Monday, April 27, 2015

أمل وحياة..حالات لفتت انظار العالم .





قصص الارادة الانسانية لا تنتهي ابدا وزي ما قال همينجواي "الإنسان يمكن هزيمته ولكن لا يمكن قهره" ..الارادة الانسانية تتحدي كل الصعاب وتحولها لدفعة لحياتنا فمالا يقتلني يقويني كما تقول المقولة الشهيرة .

قصص كتير جدا للارادة البشرية من اشهرها هيلين كيلر الاديبة الشهيرة اللي كانت صماء وعمياء ولكنها تحدت العالم كله واصبحت اعملاها ملئ السمع والبصر ودرست لغات كتير جدا.

وفي عدة حالات موجودة قصتها تديك أمل في بكرة وتمدك بروح الحياة ومنها :

1- ليزي فيلاسكويز :

في الأيام دي قصة جديدة للارادة والتحدي والصمود وعدم الخضوع لليأس وهي "ليزي فيلاسكويز" ..قصة ليزي تتلخص في ان عندها متلازمة نادرة اسمها "بروجي" بيخلي منظرها قبيح زي ما قالوا عنها انها "أقبح إمرأة علي وجه الأرض" ..حالتها نادرة جدا ومش موجودة غير عند عدد قليل جدا جدا في العالم بتخلي عندها "تشيخ في الجلد" وأنف حاد  ..
تخيل مدي صدمة ليزي وهي بتبحث في الانترنت وبتلاقي مكتوب عنها انها اقبح إمرأة علي وجه الأرض !! ..أي حد مكانها هيتصدم صدمة كبيرة ويستسلم لكن ليزي كملت حياتها وصمدت وبقت كمان بتواجه خوفها بكل شجاعة وبتلقي محاضرات عن الأمل وعدم الخوف من رأي الناس فيك وكان ليها محاضرة علي موقع "تيد" الشهير عنوانها
how do you define yourself

ازاي انت ممكن تعرف قيمتك وتشوف نفسك ومش مهم رأي الناس فيك ..ازاي ما تستسلمش لاتهاماتهم وهجومهم عليك وتعيش حياتك بكل اصرار ..دي كانت محاضرة ليزي اللي يمكن تكون قبيحة زي ام بيقولوا لكن تملك روح جميلة اسرت العالم بكلماتها واديتهم امل في بكرة افضل والوقوف في وجه الخوف .

ليزي كتبت سيرتها الذاتية وكتبت كتاب تاني اسمه "كن جميلا ..كن أنت" بتتكلم علي ان المظهر مش كل حاجة المهم الجوهر نفسه..جوهر الإنسان اهم من مظهره .



2- سام بيرنز :

سام بيرنز حالة اسمها "بروجيريا" ورغم مظهره الغير معتاد والغريب الا انه كان كأنه تكملة لسلسلة الأمل زي "ليزي" وعمل محاضرة بيتكلم فيها عن السعادة وازاي تقدر تعيش سعيد رغم الظروف الصعبة اللي بيمر بيها ونظرة الناس ليه في كل مكان وحصارهم ليه بنظراتهم ونقدهم الدائم .

وعملوا عن قصته فيلم تسجيلي اسمه "الحياة بالنسبة الي سام" عشان تكون قصته مصدر الهام لناس كتير حول العالم .



3- هارنام كور :

دي بريطانية عندها متلازمة اسمها "مشكلة المبيض المتعدد الأكياس" فبيكون نمو الشعر عندها معدله زائد عن الحد الطبيعي ..عندها دقن كبيرة والناس بدأت تتكلم عنها ويسخروا منها ولكنها قررت انها تخوض المواجهة واصبحت كمان بقوة ارادتها ناشطة لمكافحة التنمر والسخرية في بريطانيا .

بدأ الشعر ينمو عندها من ساعة ما كان عمرها 11 عام وامتد للصدر والذراعين وبتقول جريدة الديلي ميل عن هارنام :


" هارنام قررت التوقف عن ازالة الشعر من وجهها وجسدها بعد تعميدها كأحد اتباع ديانة السيخ التي تحظر قص شعر الجسم، لكنها شعرت بالخجل من لحيتها خلال سنوات مراهقتها وكانت تقوم بازالتها بالشمع مرتين في الأسبوع، وباستخدام معجون وشفرة الحلاقة كما يفعل الرجال.
وأشارت الصحيفة إلى أن الشعر أصبح أكثر كثافة وانتشاراً في وجه هارنام وجسدها مما جعلها ترفض الخروج من المنزل وتفكر بالانتحار، لكنها قررت لاحقاً ارخاء لحيتها وترك الشعر ينمو على صدرها."


4- هايلي اوكينز :

بنت بريطانية عانت من حالة من الشياخ والتقدم في العمر في سن صغيرة جدا ولكنها طلعت في عدد من البرامج للتوعية بالمرض وظهرت في وثائقي بعنوان
Extraordinary Lives
وظهرت كمان في النسخة الاسترالية لبرنامج 60 دقيقة .

توفت هايلي في سن 17 سنة ومازالت قصتها لحد دلوقتي بيتكلم عنها العالم .



حالات كتير جدا رغم السخرية ورغم الانتقاد الا انها بتعافر وبتتمسك بحلمها وبتنجح في النهاية لأن زي ما بتقول الجملة "اليأس خيانة" .

 

Tuesday, April 7, 2015

التنظيم والحياة والعالم





دايما يقولوا ان الست المصرية بتحب ترتب الشقة كتير او حتي لو حاجة اتعوجت تضايق قوي ..ده المفروض ما يكونش بس في الست المصرية دي سنة الكون كله ..واللي بتعمله الست كده صح جدا ..
كل شئ في العالم منظم ماشي بنسق ووتيرة معينة..مش في الدنيا بس كمان في الأخرة..قريت في كتب وعلي الانترنت عن علاقة الاسلام بالتنظيم ان ربنا خلي الحساب نفسه يوم القيامة منظم ..خلي الجنة فيها نظام "ونمارق مصفوفة وزرابي مبثوثة" يعني مش نمارق مرمية علي الارض في شكل يؤذي العين .
وفي أية تانية في القرأن " وجاء ربك والملك صفا صفا" . 
حتي في الصلاة ليها قواعد تحكمها لاحظ الجملة الشهيرة في الجامع عشان تكون الصفوف منظمة "وسدوا الفٌرج" ..
بص لجسمك وانت تعرف مدي الدقة والنظام والإبداع الإلهي .كل شئ محسوب مافيهوش فرصة لغلطة .
الموضوع ليه علاقة بالراحة النفسية كمان وفي اكتر من كتاب عالمي ناقش القضية دوي ومنها كتاب
unstuff your life
للكاتب "اندرو ميلين" ..
مقولة مهمة جدا بتتقال عن التنظيم في كل حاجة وهي
easy on the eye easy on the mind
كل ما يكون الشئ مريح لنظرك يعني منظم ومهندم بيكون كمان مريح لعقلك..العقل نفسه منظم ..في كتب كتير عن تنظيم الافكار منها "كيف تفكر" و "250 مهارة ذهنية" ..وكمان الخرائط الذهنية.. بل ان في دراسات بتقول ان العقل اصلا متقسم بشكل اقرب للخرائط الذهنية بتصنيفات فرعية لكل المواضيع في الحياة.
كل شئ لازم يتخططله بعناية ..رتب كل شئ دولابك سريرك اوضتك ورقك كمبيوترك موبايلك عربيتك مكتبك شغلك ايميلاتك ..لو معملتش كده هتبقي قلقان ومتوتر دايما ..
حتي الفن منظم..الشعر ليه قوافي واوزان وموسيقي وبحور مش فوضي يعني ..الموسيقي ليها مقامات والات واوركسترا وموسيقار ينظم كل نغمة ..الفيلم وهو بيتصور ليه فريق كبيررررر وناس تنظم اموره لحد ما ينتهي ..الحكومات وكل شئ في الدنيا منظم ..ما ينفعش العالم تحكمه فوضي ..
الدين الاسلامي اما بيقول "النظافة من الايمان" ده لوحده معناه نظام..الصوم نظام الصلاة اكبر نظام في العالم..مواعيدها وطريقتها وقواعدها اللي بتحكمها ..الحسنات والسيئات نظام ..الجنة والنار نظام..
تصنيف مكتبة الكونجرس اصبح نظام عالمي يحتذي به لانهم وصلوا لاحسن طريقة تنظم بيها الكتب وتوصلها بسهولة حسب الموضوع والكاتب وكل حاجة.
في مقولة كمان بتقول
fail to plan>>plan to fail
لو فشلت في تخطيطك يبقي بتخطط لفشلك .
كل الدول اللي سبقتنا سبقتنا بالنظاااااااااااااام ..
الإتيكيت نفسه نظام والعادات بتبقي نظام مع الوقت .
الكتابة كمان نظام مش فوضي ..

كان زمان في وهم عن الكتاب انهم كل ما يزيد فوضويتهم بيزيد ابداعهم ;
الحقيقة ان الموضوع ده اتكشفت حقيقته وبتتكشف كل ما يمر وقت والكتاب بيورونا ازاي حياتهم منظمة بالملي وكتاباتهم بيرسموا ليها علي الورق "اشبه بالخريطة الذهنية" .
مؤلفة هاري بوتر الشهيرة طلعت ورق من اللي عندها من اللي كانت بتنظم عليه فصول روايتها وورق تاني عن الكلمات اللي هتقولها علي كل رواية .
جداول ورسومات حتي عند الرسامين مش بس الكتاب عشرات الرسامين بيكتبوا علي مدوناتهم ازاي بيعملوا وينظموا الدفاتر عشان المعارض اللي بيروحوها وتصميم جداول لعدد اللوحات اللي هتتباع وهتترسم خلال فترة قادمة.
نجيب محفوظ كمان كان الوقت عنده مقدس وبيكتب في اوقات هو بحددها وهنا بيضرب بموضوع ووهم كلمة "الوحي" عرض الحائط..الموضوع موهبة انت بتخليه مع الوقت اشبه بالحرفة لما بتصقل الموهبة دي بالتدريب .
الناس كانت متخيلة ان حياة الكتاب العالميين لازم تبقي زي ما بتظهر في بعض الافلام ان هتلاقي السيجارة مرمية والكاس واقع جنبه
طبعا ده كلام فارغ والصور اللي تحت دي من جريدة ديلي ميل بتوريك ازاي الكتاب بيخططوا للروايات بنظام محكم جدا .











النظام لازم يكون طبيعة حياة ..الفوضي عمرها ما هتوصلك لحاجة .