روبي وبوبي

المستحيلات ..

امتي روبي هاتبطل تغني ؟

لما مفيد فوزي يبطبل يلبس بدل بمبي..

طيب وامتي كابتن ماجد هيوصل للجون؟

لما حلقات الجرئ والجميلات تخلص..

طيب وامتي نوال السعداوي هتبطل تطالب بحقوقها؟

لما الريس يعمل علاوة وميغليش الاسعار..

طيب امتي معمر القذافي هيعتزل؟

لما يعملوا بطيخ من غير بذر..

طيب امتي ميلودي يتحدي الملل هيبطل ملل؟

لما بوبي تطلع علي قناة اقرأ..

طيب امتي هيبطلوا المطربين سرقة ألحان؟

لما يبطلوا المخرجين والمؤلفين سرقة أفلام..

طيب امتي هيرخصوا الاسعار؟

لما لما الويز اللي باجنحة يطير في الهوا..

طيب امتي الجنيه يبقي بخمسة دولار؟

لما يلعب معانا المريخيين دورات بلاي ستيشن 20

طيب امتي البنات هتبطل كذب؟

لما تبطل نميمة..

طيب امتي الجرايد القومية هتشتم في الحكومة؟

لما جرايد المعارضة تحمد ربنا علي الحال..

طيب امتي هيعملوا مستشفيات محترمة في الأرياف؟

لما القاعدة تعمل مركز ليها في بورتو مارينا..

طيب وامتي الناس هتبطل تتفرج ع المصارعة في القهاوي؟

لما أسامة انور عكاشة يبطل مسلسلاته..

طيب امتي مصر هتعمل مفاعل نووي؟

لما يعملوا عملية ترقيع للربع جنيه المخروم..

طيب امتي موبينيل هتلقط شبكة؟

لما يعملوا نظامين لقط شبكة ولقط سنارة..

طيب امتي السواقين هيسمعوا لبيتهوفن؟

لما أحمد نظيف يبقي مطرب الشباب الأول..

طيب امتي القطارات مش هتولع؟

لما الطريق الدائري يربعوه..

طيب امتي الاف ام تبطل اعلانات مستفزة؟

لما يعملوا في كوم النور مدينة ألعاب مائية..

امتي مصر تاخد كاس العالم؟

بلاش دي بقي عشان عيب بجد..