتي هرب تربياني مسرعا من غلاسة العامل الذي كاد يضربه للحصول علي بقشيش ..ثم خرجوا من المطار بعد ست ساعات وركبوا سيارة اجرة عتيقة الباب مخلع والسقف تقريبا واقع

مس كلير:ايه العربية دي يا جلف؟

الجلف:مالها يا مدام دي زي الفل لادا 76 انما حدادي اسطي يعني

تربياني:دي مش عربية دي قطعة خردة المفروض يحرقوها او يرموها للكلاب

مس كلير:العربيات دي لسه موجودة في العالم ازاي ؟

مستر تربياني :دول كمان لسه بيعملوا عربية اسمه 128 انما حكاية بيقولوا منها الفئة السابعة نزلت مصر بس وفيها امكانيات عالية جدا معادا الباور والتكييف والفرامل وفتحة السقف و السي دي والاير باج

مس كلير:امال فيها ايه؟

مستر تربياني:بيقولوا صاج

الجلف:اه فعلا دي صاجها حكاية مش كده يا اسطي؟

الاسطي:128 يا سلام اما عربية ..دي حلم حياتي دي حكاية ..وبكي السائق من شدة عشقه لل 128 واحس تربياني بالفخر من صناعة بلده التي ابكت المصريين واحس بمدي قوة العلاقة بين مصر وايطاليا ..

الجزء القادم "اللجنة في امبابة"