survivor in egypt

s u r v i v o r

برنامج سرفيفر أو "الناجون"فكرةبرنامج ناجحة جدا في الخارج لمجموعة من الشباب بيحاولوا يعملوا بعض الاشياء المستحيلة احيانا والمقرفة احياناخري زي مثلا مسابقة في اكل الدود

طبعا اكيد ان اكتر دولة المفروض ينجح فيها البرنامج ده لو اتطبق هنا هو مصر والمصريين لان المصري مستعد يموت نفسه عشان مليون جنيه او ياكل سلحفة مش دود بس وياكل كلب بحر كمان..لكن ازاي البرنامج ده يتطبق في مصر وازاي تكون مراحله صعبة فعلا عشان يناسب المصريين ؟

ممكن تكون المرحلة الاولي في المسابقة هي طابور عيش وازاي تقدر تجيب 50 رغيف مثلا في عشر دقايق ودي مسابقة صعبة جدا لأنك هتواجه سيل من الشتايم لمحاولة اختراق الطابور وممكن تنضرب ومش بعيد تودع خالص

المرحلة الثانية خد ورقة حكومية وروح خلصها وعشان تبقي صعبة اوي هاقولك روح المرور وحاول تخلص اجراءاته في خمس دقايق وتشتري الورق وتمضيه وعيش في اللذيذ بقي

المرحلة التالتة حاول تقنع سواق ميكرباص باغاني ماجدة الرومي ودي اصعب المراحل لانك هتواجه اصوات مش كويسة لانه عايز يسمع اغاني مختلفة تماما عن الجو ده فممكن يرميك من العربية خاصة لو قولتله انت ليه بتركب اربعات يا اسطي يبقي جنيت علي نفسك

المرحلة الرابعة تروح لموظف في هيئة السكة الحديد غلبان وتقنعه باهمية الاي بود ليه ولأولاده وان اللاب توب مهم جدا في الحياة فساعتها طبعا هيجري وراك بالمسدس او السكينة

المرحلة الخامسة روح علي قهوة بلدي هتلاقي المصارعة شغالة والناس متنحة واقلب القناة فجأة وقول انا عايز اتفرج علي القناة دي حد ليه شوق في حاجة؟ وساعتها عينك ما تشوف الا الضلمة بقي

المرحلة السادسة روح شارع الهرم وخش كباريه وخد رقاصة معاك وقولها انا عايزك تلعبي معايا تقولك عنيا قولها لا تلعبي معايا بلاي ستيشن!

المرحلة السابعة خش في مظاهرة اطباء اومدرسين وقول لا للكادر لا للكادر

المرحلة التامنة

خش مركز جيش واسال عن وحدة الردع واما يقولك مكانها اساله هو ردع طبيعي ولا صناعي؟

اخر مرحلة بقي انك تكسر كمين شرطة وتحصل مطاردة زي افلام الاجنبي وانت راكب 127 وهو ده التحدي الحقيقي لانك هتبقي في مخاطرةان العربية تنفجر في اي وقت

فعلا مصر ارض خصبة للبرنامج ده