Monday, February 28, 2011

حفلة الأوسكار بمذاق هوليودي خاص






احساس ساحر جديد..السجادة الحمراء..خطوات زعماء هوليود تسير واثقة وخائفة ومندهشة في نفس الوقت
اوسكار جديد..ساعة حسم جديدة ..مشاعر مختلطة..قلق..تشجيع..استنكار..فرحة.خيبة أمل.

اهم حدث سينمائي في العام قد طل علينا ببسمته الرقيقة كالعادة ولم يخيب ظنوننا في الابهار المتوقع والملموس
من اول "الغرفة الخضراء" المذهلة التي اختاروا "روجر" توماس لتصميمها هذا العام وهو من صمم غرف في البيت الابيض نفسه
الي القاعة بسحرها الأخاذ ورهبتها وابتسامة الكلمات داخلها امام الميكروفون ولحظة الاعلان عن اسم الفائز..تلك اللحظة التي تتغير بعدها حياة النجم او المخرج او طاقم العمل..
لم توجد مفاجأت كثيرة هذا العام كالعام الماضي..الكثير كانوا يتوقعون ما حدث الا قليلا من التوقعات التي خيبت الظن ولكن هذا يحدث دائما..

لم تكن ليلة عادية من اول فستان "جينيفر هدسون" بلونه الرائع وتصميمه الأنيق الي التقاء طاقم المذيعين بفريق الاطفال الذي يغني لكبار المطربين اغاني مدرسية باسلوب مسلسل "جلي" ..لم يفت العرض هذا ايضا فهذا الفريق الملئ بالاطفال قد ملئ العالم بهجة وحقق اعدادا رهيبة علي اليوتيوب للمشاهدة.



الفيلم الأفضل
:

the king's speech

هل فاجئك هذا ؟ مستحيل..رغم ان الافلام التي ترشحت لهذه الجائزة كانت كلها تستحق الا فيلم "التواصل الاجتماعي" في رأي الشخصي لم يكن ينبغي ان يقارن او يوضع في هذه الخانة او القائمة "افضل فيلم" لان الافلام التي ترشحت معه تفرق عنه سنين ضوئية في كل شئ ولكن ليس في الايرادات طبعا
لم اتفاجأة بهذه الجائزة لهذا الفيلم الدرامي المبدع ولكن كنت اتوقع حدوث هذا ولو لم يحصل هذا الفيلم علي افضل فيلم فربما يحصل عليه
Black Swan
True Grit
Winter's Bone

ولكن المفاجاة فقط بالنسبة لي هو وجود فيلم "التواصل الاجتماعي" في هذه القائمة ولكن ربما فرض عليهم الفيس بوك نفسه هذا العام او الايرادات ايضا تتحدث !

فيلم
king's speech
هو بطل هذه الليلة طبعا حصد علي اهم اربعة جوائز وترك جوائز المؤثرات البصرية والسمعية وغيرها من المؤثرات لفيلم
inception

لانه بالطبع كان مبهرا علي مستوي المؤثرات ولكنه لم يخلق ليكون افضل فيلم !





افضل ممثل :


"كولين فيرث" ولكن هل من منافسة ؟
نعم في هذه الجائزة كان هناك منافسة شديدة بينه وبين "جيف بريدجيز"
ولكن "جيف" حصل عليها العام الماضي في فيلمه الرائع
crazy heart

فربما كان هذا سبب ايضا بجانب روعة اداء "كولين فيرث"
اما "جيمس فرانكو" فكان دوره ايضا مثير للاعجاب والدهشة وكان ربما يستحق بعد هؤلاء .




افضل ممثلة :



نتالي بورتمان تفوقت علي "نيكول كيدمان" ربما يكون هذا العنوان
وعذرا لباقي المرشحات فلا توجد منافسة كبيرة بين الاثنين وبين باقي الممثلات هنا في هذه القائمة
كنت اعتقد ان نيكول كيدمان قد تربح هذه الجائزة فقد ادت دور الأم المكلومة الحزينة علي اروع ما يكون منذ اداء "جوليان مور" في فيلم "ذا فورجتون" وكانت ام مكلومة حزينة
وايض دور الام المكلومة كان ل
Radha Mitchell
في فيلم
man on fire
وكان لخطف ابنتها
او دور "مارك ولبرج" في فيلم
the lovely bones
كان يقوم بدور الاب الحزين علي فقد ابنته ببراعة فائقة جدا
او فيلم
taken
واداء الاب ل "ليام نيسون"
او فيلم
taken on broad day light

وغيرهم الكثير ولكن "نيكول كيدمان" فعلا ادت هذا الدور ببراعة تحسد عليها باداء نفسي عجز عنه الكثيرون في تمثيل هذا الدور وهو دور "الام المكلومة "
وكانت تسحق ايضا هذه الجائزة ولكن من المؤكد ان نتالي بورتمان ايضا لعبت دورا مميزا جدا




الممثلون المساعدون :


Melissa Leo
في فيلم
the fighter

بينما افضل ممثل مساعد هو

Christian Bale
ايضا في فيلم
The Fighter

وهذا الفيلم ايضا فاز بنفس الجوائز في "الجولدن جلوبز" ولكن كان تم ترشيح "مارك ولبرج" ايضا كافضل ممثل ولم يفز بها في الجولدن جلوبز
هذا الفيلم من افضل 250 فيلم في موقع "اي ام دي بي " و هو فيلم قصة حقيقية عن ملاكم وكيف ساعده اخوه ليصل الي المجد
فهل هو
million dollar baby
او
Cinderella Man
اخر ؟؟

ربما بالفعل نضيفه لهذه الافلام الرياضية العظيمة والدرامية المدهشة وهو يستحق هذا باداء ممثليه وبقصته


الغريب ان ايضا ايمي ادامز من نفس الفيلم ترشحت لجائزة افضل ممثلة مساعدة..!
ممثلتين مساعدتين من نفس الفيلم ..شئ رائع فعلا




الانيميشن :


طبعا فاز فيلم
toy story 3

وهذه المجموعة هي افضل مجموعة انيميشن علي مدار سنوات عديدة وكان الفيلم مرشح ايضا لجائزة افضل فيلم !




الموسيقي والاغنية :


الاغنية فاز بها
toy story 3
ويستحق

والموسيقي فاز بها

The Social Network

ولا يستحق بتاتاااااا
ولا اعرف كيف حصل بهذه الموسيقي علي افضل موسيقي برغم وجود موسيقي فيلم
127 Hours
و
The King's Speech
و
inception

حقا لا اعرف كيف حصل عليها


الإخراج :

اوسكار للمخرج توم هوبر عن فيلم
the king's speech

وفي هذه القائمة ايضا كانت المنافسة ساخنة جدا



فيلم "انسيبشان" :


inception
فيلم جيد جدا ورائع ولكن لم يحصل الا علي ما يستحقه
انا لست متحاملا علي الفيلم فهو من اروع الافلام ولكن الكثير جدا من المؤثرات هي التي تستحق ان تفوز وليس الفيلم كافضل فيلم والحمد لله انه لم يفز بجائزة افضل فيلم فكانت ستمثل صدمة لي
فاز الفيلم بجوائز
CINEMATOGRAPHY
SOUND EDITING
SOUND MIXING
VISUAL EFFECTS

هذه الجوائز ليست عميقة كجوائز فيلم "خطاب الملك" ولهذا اعتبر جميع الصحفيين والنقاد ان فيلم خطاب الملك هو بطل هذه الليلة وليس "انسيبشان" رغم ان كل منهم اربعة جوائز ولكن قيمة الجوائز تفرق




باقي الجوائز



ART DIRECTION :

Alice in Wonderland

COSTUME DESIGN:

Alice in Wonderland


وافضل فيلم اجنبي هو فيلم دنماركي هذا العام وتستطيعون مشاهدة باقي الجوائز علي موقع اوسكار الرسمي

وكان فعلا هذا العام في اوسكار مميز جدا والافلام تتنافس بشدة وهو من افضل مواسم الافلام في هوليود
ومن فاته الحفل فعليه ان يشاهده في الاعادة لان الحفلة والتقديم كان ممتع للغاية ايضا




Sunday, February 27, 2011

خط الفرفشة والنعكشة





كل شوية تيجي رسايل عجيبة ع المحمول والكلام ده من زمان ..متعرفش ايه هدف الرسالة اساسا وهل هي رسالة بجد ولا مقلب ..بس بجد صندوق الرسايل اتملي رسايل من النوعية الحمضانة دي بتاعة المسابقات وكمان الجيش دخل في الخط وشوف بقي نوعية الرسايل اللي بتيجي عاملة ازاي :



1- "مسابقة اسمنت المقاوم ..اكسب موبايلات في مسابقة اسمنت المقاوم..مع اسمنت المقاوم عمر المبني هيبقي طويل "
وبعتولي بقي رقم المسابقة وكده..وعايز اسألهم سؤال ..بذمة ابوكوا بقي ده اسم يشجع اني ادخل المسابقة اساسا..المقاوم؟؟..وهاكسب موبايل ايه بقي اسمنتي ؟؟
وبعدين الرسالة اصلا حسستني اني عامل فواعلي بشيل اسمنت ..يا اخي ده الملافظ سعد !




2- "تكاليف فرحك كاملة علينا..ايوه علينا..ارسل كلمة فرح الي الرقم .... واجب علي تلات اسئلة بشكل صحيح وشركة...بتقلك مبروك سلفا "

طيب ازاي يعني تبعتولي الرسالة دي اساسا ؟؟ ده انا بقالي فترة طويلة قوي بكتب "الحرق بالجاز في ليالي الجواز " يبقي ازاي هاتجوز ؟
الرسالة دي من اكتر الرسايل اللي حرقت دمي بجد..ويقولك اجب ع التلات اسئلة وهندفعلك تمن الفرح ..اكيد هيسألوني هل انت خرونج ام كينج كونج؟ وبعض الاسئلة زي دي عشان يعرفوا اني عبيط جديد دخل القفص..انا كلمة "فرح" بتجيبلي العصبي وبتخلي عيني ترف جامد قوي..طبعا الرسالة دي مسحتها فوراااا اول ما وصلت وكنت هارمي الموبايل ع الارض افلقه نصين





3- "حرق قش الارز يضر بصحتك وبصحة اسرتك "

بجد ؟؟ طيب ما توفره تمن الرسايل دي وروحوا عالجوا الموضوع ده ..طيب ما هو بيضر بالصحة امال انتوا سايبن النوضوع وقاعدين تبعتوا رسايل ؟؟ هو ده الحل بتاعكوا ؟؟
ولا انا البس الموبايل كمامة علي مناخيري ولا ايه ؟؟ ايه فايدة الرسالة دي ؟؟ المفروض تكتبوا بتضر بصحتي وصحة اسرتي وصحة اللي جابوني كمان..بس فين الحل يعني ؟
ولا المفروض ارد ع الرسالة واقول " كح كح كح" ؟؟




4- "الي كل ام اب اخ اخت الي كل مواطن شريف حافظوا علي هذه البلد فالوطن باق للابد "

انا صحيت م النوم لقيت الرسالة دي اول حاجة في وشي ..مين اللي باعت ؟؟ القوات المسلحة ؟؟؟ هم جابوا موبايل ؟؟؟؟؟
يعني بيقوموا الواحد مرعوب اساسا ..انا قلت البلد ولعت تقريبا او في حرب دلوقتي في الشوارع كنت عايز اطلع البلكونة لحسن الاقي كشك ام وليد احتلوه ولا حاجة الناس..او في حرب اهلية في شارع البحر مثلا بالمصاصات..اه يا جيشنا العظيم الرعب اللي انت بتبعته ده ؟ طيب ابعت الرسالة العصر مش الصبح كده يعني؟
ده انت مقومني م النوم وانا ركبي بترقص من الخوف يا راجل من صيغة الرسالة اساسا ..دي رسالة حرب مش نصيحة.




5- " تفهم المجلس مطالبكم وتم تكليف الجهات المعنية لتحقيقها في الوقت المناسب"

اهي دي بقي جت في الجون لاني كنت لسه قايل للحاجة انا عايز اتغدي ..فجأة الرسالة جت بعدها بشوية انها هتحقق مطالبي كلها .ايه هتجيبولي دليفري؟؟ وهو انتوا مراقبيني ولا ايه يا عم الحاج ؟ ده انا يدوب قولت عايز الغدا لقيت انكوا هتحققوا المطالب وكمان جهات هتحققها في الوقت المناسب يا سلام رسالة في وقتها




6- " القوات المسلحة لن تسمح باستمرار الممارسات الغير مشروعة لما فيها من خطورة جسيمة علي الوطن وستتخذ الاجراءات القانونية الرادعة "

طب ايه اللي انا عملته ؟؟ ده انا في الحمام ..وهل اللي انا بعمله ده غير مشروع ؟
خلاص يا عم معدتش هاعمل كده تاني المرة الجاية هابقي امسك نفسي بس هدوا نفسكوا يا جدعان فزعتوني من ام الرسايل دي




7- " خط الاصدقاء للدردشة والصداقة..كون صداقات جديدة واتصل علي .... "

والغريب ان مكتوب رقم دولي ..يعني هاتصل دولي عشان اكون صداقة ؟ يا اخي بناقص الموضوع ده ما اكلم ناس من بلدي وخلاص هم يعني قليلين؟؟ ما احنا 85 مليون يعني الله يزيد ويبارك مجتش يعني علي اللي هاكلمه ده هيكون انتيمي مثلا عرفته ع التليفون ؟
وبعدين ما احنا عارفين الخطوط دي هدفها ايه اساسا ولا صداقات ولا حاجة ..دول ليهم اجندات اخري..ولا بلاش كلمة اجندات الناس اتعقدت من الكلمة دي




8- " مبروك ربحت سيارة هامر ..اتصل علي .....لتستلم الجائزة "

هامر؟ ده انت اللي هامر واللهي..يعني هتدوني سيارة هامر ومستخسرين تكلموني وبتبعتوا رسالة ؟؟؟
كفاية فشر بقي وضحك عالناس..وياتري هاستلمها من اقرب كشك ولا هتبعوها قطع وانا اركبها ؟
وايه الشركة المحترمة دي اللي بتقولي كسبت سيارة هامر من غير ما تقول للجرايد وتقول للدنيا كلها عشان تعمل دعاية اكتر لنفسها ؟
يا سلام دي شركة قديسة اوي ..
زي اللي بعتلي بتاع نوكيا وقالي كسبت 600 الف دولار بس ابعتلنا تفاصيل كذا وكذا وكذا كان عايز رقم حساب وحاجات كتير قوي يعني بيقولي هاسرقك م الاخر يعني
يا جماعة المفروض التحايل يبقي اذكي من كده يعني




وبصوا بقي انا هاقفل تليفوني لاني اتخنقت م الرسايل دي سلااااام

Saturday, February 26, 2011

الاوسكــار السنة دي غير عــادي






جايزة الاوسكار هي اكبر جائزة سنوية وهي الاعظم والاكثر رواجا واقبالا من قبل الممثلين والصحفيين والجمهور وكل من يهمه امر الانتاج السينمائي ولا تصل ابدا لمرتبتها جوائز

الجولدن جلوبز او البافتا او غيرها من الجوائز الاخري التي تمنح

طبعا بعض التواريخ والمصادر من الانترنت وبعض القراءات في تاريخ الاوسكار :


تاريخ الاوسكار :


اول اوسكار كان سنة 1929 في هوليود وحضره حوالي 270 شخص ساعتها واستمت باسم اوسكار عشان سببين محتملين ان "بيت ديفيس" سمته كده عشان علي اسم زوجها

الاول او ان ممثلة اخري قالت "ده شبه عمي اوسكار"

تمثال الاوسكار يبلغ طول الجائزة 34 سم ووزنه 3.85 كغم وهو على شكل فارس يحمل سيفا وواقف على شريط فلمي وهو مصنوع من مادة البريتانيوم الذي هو خليط من القصدير

والنحاس ويطلى في المرحلة الأخيرة من التصنيع بطبقة من الذهب



شروط الترشيح حسب موقع اوسكار الرسمي :


1- لابد من عرضه في صالات السينما في كاليفورنيا في السنة اللي قبل الجايزة

2- لا يقل الفيلم عن 40 دقيقة

3- حجم الفلم الذي صور عليه العمل السينمائي اما 35 ملمتر أو 70 ملمتر


اللجنة :

لجنة الاوسكار مكونة من 5835 شخص ومنهم الممثلين يمثلوا نسبة 22 في المية وعددهم 1311
والجميع شرط تتم دعوته لكي ينضم للجنة التحكيم



نقد الجائزة :


الاوسكار ليه نقد كتير جدا ومش هو بس ده كمان الجولدن جلوبز زس ما شوفنا روبرتو دي نيرو في الجولدن جلوبز الاخيرة وهو بينتقد الاختيارات وبيتهكم عليها
طب ايه اسباب النقد :

1- شايفين ان كمية التكاليف اللي بتتصرف علي فيلم عشان يبقي في موسم الاوسكار هي بتخلي الموضوع دعاية اكتر منه قيمة وفن
2- التصنيفات : يعيب البعض خلو الاوسكار من تصنيفات كاملة زي الكوميدي او الرعب او الرومانسي كوميدي احيانا وتصنيفات اخري كثيرة
3-التأخير : تاخر الجائزة دائما بعد الدخول في الموسم التاني والبعض بيري ان المقروض تكون بدري عن كده مش بعد دخول الموسم الجديد وافلامه
4- الاختيارات : بيشوفوا ان الاختيارات بيشوبها التحيز احيانا او بتكون اختيارات سيئة
5- الاعتبارات : ساعات بيكون في اعتبارات سياسية زي ما شوفنا في فيلم افاتار او "هارت لوكر" مثلا



ارقام قياسية :


والت ديزني : حصل علي 64 ترشيح و 22 فوز و4 جوايز تكريم

الموسيقار الفريد نيومان : يأتي ثانياً في عدد الترشيحات بمجموع 45 ترشيحاً حصد منهم 9 اوسكارات

الموسيقار جون ويليامز: يشترك في عدد الترشيحات مع (الفريد نيومان) بمجموع 45 ترشيحاً حصد منهم 5 اوسكارات

حصلت الطفلة شيرلي تيمبل على اوسكار تكريمي عام 1935 و هي لا تزال في السادسة من العمر و ذلك لمواهبها المتعددة في التمثيل و الغناء و الرقص

الممثلة Katharine Hepburn حصلت علي 4 جوايز من اصل 12 ترشيح

الممثل جاك نيكلسون حصل علي 3 من اصل 12 ترشيح

وطبعا ميريل استريب اللي طول النهار تترشح لاوسكار

في ممثلين خدوا اوسكار سنتين ورا بعض وده انجاز رهيب زي توم هانكس عن فيلمينورا بعض في عامين متتالين
Philadelphia 1993
Forrest Gump 1994

وممثلين اخرين قليلين عملوا الانجاز ده وكلهم قبل توم هانكس




أسوأ جوائز الأوسكار :


في اراء الكثير من النقاد اعتبروا بعض السنوات الجوائز كانت فيها سيئة جدا والفيلم اللي حصل ع الجايزة كان لا يستحق ومنها مثلا :


Shakespeare in Love 1998
وقالوا اللي المفروض كان يفوز بداله هما
Saving Private Ryan and The Thin Red Line, and an un-nominated The Big Lebowski, The Truman Show


American Beauty 1999
والمفروض كان يفوز بداله
Being John Malkovich
وبصراحة ده كلام معقول

A Beautiful Mind 2001
وكان المفروض يفوز بداله
memento

The Lord of the Rings: Return of the King
وكان المفروض يفوز بداله
Mystic River,
وطبعا ده اللي كان المفروض يفوز

Crash 2005
وكان المفروض يفوز بداله
Walk the Line

No Country For Old Men
وانا اعتبره اسوا فوز في تاريخ الاوسكار
وكان المفروض يفوز بداله
There Will Be Blood




الافلام اللي اتظلمت :


الافلام اللي اتظلمت كتير في الاوسكار سواء اللي كانت مرشحة اصلا او اللي مترشحتش خالص ومنها في راي

hearts in atlantis
august rush
the hours
the cold mountain
a walk to remember
finding neverland
the truman show

من الافلام اللي فوق دي اترشح فعلا للاوسكار وافلام حصلت فعلا علي الاوسكار ولكن كانت تستحق اكتر
يعني فيلم
the hours
مثلا خد اوسكار ولكن كان يستحق اربعة علي الاقل

وهنا هنشوف الافلام اللي اترشحت لاوسكار ومخادتش ولا واحدة :

About Schmidt (2002) 2 nominations

Being John Malkovich (1999) 3 nominations

The Elephant Man (1980) 8 nominations

Far From Heaven (2002) 4 nominations

A Few Good Men (1992) 4 nominations

Gangs of New York (2002) 10 nominations

The Truman Show (1998) 3 nominations

True Lies (1994) 1 nomination

The Talented Mr. Ripley (1999) 5 nominations

Sleepless in Seattle (1993) 2 nominations

The Shawshank Redemption (1994) 7 nominations

Revolutionary Road (2008) 3 nominations

Munich (2005) 5 nominations

Memento (2000) 2 nominations

Malcolm X (1992) 2 nominations

Pride & Prejudice (2005) 4 nominations

القائمة دي طويلة ولكن انا اختارت اكتر الافلام اللي انا شايف انها اتظلمت فعلا وكان المفروض من وسط الترشيحات تاخد اوسكار ع الاقل او اتنين





اوسكار 2011 :


السنة دي المنافسة حامية جدا والافلام اللي فيها كلها جامدة وقيمة فعلا ونشوف الترشيحات بتقول ايه

"Black Swan"
"The Fighter"
"Inception,"
"The Kids Are All Right,"
"The King's Speech,"
"127 Hours,"
"The Social Network,"
"Toy Story 3"
"True Grit"
"Winter's Bone"

وفعلا صعب جدا تختار مين الافضل في دول لانها سنة من السنوات الاستثنائية واللي الافلام فيها كلها بتنافس بشدة وكلهم علي مستوي راقي
وان كنت انا اختار
the king's speech
ومعرفش ايه اللي جاب هنا فيلم
social network
اللي حتي لو فاز تبقي اختيار عيب وغريب وسط العتاولة دول ولو فاز فده مش عشان هو الافضل ولكن يمكن عشان دور الفيس بوك اللي لعبه في الفترات الاخيرة او تكريم لصاحله

او اي اعتبارات تانية انما اي حد اكيد مش هيقول ان ده الافضل وسط الافلام دي مستحيل قطعا
وفيلم
the king's speech
مرشح ل 12 اوسكار السنة دي والمفروض ياخدله 6 ع الاقل لانه فيلم تحفة بجد




باقي الترشيحات هاحطها تحت وانا اتمني حصول نيكول كيدمان علي افضل ممثلة السنة دي لانها فعلا تستحق هي ونتالي بورتمان ومعرفش مين فيهم هياخد الجايزة دي



Actor in a Leading Role
Javier Bardem in "Biutiful"
Jeff Bridges in "True Grit"
Jesse Eisenberg in "The Social Network"
Colin Firth in "The King's Speech"
James Franco in "127 Hours"

Actor in a Supporting Role
Christian Bale in "The Fighter"
John Hawkes in "Winter's Bone"
Jeremy Renner in "The Town"
Mark Ruffalo in "The Kids Are All Right"
Geoffrey Rush in "The King's Speech"

Actress in a Leading Role
Annette Bening in "The Kids Are All Right"
Nicole Kidman in "Rabbit Hole"
Jennifer Lawrence in "Winter's Bone"
Natalie Portman in "Black Swan"
Michelle Williams in "Blue Valentine"

Actress in a Supporting Role
Amy Adams in "The Fighter"
Helena Bonham Carter in "The King's Speech"
Melissa Leo in "The Fighter"
Hailee Steinfeld in "True Grit"
Jacki Weaver in "Animal Kingdom"

Animated Feature Film
"How to Train Your Dragon" Chris Sanders and Dean DeBlois
"The Illusionist" Sylvain Chomet
"Toy Story 3" Lee Unkrich

Art Direction
"Alice in Wonderland"
"Harry Potter and the Deathly Hallows Part 1"
"Inception"
"The King's Speech"
"True Grit"

Cinematography
"Black Swan," Matthew Libatique
"Inception," Wally Pfister
"The King's Speech," Danny Cohen
"The Social Network," Jeff Cronenweth
"True Grit," Roger Deakins

Costume Design
"Alice in Wonderland," Colleen Atwood
"I Am Love," Antonella Cannarozzi
"The King's Speech," Jenny Beavan
"The Tempest," Sandy Powell
"True Grit" Mary Zophres

Directing
"Black Swan," Darren Aronofsky
"The Fighter," David O. Russell
"The King's Speech," Tom Hooper
"The Social Network," David Fincher
"True Grit," Joel Coen and Ethan Coen

Documentary (Feature)
"Exit through the Gift Shop," Banksy and Jaimie D'Cruz
"Gasland," Josh Fox and Trish Adlesic
"Inside Job," Charles Ferguson and Audrey Marrs
"Restrepo," Tim Hetherington and Sebastian Junger
"Waste Land," Lucy Walker and Angus Aynsley

Documentary (Short Subject)
"Killing in the Name"
"Poster Girl"
"Strangers No More"
"Sun Come Up"
"The Warriors of Qiugang"

Film Editing
"Black Swan"
"The Fighter"
"The King's Speech"
"127 Hours"
"The Social Network"

Foreign Language Film
"Biutiful," Mexico
"Dogtooth," Greece
"In a Better World," Denmark
"Incendies," Canada
"Outside the Law (Hors-la-loi)," Algeria

Makeup
"Barney's Version," Adrien Morot
"The Way Back," Edouard F. Henriques, Gregory Funk and Yolanda Toussieng
"The Wolfman," Rick Baker and Dave Elsey

Music (Original Score)
"How to Train Your Dragon," John Powell
"Inception," Hans Zimmer
"The King's Speech," Alexandre Desplat
"127 Hours," A.R. Rahman
"The Social Network," Trent Reznor and Atticus Ross

Music (Original Song)
"Coming Home" from "Country Strong," Music and Lyric by Tom Douglas, Troy Verges and Hillary Lindsey
"I See the Light" from "Tangled," Music by Alan Menken Lyric by Glenn Slater
"If I Rise" from "127 Hours," Music by A.R. Rahman Lyric by Dido and Rollo Armstrong
"We Belong Together" from "Toy Story 3," Music and Lyric by Randy Newman

Short Film (Animated)
"Day & Night," Teddy Newton
"The Gruffalo," Jakob Schuh and Max Lang
"Let's Pollute," Geefwee Boedoe
"The Lost Thing," Shaun Tan and Andrew Ruhemann
"Madagascar, carnet de voyage (Madagascar, a Journey Diary)" Bastien Dubois

Short Film (Live Action)
"The Confession," Tanel Toom
"The Crush," Michael Creagh
"God of Love," Luke Matheny
"Na Wewe," Ivan Goldschmidt
"Wish 143," Ian Barnes and Samantha Waite

Sound Editing
"Inception," Richard King
"Toy Story 3," Tom Myers and Michael Silvers
"Tron: Legacy," Gwendolyn Yates Whittle and Addison Teague
"True Grit," Skip Lievsay and Craig Berkey
"Unstoppable," Mark P. Stoeckinger

Sound Mixing
"Inception," Lora Hirschberg, Gary A. Rizzo and Ed Novick
"The King's Speech," Paul Hamblin, Martin Jensen and John Midgley
"Salt," Jeffrey J. Haboush, Greg P. Russell, Scott Millan and William Sarokin
"The Social Network," Ren Klyce, David Parker, Michael Semanick and Mark Weingarten
"True Grit," Skip Lievsay, Craig Berkey, Greg Orloff and Peter F. Kurland

Visual Effects
"Alice in Wonderland," Ken Ralston, David Schaub, Carey Villegas and Sean Phillips
"Harry Potter and the Deathly Hallows Part 1," Tim Burke, John Richardson, Christian Manz and Nicolas Aithadi
"Hereafter," Michael Owens, Bryan Grill, Stephan Trojanski and Joe Farrell
"Inception," Paul Franklin, Chris Corbould, Andrew Lockley and Peter Bebb
"Iron Man 2," Janek Sirrs, Ben Snow, Ged Wright and Daniel Sudick

Writing (Adapted Screenplay)
"127 Hours," Screenplay by Danny Boyle & Simon Beaufoy
"The Social Network," Screenplay by Aaron Sorkin
"Toy Story 3," Screenplay by Michael Arndt; Story by John Lasseter, Andrew Stanton and Lee Unkrich
"True Grit," Written for the screen by Joel Coen & Ethan Coen
"Winter's Bone," Adapted for the screen by Debra Granik & Anne Rosellini

Writing (Original Screenplay)
"Another Year," Written by Mike Leigh
"The Fighter," Screenplay by Scott Silver and Paul Tamasy & Eric Johnson; Story by Keith Dorrington & Paul Tamasy & Eric

Johnson
"Inception," Written by Christopher Nolan
"The Kids Are All Right," Written by Lisa Cholodenko & Stuart Blumberg
"The King's Speech," Screenplay by David Seidler




وكلها ساعات ونشوف الفايزين في الاوسكار ونشوف مين اكتر فيلم حصد للجوايز في الحدث العالمي الابرز حاليا الاوسكار
مقدمى الحفل الرئيسيين هما جيمس فرانكو، وآنا هاثواى، كما تم إختيار الممثلة سكارليت جوهانسون لتشارك فى تقديم أحد فقرات الحفل.
وتمتعوا بمشاهدة الاوسكار


Thursday, February 24, 2011

الأفكار القذرة ومكيافيللية الزعماء العـرب









الحاكم في العالم العربي لا يريد بشعبه الا فتكا ولا يعتبرهم الا مريدين ولا يراهم الا خزينة امواله
الحاكم في العالم العربي فيه من سوداوية "شوبنهاور" وكأبة "فيكتور هوجو" وسخرية "برنارد شو" ما يغطي سماء شعبه
تشعر انك في فساد مركب كما كان الحال في مسرحية "رؤوس الأخرين" لمارسيل ايميه
او عالم وهمي من عوالم شكسبير يصنعه الحاكم لنفسه ويعيش فيه وحده فقط.

كتاب "الأمـير" لمكيافيللي من الكتب التي لا تخلو منها مكتبة..وربما قرأها البعض عدة مرات ليري كيف تفنن مكيافيللي في فن السياسة والبعض يقول في فن "الخسة" !
اختلف الجميع علي الكتاب ومغزاه وافكاره السياسية والانتهازية الملئ بها الكتاب في شتي صفحاته وفصوله
كان هذا الكتاب هو الهدية من من نيقولا مكيافيللي إلى لورنزو، الابن العظيم لبيرو دي ميديشي..وكان فيه من خبرة مكيافيللي السياسية وإلمامه بالطبقات الحاكمة والدهاء السياسي الكثر والكثير ليشرحه للأمير.
قالوا ان نابليون الثالث لم يكن يقرأ كل ليلة الا كتاب الامير..واعتبرته الكنيسة انه من عمل الشيطان نفسه..!
ولكن تشعر في صفحات الكتاب ان كل الزعماء العرب كانوا يقرأوا الكتاب كل ليلة ايضا ..ويتبعون كل تعاليمه وتعاويذه الشريرة وطقوسه الفاسدة..

ربما كان مبارك او القذافي او بن علي ويتبعهم اخرون هم من عشاق مكيافيللي ..هذا ما يشعره الجميع عندما يقلب صفحات الكتاب ويقرأ فيه ما يدور في عقول هؤلاء الطغاة واستبدادهم بشعوبهم الذي هو واضح من بعض افكار هذا الكتاب وباقي افكارهم من صنع الابالسة .
وهنا سنأخذ رحلة في فصول الكتاب ومحاولة مقارنتها مع افكار الزعماء العرب الذين هم من اتباع مكيافيللي او اتباع كتاب الامير واحيانا يتبعونه حرفيا .




الكتاب هو هدية من مكيافيللي بيقول للامير وهو بيديله الهدية :


"من نيقولا مكيافيللي
إلى لورنزو، الابن العظيم لبيرو دي ميديشي
من المعروف أن أولئك الذين يسعون على نيل رضاء أحد الأمراء يجتهدون في
تقديم الهدايا الثمينة ذات القيمة الغالية إليه . أو يهدونه أشياء يعلمون أنها تدخل
البهجة والسرور إلى نفسه ويسعدها، ويجب رؤيتها . وعلى هذا الأساس نجد أن غالب
الأمراء يقبلون هدايا تتمثل في جياد أصيلة، أو أسلحة ثمينة، أو ثياب موشاة بالذهب
أو الأحجار الكريمة، وما شابها من تحف تليق بمكانتكم العظيمة.
ولكنني على أي حال أود أن أهدي سموكم الكريم شيئًا متواضعًا يدل على
إخلاصي لكم . ولم أجد فيما أملك ما هو أغلى من معرفتي ب أعمال ومنجزات عظماء
الرجال. وهي معرفة اكتسبتها من خلال تجربة طويلة مررت بها وقد صاحبها العديد
من الأحداث إضافة على ما درسته حول ما حدث في الماضي.
وبعد تفكير عميق وبذل الكثير من الجهد في دراسة وتأمل منجزات العظماء،
أهدي سموكم اليوم ما توصلت إليه من نتائج، وقد وضعتها في هذا الكتاب الصغير.
ورغم أنني أعتبر أن هذا الكتاب المتواضع قد لا يرقى لقبول سموكم، إلا أنني
واثق من عطف سموكم وقبولكم له ."





تقول مقدمة الكتاب عن الكتاب وما فيه :


"ان الكتاب فيه من معاني الخسة والانتهازية وعدم احترام حقوق الآخرين، بل واعتبار أن قتل
الأبرياء شيء طبيعي من الممكن فعله من أجل الحفاظ على ملك مغتصب، وذلك
عندما نصح الأمير بأن يبيد جميع أفراد الأسرة المالكة فيما يسقط بين يديه من ولايات
وإلا أصبحوا خطرًا عليه،"



وايضا يقول المترجم عن الكتاب :


"وقد أثار كتاب مكيافيللي جدلا كبيرًا عندما نشر في أوروبا لأ ول مرة، فهو
يتناول أخلاقيات السياسة وهو شيء لم يسبقه أحد إليه، إلا أن غالب النقاد في تلك
الفترة أجمعوا على ما فيه من أخلاقيات شريرة، وقالوا إن الكتاب لا يناسب سوى
الطغاة الأشرار"



وقدم الكتاب نصائح سياسية واخلاقية للأمير :

"قدم مكيافيللي للأمير مجموعة من النصائح تتعلق بالسياسة الداخلية (أي سياسة الأمير
لرعاياه) ، وأخرى تتعلق بالسياسة الخارجية (أي علاقة الأمير بأمراء الدول الأخرى ) ،
وهي كلها قائمة على الفصل بين السياسة والأخلاق ، ويرى مكيافيللي أن اتباع هذه
النصائح (أو قواعد العمل السياسي ) من شأنه أن يديم حكم الأمير ويرسخ سلطانه"


وهنا هأوضح ايه وجه الشبه بين كتاب مكيافيللي والزعماء العرب في عدة نقاط من وجهة نظري :


من مكيافيللي الي زعماء العرب :



أولا : لا تعبأ بالفضائل :



نفس اللي بيحصل من الرؤساء والملوك العرب لشعوبهم بالظبط هتلاقيه في القطعة دي من الكتاب ونصيحة مكيافيللي وهو بيقول في كتابه :


"نصحه مكيافيللي ألا يعبأ بالفضائل بل وأن يلجأ إلي الرذائل إن كان ذلك يحقق
مصلحته ، فلا يجب على الأمير أن يكون كريما لأن الكرم يؤدي إلي الفقر وهو إن
افتقر سيخسر هيبته لدى رعاياه ، وعليه أن لا يكون طيبا لأن ذلك يثير روح الثورة
عليه في نفوس رعاياه ، أما القسوة فتقيم النظام وتمنع الفوضى وتحقق الوحدة وتقضي
على الفتنة وهي في المهد ، كما أن رضا ا لرعايا متغير فلا تعتمد في استمرار حكمك
على رضاهم "



القسوة زي استعمال الامن في الحفاظ علي النظام بتاعهم وبيقولك كمان في فكر الناس دي ان القسوة هي اللي بتصنع النظام
زي تفتيت الاحزاب وقمع الحريات ووضع قيود علي كل شئ بإسم النظام رغم ان هو بإسم الجبروت والطغيان في الحقيقة
زي سحل وقتل بلال وخالد سعيد وكل الضحايا دول اللي راحوا ضحية نظام امني فاسد
زي ما قاله مكيافيللي وسمع كلامه لا تلجأ للفضائل اهم حاجة المصلحة.




ثانيا : اعتمد علي قوتك :


بيقول في الكتاب مكيافيللي ان لازم الحاكم يعتمد علي قوته وبيربطها بعلاقة طردية بفترة الحكم

" بل اعتمد على قوتك فهي إن دامت سيدوم حكمك . ويضيف
مكيافيللي : أنا لا ألوم الحاكم الروماني روميلوس الذي قتل أخاه وشريكه في الحكم
لكي ينفرد بالسلطة ويوطد سلطانه ، ولا ألوم الروماني الآخر بروتس الذي حكم على
أولاده الخمسة بالموت لكي يستمر عرشه ، فإذا كانت الواقعة (أي القتل ) تتهمه فإن
الغاية النبيلة (أي دوام سلطانه ) تبرؤه"


يا ساتر فعلا كتاب شيطاني
الزعماء العرب مستعدين عشان فترة حكمهم انهم يقتلوا بلد كاملة زي ما القذافي بيعمل في ليبيا
وزي ما مبارك قتل باستخدام الامن عشرات الشهداء
لان الناس دي مكيافيلية وشايفين ان استمرار الحكم حاجة نبيلة مش مهم قدامها القتل والقمع
اهم حاجة استمرار الحكم النبيل
بيستخدموا قناصين ورصاص حي المهم الحكم يدوم لهم




ثالثا : سياسة الغابة :



يقول مكيافيللي عن سياسة البلد الخارجية ان لازم الامير يكون زي الذئب في التعمل مع الدول التانية وبيقول في قطعة من الكتاب :


"أما بصدد السياسة الخارجية أي علاقة الأمير بأمراء الدول الأخرى فقد بدأ بوصف
العلاقات الدولية وكأنها غابة ، ونصحه بأن يجمع بين أسلوب الإنسان وأسلوب
الحيوان ، فإن اختار أسلوب الحيوان فعليه أن يكون ثعلبا وأسدا في ذات الوقت ، أي
يتبع أسلوب الثعلب القائم على الحيلة والمكر والخداع والمراوغة و النفاق والرياء ،
وأسلوب الأسد القائم على القوة والعنف والبطش . (ذكاء الثعلب وقوة الأسد).
فبالنسبة لأسلوب الثعلب على الأمير أن لا يفي بالعهود التي يقطعها على نفسه للأمراء
الآخرين إلا إذا كان في الوفاء بالعهد مصلحة له ،
وعلى الأمير أن يتزين أما العالم الخارجي بحلل زائفة من الصدق والسلام والعدل
والوفاء (ذئب في جلد شاة ) ، وأن يظهر أمراء الدول الأخرى بأنهم الكاذبون."


وبيضيف كمان في اساليب المكر والخسة في التعامل مع الاخرين :


"إذن علي الأمير أن يكون ثعلبا وأسدا في ذات الوقت لأنه إن كان مجرد ثعلب عجز
عن التعامل مع الذئاب و الغابة الدولية مليئة بالذئاب ، وإن كان مجرد أسد عجز أن
يتبين ما ينصب له من فخاخ والغابة الدولية مليئة بالفخاخ.
عليك أن تبدأ بأسلوب الثعلب فإن لم يفلح أسلوب الثعلب في خطف عنقود العنب
فليسمع زئير الأسد ( أي إن لم تجد الدبلوماسية فلتدق طبول الحرب)"


وفعلا الرؤساء العرب بيتعاملوا مع بعضهم بالاسلوب الخسيس ده ولكن بيتعاملوا مع امريكا واسرائيل باسلوب الارنب مش الثعلب .
نديهم خطوط غاز ونقفلهم المعابر ويهددونا الدولة التانية بقطع المعونة وكل حاجة باسلوب الارانب.





رابعا : إضعاف القوي :


بيقول في الفصل ده مكيافيللي :

كما أن الحاكم الذي يحكم إقليمًا أجنبيًا كما أوضحت، يجب أن يجعل من
نفسه قائدًا وحاميًا لجيرانه الأقل قوة منه ويسعى جاهدًا لإضعاف الأقوياء منهم .

وشوف الحتة دي كمان من اساسيات حكم القادة العرب انه ميقويش غيره عموما زي المعارضة المتهالكة بتاعتنا لان لو المعارضة قويت هو هيهلك شوف بيقول ايه :


"أن كل من يتسبب في أن يقوي غيره يهلك نفسه، لأنه إنما يفعل ذلك إما بالحيلة، أو
بالقوة. وهاتان الصفتان هما موضع شك ممن يصل إلى السلطة".




خامسا : الخير لن تجني من ورائه الخير :



حتة شيطانية من الكتاب برضه وكأنها مهداة للحكام العرب زي كل سطور الكتاب بيقول فيها مكيافيللي :


"وإذا كانت الأخطاء لابد واقعة فيحسن أن تكون دفعة واحدة حتى تكون أقل تأثيرًا من واقعات متعددة تبقى آثارها أما المزايا
فيجب إعطاؤها للرعايا جرعة جرعة حتى يستمتعوا بها ويشعروا بفائدتها وقبل كل
شيء لابد للأمير ان يعيش وسط رعيته بطريقة لا يؤثر فيها حدوث حادث له فيخرجه
عما يخطط سواء كان حادثًا مؤلمًا أو حادثًا سعيدًا وذلك لأنك لا تكون في هذا الموقف
موفقًا إذا استخدمت الشدة، وإن فعلت الخير لن تجني من ورائه أي فائدة لأنه سيؤخذ
على أنه اضطرار وبلا أي فائدة"


بيقول ان المزايا لازم تديها للشعب جرعة جرعة زي ما كان مبارك بيعمل في خطاباته ايام الثورة كل شوية يقول حاجة او تنازل معين بس الناس ما اتضحكش عليها
وكان مبارك لاخر لحظة في حكمه مكيافيللي برضه بيديهم الميزة او اللي هما عايزينه حتة حتة ..
وطول عمره بيعمل كده حتي في زيادة الاجور او وضع حد ادني ليها برضه حتة حتة او جرعة جرعة
وزي الحوافز في عيد العمال اللي بتغلي بعديها الاسعار علطول.





سادسا : ابتعد عن اصحاب الطموح :


بيقول مكيافيللي :

"أما أولئك المبتعدون عنك لغرض معين، فهذا يعني أنهم
ذوو طموحات، وأنهم يفكرون في أنفسهم ولا يكفرون فيك لذا يجب على الأمير أن
يحترس منهم وأن يعتبرهم أعداء غير ظاهرين يمكنهم المساهمة في سقوطه وقت الشدة "




سابعا : الحرب ثم الحرب :


بيقولك اللي يتولي القيادة تكون كل فكرته في الحرب لانه بيعتبره فن البقاء علي الحكم زي ما عمل مبارك بالامن بتاعه بالظبط وبيعمل دلوقتي القذافي بشكل ابشع واقذر وبيقول الكتاب :


"ينبغي للأمير ألا تكون له غاية أو فكرة سوى الحرب، ونظامها وطرق تنظيمها،
يتخذ لدراسته موضوعًا آخر سواها فهذا هو الفن الوحيد اللازم لمن يتولى القيادة
فن له من المزايا ما يكفي للمحافظة على هؤ لاء الذين ولدوا أمراء و الإبقاء عليهم
مناصبهم كما أنه يساعد الرجال العاديين على بلوغ مرتبة الإمارة ومن ناحية أخرى
أن نرى أن الأمراء يفقدون ولايام عندما يفكرون في مظاهر الترف أكثر من
تفكيرهم في الأسلحة والسبب الأول لضياع الولايات هو إهمال هذا الف ن فهي
تكتسب عن طريق إجادة هذا الفن"




ثامنا: بعض الفضائل قد تهلك الفرد :



بيقولك مش كل فضيلة هتسببب السعادة ساعات الرذيلة بتبقي مهمة للابقاء علي الحكم وبيقول :


"لأننا إذا نظرنا للأمور نظرة صحيحة لوجدنا أن بعض ما
يبدو فضائل قد يهلكنا لو طبقناه، والبعض الآخر الذي يبدو من الرذائل قد يسبب
سلامة الإنسان وسعادته"



تاسعا : لا تعبأ بالصفات التي يصفونك بها :


يقول في قطعة من الكتاب :

"لابد للأمير ألا يعبأ إذا ما وصف بالبخل ، إذا أراد ألا يفقد
رعيته، وأن يكون قادرًا على حماية نفسه، وألا يصبح حقيرًا وفقيرًا، وألا يضطر إلى أن
يصبح جشعًا إن الشح رذيلة تمكنه من الحكم فإذا قيل أن القيصر قد بلغ الإمبراطورية
بالسخاء وصعد كثيرون غيره إلى أعلى مترلة بالسخاء أو باشتهارهم به، فإني أرد على
ذلك قائلا إنك إما أن تكون أميرًا حديث العهد، أو في طريقك لأن تكون أميرًا "


عاشرا : الهيبة افضل من الحب :


بيتكلم هنا ان هيبة الحاكم اهم من حب الجماهير ليه لانه مش هيعرف يجمع الصفتين مع بعض فيبقي الهيبة اهم للمحافظة علي كرسيه وحكمه :


"ومن هنا تبزغ مشكلة المفاضلة بين وجوب أن يكون الأمير محبوبًا أكثر منه
مهابًا أم مهابًا أكثر منه محبوبًا والجواب هو أنه ينبغي على الإنسان يكون محبوبًا ومهابًا
في نفس الوقت ولما كان من الصعوبة الحفاظ على الصفتين معًا، فإن المهابة في هذه
الحالة أفضل بكثير إذا كنا لا نستطيع إيجاد الصفتين معًا"

وبيقول كمان ان انانية الناس هي اللي بتخلي موضوع حب الشعب لحاكمه مش مهم المهم الهيبة والخوف من العقاب لانها طريقة مستحيل ان تفشل :


"إن البشر يترددون في الإساءة إلى من يحبون أقل من ترددهم في
إيذاء من يهابون وذلك لأن الحب مرتبط بسلسلة من الارتباطات التي تتفكك عندما
تؤدي غرضها (وذلك بسبب أنانية الناس ) لكن استخدام المهابة والخوف من العقاب
طريقة صحيحة لا تفشل أبدًا"



حادي عشر : لابد ان تقترف بعض الشرور :



بيقول للحاكم انه لازم في وقت يرتكب الشرور للمحافظة علي مركزه وينافق اي طرف قد يحقق مصلحته كمان وبيقول هنا :

"ومن هنا يتضح أن الأعمال الصالحة قد تجلب الكراهية، كالأعمال الشريرة،
ولذلك فإن الأمير الذي يريد يحافظ على ولايته أن يقترف بعض الشرور ، كما سيق أن
أوضحت وذلك لأنه إذا فسد طرف من الأطراف الثلاثة، سواء كان الشعب، أو
الجيش، أو النبلاء، وكنت تعتبره ضروريًا من أجل المحافظة على مركزك، فيجب عليك
أن تتبع هواه وترضيه، وهنا تؤذيك الأعمال الصالحة"




ثاني عشر : اختار اعوانك وحاشيتك :


بيقول للحاكم مش اي حد يقولك نصيحة لا لازم يكون حد انت تختاره وتسمع كلامه وتاخد مشورته وتغدق عليه المال وترفع مكانته كمان زي مبارك والحاشية اللي حواليه اللي رفعها مبارك للسماء ومكانش بيسمع غير كلامهم ولا بيشوف غير تقاريرهم الفاسدة عن ان الوضع في مصر ممتاز وكده وبيقول الكتاب :


"ينبغي للأمير أن يصون وفاء أمينه له، فيفكر في أحواله ويكرمه ويغدق عليه، ويرفع مرتبته، ويسند إليه
الأعمال الكبرى ويستطيع الأمراء وأمناؤهم الاعتماد على بعضهم البعض حتى تستمر
هذه العلاقة، أما إذا شاب العلاقة غير ذلك فالنتيجة هي المضرة دائمًا سواء لهذا أو
لذاك".


ويضيف الكاتب :

"ولذلك على الأمير أن يختار من ينصحونه من حكماء الناس ويمنحهم
الحرية التامة كي يتحدثوا إليه عما يسألهم عنه من أمور فقط وليس عن أي شيء آخر
وعليه أن يسألهم عن كل شيء، ويسمع رأيهم، ثم يتناول الأمر مع نفسه وعلى طريقته
الخاصة، وأن يجتمع بنفسه مع مجالسهم، ومع كل منهم على انفراد، حتى يستطيع كل
منهم أن يدرك أنه كلما كان ذا رأي حر كان أكثر قبولا عند الأمير ولا يجب على
الأمير أن يستمع إلى غير هؤلاء الذين أعدهم لهذا الأمر"





كتاب الأمير رغم انه من مئات السنين الا انه كأنه مكتوب اول امبارح ..متفصل للزعماء العرب ومناسب جدا لمقاس فسادهم
كل نصيحة من الكتاب بيطبقها الحكام العرب حرفيا وكأنه حافظ الكتاب عن ظهر قلب واظن القذافي اللي بيقتل عشان يحافظ علي حكمه اكبر مثال علي ذلك
وكأن الكتاب في جيبه بيقراه كل ليلة زي نابليون وزي غيره من الاباطرة والديكتاتوريين اللي مستعدين يدبحوا شعب عشان الكرسي
يارب خذ كل ظالم اخذ عزيز مقتدر




Tuesday, February 22, 2011

مساجينووووووو





رسالة الي مسجون :


عزيزي المسجون عزيزتي المسجونة..طبعا انتوا في الشارع دلوقتي وانا قولت اكتبلكم الرسالة دي يمكن تشوفوها وانتوا في اي نت كافيه ما انتوا عايشين حياتكوا برة دلوقتي ومقضينها ..ياريت كل واحد يرجع زنزانته في سلام واحنا هنقدم للداخلية الاقتراحات دي عشان تسلموا نفسكوا وتسيبوا الناس من غير خوف شوف يا سيدي :

1- تكييف الزنزانة بتكييف اخر موديل وتنقية للهواء كاملة
2- عدد 2 شاشة ال سي دي 50 بوصة عشان تستمتعوا بزنزانة جامدة وشقية
3- ليلة الخميس من كل اسبوع فقرة رقص شرقي داخل الزنزانة لزوم الفرفشة
4- دهان النزنزانة باحدث الالوان ومش هنسيب كرانيش السقف كمان
5- شبكة واي فاي ولاب توبات لجميع المساجين مع طرابيزة خاصة لكل مسجون عشان يحط اللاب توب بتاعه وممكن تطلب "اي باد" بالطلب
6- تمارس العاب الجولف في حوش السجن والعاب باسكيت وتنس واشيك اللعبات
7- مدربين جيمانيزيوم كل يوم الصبح وتدريبات علي احدث الاغاني الاجنبية
8- مياه معدنية وغداء كل يوم من انتركونتينتال جاهز ومغلف
9- فتح فروع لاجمد المطاعم داخل السجن
10- زيارة اسبوعية كل يوم جمعة لسجون اخري للتعرف علي اصحابكوا المجرمين ومشاركتهم اخر اخبار الاجرام والبلطجة
11- تدريبات خاصة للسادة المزورين والاستعانة بادوات حديثة للتزوير وتعليمهم احدث وسائل التزوير في العالم بالاستعانة بافلام وثائقية
12- العاب حربية وقتال علي الكمبيوترات للسادة المحكوم عليهم بالاعدام والقتلة
13- افراج عن المحبوسين اللي قتلوا زوجاتهم عملا بكلمة "اقتل مراتك تنعم بحياتك"
14- انتخابات نزيهة وشفافة لمعرفة "زعيم البلطجة" داخل السجن حسب عدد الاصوات
15- لاصحاب الاشغال الشاقة المؤبدة سيتم تحويل العقوبة الي "الاشغال الحلوة المقطقطة" لتسهيل فترة السجن
16- حمامات سوبر لوكس جهزة بقواعد تفتح بالسقفة وسيفون تاتش
17- يمكن طلب زنزانة ايجار جديد مفروشة احدث صيحة باجر زهيد
18- حلويات يوميا وفاكهة بعد الغدا لحد ما بطن سعادتك تتملي ع الاخر
19- شغالة فلبينية لكل مسجون تسمع طلباته بس بلاش حركات ناقصة معاها
20- الخروج في نص او ربع المدة حسب الجريمة


ودي اقتراحاتنا ويارب تحنوا علينا وترجعوا زنازينكوا وهنحاول نوفرلكوا الطلبات دي كلها وسجن سعيد ليك ولاسرتك .."هابي حبس"..انجوي يور تايم يا مسجون يا عسول





برنامج "مساجين بلا حدود" :


البرنامج كان اسمه "خلف الاسوار" بس نظرا لان الاسوار معدش وراها حد اصلا هنسميه "مساجين بلا حدود"


المذيعة : اهلا بيكوا في حلقة جديدة من "مساجين بلا حدود" واحنا النهاردة من المهندسين الساعة 1 بليل وشايفين بلطجي هناك ماسك رشاش في ايده ونقوله ازيك
المسجون : اهلا انتي مين ؟ طلعي اللي معاكي يا مزة
المذيعة : انت مسجون ولا بلطجي عادي ؟
المسجون: بسم الله الرحمن الرحيم الاجابة مسجون بلطجي
المذيعة : وياتري خرجت ازاي من السجن ؟
المسجون : خرجت ازاي؟ ايه الاسئلة الغبية دي؟ ده كل اصحابي المساجين في النزنزانة خرجوا هي جت عليا
المذيعة: وبتفتكر ترجع تاني ؟
المسجون : بفكر ارجع تاني ؟؟ هو مصيف يا ست ؟؟ ده سجن
المذيعة: طيب تمام وياتري بتقضي وقتك ازاي برة السجن ؟
المسجون : زي ما انتي شايفة حضرتك رشاشات بقي وترويع للناس وحاجات حلوة من دي
المذيعة: ترويع ؟؟ سمعت الكلمة دي فين ؟
المسجون: في التليفزيون حضرتك بيقولوا علينا بنروع الناس في الشارع مع ان صوت الرشاش حضرتك ميروعش حد ايه الجيل الخرع ده ؟
المذيعة : وانت بتسرق المهندسين بس ولا حتت تانية ؟
المسجون: لا ما انا خلصت المعادي حضرتك
المذيعة: ومش خايف للشرطة ترجع تاني وتمسكك ؟
المسجون: شرطة ؟؟ ههههههههه لا ما هي واخدة اجازة بدون مرتب اما الدبابات اللي في الشارع دي حضرتك الناس بتتصور معاها وكده انما مبتخوفنيش يعني حضرتك
المذيعة : يعني انت اخلاقك ما اتغيرتش بعد الثورة ؟ ده بيقولوا انها ثورة اخلاق وكده
المسجون: الثورة الجاية ان شاء الله ابقي اغير اخلاقي المرة دي انا عايز اكل بس
المذيعة : وياتري انت ليك عتاب علي حد ؟
المسجون : طبعا ليا عتاب علي شلوفة والعترة اللي خرجوا م السجن وسرقوا اهل منطقتهم رغم ان دي مش مجدعة ابدا واخلاق المسجون متسمحش بكده ولا اخلاق المجرم
المذيعة: اخلاق المجرم ؟؟؟؟ اشرحلي اكتر
المسجون: يعني ده يرضي ربنا ان واحد يسرف اهل منطقته وناسه ؟
المذيعة: طيب ما انت بتسرق منطقة المهندسين كلها
المسجون: ايوه انا معرفش حد في المهندسين فواجب عليا اسرقهم
المذيعة: اااه ماشاء الله مبدأ برضه واخلاق ممتازة
المسجون: امال ايه ؟ هو احنا مساجين اي كلام ؟
المذيعة: لا العفو ده كفاية شنبك ده ده انت مجرم بدرجة قدير جدا
المسجون: الله يكرمك ياست ..هو البرنامج ده هيتذاع امتي؟
المذيعة: ليه هتشوفه ؟
المسجون: اه ما انا سرقت تليفزيونات كتير قوي وهاشوفه اما ييجي عشان اشوف وشي في الكاميرا علي مؤاخذة بيقولوا وشي "فوتو فينيك" في الكاميرا
المذيعة: فينيك ؟؟؟ لا حضرتك "الفنيك" ده بيتحط في الحمامات تقريبا التانية اسمها "فوتو جينيك"
المسجون: اه عفارم عليكي يا ست سيبيني بقي في اكل عيشي
المذيعة: فرصة سعيدة قوي حضرتك كمل براحتك واستعمل رشاشك..وانت كسبت معانا النهاردة في الحلقة مفاجأة
المسجون : ايه كسبت ايه ؟؟
المذيعة : جراب احمر للرشاش يحفظه من الاتربة مبرووووووووووووك
المسجون: واللهي؟ الحمد للله الحمد للله انا كان نفسي من زمان في جراب ليه فعلا بس مبيبعش في اي محل الحمد لله اني لقيته الف شكر الف شكر..انا بهدي الانجاز ده للسيد مأمور السجن وبقوله تحيا مصر تحيا مصر
المذيعة: دي كانت نهاية حلقاتنا مع دموع المسجون وفرحته بالهدية ونشوفكوا في حلقة جديدة




اعلان مساجينكوا :

هربان ؟؟
هربت غصب عنك وعايز تحس باحساس السجن اللذيذ تاني ؟
دلوقتي بنقدملك قضبان "مساجينكوا"
تقدر تحطها حوالين السرير او ع الشباك عشان تحس انك مسجون من جديد
القضبان صلبة جدا وغير قابلة للكسر احبس نفسك بنفسك
حس باحساس السجن المنعش واللذيذ من تاني بدل عيشة الحرية المقرفة اللي انت خرجت ليها
"قضبان مسجينكوا" بتقدملك تشكيلة الوان القضبان الذكية وباسعار مدهشة
اتصل الان من اي تليفون مش متراقب وهنوصلك لاي غرزة انت فيها
سعر الشحن حسب مكان الغرزة او الخرابة اللي هيقابلك فيها المندوب
مساجينكوا..ع الزنزانة دور



Sunday, February 20, 2011

تاتا تاتا اديها كمان شماتة







لكل واحد من النظام السابق نشوف ايه الاغنية او المثل اللي ينطبق عليه في وضعه الحالي بعد ما بقي معظمهم متجمدة فلوسه يا عيني في اجدع فريزر وعقبال مترجع الحقوق دي لشعب مصر :



أحمد عز : الدنيا زي المرجيحة يوم تحت وفوق..فيها خلق عايشة ومرتاحة وفيها ناس مش فوق..واللهي بتمرجح فيها من تحت لفوق لفوق "اغنية المرجيحة"


اعضاء الحزب الوطني : قالوا علينا ديابة واحنا يا ناس غلابة يا مغنواتي غني حكايتنا ع الربابة " ذئاب الجبل "


انس الفقي : قال علي راي المثل "امتي بنتيت القصر..قال امبارح العصر"


اسامة سرايا: في الوش مراية وفي القفا سلاية


جمال مبارك : انا موصلتش لحاجة من اللي حلمت بيه ..سوء اختيار ده ولا سذاجة ولا ايه..رجعت للصفر من مكان ما بدأت "محمد محي"


حسني : دنيا غريبة وكدابة زي السواقي القلابة "اغنية "


ممتاز القط : تحلم بايه وتعمل حزين ولعبت ليه دور الرزين كومبارس منسي من سنين وملكش حق الاختيار مسرح عرايس يا بنات وكلة يرقص من سكات نسو الزبون كل اللى فات ينفخ مرارتة فى السيجار " وائل جسار"


احمد نظيف : الدربندوخ الدربندوخ .كنا شباب وبقينا شيوخ "احمد زكي"


صفوت الشريف : الدنيا اكبر غمازات يوم تهزك غمازات ويوم توزك غمازات وبت بيضا غمازات "غمازات"


فتحي سرور : حاسس بخنقة وضيقة حاسس ان انا بتهد..في ناس من براها بريئة وهي من جواها الكذب "احمد سعد"


حبيب العادلي : الدنيا مبتغيرشي لكن احنا اللي بنتغير احنا اللي مبنقدرش واحنا بنختار ونغير..اول ما الواحد يعلي مش عايز حد معاه وبينسي مين كان واقف جنبه لحد ما علاه..وكانه كبير طول عمره ومكانش ضعيف وصغير الدنيا مبتغيرشي لكن احنا اللي بنتغير "ايهاب توفيق"


علاء مبارك : وانا مالي وانا مالي ما انا كنت زمان في حالي "غادة رجب"


سوزان مبارك : دايما دموع دموع دموع دايما دموع دموع دموع "حمادة هلال"


جرانة : قال مشافوهمش وهم بيسرقوا شافوهم وهم بيتقاسموا


التليفزيون المصري : الكداب بيخش النار وانت بتكدب ليل ونهار "طارق عبد الحليم"


الشرطة : وداع بوداع وايه يعني ما قلبك باع وودعني "محمد فؤاد"


المغربي : والسنين اللي قضيتها تفوت من غير حساب والقصور اللي بنيتها كانت قصور فوق السحاب والحنين اللي في عيونب تبقي عيني في التراب لا ولا ولا قبل ما تفكر تبيعني هاتلي شاري للعذاب "بهاء سلطان "



بطرس غالي : يا ابن ادم تملى تميل على اللى بيوهمك و بيخدعك كل اللى تقول ده خير لي هو ده اللى يضيعك رحال والبخت مال موال وكله بيسمعك ضحيت حبيت هويت وفيت لناس لا تؤتمن يابحر من العذاب ومن الجراح ومن المرار يادنيا نهارها ليل وليلها ويل والم ونار ما لاقيت من الصحاب اصحاب وكله ياصاحبى جار وياريت بتفوق تملى الغلطة سوء الاختيار "بهاء سلطان"


عزمي : ماشي يا زمن..راضي يا زمن..كلشي له تمن يا زمن..عنوان ابدا..ما يغلي سكن.لو جنة عدن..يا زمن "ريدا بطرس"



ابو العينين : ظلموه ظلموه القلب الخالي ظلموه قابلوه شبكوه "عبد الحليم"




Saturday, February 19, 2011

الثـورات..لماذا الأن ؟





كما تقول المقولة "الشعوب تنام ولكنها لا تموت" وفي ظل الغفوة الطويلة التي شهدتها المنطقة العربية جمعاء في ظروف اقتصادية صعبة وقمع للحريات كان من الطبيعي جدا ان تصل الشعوب لنقطة الغليان المتوقعة حتي وان طالت الفترة وان طال الصبر علي استبداد الانظمة الديكتاتورية الحاكمة والمتنطعة فوق قرارات السيادة الكاذبة والحجج الواهية.
"المساواة والعدل" كانت دائما نقطة الدفع لاسقاط اي نظام من عهد الثورة الفرنسية والبلشفية وحتي من ايام ثورة العبيد كانت هي الحافز الرئيسي كذلك وايضا نقطة التحرر التي تقود للحرية
يبقي ايه هي نقاط الثورة المنطلقة في العالم العربي ومصر وباقي الثورات او ايه هي الركائز اللي قامت عليها الثورة او دوافع قيام الثورة :




1 - قمع الحــرية :



وكما تقول "حنة ارندت" في الكتاب الشهير "في الثـورة" :

"قد يكون من الحقيقة البديهية ان نقول ان الحرية والتحرر ليسا مثل بعضهما ..وان التحرر قد يكون شرط الحرية ولكن لا يقود اليها اليا "

يعني لسه قدامنا خطوات نمشي فيها بعد الثورة كمان مش كده وصلنا للي احنا عايزينه

وتقول ايضا :

" ان من الامور الجوهرية في اي فهم للثورات في العصر الحديث ان تتزامن فكرة الحرية مع التجربة لبداية جديدة ..وليس فهمنا للثورة وحده..بل مفهومنا كذلك للحرية الذي هو ثوري الاصل هما اللذان عليهما يتوقف قبولنا ورفضنا لذلك التزامن "

هذا الكتاب من المحركات الاساسية لفهم اي ثورة وفهم طبيعة الحرية والتحرر التي هي من شروط الثورات في العصر الحديث

والحرية وقمعها في مصر ليه اشكال كثيرة اخرها حتي محاولة التصدي لطبعات جديدة من كتاب الف ليلة وليلة عشان بيقولك اصل فيه كفر وعري !!!
ومنها مصادرة الكتب وتكميم الافواه وحتي اثناء الثورة قطع شبكات الاتصالا والانترنت رغم انها حق من حقوق الانسان
وتعذيب جسدي لكل من ينادي بالتظاهر او المطالبة بالحقوق والبطش به من جهاز الامن المصري
القمع في مصر متعدد الاشكال والاساليب وهو من اكبر اساليب البلطجة الحكومية





2- الفقـر :


وليس فقط الحرية او التحرر والمساواة هما اسباب الثورات بل من الطبيع جدا ان يكون الفقر هو احد الدعائم الرئيسية لقيام الثورة وفي هذا الصدد يقول كريفيكور "ان الفقر المطلق اسوأ من الموت" وايضا عندما تحدث الكاتب الكبير جلال امين في كتاب "ماذا حدث للمصريين" عن الحراك الاجتماعي في مصر وكيف اهمله علماء الاقتصاد بعدم دراسته كاملا وتحليله بشكل كامل وتحدث عن نظرية عالم الاجتماع الشهير سوروكن "انه بينما تميل الطبقات الدنيا في الظروف الاجتماعية الثابتة نسبيا الي تقليد الطبقات الاعلي منها في انماط سلوكها ..فانه في الظروف التي تتعرض فيها الطبقات العليا للانحدار والتدهور علي درجات السلم الاجتماعي يحدث العكس..حيث تاخد الطبقات الهابطة الي اعتناق سلوك الطبقات الادني "

وفي النقطة دي بيقولك ان العمل اليدوي مثلا اللي الناس بتحتقره احيانا لانه مرتبط بانخفاض الدخل..يبدا الطبقات الهابطة انها تقوم بيه تدريجيا دون الشعور بالخجل او الاستحياء ولا يعود الانتساب لعيلة معينة او غيرها مصدر خجل او فخر وبيدينا مثال مثلا بالحجاب اللي انتشر في كافة الطبقات وكده

وفي النقطة دي اللي يهمنا هو كلامه عن الطبقة الوسطي اللي اتكلم عنها كتير من المصريين وقالوا انها بتنقرض وبيقولك ان المجتمع كائن حي دائما ما يتغير تركيبه الطبقي
وفي ايام عبد الناصر مثلا وصف ان مجتمع قبل الثورة كان اسمه "مجتمع النصف في المائة " وعام 55 كان واحد في المائة بس بيحصلوا علي 1500 جنيه للاسرة في السنة وكان في 80 في المائة بيحصلوا علي اقل من 240 جنيه
يعني كأننا رجعنا للعصر ده تاني او يمكن اسوأ كمان اللي هو عصر ايام الملك وبعده بشوية

وفي فصل مهم جدا من الكتاب لجلال امين يقول في فصل "اسياد وخدم " متحدثا عن الفقر :

" ليس هناك مؤشر علي التقدم الاقتصادي فيما اظن افضل من قيمة العمل الانساني..كلما زاد التقدم الاقتصادي ارتفعت قيمة العمل مقارنة بقيمة السلع والعكس بالعكس..فاذا وجدت ان العمل الانساني في بلد ما يقدم للعمل الحد الادني من القوت والملبس والمسكن فانت في بلد اقرب الي نظام العبودية او السخرة..ا هكذا يعامل العبد : لا يعطيه سيده اجرا بل يعطيه ما يسد رمقه "

والحتة دي فعلا منطبقة جدا علي الوضع في مصر ايام مبارك شوف مثلا بتاع تكنولوجيا المعلومات اللي بياخدوا 99 جنيه في الشهر او المدرسين اللي بياخدوا 200 جنيه يعني فعلا نظام العبودية قائم وبشكل مقزز في مصر..واحمد عز كان يحسب دائما بمعدلات النمو فقط رغم انها حسبة مخادعة تماما فمصر كانت بتتقدم في معدلات النمو ولكن ده لعوامل تانية كتير يطول شرحها لكن الفقر كان بيزيد مع ارتفاع معدلات النمو..واحمد عز كان بيحسبها بالفزلكة ويقولك شوف كام عربية فور باي فور في مصر وعدد اللي معاهم موبايل وهو اسلوب غريب جدا لقياس معدلات الفقر او البطالة وغيرها وتعتبر اساليب مضللة


وكمان في مصر شوف المستشفيات العامة عاملة ازاي وقري كاملة في مصر بتقمع بامية او بتقطع ملوخية وبيكون رزقهم بريزة في اليوم ودي من افقر القري في العالم
وفي نفس الوقت عشان تشوف التفاوت الميزانية المهدرة في قطاع زي التليفزيون 11 مليار خسائر
بالاضافة لمخالفات عربيات السلك الدبلوماسي والعلاج علي نفقة الدولة اللي بتدفعله الدولة مليارات والناس مش لاقية تاكل
والقري الكاملة اللي مش لاقية تزرع الا بمياه المجاري والتقاوي والمبيدات المسرطنة
والناس الل بتبيع اصواتها في الانتخابات بوجبة غداء من الفقر المدقع
والعشوائيات اللي مش واصلها مياه ولا صرف صحي وواحد بيقول في برنامج واحد من الناس ان بقاله خمس سنين بيشتكي
تخيلوا خمس سنين واحد بيبعت جوابات وبيروح يشتكي ومحدش بيشوف ايه الموضوع والورق بيترمي بالزبالة
الناس اللي في الدويقة اللي ميتة بالحيا دي وساكنين في وسط الصخر والصخر بيتشقق وبيسقط عليهم مياه
الفقر في مصر شبح مخيف كان لازم ينتج عنه الثورة




3- مخططات التوريـث :


طيب ده الفقر ايه تاني خلي الثورة تنطلق في مصر او سبب انطلاقها في بعض الدول العربية برضه من الاساسيات "مخططات التوريث " ودي طبعا من اكبر الاساليب اللي بتحسس الشعوب بقمعها وعجزها وخنوعها ان يتفرض عليك حاكم كانه نظام ملكي مستبد يملي عليك ما يريد دون حد ادني حد للديموقراطية وحرية الاختيار
ومن اشهر اللي اتكلموا عن الملف الخطير ده طبعا "محمد طعيمة" في كتابه "جمهورية ال مبارك" وقال معلومات في الكتاب بتقول عن التوريث :

ان الاستاذ هيكل اول من اشار الي الملف بتاع التوريث في الجامعة الامريكية وبعد لقاء جاك سترو وزير خارجية بريطانيا بجمال مبارك عام 2002 قام المصريون المقيمون بالخارج بعمل حملة توقيعات ضد التوريث وبعد محاولات اغتيال الريس عام 95 وعام 99 مرة في اديس ابابا ومرة في بورسعيد بدا الحديث يدور حوالين جمال او الانظار تتجه اليه اما انضم للحزب الحاكم عام 2000 وكان ده من بدايات مخططات التوريث طبعا في مصر

والكتاب اتكلم بشكل كبير عن انشطة جمال قبل ما ينظر اليه الناس علي اساس انه الرئيس القادم واتكلم عن عمله في البنوك البريطانية وسفره برة وبداية عمله وامتلاكه لشركة اوراق مالية فتح فرعها في مصر عام 97 وبداية عصر جمال مبارك وتحدث اصحف الاجنبية في عام 99 عن ملفات التوريث وبدأ فتح الملف

الكتاب ده رائع في التحدث عن ملف التوريث بشكل كامل وغني جدا بالمعلومات عن حياة جمال مبارك وبداية افكار التوريث في مصر ولابد من قرائته

وطبعا معروف ان ملف التوريث كان من احد نقط الدفع للثورة لان مصر مش هتعيش مقهورة تاني ومنذ ظهور جمال مبارك والحيتان اللي حواليه بدات الحركات تظهر في مصر بشكل تدريجي زي كفاية او 6 ابريل والحركات اللي قبلها يعني مع بدايات ظهور جمال في الحياة السياسية بدات الحركات السياسية المصرية تظهر علي السطح جدا





4- الإحساس بالعبودية والقهـر :


وفي كتاب العقد الاجتماعي نجد نقطة كمان من نقط انطلاق التوريث هي الاحساس بالعبودية اللي اتكلم عنها كتاب العقد الاجتماعي الشهير للرائع جان جاك روسو وبيقول في فصل من الكتاب :

"حيث إنه ليس لإنسان سلطة طبيعية على أقرانه وان القوة لا تنتج أي حق، فإن الاتفاقات تبقى إذن هي الأساس لكل سلطة شرعية بين البشر.
هكذا فان حق الاستعباد، من أية زاوية نظرنا إلى الأمور، حق باطل، ليس فحسب لأنه غير شرعي وإنما لأنه محال ولا يعني شيئا. ان هذين اللفظين: "استعباد" و "حق" لفظان متناقضان، أحدهما ينفي الآخر. وسواء أكان الأمر من إنسان لإنسان أم من فرد لشعب، فانه لمن البلاهة دائما ان نقول: "انني اعقد معك اتفاقا كله على حسابك وكله في صالحي وسأنفذه طالما يروق لي وانك ستنفذه طالما يروق لي".


استعباد وحق فعلا كلمتين متناقضتين وفي مصر كان الاستعباد هو سيد الموقف وقامت الثورة لتعطي كل ذي حق حقه مش بس الحق ضد كلمة الاستعباد
لا
تقدر تقول ان الحق ضد كلمة "مبارك"..!





5- ممارسات الحكومة :


وفي الفصل "الحكومة بصفة عامة" من الكتاب "العقد الاجتماعي يقول روسو :

"فما هي الحكومة إذن؟ إنها هيئة وسيطة بين الرعايا وصاحب السيادة من أجل الاتصال المتبادل بينهما، مكلفة بتنفيذ القوإنين وبالمحافظة على الحرية المدنية والسياسية على السواء.
إنني، إذن، أطلق اسم حكومة أو إرادة عليا على الممارسة الشرعية للسلطة التنفيذية، واسم أمير أو وال أو حاكم على الشخص أو الهيئة المكلفة بهذه الإدارة.
ذلك إن القوة الوسيطة التي تؤلف علاقاتها علاقة الكل بالكل أو علاقة صاحب السيادة بالدولة، توجد في الحكومة. ويمكن تمثيل تلك الرابطة الأخيرة بالرابطة بين أطراف تكافؤ مستمر، متوسطُهُ المناسب هو الحكومة. فالحكومة تتلقى من صاحب السيادة الأوامر التي يصدرها إلى الشعب ولكي تكون الدولة في توازن سليم يجب، مع توازن الكل، إن توجد هناك مساواة بين النتيجة أو سلطة الحكومة في حد ذاتها والنتيجة أو سلطة المواطنين الذين هم أصحاب سيادة من جهة ورعايا من جهة أخرى.


ده تعريف الحكومة السليم مش تعريف حسني مبارك يعني اللي هو ان الحكومة هي السيد واحنا الخدم او ان الحكومة هي احمد عز وجمال مبارك والشعب رعايا وعبيد !





6- تكسير تابوهات العجز :


اما في كتاب "لماذا لا يثور المصريون" للكاتب المبدع علاء الاسواني فانه يقول في فصل " من ادوار سعيد الي مقهي ريش " :

"إن الطريق الوحيد لتحقيق العدل هو أن ننتزع حقوقنا بأنفسنا.. عندما نعود كما كنا أمة قوية لها أهداف كبرى وكرامة وطنية لا تسمح لأحد بإهانتها.. عندئذ فقط سوف يسمع الغرب كلمتنا "

وبيقول في فصل من الكتاب كمان :

"العبقرية المصرية ربما تتلخص في كلمة واحدة: التأقلم .. إن قدرة المصري اللانهائية على التكيف مع أصعب الظروف والاستمرار في الحياة، هذه القدرة صفة حضارية رائعة يتميز بها شعبنا بجدارة.. فربما لا نكون أشجع الشعوب ولا أمهرها لكننا بالتأكيد أساتذة كبار في الدفاع الحياة ضد كل ما يهددها، فنحن نعرف تماما كيف ننتزع من الطغاة مساحة ما ولو صغيرة لنعيش ونستمتع ونبدع.

ولكن الحمد لله المصري زهق من التأقلم يا استاذ علاء وخرج ليتأقلم مع وضع جديد هو الحرية والعدالة والمساواة





الحمد لله الذي الهم جميع المصريين الامل كما في "العجوز والبحر " لهمينجواي..لم نفقد الامل تحلينا به حتي وان تقطعت السبل
دائما ما يتحلي المصريون بالامل حتي ولو كان اليأس سيفا فوق رؤوسهم..
الحمد لله ان الفقرا والجياع طالبوا بحقوقهم في حياة افضل
ويارب حياة افضل لكل قطاعات الشعب ونري المساواة بشكلها الكامل
والعدل بمناخه الحقيقي في مجتمع اقرب الي المثالي
امل ذلك وان طال الوقت..!

Thursday, February 17, 2011

قضـايا الـفساد ..وابـداع هوليود








في الفترة الاخيرة كثر الحديث عن الفساد ومحاسبة الفاسدين في كل القطاعات وخصوصا قطاع الشرطة ورجال الاعمال..ومنذ سنوات طويلة ونحن دائما ما نتحدث عن الفساد والفاسدين ومحاولات الاستيلاء علي حقوق الاخرين والتعتيم علي ذلك بشتي الطرق..
وكان لهوليود دور كبير جدا في هذا الصدد حيث ان كمية الافلام التي تحدثت عن قضايا الفساد في قطاع الشرطة وقطاع الاعمال والقطاع الحكومي كبيرة جدا واحب ان اذكر اهمها هنا التي تحدثت عن هذه القضية بالتحديد وسأذكر اسم الفيلم وسنة عرضه ونبذة عنه وكلها من افلام قضايا الفساد :





1-- Pressure

انتج هذا الفيلم عام 2002 وهو من اشهر الافلام التي تحدثت عن هذه القضية ويريك هذا الفيلم في احداثه كيف يكون رجل الشرطة الفاسد والذي يصر علي تلفيق قضية معينة لاشخاص وكيف يدور الصراع لاثبات براءة الشخص في احداث مليئة بالفساد الشرطي والتعتيم من الجهات الاعلي حتي يتم التوصل للحقيقة



2-- Cellular

من افلام عام 2004 وهو كيفية التعتيم علي قضية فساد ايضا تتورط فيها الشرطة عن طريق تصوير التفاصيل ويتم الوصول للهدف ومطاردته للتعتيم علي ملامح قضية الفساد حتي يتم اكتشاف الحقيقة وهو من اشهر افلام الفساد في قطاع الشرطة



3- Pride and Glory

من افلام 2008 وهي اسرة في قطاع الشرطة حيث تري نماذج وانماط مختلفة في نفس الاسرة لشرطي شريف وشرطي اخر متورط في عدة قضايا فساد مخدرات وغيره ويتربح عن طريقها وكيف يستعين بالمجرمين والبلطجية والتهديد والوعيد في معاملاته لاهالي الشهود للحصول علي مايريد الي ان ينكشف امره امام الجميع ..فيلم ايضا شهير ومميز عن قضية الفساد الشرطي



4- V for Vendetta

من افلام 2006 وطبعا علامة تاريخية مميزة في افلام قضية الفساد ولكن ليس فقط في قطاع الشرطة بل في جميع قطاعات الدولة وتري في الفيلم ملامح الثورة وكيفية الوصول الي ما يريده الثائر العظيم في الفيلم والوصول للناس ومطالبتهم بعدم السكوت علي حقوقهم لاسقاط حكومة الفاسدين برأسها الفاسد ..من افضل الافلام التي تحدثت عن الفساد والثورة


5- street kings

من افلام 2008 واذا تحدثت عن افلام الفساد في الشرطة فعليك بأن تبدأ بهذا الفيلم ..فيلم رائع يريك كيف يكون مدير قطاع الشرطة الذي يظهر برئ حتي امام اصدقائه المقربين من نفس القطاع هو لص متربح من جميع الجهات مخدرات ودعارة وغيرها وتلفيق القضايا ويجمع كميات ضخمة من المال والذهب من رشاوي وغيره حتي يفضحه ظابط شريف اخر في قطاع الشرطة



6- The Yards

من عام 99 ومن افضل افلام مارك ويلبيرج علي الاطلاق ويتحدث ايضا في مضمونه عن قضية فساد كبري تطال قطاعات عدة ويتم المداراة والالتفاف عليها من خلال العلاقات والنفوذ لمداراة عملية قتل مدبرة والحصول علي حقوق منهوبة..فيلم رائع


7- Shooter

من افلام 2007 وايضا مزالنا مع مارك ويلبيرج وله نصيب من افلام الفساد المتعددة التي فتحت قضايا هامة وهذا الفيلم يتحدث عن كيفية اخفاء اكبر قطاع امني لمقابر جماعية في دول افريقية وايضا دفع العمولات والرشاوي وتدبير عملية قتل خطيرة وتلفيق التهمة ولا يجد البطل لنفسه اي حلول الا الانتقام بيده بعدما جرب كافة الوسائل القانونية فينتقم بيده وباسلحته الخاصة لقتل السيناتور وشخصية نافذة في الجهاز الامني



8- control

هذا الفيلم يتحدث عن الفساد في قطاع مختلف تماما عن التجارب المعملية التي تضر البشر والتي لها نتائج سلبية ..وتتم التجارب خارج الاطار القانوني للوصول الي اهداف مادية


9- crash

من افلام 2004 والحاصل علي الاوسكار الشهير جدا ويتحدث عن قصص متعددة منها التمييز العنصري والفساد في قطاع الشرطة ايضا في اطار انساني متميز..من الافلام التي يجب مشاهدتها



10- god father 2

اذا ذكرت قضية الفساد..ذكرت سلسلة الاب الروحي فورا..من اشهر سلاسل الاكشن والتي تحدثت عن المافيا وكيف تتعامل قطاعات المافيا مع الشرطة بحرفية دقيقة جدا للوصول الي اهداف غير مشروعة وكيف تحصل الشرطة علي العمولات وتتكسب كسب غير مشروع بل وتقتل لصالح المافيا ان امكن مقابل المال..سلسلة من اروع ما يكون واشهر ما يكون




11- Michael Clayton

من افلام 2007 وتتحدث عن الفساد في قطاع الشركات العالمية الكبري وكيف تزيف الابحاث والاوراق التي تتحدث عن مخاطر انشاء الشركة ومع ذلك يتم التحايل علي كل هذا للوصول الي مبتغاهم وتتم ملاحقتهم طوال الفيلم لوقف الاعمال الغير مشروعة التي تنوي عليها الشركة العالمية الكبري باعلاناتها المزيفة والخادعة حتي ان الكلمة الرئيسية للفيلم
the truth can be adjusted




12- Rogue Trader


من افلام عام 99 ومن الافلام التي تحدثت عن الفساد والتسيب في القطاع المالي وخصوصا البورصة وكيف يمكن ان تترك الامور لشخص واحد ويتحايل بعقليته المالية المذهلة التي ابهرت من حوله ليحصل علي اموال لنفسه او مكاسب تصل به في النهاية الي كارثة محققة بل الي انهيار بورصة كاملة وقطاع مالي بلا رقيب يحاسبه او يتابع ما يفعل




وافلام الفساد متعددة ولكن احببت ان اتحدث عن معالم شهيرة جدا فيها وكيف تحدثت هوليود عن هذا الامر بحرفية واتقان وفن عالي جدا واداء مبهر



Wednesday, February 16, 2011

حــوار مـع صديقـي المبـارك






ده عنوان شبيه لعنوان كاتبنا الكبير مصطفي محمود "حوار مع صديقي الملحد " مش عشان مبارك صديقي يعني اكيد هههههه
انا قولت اعمل حوار بيني وبينه ..اكنه قاعد قدامي دلوقتي وهو تعبان صحيا وبسأله عن ندمه وحقوق الشعب اللي ضيعها وبعدين ضيعته كمان

ونشوف قاللي ايه :


انا: ازيك يا مبارك

مبارك: حالتي مش كويسة ابدا انا تعبان.انا في اتعس ايام حياتي

انا: عمرك تخيلت ان اليوم ده هييجي ؟

مبارك: بصراحة لأ..الشعب ده مقهور بقاله سنين بس عمري ما تخيلت انه هيفوق ..لكن الظاهر الظلم كان جرعة سم لا تحتمل وزادت قوي في الايام الاخيرة

انا: حاسس بندم ولا بس بحنين لكرسي الحكم ؟

مبارك: طبعا حاسس بندم..انا كبرت في السن وبدأت افوق متأخر علي حقيقة اني بهدلت الشعب معايا ووديته للحضيض بس مش ذنبي لوحدي

انا: ازاي مش ذنبك لوحدك ..انت اللي مختار اعوانك وحاشيتك واحد واحد..حتي لو ابنك اختار معاك كان لازم توقفه عند حده انت رئيس يعني المفروض تكون واعي لكل مؤامرة حواليك والا متصلحش للرئاسة

مبارك : كان في ظروف اقوي مني وكان في ناس ضمتها لحاشيتي فعلا لكن استولوا مني علي السلطة وكانت مقدرات البلد بايديهم

انا: برضه هتفضل المسئول قدام الملايين دي كلها والعالم العربي كله ..بس ايه اكتر حاجة زعلتك ؟

مبارك : اكيد خروجي بالشكل ده كان لازم اتنحي من بدري

انا: انت اتاخرت في كل خطوة يا مبارك..كل خطاب وكل خطوة كانت متأخرة جدا..سمعت مقولة "البورصة زي الكوميديا اهم حاجة التوقيت" ؟ اهو الحكم برضه كده اهم حاجة وقت اختيار القرار يا مبارك ووقت اخد القرار ..عرفت التوقيت فرق معاك ازاي؟؟ تخيل لو كنت حليت المجلس وعدلت الدستور في اول يوم خالص..كان زمانك ممكن تلحق نفسك بس انت بهدلت الناس وقمعتهم بجهاز الشرطة وسقط شهداء كمان كنت منتظر ايه منهم ؟؟ يخرجوك خروج مشرف ؟؟

مبارك: بس انا مصري وليا حق علي الشعب وقضيت معاكوا تلاتين سنة

انا: ايوه قضيت تلاتين سنة بس قضيتها فيايه يا مبارك ؟؟ قضيتها في اختيار حاشية ظالمة وجبروت وقهر للناس وامراض سرطان وصفقات قمح مغشوش ومبيدات مغشوشة واجهزة رقابية غايبة وتعليم فاشل ..مش مهم المدة يا مبارك المهم عملت ايه فيها ..ايه قيمة تلاتين سنة من غير افعال ؟؟..الافعال اسبق وامضي من الاقوال يا مبارك زي ما بيقولوا

مبارك: انا جاي تهاجمني انا فاكرك جاي تواسيني طيب طالما انت منهم عليا جاي تزورني ليه ؟

انا: مافيش حاجة اسمها "منهم" يا مبارك احنا مصريين وانت مصري بس انت اللي فجأة بقيت مش مننا ..عارف انك هتكلمني عن الضربة الجوية يا مبارك بس دي مش انجاز في جنود كتير عملوا اكتر من كده واستشهدوا وفي صائد الدبابات اللي كان بيفجر عدد رهيب من الدبابات وغيره دول بقي يعملوا ايه اذا كان انت بضربة جوية واحدة عملتلنا كل الهيصة دي ؟ ضربة جوية يا مبارك متدكش الحق انك تدك شعبك كمان بضربة قاضية

مبارك: يااه للدرجة دي انا كنت ظالم..ولا كنت اعمي؟

انا: لو كنت عارف ان ده بيحصل دي مصيبة ولو مكنتش عارف فالمصيبة اعظم يا مبارك ..انت رئيس يعني فين الثواب والعقاب؟؟فين المحاسبة؟؟ فين التقارير الختامية وتقييم الاداء؟؟ ايه متعرفش كل المصطلحات دي ؟؟ مدرستهاش او مقريتش عنها ؟؟ طب ما كنت اتعلمها من حكومات اوروبية بدل مكنت بتروح تزو اوروبا زيارات مكوكية وتيجي مستفدتش اي حاجة منهم

مبارك: انا كنت بعمل علاقات دبلوماسية وبحط مصر في مكانها الدولي

انا: مكانها الدولي؟؟؟ هي مصر ليها مكان او مكانة في عهدك ؟؟ انت خليت حتي العرب كلهم اخواتنا وحبايبنا يشمتوا فينا ويقولوا اننا ضد القضية الفلسطينية ونقفل المعابر ونرفض وصول المساعدات عبر المعابر يا مبارك عشان انت بتقول بحجة الامن والامان..انت ضيعت وهزيت صورتنا في كل مكان يا مبارك لان اللي فقد حياته الكريمة في بلده عمره ما هيلاقيها برة بلده ولو قعد مليون سنة..الحياة الكريمة اللي البلد تحرم المواطن منها مش هيلاقيها برة حضن بلده يا مبارك

مبارك : اسكت اسكت انا مش ناقصك

انا: انت بتهرب يا مبارك للاسف دايما كنت بتهرب من اللي يصارحك ويديك تقارير عن حال البلد وتصدق اللي انت عايز تصدقه وتكذب بمزاجك يا مبارك..عمرك نزلت للشارع من غير حراسة او وقفت وسط جموع في الشارع يا مبارك زي الرؤساء الامريكيين ما بيقفوا في وسط الجموع الغفيرة لدرجة ان بوش يا مبارك اتسرقت ساعته من الايادي والناس اللي كانت محاوطة بيه من غير الوف البودي جارد والهيلمان اللي انت فيه والموكب الفخم اللي متكلف ملايين يا مبارك من فلوس الناس الغلابة

مبارك : كنت بخاف حد يغتالني وبعدين ده تأمين

انا: ايوه بتأمن نفسك من ايه ؟؟ من حد انت خايف منه ..طيب خايف منه ليه ؟؟ عشان انت عارف انك ظالمه وحابسه في قمقم وقامع حريته يا مبارك ..عشان كده عندك الوف الحرس عشان امانك الشخصي وامان مصر وناسها مش مهم..انت عايش لنفسك ولعيلتك يا مبارك وده مش من صفات القائد ولا الرئيس يا مبارك..انت فقدت في عيون الناس صفة القيادة فاهانوك ..وصفة الاب فجرموك..وصفة حامي الحمي فخلعوك..

مبارك : قولتلك اسكت بدل ما ارميك برة

انا: ترميني برة ؟؟ لسه برة الكبر ده جواك؟؟ لسه ماشي بكلام حبيب العادلي اللي ضشعك وطريقة كلام عز اللي خلاك تفقد شعبيتك وهيبتك ؟..لسه بتتعامل مع الناس بنفس الطريقة القديمة بدل ما تسمعهم ؟ كنت بتمثل علينا دور الاب وتروح تشرب شاي مع صعايدة عشان الصورة تطلع في التليفزيون وانتوا بتمثلوا علينا والراجل دهاصلا مقهور وغلبان ومش لاقي ياكل..عارف الراجل ده كان بيحبك ليه يا مبارك ؟؟ احنا دايما بنحب البطل الشرير في الروايات يامبارك منايم المليجي وتويق الدقن والباتشينو وغيره دايما بنحب شخصية الشرير وساعات بنعيط عليها اما الفيلم ينتهي مع انها شريرة ..هو ده كان موقف الغلابة منك يا مبارك بيحبوك عشان كده..عايزين اي جناح يضلل عليهم ولو حتي عصابة يا مبارك

مبارك : مافيش حد بيحب الشرير انا بيحبوني لانجازاتي انا ياما عملت للشعب ده

انا: انت عملت للشعب التاني يا مبارك..شعب احمد عز وجمال وغيره شعب الهاي لايف اللي انت منهم عملت لناسك يا مبارك ونسين ناسنا كنت ونسهم يا مبارك ومكنتش ونسنا..
انت كنت تديهم الاراضي وتسحبها مننا..تديهم المستورد ونشرب احنا مياه المجاري ياخدوا هم المستورد واحنا ناكل الفاكهة الصيني..حتي الفاكهة يا مبارك في منها صيني واحنا بلد الزراعة والصناعة..انت خليت قيمتنا مش صفر يا مبارك لا..انت خليتها تحت الصفر قدام شعوب العالم فكان لازم يجي يوم ونطالب بحقوقنا ولا انت مشوفتش تاريخ الثورات وكنتش تعرف ان ده هييجي وهيحصل حتي لو اتاخر..كل الثورات اتاخرت يا مبارك فرنسية وبلشفية ورومانية وامريكية والمصرية كمان لازم الناس توصل لنقطة الغليان ثم تثور وانت وصلتنا ليها من زمان بس واضح انك مبتقراش التاريخ ولو قريته مبتتعلمش منه حاجة

مبارك : انا مبقراش التاريخ انا بصنعه

انا: مغرور يا مبارك وكلامك مش صحيح..انت مصنعتش اي حاجة لمصر غير حاجات اساسية من طرق وكباري وغيره هي دي انجازات ؟؟ مش مكسوف وانت بتسمع اغاني وطنية علي افتتاح محطة جديدة لمترو انفاق ؟؟ هو ده انجاز يا مبارك ؟؟ او طريق دائري جديد ..هو ده انجاز يا مبارك ؟؟ مبتشوفش فين ماليزيا وكوريا وباقي الدول اللي كانت اقل مننا ؟؟ ليه يا مبارك مبقيناش دولة زي دول ؟؟ ليه حولتنا لاغنياء قوي وشحاتين قوي ؟؟ معندكش حل يرضي جميع الاطراف ؟؟ يبقي انت مش حل يرضي جميع الاطراف

مبارك : انا عملت اللي في وسعي

انا: الكلمة دي كارثة يا مبارك ..لو ده اللي في وسعك فعلا من تزوير وبلطجة ومليارات مهدرة في قطاع الاعلام والصحة والزراعة تبقي كارثة يا مبارك احنا كان مضحوك علينا ودلوقتي الثورة ضحكت ضحكتها الاخيرة والعالم كله بيبارك يا مبارك وانت دلوقتي صفي حسابك بقي مع حاشيتك اما احنا فراحين نتنعم شوية في جنة الديموقراطية اللي انت سفكت دمها يا عم مبارك..انتخابات البلطجة واللامبالاة..خليت كل المصريين ميحطوش اصواتهم ويعتبروا صوتهم بلا قيمة..افقدتنا قيمة صوتنا قدام نفسنا يعني كسرتنا يا مبارك ..وكان لازم نردلك الكسرة اضعاف

مبارك : اطلع برررررة بقولك اخرج من هنا

انا: انا خارج والجزاء من جنس العمل وكما تدين تدان يا مبارك وياريت تعلم كل اصحابك من زعماء فاسدين ان الدور جاي عليهم والدايرة بتدور وبتصفي كل الخونة والظلمة..وعايز اقولك كلمة اخيرة فعلا انا لو كنت رئيس جمهورية وواحد في شعبي واحد بس في شعبي باع كليته من الفقر انا كنت موت نفسي برصاصة ترحمني من العذاب




وخلصت الحوار وحسيت ان كل الناس عايزة تقوله الكلام ده ونفسهم يشوفوه عشان يقولوله رايهم وكلماتهم الاخيرة
بس بنقول ونعبر
واحنا في جو حرية جديد وصوتنا طلع للنور اخيرا
وطار زي طيور الجنة يطلع فوق شوية ويحضننا ع الارض شوية
الحرية حلوة قوي بعد عصر مبارك

Tuesday, February 15, 2011

عــزيزتي صــوفيا..او..فلانتين بلا ذات






ليلة هربت من ارتجالية هوميروس الي طرف لساني..
فكرت كثيرا قبل ان افعل فعلتي ..ولكن من هول الموقف قررت خوض اهواله..
أخرجت مشاعري بيدي من داخل جوفي واسميتها "صوفيا"..!

لا تتعجب مني رجاءا..
ألم تفكر أن تتعافي قليلا من أدميتك..!
أن تكون شيئا غير نفسك ولو حتي الضد ..!
ان تخرج خوفك من قلبك وتجعله أسدا ضريرا تحاول اصطياده بسهام ثباتك..
الم تفكر ان تصبح اشبينا لتراويح الليل البيضاء !
حدثت مشاعري كثيرا في تلك الليلة كما لم اعهد نفسي..

ايا "صوفيا" الغالية..
ليس الموقف "بجماليوني" خالد فأنا لم أصنعك ولكن صنعتيني..
تحررت منك لكي اتنعم في قلبي في منطقة "ربع الحب الخالي" ..
لا احتاج مشاعر اخري الان..
غضب..ضيق..احتياج..سعادة..حزن..
"صوفيا" الغالية..سأقدس روحي اياما واعواما كي أصل لروحي المقدسة..
واسميتك "صوفيا" كي أتصوف في محرابي قليلا دون مشاعر..!

"صوفيا" الغالية..
انا لم اتخلص منك ولكن ارهقتني انسانيتي وادميتي قليلا..
ولا احتاج لخوفي ان يولد وحيدا ولا يلهو مع شقيقه الأمل..فتخلصت منهم جميعا..
انا لم اخونك "صوفيا" ولكني خنت نفسي قليلا حتي ان عدت اليها عدت نادما مطيعا..
وعودة النادم احتياجا وحسرة وفيها من الصدق مالم اجده في عودة المحتاج..
"صوفيا" عيوبك كأي إمرأة وإسمحيلي ان اناديكي ب "إمرأة" ..بعض الأنانية ..
وحينما تصبح مشاعري انانية فكيف انظر للعالم بتجرد واحتواء !
احتاج لأن اري العالم "صوفيا" ..
لم اعد استطيع ان اعشقك وحدك وننام معا في علب السكر وفي بقايا البنفسج..
حرريني "صوفيا"..اعطيني الحرية التي استطيع بها ان اصبح اسيرا لشئ..
واعطيني الثقة التي استطيع بها ان اصبح خائفا من شئ..
واخرجيني من نفسك نفسا ناعما كأطراف الندي برغبة لا برهبة ..

"صوفيا" الغالية..
انا لا اتحدث من منبر العاشق..فمنابر العشاق احترقت داخلي يوم احترقت صورتها..
ولا اتحدث من قصر الواهم..فقصور الاوهام داخلي تصبح يقينا يمحوها يوما بعد يوم..
اتحدث اليكي ذليلا راضيا بحكمك..ان لم ترضي خروجا كريما فلا بأس..
ولكن أرجوك قبليني وارحلي..
اعصري مني الشعر وبعض النثر واقرأيهم حتي اعود اليكي..
انا لا احدثك عن موت صوفيا..بل احدثك عن هروب بصيغة الخلود ..
هروب منك كي نعود اكثر شوقا واكثر استعدادا واكثر انانية..
لا تجعليني داخلك كجرح "صوفيا" بل اجعليني التئام جرح..
جرح يلتئم فوق رأسنا سويا ويضمنا حنانا وحنينا..
اجعليني كقطعة سكر او قرص مخدر كما ابتلعتك مرات كي احصل علي جنسية الملائكة..
وليس للملائكة جنسية "صوفيا"..ولكنك اوهمتيني بذلك..!
احتاج لان اخرج منك لافق العشق الاكبر ..كي اري شموع العالم من بعيد احتفالا بدلا من رؤيتها قلوب تحترق..
امسحيني من مذكراتك صوفيا..
فانا لم اعد طفلك المدلل الذي تروين به الاوراق كل ليلة وتبكين..
اجعليني في ورقة واحدة وكلمة واحدة واكتبي "سيعود "..

وداعا عزيزتي ..ولا تقولي انا متمرد..فأنا لم اتمرد من قبل عليكي..
ولكن قولي اني اسمو الي مرتبة العشق الابدي..
اهرب الي "فلانتين" برحلة سريعة علي سهم كيوبيد كي اتعلم اخر وصاياه..
فلا احتاجك معي "صوفيا"..الرحلة طويلة وشاقة..
وقد اعود بإمرأة اخري..ولكن صدقيني ..انتي حبي الأول..بالفطرة !
فالكل يتحدث عن الحب الاول ولكن الحب الأول ذاتي بحت..
سامحيني "صوفيا" ان لم اشاركك لحظة ميلاد ابننا الجديد "الأمل"..
فسأعود بعد الرحلة مشتاقا اليه مثلك تماما..
وان كان الامل جنينا فالحلم قريبا..
ولكن سارحل الأن..كي اعود اقرب..بتعاليم قدسية اخري..
وداعا "صوفيا"..

وداعا عزيزتي..!




Monday, February 14, 2011

لم ينسـحب الدانتـيل من ميدان التحرير..قصة قصيرة




لم يسبق تلك الليلة احساسا بالحرية..في تلك الليلة بالذات تنفس الهواء البشر مثلما تنفس البشر الهواء ..وتنفستهم جميعا روح الحرية وروح الوطن
كانت "داليا" فتاة عشرينية ليس لها سابق خبرة في الحياة السياسة ولكنها تؤمن ان الله خلقنا كي نبحث عن حريتنا اينما كانت وان فاقد حريته فاقد كبريائه وفاقد عمره بأكمله..
لم تكن تظن ابدا ان الارض في تلك الليلة حبلي بالمفاجأت وعطشانة جدا للعب بمقدرات البشر..لم تكن تظن أن علامات قيامة وطن وعلامات قيامة قلب قد قامت في تلك الليلة بالفعل كانت قصيرة ذات عيون خضراء مستديرة القوام ذات شعر كستنائي قصير كان القاصي والداني منها يجدها قرب كتفه تقريبا ..ترتدي ثياب فتاة مراهقة صغيرة بالنسبة لسنها قليلا..
في تلك الليلة عندما قابلت "عادل" لأول مرة ..لم تكن تعرف ان القدر كان ينظر خلسة من العين السرية لخانة حياتها..كانت تعرف ان الحب مقدر..ولكن لم تظن انه فعل مدبر !
عادل كان من شباب الحركات السياسية يرتدي نظارة ملونة طويل القامة ذو شعر مجعد محني الضهر قليلا ولكنه صالب عود الكرامة والرفعة لبلده..

في اول لقاء بينهما وسط المظاهرات الحاشدة كانت نظرات العيون بينهما تجمع علي كلمتين فقط "حب" و "مصر" ..كأن شعارات الحرية التي كانت تتردد تسمع صداها في عيون عادل وداليا في نفس الوقت تتلون من الوان الطيف وتسبح في قلوبهما فكرة العدالة والمساواة ولا تنسي نصيبك من "الحب "..
وفي حوار دار بينهما قبل ان يسدل الليل ستاره :

عادل : انا بكون سعيد قوي وانا معاكي بجد رغم اني معرفكيش من زمان بس حاسس بكده
داليا: وانا كمان يا عادل ان شاء الله حلمنا هيتحقق وهنحرر الارض دي وهنملا الارض دي حرية وسعادة وعزة
عادل: ده حلمي وحلم كل مصري..زي ما انتي بقيتي حلمي كمان


نظرت داليا الي الارض خجلا.كانت تشعر بما في نفس عادل من مشاعر تجاهها لم تتيقن منها الا في تلك الليلة وخصوصا في الساعات المتأخرة منها قرب الفجر ..كانت داليا تملك قطع من "الدانتيل" تكتب به اسم "مصر" علي الخيمة التي صنعوها الشباب ليبيتوا ليلتهم..وكانت تؤمن جدا بفلسفة "الطبشور" ..نعم "فلسفة الطبشور..ما ترسمه علي الارض تراه وتحلم به وتتمناه..

سهرت ترسم عادل علي الارض في ركن خاص وتزين الصورة بالدانتيل لعله يراها في الصباح كانت المفاجأة التي تحضرها له سرعان ما انتهت نهاية مفزعة..

أصوات تتعالي من كل حدب وصوب..بشر يخرجون كأنهم سكاري من علب الليل وزجاجات الويسكي بلا ضمير ولا انسانيات..كأنهم الأبالسة الذين فروا من سلاسل الشيطان الاعظم تمردا وغضبا..لم تجد داليا الا زجاجات الملتوف في كل مكان تحرق وتأكل الاخضر واليابس..لم تتهاوي الشجاعة في داخلها مثلما تهاوت خيمة من الخيم احتراقا وظلما..
سقطت زجاجة علي الارض بجوار الصورة التي رسمتها لعادل واحترق الدانتيل الابيض وكأن الطبشور يحترق والصورة تنتهي وكأنها تغرق في ظلمات ليل ليس كمثله ليل..

شعرت وكأنها مدمنة الوطن الأولي وكأنها في اعراض الوطن الانسحابية..كانت عيناها مليئة بالضراوة كوجه من وجوه ابطال القصص القصيرة..خدودها النافرة غضبا وعيناها الجاحظتان وكأنها تميز من الغيظ..جرت مسرعة الي بعض الطوب الملقي علي الارض والقتها بشدة وعنف علي "البلطجية" الذين خرجوا من معتقلات ابليس ولم يعودوا الي سيدهم..

القت عليهم الحجارة وقالت "كلاااااب جبنااااااء" ..كان صوتها يهز جدار كل بيت في التحرير حتي وصل الي عادل الذي كان يدافع عن حلمهما وحلم مصر في الصفوف الامامية للمقاومة..وحينما نظر الي صوت داليا كانت الرحمة غائبة في تلك اللحظة..كانت في غفوة قصيرة ليخرج عنفوان الظلم من غيبوبته في هذا المكان المقدس..سقطت علي رأس عادل زجاجة من تلك الزجاجات المشتعلة والقته علي الارض..
صرخت داليا وجرت بسرعة رغبة طفلة في حلوي يوم العيد وبنفس اللهفة ..جرت اليه وامسكت يديه "

داليا: قوم يا عادل هتتعالج وهتخف قوم معايا في مركز علاج ورا تعالي معايا بسرعة
عادل: داليا..مش مهم انا ..انتي اجمل حاجة حصلتلي في حياتي ..وعايز مصر تبقي اجمل حاجة تحصل في الحياة كلها..مصر يا داليا امانة بين اديكوا..
داليا: انت هتحررها معانا يا عادل ..قوم يا عادل مش هاعيش من غيرك ومش هنشوف نور الحرية من غير ما اشوفها من عنيك..
عادل: المهم مصر يا داليا..انتوا الاحرار..انا مجرد شهيد لبلدي عشان بلدي تنطق الشهادة من جديد

بهذه الكلمات التي انهي بها عادل حياته صرخت داليا صرخة مدوية ربما انزعج لها بعض ملائكة السماء المترقبة للحدث..وربما طربوا لها شجنا..
وكأن حلم الطبشور وحلم الدانتيل كان محقا..حين احترق الدانتيل واحترقت صورة الطبشور علي الارض مات عادل..استشهد عادل في وقت احترق حلم الطبشور والدانتيل..
ولهذا كانت داليا مؤمنة تماما بأحلام وتنبؤات الطبشور..

لم تجري ولم تقاوم العدو والبلطجية مرة اخري بل وجدها الجميع تجري في مفاجأة غريبة في الاتجاه المعاكس تماما وترسم بطبشورها صورة غريبة..
في وقت المقاومة جلست داليا ترسم بهستيريا صورة "الرئيس"..ولكن عجبا لماذا ؟
رسمت صورته علي الارض ووقفت منتظرة سقوط الملتوف علي وجهه لعل النبؤة الجديدة تتحقق..لعل حلم عادل يتحقق وينتهي الكابوس ويسقط فرعون..

وظلت تصيح للعدو "انا هناااااا يا جبنااااء" وتصيح باعلي صوت حتي سقطت زجاجة ملتوف بالقرب منها فعلا وعلي الصورة تقريبا واحترق الطبشور الذي يحمل وجه الرئيس كما احترق طبشور عادل..
ابتسمت داليا وقالت "الحمد لله سيتحقق حلم مصر" ..كانت مؤمنة ايمانا عجيبا بلا اسبابا مقنعة بان الطبشور يصنع الاحلام للاطفال والكبار ..الطبشور يصنع المعجزات والاحلام ايضا ..

وسحبت قطعة دانتيل محترقة من اثر عادل وقبلتها كانها تجد فيها رائحة عادل وطعم حرية مصر..
وكان الدانتيل يترنح ما بين حرية مهداة وحياة مسلوبة وقصة حب لم تكتمل كحلم عشاق..
وانتصر الشباب في ميدان التحرير وانتصرت داليا وعاشت واهدوا لمصر الحرية المفقودة
خرجت داليا بنصف قلب..فقدت نصف قلب لعادل وامتلكت نصف قلب للحرية ..حرية مصر الغالية..
وانسحب الناس من المكان تدريجيا بعد ان سقط فرعون وانتهت الحكاية ولكن بقيت قطعة دانتيل بلون الحرية وكأنها شاهدة علي الحدث..

ولم ينسحب الدانتيل..ولم تنسحب بقايا الطبشور..
ولم تنسحب الاحلام من مدامع العيون ومقل البشر..
ولم تنسحب مصر ابدا..بل بقيت ساهرة حالمة..تستنشق الحرية لحنا جميلا وشجنا أصيلا وخمرا جميلا..
جميلة انتي يا حرية..جميلة انتي يا مصر..
جميلة انتي ..حتي مطلع الفجر..جميلة انتي كليلة القدر..وكان تلك الليلة..ليلة قدر مصر..
الله يا حرية الله يا حرية..




Sunday, February 13, 2011

معسكـرات الثـورة المصـرية الخـالدة وكدابين الزفة







الناس في الثورة المصرية الاخيرة افرزت عن معادنها بشدة..وفعلا وقت الازمة بتبان معادن الرجال ناس من دهب وناس من نحاس..
اللي شارك فيها من قلبه ليكلل عمله السياسي من سنوات واللي شارك لتحرير وطنه من الظلم والاستبداد واللي شارك عشان يقول للناس انا شاركت ودول "الاخوة كدابين الزفة"..
او بتوع "عاش الملك مات الملك" وخلاص وهم ماشيين مع الرايجة زي ما بيتقال





المعسكر الاول : شباب مصر عاشق تراب الوطن :


ودول الاكثرية في التحرير وفي كل المحافظات المصرية ..شباب بيخدموا بلدهم وبيحاولوا يحطوها في مكانة احسن او المكانة اللي تستحقها مصر فعلا ..مصر التاريخ والريادة
مصر الاصالة والعراقة واللي بيتكتبلها مستقبل جديد
عملوا بجد.نظموا المظاهرات .عملوا قوايم للمصابين ..حضروا الوف الناس لمساندتهم..كلموا وحشدوا الصحافة والاعلام وكلموا القنوات التليفزيونية وابدوا وجهات نظرهم..
شباب مثقف واعي سياسيا ..يخدم مصر ولو علي حياته..يفدي مصر بقلبه وبعينيه لو لزم الامر..
شباب متيم بمصر..وليس خائف علي مصلحة شخصية او له اهواء معينة او مطامع من الثورة
شباب مثقف وواعي سياسيا وله رؤية حقيقية لوضع بلده علي خريطة العالم الاول..
لا يهم رصاص مطاطي او اي اساليب قمع حكومية قذرة او تضليل اعلامي يخدموا الوطن بالوح والدم وليس شعارات





المعسكر الثاني : "كدابين الزفة".."المتاجرين بعرض مصر " "مخادعي انفسهم " :


دول قلة طبعا لكنهم موجودين ووضحوا جدا في الايام الاخيرة طيب ليه حضروا الثورة اصلا ؟؟ في اسباب كتير :

1- محاولات كاذبة لوضع اي قيمة سياسية لهم وطبعا هي حاولات مضللة وعبثية لانهم لا يفقهون تأويل السياسة اصلا

2- عشان يحكوا للناس زي اللي بيصلي عشان يقول لناس "واللهي انا بصلي"

3- لعب ع البشر ومتاجرة يقعد يقولك اصل انا نزلت وكده وانتوا منزلتوش رغم ان في ييجي 80 كليون منزلوش اصلا

4- القولبة او وضع اطار لنفسهم في العمل السياسي طبعا خدعة وخديعة كبري علي الناس وعلي نفسهم والجاهل من يصدق..فدايما اللي بيعمل حاجة من قلبه مبيعدش يحكي عنها طول اليوم

5- محاولة تحسين الصورة انهم اعداء مصر ويغسلوا دم العار القذر اللي في ايديهم من كتر نجاسات القول وبذائة العمل عن مصر بحضور واهي وعقيم للمظاهرات

6- محاولة الخروج من قمع "حب مصر" لان كل اللي حواليهم حاسين انهم بيحبوا مصر اكتر منهم فييجي يتاجروا ويقولوا لا انا كمان بحب مصر واكتر منك رغم انهم حاضرون لمصالح شخصية عفنة

7- الالتواء والتلون او رسم ملامح شخصية جديدة..احساس بانه بلا قيمة فكرية فيبدأ مرحلة النضج اللي عايز يفرد جناحاتها علي اللي حواليه برائحة جناحات مقززة وعفنة

8- التشرنق..زي دودة القز يبدأ يتشرنق لوضع قيمة او محاولة تحويل الدودة لفراشة ولكن يظل في مرحلة الشرنقة ما بين الدودة والفراشة

9- البذاءة..يظهر لسانهم السليط الخفي بعد المظاهرات والشخصية التي كانت خفية خلف القناعات المتعددة ليقول كل ما كان يدور في خلده ومهاجمة الجميع بلا استثناء لانه حضر مظاهرة لاول مرة في حياته

10- العبث الفكري باستمرار بمن حوله ومحاولة اقناعهم بانه بطل مع ان البطولة قالب يوضع وليس دور يرسم

11- الخروج عن كلمة "جاهل"..كرهوا هؤلاء الاشخاص كلمة جاهل او غير قارئ التي دائما ما تنصب عليهم كصيب من السماء فحاولوا التمرد علي اطرهم المرسومة لهم بالحضور للمظاهرات عشان يقول "لاااا انا بفهم" كذبا وزورا

12- محاولة تصنيف الناس ..لانهم دائما ما يصنفون .."خدوهم بالصوت " يعني..دائما الناس تصنفهم في خانة معينة وتلقي بهم فيها فيحاولون الخروج منها الي قائمة المصنف ..نفسه مرة يصنف حد انت مع او ضد مش طول النهار الناس تصنفه بانه "امعة" ..فحضوره محاولة للتمرد..!

13- "حمل الفوطة" والتذلل لاشخاص اخرين لتكوين جبهة معارضة بلا قضية اصلا ولكن صنع قضية مهمة في عالمهم الواهي الغير مهم

14- فك الحصار الفكري عنهم بمحاولة التحرر من ضعفهم وقلة حيلتهم امام الاخرين

15- محاولة الخروج من قالب الشرذمة الذي فرض عليهم فكريا

16- التقرب للمهمين سياسيا بصور او دلائل علي حضور المظاهرة ليقول بفخر "اخيرا انا سياسي" رغم ان كلمة سياسي مش معناها خالص "نزلت مظاهرة" ولكن فكرهم يهديهم الي هذا

17- محاولة الربط بين حب الوطن ونزول المظاهرة زورا رغم ان مئات من الناقمين علي الوطن حضروا المظاهرات وملايين من عشاق ترابه لم يحضروا

18- عدم القدرة المادية علي تغيير جدار منزل حتي او استقلال مادي فيحاول الخروج من ضعف هذه النقطة لمحاولة التغيير باي شكل او صنعه لانه مل من قلة الحيلة

19- المحاولة من الخروج من سيادة السادة فوقهم الي الخروج بموقف او رأي ومحاولة التسلط

20- محاولة الربط بين دمهم النجس ودم الشهداء الابرار ولكن هيهات بين دم الافاعي ودم الحمائم..





المعسكر الثالث : "قافلة بابا مبارك " .."منافقين النظام" :


قالوا لا لازم مبارك يستمر 6 سنين جاية كمان
مبارك عملكوا ايه ؟؟ ده عمره ما اذي حد..بابا مبارك اعظم رئيس
وكلام اي كلام عن حكم مبارك الفاسد ووزرائه وزبانية النظام الخونة بل خرجوا في مظاهرات عند مصطفي محمود وقالوا "نعم لمبارك "
ياللكارثة
رغم اني لا احجر علي رأي أحد بجهل وزور فلهم ما يحبون ولكن لابد ايضا من التغيير الشامل ي هذا النظام الفاسد
لا الوم احد علي حب مبارك فهذا رأيه الشخصي ولكن فليقل لي ما هي انجازاته فكل ماله كوارث وانجازاته واهية جدا من كباري وانفاق واشياء اساسية في اي دولة وليست انجاز فعلي لنقل مصر الي مكانة دول كانت مثلها او اقل مثل ماليزيا او كوريا
ولماذا تلصقون بمبارك كلمة "بابا" ؟؟ ما الذي فعله هذا الاب لاولاده سوي الذل والامراض وغيرها من تعليم فاسد
لكم رأيكم ولكن انا ضده تماما فافسد نظام جاء الي مصر هو نظام مبارك
او بابا مبارك كما تسمونه انتم
لن احجر علي رايكم بجهل مثل الاخرين الذين خونوكم لانكم تعشقون تراب مبارك
ولكني اقول فقط راجعوا انفسكم دون كتم لحرياتكم او تكميم لافواهكم
بديموقراطية كاملة قولوا انتم نعم وسأقول انا لا والف لا

الجاهل فقط هو من يحجر علي الاراء..والعاقل يسمعها كلها

وتحيا مصر العظيمة ام الدنيا فوق كل الجهلة وصناع الفتن ومثيري البلابل والقلاقل للشهرة.

مبـارك شوب..قريبا






الناس حول العالم بتشتري حاجات غريبة جدا كذكري لمناسبة معينة او كتخليد لشخص معين ويمكن كان اغربها المليونير اللي كان عايز يشتري حوض الاخطبوط بول..!

بل ان في كمان حاجة اغرب من كده ده في واحد كويتي اشتري الحبل اللي كانت ملفوفة فيه لقبة صدام ايام اعدامه كنوع من الشماتة مع ان مافيش شماتة في الموت..وحتي ادوات المطربين وملابسهم زي "صديرية" ماسية لبريتني سبيرز تم بيعها بمبالغ عالية جدا..وكمان بدلة معينة لبسها "الفيس بريسلي" لسه متباعة برضه كن واقف بيها قدام محل اثناء اعداده لاغنية وكانت بدلة شهيرة جدا..

كمان كان في واحد عايز يشتري الحفار اللي نقل وانقذ عمال منجم تشيلي في الفترة الاخيرة كنوع من التخليد للذكري دي اللي تلاحم فيها كل طوائف الشعب ايامها

وواحد تاني راح اشتري الاشعة الي كانت علي مخ "اينشتين" واشتراها وكانت المفارقة ان كانت تمنها اقل من بدلة الفيس بريسلي..تخيلوا مخ اينشتاين ولا بدلة بريسلي؟؟

وواحد راح طلب شراء تابوت الراجل اللي قتل "جون كينيدي" ..
حوالين العالم الناس بتشتري اغرب حاجات في كل مناسبة بيتحدث عنها العالم زي اللي بيشتروا الكورة اللي ضيعت ضربة الجزاء في ماتش ايطاليا والبرازيل ومناسبات رياضية كتير جدا بيحصل فيها شراء الحاجات الغريبة دي
لكن في ظل ظروفنا الحالية تفتكر الناس ممكن تشتري ايه من "مبارك شوب" ؟؟

يعني ايه الي ممكن تشتريه كنوع من اخراج غلك في عصر مبارك او الشماتة فيه او حتي للي بيحبوه كتمجيد ليه ؟؟


ممكن تشتري :


1- جزمة جمال وهو بيدخل الحزب الوطني اول مرة وبياخد منصب عشان ينفخ في الشعب

2- صبغة شعر مبارك العجيبة اللي بيستخدمها من سنين

3- الكنبة اللي قعد عليها احمد عز مع مبارك عشان يتفقوا علي تزوير الانتخابات الاخيرة

4- كرسي مجلس الشعب اللي بيقعد عليه سرور ويقول "موافقون"

5- القاعة اللي قال فيها مبارك اخر كلماته "خليهم يتسلوا"

6- نضارة سوزان وهي بتقرا في كتب مهرجان القاراءة للجميع

7- اللوحات الغير فنية لوزير الثقافة السابق اللي هي نكش فراخ

8- طبلة من طبلات عز وهو بيطبل عليها في فرقته زمان

9- جزء من بدل فرقة رضا اللي كان فيها انس الفقي

10- جزمة علاء مبارك وهو بيلعب خماسي والناس بتسيبه يفوز وخلاص هو يعني في واحد يغلب ابن الريس ؟؟

11- اشتري تمثال للقذافي العجيب هتلاقيه في قصر مبارك ما هم حبايب

12- نضارة صفوت الشريف العجيبة الي كانت بتقرا التقارير بالعكس وتظلم الشعب كله

13- عدد 2 لباس داخلي لبتاع امن مركزي وهو بيتضرب من المتظاهرين ومبلول

14- عدد 2 طوبة من اللي اتحدفت علي عربيات الامن المصري اللي كانت بتضرب الناس

15- المعطف اللي كان لابسه جمال وهو بيقول "زي ما قال الريس منتخب مصر كويس"

16- جزء من ورق مشروع التوريث اللي كان هيتعمل هتلاقيه في درج الريس

17- الماسك اللي كان بيستخدمه الريس وهو بيقول بيناته الاخيرة وبيثبت وشه ببرود

18- الصمغ اللي كان لازق الريس في كرسيه الحاكم



وعلي من يرغب في الشراء التوجه لاقرب مركز مبارك شوب قريبا في الاسواق.

ازاي تبقي شرير كيك.. الجزء الثاني







عايز تبقي شرير عايز نظرتك ترعب اللي حواليك ..انا ممكن اعلمك الشر "علي اساس اني محمود المليجي" ..انا ممكن اطلع منك الشخص الشرير اللي جواك بخطوات بسيطة :



1- لو بتاع الدليفري قالك معلش نسيت اجيب باقي الفلوس بصله بنظرة حادة وقوله زي فيلم بدل فاقد "انا ممكن اعمل ديليت لعيلتك كلها من الدنيا "

2- لو بتاع السوبر ماركت قالك مافيش الشاي اللي انت طالبه وقالك هيجيلي بعد كام يوم قوله برضه من نفس الفيلم " بص يا حاج انا اللي احطه في دماغي الدنيا متسعناش احنا الاتنين "

3- لو حد جه يخرج من بيتك وقالك انا ماشي بصله بشر وقوله زي خالد صالح "هتروح علي فين؟ الأرض دي كلها ملكي "

4- ممكن تقول لابنك وهو خارج يوم الخميس برضه من خالد صالح " اخرج براحتك ..بس لو خرجت برة الإطار اللي راسمهولك..أسحقققك "

5- اما لو عيل من ولاد الجيران خبط عليك وطلع يجري وانت فتحت بسرعة ولقيته قوله زي فيلم اولاد العم " مش هارحمك..هخليك تتمني تشوف الموت بعنيك "

6- طلع محفظتك بحركة بطيئة جوة محل ولو الراجل قالك "انجز" قوله "انا قبل ما اربط جزمتي بحط احتمالات" زي الريس عمر حرب

7- وزي خالد الصاوي قول لواحد في الشارع بيشحت منك "يا بابا انا التعامل معايا زي المتفجرات الغلطة الأولي هي الأخيرة"

8- حاول تتدرب علي ضحكة سعيد عبد الغني في فيلم احنا بتوع الاتوبيس او كمال الشناوي في الكرنك اللي هي ضحكة شريرة مريضة واعملها كتير قدام المرايا

9- لو واحدة طلبت منك في محل تفتحلها الحاجة الساقعة حاول تبقي شرير وافتحها ببقك..بس لو اتعورت قدامها انا مش مسئول هيبقي منظرك زبالة الصراحة وسيس

10- حاول لو بتدخن تشتري سيجار كبير وتقول للناس السيجار ده ملفوف علي اوراك العذاري زي فيلم عادل امام

11- اكتب علي بروفايلك ع الفيس بوك ان افلامك المفضلة "المغتصبون " و "لحم رخيص" و "سوق المتعة"

12- حاول تشوف فيلم شئ من الخوف كتير واتعلم حركات عتريس وانزل الشارع بحصان وبندقية وقول بصوت عالي من النهاردة صوت عتريس بس اللي هيتسمع .بس ماليش دعوة لو شدوك علي مستشفي المجانين

13- خد ستة من اصحابك واعمل زي فيلم عادل امام العظماء السبعة وامشوا ببطئ في الشارع وكل واحد شايل سلاح شكل منهم اللي شايل النبلة

14- سيب حواجبك في كثافة حواجب تامر حسني وشعر صدرك كله برة زي حسين فهمي زمان والبس بنطلون من بتوع سمير صبري القديمة والسيجار في بقك

15- اعمل شعار لنفسك زي مستر اكس مثلا واكتب مستر اكس عمره ما ينتهي ابداااا

16- خلي نغمة موبايلك "عاد ليفترس عاد ليشتعل عاد لينتقم "

17- حاول تقعد مع اطفال كتير من بتوع اليومين دول عشان تعرف كيف تكون البلطجة

18- جيب خمسة ستة متفق معاهم من اصحابك وانزل فيهم ضرب في وسط الشارع عشان كله يكش منك وضرب بقي زي الافلام الهندي باصوات ياااااااع بممممم

19- ممكن لو انت واطي تحط موس في بقك وبلاش المدرسة السيس الجديدة اللي بيحطوا صاعق كهربا..بس لو جيت تتطلع الموس وعورك كله هيعرف انك اصلا سيس متنكر في زي بلطجي

20- حاول تاخد في ايدك رهينة زي فيلم ابراهيم الابيض وفي وسط الشارع تمسكه وتعلم عليه وتقول "اهوووو عايزين كمان اهووو"

21- خلي ليك شعار مميز تختم بيه علي الضحايا بتوعك مثلا تعلم علي مؤخرتهم بسيفك زي زورو

22- ارمي عود الكبريت ببطئ ويبقي المشهد من وراك نار بتولع وانت ماشي بثقة قدام الحريق زي الافلام العربي الهندي او زي واحد من الناس

23- اصبغ حواجبك بلون تاني غير شعرك وياريت لو احمر وتبقي اصلع في نفس الوقت تبقي شرير كيك

24- حد علي جرح في راس ضحيتك بارود وولعه عشان الجرح يلم زي احمد السقا في فيلم الجزيرة

25- افتح شنطتك قدام كمين وارمي اللي فيها وقول "دي حتة حشيش ملناش دعوة بيها" زي احمد زكي

26- املا اوضتك بصورة غسان مطر والمليجي وتوفيق الدقن


وياريت اكون وضحتلكم ازاي تبقي شريك كيك تاني ..