Saturday, July 28, 2012

رمضانيات كمان وكمان








** من أقوي البرامج السنة دي برنامج معز مسعود "رحلة اليقين" بيتكلم عن بعض الافكار الالحادية لبعض الكتاب الغربيين في اولي حلقاته وكيفية مواجهة الافكار دي بالعقل مش بمنطق "إسكت متسألش هو كده وخلاص" او بالمبدأ القديم قوي "من تمنطق تزندق" بدون اعمال عقل للوصول الي اليقين الكامل.. البرنامج فكرته جديدة وذكية جدا عن اليقين والرد علي الافكار الالحادية وكمان عن الكتاب اللي اتحولوا من الحادهم الي الايمان بعد كده واتحولت افكارهم تماما ..ياريت فعلا نبدأ نهتم بالعقيدة قبل ما نهتم بالاسئلة من نوعية "هو اللي يركب التاكسي لو مش مسلم اوصله ولا لأ" وفتاوي الفضائيات اللي غربت الناس عن الدين الاسلامي السمح العظيم ..
معز مسعود وغيره من الدعاة الشباب هم الأمل لتوصيل تعاليم الاسلام الحقيقي الي جيل كامل من الشباب متعطش لمعرفة المزيد عن دينه .



** لاني بحب المسلسلات المأخوذة عن قصص واقعية بتابع مسلسل الاخوة أعداء المأخوذ عن  رواية "لإخوة كارامازوف"  للكاتب الروسي العملاق فيودور دوستويفسكي وفيه مجموعة مختارة بعناية فائقة لتجسيد الادوار خصوصا فتحي عبد الوهاب ..بيفكرني ولو من بعيد ب "جاك نيكلسون" ولعبه لادوار الشخص السيكو في عدة افلام زي
the shining
فعلا بحس في فتحي عبد الوهاب  من كتر ما بيلعب ادوار شخصية مضطربة نفسيا ان المخرج بييجي في اخر كل عمل يلفوا في ملاية بيضا وياخده علي السراية الصفرا.ممثل بدرجة "مريض جدا" !
وكمان الخواجة عبد القادر طلعت قصة حقيقية زي ما قال مؤلف العمل انها قصة  حقيقية لمهندس ألماني كان بيشتغل في سوهاج واعتنق الاسلام .


** شركات المحمول اللي عمالة تعمل في عروض واعلانات بالجملة ياريت بس تبص شوية للشبكة الاول اللي بتقطع وماحدش بيسمع حاجة في المكالمة والتغطية سيئة جدا ..يعني عايز اقولهم زي اعلانهم كده هو فعلا الديكور وقع بس علي المشتركين كلهم !
ولا الاعلان التاني اللي يقولك هتسيب شبكتنا ليه يا افندم..يعني بذمة ابوكوا مش عارفين ليه ده حتي زي ما بيقولوا الاحساس نعمة يا بشر!!



** مشهد السبحة بتاع مصطفي شعبان في اعلان المسلسل بتاعه وهو بيسبح ويقول اسماء ستات مشهد مستفز جدا وكان المفروض يتحذف من الاعلان حتي لو هم مش قاصدين بس علي الاقل يلاحظوا ان المشهد هيثير حفيظة ملايين البشر ..عموما مصطفي شعبان حط نفسه في قالب صعب يخرج منه هو كمان زي محمد سعد كده ما حبس نفسه في دور اللمبي وبوحة والحاجات دي مصطفي شعبان بقي حصر وحبس نفسه في ادوار مختار باشا والراجل حلم الستات كلها والحوار الفكسان ده مش عارف ليه الممثلين بتوعنا بيحبوا  الادوار المكررة او يمكن بيستسهلوا زي بعض المنتجين اما يحب يعمل مسلسل سهل يقولك اعمل مسلسل وجوز البطل اربعة وريح نفسك !



** فرقة ناجي عطا الله مسلسل فيه دروس كتير مستفادة منها علي سبيل المثال  :
:
اللي مزنوق في قرشين يكون فرقة ويطلع يسرق بنك في اسرائيل والعملية سهلة يعني !
وان اي عملية في اسرائيل استشهادية وخلاص حتي لو سرقة بنك علي حسب كلام المسلسل يعني .
وان الراجل الحرمجي او الدور اللي قايم بيه ابن عادل امام  بيكون ليه ادوار مهمة قوي في عملية اقتحام البنك.
مسلسل كله عبر يعني بس محدش يقولي ده فيلم هندي ما هو توم كروز برضه كان رايح يقتحم الكرملين واحب اقول للاتنين "عندها" !



**أدوار كتير السنة دي للممثلين عملوا موضوع "التأتأة في الكلام" زي احمد رزق في مسلسل "الأخوة أعداء" وابن غادة عبد الرازق في مسلسل "مع سبق الاصرار" وكمان في مسلسل "رقم مجهول"
مش عارف دي مقصودة يعني ولا ده يا حبة عيني من كتر المسلسلات السنة دي الممثلين بتهنج !



** بحب قوي الكلمات في مقدمة المسلسل كل سنة تلاقي شوية كلمات مسخرة السنة اللي فاتت مثلا فيها كلمات في مسلسل شارع عبد العزيز رغم حلاوة الاغنية وكلماتها الا ان كان فيها جملة  بتقول
"كفك يا دنيا علم ع الجتة وع القفا
 أشوف حالك أبلم وأتشحتف شحتفة
 ليه تمشي معايا سلبا وتحلبيني حلبا
 إمتي أدوقك يا ملبن ع الفزدق اتبرم "

السنة دي في مقدمة مسلسل "باب الخلق" بتقول الكلمات  "اعمل عبيط خليك حويط" وأظن الجملة دي بالذات مناسبة لبعض الاحزاب السياسية وجملة هامة قوي في السياسة المصرية !


** الرئيس محمد مرسي ليه برنامج في الراديو بيكلم فيه المواطنين ويرد علي اسئلتهم اسمه "الشعب يسأل والرئيس يجيب"..كويس ان الزمن جري بينا وشوفنا الرئيس بيكلم شعبه كل يوم والظاهر ان في مصر في ارتباط بين السياسة والمواهب يعني المخلوع كان بيمثل كومبارس في فيلم قبل كده واحمد عز كان طبال وفاروق حسني بيرسم يعني الظاهر وحمدين صباحي مثل في فيلم "الاخر" الظاهر ان كل اللي بيلعب سياسة في مصر بعد كده يكون خريج ستار اكاديمي !


** دنيا سمير غانم في اعلان بيبسي بتقول "رمضان كريم قوي قوي علطول" ودي بتفكرني بجملة حمادة هلال الشهيرة "شهداء خمسة وعشرين يناير ماتوا في احداث يناير" او جملة شفيق "ساجعل عاصمة مصر هي القاهرة" اضافة جيدة يا ست دنيا نورتي المحكمة .



**رغم ان اعلانات التبرعات تقطع القلب فعلا الا ان بعض الناس شايفة وانا منهم ان اعلان زويل هو اللي يقطع القلب اكتر ..يعني رغم ان دي حالات انسانية ولازم تتعالج الا ان اعلان العالم المصري زويل جاي علي الوتر فعلا للشعب المصري كله وانه لازم يتحرك خصوصا اما بيقول الجملة بتاعة البحث العلمي في اسرائيل فعلا حاجة تفقع تخلي الشعب كله عايز يدعي دعوة موحدة زي ساعة الفطار علي المخلوع اللي ضيع مصر وقيمة العلم والعلماء فيها بسبب الفساد والاهمال والتسيب وكل الصفات الوسخة اللي كانت في حاشيته ..لكن لسه الامل موجود وياريت الكل يتبرع لمدينة زويل العلمية ونرجع لمصر هيبتها ومجدها .

Monday, July 23, 2012

رمضانيــــــات







** السنة دي تحس ان أسماء المسلسلات جاية بالمقاس ومناسبة لكل فئة واتجاه :

مسلسلات المجلس العسكري : خطوط حمراء - سيدنا السيد - لسه بدري
مسلسلات الفلول : طرف ثالث-ابن النظام
مسلسلات الاخوان : الصفعة-ويأتي النهار
مسلسلات البلطجية : البلطجي-الهروب-الخفافيش- بفعل فاعل-مع سبق الإصرار !



** منتجات بريل زودتها لدرجة انها ممكن تهرب منها الجنس الناعم تماما باعتبار ان ازازة بريل الواحدة مليانة هرمونات ذكورة !! وصلت لدرجة الرجل المستذئب !
وياريت تبقي كلمة "استرجل" موجهة لكل اللي كل ما يحصل حاجة يقولوا "البلد بتولع" .



** إعلان أيس كريم "ماكسي بون" هو واعلان سمير غانم بتاع فودافون هم افضل اعلانات لحد دلوقتي في رمضان ومعاهم اعلانات يونيفرسال اللي كل سنة بتعتمد علي الالحان الجامدة سواء لحن مصري او مقتبس لكن افكار اعلاناتها وشكل الاعلان نفسه انيق وليه ستايل خاص .


** اظن واضح ان الاجازات اللي خدتها برامج التوك شو خلت المذيعين مرطرطين في الاعلانات والبرامج والمسلسلات ..عمرو اديب بيظهر في مسلسل باب الخلق ومعتز الدمرداش راح يعمل اعلان وشريف مذيع الحياة اليوم في مسلسل فرقة ناجي عطا الله والباقي بيطلع ضيف في برامج منوعات ..هم مذيعين التوك شو ظهورهم فرض يعني اما تاخدوا اجازة يبقي ريحونا منكوا شوية وخلوها فعلا اجازة مش طول السنة يعني .


** اعلان دنيا سمير غانم مستهلك ومكرر بشكل كبير ..تحس ان هي نفس اعلاناتها بتاعة السنة اللي فاتت بس المرة دي لبست بدلة رقص كاملة يعني عشان بيبسي ..يعني ماشية بنظام "ابجني تجدني" او "أبجني أرقصلك بلدي" .الاعلان مافيهوش فكرة ولا روح ولا كلمات ولا اي حاجة بصراحة هو اعلان غير قابل للاستهلاك الادمي !لا والغريبة ترقص وفي اخر الاعلان تلم تبرعات..عجبت لك يا زمن ده الاعمال الخيرية بقي ليها شكل تاني خالص.



** الناس الجعانة قوي تقول ما تفتحلنا اي قناة من اللي هي "بلاس تو" اصلها بتعيد كل حاجة بعدها بساعتين يمكن تعيد ادان المغرب ونديها أكل من جديد !!


** يعني بعد متابعة كام حلقة الاوائل من المسلسلات اظن في راي الشخص ان المسلسلات اللي فعلا تشد وتجذب للمتابعة هي : سيدنا السيد- باب الخلق-فرقة ناجي عطا الله- عمر-نابليون والمحروسة- مع سبق الإصرار- الأخوة أعداء-الخواجة عبد القادر.


** برنامج "سمر والرجال" هو مش برنامج جرئ ولكنه مبتذل وتشعر ان الأسئلة كلها منصبة علي جانب واحد ومش ناقص الا ان يكون في فقرة ستربتيز في البرنامج والمذيعة تسأل الضيف بعدها "كان ايه احساسك كرجل بعد الفقرة دي" !


**كل ما برامج المقالب بتشد اكتر زي برنامج رامز جلال الجديد يكون الاتهام الموجه للبرنامج انه "مسرحية" ! يعني كل ما تزود المقلب الناس تحس ان اكيد بيضحكوا علينا طيب الناس دي ربنا يكون في عونها لو عملوا مقالب خفيفة يقولوا برنامج اهبل ولو عملوا مقالب مفزعة يقولوا برنامج بيضحك علينا طيب يعملوا ايه بقي ؟..بعد رعب رامز جلال في الاسانسير دلوقتي بيعملهم ارهاب علي الطريق عشان يثبت ان "زكية زكريا" كان اخرها "تنفخ البلالين عشان عيد الميلاد " او انها برنامج اطفال  !!



** في رمضان توفيق عكاشة مختفي كده او مش ملعلع يعني زي الأول بسبب كم المسلسلات في كل القنوات ..يمكن يكون في خيمة رمضانية بتقدم "بط وجرجير" ع السحور !



**أفضل مقدمة لمسلسل هو مسلسل "مع سبق الاصرار" بطولة غادة عبد الرازق ..وأخيرا بقت المقدمة هي اللي قوية بدل ما اتعودنا علي ان دايما اعمال غادة عبد الرازق تبقي مركزة علي "المؤخرة" في اعمالها الهلس السابقة زي "زهرة وازواجها الخمسة" !


**أفضل أغنية في مقدمة لمسلسل بالتأكيد لمسلسل " نابليون والمحروسة"  الأغنية العظيمة "مصر يا امة يا بهية" الشهيرة لأحمد فؤاد نجم والشيخ إمام..يعني رغم المنافسة الا ان في اغاني مينفعش تخش المنافسة امام أغاني كتبت تاريخ .


**واحد مدمن مسلسلات تقوله نابليون دخل مصر امتي؟ يقولك في الحلقة التالتة !!.. وواحد تاني يقول هو ازاي عادل امام بيشكوا فيه في مسلسل فرقة ناجي عطا الله يقول اصله كان جمعة الشوان قبل كده !



** المسلسل الواحد ممكن تشوفه في ساعة ونص بسبب كمية الاعلانات الغير طبيعية والمستفزة جدا مع ان حلقة اي مسلسل علي اليوتيوب بدون اعلانات بتكون في حدود 33 دقيقة يعني تلت الوقت علي التليفزيون ..المشكلة ان الاعلانات الكتير بتخلي الواحد يزهق من المسلسل نفسه او يقوم ويسيبه يعني هم بيعودوا بالسلب علي المسلسل والقناة كمان لان اي مشاهد بيروح يدور علي اقل قناة بتجيب اعلانات ويتفرج عليها ..يعني بدل رطرطة القنوات دي كلها ابقوا اعملوا قناة للاعلانات بالمرة طالما عندكوا كمية الاعلانات دي كلها ..المفروض يبقي شعار القنوات "اعلانات حصري علي التليفزيون المصري".



** من البرامج المفضلة لناس كتير هو برنامج "خواطر" للشقيري مازال متألق كالعادة ويقدم مواضيع جديدة ومتميزة دائما وارجو ان يستمر دائما هذا البرنامج الرائد والملئ بالأمل والمعلومات القيمة في مجالات متعددة لانه اصبح من البرامج القليلة التي لها نكهة مميزة جدا .


** برامج الطبخ شغالة طول اليوم في نهار رمضان ياريت يخلوها بعد الفطار احسن لان الناس بتقعد قدام البرنامج وتقعد تقول "اللهم اني صائم" ويبقي هياكل الريموت وهو قاعد من منظر السفرة في التليفزيون اللي غالبا بتكون مش نفس المنظر من ايد مراته اللي بتتعلم فيه الطبخ !


** فيه برنامج اسمه "مراتي في ورطة" البرنامج ده رادار لردود افعال الست المصرية وغيرتها علي جوزها.. لكن أظناسم البرنامج  ده يناسب جدا حالة اغلب الزوجات داخل المطبخ المصري قبل الفطار .

Thursday, July 19, 2012

مسلسلات رمضان بين الدراما والهجص




الدراما في رمضان اكيد ليها طعم تاني ..طبعا ده حسب المكتوب علي كل قناة يعني زي ما بيقولوا كده ان كل المسلسلات حصري عندهم برضه مع انها مرطرطة اكتر م الهم ع القلب !

الزحام الغريب في مسلسلات رمضان زي كل سنة هو اللي بيخلي معظم الاعمال تسقط بالضربة القاضية لان اما يكون عندك 70 مسلسل حسب ما نشرت جريدة المصري اليوم يبقي لو بقاعدة رياضية حلمنتيشي بسيطة نضرب عدد المسلسلات في "ط نق 2"محيط دائرة مؤخرة المشاهد يطلع ما يمكن تحصيله من المسلسلات للمشاهد في اليوم !!!

مصري ولا تركي ولا سوري هذا هو السؤال ! تضرب مسلسل مصري ولا سوري ولا تركي بعد الفطار ..يعني بيتهيألي الدراما التركية مش وقتها في رمضان لانها طول السنة مخلية الستات بيزيد وزنها اللهم صلي ع النبي من كتر المتابعة علي راي عادل امام "بعيد عنك يا اخويا وررررررمت تاني يوم وررررررمت" .
الغريبة ان السنة اللي فيها التيار الاسلامي هو اللي حاكم وكانت الاشاعات العبيطة تقول دول هيعملوا رقابة صارمة وهيمنعوا المسلسلات اصلا نلاقي مسلسل كيد النسا 2 وكاريوكا وهز يا وز ع الشاشة الصغيرة ولا صغيرة ايه بقي دي الشاشة العملاقة التخينة عشان تكفي السبعين مسلسل يعني بعد ما يعدي اول يوم تزعق زي شوبير من كتر المسلسلات والقنوات وتقول "لييييييه؟ ايه المبرررررر؟" .

يعني في المسلسلات الاجنبي بنلاقي كذا سيزون للمسلسل ويقعدوا يشوقوا الجمهور لانتظار الموسم القادم والموسم مش بيبقي بكمية الحلقات المهولة اللي عندنا احنا او العدد الغير منطقي في الحلقات التركي لكن ساعات الموسم بيكون 15 حلقة او عشرين وساعات اقل في بعض المسلسلات حتي الواحد يهضم المسلسل مش هري وخلاص زي بعض المسلسلات عندنا .

طيب عايزين نعرف ايه افضل المسلسلات زي ما بيعملوا برة وبيدوا جوائز كل سنة للدراما او الانتاج التليفزيوني بشكل عام في جوائز "ايمي" مثلا ..ليه عندنا مافيش حاجة زي كده المشاهد يعرف منها ايه افضل الاعمال وتكون جايزة ثابتة كل سنة مش جوائز مجلات او جوائز قنوات زي كل سنة وتلاقي كل قناة بتقول حاجة شكل وان افضل مسلسل حاجة تانية خالص غير القناة اللي جنبها !

في وسط الهري الدرامي الكبير ده ازاي الناس تختار بين 70 مسلسل وفي نفس الوقت يكون عندها وقت تاكل او تصلي او تعمل اي حاجة ؟ في انواع من الناس في رمضان :

1- مدمن المسلسلات : ده تلاقيه بيجري يفتح مسلسل ع اليوتيوب ويسيبه يحمل في الوقت اللي هو بيشوف مسلسل اصلا ع التليفزيون ويفضل يجري ما بين التليفزيون والكمبيوتر لحد ما يخرج من رمضان وهو عامل زي توفيق عكاشة !

2- الرمضاني: الراجل بقي اللي بيعيش رمضان صح يعني بياكل عادي وبيلاقي وقت يصلي او يقعد في خيمة رمضانية وعنده كل الوقت يعمل كل حاجة ومش مهتم بالمسلسلات اصلا لكن ممكن يشوفله مسلسلين كده مش مشكلة يعني انما موصلش للادمان الدرامي.

3- خليهم يتسلوا : ده بقي المواطن اللي بيشوف رمضان زي اي شهر اصلا وبيفضل يشوف برامج سياسية او توك شو وكأن مافيش حاجة اصلا او ان الشهر مالوش ميزة او شكل مختلف عن غيره من الشهور وساعات بيكون مستني الفطار عشان يضرب السيجارة التمام وده المهم عنده واهم من خمسين مسلسل .



احنا ممكن نقدم في موسوعة جينيس علي اكبر دولة عملت مسلسلات في وعرضتهم في شهر واحد !! مصر فعلا ممكن تفوز بالمركز الاول حتي لو كانت ربع المسلسلات في البطيخ بس العدد غير منطقي ابدا ولازم يكون المنتج اللي بيصرف علي مسلسل متأكد من نجاحه لإما هيتاكل تماما وسط الباقيين ولو ان الناس كلها متاكدة ان مافيش مسلسل بيخسر ده كفاية فلوس عرضه علي القنوات اللي بقت زي الرز وكل قناة بقت بتفتح قناة تانية ويقولك "بلاس تو" عشان تعرض بعد القناة بساعتين نفس الحاجات اللي جابتها ! اديني في الهايف يعني !!



كان مكتوب في الجريدة بعض تكلفة المسلسلات السنة دي ونشوف اكبر امسلسلات المصرية المتكلفة السنة دي ارقام فلكية زي :

1-فرقة ناجي عطا الله : 70 مليون
2- خطوط حمراء : 42 مليون
3-باب الخلق : 40 مليون
4- الخواجة عبد القادر : 40 مليون
5- زي الورد: 38 مليون
6- عرفة البحر : 35 مليون
7- نابليون والمحروسة : 35 مليون


دول من اكتر المسلسلات المتكلفة السنة دي في الدراما الرمضانية لكن المشاهد ازاي يحط الخريطة ويبدأ الهجوم علي المسلسلات في حالة انه بيحب المسلسلات اصلا ؟
في توقعي من خلال قراءة قصص بعض المسلسلات وشوفت التريلر بتاعها اقدر اقول ان ممكن يكون السنة دي اقوي المسلسلات هي :

1- نايليون والمحروسة
2- عمر
3-باب الخلق
4- الخواجة عبد القادر
5- فرتيجو
6- الأخت تريز
7-الإخوة الأعداء
8 زي الورد
9- الصفعة
10-عرفة البحر
11- الإمام الغزالي


المسلسلات كتير لدرجة ان محمد سعد واخد بطولة في مسلسل ..هو ظلم نفسه في ادوار اللمبي وبوحة والحاجات دي لدرجة ان الواحد مش متخيله في دور حقيقي او مسلسل درامي ..الممثل الكوميدي لازم ينوع زي حلمي ومكي وغيره من الممثلين في العالم مينفعش يحط نفسه في قالب واحد لكن اظن محمد سعد اتاخر قوي ولازم يبدأ في جرعة درامية قوية وادوار مهمة بقي يلحق بيها سمعته كفنان حقيقي مش مجرد "لمبي" .

المسلسلات من نوع "الزوجة الرابعة" و"كيد النسا" والقصص الحمضانة دي كترت قوي وبوخت قوي زيادة عن اللزوم خلاص كانت فكرة اتعملت وجبرت خلاص مش لازم يقعدوا يقرفونا بموضوع الاربع زوجات وتصوير الستات كانهم عبيد للرجال بافكار متخلفة ورجعية زي مسلسلاتهم دي ويقولك في عرض المسلسل "طبيعة الرجل الشرقي" اي رجل شرقي ده ؟؟ ده كان زمان المفروض اننا في زمن جديد يعني نسبة اللي بيعملوا التصرفات المتخلفة دي مش زي الاول حتي لو كانوا موجودين بالفعل لكن ياريت ميقولوش ويقولوا الشرقي لانها بتمثل اهانة للرجل الشرقي والست الشرقية كمان .


ياريت كمان منشوفش بقي راجل وست ستات في جزء جديد لانها برضه من المسلسلات اللي انتهت صلاحيتها خالص وبدات حلقاتها في اواخر مواسمها كانها نسخة كربونية من بعض يعني ياريت يرحمونا شوية من المسلسل ده بقي ولو سنة حتي اجازة.

من اللي بيجددوا في برامجهم باستمرار وافكار برامجه مختلفة ومطرقعة هو رامز جلال كل سنة بيجي بشكل جديد وبرنامج غريب ولذيذ حتي لو كانت برامجه متعجبش الكل لكن بصراحة هو فعلا مختلف عن الاشكال التقليدية للبرامج التانية .


بيكون في قنوات كتير قوي تقول احنا الاصل والكلام ده لكن انا شايف ان افضل قنوات بتكون في رمضان هي شبكة الحياة وقناة القاهرة والناس باقي القنوات مجرد عرض مسلسلات انما دول بيقدموا حاجات ومنوعات مختلقة عن الباقيين فعلا.
عندنا عدم تعود علي برامج المقالب في عالمنا العربي وكل سنة يطلع صحفي يقول ايه الانحطاط في المقالب ده مع ان برامج الدنيا كلها في المقالب اصعب وفيها حاجات اقوي من كده بمراحل وعادي بتيجي كل سنة يعني عندنا لو واحد خض واحد قوي في المقلب يقولوا بعض الصحفيين "ده انحطاط" مع ان في برامج مرعبة في المقالب لدرجة الموت زي
Scare Tactics
و
pranked
و
punk'd
وعشرات البرامج بالشكل ده ومحدش بيتكلم او بيعلق عليها لانها مجرد مقالب انما عندنا بنبالغ قوي ونشتم ونسب في اللي بيعمل المقلب كانه عمل جريمة وكانه مش برنامج كوميدي !


برامج التوك شو بقي المفروض تندثر تماما في رمضان لاننا شبعنا سياسة واتخنقنا فمش هيبقي في رمضان كمان يعني ..انما ممكن يفضل عكاشة اهو يسلي صيامنا برضه ولو ان بعض الناس هيقولوا هيخلينا نفطر عليه .


كل سنة والجميع بخير ورمضان كريم علي مصر كلها .

Saturday, July 14, 2012

ميلودراما عاصفة العشق







"عندما ولدت حبيبتي لم تحدث المعجزات في الكون ولم ينشق قمر..ولكن كانت الرجفة في كياني قبل أن أولد..الرجفة في الفكرة التي اوجدتني ..الفكرة التي خلقها الله وخضع لها العدم.. "

"أريد أن أفجر قلبي كبضعة ألعاب نارية ويبقي الكبرياء والأمل أطفال ترقص امام المشهد "




يوم لم تكن الشمس فيه الا علامة فارقة ما بين حقيقتي وعدمي..
يوم أشرقت فيه الشمس عنادا أو قل توضيحا للحقائق..
هل حاورت نفسك من قبل ؟ لا لا ..لاأقصد مجرد كلام مع نفسك بل أن تحاور كل شئ فيك علي حدة في غرفة مغلقة ..
أن تنفرد بعقلك في غرفة ونبضك في غرفة وقلبك في غرفة ومشاعرك في غرفة اخري وتحاول ان تقنعهم بمذهبك الجديد ..
مذهب العشق الذي سرت عليه واعتنقته قبل ان يكذبوك ويحاولوا ان يثنوك عن رأيك وعن يقينك..

فتحت أربعة غرف متجاورة ويفصل بينهم جدار زهري شفاف كأنه بطانة قلب عاشق ولكن لا يسري الصوت فيه ولا يسمع كل منهم ما يقوله الاخر حتي لا تؤثر أقوالهم علي أقواله ..
كانت حبيبتي كانها شاهدة علي النقاش بحضورها الرمزي المتجسد في أناملي المرتعشة وإرتعاد فرائصي وعذابي المقيم  ولكنها لم تحضر بنفسها بالفعل.

بدأت الحوار في الغرفة الأولي مع العقل ودخل مترددا معي الي هذه الغرفة وقال : هل تعرف ما تحاول ان تقنعني به ؟

قلت في حسم : نعم أعرف وانت لو فكرت جيدا ستري ما أقول هو الحق

قال : كل طرف في نقاش يري ما يقوله هو الحق ..والحق رمح ناري لا يحكم قبضته عليه الا من يمتلك مفرداته ..

قلت : والحب طائر جنة لا يسمع صوته الا من يشعره فقط..

قال محتدا : اه ..دعك من رومانسيتك الكلاسيكية وحاول ان تزن كلامك معي فأنا لست القلب..ان اردته فهو في الغرفة المجاورة فإذهب له الأن..

قلت : سأحاورك بالمنطق الذي تحبه ودعك من لغة العواطف..أليس أنت مصدر احزاني وقلقي وسعادتي

قال مترددا : ولي الفخر

قلت : كلما فكرت في أمر محزن أو شئ جيد حدث لي أفكر عن طريقك ثم أشعر..أنت الأب الروحي لشعوري وحزني وسعادتي

قال : ولهذا أمرتك ان تبتعد عن الحب

قلت : أسف جدا فأنا فكرت خارج إطارك..

قال في لهجة توبيخ : بدأنا الحديث الذي لا جدوي منه .

قلت وأنا أطمئنه : إسمعني فقط..حتي إني أحببت عن طريقك الا تعلم ان الحب ايضا تفاعل كيميائي ودورك فيه عظيم ؟

قال مراوغا : أنا أستطيع ان امنحك السعادة ولكني لن امنحك الحب الذي يشقيني..فهل عرفت الفرق بين السعادة والحب ؟

قلت في يقين : دعني أقول لك أن السعادة هي لحظة كاملة ولكن الحب هو كمال كل لحظة

قال في حيرة : فلسفة

قلت : ولماذا تكون أنت  من فلاسفة العالم القائمة أفكارهم علي التشاؤم ولماذا تكون متشائما مثل أشعار ابن الرومي إن كان التفاؤل سيزيد علاقتنا ترابطا وقوة.

قال : حسنا حتي لو اقتنعت بما تريده مني وهو الإستسلام للحب حاول أن تقنع الباقين فأنا لست وحدي كما تعلم أمامك مشوار طويل..سأفتح لك زهوري لاستقبال ندي الحب طالما هي سعادتك الأبدية .

قلت : لا أعرف كيف أشكرك الان سأكمل مشواري في غرفة النبض



خرجت الي غرفة مجاورة وهي غرفة جلس فيها النبض مرتعشا خائفا :

قلت له في البداية : لماذا اراك مهزوما وقد إقتنع العقل نفسه

قال : هذا ما يخيفني ويجعلني مرتعشا فقد عرفت ان العقل اقتنع والقلب مقتنع بدون ان تحدثه

قلت في فرحة طفل وأشرقت عيني: حقا ما تقول ؟؟ هل اقتنع القلب قبل ان احدثه ؟

قال : للأسف وهذا ما يخيفني ان العاصفة تقترب..العاصفة تقترب ولا أجد ماوي

قلت مبتسما : عاصفة تهب من ثغر حبيبتي المعسول لا اظنها ستذهب ريحنا وتفنينا بل هي كل احلامنا وأمانينا

قال شاردا : لا أشعر بالطمأنينة علي نفسي ..بدأت أتوتر وأهتز علي كرسي القلب الهزاز بشكل مفزع.

قلت : لا تخاف إنه الأثر..

قال في تعجب : أي أثر

قلت : أثر الفراشة..الحب يأتي وتبدأ بوادر أثر الفراشة لتتجلي أمامنا الرؤية كاملة لعجائب المشهد وقدرة الحب..

قال : أراك تتحدث مثل القلب تماما وكأنكما خلقتما للعشق..

قلت : خلقنا له وخلق لنا وما بين الحالتين خلقت لنا حالة كمال علي شكل إمرأة..

قال وهو يغالب تشنجه : حسنا سأحاول الهدوء واذهب الي الغرفة الاخري الأن وحاول ان تقنعه بعشقك المجنون..



خرجت من غرفته منتشيا سعيدا باقتناع القلب دون ان اذهب اليه حتي ولم يتبقي الا مشاعري..
فربما سيطر عليها عقلي سيطرة كلية ..ولكني اقنعته فلماذا تبقي المشاعر متأرجحة ..؟
أم هو تأرجح سعادة وليس تأرجح التوتر والحيرة ؟

دخلت الغرفة وقد غطاها الثلج في كافة الأركان وكأننا ذهبنا في رحلة الي قطب ثلجي تماما ..

قلت لها : هل يعجبك الحال هكذا ؟ هل إستسلمت لحالة التجمد ..ألن يعقب عشقي ذوبانا للجليد كما ذبت أنا في شمس نهار وجهها ؟

قالت : لا أصدق رسالتك ..لن أتبع عشقك الجديد ولا أهوي المغامرة لاني أخاف من المخاطرة

قلت: تخاف المخاطرة ؟ اذا كنت تريد الهروب من الخوف فلماذا اعيش فيه ؟ إنها الدوامة التي يعيش فيها البشر يتحدثون عن الخوف وهم لا يحاولون الخروج منه ..يتحدثون عن شبحه ولا يعرفون ان هروب الشبح في الأمل والحب..

قالت : الحب قبلة الخوف والرهبة والموت

قلت : الحب حالة رهبنة الخوف وتصوفه في نفس الوقت وما أجمل أن تشعر بتصوف خوفك في محراب قلبك فتهرب عزلتك في عزلته ووحدتك في وحدته..

قالت : إتركني الأن لن اقتنع الا بدليل ملموس ..ليطمئن قلبي

قلت : حسنا الأن قد حانت اللحظة ..هل سمعت قصة يوسف من قبل ؟

قال : نعم ولكن ما الغرض منها الان ؟ عن أي جزء فيها تتحدث ؟

قلت : ستعرف بعد قليل


خرجت من الغرفة وبدأت أصيح فيهم لكي يجتمعوا أمامي وحضروا جميعا ومعهم القلب
وقد أعددت لهم المفاجأة ..
تفاح من شجرة الحب وبعض السكاكين الحادة وقلت لهم انه وقت الاحتفال ..
ثم..
ثم..
خرجت عليهم حبيبتي..لم يروا في نور وجهها الا يوم قيامتهم ونشيجهم ..
لم يسمعوا من أصواتهم الا الأنين والحشرجة..
قطعوا أياديهم من نورها ومن تلك النظرة التي إستعبدت أزهار العالم وثراه..
كانوا من الدهشة بحيث لم يشعروا بالألم والدماء تسيل منهم عشقا وكمدا..
الأن تقتنعون بما فعلت ؟
الأن تعرفون من عشقت ؟
الأن لا تسألوني ما الدليل ولماذا عشقت ؟

خرجت من الغرفة هي ثم نظرت اليهم وحاولت إفاقتهم وبدأوا يرتجفون من مشهد الدماء السائلة فوق التفاح..
قالت لي المشاعر : الأن عرفت عن أي قصة تتحدث..يالك من ماكر..
قلت : وهذا قبس من نورها فقط فما بالكم لو جلستم معها لساعات وأيام مثلي ..!


خرجوا جميعا يحاولون التغلب علي خوفهم مما حدث وقالوا "كان الله في عون البشر"
لقد أصابنا الجنون من نظرة واحدة وفقدنا الاحساس بالألم فكيف نعيش عمرا عاشقين !

ثم ذهب كل منهم الي مكانه وبقي القلب يقول "لقد أمنت برسالتك من البداية..لقد أمنت بها من البداية"
قلت له "طوبي لمن أمن بالحب وحالة السلام التي يخلقها الحب"
قال "لكن جمالها لا يعدل ولا يرحم..وعينيها لا تبقي ولا تذر"
قلت "ان إجتمع الحب مع جمالها ستجد العدل في حسنها ولن يظلمك أبدا"
قال " انا لك خلقت لك..
قلت "وأنا وأنت خلقنا لنعشقها".

Tuesday, July 10, 2012

فلنتعلم من التاريخ جميعا







دائما ما نسمع مقولة "التاريخ يعيد نفسه" والتاريخ حافل بالدروس العبر التي من المفترض ان يستفيد منها دائما أهل الحكم وأهل السياسة ولكن كثير من حكامنا العرب للأسف لا يريدون التعلم من التاريخ ولكن فقط ان يظل يعيد نفسه وهم علي كرسي العرش بلا استفادة من دروسه ولا عبرة من مأسيه.

والتاريخ يعطينا العديد من الدروس للجميع علي حد سواء..ولابد ان نستفيد جيدا من دروس وعبر واحوال التاريخ وللثوار دروس وللفلول ايضا دروس وللحاكم نفسه دروس ومن هذه الدروس التي نستفيد منها جميعا :



1 - السعي الدائم للحرية :

 كان "نهرو" من الشخصيات العظيمة والبارزة علي الصعيد السياسي وكانت له عدة رسائل يتحدث فيها عن التاريخ متحدثا عن وثيقة  "الماجنا كارتا" وكما ذكر نهرو انه منذ عهود والامم تتجه للحد من قوة الملك او ان يصبح منفردا بكل شئ ففي عام 1215 أعلنت "الماجنا كارتا" او كما تسمي "الميثاق العظيم للحريات" لكي لا تكون حرية الملك مطلقة بسبب إستبداد الملك "جون الأول" وكانت تشمل أكثر من سبعين بندا للمملكة .

وكان "شارل الاول " في انجلترا يشتاط غضبا عندما قدم اليه البرلمان "طلب الحقوق" وهي وثيقة بارزة تقول للملك ان هناك امور كثيرة محرمة عليه فليس من حقه ان يفرض ضريبة او يسجن أحدا بغير فثار شارل غاضبا وامر بحل البرلمان

 ونتيجة هذا الطغيان من الملك حدثت بعد سنوات الحرب الاهلية الملك والنبلاء والجيش في جانب والبرلمان في جانب مؤيدا بالتجار والاغنياء واهالي لندن وظهر القائد "كرومويل" ونظم جيشا جديدا وانتصر كرومويل وسقط الملك في يد البرلمان ثم في عام 1679 قطعوا رأس الملك بعد محاكمته علي أفعاله وفساده.
وزادت قوة انجلترا في عهد اللورد كرومويل وتفوق اسطولها واصبحت سيدة .

وايضا كان برلمان فرنسا الثائر الغي اعفاء النبلاء من الضرائب والغي حتي الألقاب ليحصل الشعب علي حريته وحقوقه.





2- لا تصدق كل شئ دون تدقيق فالمكائد تدور :

فعلي سبيل المثال في 1774 قال جورج واشنطن "لا يوجد عاقل واحد في امريكا يريد الاستقلال" ثم اصبح اول رئيس جمهورية امريكية مستقلة !

وايضا ابن احد اخوة نابليون" لويس بونابرت" تظاهر بانه من انصار الحرية فالنتخبوه رئيسا للجمهورية الثانية الجديدة وكانت خدعة ليصل الي الحكم فقام بانقلاب وطغي وسمي نفسه نابليون الثالث وهكذا انتهت الجمهورية الثانية في فرنسا .


في كتاب "وبدأ العد التنازلي" قال مصطفي محمود ان "روتشلد" لما رأي الدائرة تدور علي نابليون اطلق الحمام الزاجل الي انجلترا بخبر كاذب ان انجلترا انهزمت مما ادي الي انكسار الجنيه الاسترليني وهبوطه ثم اسرع الي انجلترا ليشتري كل ما امكن من ملايين الاسترليني برخص التراب لينتظر الخبر الحقيقي وهو انتصار انجلترا ثم يعود ليبيع التراب بسعر الذهب .

وكمثال أخر هو مكر موسوليني عندما دخل موسوليني بني غازي لبس عمامة الاسلام وقال انه جاء لينصر دين محمد !!






3- إحذر من الإنقلاب علي الثورة فأحيانا الفلول تنتصر :

تيموشينكو في اوكرانيا هي احد أبرز رموز المعارضة في فترة الثورة البرتقالية وسرعان ما عاد خصمها الي الساحة مرة اخري وبدا في تلفيق قضية لها لتنال حكم سبع سنوات لتخلو له الساحة لممارسة سياساته ومازال الشعب يعتبرها بطلة الثورة ورمز لهم الي الان والحكم الذي صدر قد اثار مشاكل كبيرة في العلاقات بين اوكرانيا والعديد من الدول ووصفه البعض بالحكم الظالم .


وأيضا كمثال من كتاب نهرو ..بعد الثورة الفرنسية كانت قوي الثورة قد انهكت فانقلبت علي نفسها ثم جاءت الثورة المضادة فابتلعت الثورة الاولي وخرج نابليون ديكتاتورا جديدا .

ودائما ما تواجه الثورات محاولات لقمعها والعديد منه فشل علي مر التاريخ وفي كتاب الثورات الكبري يقول الكاتب  "الفائدة تبقي ضئيلة اذا لم تصاحب الثورة ثورة اجتماعية ايضا" وقال ان الثورة الانجليزية مثلا كانت ثورة اجتماعية ايضا لانها سمحت بمشاركة الطبقة الغنية للملك في سلطة الحكم.

عام 1848 كان في اوروبا هو عام الثورات ومعظمها فشل فمصلا فشلت واخمدت ثورة بولندا وثورة شمال ايطاليا ضد النمسا والثورة الهنغارية الكبري ضد النمسا وبعد سنتين من المقاومة اخمدت ايضا.
وكانت دول اوروبا تحاول كبت الثورة الفرنسية في بدايتها وكان دانتون قائد الثورة يقول "لقد تحدانا ملوك اوروبا فالقينا اليهم برأس واحد منهم".








4- ثمن الثورات :

كما ذكر الكاتب معتز بالله عبد الفتاح في مقالته الشهيرة "ثورتنا فى ميزان الثورات" عن بعض الاثمان التي يتكبدها الشعب احيانا من وراء مطلب الحرية الأسمي وقال من بعض هذه الاثمان :

الولايات المتحدة فى عام 1779 (أى بعد 3 سنوات من ثورتهم) عانت معدل تضخم بلغ 400 بالمائة.

 إن إندونيسيا وبوليفيا والسلفادور شهدت انهيارات اقتصادية حادة بعد ثوراتها مباشرة لدرجة أن السلفادور كانت على شفا إعلان إفلاسها.
وبالطبع تحدث عن "ثورة المقصلة" الثورة الفرنسية التي راح ضحيتها الالوف .






5- التحول الي ديكتاتور :

نعرف الكثير من الطغاة في العالم ولكن بعض القصص في التاريخ تشير الي تحول كامل في شخصية من يتحدث بإسم الحرية ثم ينقلب الي دموي سفاح ديكتاتور ومن هؤلاء هو "روبسبير" أثناء الثورة الفرنسية  كان من رموز الثورة وفجأة انقلب الي دموي بشكل غريب وظالم وقتل الالوف علي المقصلة لدرجة ان البعض اصبح غير قادر علي التنفس من رائحة الدم التي تفوح من حول المقصلة وكان من اشد المعارضين ثم بدأ يصفي خصومه بعد الثورة ويقتلهم علي المقصلة تدريجيا بشكل بشع

لدرجة ان "دانتون" من رموز الثورة الفرنسية قال عند موته  "الحاجة الوحيدة التي أنا نادم عليها أنني سوف أعدم بالمقصلة قبل الحيوان الذي يُدعى روبسبييرو"
لقد قتل روبسبير الجزار حتي صديقه السابق وشريكه في الثورة "دانتون" ولم يرحم احد ولكنه حصل علي جزاءه في لانهاية وتم اعدامه علي نفس المقصلة التي قتل عليها الالوف .





6- حرق التاريخ :

كل من يأتي علي مر العصور يحاول احراق من قبله منذ ايام الفراعنة وكل حاكم يأتي يحرق أثر من قبله دائما ويزيل صورته من علي المسلات ويحرق له كل أثر في الحياة ..ومن ما ذكره الكاتب "محمود السعدني" في كتابه "مصر من تاني" بعض الامثلة علي هذه حيث قال "عندما قتل محمد بك ابو الدهب سيده علي بك الكبير الغي كل القوانين التي سنها سلفه ورد الاموال والاملاك المصادرة الي أصحابها وعفا عن كل المنفيين خارج مصر وسب سيده واتهمه بكل رذيلة مع ان التاريخ الحقيقي يقول ان لو ان علي بك الكبير استمر في السلطة لتغير تاريخ مصر لانه هو اول من حاول بناء الدولة المصرية في العصر الحديث واتخذ اجراءات اجتماعية حاسمة .

ومن القصص التي ذكرها ايضا في نفس الكتاب "عندما مات الخليفة الاموي في دمشق ابلغ الحاجب ولي العهد الوليد بن عبد الملك بنبأ موت الخليفة وكان يعيش منفيا في احدي القري الواقعة بين العراق والشام فأمر ولي العهد بان توضع كل متعلقات دار الخلافة في حرز حريز حتي يعود الي دمشق من منفاه ولكن الخليفة المتوفي استيقظ فجاة في المساء وتبين انه كان في إغماءة طويلة وبعد ان استيقظ طلب شربة ماء فجاءه الخادم بشربة ماء في كوز صفيح وكان للخليفة  طاسة من الذهب يشرب فيها الماء فطلب الطاسة الذهب ولكن الخادم اعتذر له لان الخليفة الجديد امر بتحريز الطاسة  فلما سمع الخليفة القيدم الخبر شهق شهقة طويلة وفارق الحياة قبل ان يشرب الماء !!





7- العدالة مطلب الشعوب :

التاريخ الاسلامي حافل بالأمثلة علي العدالة وتحقيقها وايضا كانت من شروط اختيار الامام ومنها قصص لعمر بن الخطاب حينما قال جملته الشهيرة "اضرب ابن الاكرمين" وسيدنا محمد عندما قال "لو سرقت فاطمة بنت محمد لقطعت يدها" والعديد من الامثلة

وهناك مثال بارز وهو السلطان "سليمان القانوني" عاشر سلاطين الدولة العثمانية وقصصه الشهيرة في تحقيق العدالة ولو علي اقرب الناس له حينما امر باعدام زوج اخته رغم العلاقة بينهم ولكن لانه كان فاسد الذمة المالية ! وهو ما لا يمكن حدوثه في عصرنا الحديث الا في دول تحترم قيمة العدالة وتحترم الحق وتراه سيفا علي رأس الكبير والصغير وهو ما لا يحدث في دولنا العربية من عهد بعيد منذ ان تملكها وحكمها الطغاة امثال مبارك وغيره ونأمل ان يعود عصر العدالة مرة اخري كعدالة عمر بن الخطاب وعمر بن عبد العزيز الذي كان من اروع الامثلة في العدل والحق في تاريخ الاسلام وكان كان يدوردائما ما يسأل الناس : هل من مريض فأعوده، هل من أرملة فأقوم عليها، هل من جائع فأطعمه؟


بالطبع لا نغفل ان الكثير من الدول الغربية ايضا تطبق العدالة ولو علي حكام الدولة والامثلة كثيرة مثل محاكمة شيراك او معاقبة احد الوزراء بسبب مبلغ مالي زهيد وغيره من الامثلة الشهيرة في العالم الغربي الذي يطبق القانون علي الجميع وكانه التزم بتعاليم الاسلام ولم تلتزم حكام العرب به للأسف رغم ان اقوي واغلب الدروس في تحقيق العدالة هي عربية اسلامية وكأنهم هم من تعلموا منا الحق والعدالة ورفضها الطغاة الحكام العرب .



فالتاريخ هو المنهل الذي لن نرتو منه ابدا من قصصه وعبره وحكاياته وحتي اساطيره وياليت الحكام يستفيدون من دروس واحوال التاريخ .

Friday, July 6, 2012

هوليود ولعبـة الحظ والقــدر






الحظ في سينما وعالم هوليود كان هو محور العديد من الأفلام أو لعبة القدر التي كانت جزء من الفيلم او حبكة الفيلم كاملا ومن هذه الافلام الفيلم الرومانسي الجميل
the lucky one
بطولة زاك ايفرون وتايلور شيلينج ويدور الفيلم عن دور الحظ في انقاذ حياة جندي في الحرب عن طريق التقاطه لصورة سقطت من احد الضحايا في المعركة وفي وقت التقاطه للصورة يلعب القدر لعبته ويظل البطل يحمل الجميل لهذه الصورة التي انقذته من الموت ويبدأ في البحث عن صاحبة الصورة والتي وقع في حبها بعد رحلة بحث طويلة عنها وهي لم تكن تعرف بالطبع موضوع الصورة حتي عرفت بعد ذلك وشعرت بخيبة أمل كبيرة خصوصا علي وفاة من أعطته الصورة وهو اخيها الذي كانت تتمني له التوفيق وان يعود سالما.

الفيلم رومانسي متميز ومن الأفلام المأخوذة عن كتاب للكاتب "نيكولاس سبارك" ونري كيف شعرت البطلة التي قامت بدور "بث" بخيبة الأمل والحزن الشديد عن علمها بان من تعشقه قد جاء فقط لرد الجميل لصورة وجدها ..وحزنها الأكبر علي أخيها وتألمها بشدة ونري كيف تربط العلاقة بين الطفل الصغير و زاك ايفرون مما زاد العلاقة اشتعالا بين العاشقين وكيف كان دور الجدة "الي" في توطيد العلاقة بينهم واعطائهم مساحات أكبر للتقارب .


من الجمل الشهيرة في الفيلم :

Finding something like that in a war is like finding an angel in Hell


وهو يوحي لك بمدي دور الحظ في انقاذ حياته ومدي إفتتانه بجمال صاحبة الصورة وحبه لها من النظرة الأولي .

ولكن حينما تشعر البطلة بخيبة الامل وانه تم استغلالها خصوصا ان زوجها السابق حاول بكل السبل ان يصور لها العاشق علي حقيقته وان يحاول ان يبلغها بانه يستغلها او ان هناك شئ خفي ولم تصدقه ولكن حينما اكتشف الامر بعد اعتراف زاك ايفرون شعرت بالحسرة التي رأيناها في العديد من الافلام حينما يعرف العاشق ان من يحبه يستغله لهدف ما حتي اننا راينا هذه الفكرة ليس في الافلام الرومانسية فقط بل في بعض الافلام الكوميدية مثل
wedding crashers
 عندما عرفت مدي استغلالها من جانب البطل الذي شعرت انه لا يحبها ولكنه فقط يستغلها كما يستغل اي من الجميلات في الافراح وايضا فيلم الاكشن الكوميدي
Knight and Day
عندما شعرت نيكول كيدمان بمدي استغلالها من توم كروز عندما سمعت المكالمة التي تدور عن عدم اهميتها وانه لا يهتم بها .

والمغزي ان هذه الفكرة ليست فقط في الافلام الدرامية ولكن ايضا في الكوميدية وغيرها وهي فكرة الشعور بالحسرة نتيجة الشعور بالاستغلال لاي هدف .

اما عن فكرة رد الجميل فهي مختلفة عن فكرة التعويض ..ففكرة التعويض او تعويض اشخاص عن ضرر الحقته بهم رأيناه في الفيلم الرائع
 Atonement
او الفيلم المتميز جدا
Another Earth
حينما حاولت البطلة بكافة الوسائل تعويض البطل عن ما الحقته به من ضرر عندما قتلت عائلته في حادث سيارة عن غير عمد دون ان يعلم انها هي المتسببة فأعطته الرحلة التي ربحتها للكوكب الذي يستطيع ان يقابل فيه عائلته مرة اخري ولو علي سبيل التخيل او حسب معتقد البطلة .

اما من الافلام الشهيرة التي كانت ايضا تدور عن الحظ سواء حظا عاثرا او حظا جيدا منها :

الفيلم الدرامي الرائع الملئ بالأبطال
match point
والذي يتحدث في تفاصيله عن دور الحظ في حياة البطل الذي كان مدربا للتنس ويعرف جيدا قيمة الحظ في حياته ودائما ما يتخيل شبكة التنس وكيف قد تقلب موازين اي مباراة حينما تلمسها الكرة علي اطرافها وكيف تستطيع ان تغير مجري مباراة كما يحدث في الحياة ايضا ان بعض الاحداث الصغيرة تستطيع ان تقلب حياتك رأسا علي عقب الحظ جعله غنيا والحظ جعله يتورط في القتل والحظ جعله ينجو من جريمة والحظ كان يلعب بحياته كاملة .


very bad things happened

فيلم كوميدي ساخر عن دور الحظ السئ في حياة مجموعة من الشباب ذهبوا لرحلة للإستجمام قبل الزواج او حفلة توديع العزوبية ولكن يتورطوا في عملية قتل بالصدفة يضطروا بعدها في ارتكاب العديد من الجرائم رغما عنهم لاخفاء الجريمة الاولي وتجبرهم الظروف علي ذلك بطريقة ساخرة لدرجة ان يقوم احدهم بقتل الاخر لكي لا يخاف ويفشي سرهم الفيلم ملئ بالحظ العاثر لأبطاله ومن الافلام الشيقة .


the bang bang club


الفيلم درامي رائع ويتحدث عن حياة المصورين والمخاطر التي يمرون بها في الحروب ولكن في احد مشاهده تجد الحظ جليا واضحا عندما التقط احد المصورين صورة عظيمة جعلته يحصل علي جائزة رفيعة في الصحافة بسببها رغم انه التقطها وهو في لحظة يأس وبكامل الحظ وجد طفلا صغيرا خلفه نسر عملاق والتقط الصورة الشهيرة ووضعها علي غلاف اشهر المجلات العالمية ليصبح احد اشهر المصورين رغم انه التقط الصورة بحظ واضح واعترف بذلك .


Envy
فيلم كوميدي عن حظ احد من يؤمنون بالافكار التي تبدو تافهة ولكنه يؤمن بها ويخترع سائل لازالة روث الكلاب وهو ما كان يسخر منه صديقه وفجاة يجد ان الاختراع حقيقة وبدأت شهرة صديقه في الازدياد حتي يصبح من اغني الاغنياء ويبدا الحقد في التسلل لصديقه من هذا الحظ رغم ان الاخر يكد في العمل بلا طائل .


the Rum diary

من فلام جوني ديب الجميلة والتي ايضا تجد في احد تفاصيلها دور الحظ جليا مع الصحفي الشاب المخمور دائما الذي يصل به الحظ والصدفة الي تفاصيل صحفية وعلاقات مع الاثرياء بشكل غريب ومثير .


bad ass

يوضح هذا الفيلم كيف يلعب احد الفيديوهات المصورة في حافلة لبطل الفيلم وهو يقوم بضرب مجموعة من المشاغبين دورا هاما في حياة البطل ويصبح بطل المدينة التي لا تقوم فيها الشرطة بدورها بشكل كامل بل ويصل بالشهرة لدرجة طباعة صورته علي الملابس في المدينة ويصبح بطلا من لاشئ نتيجة احد الفيديوهات بالصدفة في حافلة .


the grey


من اجمل افلام النجم ليام نيسون وان كان لا يتحدث فقط او تدور قصته عن الحظ ولكن فكرة الحظ هنا فقط كيف تسقط الطائرة في وكر للذئاب وموطن لها في حظ عاثر جدا لركاب الطائرة .


2:22

وضعوا الخطة لتنفيذ المهمة ولكن الحظ يقوم بدوره في كشف احد عناصر الخطة بالصدفة حينما ذهب احد اعضاء المهمة لشراء المخدارت فينكشف أمره ويتم الهجوم علي باقي الافراد عن طريق من تم كشفه بالصدفة البحتة .


serendipity

من أروع ما قد تراه من افلام للأبطال "جون كوزاك" و "كيت بيكينسل"  وهو لا يدور حول الحظ تحديدا ولكن عن "العلامات" وكيف تؤمن البطلة بالاشارات من القدر والعلامات التي تحدد حياتها حتي لو لقصة حب حياتها فتترك للقدر تحديد مصيرها بشكل كامل حينما تكتب رقم هاتفها علي كتاب وتقول للبطل ان لو وصله هذا الكتاب في يوم ما فتكون اشارة تجمعهما وفعلا يأتي اليه الكتاب بالحظ في يوم فرحه الذي كان مقرر له ويبدأ بسرعة في البحث عنها بعد ان حاول بأكثر من طريقة الوصول لحبيبته وفي النهاية يراها مرة أخري .فيلم رائع جدا





الحظ والقدر والصدفة ليسوا أشياءا متشابهة ولكننا نري احيانا وفي فيلم واحد اجتماعا للثلاثية وهذا من احد إبداعات هوليود المستمرة .


Monday, July 2, 2012

القراءة تصنع وجودا وحياة





سقراط: قيل له: كيف تحكم على إنسان؟ فأجاب: أسأله كم كتابًا يقرأ وماذا يقرأ؟


عملية القراءة طبعا من اهم اللي احنا بنقوم بيه في حياتنا وكتير الكتب اللي اتكلمت عن اهمية القراءة والعلاقة بين القراءة والثقافة وعن تشكيل الوعي عند اي انسان وازاي القراءة ممكن تغير طريقة تفكيرنا وارائنا كلها .


من الكتب اللي اتكلمت عن القراءة احد فصول كتاب انيس منصور "اقرأ اي شئ" وقال في الكتاب  :

"رأي الخاص ان اي شئ أو ورق يقع في يدك يجب ان تقرأه المهم ان تكون القراءة عادة وان تصاحبها لذة المعرفة ولا خوف علي هذا القارئ الذي يبحث عن الكلام اللذيذ عن الموضوعات الممتعة لان هدف القراءة هو ان تتحقق المتعة والبهجة لديك حتي لو قرات قصصا بوليسية او حكايات غرامية او رحلات علمية او رحلات تاريخية او فلكية نعم المهم ان يشغله الكتاب وان يشعل النار في خياله ويجدد احلامه ويفتح شهيته علي دنيا جديدة في اي اتجاه ادبي او علمي او جغرافي او فلكي"


وضرب بعض الامثلة عن اللي كانت الدول بتعمله لتشجيع الناس علي محو الامية زي :

علي ايام الامبراطورية الايرانية كانت الحكومة قد قررت الا يدخل الجامعة طالب الا اذا كان قد محي امية عشرة او عشرين والا يرتقي احد من درجة الي درجة في الحكومة الا اذا فعل كذلك

وفي اوروبا في اعقاب الحرب العالمية كانت بعض الدول الاوروبية تشترط لقبول الدولة ان يكونوا قد عملوا عدد من الساعات في بناء الكليات والمعامل .


وفي الكتاب القوي "لماذا نقرأ" وهو كتاب فيه مقالات لاهم المفكرين ومقالتهم عن عملية القراءة وبيشمل الكتاب مجموعة من النخبة زي طه حسين والعقاد وتوفيق الحكيم وغيرهم كثيرين ومن كلمات طه حسين علي القراءة في مقالته بيقول :

" زاد الشعب هو القراءة يقبل عليها ويشبع بها جوعه الي العلم والمعرفة والوان الحضارة . ان الحث علي القراءة هو خير ما يوجه الي الافراد والجماعات في جميع الامم والشعوب ".

"القراءة في اول الامر كانت مقصورة علي قلة ضئيلة من الناس في كل شعب من الشعوب المتحضرة وحتي كانت الديمقراطية التي اخذت تلغي الفروق والامتيازات وتقرب ما بين الطبقات واذا القراءة تصبح حقا شائعا لكل انسان بل واجبا محتوما علي كل انسان يريد ان يحيا حياة صالحة "


وعباس محمود العقاد قال عن القراءة :

"اهوي القراءة لان عندي حياة واحدة في هذه الدنيا وحياة واحدة لا تكفيني ولا تحرك كل ما في ضميري من بواعث الحركة والقراءة دون غيرها هي التي تعطيني اكثر من حياة واحدة في مدي عمر الانسان لانها تزيد هذه الحياة من ناحية العمق وان كانت لا تطيلها من ناحية الحساب"

اما حلمي مراد في احد فصول الكتاب بيتكلم عن بحث اسمه

how to find time to read

ويقول ان جملة "لكن عملي ومطالب حياتي لا تترك لي وقت لأقرأ" هي مجرد جملة و زعم وهمي فأي كانت مشاغلك تستطيع القراءة طبقا لهذا البحث :

ويضرب مثالا لطبييب شهير هو  سير "وليم اوسلر" فرغم مشاغله كان قد عهد علي نفسه ان يقرأ كل ليلة ولو ربع ساعة فقط المهم أن يقرأ وكان شرط قرائته ان تكون قرائته منعدمة الصلة بمهنته وفعلا حصل علي اطلاع واسع نادر المثال .




وقال الدكتور السعيد مصطفي السعيد في التفرقة بين العلم والثقافة :

اذا كان العلم مطلوبا في مجالاته المتخصصة فان الثقافة مطلوبة في الجملة وربما تكون الزم للجمهور في مجتمعنا المعاصر .

والثقافة العامة في مختلف النواحي هي التي تكون شخصية الفرد وتسمو بها وتميزه ما بين اقرانه وعلي قدر زيادة حصيلته من الثقافة يكون سموه بين اقرانه وفي بيئته ادبيا بل ماديا ايضا في كثير من الاحوال .


ويقول ايضا :

جاز ان يجمع الفرد الواحد بين العلم والثقافة بان يكون عالما متخصصا في مادة ومثقفا في الجملة بالاضافة الي ذلك ويوجد المتخصص في ناحية العلم ولكنه مقطوع الصلة بما خرج عن تخصصه من معارف فيضيق افقه وينحصر فيما تخصص ولا يقال انه مثقف .




أما من اهم الكتب العالمية الشهيرة اللي اتكلمت عن القراءة وكل تاصيلها واسرارها هو كتاب "كيف تقرأ كتابا" تأليف "مورتيمر أدلر" و" تشارلز فان دورن.

اتكلم الكتاب عن مستويات القراءة وانواع القراءة وسرعتها والذي يمكن ان تتعلمه من عنوان الكتاب واتقان فن التلخيص للكتب وكيف تقرا الكتب الأدبية والتطبيقية والمسرحيات والملاحم والقصص.

وبيتكلم ان لازم تقرأ بفاعلية يعني تفهم اللي بتقراه زي ما بيدعوهم الكسندر بوب "الحمقي جاهلو القراة" وهو وصف عنيف للي بيقروا كتير وخلاص من غير ما تستفيد حاجة من اللي بتقراه او تفهمه
وبيقول الكاتب ان اليونايين لديهم تسمية لهذا الخلط بين التعلم والحماقة التي تطبق علي هؤلاء المولعين بالمطالعة لكن يقرؤون بفعالية قليلة في كل العصور انهم "ضاحلو الثقافة"



 وبيقول ان في اربع مستويات للقراءة :

المستوي الاول:  " المستوي الإبتدائي" وده اقل مستوي اللي فيه الفرد يكون الشخص قد مر علي الاقل من المرحلة الامية الي مرحلة الالمام بقواعد القراءة والكتابة يعني بدايات فن القراءة

المستوي الثاني:  "القراءة التفحصية" ودي بتركز علي الوقت زي ما قال الكاتب
المستوي ده بيكون التركيز علي الوقت يعني تخرج اقص مضمون للكتاب خلال فترة محددة من الوقت وبيسموا المستوي ده "التصفح"

المستوي الثالث:   "القراءة التحليلية" ودي طبعا اكثر فعالية وبتكون في وقت غير محدد المهم تبقي قراءة فعالة وتستفيد من الكتاب فعلا

المستوي الرابع : " القراءة المرجعية "او القراءة الموجهة لموضوع واحد وده النوذج الاكثر تعقيدا لان القارئ بيطالع كتب عديدة في نفس الموضوع وبيربط بينهم كلهم


ومش لازم الواحد عشان سنه كبير انه بيقرا بشكل فعال لان بدا في امريكا المعلمين بيلاحظوا انه لم يعد من الممكن افتراض الطلاب المندرجين في الثانوية يستطيعون القراءة بشكل فعال وبداوا يقدموا الحلول للمشكلة دي وحتي طلبة الجامعة بيدوهم دورات في القراءة بفعالية .

وبيقول الكاتب ان اعطاء نظرة سريعة علي الكتاب بتساعد في فصل القشور وهضم المفيد منه ومن خلال النظرة السريعة ممكن تحدد اذا كان الكتاب مفيد ليك ولا لا

وبيدي بعض النصايح في القراءة التفحصية زي مثلا انك تبص لصفحة الغلاف والمقدمة وتشوف الفهرست عشان تعرف الكتاب وهيكله وبيتكلم عن ايه بالظبط  وتشوف القوائمة الهجائية لاسماء والموضوعات الموجودة في نهاية الكتاب وتقرا ورقة التجليد الختامية ساعات بيكون عليها ملخص للكتاب او فكرته

وبيقول انك تقرا الكتاب وانت مش خايف منه حتي لو فقرات مش فاهمها لانه هيساعدك لو قريته مرة تانية وبيقول ان اكيد فهمك لخمسين في المية من كتاب احسن من عدم فقرائتك ليه علي الاطلاق.

وعن سرعة القراءة بيتحدث الكاتب ان بعض الكتب لا تستحق حتي التصفح والبعض لازم يتقري بسرعة وبعض الكتب لازم تتقري بمعدل بطئ ليتاح فهمها وبيقول ان يعتبر تضييع وقت انك تقرا كتاب ببطئ وهو اصلا المفروض يتقري بسرعة عشان كده لازم اكتساب مهارات القراءة .

يعني الهدف مش ان القراءة بس تكون اسرع ولكن انك تكون قادر انك تقرا بسرعات مختلفة وتعرف امتي تستخدك كل سرعة.

ووضع اشارات في الكتاب هي عملية بتخليك مستيقظ وواعي للي بتقراه وكمان لان القراءة عملية تفكير وحوار بينك وبين الكاتب ومن الاشارات اللي بيحطها الناس خطوط تحت الجمل المهمة او علامات ونجوم واي طريقة تساعدك.


وبيقول انك لازم تخلي القراءة عندك عادة والتمرين عليها باستمرار حتي لو كان الموضوع صعب في البداية لكن لازم تقرا علطول وتخليها عادة وذكر المقولة اللي بتقول "العادة هي الطبيعة الثانية".


وان عملية تصنيف الكتاب من اهم الخطوات يعني تعرف نوع اللي بتقراه هل هو كتاب ادبي ولا علمي وده مش بيتحدد من العنوان فقط ولكن من خلال التصفح للكتاب كمان.

وفي فصل في الكتاب سماه الكاتب "تصوير الكتاب اشعاعيا" يعني كانك بتحط جملة واحدة تكون هي محور الكتاب او الكتاب بيتكلم علي ايه في المجمل في جملة واحدة وتوضح الاجزاء الرئيسية في الكتاب وازاي اتنظمت في الكتاب بمجمله من خلال معرفتك لعلاقة اجزاء الكتاب ببعضه وكمان تعرف حبكة الكتاب زي مثلا اما بتلخص قصة او بتحكيها لحد في جملة محددة هي ملخص القصة هي دي الحبكة.


وبيقول في نقد الكتاب انك لازم عشان تنقد الكتاب بشكل سليم لازم الاول تستكمل تفسير الكتاب ومتقولش انك تتفق او تختلف او تكون حكم الا اما فهم الكتاب كويس جدا ولا تختلف مع الكاتب بشكل منازع او مشاكس والقاعدة الاخيرة في النقد انك تفرق بين المعرفة والرأي الشخصي الصرف من خلال عرض اسباب جيدة لاي حكم نقدي تقوم بيه.


ومن المقوالات الشهيرة اللي اتقالت عن قراءة الكتب :



فرنسيس بيكون  "هناك كتب تستحق ان يذوقها القارئ وكتب تستحق ان يلتهمها وكتب تستحق ان تضمغ وتهضم "

شوقي " انا من بدل بالكتب الصحابا  لم اجد لي وافيا الا الكتابا "

الجاحظ "لا اعلم قرينا احسن موافاة ولا اعجل مكافاة ولا احضر معونة ولا اخف مؤونة ولا شجرة اطول عمرا ولا اطيب ثمرة من كتاب "