Sunday, November 29, 2009

أعمـل الخيـر وارمـيه في البحــر





أيام كتير تصحي الصبح وتبقي عايز تعمل خير كتير في اليوم ده لكن انا دايما حظي وحش في العملية دي مع ان نيتي صافية يعني كل ما انوي في يوم اعمل خير من أوله لأخره ألاقي حاجات غريبة جدا تخليني تقول
هو عمل الخير غلط ولا ايه يا جدعان حرام عليكم بقي ادوني فرصة

أول يوم نويت فيه اقضيه كله في الخير الشحاتة كانت عايزياني اشيلها من الحنطور وانقلها الرصيف التاني وشيلتها في الشارع وصاحبي طبعا مذهول انه شافني وانا شايلها فعلا كأننا بنرقص باليه
وهي تقريبا كان عندها حوالي 90 سنة

في يوم بقي أسوأ من كده كنت قدام السنترال وبدي الست الي قاعدة وجلبيتها مقطعة جنيه لقيتها بتقولي "ايه ده يا ابني ؟"
قولتلها : "جنيه يا حاجة"

قالتلي: "جنيه؟"

قولتلها: "ايه يا حاجة امال يعني عايزة خمسة ايه الطمع ده ؟ "

قالتلي بعجرفة : "مش عايزة فلوسك خالص"


قولتلها: "يا سلام امال يعني قاعدة مستنية اتوبيس مارينا ؟ "

ودارت مناقشات حامية

وفي النهاية طلعت الحاجة مستنية ينادوا اسمها لأنها بتركب خط تليفون ومش شحاتة اصلا ههههههههههههههههههههههه



يوم تاني لقيت واحد واقف وعايز من الناس فلوس قولتله مالك يا حاج
قالي: مش معايا فلوس اسافر المحفظة ضاعت
قولتله: طيب خد يا حاج واديته اتنين جنيه تمن المواصلات
قالي: لا انا محتاج سبعة جنيه اصلي بركب كذا مواصلة

طيب اقوله ايه ده ؟؟ وبعدين هو انا حظي وحش ليه كده مع الخير ؟؟

خلاص انا شرير .انا ووووووحش

واحد تاني وقفتله ع السكة قالي معاك كوريك للعربية؟
قولتله لا يا حاج انا بطمن عليك بس
قالي: امال وقفت ليه يا ابني؟

هههههههههه هي الناس عاملة كده ليه ؟؟ ده بدل ميشكرني اني كنت خايف عليه ليكون ميت ولا حاجة؟

مرة كمان وصلت الحاجة بشنطتها لحد متوقف تاكسي وبعدين قولتلها انا ماشي بقي يا حاجة عايزة حاجة ؟
قالتلي: طيب استني معايا علي ما التاكسي يقف

يعني انا الحق عليا اني ساعدتك اصلا وانا معرفكيش وشيلتلك الشنطة عايزاني كمان اوقفلك التاكسي واستني معاكي ما اجي احميكي بالمرة ايه الهبل ده
الناس بقت عجيبة يا اخي

ولا انا نيتي فيها حاجة اما بعمل خير مثلا ولا ايه ؟

وواحد تاني اجي اغششه الامتحان بالنص كلمة كلمة يجيب هو امتياز وانا جيد جدا في المادة دي ؟؟؟؟؟؟

أعمل ايه ..وبعدين واحد يقولي اصلك بتعمل الخير ومش بترميه في البحر
يعني ايه ارميه في البحر

دلوقتي انا فهمت معناها ان كل دول عايزين يترموا في البحر فعلا ..الحاجة والشحاتة والراجل وكلهم

ومرة في الصيف اديت لواحد جنبي نص ازازة مية والدنيا حر موت شربها كلها وقالي معلش انا كنت عطشان قوي انا اسف واللهي

ومسبليش بق مية واحد ..طيب ده خير ولا شر يعني ؟



يعني دلوقتي انا هاكون انسان جديد ودي تصرفاتي الجديدة بقي :

أولا: مديش لأي شحات الا اما يكون معاه كارنيه من نقابة الشحاتين ومعتمد منها

ثانيا: اي شحاتة تقولي اشيلها مش هاشيلها "هو المفروض ده ميتكررش اصلا"

ثالثا: الراجل بتاع السبعة جنيه اديله بكس في مراخيره لأنه بجح قوي

رابعا:اللي هيقولي هات مية هاشرب تلات ارباع القزازة الاول واديله بق واحد احتياطي لحسن يشربها كلها

خامسا: اللي هيوقفني ع الطريق هطلعله لساني وهاقوله معايا كوريك ومش هساعدك ااااااااااااااااه

سادسا:الحاجة اللي هتقولي وصلني لتاكسي يا ابني حتي لو عمرها مية وعشرة هاقولها شليها انتي يا حاجة ما انتي بقالك ميت سنة عايشة خايفة يعني تتعبي دلوقتي ههههههههههه

سابعا: معدتش هاعمل خير اصلا لان حظي فيه وحش قوي

Wednesday, November 25, 2009

عروبــة تـــبكي





بعد الأحداث الأخيرة والعلاقات المتصدعة بين الشعبين التي أبكت وأذهلت الجميع لاننا عالم عربي واحد شئنا أم أبينا
ستظل الخريطة تجمعنا لو فرقتنا مشاعرنا البغيضة لبعضنا البعض




يا جزاير دمنا فاير
في كل مدينة وكل ميدان
بتقول ليه عليا يهودي
وف ايدي سبحة وقرأن؟
ببعتلك وردة مسالمة
وبتبعتلي فنون إجرام
لو حتي مكناش أخوة
طب خليها حقوق انسان
مش كارهك بس بحاورك
عايز افهم ليه الغليان ؟
ليه كرهك ليا عصابة
علي عينك والقلب كمان؟
وازاي راح تنكر أصلي
و تاريخي مزلزل أزمان ؟
طب ده انا بتكلم عربي
لا فرنساوي ولا بتنجان
ده الخنجر في ايديك قاتل
مش ابدانا ده قتل كيان
أنا مصر نوبل وأكتوبر
والثورة وشهدا وأحرار..
انا مصر عرق وأصالة
وفراعنة وتاريخ أهرام..
انا مصر ودي الحدوتة
انت اكيد مقريتش زمان
يعني خلاص بقي دي قضيتنا
اننا نكره بعض كمان؟
يعني نسينا العدو التاني
وبنعمل لينا الأكفان؟
يعني العربي هيقتل عربي
والصهيوني حر مصان؟
مش قادر اتخيل نفسي
ماسك خنجر للإسلام
مش قادر افكر فينا
واحنا بنصغر وبنتهان
انا بابكي مش علي بلدي
لأ لعروبتي وللإنسان
نحتج علي جدار عازل
واهو بينا مئات الجداران
انا مسلم لو مش عارف
بلد الأزهر ألف اذان..
طب حتي تقولي يهودي
طب في الاخر مش انسان ؟
يا جزاير حزني مغطي
شمس نهارنا والألحان
دي اغاني حزينة سامعها
ومسخ ضميري بألف لسان
أنا ببكي في كل دقيقة
وانت بتنكر دمعي كمان
مش هاحرق علمك أبدا
مهما حرقتم من أعلام
انا ديني امرني وربي
اني مهينش اخو الإسلام
معلش يا سيدي يهودي
عارف دينه ووطنه كمان
أخلاقي أكيد مش سامحة
اني امسكلك سيف قتال
انا مصري ودي الحدوتة
انت اكيد مقريتش زمان



Monday, November 16, 2009

يا دبــلة الخـــطوبة مــش عقــبالنا كـــلنا









دلوقتي هتشوفول الطرق العصرية لفسخ اي خطوبة لو طرف عايز يفلسع من الليلة دي ويهرب ازاي يخليها تيجي من الطرف التاني وكأن هو مالوش ذنب "نظام تطفيش يعني" :




أولا: كلاسيكي بحت يا ماما :

أول ما تقابل خطيبتك تقولها "سعيدة.. الجو بديع النهاردة"

وتيجي تعاكسها وتقول "يا سلام ايه اللطافة دي" أو "يا ارض احفظي ما عليكي"

او تقولها اغنيلك اغنية ؟
وتروح مغنيلها "جفنه علم الغزل " او "اهو ده اللي صار " أو "متبطل تمشي بحنية ليقوم زلزال"

ولو قالتلك بحبك قولها "انا ممنون قوي ليكي"
وتجيب شعرك علي جنب وتقعد تزق النضارة كل شوية علي عنيك لجوة

وتقولها قابليني في المينا هاوس أو جنينة الأسماك




ثانيا: شعبي أوي يا ماما :

أول ما تخش عليها "قشطة اللوز من حق الكبير يدلع يا قمر"

وتيجي تعاكسها "يا بت جمالك هبشني والهبشة جت في العباية"

واغنيتك الرومانسية ليها تكون "البت البت كيتي"

ولو قالتلك بحبك ترد تقول "كده السطة ده احنا اترستأنا علي سيستم بعض والهوا بينا بقي توماتيكي"

وتحط كيلو جيل علي شعرك وتلزقه زي شعبولا

وتقولها قابليني في الحسين أو في امبابة




ثالثا: مثقف أوي يا ماما :

أول دخلة علي خطيبتك تقولها " يا سلام فعلا النساء من كوكب الزهرة كما قريت في الكتاب"

وتقولها بيت شعر "مفلجة الأنياب لو أن ريقها تداوي به الموتي لقاموا من القبر " وهي هتقولك "مين يا اخويا ؟؟؟ "

ولو بتكلمها في التليفون تقولها "ثانية واحدة هقرالك قصيدة لهوميروس من الالياذة بتعجبني قوي"

وتقولها " انتي سونيتة من سونيتات شكسبير "

وتقابلك طبعا في ساقية الصاوي ..!




رابعا: الفاظه كلها غريبة يا ماما :

أول ميدخل عليها يقولها " أوبة رسيني بقي ع الحوار لان البولة دي عليا"

ويقول "يااه ده انتي جبتي م الاخر وعملتي معايا الصح "

ولو قالتلك بحبك "يا سلام مرهميني بقي وثبتي "

"حبك ليا توتو ني خالص مع اني حبي ليكي واوا اح "

ويقابلوا بعض في اي كباريه..




خامسا: رياضي بشع يا ماما:

"عنيكي زي مثلث برمودا" تقولك "ايه بيخطفوك اوي كده ؟"
تقولها "لأ بيفكروني بتريكة وفلافيو ومتعب"


"كل رمش منك بيحيرني زي ما وائل جمعة محير هجوم الزمالك"

واما تعاكسها "يا ساحرة يا مستديرة انتي يا قمر"

وتقولها "النهاردة يوم تاريخي في حياتي" تقولك "ده اول يوم اتقابلنا فيه؟ "
تقولها "لا دي الذكري التالتة لكاس الامم الافريقية اللي خدناها"

وتتقابلوا في اي استاد طبعا..



Friday, November 13, 2009

هـــي القــلوب ممـــكن تـــموت؟..








هي القلوب ممكن تموت؟..
تسقط مشاعرها لتراب؟..
تبقي خيوط للعنكبوت..
تمثال لذكري من العذاب؟..
ولا القلوب ورقة شجر..
معجونة بالليل والقمر؟..
مكتوب علي شعورها الخلود..
احساسها عاشق للوجود..
محتار قوي..
ليه قلبي مات..
بقي عنده "فوبيا"المعجزات..
كافر بشرع الحب ليه..
طاعن ملامحه بذكريات..
باع دمه لليل والرحيل..
بقي قصة تايهة في كل ليل..
قصة غرام بيقول دجل..
ويقول لنفسه ايه العمل..
خرجني من حالة الجنون..
انا نفسي بين شهقة وسؤال..
وفي كل لحظة بألف حال..
صدري"مصحة"لقلب تاه..
شرب الجنون من كاس حياة..
ليه قلبي مات !..
بقي نوره من شباك رحيل..
بقي غاوي طعم المستحيل..
والدمع غرق نبضته..
والشك محني في خدمته..
خرجني من حالة الجنون..
عيشني حالة كبرياء..
موتني لحظة الاشتياق..
انا حبي ضعف..
غرامي ضعف..
دلوقتي رافض اي ضعف..
واقدر اقول انا قلبي مات..
في شهاب وقع..
علي ارض خضرة مخضرة..
علي ارض واعدة مبشرة..
قال الجميع اتمني خير..
إتمني قلبي امطار وسيل..
يطفي من تلجه الشهاب..
ويطفي من ناره العذاب..
سقط الشهاب قطعة حجر..
من غير غرام ولا منيات..
كان عمره لحظة في يوم ما مات..
وساعتها بس انا قلبي مات..
بايدين عيونها السفاحين..
واماني خضرة ومدبوحين..
يمكن يكون قلبي الشهاب..
ورحيل عيونها كان المطر..
لكن المهم..
لكن الأهم..
أنا في خطر..
ايوه في خطر..



Wednesday, November 11, 2009

الدليــل العـــصري لكـــل بيــت مصـــري




ازاي تعرف ان ابوك نايم في الصالة قدام التليفزيون ؟؟



أولا: لو سمعت صوت اغنية لإيمنيم او جاستن جاي من الصالة

ثانيا: لو سمعت صوت لبرنامج "كنوز مسرحية " او "تياترو" او "اوتار الليل"

ثالثا: لو سمعت صوت اغنية "انا طارق ياض" لطارق عبد الحليم لأن اكيد مافيش اب هيسمعها اصلا

رابعا: لو سمعت صوت برامج المسابقات زي اللي بتييجي علي ميلودي

خامسا: سمعت صوت شخيره





ازاي تقدر تتغلب علي المنبه ومتصحاش بسهولة؟


اولا: متحاولش تظبطه اكتر من مرة علي مواعيد مختلفة هي مرة واحدة بس

ثانيا: حاول قبل ما تنام بليل تضرب حلة كاملة من اكلة معينة ولا ميت منبه هيصحيك

ثالثا: اقفل علي نفسك بالترباس تجنبا لحد يصحيك بمية ولا حاجة "لزوم الاحتياط"

رابعا: خلي جنبك مخدة احتياطي تكتم بيها المنبه لو مش قادر تطفيه

خامسا: وصله بفتلة طويلة لحدعندك وفي طرفها قلم مثبت وهزها تطفي الزرار "محتاجة دقة جامدة"

سادسا: حط مخدة تحت المخدة عشان تدفس راسك وسطهم ومتسمعوش





ازاي تتعامل مع خدمة الانترنت البطيئة :


أولا: تقعد جنب الكبل وتقرأ المعوذتين واية الكرسي

ثانيا: تبص للمراية وتقعد تقول ميت مرة "النت جميل انا اللي بستهبل "

ثالثا: اثناء التحميل والتصفح البطئ اقعد مبتسم وتظاهر ان النت صاروخي وقول "ياااه ملحقتش اقرا الصفحة دي "

رابعا: بوس الكابل كل يوم الصبح قبل ما تخش ع النت

خامسا: كل ما صفحة تحمل اجري في الشقة واسجد زي منتخب مصر

سادسا: في انتظار التحميل اقعد اصطاد سمك بلعبة السمك اللي بتلف دي بالبطارية ومعاك صنارة صغيرة

سابعا: كلم خدمة العملاء وقولهم "ايه النت العالمي ده انا مش مصدق يا جماعة واللهي " وامدح فيهم لحد ما تصدق نفسك

ثامنا: حسس علي الراوتر بحنية وبوس لمبته بحنان







Thursday, November 5, 2009

لـغــة الجـسـد ..المـصرية وبــس



دايما اسمع عن كلمة "بدي لانجويتش"..لغة الجسد ..وازاي ممكن نعبر بيها عن حاجات كتير جوانا ولكن عندنا لقيت لغة الجسد دي مختلفة قوي عن برة ويمكن عن العالم كله في بعض المناطق في مصر
يمكن زي الأرياف أو اماكن شعبية شوية


اللغة الأولي : تفتفة في الكلام :


بيكون الحوار شغال بينكم وفجأة الحوار ياخد مجري تاني خالص ومن فرط حماسه عايز يوصلك احساسه الي جواك فبيرسلك رسالات خاصة بلغة الجسد الي وشك وعينك وكلك
عن طريق التفتفة في كلامه ..وساعات بتحمل معاني الفة وحب ..
لأن الحوار بيكون اشبه برسالة اتكتبت علي وشك
!



اللغة التانية: لغة الايد :


وده بيكون واحد طول ما هو بيكلمك اصلا عمال يشاورلك بايده وساعات يهز كتفك لو التفت شمال ولا حاجة وانت عايز تخلع منه وهو محاصرك بايده ناقص يقرص عليك برجله كمان
واما ييجي يوصفلك مكان يرسمهولك علي ايدك بصابعه كده وكل حياته بلغة الايد ولو قلتله نكتة وعجبته يقوم يخبط فيك ويهريك خبط في كتفك أكنها مجاملة وهو ايده تقيلة اصلا




اللغة التالتة : لغات غريبة في الشارع :


يعني ليه دايما البنت بتعدل جيبتها وهي بتيجي تقعد مش فاهم

وبرضه البنات حاضنة الاكلسير دايما وهم رايحين الدرس هل ده دليل انها لنت يعني ولا ايه مش فاهم برضه؟

والراجل اللي تلاقيه رافع الجلابية لفوق بايده طيب ما تقصرها يا حاج وبلاش تبلينا بام المنظر ده

وليه الناس بتتف من شباك العربية هل دي رسالة للغة جسد معينة انه ممنون للدنيا يعني وسعيد ولا ايه؟

والستات في الارياف بيحبوا يعينوا الفلوس في صدرهم مع ان في جيب في الجلابية اللي لابسينها ولا الفلوس بتحب المكان ده ولا ايه ؟

وليه العيال في بعض المناطق بتجري ملط في الشارع وحافيين وبيلعبوا بالكزوزة زي ما بيسموها ..مع اننا ممكن ندعم الاسكوتر ليهم وللعائلات الفقيرة

وليه دايما سواق الميكروباص كل اغانيه هابطة ..هل هو تمرد بس هو عارف الاغاني المحترمة ولا هي كل اغانيه كده ومش معترف بالاغاني التانية


مرة زمان اديت لسواق ميكروباص شريط ماجدة الرومي يشغله سمع تلات دقايق قال ايه يا باشا ده انت جايبلي شريط اجنبي ؟ولا عربي مكسر ده ولا ايه ؟
ههههههههه طبعا هو مش متخيل ان في ناس بتغني كده اصلا او ان المطربين دول المفروض يموتوا من اجل حياة سعد الصغير ومصطفي كامل




اللغة الرابعة : اصوات غريبة في المولات:

ساعات تدخل حمام المول المفروض تبقي قاعد مستريح وكده لا تسمع اللي واقف ع الحوض بيعمل اصوات غريبة ببقه وكأنه في مرحاض عمومي يا عم انت جاي منين بس ده مكان محترم
يعني واحد ييجي يسألني في المول "هي فين المبولة لو سمحت؟" بالذمة ده ام سؤال يتسأل في مول محترم ..
واتنين يقفوا قدام محل "اسبينس" واحد يقول للتاني "سيب ميتين ام الشيكولاتة "
كلام غريب جدا المفروض نتحكم في اصواتنا وحركاتنا في اماكن معينة مينفعش فيها الكلام ده.




اللغة الخامسة : الاصوات التي يفهمها ناس معينة :


يعني البياعين اللي بيمشوا في الشارع بيعملوا علامات معينة يفهمها الناس اللي عايزة السلعة دي والحكاية تكون محتاجة ترجمة اصلا
زي بتاع غزل البنات ليه دايما بيزمر مع انه ممكن يقول "غزل البننننننننننننننات" بصوت عالي
وبتاع الانابيب دايما يخبط مع انه ممكن يقول ويغني زي ريكو "أنابييييييييييييييب "
واصوات تانية ملهاش اي معني زي الراجل اللي بيقول "اي حاجة قديمة للبيع " بيقولها بطريقة مريخية بحتة عمري ما سمعت صوته واضح
وواحد يقول "اسن السكينة واسن المقص" بصوت مقزز جدا ومخارج الحروف مش واضحة تماما عنده ومش مفهومة
وواحد يقولك "البصل الفلاحي" ثم جملة تانية مش فاهمها كنت بسمعها "الدهدهين الدهداهي" واهي اي حاجة ع الوزن ولسه لحد دلوقتي مش عارف هو بيقول ايه بعد الجملة الاولي

طيب ليه الغموض ده متجيبوا ميكرفون وقولوا سلعتكم وخلي الموضوع واضح او ليه اصلا يتم بيع سلعة في الشارع ما في اماكن معينة وخلاص ..




بلد غريبة جدا . حد يترجم يا جدعان ..








Tuesday, November 3, 2009

الكــــرت ع القفـــا




من يدقق في بواطن الامور والسيرورة الفكرية لبعض الناس وأعماق الوعي فيهم وبوتقة الاحداث الحميمة داخلهم يجد أن هناك فرقا جوهريا بين "الضرب ع القفا" و "الكرت ع القفا"
"حكمة لجبران مش خليل جبران "





في مصر في انواع كتيرة قوي من الكرت ع القفا للمستهلك ولكن المستهلك دايما بيبقي فاهمها وقارشها لكن خلاص مسلم بيها كأمر واقع وحدث يومي هنعمل ايه ؟
وبعضهم لسه مش عارف وبيتنصب عليه لأن احنا فعلا ماعندناش حاجة اسمها حقوق المستهلك حتي جمعية حماية المستهلك دي مبتعملش حاجة في حالات كتيرة لانها هتفتش علي ايه ولا ايه؟


أول نوع للتجار والكرت ع القفا هو : بائع الفاكهة :


يستخدم مصطلحات مثل "دي طازة"
"دي بقي نوع لوكس"


وعندما يقول تاجر الفاكهة "يا بيه انا عندي نوعين نوع عادي ونوع لوكس"
تعرف انه ماعندوش غير نوع عادي وبيستعبطك عشان فلوس زيادة لنفس السلعة ويقعد يقولك كلام فارغ زي
"شوف قشرة دي وقشرة دي يا بيه ..اصل دي لوكس"

ودايما بيستعمل للحبايب والزباين عنده الفاظ ثابتة "منور الدنيا كلها يا باشا" "انت تأمرني " "احسن بضاعة للباشا من المخزن" "دوق كده يا باشا ..دي معسلة قوي عشانك مخصوص"

وطبعا كله ضحك ع الدقون لأنها ولا معسلة ولا هي مخصوص دي مشاع لكل الناس مش بعيد تكون متاكلة قبل كده .



النوع الثاني: الساعاتي:

مصطلحاته "بطارية ياباني اصلي"
"المينا متربة نفختهالك ولمعتها"


واول ما يقولك "عندي نوعين بطارية نوع بتلاتة ونوع بستة اصلي " تعرف انه معندوش غير نوع واحد وبجنيه ونص بس !

لأنه لو شاف واحد شكله فقير شوية هيقوله عندي نوعين نوع بجنيه ونص ونوع بتلاتة فيبقي مش هيخسر ابدا.

ولو قال كلمة "سيبهالي عشان اظبطها" ..يبقي فعلا هيظبطها وهياخد المينا والبطارية الاصلي ويحطلك واحدة طبق الأصل وعليه العوض.

النوع الثالث: بياع في محل ملابس :

مصطلحاته
"يا باشا جميلة جدا عليك "

"مقاسك بالظبط"

"كأنها متفصلة عشانك"

واول ميلاقي واحد تخين يقول "متقلقش التي شيرت هيريح"
ولو رفيع "متقلقش غسلة وبيكش وهيبقي ماسك عليك كمان.

وساعات يبقي كرشك باين من التي شيرت يقولك "يا سلام راسم جسمك بالظبط"
وساعة دفع الحساب "يقولك عشان خاطرك ب" وهو ميعرفنيش اصلا يبقي تنقص عن السعر التلت او النص كمان

ولو قلك "الأوسع هيبقي واسع عليك اوي" يبقي هو معندوش اصلا وعايز يخلص م الحتة دي بسرعة




النوع الرابع :بائع في محل الكترونيات :

مصطلحاته

"دي احدث نوع لسه نازل"

"كل اللي خدوه بيشكروا فيه وفي امكانياته"

ولو سألته عن ديفيدي مثلا هل بيدعم صيغة معينة للفيديو وقالك "يا باشا ده بيعمل كل حاجة" تعرف انه مش فاهم ايه الجهاز ده اصلا

يعني ايه بيعمل كل حاجة؟؟ يعني ممكن اقعد جنبه واشكيله همي مثلا ؟؟



اما الانواع التانية للنصب والضحك علي الزبون في الشارع بقي فكذا نوع :

**بياع تذاكر الصم والبكم بيعمل نفسه اخرس وهو بيتكلم اول ما يسيبك علطول وظبطته قبل كده بيتكلم وواجهته وقعد يستعبط وقالي "امممممممممممممممم " قال يعني نطق حرفين واتخرس تاني

**الست الشحاتة المليونيرة اللي بنت عمارتين قبل كده ولسه بتشحت وبتدعيلك

**الراجل اللي في الشارع اللي بيقولك محفظته ضاعت وعايز فلوس عشان يركب مواصلات ويسافر بلده وهوبيقول لكل البشر نفس الكلام

**بتوع جمع التبرعات اللي بيلموا من البيوت قال يعني الراجل خيري قوي ..واحد مرة كان بيلم فلوس لفلسطين قولتله "هم اليهود دخلوا فلسطين امتي" قالي "مش عارف" قولتله" عشان انت نصاب كبير"

**حتي بتاع البنزين لو مبصتش عليه بينصب في عدد الليترات وياخد فلوس اكتر في جيبه

وطبعا النصب الرفيع المستوي زي :


**تجيب تذكرة لحفلة وتقعد في كرسي معفن مع انها حفلة نضيفة

**اكياس قلبظ اللي مكتوب عليها خالي من المواد الحافظة وصحي ومفيد كمان

**واللبن اللي بيقعد عشرين يوم في التلاجة وخالي من المواد الحافظة

**ونصب الحكومة طول اليوم في اي تصريح طبعا



ربنا يحمينا من الكرت ع القفا