Monday, June 15, 2015

عظمة النساء في تاريخ الانسانية





من افضل الكتب اللي ممكن تقراها عن تاريخ النساء وتأثيرهم في العالم والتاريخ هو كتاب "الدر المنثور في طبقات ربات الخدور" لزينب فواز..الكتاب مقسم حسب الحروف الابجدية ويبرز المئات من الشخصيات النسائية اللي ليها تأثير كبير في تاريخ العالم.

من أول "أمنة بنت وهب" الي شخصيات فرعونية ورومانية وجنسيات مختلفة وتبرز الكاتبة دور كل شخصية وتعطي نبذة عنها .

الرسول وصي علي النساء وعظمة النساء تبرز في شخصيات كتير جدا في تاريخنا الاسلامي زي ما في التاريخ الغربي كمان ..لما بتصلي وتحج تذكر كمان قوة المرأة وتكريم الله لها..

الكعبة اللي انت بتطوف حولها بناها ابراهيم واسماعيل عليهما السلام..ابراهيم كان متجوز سارة وكانت ما بتخلفش وقالتله وهم في بيت المقدس بكل كرم : ان الرب قد أحرمني الولد ؛فادخل علي امتي هذه لعل الله يرزقنا منها ولدا"

كانت بتتكلم عن هاجر اللي جت معاهم من مصر تساعد سارة..شايف جمال الكلمة وهي بتقول " لعل الله يرزقنا" مقالتش " لعل الله يرزقك" انما كانت كأنهم نسيج واحد.

فعلا خلف اسماعيل من هاجر لكن بدأت تتعاظم عليها شوية وبدأت الغيرة واشتكت سارة لابراهيم وطلبت منه يبعدهم عنها وخدها ابراهيم لحد مكة وسابها هناك طبعا دي مش قسوة لكن حكمة ربانية.

هاجر قالت : يا ابراهيم اين تذهب؟ وليس معنا ما يكفينا.
فلم يجبها
وبعد كده قالت : الله امرك بهذا؟
قال : نعم
قالت: فإذن لا يضيعنا.

العلاقة الزوجية الكاملة تتجلي في قصص ابراهيم وزوجتيه..كلها ردود توحي بمدي متانة العلاقة ومدي الايمان.

هاجر هي اول من سعت بين الصفا والمروة..واسماعيل ابنها بني الكعبة مع ابراهيم..
حتي وانت بتشرب من زمزم تذكر هاجر.

حتي لو واحدة بنت بتخرم ودانها عشان حلق افتكري غيرة سارة من هاجر..
سارة غضبت من هاجر فحلفت لتقطعن ثلاثة اعضاء منها..فأمرها الخليل ان تثقب اذنيها وتخفضها فتبر قسمها.

حتي لو بتستعين بالصبر والصلاة تذكر سارة..لأن كان في ملك عايز ينال منها فاستعانت بالصبر والصلاة فحفظها.ولهذا كانت الاية " واستعينوا بالصبر والصلاة".

من كتر عظمة بعض النساء ذهب بعض العلماء الي نبوة سارة وام موسي ومريم..ولكن المعظم قال انهن صديقات
كل حاجة بنعملها هتلاقي فيها من عظمة المرأة شئ وارادة الله طبعا..من اول نزولك للأرض لحد الحج والسعي