Saturday, June 27, 2009

شخصين في بــعض






حضن النسيم..
قلبه انفطر..
وكأنه ماشي علي الهوي..
او قلبه غرقان في الهوي..
او شم من عطر القمر..
جاب القلم ..ساب القلم
كتب الرسالة من الألم..
يكتب لمين؟
يشكي لمين؟
لو نام علي صدر الوجع..
وزمانه فاقد للسمع..
صرخ وقال..
قلبي العزيز..
بعد التحية..
اخترت ليه ابقي الضحية؟..
متحني من صرخة عدم..
اخترت ليه ابقي الندم؟..
موتني..حنطتني..
ورمي القلم..
عيط كتير ..
وضحك كتير..
في اللحظة كان صعلوك أمير..
وشرب في كاس حلم وسهر..
كان الغرام..
مواله من صبحه لمساه..
لو راح لفين هيروح معاه..
معملش في حسابه الرحيل..
معرفش ايه معني الرحيل..
وصرخت أنا..
للناس هنا..
للناس هناك..
هتجننوه..
يا ناس حرام هتجننوه..
عايزينه يضحك من جديد؟..
عايزينه في الحب الجديد؟..
لأ هو كان عاشق قوي..
علشان كده جرحه القوي..
قاتل ضلوعه..
سايب راياته ما بين دموعه..
حسوه بقي او افهموه..
يا اما تنسوه ترحلوه..
بس اعرفوا ان الهوي ..
بقي لون عينيه..
ونسيم وراحل بين ايديه..
بقي له جنون حضرة ومقام..
وتشوفوا تتغطي بسلام..
وبقي الولي..
من أولياء الهجر والدمع البرئ..
من أولياء الحب والنار والحريق..
عاش في التابوت..
وسنين طويلة يقوم.. يموت..
وغرامه عاش..
وساعات كتيرة بهاجمه اه..
لكن هيفضل فيا اه..
جوايا هفضل ارفضه..
لحد مايموت من جديد..
واعود لنفسي سعيد وحيد..


Monday, June 22, 2009

كبوة عمرو اديب الكبري

كانت حلقة عمرو اديب امبارح صدمة حقيقية..انا اتفزعت مش من اللي مكتوب عن المنتخب ولكن من اسلوب الحوار والسباب الرسمي في الحلقة
عمرو اديب لم يحترم كبير ولا صغير والمشكلة الاكبر انه كان بيتكلم علي لسان شعب مصر وشعب مصر برئ من الكلام الفارغ اللي قاله انبارح..بصراحة شعبية عمرو اديب في الحلقة دي تقريبا انخفضت 40 في المية ان مكانش اكتر لأنه جرح في قيمة حقيقية ولأول مرة بدون اي دليل فكان موقفه عاري تماما..دلوقتي قدامه حل من اتنين لأما يعتذر ليكمل ويعتبرها تحدي ويجيب التقارير ونشوف من اللاعبين دول رغم اننا متأكدين ان ده تلفيق من جنوب افريقيا للاعبي منتخبنا ..

والكلام الأغرب اللي قاله الفنان هاني شاكر برضه وكانهم متأكدين خلاص ان ده حصل وبيعلقوا علي نتيجته ..فين يا عمرو اديب ايام مكنت بتقول علطول ان من غير دليل والرأي والرأي الأخر الحلقة تبقي فشنك..فعلا كانت حلقة فشنك ع الأخر ..انا حزين بجد علي غلطة هذا الاعلامي الذي احترمه وكتير مننا زعلانين علي اللي اتقال انبارح مقدرين موقف زوجات اللاعبين وموقف اهاليهم اما يسمعوا كلام زي ده ..
مش ممكن يا عمرو تقف مع صحف جنوب افريقية ضد منتخب بلدك اللي كنت لسه بتشيد بيه مش ممكن النفاق ده ..
ومش ممكن المهزلة دي تكمل فعلا لنت لازم تعتذر واعتذار رسمي ولمدة نص ساعة علي الأقل..
واللي بوظ موقف عمرو بقي النهاردة موضوع المنتخب البرازيلي لأن هو كمان اتعرض للسرقة فضاعت مصداقية الصحف الافريقية وضاعت مصداقية عمرو مع هذا الخبر الجديد..

يا خسارة يا عمرو متخيلتش انها تيجي منك انت كواحد من انجح اعلاميين القرن في العالم العربي..
وكانت اللعبين في حالة مزرية جدا وكانوا بيتنقلوا بين البرامج كلها عشان يشتكوا عمرو اديب والبرامج طبعا لقت الفرصة الذهبية للشماتة في عمرو والحرب القذرة الدايرة بين الاعلام العربي الرياضي والسياسي بالكامل ..
وكان المذيعيين مبيصدقوا وقعة لزميلهم وهات يا شماتة..

دلوقتي عمرو في موقف وحش بجد وهيترفع عليه بلاغات لو ما اعتذرش لكن دي اكيد كبوة وهيرجع البرنامج تاني زي ما اتعودنا عليه وعلي نجاحه..ويا جماعة مش منتخب مصر اللي يعمل كده

Tuesday, June 16, 2009

متتالية الجنون

مين اللي قال؟
ان الجنون مش فكرتين؟
فكرة توصلنا لحل..
ننصح قلوبنا بكلمتين..
وفكرة تنسي الحل..
وساعتها نبكي بدمعتين..
ولو الجنون جواك..
لقي نص عمره معاك..
يكبر طفل الجنون..
يبقي شاب الجنون..
لكن جنون محكوم..
أمر الجنون محسوم..
بالعقل والنية..
لو كان جنونك دار..
او كان مالوش دية..
حتي الجنون له عقل..
كل الجنون له عقل..
عقل الجنون الحب..
مع انه مش عاقل..
مسكين اوي جنونك..
لو كان غرامك عقل..
مسكين اوي جنونك..
نفضل نروح ونغيب ..
بين الجنون والشيب..
والشعر موصوفله..
حبة هدوء ابيض..
شعر الحكيم الأبيض..
لكن في حكم الغيب..
والحكمة رحالة..
بين القلوب والفكر..
للحكمة ميت حالة..
للحكمة عكازها..
لو مين يكون عازها..
هتروحله مكسوفة..
زي النسيم والحب..
من قلب عاشق قلب..
والقلب شاب دمه..
غارق في صوت همه..
ويقول عليه الحب..
ملعون ابو ده حب..
يضربله كف بكف..
مش مرة لكن الف..
ويقدم النية..
لو كان غرامك شهد..
متشربوش كله..
علي راي من قاله..
واللي كمان دله..
علي الجنون تاني..
فكرة جنون بيحب..
فكرة جنون تهجر..
فكرة جنون بتطير..
فكرة جنون ترحل..
لكن الجنون اتنين..
ادم جنون الحب..
حوا الجنون العمر..


Friday, June 5, 2009

الشاب النايتي

الشاب النايتي شخصية مصرية اصيلة من ايام الفراعنة كان في ايامهم فراعنة نايتي برضه بس مكانش له علامات مميزة ولكن دلوقتي بانت ملامحه
وقدرنا بفضل التكنولوجيا الحديثة اكتشاف ملامح وصفات هذا الشاب ومن بعض الحكم التي تقال في مصر عن الشاب النايتي:

"شاب ديدي بيروح وييجي"
"بتاع مامي وداداي بيتعشي مربي يوماتي"

وغيرها من الأقوال المأثورة ..




وعلاماته كالتالي:


العلامة الأولي:

برنامجه المفضل "عيون بيروت"..وغالبا بيكون حافظ اسامي المذيعات زي ريتا وغيرها وبيهتم كمان بتسريحة شعرهم وبيتكلم عن درجة الروج اللي بيحطوه كمان

العلامة التانية:

يتضايق لو الفيس بوك قطع يومين..وتلاحظ انه بيكون حزين جدا من غير فيس بوك وكانه فقد شخص عزيز عليه لو كان في تصليحات في الموقع.

العلامة التالتة:

يقرأ دائما جدول السعرات الحرارية..ويهتم ببرامج الرجيم والتخسيس جدا وكمان يكلمهم علي الهوا عشان ياخد وصفة للرجيم

العلامة الرابعة:

يعيط قدام المسلسلات التركي..ويقعد ماسك مناديل قدام الحلقة الاخيرة ويقول "لميس..اهئ اهي..لميس.."

العلامة الخامسة:

لسه بيتابع مسلسل الجرئ والجميلات من سنين

العلامة السادسة:

عنده رف لمستحضرات العناية بالبشرة

العلامة السابعة:

يتأخر في مواعيده عن اصحابه عشان بيوضب نفسه

العلامة الثامنة:

بيحب مريام فارس ونانسي عجرم وهيفاء وهبي مع بعض

العلامة التاسعة:

لسه بيسمع كلام ابراهيم الفقي وامثاله

العلامة العاشرة:

لو مافيش ريموت جنبه ميقومش يقلب المحطة

العلامة حداشر:

ميقدرش ياكل الاكل الا لو كان متسخن وعليه بهاراته وحاجته

العلامة الثانية عشر:

متابع كل اسعار التخفيضات بتاعة كارفور في الجرايد

العلامة الثالثة عشر:

مهتم جدا ببناء جسمه وعضلات صدره عشان يبقي جذاب

العلامة الرابعة عشر:

ميقدرش يعيش من غير تكييف في البيت او العربية

العلامة الخامسة عشر:

يفرح جدا اما يعرف ان منيو الخمسة لسه بخمسة

العلامة السادسة عشر:

معظم كلامه عن الجنس الأخر

العلامة السابعة عشر:

بيقول كلمة "حد جميل " كتير في كلامه

العلامة الثامنة عشر:

لسه بيعلق صور المطربين علي الحيطة

العلامة التاسعة عشر:

ياخد وقت كتير عشان ينقي هدومه من المحل بحجة الشياكة وفي الاخر بيبجيب حاجة نايتي

العلامة العشرين:

بيقرا العلامات اللي انا كاتبها دي لحد النهاية

العلامة الواحد وعشرين:

بيلبس سلسلة واما تيجي تناقشه يقولك انت مش فاهم او ان هو مش تيييييييييت ولكنها تحضر وكده يعني

العلامة الواحد وعشرين:

لا يفارقه اللبان بأنواعه

العلامة الثانية والعشرين:

الشاي اللي بيشربه بيسهره لأخر الليل

العلامة الثالثة والعشرين:

بيتفرج علي برنامج مفيدة شيحة

العلامة الرابعة والعشرين:

ميعرفش ياكل من غير كاتشب او دايما يقول في حاجة ناقصة في الاكل

العلامة الخامسة والعشرين:

مبيشربش بريل

العلامة السادسة والعشرين:

كل خمس دقايق يمسك الموبايل من جنبه من غير ما يعمل فيه حاجة

العلامة السابعة والعشرين:

بيطلع الدور التاني بالأسانسير

العلامة الثامنة والعشرين:

لسه بينزل الشارع مخصوص عشان يعاكس

العلامة التاسعة والعشرين:

بيقرا جرنان "روز اليوسف" اليومي

العلامة الثلاثون:

بيقول "ليه يا جماعة والله انتوا ظالمين الحكومة "

العلامة الواحد والثلاثون:

بيقول ان الريس ده هو افضل واحد مسك البلد




وعلي من يجد في نفسه اكثر من خمس علامات يتوجه فورا لقسم مكافحة الشباب النايتي في دريم بارك وشكرا







Monday, June 1, 2009

معاك كريك يا ابني؟








انت ايه اللي جابك هنا؟".."مش شايف اليافطة يا اعمي؟"..."يا حمااااااار"

جمل كتير بنسمعها علي الطريق مش لازم تكون لينا بس بتكون احيانا موجهة لينا ومنعرفش نعمل ايه والراجل ده او الست دي بيزعقوا علي ايه اساسا؟
بضايق اوي من الناس اللي مبتخدش بالها من السبب الرئيسي للخطأ ..يعني لو في عربية نقل واقفة قدامي اللي ورا بيزمرلي جامد ليه انا مالي؟ متنزل تحركه يا عم ..وعمال ينور ويخبط في الدركسيون وكأن انا واقف بمزاجي..


من كام يوم كان في واحدة واقفة جنب عربيتها وانا في ارض محفورة كلها طوب عشان بيرصفوا الطريق يعني مش ذنبي اي حاجة ..المهم جيت اتحرك بالعربية
طبعا الكاوتش قرص علي شوية طوب صغير فخبط في عربيتها وانا ماليش اي ذنب باي حاجة
لقيتها بتقولي :"انت هتمشي كده ببساطة؟؟"
طبعا اتغظت منها جدا لأني معملتش حاجة اصلا الطريق مكسور فقولتلها : "لأ هامشي بإستغراب..هأمشي واسيب ورايا علامة تعجب المرة الجاية !!!!"

طبعا هي ممكن تفهم اني بلطجي بقي وبتاع لكن الحقيقة اني بتضايق اوي من القاء اللوم علي واحد مش ذنبه كسر الطريق ولا ذنبه ان الطوبة لزقت في الكاوتش
عشان كده اما بيبقي حد ماشي قدامي بطئ بطريقة مستفزة لازم اعرف الاول السبب قبل مزمر بغباء لأنه يمكن يكون معذور قدامه عربية نقل ولا تك تك حتي ..


وواحد عايز يركن في مكانك بقي ييجي فجأة يقولك "انا شوفت المكان ده قبلك"
طبعا لازم تقوله "انا سعيد بالصدفة دي معقول احنا الاتنين شفناه انا في منتهي السعادة واللهي ده شرف ليا"..
يعني هي الحكاية عافية؟ مكان ايه اللي شوفته قبلي ؟؟ حد قالك اننا حطينا يافطة مكتوب عليها "انما الركنات بالنيات "..
تصرفات عجيبة جدا من الناس ويقولك البلد زحمة ليه علطول ما هو بسبب التصرفات الغلط الكتير اللي بتحصل ومش عارفين سببها..

وبتاع التاكسي يقعد يربط منديل حوالين دماغه ويسب في الحكومة وفي البلد بحالها..وبتاع النقل معاه فوق براد شاي وقاعد يصب ويرمي علينا رمله..عميتنا يا عم برملك علي ما توصل هتكون العربية فاضية هتوصل ايه بقي ما الرمل كله ع الطريق؟..


وساعات ابقي ماشي علي طريق كله تراب اصلا واللي جنبي يتخانق معايا من الشباك ويقولي "ايه يا عم غرقتنا تراب"
طيب بالذمة اقوله ايه ده بس "حاضر يا عم الحاج المرة الجاية هاسوق برجلي واخرج جسمي برة واقعد انضف قزاز عربيتك من التراب..انا اسف"
بس اخاف اقوله كده لحسن يقولي زي بوحة "وانت هتسوق كده وانت نايم كأنك طاير؟"


طيب العساكر اللي واقفة ع الطريق علطول عايزة توصيلة ..هم بيشتغلوا فين ولا راحين فين ولا جايين منين محدش عارف كل يوم تحس انها ناس مختلفة وخط سير مختلف..


واللي عايزين مساعدات ع الطريق مرة وقفت لواحد منهم
فقالي "معاك كريك يا ابني؟"
قولتله "لا والله يا حاج"
قالي "امال وقفت ليه؟"
تصدق يا حاج انت رخم رخامة الابل انا الحق عليا اني وقفت اساسا قولت ليكون الراجل تعبان ولا حاجة لانه كان شكله نايم ع الدركسيون ومبيقدرش المساعدة
المهم قالي"طيب متشوف حد كده معاه"
قولتله "لا يا حاج انا ماشي بقي"هههههههه

لانه رخم عليا بصراحة وبعدين طلع بصحته مش تعبان ولا حاجة ده كان بيجيب حاجة وموطي بس..
وياريت الحكومة تعملنا يافطة مرسوم عليها عضلات نعرف منها ان دي منطقة كسر وغرز وفتونة عشان مندخلش واحنا مش عارفين
اليافطة تبقي علي شكل عضلات ومكتوب عليها شعار "بدراعي يبقي الشارع بتاعي"..


وبعض النصايح لتجنب المشاكل اثناء القيادة كالتالي :

* مضغ اللبان لانه يساعد علي مسك الاعصاب والابتسام ببرود في وجه من يشتم من الزجاج

*يا ريت لو تفتح التكييف وتقفل الزجاج اساسا وتعلي الكاسيت عشان اللي يشتم يشتم..

*لو في عسكري هيشاورلك عشان الحزام وانت شايفه هيرفع ايده اعمل عبيط ووطي هات حاجة من التابلوه علي ما الطريق يمشي ..

*اللي بيشتمك من الزجاج ممكن تهديله بوسة بايدك في الهوا او تبتسمله وانت بتاكل اللبانة فده بيخليه يولع وودانه توصل في احمرارها للذروة "عن تجربة"

*بالنسبة للبنات اللي بتشتم من الزجاج برضه لو قالتلك "انت بارد؟" قولها " وانتي فاترة" فهذا يجعلها في قمة الغليان النفسي "عن تجربة"

*تعلم الزمامير اللي علي شكل شتايم لاهدائها اهداء رقيق للنقل والتوك توك

*لو حد زمرلك بشدة وراك بطريقة مخيفة افتح الباب وانزل كانك هتتخانق معاه وفجأة اربط رباط جزمتك واركب تاني وتجاهله وده بيوصله لدرجة الموت "عن تجربة"

*افضل طريقة لحرق اعصاب اللي بينورك قوي وراك انك تبصله في المراية وتضحك وبعدين تقلب المراية لفوق وتبطئ اكتر .."حركة قاتلة ..عن تجربة"


وياريت اكون افادتكم ازاي تبقوا في قمة البرود علي الطريق وتتجاهلوا الناس المزعجة..سلام

خمـــس أنــــواع وصــلحه


خمس انواع:

الشعب المصري خمسة انواع معروفة ومفهومة مش زي باقي الشعوب التانية وفي اي قضية يحب يقول رايه لكن ساعات الرأي ده بيكون علي نمط واحد حسب طبيعة الشخص ده
يعني مثلا في قضية الأزمة العالمية هتلاقي بالظبط الأراء دي:

المتفائل: يا عم دي بتحصل كل فترة وهتنحل اكيد ان شاء الله ودي مش اول مرة يعني
العبيط : يااااا كويس واللهي بقالنا كتير مشوفناش ازمة عالمية يا سلام اما حكاية دي
المتشائم: دي بداية الضياع احنا خلاص اوشكنا علي النهاية ولسه ..ولسه
الشكاك: اكيد دي من صنع الغرب عشان يدمرونا..مافيش فايدة عايزين يقضوا علي العرب
الكوني : انا كنت متوقع من زمان وحاسس انها هتحصل وفعلا حصلت في وقتها


وبين الأراء دي بييجي بقي خليط منهم ويكون الرأي الصحيح اللي بيقولوا المحللين في الأخر واحد هيقولي ازاي اقوله شوف دي "زي كتكوت" وشوف دي:


المحلل هيقول كده بالظبط :

"طبعا الأزمة العالمية حصلت قبل كده مش اول مرة "المتفائل" ..وده يعتبر تصحيح لوضع خاطئ من فترة طويلة ماشي عليه النظام الاقتصادي "العبيط" بس طبعا الحذر كل الحذر الفترة الجاية لأننا مش عارفين نهايتها ايه"المتشائم" وطبعا مش عارفين هل هي هتأثر علي فئة بعينها ولا علي العالم كله"الشكاك"وعموما هي كانت متوقعة من فترة وانا كنت عارف انها هتحصل"الكوني"


زي ما شوفنا راي المحلل دايما بيكون خليط من الخمسة وده في كله سواء بورصة او اقتصاد او سياسة حتي .




يوميات محلل بورصة :

عم "بويرص" ربنا سهله واتجوز الحمد لله ولكن ملقاش نفسه في الجواز وبدأ يصارح مراته بكل حاجة جواه ولكن ده كان اثناء الجلسة الصباحية للبورصة

بويرص : مديحة يا حبيبتي انا عايز اقولك كلام المرة دي مش "اخضر" زي كل مرة

مديحة: قول يا حبيبي انا سامعاك

بويرص: انا شايف اننا وصلنا "لنقطة وقف الخسارة" ولازم نقف

مديحة: نعم نعم يا سيد امك لأ يا اخويا ده انت بقي بتحجج مش كفاية انك بقالك سنتين "معرض" وكيرفك عيان

بويرص: احترمي نفسك انا بس كنت بكون "قاع" عشان انطلق منه

مديحة: ما انت قلت كده كتير ..انت خلاص "كسرت حاجز" الثقة ومش هيتلم تاني

بويرص: انتي عاملة "شمعة" مش تمام في حياتي

مديحة: وانت "اتجاهك هبوطي علي المدي القصير" يا حبيبي

بويرص: والحل؟

مديحة: يا "نجني أرباح" يا "نوقف الخسارة" لحد كده

بويرص: انا هشوف واحدة تانية "اختبر معاها نقطة " الحب اللي جوايا

مديحة: ده انت كل "ما تجرب علي النقطة دي بترد لتحت"

بويرص: انا هوقف الخسارة وهأقول بسم الله الاجابة انتي طالق

مديحة: يا لهويييييييي