السيرة الذاتية لصابع

متعلق بين حبل الشنطة ..من غير خاتم ولا يحزنون بس فعلا يحزنون..

بيشاور بيلف العالم دايخ مش بيلف لشمس ودنيا..

بيألف دواوين الشعر في لمحة قوس قزحية وبيخلق اشباح وجنون..

خبط راسي في نفس الحيطة دي اربع سنين..

والحيطة انشقت من دمع العاشق والصابع رافض يحضن نفسه..

والحيلة انهدت والصابع رافض يضعف ابدا مش هتعلق انا بالخاتم ده الخاتم ضعف ..

وانا رمز القوة في عيوني القوة بشوفها في عينه وعين صاحبه مجانين بيحاوطوا عقل الصابع زي الخاتم لكن علي مين..

هددت الصابع ده مرة بقالب شيكولاتة ولكن دابت ..او تقدر تنطق "ماتت"..اما الشيكولاتة دي طلعت مقلب..

انا بني ادم مش شايف ادم الا في ضعفي كل ما بقوي بشوفني حوا ..مع ان حوا هي الأقوي..

انا شوفت الصابع ده قبل كده يمكن ده مسك التفاحة ونزلنا من الجنة بس بيتكبر ع الخاتم مش عارف ليه..

صاحبي سألني وقالي كلام قولتله لون مونكيرها في دمي بس ده همي اشوفها يوماتي واشوف الصابع..

لو يمسكني زي سيجارة اكون مبسوط او يلعبني زي جيتار اهو ابقي لحن وكله علي الله..

انا مجنون بس ده صابع كن فيكون..انا عاقل جدا لو فكرت بعقلك بس المحنون جوايا مسيطر جدا علي افعالي ونشيط في غبائه..

مرة وشاورت قالت "لا" بنفس الصابع خلقت طيف مجنون متعفرط وركبت بساطي وقولت ما شا الله ..

وموصلتش قصر ولا حاجة ولكن في نفس مكاني مرت غزلان وجنيات وعرايس بجر يمكن طيف الصابع يخلق الف خيال مع ان صاحبته الواقع نفسه ..

المهم روحت البيت ونمت شوية ..

الحلم عماني لبست عصابة علي عيوني لمدة شهر ..

والشهر في عرف الحلم ثواني ..

لما فتحت مشوفتش حاجة..

شوفت بريق خاتم في عيوني..

قالولي الخاتم هل هلاله..

قولت بتاعي ..قالوا بتاعه ..

مت في جلدي رجعت جنين ونزلت الارض اعيط تاني ..

وبقيت نونو بيبكي ويصرخ بس ساعتها بدأت حياتي ..

بدون الصابع