Thursday, June 24, 2010

اللخـوشية وأنــواعها










الشخص الدغف يختلف تماما عن الشخص اللخش في الخصائص والتركيبة الجسمانية حتي ..ولكل منهم سره الخاص"

حكمة رومانية



طبعا ده كذب من النوع اللي مالوش رجلين زي ما بيقولوا رومانية ايه بس دي اخرها حكمة من كفر البطيخ مثلا
ولكن الشخص اللخش فعلا مختلف تماما لان اللخش هو المحرج او اللي مبيراعيش اي حاجة في موقف معين قدامه
انما الدغف بيقع بلسانه بس انما بيحس بغلطه

امثلة علي الشخص اللخش :

مثلا واحد صاحبي مرة واقف مع زميلته في الجامعة
جه واحد تاني من وراه وبصوت عالي "انت فين يا عم الجحش بقالي تلات ايام بدور عليك "
طبعا يحمر وش الاول خجلا
ويقول لزميلته "احم اصلهم بيدلعوني في الشلة ويقولولي يا جحش من رباطة الجأش يعني وكده ..احم "
واكيد عموما بيكون التفسير همايوني مالوش معني انما بيكون موقف اتثبت فيه جامد وقمة الخجل قدام اللي واقف معاها

واحد تاني لخش ومثال حي بقي المرة دي ...مرة كان في عزومة مفاجأة عندنا ومكناش عاملين حسابنا ان الناس دي كلها جاية فقولت خلاص مش هاكل
الا لما يمشوا عشان الاكل يقضي لاننا كنا كتير جدا فقولت عشان اوفر اكل للضيوف واكل انا بعدين فقالولي ما تيجي تاكل قولتلهم شكرا انا بجد لسه متغدي من نص ساعة
المهم طلعوا قعدوا في الصالة دخلت انا اكل وكنت جعان جدا ..
دخل واد صغير قريبي وبصوت عالي "معتتتتتز اللي كان بيقول شبعان قاعد ياكل ويشرب جوة زي المفجوع
معتز بياكل ..بيااااااااااااااااكل "
وطبعا ده اللخش بمعناه الاصلي يعني ومنظري كان مزبلة وانا طالع من المطبخ والاكل في ايدي وبقول " اكل ايه يا ابني ..ده انا بشوف حاجة بس في التلاجة"

طبعا الناس قالت طيب مكانش عايز ياكل معانا ليه يعني وكده وهذا اللخش الصغير خلي منظري زفت يومها.

واحد مثلا عايزني اوصله بالعربية بليل فقولتله معلش اصل العربية في الجراج مش هينفع دلوقتي وييجي لخش من وراك ويقول " عربية ايه يا عم اللي في الجراج المفتاح اهو تحت الكرسي"
وتبقي عايز تقوله "يا ابن ال.........."

واللخوشية نوعين في لخش بطبعه ولخش بالصدفة وفي نوع شاذ عن القاعدة وهو "جعلوني لخشا"
وده بيكون من تأثره بالشلة اللي حواليه فبيتعدي باللخشنة
اللخش اللي بالصدفة ده بيكون زي اللي بيسيب سعر الهدية علي الهدية في عيد ميلادوهو بيقدمها


اما شلة لخشنة بتكون زي الموقف ده :

اتنين يدخلوا عيد ميلاد وقدام صاحب عيد الميلاد يقول الاول للتاني : انت جبت الهدية؟
التاني: اه جبت
الاول: انا مجبتش ههههههههه
التاني: لا انا جبت وغالية كمان
الاول: عاملة كام يعني
التاني: 75 جنيه
وسط ذهول صاحب عيد الميلاد من هذا الحوار الفج والمقزز ههههههههههه

دي بتكون شلة لخشات علي بعض حتي صاحب عيد الميلاد اكيد لخش طالما يعرف هؤلاء اللخوش


وفي لخشنة في المعاكسات ودي كتر جدا طبعا ومعروفة يعني واحدة يقع عليها الكاتشب مثلا وهي متنرفزة جدا وكده ييجي واحد غبي يقول "ياريتني كنت البقعة"
ههههههههههههههه
ودي تاني اسوأ معاكسة سمعتها في حياتي وطبعا كانت البنت مستاءة جدا لان اولا مش وقته ثانيا ايه القرف اللي بتقوله ده ؟ هههههههههههه
طبعا هي اسوأ معاكسة سمعتها في حياتي كانت من واحد صاحبي بيعاكس واحدة ماسكة كلب صغير ولذيذ
تتوقع قالها ايه ؟؟
واحد هيقول قالها "ياريتني كنت الكلب" ههههههههه لالا مقالش كده العن بكتير
واحد هيقول "ياريتني كنت طوق الكلب" اقوله ايه يا عم الذل ده في ايه لا برضه مقالش كده
تخيلوا قال ايه ..قال "يا تري الكلب ده بينجس زي بقية الكلاب؟ " هههههههههههههههههههه
ايوه انا حاسس بيكم دلوقتي وانا عارف ان دي اسوأ معاكسة في العالم ويمكن من ايام منقرع
ومن ايام الحروب الهكسوسية والعجلة الحربية ومخترع الاسكوتر الحربي زمان ايام الفراعنة
معلش بس كان لازم اقولها لان ده موضوعها وده مكانها الحقيقي
واللخشنة عادة جاهلية وعادة حكومية ايضا مش بس في المواطنين العاديين
يعني معظم تصريحات الحكومية فيها لخشنة وغباء وكذب في نفس الوقت
والوزراء في تصريحاتهم في مجلس الشعب والالفاظ اللي بتطلع منهم وغيره كتير في البرامج الحوارية
وفيه نوع اللي هو اللخش الجلياط زي مثلا تكون بتكلم امك في التليفون واحد يقولك هات الموبايل اتكلم
تقوله طيب اما اخلص..يقولك طيب انجز عشان عايز اعمل مكالمة
وهو موبايل اهلك ؟ ههههه ده من اشد انواع الجليطة وقليل من صلصلة اللخشنة برضه
لان في حبل رفيع قوي بينهم

واحد هيقولي طيب ايه هي مراحل او درجات اللخشنة
اقولك يا عم :
1- اللخش المبتدئ
2- اللخش المتمرس
3- اللخش الاصلي
4- اللخش بتاع بلاده
5- اللخش بالفطرة

وتقدر تحط تحت كل تصنيف مجموعة زي مثلا سواق الميكروباص اللي بيتخانق مع بنات عشان يركب اربعات ده لخش بالفطرة

المبتدئ بقي اللي بتجبره الظروف علي كده انا مثلا مرة قولت لواحد "ههههه مين البأف اللي هناك ده ؟؟ " قالي في احراج "ده ابويا !!!"
ودي درجة من اللخشنة بس مش ساعات مش بتقصدها

انما المتمرس والاصلي قريبين من بعض
اما بتاع بلاده بقي فده اللي يروح عيد الميلاد واول ما يفتحوا الباب يقولك "والللهي معلش اتاخرت لاني كنت بفك فلوس من المحل اللي جنب محل الهدية لان مكانش معايا فكة متين واللعبة دي ب 140 جنيه اساسا "

ياريت اكون اوجزت وفهمنا مع بعض ما هي اللخشنة والي اللقاء في حلقة اخري من البرامج التعليمية اللخشية ..

Sunday, June 20, 2010

شبــاب بالــــترتر






مناظر احيانا تخليك قرفان او مشاهد مقززة للعين ..دي بتختلف من واحد لواحد ..ولكن في حاجات ميختلفش عليها اتنين بتكون فعلا مقززة :


1-خليجي بيرقص علي اغنية البرتقالة

2-تكاثر دبانتين علي بنطلونك

3-واحدة وحشة قاعدة كل دقيقة تفرد شعرها وفاكرة نفسها حلوة وبتبص حواليها

4-شاب ماشي بكاسيت كبير و بقميص بترتر

5-عايشة الكيلاني في مشهد اغراء بملابس ساخنة

6-كرش الحكام المصريين في الملاعب

7- واحد كل شوية يمثل انه بيكلم بنات ع التليفون والتليفون يرن وهو بيمثل

8- خطاب الحكومة في عيد العمال

9- النحل اللي علي العيش في بعض المخابز القذرة..والراجل يقولك ده عيش طازة وهو مليان نحل وحشرات

10- واحدة تيجي تشحت باسلوب غبي وتحط ايدها علي ازاز عربيتك بطريقة مشهد تايتانيك بتحط ايدها كلها وتنزل بيها علي الازاز

11- نفاق البرامج الرياضية وحروبها علي بعض

12- كرش احمد عبد الغني لاعب حرس الحدود

13- الانتخابات الرئاسية علي الفيس بوك وكأنها مسابقة لبان مثلا

14- مجموعة قنوات مودرن واسفافها وبرامجها الساذجة

15- انك تبقي في ميكروباص ضيق وينط عليك "فرس النبي" ومافيش مكان تهرب فيه حتي

16- تباع الميكروباص يفضل باصصلك طول الطريق عشان قاعد وشه في وشك

17- تبقي ماشي ورا عربية بصندوق في زحمة وكل ركابها يقعدوا باصينلك عشان مافيش غيرك يبصوله

18- واحد تقوله تعالي حفلة باربيكيو..يقولك بتعرف ترقصها ؟؟

19- واحد راكب عربية هامر يقولك "انا مش عارف ايه مشكلة الشعب ده مع الحكومة ؟ "

20- واحد قاعد في مطعم كنتاكي وحاطط ازازة الكاتشب في بقه

21- واحد في ميكروباص بياكل موز جنبك واللي جنبك بياكل فول سوداني وكأنك في جبلاية

22- رسايل كابتن مدحت شلبي اللي بيقعد يقراها ويقول "يا شلوبتي" و "يا شلبلب" ويدلع نفسه

Thursday, June 17, 2010

شربت في عينيك كئوس النيرفانا













اليوم في عينيك..
لا تتجاوز فيه الاحلام عمر العشرين..
أحلامي في عينيك مراهقة جدا..
تتقنع من كل النزوات برمش او رمشة عين..

اليوم وجدت في عينيك قصائد تتبرأ من شاعرها ..
وشعراء يتبرأون من أقلامهم..
وأساطير تتبرأ من راويها ..
ولا أعلم من ما أتبرأ انا في عينيك..
فتبرأت من نفسي ..!

اليوم شربت في عينيك كئوس النيرفانا..
وحجزت طاولتين للعشاء..
والمدعو ..أنا ورسالة حب ..وبيننا ضوء شموع !

اليوم علي عينيك عزفت قيثارات الشكر لله..
وعلي اصابعك عزفت اناشيد سلامي مع نفسي..
وعلي شفاهك رحلت...
قنديل يضئ قبلة الموت..
لكي أحظي منك بقبلة الحياة..!

اليوم تفننت مشاعري في كتابتها بالحبر السري..
رسالة لا تقرأ الا في عينيها..
لإمرأة مكتوبة بحبر الدنيا السري..!

اليوم زرعت نفسي كشجرة في عينيها..
والأرض خصبة والسماء ستمطر طول العام..
كي اكمل هذا المشهد ..بشجرة فل..او بنفسج !

اليوم عرفت الموت عاشقا ومستعشقا..
ومعاشقا..ومتعاشقا..وكل ترانيم اللغة العربية في وصف العشق..
لاني اليوم رأيت انا الذي لا اعرفه
انا الذي خلقته إمرأة ..

اليوم أكلت سحاب السماء في فمي..
كي ترعد..كي تبرق ..كي تقتلني ظاهرة اخري..
غير ظاهرة عينيها..

اليوم تسلقت جبال وحضنت بحور ..
وركبت جناحات النورس ..
وسافرت في كينونة اللون الابيض..
بدمي الاحمر..
وصنعت من اللونين لون عاشق بدرجة مجنون..!

اليوم خرافاتي تقبل يد الحقائق..
كي تحصل منها علي اعتراف واحد..
هل احيا الان ام مسلوبة روحي في جنة خلد ؟

اليوم اشاهد خمسون راقصة باليه علي فمي..
وخمسون عازفة فيولين علي قلمي..
وخمسون شاعر وفيلسوف علي دمي..
وخمسون خسوف وكسوف في اعماقي..
ليصبح جسدي..اوركسترا السماء..
لعينيها التي تنظر الي السماء..

اليوم تعانقت الرحمة والقسوة ..
والخطوة والتردد..
وانتصاراتي وانهزاماتي..
وباركوا كلهم وقبلوا بعضهم..
في حفلة سقوط قلبي في قفص الاتهام..
لحكم سيؤجله القدر..وقاضيه لم يأتي بعد !

اليوم زحام..
زحام مشاعر جم وزحام احاسيس يقتلني..
وتضيق عليا ابعاد جسمي..
مكعب..مربع..مثلث..
تفاصيل هندسية لا تليق بعذوبة الغرام..
ولكن جزء من الواقع يتبقي دائما !

اليوم تطارحني الدنيا الغرام..
وتطرحني ارضا بالغرام..
وتطحنني كحبات البركة..
لتبارك الغرام..
وتحرق قلبي ليخرج منه رائحة الفل..
لاصير مبخرة الغرام !

اليوم في عينيها..
سنة ضوئية..
تتلون فيها كلمة"سبحان الله"..
وتركض فيها غزلان وطواويس ..
وتترامي اوراق الالياذة البيضاء علي مدي البصر..
ان نظرت اليها واحسست النظرة !

اليوم في عينيها..
جمعت مساحات شجوني..
ورسمت منها مساحات خضراء او وطن جديد يحتضنني..
وجمعت اصوات بشر تحدثني..
وعيون من "مسك" ..قبلتها العطر..
ونظرتها السلام..

وحين اهرب من نظرتها
اهرب من الاحتراق الي الاحتراق
من احتراق قلبي الي احتراق لهفتي ..
ولكنه قراري الاخير..
لا حل الا الهروب..!


Monday, June 14, 2010

الفرات في اختصارات الشات..من اجل شات حديث وسيس








كترت قوي اختصارات النت الاجنبي فقولنا نعمل مصري بالمرة يعني يمكن ينتشر ولا حاجة والاختصارات زي مثلا

brb

be right back



وزيها الوف الاختصارات لكن العرب ناقصهم اختصارات خاصة بيهم ونحاول نعمل زي الاجانب في الاختصار زي :



ي ي ي
يلا ياد يا كورك

ا ف د
اخفي في داهية

ع ا م ا
عايز ايه من امي

ه ع
هاعلم عليك

ا ف ك
ا... في كيس

ح ف ك
حموك في كنكة

ح ك
حيزابون كبير

ل ا
لطخ الليالي

ص ت
صبح تاتا

و ع م ض
وقعت علي مؤخرتي م الضحك

ي ه م
يلا هنرش مية

ي ي ز
ياد يا زبالة

ا ع
اتفوه عليك

ق ي ب
قشطة يلا بينا

ر ع م
ربنا ع المفتري

ا م
افة متين

ا م
اوين متين

ظ ف ح
ظبطني في الحوار

ه د
هفخد دلوقتي

ش و ا
شهيصني واقرش

ع ا ا
عند ام ادهم

ط ف
طز فيك

ح ط ت ب
حنة طرية تستاهل بقك



اختصارات خاصة ع الفيس بوك :

ف ك
فشختني كومنتات

م ت ب ا
متيجنيش تاني بروح امك مصطلح للفيس بوك عشان ميعملش تاج للصور

ش ع ف ا
شكلك ع... في الصورة

خ ب ا
خنقتني بروح اهلك

ف ك ز
فيديو كورك زيك

ر ي ط ا
رد يا طينة البرك

60+ن
جتك ستين نيلة

ع م
عيل مخوخ

م ه ا
ما هذا الفك وهي ترجمة حرفية مريضة ل wtf ,وعوضنا عن الكلمة الاخيرة بكلمة فك بدل منترجمها

ل ت م ا
لقد تقيأت م الضحك

انت ح ي ح
انت حمار يا حمار؟


اختصارات للشات وبين الخاطبين او المظبطين مع بعض :

س ع ا ا
سك علي ام الشات

و ا
وريني افاك

ا م ا
اتبول من الضحك

ن ع
نقضيها عرفي ؟

ف م م ا
فكك من موضوع الجواز

ع و م
عرفي ولا مسيار ؟

ا م ب
اخطبني من بابا

ع ي ح
عندها يا حبيبتي




Sunday, June 13, 2010

الصدمة نبض المجروحين






انا شفت عينها من زمن..
من يومها قلبي شراع خيال..
طاير علي جناح الجمال..
طاير ما بين ييجي مية زمن..
من يومها قلبي في فضفضة..
وكلامه طاير للفضا..
واتعلم الرقص الجميل..
ورقصلي تانجو في وحدتي..
ونام كمان في مخدتي..
وبقينا اصحاب الغرام..
من يوم عيونك والغرام..
وبكلمه..
وفي كل ليلة بكلمه..
لكن بخاصمه في كل يوم..
علشان بيسأل عنها..
فكرني دايما انها..
مشيت بعيد..
ده انا جايله يرميلي الهموم..
لكن يدوقني السموم..
وتملي يسأل عنها..
سيبته ورحت لوحدتي..
وبقينا اصحاب بعدها..
لكن خاصمت انا وحدتي..
علشان حنانها لحضنها..
طب اروح لمين؟
وقعدت استني ليومين..
ورحت اصاحب صدمتي..
وبقينا اصحاب بالقوي..
وقرينا قصص المجروحين..
وفي قصة منهم صدمتي..
قالتلي مش دي قصتك؟
وخاصمنا بعضينا ليومين..
لكن رجعت ومن جديد..
وعرفت ان خلاص مافيش..
في الدنيا دي غير صدمتي..
اوفي صديق للمجروحين..
صدمة حياتهم من سنين..
والحزن تاج العاشقين..
ورجعت اصاحب صدمتي..
حتي ولو دي قصتي..
دي الصدمة نبض المجروحين..
وبيوتها من وحدة وحنين..


Friday, June 11, 2010

الطـالب المـثالي ع السـور يا استـاذ






الطالب الاعتيادي في الثانوي ..شعره منكوش لاما شعره مليان جيل ومزفلط وطول النهار ماسك الموبايل ده في الجيل الحديث
بس لو رجعنا للزمن لورا مكانش في موبايل وكان يوم ما بنحب نروش بننط من ع السور انما دلوقتي مش بيضطروا قوي ينطوا
لانهم معاهم موبايلات جوة وممكن يشوفوا افلام كاملة اثناء شرح المدرسين


في يوم من الايام كانت منتشرة قوي الاجازات المرضية والكلام ده في الثانوي عشان المذاكرة وكنت انا من اللي واخدين الاجازات دي
وكنت بنزل ساعات اقابل صحابي من علي سور المدرسة كده بترنج البيت لان المدرسة جنب البيت وفي يوم من دول كان في تكريم
للطلبة وطبعا اي هنتريش التكريم ده وانا كان اسمي بينادوا عليه كطالب مثالي "واحد هيقولي طالب مثالي؟؟" اقوله اه ياعم ما انا كنت في فصل الادبي بتاع عاطف عضلات وعبد الله سنجة فاكيد كنت مثالي ومثالي جدا جدا كمان.

وساعة ما كانوا بينادوا اسمي كنت واقف برة ع السور ونطيت بسرعة عشان اخد الجايزة بالترنج كان ده في الطابور التاني الي بعد الفسحة مش بتاع الصبح

وهم بينادوا"الطالب المثالي..معتز"
وفجأة اصيح انا من فوق السور : ايووووووووووه انا اهو

وتلتفت جميع انظار المدرسة للطالب المثالي علي السور بترنج البيت وكله تراب وطين تقريبا من مطرح السور
ونزلت استلم الجايزة وسط ذهول الجميع من منظر الطالب المثالي اللي جاي بالبيجاما وناطط من علي السور وواخد اصلا اجازة ومبجيش المدرسة

وبعد عدة اسابيع

كنت من اشد الساخطين علي تمارين الصباح الهايفة يمين شمال حازي هوب هوب
يمين شمال ..حاااازي يا واد علي زميلك والجو الهنتريشي ده وكنت واقف علي طرف قسم الاذاعة وصوتي لو عليته يطلع في الميك لاني اول واحد في الطابور جنب الاذاعة

وفعلا عليت صوتي وكنت بقول "ايه يا جدعان الهبل اللي احنا بنعمله ده ..حازي ايه يا عم ؟؟ هي دي تمارين نشاط بالذمة ؟؟ دي حاجة تنيم وتخنق اساسا "

وكانت الدهشة وساد الصمت جميع ارجاء المدرسة فجأة لان صوتي ده كله سمعه في الميكرفون غصب عني
وسأل المدرسين "مين اللي اتكلم ده عن تمارين المدرسة؟؟"
وكأني اتكلمت في سمعة امه مثلا فقولت باستحياء "انا يا استاذ" لانهم هيجيبوني هيجيبوني فقولت اعترف
قالي "كنت بتقول ايه عن التمارين يا ولد؟؟"
قولتله " كنت بقول انها غذاء العقل والبدن يا استاذ"
قالي " غذاء ايه يا خويا ؟؟ "
قولتله" العقل والبدن يا استاذ "
قالي "طيب ورايا ع المكتب "
وكانت نتيجة ثورتي ع التمارين فصلي عدة ايام ورجعت تاني بعدها الطالب المثالي المتبهدل يا عيني ووقفت في الطوابير تاني ومعدتش بعمل ثورة
يمين شمال هوب هوب بس نعيش ونخلص السنة علي خير

وبعد ايام كانت السلالم كلها جنب الحيطان عشان نهرب وفعلا بنطلوني شبك علي السور وهم المدرسين بيجروا ورانا يضربونا ع السور اللي بيلحقوه
وانا بقي بقيت ملقف ما انا بنطلوني شبك وكله نط اساسا
لحد مقولتلهم "حرررام بقي مكله نط ولا عشان انا اللي متعلق هنا هتجلدوني؟ حد ييجي يفكني يا جدعااااان"
وجه المدير وقال "هاتولي الواد ده ..مين ده؟؟ "
واحد قاله "ده الطالب المثالي يا استاذ"
قال المدير " مثالي؟ ههههههه ..طيب قوله ينط وياخد الاتنين جنيه دول يجيب معاه فول وطعمية ليا معاه "

كان المدير متعاون قوي وبتاع مصلحته فعلا مش مهم مين اللي نط المهم يستفيد وكأنه محبوس معانا جوة وهيتلب بالعصاية لو خرج فالمدرسة الثانوية اشبه بمعتقل صغير

وفعلا خلصت من ع السور ونطيت واثناء تنضيفي للتراب من علي البنطلون كانت المفاجأة ...
كانت اختي مع صاحبتها برة المدرسة بالصدفة
وبتقول لصاحبتها " انا مش فاهمة ايه الفوضي دي والطلبة اللي ملهاش اهالي دي بينطوا وبيزوغوا وحاجة قرف"
وفي اثناء حديث اختي لصاحبتها تفاجأة هي بمنظري قدامها وبنطلوني مقطع من ع السور وجاي من ناحية السور وبقولها "اهلا ازيك "

وطبعا خليتها في نص هدومها قدام صاحبتها هههههههههههه هي كانت لسه بتشتم في العالم دي لقت اخوها منهم وقدام صاحبتها هههههههههههههههههه

ومن يومها الطالب المثالي كل شوية يطلع عينه في المدرسة دي مرة عشان وزيت بتوع الموسيقي في الاذاعة انهم يطلعونا من الطابور علي موسيقي شيك شاك شوك بدل الاغاني الوطنية
ومرة تانية عشان شوطت الكورة الوحيدة في حياتي في حصة الالعاب في وش مدرس الالعاب وكانت ضربة جزاء صاروخ ووشه ورم
ومرة عشان قاعد جنب صاحبي اللي عامل دكته عربية باكلويزر وعمال يعمل اصوات اكلويزر ببقه ويقول فوووووووووو

طيب انا مالي دي مدرسة مجانين ومرة كان عاطف جنبي بيجرب مطوته الجديدة !!

ومن يومها والطالب المثالي ساب السور والهاي اسكول ودخل الجامعة وخرج منها بس كنت في يوم طالب مثالي
مثالي قوووووووووووي هههههههههه

Wednesday, June 9, 2010

يا تكنولوجياتك يا بـلد



التكنولوجيا الحديثة ممكن تستخدم في كل حاجة في حياة الناس وكل مهنة او موقف ليه التكنولوجيا الخاصة بيه اللي ممكن تنطبق عليه بالظبط كل مهنة او موقف تحتيه التكنولوجيا او المصطلح اللي يليق عليه :



الحاكم

"نسبة الاستحواذ" المستخدمة في الماتشات
الرقاصة

"عداد الزوار" علي جسمها

الطالب في الامتحان

the page can't be displayed

الزوج في حياته الزوجية بعد ال 50
server is down due to maintenace

درج الموظف المرتشي

you can use your visa here

الاغاني اللي بيفتحها سواقين التاكسي

bad extension or corrupted file

القمم العربية

system is halted

الانتخابات المصرية

c:/fasad.exe

الافلام العربي

the process is duplicated

مصر تروح كاس العالم

error707 : not allowed

الحب بعد الجواز

this link is no longer exist

التوريث

? are you sure you want to move the folder "fasad"

الانترنت في مصر

" d s l...shortcut for "dead service link

الجامعات المصرية

use the shortcut .."l o l

تمثيل ادوارد

use the shortcut "W T F

الزمالك في عيون الاهلاوية

r o f l




Tuesday, June 8, 2010

جـريمة التـيولـيب






اعشق..
زهرة تيوليب تشرب من دمي ..
وتجافيها مضاجعها الا شراييني..
لا يخرج احساس مني الا بلهجات الزهر الاربع..
الحب والكبرياء والدفء والأمل..
ولا اسقط من علي حصاني الا علي احضان دافئة..

غيبياتي تظهر واحدة تلو الاخري منذ عشقت..
لا يوجد سر قادم ابدا ومفاجأة كبري..
من يعشق لا ينتظر مفاجأة اخري او سر اكبر..

وينابيع احاسيسي تتفجر اقمارا وشموسا..
كي تخلق الف شروق والف غروب ..
لاكون انا "العاشق المنتظر"..لهذه الدنيا
او "العاشق الدجال" ..لقلبي !

وقلبي يستمتع بالمشهد..
لا يوجد فوق المسرح غيري وهو المشاهد الوحيد..
وهو المعجب الوحيد..والمفتون الوحيد..
والمصدق الوحيد في موهبة نبضاتي..
اينما ذهبت اتي ورائي ليقول "ممكن تكتبلي في الاوتوجراف ده؟ "
لكني اقول له "في الخارج عالم اخر..لا تمرض بي..لكوني عالمك الوحيد"..!
او لكوني بيتك الوحيد..وحبك الوحيد..

وفي كل مساء اجلس علي مائدتي مع حواريين الحب..
بلا نهاية اخيرة...ولا عشاء اخير..
نتهامس في ما فاتنا الليلة وما سنراه غدا في لقاء معها..!

واحاول ان اتغير الي سنة من سنن الكون..
او شئ يراه الناس اعتياديا كما الهواء والشمس والقمر..
فأكون حينها حصلت علي صفة من صفات الحب..
او "افتراضية الحب والغرام" !

وازين كل ما يختلج داخلي بفساتين واساور..
كي تستقبل امرأة حين تسير..
تسقط من حولها بعض رماد روحي التي احترقت داخلها..
او بعض تفاصيلي التي هاجرت اليها وتنتظر قرار العودة بنظرة..!

واترك للتيوليب حق الاختيار
ان كان سيعصر احساسي حتي الموت
او كان سيمنحني شهقة اخيرة لانفاس الغرام..
انا قلبي ربيعيا جدا..ولذلك اجعل الزهور سيدة الموقف..!

اتوهج قنديلا في صحراء عينيها..
ابحث عن لغة الكنز المفقود..
بخارطة طريق الجمال..

واصارح جنوني باعتقاداتي..
ليكون لي حق الاختيار بين
جنون الاعتقادات
والاعتقاد في الجنون !

واعيش راهب في الحب..
علي زهرة وقطعة خبز..
وماء المطر وشهد عينيها..
بلا تيوليب يقتلني..
وان كنت اشعر به يلتف الان حولي ..
يحاول مرة اخري
في "جريمته المشروعة" ..في عرف الحب !

Sunday, June 6, 2010

شاااااات بالـــعربي الـــروسي






في احد المواقع لتعليم اللغات كنت بكلم اجانب اعلمهم عربي وهم بيعلموا الناس لغتهم برضه جالي واحد روسي عايز يتعلم بعض الكامات الدارجة في مصر قولتله بص انا

هاقولك بعض الكامات بس متقولهاش لحد لان دي صيغة كلام في الشارع لاصدقاء مقربين ماشي؟ قالي ماشي
واتفقنا ان انا هاكتبله بالعربي وهو ينطق اللي هاكتبه لانه بيعرف عربي مكسر وبيعرف يقرا شوية

هو: ابدأ
انا "بكتبله بالعربية الفصحي عشان لسه مش بيفهم عامي قوي بس بيعرف يقرا " : عندما يقول لك احد "ازيك ؟ " قوله "مزاجي عنب "
هو: مزاجي انب
انا: عنب
هو :عنب

المهم بعد تدريبات كتير وكتير من هذا النوع انتهي الحوار بيني وبين الروسي علي هذا الوضع وعرفته اللغة المصرية الشائعة في الشارع واللي هو كان مذهول منها اما

ترجمتهاله وخصوصا اما قولتله كلمة "عنب" انها فاكهة..وقالي ايه علاقة مزاجي بالفواكه ؟
وده الحوار اللي بينا بعد التدريب :

انا: ازيك ؟

هو: مزاجي عنب يا برنس الليالي

انا: ايه النظام؟

هو: لين عظام

انا: عايز تتعلم عربي ؟

هو : امال اركب الحنطور واتحنطر ؟

انا : انا هاعلمك عربي

هو : العبي يا العاب

انا: قشطة

هو : قشطة اتجوزت

انا: شغال

هو: وبيجيب عيال

انا: ما تخلينيش اديهوملك افرادا وازواجا

هو: هتديهوملي نيلي نيلي هديهوملك شريهان شريهان

انا: ده انت حبيبي

هو: مرهمني مرهم

انا: وانت بتعمل ايه دلوقتي ؟

هو : مفخد

انا: بتفخدوا برضه في روسيا ؟

هو: بنفخد يا حيزابون

انا: ده انت بتبهدلني قوي

هو: واشهيصك كمان

انا: وروسيا البيضا دي لسة بيضا ؟

هو: حموك في كنكة

انا: انت حافظ مش فاهم

هو: لا انا فاهم رسمي فهمي نظمي

انا: هاجيلك روسيا وانيمكم م المغرب يا روسيين

هو: عندها يلا

انا: مش روسيا دي بتاعة الحرب الباردة..ايه كنتوا بتحاربوا بالايس كريم ولا ايه ؟

هو: لا بالكريم كراميل يا خرونج

انا: انا مش خرونج انا كينج كونج

هو: بقولك ايه طير انت بقي

انا: ماشي يا حبيب بابا

هو: بابا اوبح

وده كان كورس مهم جدا في تعليم اللغة العربية قعدت معاه بتاع اربع ساعات قبل الحوار ده عشان افهمه الالفاظ دي وطبعا هو مش فاهمها هو حافظها بس
وانا فهمته انه اوعي يستخدمها لو نزل مصر لانها عدوانية مش ترحيبية بس كان كورس مسلي جدا خصوصا وان انا كنت بكتب وهو بيتكلم بالصوت
فكانت طريقة نطقه مسخررررررررة في الالفاظ دي وبعدين علمته شوية عربي بجد مش عربي بتاع الحنطور واتحنطر ههههههههه

Friday, June 4, 2010

احــترس مـن الدش السـخن







احساس صعب قوي ساعات بنحسه في مواقف هايفة كتير مش مؤثرة يعني لكن بتخلي وشك احمر ومتضايق منها وخصوصا انها بتحصل كتير :



*ان تبقي مصر بتلعب والماتش ممل واول ما تدخل الحمام انت وتعيش مع نفسك تخرج تلاقي الماتش بقي 3/1 وانت سامع صيحات الجيران كل شوية ومش قادر تقوم

*انك تاخد كرباج مية ساقعة طحن في عز الشتا وانت فاتح السخان وبتستحمي بمية سخنة بس الانبوبة فضيت فجأة

*انك تنزل يوم الاتنين لحلاق في اخر الدنيا وتضرب المشوار ده كله ويطلع يوم الاتنين اجازة

*انك تبقي نازل مقابلة مهمة جدا ومتشيك ع الاخر وتقع عليك مية من الدور السابع اصل الجيران بيمسحوا البلكونة

*انك تلعب لعبة ع الكمبيوتر وتطبقلها 24 ساعة واول ما تيجي تخزن اللي وصلتله النور يقطع

*انك تكون متابع فيلم حربي قعد بقاله تلات ساعات وفي مشهد النهاية برضه النور يقطع

*انك يوم ما تجيلك واحدة في الحلم تطلع عائشة الكيلاني

* انك تشرب كوباية عصير قصب واول ما تسلم الراجل الكوباية تلاقي في اخرها عنكبوت

*انك تجري ع البنك في اخر دقيقة عشان موضوع مهم والراجل يقولك لأ صورلي البطاقة الاول

* ان موظفة شئون الطلبة تحرجك اما تقولها "هو دي شئون الطلبة؟" تقولك "لأ بنحجز شاليهات في مارينا حضرتك "

* تقعد في اوتوبيس كله ناس زي الفل ويبقي الكرسي اللي فاضي جنبك يقعد راجل ريحته وهمية

*انك تمشي علي سؤال الناس في الطريق وبعد ما قربت توصل واحد يقولك "يااااااه وانت ايه اللي جابك هنا طالما عايز تروح الدقي ؟ "

* انك تبعت رسالة موبايل لواحد صاحبك بتقول "يلا بقي الشقة فاضية دلوقتي" عشان تلعبوا بلاي استيشن .. وتوصل الرسالة بالغلط لواحدة بنت

* انك تشوف فيلم محترم واول ما ييجي المشهد الوحيد اللي في الفيلم مش كويس يكون جنبك ابوك

* انك كل ما تحلق شعرك واحد يقولك "مين اللي عمل فيك كده ؟ "

* انك تقعد وسط اربع اطفال بيتخانقوا علي لعبة

* انك تفتح قناة اقرأ تلاقي حمادة هلال "حدث بالفعل وكان بيغني محمد نبينا "

* انك تكون قاعد في بيتك بالملابس الداخلية وبعدين تكتشف ان الشباك اصلا مفتوح والجيران كلها شايفاك

* انك تيجي تفتح لتر بيبسي يضرب في وشك بالكامل

*انك تيجي تفتح قميصك اللي بكباسين بشده بسرعة..وانت لابس قميص بزراير ..فكلهم يتقطعوا

* انك تدخل علي الفيس بوك تلاقي ناس عاملين لك تاج في صورة هبلة وتلاقي 140 كومنت

* ان شارع كله نضيف وتركن في الحتة الوحيدة اللي فيها طين وتنزل بجزمتك فيه

* ان العربية بتاعتك تعطل علي كوبري وتبقي مصر كلها منتظرة حل الموقف

* انك تشرب عصير بتجربه لاول مرة في مكان شيك ويطلع طعم "المجاري"

* انك تدخل علي محل تسأله علي سعر تي شيرت بكل ثقة يقولك بالفين جنيه


Tuesday, June 1, 2010

أحــلامي في ديـول الفـرس







احلامي في ديول الفرس
سبق الجميع علي جنته
وسابلي سيف ويا الحرس
انا حلمي رسمة منتهي
وساعات دموع شئ انتهي
وطريق مسافر ضي نور
وبيوت علي رمل البحور
تهدمها حدوات الفرس !
انا حلمي طيف او عود بخور
وقصيدة عذبة في ارض بور
وشموع علي همسة كمان
او بسمة من خد الامان
انا عايز اصيح
انا عايز اقول
وانده بصوتي علي الفرس
واهمس لعشقي في جنتي
اوسيف عذابي اللي اتغرس
واقول لعشقي ودنيتي
مش بس انتي هتحبلي
مادموعي برضوا بيحبلوا
وجنين عيوني محبتك
لو اولدك
لو اولدك
واكون لك الليل والنهار
او حبل سري ما بينا دار
مربوط علي ديل الفرس
وتبقي اختك نبضتي
والام شجني ووحدتي
واهو برضه يطلع جنته
ويسيبني حلم في سكته
اعملك ايه يا ابن الفرس ؟
بيطوف جنونك غنوتي
ومسيرها تولد دمعتي
وحقي يرجع من جديد
احلامي من ديل الفرس
اللي بيهدم جنتي
احلامه ينسف دنيتي
ويدق لنهايتي الجرس
ومسيرها تولد دمعتي
واكسر عيونك يا فرس !