Saturday, January 28, 2012

زواج السيـاسـة بالفـن..سياسة الجوائز ام جوائز مسيسة ؟






السينما والسياسة تتقاطعان في الكثير من الأعمال سواء كان التقطاع لغرض معين أو توجيه أو كان لمجرد سرد حقائق تاريخية .

فيلم "إنفصال" الإيراني" يمثل إحدي العلامات لدمج السياسة في السينما فرغم فوزه بالعديد من الجوائز بل وايضا ترشيحه لجائزة أوسكار فإن اعتراضات واسعة اجتاحت ايران احتجاجا علي الفيلم لأنهم يرون انه يمثل قصة غير واقعية بل وتسئ الي ايران حيث قال المتحدث الرسمي باسم وزارة الخارجية الإيرانية :  "أن الجميع يجب أن ينظر إلى تلك المهرجانات بشيء من الكياسة. أحيانا نرى الذين يديرون تلك المهرجانات يمنحون جوائز قيمة لأفلام تركز فكرتها الرئيسية على الفقر ومصاعب مواطني البلد ، يجب ألا يقود هذا فنانينا لتجاهل النقاط الايجابية الواضحة وخصائص أمتنا والاتجاه بدلا من ذلك الي نوعية الاشياء التي يرحب بها منظمو مثل تلك المهرجانات"

ويروي الفيلم عن خلاف بين زوجين يصل الي المطالبة بالطلاق لانها تريد الهجرة من الوطن مما نال العديد من الانتقادات داخل ايران وخصوصا من الجهات الحكومية الرسمية بوصف الفيلم بانه يغالط الواقع وانه مصنوع لخدمة اهداف معينة ونقدوه نقد لاذع .

ويقول البعض ان الفيلم ربما يحصل علي جائزة اوسكار لاسباب سياسية كما لم يحصل فيلم "الجنة الأن" الفلسطيني علي جائزة الاوسكار لاسباب سياسية ايضا حيث قالت احدي الصحف الاسرائيلية "أن أثرياء يهود لديهم نفوذ في هوليوود يسعون الى منع حصول الفيلم الفلسطيني (الجنة الآن) على جائزة الأوسكار بادعاء انه يقدّم الانتحاريين الفلسطينيين بشكل إيجابي.

ورغم حصول فيلم الجنة الان علي العديد من الجوائز وكان مهيئا للحصول علي الاوسكار الا ان قوة الضغط اثرت علي الجوائز ومنعت حصول الفيلم علي جائزة اوسكار.

وربما لم تكن السابقة الاولي في عالم المهرجانات والافلام التي تدخل فيها قوة ضغط ضد فيلم او تصريح حيث رأينا ما حدث قريبا من طرد المخرج الدنماركي لارس فون من مهرجان كان لانه ادلي بتصريحات قال فيها انه يرفض الدولة الاسرائيلية لانها مصدر ازعاج .

وصرح الكثير من النقاد ايضا ان فيلم "افاتار" رغم تكلفته واخراجه وابهاره الا انه لم يحص علي كثير من الجوائز عند ترشيحه منذ سنوات لاسباب سياسية حيث يحمل الفيلم العديد من الاسقاطات السياسية التي جعلت فيلم له ابعاد سياسية اخري يحصد الجوائز وهو فيلم "هارت لوكر" اخراج كاثرين بيغلو وهي زوجة المخرج الشهير جيمس كاميرون سابقا مخرج افاتار وقد ازاحت زوجها عن العديد من الجوائز في عام التنافس بينهم.

وفاز فيلم "هارت لوكر" او "خزانة الألم" بالعديد من الجوائز ايضا لاسباب سياسية لانه كان يرصد ما حدث في العراق ولكن بشكل تجاهل الكثير من الاحداث الرئيسية ورؤوس الأقلام  وكأن المشكلة في العراق هي استخدام الطفل العراقي كقنبلة بشرية فقط وتجاهل الفيلم الكثير من القضايا الاخري في العراق ولم يظهر بموضوعية كاملة وطبعا كان لابد ان يظهر الجندي الامريكي بمظهر البطل كالعادة .

وهناك العديد من الافلام التي نجحت ايضا وهي افلام سياسية عن بلدان اخري وحصدت الجوائز او تقييمات عالية من النقاد مثل فيلم "أسامة" عام 2003 عندما تحدث عن الحياة الصعبة في افغانستان وكيفية معاملة المرأة هناك والفيلم الذي يتحدث عن الرجم في ايران وهو "رجم ثريا" او
the stoning of thuraya
الذي كان يحاول ان يظهر تطبيق الحدود في ايران ولكن بشكل وزاوية اخري ربما تكون عنيفة لدرجة كبيرة .

و في عالم السياسة وتقطاعها مع الاوسكار ايضا اعمال الجرئ "مايكل مور" الذي هاجم بشدة وادان الفساد في بعض المؤسسات الامريكية عندما تحدث في افلام مثل "فهرنهايت" عن نظرية المؤامرة وكيفية تبرير احداث سبتمبر لغزو العراق وافغانستان وايضا في فيلمه الثاني عندما تحث عن قطاع التامين الصحي والفساد الذي حل به في جرأة شديدة وظهر في العديد من الافلام الاخري التي تحدثت عن الرأسمالية والأفلام التي هاجمت الحكومة الامريكية بضراوة .

وعندما حصل مايكل مور علي جائزته في مهرجان الاوسكار وقف ليقول خطبته الشهيرة علي المنصة وقال "كلنا ضد هذه الحرب يا بوش..عار عليك..عار عليك " .
ومن الخطب الشهيرة ايضا في الاوسكار لشخصية سياسية كانت عندما تسلم "ال جور" جائزة عن فيلم عن التغيرات المناخية ووقف ليتحدث عن مخاطر التغير الذي حل بالمناخ في العالم وخطورة ذلك علي الكرة الارضية .

وكانت من اشد الصراعات الفنية الرئاسية الصراع الرهيب بين فريق "ديكسي تشيكس" وبوش ايضا عندما انتجوا فيلما ضده وضد افكاره التي قالوا انها ماكرة وخادعة وتلقوا العديد من التهديدات بالقتل ومنعت اعمالهم علي بعض المحطات ولكنهم حصدوا العديد من الجوائز في "جرامي اووردز" في عام واحد بسبب اغنية سياسية ضد بوش ونظامه وكانوا من انجح الفرق الفنية في هذا الوقت .

وهناك العديد من المخرجين الذين شاركوا في الكثير من الادوار السياسية علي الصعيد العملي مثل كلينت ايستوود و وودي الان  وجورج كلوني وغيرهم من المخرجين ومن الفنانين الاشهر في المجال السياسي هو "ارنولد شوارزنيجر" عندما تقلد منصب حاكم كاليفورنيا والفنانة "انجلينا جولي" قامت بالعديد من الادوار في كبري المنظمات العالمية وكانت سفيرة دائمة للدول الافريقية وتبرعت بالكثير من التبرعات وقامت باعمال خيرية وسط مناصب عدة دولية .

وشارلي شابلن كان من اكثر الفنانين قياما بادوار سياسية ربما بسبب حكم الفترة التي نضجت فيها اعماله وهي فترة حروب دائمة وايضا للتعبير عن ارائه في ما يحدث وهاجم بشدة هتلر وغيره من الرؤساء في العديد من افلامه القيمة والهامة .


ومن الافلام التي رأي البعض فياه انصاف زائد عن الحد لليهود في فترات محددة من التاريخ او اظهارهم الدائم بمظهر الابطال علي مدار التاريخ لاسباب سياسية طبعا هي :


the reader
schindler's list
the pianist
Inglourious Basterds
Defiance
munich


بينما هناك العديد من الافلام التي تمخر عباب عالم السياسة القذر والاعيبه مثل :

ides of march
ghost writer
lions for lambs


ومن اشهر الافلام التي اقتحمت عالم السياسة ايضا :

Rendition
A Mighty Heart
Flight 93
The Kingdom
Syriana
Babel
Body of Lies
Tears of the Sun
Jarhead
Hotel Rwanda
The Last King of Scotland
Black Hawk Down
V for Vendetta
the assasination of trotosky
z
hurt locker
green zone
the king's speech


وغيرها من الافلام التي ابرزت دور الشخصيات الهامة في افلام عن قصة حياتهم مثل : مالكوم اكس وغاندي ونيكسون علي سبيل المثال .


اذا فتصادم السياسة مع هوليود ومع الفن عموما دائم ومتصل علي مدار سنوات وعقود كاملة ومنذ ايام الحرب العالمية وفترة وصم الفنانين بالشيوعية "كانت في فترة معينة في هوليود تعد كارثة"
 لابعادهم عن الجمهور وتصنيف الفنان حسب افكاره ومعتقداته ومنهم كبار الفنانين منذ عشرات الاعوام وحوادث اغتيال مطربين وفنانين مثل المطرب جون لينون الذي اغتيل في حادثة مروعة .

فيلم انفصال الايراني ربما نجده يحصد الجائزة لاسباب سياسية وربما يتم ابعاده ايضا لاسباب سياسية ولكن لا يظن الكثيرون انه سيحكم عليه فنيا فقط
فغالبا الاوسكار تحكمها النزعات السياسية واتجاهات معينة .

Wednesday, January 25, 2012

رسالة الي شعــب الثــورة





اليوم نستيقظ علي شعلة أمل جديد وشعب يغني ويكمل ثورته..
اليوم يرفرف العلم ويغطي الشوارع والميادين دون ان ينكسه فساد أو توقفه سحابة قهر وظلم..

اليوم العيد الأول لثورة مصر التي يكملها الشعب لتحقيق اهدافها كاملة ويتم لمصر نورها ..
اليوم العيد الأول والعيد الوحيد الحقيقي في اعياد مصر..
اعتدنا علي عيد عمال بلا حقوق عمال..وعيد ثورة 52 بلا روح ثائرة ..وعيد شم النسيم بكل التلوث الذي استنشقناه في عهد المخلوع..
واحتفالات اكتوبر لتذكيرنا فقط بضربة المخلوع الجوية وليغني الجميع "اخترناه" في نفاق لا يحسد عليه من يؤديه ..
العيد الوحيد الحقيقي والحق..العيد الوحيد الذي اختاره الشعب ولم يفرضه أنظمة غاشمة بائدة ضالة مغيبة ..

اليوم يكمل الشعب ثورته ويطالب بحقوق شهدائه الذين فرشوا التراب سجادة حمراء لاستقبال كل مصري بشرف وعزة واحتفاء..
اليوم يستتر الفلول ويختبأ محبي مبارك في تربتهم الذين صنعوها لاسفلهم وكفنهم الذين صنعوه من حقدهم ومن غزل سواد قلوبهم ..
اليوم ينتفض الهرم ويشعر النيل بالإنتشاء وتغني الأرض و"تتكلم مصري" .

مضي الحلم ويبقي إكتماله ..مضت شمس الحقيقة وتبقي في ايادينا شعلتها ..
مضت لحظة الحقيقة وتركتنا نكمل وجودها..
مضت الثورة وتبقي الحلم المصري ..مضت ولكنها لم تودع..
مضت ولكنها حاضرة بداخل كل مصري الي ان تكتمل وتنتصر بإرادة كل مصري..
تبقي منها "حي علي الكرامة" .."حي علي العدالة".."حي علي الفلاح والكفاح ضد الفساد" ..


اليوم نقبل رأس كل شهيد ونقول "يا أمي لا تحزني" "يا مصر لا تحزني" ان الله معنا..
وضعونا الفاسدين في غار لسنوات وحاصرونا ونسج عنكبوت العدل خيطه ليغطينا وكنا مع مصر في الغار نقول "لا تحزني يا مصر..ان الله معنا" .
 وانتصرت الحقيقة وصغر المفسدون وكبوا علي وجوههم ولم يبقي منهم الا كلمة سيئة وذكري فساد ..

اليوم ينقضي عام علي سقوط طاغوت مصر الذي تخجل الفراعنة من ذكر اسم فرعون عليه..
ويكره الطغاة ان نطلق عليه طاغية ..
ويكره المفسدون ان نقول عليه فاسد..
ففساده وسوء اصله لا يوصف بالكامات ولكن علي وجه كل فقير وخطوط العجز والمرض علي كل طفل تركه بلا مأوي ..
أسماهم "عشوائيين" ولكنه "العشوائي الوحيد" وهم المواطنون..
أسماهم "مواطن بسيط" ولكن هم العظماء وهو "البسيط" الذليل..
أسماهم "الفقراء" مالا ونسي ان يعرف انه "الفقير" عدلا والحقير طبعا والذليل أبدا ..
لا تطلقوا عليه "راع" غهو "عار"
ولا تطلقوا عليه "رئيس" فهو "خسيس"
ولا تطلقوا عليه "حاكم" فهو "محكوم بفساده"
قولوا فقط ورددوها انه "المغضوب عليه" وجزء من "الضالين" .

اليوم نصفق لمصر ولا نصفق في برلمان "عز"
اليوم نحي العلم بارادتنا لا بسبب حضورنا الطابور..
اليوم نرسم مصر جديدة ولا نرسم في كراسة الرسم صورة الرئيس..
اليوم نتفق ولا ننافق ..ولا نكتب في مواضيع التعبير "إرسل برقية تهنئة للرئيس" ..
اليوم  ينتشي الشرفاء ويرتعد الجبناء والأذلاء..

أخيرا امتلكت مصر برلمان اختارته ولم تخترعه..
أخيرا امتلك المواطن صوت لا يباع ولا يشتري..
أخيرا امتلك المصري "ارادته" ولم يصبح ملك "إدارته"
أخيرا نحتفل..أخيرا ننتصر..أخيرا نكمل ما بدأناه..
أخيرا أصبح لكل المصريين هدف واحد وبناء واحد وكيان واحد..

عيد ثورة سعيد وان كان لا يكتمل بدون حق الشهداء..
ولكنه سيبقي عيد لان الشعب اسقط رأس الأفعي مبارك وان بقي بعض فلول نظامه..
ثورة تكتمل وامل قادم ومصر طاهرة شريفة معافاة من مرض الفساد العضال..

اهنئ كل مصري وأقبل رأس ام كل شهيد ونقول الثورة ستنتصر ..
الثورة ستكتمل عندما نأخذ حق الشهداء كاملا..
مصر ستبقي خالدة أبد الدهر..

Sunday, January 22, 2012

ربع ثائر ربع خايف ربع عادي ربع عاشق




كل واحد فينا جواه حلم نجاح الثورة ..جواه "ثائر صحيح"..لكن ربع الثائر الصحيح عاشق وربعه عادي وربعه خايف وربعه عاشق..بيحلم بنجاح الثورة ..وبيحلم بمصر جديدة بس يبقي دايما ربعه خايف علي الثورة ودايما خايف علي بلده لسبب او من غير سبب حتي..ودايما تغني في قلبه اشعار نجم وحداد ويعيش جواه الأمل ويفضل يحلم بمصر اللي جاية..تعيشي يا مصر حرية.







بين الهوية وانتمائي والهوي ..
عاشق ترابك بس خايف مني انا..
انا ماشي بحبي خطوتي كل الجسور..
ممكن اخاف ممكن أهيم ممكن أثور..
وعشان اقولك ان انا ثائر صحيح..
واقف غضنفر ضد ظلمهم القبيح..
لازم يكون فيا اربعة ..
شخصيتي بين الأربعة ..
ثورة فصولي الأربعة..
الربع عاشق قلبه ليكي عود بخور..
سكره في حبك كاس غرام دايما يدور..
والربع عادي شايفها حلوة بالمرار..
مهما عصاها يغني ليها ليل نهار..
والربع خايف يتنفض وكأنه زار..
يهرب ويبكي يحس دمعه في كل دار..
والربع ثائر قلبه مولود من ياقوت..
خارج يصحي الحق في كل البيوت..
جايز بكلمة يقولهم يلا ارفضوا..
ده الظلم شين مرة وميت مرة السكوت..
بين الهوية وانتمائي والهوي
عاشقك يا مصر بس قولت لنفسي أنا :
"انا ولا عندي طبع خبيث..
ولا ف سياستي م المهاويس..
ساعات أرضي وأقول عادي..
وأقول اهو خوف علي بلادي..
وساعات تتكسر البراويز..
ساعات بخرج لبرة الدار..
وأخاف من نشرة الاخبار..
ساعات طبعي يكون مجنون..
وأحس اني سيف مسنون..
ساعات فيكي أكون راهب..
ساعات من حبك انا تايب..
ساعات اشبك في حدوة خيل..
يشيل نسرك في وسط السيل..
واضمه لحضن ألوانك..
وأقول نسرك يعليكي..
جناحه يقوم ويحميكي..
لأني كنت أنا سبوعك..
وشبعي وجوعي في ضلوعك..
ورفعة راسي من خيرك..
يا مصر الثورة دي كروان..
تنادي جوانا الإنسان..
يقوم انجيل يقوم قرأن..
وينزل من ميدان لميدان..
يا مصر الثورة دي توبة..
يا ارض طيبة والنوبة..
وصافية زي لون نيلك..
وبتكمل مواويلك..
وبتقول للضباع ترحل..
وبتقول للديابة تعود..
انا المصري ومش هارحل..
والحن موقفي ع العود..
انا مش جثة تنهشها..
ودمي يجري في انيابك..
ولا عضامي تقرقشها..
انا ميدانك انا حسابك..
واقولها الأه واعليها..
وازعق في اللي راميها..
وكل حاميها حراميها..
وااااه يا نظام فاكرها ماخور..
كرامتك عزتك بتخور..
ضميرك جلدة التعبان..
وسمك أنك المأجور..
وااااه يا حامي ثورتنا..
وليه بتهين في عزتنا..
بيادتك ليه علي بدني..
لابس رسمي لابس مدني..
وليه بتقول وما بتوفيش..
دي ثورة ولا ايه شيش بيش ؟
وااااه يا بتوع بابا حسني..
وضربة زفت جوية..
كانه ضربها في قلوبكوا..
وصبحت هي معمية..
كانه ضربها علي بلدي..
فتح مقلب لحرامية ..
واااااه يا محاكمة موقوفة..
وفي سكينة عايزة دليل..
وشوفنا الدم ع المنديل..
وقالوا نتيجة معروفة..
وااااه يا عصابة ولادة..
ولكن مصر ولادة..
مسيرها تلاقي مرة رئيس..
وميكونشي في قصره خسيس..
وميكونش بيعبد غاز..
قراره الحسم والإنجاز..
يكون شرعه في ايد شعبه..
وشعبه الشرع والتشريع..
شراعه لو في يوم هيضيع..
وهيعدي مع بلده..
وااااه يا ثورة مقهورة..
ولعبوا كتير عليها قمار..
وضاعوا شبابها في الصورة..
ركبها الكل م الاوكار..
واااه يا شهيد يضيع دمه..
وايد الحق ملوية..
وهب روحه وكان حلمه..
يشوف النهضة مصرية..
واااه يا "حرارة" الهمة..
عنيه الطاقة والملكوت..
فقد بصره لكن لسه..
هيبقي الحلم عالي صوت..
وااااه يا كرامة معصوبة..
واااه يا ثورة منهوبة..
وااااه يا دولة مقلوبة..
هتبقي يا مصر في دارك..
ويبقي الشعب ثوارك..
تعيشي يا مصر حرية..
وغني يا مصر حرية..
ومهما الربع جوايا..
يخاف منك يخاف ليكي..
هيبقي ربعي انا التاني..
وهابقي اقولها بكياني..
تعيشي يا مصر حرية..
قلوبنا تعيشها أغنية..


Thursday, January 19, 2012

التعليم المصري ما بعد الثورة المفروض يكون ازاي ؟





الكل بيتكلم عن التعليم المصري وانه في أسوا حال والكل في مصر بيدور علي خطوات للنهوض بيه في كل البرامج الرئاسية والحزبية ..وفعلا حال التعليم المصري والخريجين اصبح في خبر كان من زمن طويل بسبب سياسات وخطط النظام السابق الفاشل في الادارة بشكل كامل .

خطط كتير اتكلمت عن تغيير جذري لنظام التعليم المصري وخطط تانية قالت لازم من زيادة الجانب العملي لان كل تعليمنا نظري وقايم علي الحفظ وناس اتكلمت كتير عن اهمية التعليم الابداعي وكل دي اشياء هامة جدا لو فعلا عايزين نطور التعليم ولكن هاتكلم عن مواد معينة محتاجها كل طالب مصري عشان يركب السفينة بقي ويناطح الاوروبيين في كل المجالات ..مواد ممكن تكون صغيرة وبسيطة ولكن دراستها من الصغر فعلا تغير معلومات الطفل ونمط تفكيره شكلا ومضمونا مش مجرد حفظ وخلاص لدرجة ان مدارسنا بتحفظه حتي الشعر وهو مش فاهم ولا كلمة فيه يعني حتي الاحساس بالقصيدة معدوم في مدارس مصر !


مواد هامة جدا هتلاقي معظمها بيتدرس برة في مدارس امريكا واوروبا وطبعا تفتقدها مصر بشدة وكل طالب محتاج لتعلم نوعيات المواد دي وهي :




أولا : مادة النظام :


طبعا احنا عارفين ازاي كل طالب مصري بيرجع بيته يرمي الشنطة ع الارض ويخش اوضته يرمي الهدوم بشكل عشوائي وبعدين يخش ع الغدا بتاعه وهو حتي مش غاسل ايده ..مش كله بيعمل كده ولكن كتير من الطلبة بتعمل كده ولو قولتله خليك منظم او رتب حاجتك يشوف ان دي حاجة تافهة ومش مهمة رغم انها ممكن تغير حياته بشكل كامل وتأثر علي بلد بحالها .

غالبا المراهقين بيشوفوا الموضوع بتاع النظام ده بشكل سطحي وبيعتبروه مجرد شئ جانبي مش اساس حياة عكس الاوروبيين والامريكيين واليابانيين وكل الجنسيات اللي بيتربوا علي النظام من صغرهم من المدرسة وده من اهم الحاجات اللي خلت دول كتير سبقتنا وخلت مصر في مؤخرة الدول وخلتنا دولة بلا تجربة لان مافيش تجربة هتقام علي الفوضي ..الفوضي اللي اتعلموها في المدارس بتنقلنا لفوضي الشارع والقاء المخلفات في كل مكان من شبابيك العربيات والمرور فوضوي وكله عايز يعدي ومافيش اشارة مشارة اساسا ولا اماكن لعبور كبار السن زي برة وكله قايم علي الفوضي عندنا .

لو يكون في مادة في المدارس تنصحهم باهمية النظام في حياتهم وفي بيتهم من اول الدولاب وطريقة الاكل وعبور الطريق هيأثر ده علي البلد كلها وهيخلق جيل كامل منظم عارف خطورة الفوضي ومدي تأخيرها لكل حاجة لان المرور والمواصلات من اساسيات التنمية في كل دولة فما بالك اننا تقريبا بلا نظام مروري في مصر وكل حاجة عشوائية .

ويكون حتي النظام والتحكم في كل حاجة في حياة الطالب من صغره ونربطله ده بكيفية خلق الله للدنيا باحكام ونظام متقن وازاي الصلاة نظام والصوم نظام واتجاه القبلة نظام وجسمنا قائم علي النظام وعقلنا قائم علي الخرائط الذهنية والنظام واقوي سيمفونيات اي اوركسترا نظام وكل حاجة جميلة وقوية بتبدأ بالنظام وعمر الفوضي ما بتخلق شئ جيد عكس ما البعض موهوم ان الفنان فوضوي دي من الاخطاء

الشائعة بقوة ونشوف مقولة اينشتاين عن النظام وعدم الفوضي اما بيقول :

"Out of clutter, find Simplicity. From discord, find Harmony. In the middle of difficulty lies opportunity"

لو بس نتعلم ازاي يكون الطابور حتي وازاي ننجز اي هدف بنظام واحكام وازاي يبقي كل حاجة بمواعيدها ومحدش يمشي مخالف في اي شارع هنبقي بلد منظمة ودي اول خطوة للتقدم وده بيبدأ من الصغر.




ثانيا : مادة الحقوق والواجبات :

كتير من المصريين ميعرفوش حقوقهم ايه وواجباتهم ايه وازاي ان الواحد لازم يأدي واجباته عشان يبقي فعلا ليه الحق في المطالبة بحقه ولازم كل واحد في مدرسة يبدأ في التعرف علي الدستور بتاع بلده واهم القوانين فيها كمان اللي بتأثر علي حياته اليومية .

الكل برة عارف كويس قوي حقوقه وازاي يقدر يشتكي الموظف المسئول عن خدمة معينة بسهولة ويسر وياما تم رفع قضايا علي اكبر الشركات برة وبيكسبوها مش بس مجرد شكوي اللي احنا حتي مش عارفين نشتكيها.

الكل بيتحكم في المواطن اللي ميعرفش حقوقه ومعرفش ازاي يجيب حقه من اللي ظلمه لان النظام عندنا في مصر قائم علي ان الشكوي لله فقط رغم ان كل الجهات ليها جهة مسئولة عنها تقدر تشتكي ليها حتي الشرطة في كل دول العالم الا مصر .

ولازم كل مصري يعرف كمان انه مقابل الحقوق اللي ع الدولة دي لازم يؤدي كل واجباته قدام بلده ويشتغل بضمير وبذمة وميخالفش القواعد بأي طريقة ويحسن معاملة الناس في شغله طوال اليوم مش زي عندنا اما الموظف بيطلع غضبه عالناس عشان حتي ظروف بيته !

ولازم نعرفهم حدود الحرية وان مافيش حرية مطلقة ومقولة "انت حر ما لم تضر" يفهموها بشكل واضح وده ظاهر في العالم الغربي بشكل لافت وان مع الحرية الكبيرة اللي عندهم برضه في قيود ومعايير اخلاقية وتناقش في الكونجرس في امريكا وايضا في مجلس لندن قضايا اخلاقية كثيرة تخص الطلبة .




ثالثا : الأخلاق والجنس :

يعني فيه ناس بتسميها الثقافة الجنسية وطبعا ناس كتير فاكرة انها قلة ادب مع ان الجهل بيها هو اللي بيأدي لقلة الأدب في الأخر ..مش لازم تدريسها بشكل فج وقبيح زي برة اما بيعلموا الطلبة في المدارس ازاي يلبسوا "الواقي الذكري" طبعا مش ده المقصود انما عندنا كمجتمع شرقي ممكن تكون الفكرة علي الاقل ان يتم تهذيب الفرد جنسيا يكلموه عن اخطار الافراط في العادة السرية ومضار ده علي جسمه وحاجات تانية ومعلومات صحية كتير عن اعضائه التناسلية اللي هتفيده مدي الحياة انما للأسف البعض دايما بيتكلم عن الجنس بتريقة وانها هتبقي مادة للافكار القذرة فقط وده مش صحيح بالعكس ده هام جدا ان اي مراهق يعرف طبيعة جسمه وتفاصيل حياته الجنسية كاملة بشكل مهذب ومحترم وكأنها محاضرة دينية عن الموضوع ده .

وتسمية المادة بالاسم ده احسن كتير من اسم الثقافة الجنسية انما نسميها الاخلاق والجنس يعين اما نربط الاخلاق بالجنس هتحس انها بشكل غير مباشر هتأدي لفهم المعلومات بشكل صحيح واستيعابها بالشكل المطلوب مش بالشكل اللي البعض عايز يفهمه بيه بشكل ساخر وافكار منحرفة .




رابعا : التفكير :

غريبة قوي ان مادة تكون اسمها "التفكير" ولكن مش غريبة ولا حاجة اما نعرف ان كان في وزير للذكاء في العالم واسمه ماتشادو في فنزويلا وده عمل اكبر مشروع للذكاء في الثمانينات وكانت فكرة الذكاء عنده هو تعليم التفكير بشكل صحيح وطبعا التفكير خارج الصندوق والتأمل والقراءة السريعة وحاجات تانية كتير في الإطار ده .
لو علمنا اولادنا التفكير بشكل سليم في المدارس في حصص معينة بدل الحفظ وخلاص ولو علمناهم المناقشة بدل التلقين بغباء هنبقي مجتمع فعلا مقبل علي نقلة كبيرة وقفزة مجتمعية هايلة للأمام .

ومناخدش اي موقف الا قبل التفكير كويس وبعمق في الموقف والنظر اليه من كل جوانبه وكل تفاصيله .
والمثل بيقول
Action without thought is like shooting without aim

الطلبة المصريين من ابتدائي لحد الجامعة وحتي في الجامعة متعودوش ابدا يقولوا رأيهم او يناقشوا استاذهم في اي حاجة لازم تحفظ وبس لان المناقشة في نظر التعليم المصري هي مجادلة فقط !!
مافيش ابدا سؤال اسمه "قول رأيك" هتلاقي كل الاسئلة عبارة عن "علل" وطبعا تعليلك لازم من الكتاب ميطلعش سطر من برة وتقول بالحرف وبس .




خامسا : مواد مساعدة :

في بعض المواد المساعدة اللي المفروض الطالب ياخد عنها فكرة من صغره لانها بتساعده كتير في حياته زي مثلا الخرائط الذهنية او اساليب القراءة السريعة او التنمية البشرية بشكل عام سواء كتب اجنبية زي مثلا ستيفن كوفي وغيره من المشاهير او عرب زي ابراهيم الفقي .
ولازم الطلبة ياخدوا ولو نبذة عن الكلام ده كله لانه ممكن يغير اسلوب حياتك بالكامل ويخلي الجيل كله مختلف تماما في سوق العمل واكثر انتاجية فعلا .




سادسا : طوارئ :

طبعا دي مادة تكون ازاي الواحد يتصرف في الظروف الطارئة علي فكرة الحكاية دي موجودة بس بشكل عقيم جدا وعبيط في بعض المدارس المصرية .انا اقصد بالطوارئ زي مثلا الاسعافات الاولية في الظروف الطارئة او ازاي تتصرف في وقت زلزال او اي حدث زي كده وكان في بعض المدارس بتناقش ده بشكل غير عملي علي الاطلاق برضه حفظ وصم وخلاص وبتكون مش مادة اصلا ده نشاط الطلبة بتروحه عشان تزوغ من الحصص !

في الخارج فيه اماكن مخصصة لمحاكاة الزلازل بشكل كامل بتكون الاوضة بتتهز بالكامل وانت بتحجز للدورة دي وبتخش بشكل عملي لغرفة كلها ارتجاجات كانك في زلزال للتدرب علي الموقف بشكل تفاعلي وتشوف ازاي تقدر تتصرف فيه حسب التوجيهات اللي هتدرسها .



سابعا : ادب الحوار :

ده مش كتاب ادب الحوار في الاسلام وبس لا لازم تكون في حصص كاملة في ادب الحوار لان زي ما احنا شايفين اجيال كاملة سياسيين ورجال دين وعلماء وفنانين والوف البشر من العرب يفتقدوا تماما لاسلوب محترم في الحوار والاختلاف مع الاخر في كافة المجالات سياسة او اقتصاد او فن .

وشوف اي مناظرة عندنا في اعالم العربي ما هي الا معركة تدور رحاها علي شاشة التليفزيون والمذيع اشبه بالمحجزاتي بين الطرفين اللي فعلا عايزين يضربوا بعض.
يكون محور المادة دي ازاي توصل وجهة نظرك بلباقة واحترام ومتفتيش في اللي متعرفوش وتزعق وخلاص لازم تقول ساعات "معرفش" لان ده احترام لنفسك وللي قدامك مش اي حاجة تفتي فيها وخلاص وللأسف ده طبع عربي اصيل .

ولازم كمان نتعلم ازاي منرتفعش بنبرة الحوار مهما كانت الحماسة وحاول تحول حماستك لأدلة ومعلومات اكتر بدل صوت عالي علي مافيش زي برامج كتير تزعق ومتوصلش حاجة في الاخر.

الاسلام علمنا ادب الحوار ولكن للاسف تلاقي حتي الشيوخ ساعات بيتكلموا باسلوب تهكمي سوقي بديلا عن اللغة العربية العظيمة وتكون ركاكة الاسلوب وضعف الصيغة هي سيدة الموقف .

ولازم نوصل للأجيال دي فكرة "الاختلاف" واهمية الاختلاف في حياتنا وانه منبع للافكار ومصب للابداع .
ولازم نعرفهم ان الانظمة الديكتاتورية فقط هي اللي مبتسمحش باي ذرة اختلاف ولا تعددية وبتحاول تذرع كده في الناس من صغرهم ولكن حان الوقت اننا نزرع في اجيالنا الجديدة الاختلاف ولكن باحترام
الاختلاف في حدود اللياقة الاختلاف الثري الخلاق وليس اختلاف الاهانات وانعدام الاخلاق .



ثامنا : عادات صحية :

يعني نكلمهم عن التغذية السليمة والابتعاد عن المأكولات السريعة ونبين ليهم خطرها ونكلمهم عن السمنة المفرطة واخطارها ومعلومات مفيدة بالشكل ده وبعض تمارين اللياقة وحاجات تخص صحتهم فقط لان الطلبة غالبا لحد الجامعة بيطلعوا مش عارفين اي حاجة عن المواضيع دي بسبب مناهجنا الفاشلة اللي مبتديش حتي نبذة ولو صغيرة عن اي حاجة من دي .
نكلمهم عن الاحساس بالشبع وان الانسان ميبقاش مجرد اله لنسف الطعام وخلاص لحد ما تلاقي جسمك وصل لوزن مهول وتندم بعد كده ونكلمهم عن اهمية النضافة عموما في حياة الطالب من اول المدرسة لحد البيت .



دي بعض المواد او كتيبات صغيرة المفروض الطالب المصري يعرف نبذة عنها بدل ما يتخرج من الجامعة وهو ميعرفش الا اللي في الكتب وبس ..مواد زي دي ممكن تغير حياته كلها وتغير شخصيته بشكل كامل ويبدأ يفكر في كل شئ حواليه ويضيف للمجتمع بدل ما يكون الة للحفظ والتلقين .

وفي الخارج بيناقشوا اي حاجة في الامور اللي تخص الطلاب حتي اللي يشوفها العرب امور هايفة لدرجة انهم ناقشوا في الكونجرس كمية البطاطا اللي بيستهلكها التلاميذ في المدارس الامريكية وقالوا ان لازم يكتروا من الفاكهة جوة المدرسة بدل استهلاك المواد اللي تسبب البدانة ..يعني شوفتوا بيوصلوا باهتمامهم بالطلبة لحد فين ؟

لابد من تطوير التعليم المصري بشكل جذري وعاجل لان الطالب المصري باستمراره بالنظام ده هيكون في خطر وهيكون بالنسبة للطلبة في كل مكان في العالم شئ قديم ومجرد اثار بالنسبة للي هم درسوه وعرفوه واتعلموه في كل اوروبا والدول العربية كمان .

Monday, January 16, 2012

كريم شعرك بيظبط ولا بيثبت ؟؟





ايوه اللي في الصورة بيكهام في اعلان لجيليت ..هو بيكهام بيحلق دقنه ليه اصلا ؟هو في اي حالة هيفضل مز.

مافيش غير اعلان سنيكرز اللي بيقولك ابني بلدك والباقي كله بيقولك "روح مز او ظبط يا برنس" !
الاعلانات المصرية غريبة جدا في انها كلها تحس انها بتتكلم عن نفس الموضوع وهو التظبيط ..وكأن كل السلع بتدور حول علاقة الراجل بالست فقط لا غير يعني مينفعش احتاج السلعة دي عشان انا عايزها ولكن عشان ابقي كويس قدام المزة او ان المزة تبقي اجمد قدامي .

ولو الاعلان مش عن التظبيط يبقي هيقولك في نهايته رسالة غريبة او قيمة غريبة برضه زي مثلا اعلان "جدع يا خالد" اللي تحس انه بيقولك خد العرض ده وافشر يلا براحتك وهول القصة ع الاخر ..
يجيبوا ناس عمالة تهول في قصة صغيرة ويزودوا التحابيش المصرية كالعادة وفي الاخر يقولك احكي حكايتك وهنديك عرض كذا !

الاعلان التاني بتاع تايجر "اكبر وسيطر" بيدي رسالة للاطفال انهم اول ما يكبروا لازم يتحرروا بقي من تحكم الام والاب ده وميسمعوش كلامهم لدرجة ان طفل بيسأل بعد الاعلان "هو لسه صغير عشان يسمع كلام مامته ؟ " !! يعني هو اعلان لذيذ وكل حاجة بس ساعات الاطفال بتترجم بطريقتها الخاصة .

شوف بقي اعلانات الموبايل كلها يا معلم معمولة فقط للتظبيط وكل العروض بعد الساعة 12 بليل اكيد مش عشان ابويا واحد يقولي عشان الخاطبين يا اخي او المتجوزين ! اقوله المتجوزين ؟؟ لا شكلك فاهم الجواز غلط هو ممكن للمخطوبين بس ليه يعني لازم يتكلموا بعد 12 ما اليوم طويل جدا يعني معرفش مين اللي خلي دايما المخطوبين كل كلامهم بعد 12 الا شركات خطوط الموبايل كلها هي اللي زرعت المبدأ ده لان كل عروضها يقولك من 12 لحد الصبح ..اي عرض حلو هتلاقيه في المواعيد دي بس انما في عز الضهر يقولك لا يا عم ده كلام شغل وبتاع يعني مش اتنين هيمزوا بلاش عروض بقي !

اما قيمة التثبيت بالجيل فدي كترت قوي بقي في كل اعلانات الجيل والكريمات وبقت كل فكرة الاعلان ان واحدة تيجي من وراك عايزة تحسس علي شعرك وكأنها عمرها ما شافت رجالة او انت الراجل الوحيد اللي فاضل علي الكوكب ومهم جدا للحفاظ علي بقاء البشرية ..او يخلي في الاعلان السكرتيرة ترمي الورق فجأة اول ما تشوف شعرك وده "الحب من اول لحسة جيل" .

وكل الاعلانات بدأت تقلد بعض في موضوع الرجولة ده زي بيريل ظهر برضه كريم يقولك "للرجالة بس" مش للفرافير ..مش عارف ازاي الكريم بتاع الشعر للرجالة بس امال الفرافير يحطوا ايه كريم ازالة شعر ؟؟

وبرضه اعلان كريم او جيل يقولك فن التثبيت ! وكأن الشعر فجأة بقي اهم حاجة في الراجل وان كل هدف الراجل من ساعة ما يخرج من بيته مش لقمة العيش ولكن التثبيت ..احنا عايشين عشان نثبت وكل يوم نثبت وكل ساعة نثبت في نظر شركات الكريمات والجيل وكل لحسة كريم بتساعدك علي التثبيت اكتر واكتر زي الاعلانات بتاعة مش مهم البلاط انا جبت التلاجة دلوقتي مش مهم الشقة انا جبت الكريم والجيل .

 واعلانات المعجون ..سواء معجون حلاقة او معجون اسنان الاتنين ماشيين علي نفس المبدأ بالظبط ..هتغسل سنانك عشان حاجة واحدة بس ولسبب واحد بس انك اما تبقي في المترو والمترو يتهز جامد وواحدة تقع وانت تلحقها هتشم بقك فتلاقيك غاسل سنانك فيظهر قلب كبير في المترو وهتحبك علطول من نضافة سنانك !! هتحبك عشان نضافة سنانك علي اساس انها ابلة الناظرة وانت عيل في حضانة ناقص بالمرة تفتش علي نضافة ضوافرك في الاعلان اللي بعده !

وواحدة لازم تخبط فيك فيقع منها حاجة وخلاص وتوطي تجيبوها مع بعض فتشوف سنانك بتبرق وتطلع نجمة كده غريبة فتدوب في هواك ! ايه الهلس ده ؟

انما معجون الحلاقة كله معروف لازم تحلق دقنك وانت خالع تقريبا والافضل يكون ملط مش عارف هو بيحلق ايه بالظبط ده بيحلق دقنه يا عم والست المزة جاية من ورا برضه وتشوف المعجون علي دقنه تقول "يا داهية دقي انا مش قادرة واااو معجووون " مش عارف ايه اللي بيخليها تجري ع المعجون وهي بقميص النوم وسؤال ساذج معلش يا تري الست دي دايما مراته ولا المعجون جابها من الشارع !

طبعا اعلانات البرفان معروف ان كلها او فكرة الاعلان هتكون فقط "السكس" لدرجة ان الواحد بيشك في نفسه وهو داخل يشتري برفان مش اسبراي اذا كان اسبراي خفيف بيخلي كل الحريم يجروا وراك امال البرفان بقي هيعمل ايه ؟ اكيد البعض بيفكر كده وهو داخل المحل ..هو مافيش حاجة ليك وللوطن يعني ؟؟ يعني كل حاجة بشتريها عشان هاظبط او هاثبت ؟؟ طب واللي مالوش في الحريم يعمل ايه ؟ يشتري هابي ميل وياكلها وخلاص ؟ ولا دي كمان هتظبط ؟

ودايما يجيبوا جسم ابن كلب في الاعلان بيترش عليه البرفان ونجم عالمي وتيجي بعد كده تبخه انت علي كرشك تبقي عايز ترمي العبوة في الشارع ولو وقفت علي شعرك زي ما بيقولوا مش هتلاقي واحدة بتجري في الشارع ولا حتي في الميكروباص ده اعلان يا ابني فووووق .

وليا سؤال مهم قوي قوي طالما الحكاية كده فهل الراجل اللي بيسرح بشنطة في الاتوبيسات يقدر يظبط بقوة ؟ اصله معاه في الشنطة كل حاجة بتظبط المعجون والجيل ومعجون الحلاقة وكل حاجة في الاعلانات المصرية وتلاقي معاه اسبراي خفيف كمان اكس ولا حاجة .

واعلانات الصابون بترتبط ارتباط وثيق باعلانات السخانات الاتنين فيهم كمية قلع غير طبيعية وكأن عشان نعرف ايه هو استخدام الصابونة وكأنهم بيقولولنا علي فكرة الصابونة بتستحمي بيها بالطريقة دي ناقص يوزعوا مع الصابون كتالوج..مع ان الصابون ليه استخدامات كتير قوي غير الموضوع ده يعني ..وتخرج واحدة من الحمام تلاقي واحد بيشمها ويخلص الاعلان ..وكان في نهاية الاعلان هيقولولنا "هو نهارنا فل ولا حاجة ؟ " !

والسخان برضه يقولولنا ده الجهاز اللي بتستخدموه لتسخين المية عشان تستحموا وكأننا من زحل تقريبا ويعملوا سخانات بالريموت من كتر الرفاهية يعني ..وتلاقي الراجل في الاعلان بيستحمي دايما قبل ما ينزل شغله مع ان ده شئ عجيب قوي هي الناس دي مش عايشة في مصر ولا ايه ؟
هو الواحد ممكن يستحمي اما يرجع ميت مرة اه انما قبل ما ينزل ليه هو هيصحي الساعة 4 الفجر يستحمي وبعدين ينزل يلم تراب البلد كلها عليه ؟؟ هو ممكن الحكاية دي في باريس ماشي انما هنا مين يقدر يستحمي الصبح ده هيرجع لونه اسود فحمي !

يا راجل ده حتي اعلان الجبنة فيه تظبيط !! وصلت للجبنة ..الواد الطفل يبقي قاعد ياكل جبنة عشان الحتة اللي معاه تاخد حتة وتقعد معاه شوية !

واعلانات السمنة عشان اكلك يطلع الشعاع السحري بتاع الاعلان ويجيب عريس او عشان جوزك يملي الكرش .
واعلانات المشروبات تلاقي واحدة فجاة سابت اللي معاها عشان تروح للي معاه بيبسي مثلا !! ايه الدناوة دي هي جاية منين يعني ؟

هو مافيش عندكم اعلانات للشباب العازب ؟؟ ولا كله للشباب المظبط والشباب المتجوز ؟ يعني اعملوا شعارات كده من غير ما تقولوا "ثبت" او "ظبط" او الحكاية دي..اصل الواحد مش عايز يثبت ولا يظبط مافيش حل تاني عشان اخد المنتج ولا اروح اشتري من حتة تانية ؟

Friday, January 13, 2012

قاموس الألفاظ والإيحاءات وسع قوي يا اخواننا..ما تجيبوا من الاخر




ايه يعني اكتب علي بداية الموضوع انه للكبار فقط ؟ ولا اقول تحت 18 مينفعش ؟
انا مش هاقول الفاظ خارجة انا هاقول الفاظ من واقع السينما المصرية والاعلام المصري ..والقاموس عمال بيزداد يوم بعد يوم في السينما والبرامج لحد ما هتبقي حاجة عادية..

زمان كنا دايما نقول "هتخلييني اقول كلمة قبيحة" دلوقتي قاموس الكلمات القبيحة بيزداد قوي في السينما والبرامج لحد ما هتبقي الفاظ عادية يتم تداولها لحد ما هتبقي اقذر الالفاظ في يوم من الايام زي شتيمة "كلب" !

الناس الأول كانت بتقول علي التلميح او الايحاء الجنسي او غيره في الفيلم انه "قلة ادب" ومسخرة بس دلوقتي معادش فيه ايحاءات الموضوع دخل في الصريح وفي الغويط قوي.
كنا نكتب علي الترجمة في الافلام الاجنبي "تبا لك" او "يا ابن النذلة"  بس بعد فترة هنقول الحقيقة وهنترجم حرفيا بقي اكيد !

الموضوع اني دخلت من فترة فيلم "واحد صحيح" لان مكانش فيه غيره في السينما هو شوية افلام اي بتنجان فاضطريت ادخل الفيلم قلت ما هو افلام هاني سلامة حلوة بصراحة وبصرف النظر عن تقييم الفيلم فنيا بس انا بتكلم علي بعض الالفاظ جواه الغريبة جدا علي اذان المصريين .
الفيلم البعض شبهه بفيلم "ناين" الاجنبي وانا مذهول ومذبهل من التشبيه اساسا لاني شفت فيلم ناين بتاع اربع مرات وهو من اروع الافلام اللي شفتها ومش عارف ده شبهه في ايه ولا هو عشان قصة حب متشابكة وخلاص ونسيوا ان التاني فيلم استعراضي وان القصة ملامحها مختلفة اساسا في اجزاء وجوانب رئيسية ولا عشان اي فيلم في تلاتة بيحبوا واحد يبقي هي نفس القصة لا ما هو في افلام كتير من النوعية دي انما الفيلمين مختلفين تماما ولا عشان ده مخرج وده مصمم ؟؟

ممكن نقول انه في من بعيد شبه من فيلم ناين فعلا ويشبهه في بعض الحاجات علي اساس مثلا ان بينلوبي كروز ونيكول كيدمان واحدة رغبة فقط والتانية  قصة حب والتالتة حب وكده  انما حكاية اقتباس مستحيل لان بالمنظر ده يبقي كل الافلام الرومانسية مقتبسة بقي علي اساسا انه كله يقولك اصلها "قصة حب" !! يبقي كلهم سارقين من بعض المهم التفاصيل يا سادة و حتي الخط العريض نفسه والا بقي لو بالشبه يبقي نقارنه بالفيلم الاجنبي الفاشل "شيك ماجنيت" اصل كانت كل البنات بتحبه وتجري وراه !

الفيلم جرئ ومختلف وما انكرش انه عجبني في تفاصيل كتير وان كانت خيالية او يمكن حياة ربع في المية من المصريين ميكملش حتي واحد في المية طبعا ولكن الالفاظ فيه كانت متوحشة شوية وجديدة يعني لأول مرة هتسمع  الفاظ زي "يا ابو شخة" المهم سمعناها وقولنا عادي ده لفظ شائع ولكن اللي قلب السينما ضحك مع ذهول اما سمعنا بسمة في حوارها وهي بتقوله "متزعلش مني اما بفشخك بكلامي..اصل انا خرة..انا خرة..انا اسفة اني فشختك ودايما بفشخك" !!!!

طبعا هاحط علامات تعجب كتير والبعض مش هيصدق الا لما يسمع بنفسه ولكن الالفاظ دي قلبت الفيلم فجأة كانه فيلم كوميدي مع ان المشهد ده كان المفروض يبقي مؤثر جدا بس الالفاظ قلبته مشهد كوميدي فعلا ..لدرجة ان في ناس مصدقتش والبعض بيسأل اللي جنبه هي قالت ايه ؟؟

طبعا بصرف النظر عن حياة الشخصية اللي بيجسدها هاني سلامة اللي هي طول اليوم نسوان وخمرة فقط لا غير وكل الابطال عايشين في بيوت وقصور وهمية ولكن تمثيله في بعض المشاهد كان بارع جدا والفيلم ده تجربة جديدة لو بس كان خالي من الالفاظ دي وكانت نهايته مش هلامية قوي كده ولكن اعتبره اداء جيد من تامر حبيب كعادته في افلامه ونهايات غريبة غير متوقعة .

ولكن قاموس الالفاظ الغريبة ممتد من زمان حتي من التسعينات وقبلها ولكن الفترة الاخيرة ظهر قوي بقوة تلاقي بعض الايفيهات الجنسية في افلام هاني رمزي احيانا زي مثلا في فيلم نمس بوند اما قال "سلاح القنص" قصدي "سلاح العر.."  وكمان في فيلم اخر ليه اما قال "في ابتزاز علي البحر"  وفي فيلم اسد واربع قطط اما قال للعساكر في خطبة وهو بيلخبط الكلام "كبح الجماع" وطبعا فيلم كلمني شكرا اما قال البطل فيه "انا قلبي تحت حاسبي احسن قلبي هيقف"  او اما قال احد المشاركين في الفيلم "هو حالنا بس اللي واقف؟"  .

وطبعا فيلم بلبل حيران اما قال احمد حلمي "عليها حتة طير" واخرهم فيلم انا بضيع يا وديع اليلي كانت فيه ايفيهات خارجة بعنف اما قال احد المشاركين في الفيلم للبطلة وهي نازلة من العربية "أبرده" !!

بس الفكرة ان ده معادش بس في الافلام كنا قولنا ماشي انما المشكلة ان حتي البرامج اللي بتشوفها اسرة كاملة بقت فيها الفاظ خارجة وبقو شايفين ان الألفاظ دي عادي يعني من اول ما مدحت شلبي مرة قرأ نكتة جنسية عن طريق الخطأ ورمزي من الزمالك اما قال "راح يعمل واحد" في برنامج تليفزيوني ومدحت شلبي قال "ده بيشخر للحكم" ده غير مراسل برنامج مع شوبير مرة اما قال لفظ "...أمك" علي الهوا لمراسل تاني وتم ايقافه فترة.
والاعلامي الغريب عكاشة اما قال علي الهوا "ده تهمته انه انسان معرص" !!

ده طبعا غير الاغاني حدث ولا حرج للصبح معاك بقي زي مثلا اغنية "أبو تكة" بس خلاص راحت عليها لان كلمة "ابو شخة" اتقالت رسمي اصلا والاعفن من كده اغنية اسمها "معادش بيقف بلبلي" وطبعا بيتكلم عن بلبل واقف قدام شباكه علي شجرة !!
ولا اغنية هابطة بتقول "انا كل ما البس ماكسي بيقولوا عليا سكسي" !! والوضع بيتطور من ايام نجلا والحصان !

انما سعد الصغير كان بيجيب من الأخر وبيقول "خشي الاوضة خليكي ع الموضة" او "فكي السوستة هتشوفي الكفتة"  يعني مافيش ايحاء ولا حاجة الموضوع صريح يعني
وطبعا نجلا اما قالت "انت لا وهو اه انت سهل وهو صعب..اعمل ايه يا ناس طول عمري بحب الصعب" واكيد مافيش اي ايحاء انا اللي نيتي وحشة !
وبوسي سمير اما قالت "بحبه هو يا قلبي هو اطلعله برة يجيلي جوة..افتح افتح " !!

وحتي اعلانات بعض القنوات اما يترجموا اسم المسلسل ترجمة حرفية فيكتبوا "قريبا مسلسل مدينة اللبؤات" !! طيب ما تترجموه عدل يعني يا جماعة دي الملافظ سعد..او حتي سعد نبيهة بتاع زمان ولا خلاص الملافظ بقت هري دلوقتي ؟


ده كان من فترة اما احمد حلمي قال "حمرا" في فيلم علي الطاحونة الناس استغربت وماتت من الضحك علي اساس ان ده ايحاء امال ايحاءات دلوقتي والفاظ دلوقتي بقي العجيبة دي ايه !!
هل بعد فترة هنشوف الفاظ في السينما وفي البرامج زي برة كده علي الهوا "بس يا ابن الم..." وحاجات زي دي مثلا او عناوين الجرايد زي بعض الصحف في الخارج ؟ هل تقاليدنا تسمح بده  اصلا ؟ وهل ده تحرر ولا اسفاف ؟ ولحد امتي الالفاظ دي هتفضل تزي تزيد في كل فيلم بعد التاني لحد ما تبقي عادي بقي في برامج التوك شو ونلاقي بعد فترة :

اعلامي: الو
المتصل: ايوه يا افندم
اعلامي:وطي التليفزيون يا خ.....
المتصل: حاضر يا ع....
اعلامي" موطيتوش ولا حاجة يا عم الواطي


يعني انا بس بقول الرحمة يا عالم القاموس وسع قوي والالفاظ بتزيد والايحاءات بتزيد قوي ما هو يتبطلوا يا تخلوا الكلام صريح بقي ونخلص يا اعلاميين وفنانيين ولاد تييييت .

الفن الراقي كده هيندثر وحتي المشاهد المؤثرة هتقلب كوميدي بسبب بعض الالفاظ في السيناريو يا جماعة ..يا ريت نهدي شوية محدي قال ان دي جرأة يعني متخلي الفكرة جريئة وخلاص انما مش لازم الألفاظ..وياريت القاموس بتاع الايحاءات في الاعلام والافلام والاغاني يهدي شوية بقي كفااااية .

Tuesday, January 10, 2012

عايز تخس ؟؟ هاقولك كلمة خليها حلقة في كرشك




لما الناس كلها عاملة رجيم امال ايه كمية الكروش اللي مالية البلد دي ؟ رجالة بتتدحرج ع الارصفة وستات بتتأرجح من كميات اللحم الابيض المتوسط !
طول عمرهم يقولوا العقل السليم في الجسم السليم انا لا اؤمن بهذه المقولة اصل هيفاء وهبي مش اذكي من بهاء جاهين مثلا .

اللي بيعمل رجيم بيدور علي الجوجل علي كلمة "حرق" طبعا هيطلعله اول حاجة حرق الدهون قبل حرق الغابات وقبل حرق قش الرز وده دليل علي ان الناس كلها في العالم العربي بتدور علي حرق الدهون
ولو بحثت علي الجوجل علي كلمة "نظام" هيطلعلك نظام رجيم قبل حتي نظام حكاوي بتاع الموبايلات ! يعين الناس مهتمة حتي بالرجيم اكتر من الخطوط والموبايلات ومن كل حاجة .

وتبدأ الاصوات تلعب في دماغك كل يوم اول صوت يقولك "يا عم هتمشي اكلك علي جدول ؟ ده الاكل متعة المتع "  وصوت تاني يقولك "يا عم يعني هتوصل لجسم عمرو دياب ده عنده جيم في البيت " !!
والصوت الاشهر في عالم الرجيم "هتتخن تاني هتتخن تاني فمافيش داعي للحرمان ده كله" والصوت الشهير للي مبيعرفوش يخسوا غالبا هيقولك "وماله الكرش ده عز وفخفخة" !!

احنا الشعب الوحيد ع الارض اللي بيفتخر بالأكل مش عارف ليه ..يعني يقولك الواد ده اكيل الواد ده حوووت يا عم ده في العزومات ناار وكأن ده مصدر فخر الظاهر دي عادة من ايام العرب زمان اما كانوا بيحبوا الست التخينة ويتغزلوا فيها في اشعارهم ..دلوقتي الواد الأكيل دي حاجة حلوة وتيجي تقوله والسعرات يقولك علي راي حلمي "الراجل من غير كرش ميسواش قرش" .

احنا اساسا بنقول للطفل نام وهنجيبلك جوزين حمام ..يعني اكل برضه حتي الطفولة مكافأتها عندنا حمام !! ايه يا عم الفجعنة دي ..وكل ام بتجري ورا اطفالها بالشبشب عشان ياكل والغريب ان فعلا كل الاطفال مش بيحبوا الاكل ولكن اول ما يكبروا تلاقي اللهم صلي ع النبي حوت صغير نازل اكل في الاخضر واليابس وتبدأ الاوزان اللي كانت الام خايفة عليها عشان قليلة تتضاعف وتتضاعف لحد ما الواد ياخد في المدرسة لقب غريب شوية "فشلة" او "تختخ" او "كلبظ" .

واحنا صغيرين تفتح بقك يقولك "اوعي القطر رايح فيييين ؟"  والواد يفتح بقه زي العبيط ..القطر ده بيبقي قطر فعلا اما الواد يكبر والقطر هيروح فين يا ست الحاجة غير في الكرش في الاخر وليه اكل قطر اصلا ؟ اذا كنت طفل بتقولولي القطر رايح فين امال اما اكبر هاكل ايه سفينة فضاء ؟ ايه البغولة دي ؟ ده تمارين ع السمنة يعني ؟
ولا ممكن تلاقي ام تانية تقول لابنها لو كلت الطبق كله هاجيبلك شيكولاتة ..اصل العملية ناقصة يعني مكافأة الاكل أكل !!

والغريبة ان الامهات بيشوفوا حتي ان اكل الاطفال مصدر حسد ! مش عارف ايه اللي يخلي حد يحسد حد عشان بياكل كتير ؟ ده بدل ما يقول اللهم احفظنا من الحوت ده ؟

واول ما يكون في عزومة جامدة تلاقي واحد جاي من بعيد زي الخرتيت والاصوات بتناديه "خش يا وحش" كأنه داخل مصارعة في قفص حديدي من ايام الرومان والناس بيشجعوا برة القفص .
وكله بيوسع للوحش اللي هيقسم الفرخة او الديك الرومي وكأنه فتح عكة وياخد نصه في طبقه ويقعد ياكله زي البغل الاسترالي زي ام بيقولوا مش عارف ليه دايما نشتم نقول بغل استرالي !

وطبعا الوحش ده من جواه نفسه يبقي في جسم اصحابه اللي حواليه اللي بيلبسوا اي مقاس وهو بيدخل محلات الاكس لارج والدبل اكس بس انما ميلاقيش حاجة يلبسها .
واللي يغيظك في موضوع الرجيم اما تلاقي واحدة مثلا وزنها 60 وتكلم برنامج وتقول انا تخنت قوي ولازم اخس ساعتها تحس انك درفيل قاعد ع الكنبة اذا كان هي تخينة امال انا ايه ؟؟

اوعي تفتكر ان بجد في تخين مبسوط بتخنه هو بس بيبوهمك بده انما هو بيغلي من جوة ونفسه يخس لو مش عشان منظره يبقي عشان يعرف يلاقي مقاسه ع الاقل يعني ..سيبك من اللي يقولك وماله التخن يعني مش احسن من الحرمان م الاكل لان هو نفسه اصلا عايز يخس بس مش قادر يبطل اكل عشان الوهم المصري اصل الرجيم هيتعبني وهيضعفني ومش هاعرف اكون مصحصح طول اليوم علي اساس ان الفول هو اللي بيخليك مصحصح مش متيس !!

ويبدأ اللي عامل رجيم في ادمان اي برنامج اكل وكأنه بيشوف فيلم ثقافي ..اهو بيعوض بعينه اللي مش قادر ياكله في ايام الرجيم وياحبذا لو فتح قناة فتافيت صديقة المحرومين من الطعام ..القناة اللي فيها وصفات بيعتبرها البعض خيال علمي عشان المكونات العجيبة في بعض الاحيان والطريقة اصلا اللي بيعملوا بيها بشياكة غريبة والبوتاجازات التاتش والرف اللي بيفتح لوحده ..واصلا اي ست في الدنيا لو عملت اكلة في البيت مبتقعدش تحط المكونات قدامها في اطباق صغيرة بالشياكة دي زي برامج الاكل طبعا عشان متبهدلش اطباق كتير انما الكلام ده في البرامج بس انما مبيحصلش في البيوت غالبا كله بيرمي في الحلة وخلاص .


ويبدأ صاحب الرجيم في كتابة اي برنامج تخسيس وخلاص قدامه ويدور ع المشروبات السحرية اللي هتخسسه زي ما النت بيوهم الناس هي بتخسس اه بس علي مدي بعيد قوي وبكميات كتير انما الناس فاكرة انها تشرب كوباية شاي اخضر تقول انا خسيت بسبب الكلام اللي ع النت في موضوع التخسيس.
وتحس فجاة انك ابن الطبيعة او طرزان كل اكلك خضروات وكل شربك شاي اخضر وزنجبيل وحاجات غريبة حتي الكابتشينو ممنوع ايه الحياة دي يا عم ؟
المفروض حتي برنامج توفيق عكاشة ممنوع لانه بيخلي الواحد ياكل زي البطة طول الحلقة اللي ملهاش اي تلاتين لازمة !

وبمتابعة البرامج بتاعة الرجيم عبر القنوات كلها ودخولك المنتديات البناتي واحساسك انك "سوسن" طول الوقت بتحس باحساس انك هفأ قوي..اما تلاقي في المنتدي اللي انت قاعد تقراه كلام علي واحدة بتخس عشان جوزها ..ومش بعيد تغير اسمك في المنتدي فعلا لسوسن وتبدأ تشتري زهرة الخليج كل اسبوع !

وكل البرامج معظم اللي بيتصلوا بنات وستات وتلاقي نوعيات معينة بتتكلم وانماط معينة في معظم الحلقات وحتي الراجل اللي بيتصل هتلاقي عشان مراته مش عشانه وكأن كل رجالة مصر راضية بالكرش يا اما النوع التاني علي النقيض بتوع الجيم طول الاسبوع والمجانص والترابيس ..اصلا كلمة مجانص وترابيس دي تحسسك انك بتكلم حيطة خايف تلمسه تلاقي صدره بيلعب لوحده .

والدجل بقي يبدأ يكتر ويقولك خد الاسورة دي عشان تصحي تلاقي نفسك خاسس وخد الحباية دي وكل زي الطور عادي جدا وأي كلام بتاع الاعلانات اللي بعض الناس بتمشي وراها عشان متبطلش أكل قال يعني الاسورة هتخسسك وانت نايم لا سحر ولا شعوذة .
طبعا ده غير حزام السونة وحزام العبط وكل الحاجات اللي تقعد حاططها حوالين الكرش بدون اي جدوي واحد قاعد ياكل ولابس حزام ومستني انه يخس بالذمة ده مش عبط مزدوج يعني ؟
والشاي الصيني بقي اللي هيخلي جسمك صيني ويجيبلك في الاعلان واحدة معضمة قال يعني الشاي خلاها كده مش خلقة ربنا هي مولودة عضمة اساسا .



وشوف بقي انوع الناس اللي بيتصلوا علي برامج الرجيم هيكونوا نوع من دول :



1-البنت اللي بتتصل بدون سبب :


المتصلة : الو
الدكتور : ايوه
المتصلة : دكتور انا جسمي حلو بس..
الدكتور :اوببة وانا تيييييييييييت
المتصلة: انت مش متربي علي فكرة


دي بتكون متصلة بدون سبب معين وكانها بتشمت في التخان يعني او بتغيظهم وبتكون وزنها مثالي بس عايزة برنامج رجيم عشان تنزل نص كيلو كمان يا حرااام وبيكون الدكتور في نفسه عايز يقولها كده فعلا .




2- ابن التخينة :

المتصلة : الو يا دكتور ماما تخينة
الدكتور : ههه يا فشلة يا فشلة
المتصلة : علي فكرة دي كلمة قديمة قوي فشلة دي
الدكتور : طيب ماما فين ؟
المتصلة: ماما بتاكل دلوقتي قدام الحلقة

وده بيتصل غالبا لان مامته لسه قاعدة تاكل حتي قدام برنامج الرجيم مش قادرة تبطل ولو ساعة وطبعا الدكتور اول ما يسمع كلمة ماما تخينة اللي بتتقال كتير في البرامج بيبقي عايز يقوله يا ابن التخينة لان مش معقول دي دخلة مكالمة اساسا من غير سلام حتي .



3- ما تفهمونيش غلط :

المتصل: يا دكتور باكل بليل كتير وتخنت
الدكتور : ويجيلك هيجان ؟
المتصل : ساعات يا دكتور حسب البيت بقي وانت عارف
الدكتور : انا عارف ايه يا عم انا قصدي نهجان  يعني كرشة نفس كده وبتنهج ؟
المتصل: احم ..اه فهمت حاجة تانية اسف يا دكتور اه بيجيلي نهجان انا سمعتها كلمة تانية




4- النوع اللي بيهجم علطول :


المتصل : يا دكتور انا اسف انا مش مقتنع بكلامك ولا برنامج الرجيم
الدكتور: ليه يا عمنا بس ؟
المتصل : يا دكتور حضرتك بكرش انا اسف يعني شوف نفسك في المراية حضرتك عملاق فعلا ومش معقول هتقدر تخسسني وكرشك بالحجم ده
الدكتور: يا سيدي ما دكتور الامراض الصدرية بيدخن عادي
المتصل: معلش يا دكتور بس انت هاجم عليا بكرشك وبتقولي خس مش هاقتنع زي ممدوح فرج ما بيقولي خس
الدكتور: خلاص يا سيدي روح شوفلك مكان تاني تخس منه وسيبك من كرشي



5- مريض بزيادة :

المتصل: انا والدي تعبان يا دكتور
الدكتور: خير عنده ايه؟
المتصل: هو عنده الضغط
الدكتور: ووزنه عامل ايه ؟
المتصل: لا هو وزنه 160
الدكتور: لا بسيطة ان شاء الله
المتصل: لا يا دكتور ما هو عنده القلب كمان والسكر
الدكتور: يا ساتر يارب
المتصل: وكان جاله جلطة من فترة قصيرة ده غير فيروس سي
الدكتور: اقفل يا ابني ده برنامج رجيم مش حانوتي

ههههههه فعلا الدكتور اما يسمع الكلام ده يبقي عايز يقوله الراجل يروح يموت احسن هو عايز يخس ليه اساسا ؟ وده بيحصل في برامج الرجيم انك تلاقي واحد بيشتكي من كل الامراض وتلاقيه عايز يخس يا عم شوف الأولويات وتعالي خس ده انت بتودع اساسا .

اغرب حاجة كمان ان في واحد في احدي القنوات كل ما حد يكلمه يقوله قبل ما اعرف وزنك وطولك انت برج ايه الاول !! يقوله مثلا انا برج الميزان يقوله اااه علشان كده مبتعرفش تخس كويس ولا تمشي علي الرجيم !
ده علي كده برج الحوت مستحيل يخس بقي ! ايه الكلام المريخي ده ؟

يعني الاصعب من الرجيم برامج الرجيم نفسها الفرجة عليها كتير تجيبلك الخفيف والمشكلة ان البرامج الصحية كترت في كل القنوات وبقت مصدر للهري زي الجرايد الصفرا بالظبط .
حاول تخس ولو معرفتش قول لنفسك  يا اخي "الكرش هيبة" برضه وخلاص.

Saturday, January 7, 2012

قضية مبارك وقضية ستيفن لورانس ..هل نأخذ الدروس والعبر ؟




من وصايا عمر بن الخطاب للقاضي ان قال له " لا يمنعك قضاء قضيته بالأمس ثم راجعت فيه نفسك  وهديت فيه لرشدك ان ترجع عنه , فإن الحق قديم ومراجعة الحق خير من التمادي في الباطل "


قضية مبارك والعادلي التي لا تحتاج تقريبا إلي أدلة ولا تحتاج حتي الي شهود فمصر كلها شاهدة علي ما حدث لأبنائها واستشهاد أبطالها في الثورة طال وقتها وبدأ الضجر يستشري في أهالي الشهداء ولهم كل الحق ..

نشعر أن البحث عن الأدلة نفسه فيه من التخاذل ما لم نره في اي قضية من قبل ويشعر البعض ان العدالة والقوانين في مصر في حاجة الي تعديل حتمي اذا كانت قضية مثل هذه لا نستطيع ان نري فيها حكم رادع برغم براعة النيابة وخطبتها امام القاضي والهجوم العنيف علي مبارك والعادلي الفاسدان.

جائت قضية جاري دوبسون وديفيد نوريس لتعطينا مزيدا من الدروس في كيف تكون العدالة وكيف يتم القصاص من المجرمين وان طالت المدة وان ضعفت الأدلة حتي..فلا يأس يصيب الباحثون عن العدالة هناك ..
جريمة قتل حدثت منذ ما يقارب عشرون عاما عندما طعن مجموعة من الشباب "ستيفن لورانس" في لندن عندما تبادلوا معه الألفاظ العنصرية ثم قتلوه امام محطة الأتوبيس هناك .

تلك القضية كانت من أشهر القضايا في لندن لفترة طويلة وكانت قضية عنصرية من الدرجة الأولي لشباب ابيض يقتلون شابا أسودا ثم لا يحكم علي أحد بأي حكم لعدم ثبوت الأدلة وبدأت الاتهامات حينها تنهال علي شرطة بريطانيا بأنهم لم يتعاملوا بعدالة وحيادية مع القضية وأنهم عنصريون .

ولكن بقعة دم صغيرة جدا علي جاكيت احد القتلة وهو جاري دوبسون تم الكشف عنها قبل ذلك فكان الكشف سلبيا ثم اعيد الكشف بفحص ميكرسكوبي ليثبت بذلك ان بقعة الدم تلك هي للضحية وان المتهم كان موجودا بالفعل في مسرح الجريمة حين وقوعها .

وكانت من بين الادلة اتهام صحيفة انجليزية علنا في عنوانها للجناة بدون ادلة قاطعة ولكنها كتبت "المجرمون" وكتبت اسمائهم بالكامل وقالت ان كانوا يريدون ان يقولوا انهم ليسوا الفاعلين فليقاضونا !
وكانت جرأة شديدة تعودناها من الصحف الانجليزية في كافة المجالات وشجاعة يحسدون عليها .

وايضا كان الجميع متأكد من انهم الجناة خصوصا ان احدهم سبق له السجن بتعاطي المخدرات والاخر في مشاجرة عنصرية اخري مع ظابط اسود اي ان العنصرية عند افراد هذه العصابة حدث اعتيادي .

وكانت لحظة الحكم هي لحظة السعادة لوالدة ستيفن لورانس ولحظة الدهشة والحزن العميق لوالد دوبسون حينما صاح بعنف "عاري عليكم عار عليكم" حين نطق القاضي بالحكم .
وقالت والدة ستيفن وهي فرحة بالحكم " ربما يكون الحكم ضعيف مقارنة بما فعلوه ولكني سعيدة به جدا "

وكانت اسرة ستيفن لورانس قد يئست من الشرطة في وقت الجريمة حينما شعرت بعدم الجدية الكافية واتهمت الشرطة بالعنصرية فعينت فرقة تحقيقات خاصة للوصول الي الحقيقة وفعلا نجحوا بعد سنوات من اليأس في الوصول للحقيقة في ان يصلوا للعصابة التي قتلت ابنهم وكانت رحلة طويلة يبحثون فيها عن العدالة ورحلة طويلة امام القضاء العادل .

وكانت كلمات القاضي قوية وقاسية علي القتلة وتم ردعهم باحكام قوية  حدها الادني 15 سنة واقصاها سجن مدي الحياة حسب القانون البريطاني وقال في كلماته "انهم قساة القلب عنصريون روعوا ضمير الأمة البريطانية" .

هل رأيتم هذه الكلمات ؟ "انهم قساة القلب روعوا ضمير الأمة البريطانية" ..قال القاضي هذه الكلمات لمجرد ان مجموعة افراد فتكوا بشاب امام محطة اتوبيس فما بالكم بمبارك ونظامه الذي فتك بمئات بل بألوف المصريين قتلا واصابة وملايين منهم فقرا ومرضا وقهرا وحسرة ..ألا يروع هذا ضمير مصر بأكملها ؟ القصاص في انجلترا من قضية عمرها عشرين عاما فما بالكم بقضية عمرها شهور وأدلتها واضحة وضوح النهار وشمسه .

ذهب في هذه القضية أصدقاء المتهمين وهم يخبأون وجوههم من الصحافة خجلا رغم ان ليس لهم أي علاقة بالجريمة ولكنهم فقط أصدقاء الجاني !! فما بالكم بأحباب مبارك الذين يجاهرون بعشقه بكرة وأصيلا وفي كل مكان وزمان !! لا يخبأون وجوههم بل يقفون بوجوههم كاملة عارية ويوجهون الاتهامات لاهالي الشهداء ايضا ..ياللعار أين حمرة الخجل !!
أصدقاء المتهم يخبأون وجوههم من الصحافة والاعلام لانهم اصدقاء من قتل فردا فما بالكم بأبناء من قتل الوف وشرد وأفقر وأمرض ملايين ؟؟ أين الحياء ؟؟ أليس فيكم رجل رشيد ؟؟

لو كنت انا من عشاق مبارك والله لأختبأت في مخبأ تحت الأرض ما خرجت منه ولا جاهرت بكلمة حتي تفوت أزمان وأزمان وأحاول ان اصفح عن نفسي امام نفسي وامام العالم وامام ضميري..
والله لو كنت من مجانين مبارك لطأطأت رأسي خجلا ولجلدت نفسي أمام المرة كل يوم حين أري وجهي وعليه علامات رضا عن السفاح .
والله لو كنت من عشاق مبارك لوددت أن تقتلعني الأرض من نبتتها لاني سأعتبر نفسي نبتة خبيثة .

وليس فقط البحث عن الأدلة والتحقيق بضمير في القضية هو الدرس المستفاد من هذه القضية الانجليزية بل ايضا هناك درس أخر من قضية أخري تماما في فنلندا هذه المرة حينما تم العثور علي بعوضة في سيارة مسروقة وقاموا بتحليل الحمض النووي فعثروا علي السارق حينما حللوا دم البعوضة ووجدوه يعود لمسجل سابق لدي الشرطة !

البحث عن أدلة ولو كانت بعوضة !! أليس في قضية مبارك بعوضة واحدة تشهد أنه قتل ؟؟ أليس هناك حقا دليل علي مبارك والعادلي والفيديوهات والاسلحة والتسجيلات تملأ البلاد من كل حدب وصوب ؟؟
أي جنون هذا ؟؟ عن أي دليل نتحدث ؟؟ أليس هناك ولو جثة تشهد أمام سيتركوا الأمر حين تشهد ايديهم وارجلهم يوم القيامة ولا نجد لهم عقاب في الدنيا ؟؟

لماذا لا تؤدي التحقيقات في مصر الي اي نتيجة ؟؟لماذا يبحثون لسنوات طويلة ويستعينوا ولو ببعوضة كدليل ونحن نماطل في الادلة وفي الوقت بدون سبب واضح ؟؟ هل هناك قصور في بعض القوانين أم ان هناك مسرحية ما تحدث علي ارض مصر ؟؟ لماذا لا نعتبر بهذه الدروس والدروس من حول العالم كثيرة جدا في فنون العدالة والضمير والمهنية .

ستظل قضية ستيفن لورانس والقاتل جاري دوبسون هي درس من انجلترا في العدالة وكيف يكون قتل انسان هو حدث يروع ضمير أمة كما قال القاضي بسبب قضية واحدة عنصرية ..فكيف في عصر مبارك كانت المبيدات المسرطنة والقمح المغشوش لا يروع ضمير كون بأسره ؟؟ كيف كانت العشوائيات والفقر المدقع والتعذيب في المعتقلات لا يروع ضمير كون بأسره ؟؟

كيف مات هؤلاء الشهداء وكيف اصيب من اصيب وفقدوا اعينهم ؟؟هل هي صدفة ؟؟ هل الأمر حقا يحتاج لأدلة ؟؟ أليست هناك أدلة كافية ؟؟ أسألوا 80 مليون مصري اذا استثنينا الفلول الذين باعوا ضميرهم للشيطان ..أسألوا 80 مليون مصري عن ما فعله مبارك ونظامه ..وياليتها كانت محاكمة ثورية من الأساس ولم نحتاج لجمع الأدلة حتي الأن ..ياليتها كانت محاكمة ثورية كان القصاص فيها أسرع وأعدل وأحق.

الكل يريد العدالة الناجزة ..العدالة التي لو تأخرت عشرون عاما مثل حادثة انجلترا فانها في النهاية تقضي بالحق ولا شئ غير الحق..العدالة التي تجمع الأدلة ولا تقلل من شأن اي دليل..العدالة الحاسمة ذات الاحكام الرادعة لكل من تسول له نفسه القيام بأفعال عصابة نظام مبارك مرة أخري .

العدالة التي حاكمت تيموشينكو في اوكرانيا وجاك شيراك في فرنسا وغيرهم من الذين اساؤا استخدام المناصب والنفوذ في غير وجه حق .
نريد العدالة ولا شئ غير العدالة .

Wednesday, January 4, 2012

افضل وأقوي أفلام هوليود لعام 2011





كان عام 2011 عاما فنيا متميزا كما تعودنا من هوليود في دفقة ابداعها كل عام وتميز بعدد من القصص الجديدة تماما والغريبة وايضا الاخراج المتميز والمتجدد كما راينا مثلا في فيلم
the tree of life
وفي رأي فإن خلاصة افلام هذا العام وافضلها هي :

the tree of life

The Beaver

The Skin I Live In

A Dangerous Method

Melancholia

The Music Never Stopped

Water for Elephants

Midnight in Paris

The Ides of March

Moneyball



واتوقع لهم حصد العديد من الجوائز او لمجموعة منهم ..ولكن كان العام مميزا ايضا في افلام الاكشن اللي كانت علي شكل انتقامي او قصص انتقام في اغلبها كما راينا في فيلم
colombiana
او
setup
وغيرهم من الافلام

وكانت هذه السنة في افلام الرعب هي سنة السلاسل فمعظم افلام الرعب هذا العام هي اكمال لسلسلة شهيرة من هذه النوعية كاضافة الجزء الرابع او الخامس في اشهر سلاسل هذه الافلام .

بينما لم تكت سنة مميزة جدا في افلام الرومانسي كوميدي بل ان معظم افلام هذه النوعية لم يلقي النجاح الكافي وكان أسوأ فيلم في اختيار موقع اي ام دي بي حسب تقييم الناس والذي حصل علي درجة متدنية جدا هو فيلم
jack and jill
للفنان ادم ساندلر الذي قل مستواه كثيرا في افلامه في الفترة الاخيرة وكان ساندلر في هذا الفيلم يجسد شخصية رجل واخته في نفس الوقت وربما هذه الطريقة لم تعد تلقي رواجا واصبحت شكل قديم للكوميديا لم يحتملها البعض وهذا هو سر التقييم الضعيف للفيلم حتي مع ظهور الباتشينو ضيف للفيلم في مشاهد متعددة .

وكانت سنة مميزة ايضا في افلام الفانتازيا والسكاي فاي ونوعية الافلام الخيالية حيث اضيفت لهذه المجموعة العديد من الافلم الجيدة هذا العام لمحبي هذه النوعية تحديدا .
بينما كان نجوم الاكشن هذا العام هم بروس ويلز وجاسون ساثام بافلام متميزة في فئة الاكشن .

ونبدأ في تقسيم نوعيات الافلام واضافة الافلام المميزة في كل فئة لعام 2011 ونري معا اروع واقوي الافلام في كل نوعية علي حدة :


action :


the mechanic

Unknown

hanna

the eagle

Source Code

Age of Heroes

Kill the Irishman

Ironclad

BLITZ

Largo Winch 2

Immortals

Red State

Seeking Justice

Colombiana

Killer Elite

Real Steel

Rise of the Planet of the Apes

Setup

Captain America: The First Avenger

In Time




drama :


The Lincoln Lawyer

Water for Elephants

The Beaver

That's What I Am

Moneyball

Warrior

The Art of Getting By

One Day

50/50

J. Edgar

The Ides of March

The Skin I Live In

Martha Marcy May Marlene

Hugo

A Dangerous Method

Drive

Love Likes Coincidences

Margin Call

Melancholia

Page Eight

The Shunning

The Music Never Stopped

The Tree Of Life

Win Win

United

The Help

Trespass

Contagion

The Son of No One

Midnight in Paris

Another Earth

The Rum Diary






comedy :


The Green Hornet    

Hall Pass

Paul

The Hangover Part 2

The Dilemma

Bad teacher

Mr Poppers Penguins

Horrible Bosses

Your Highness

La vita facile

The Guard

The Muppets

30Minutes or Less

Flypaper

Johnny English Reborn

The Change-Up

Tower heist






romance comedy :


Just Go with It

Arthur

From Prada to Nada

No Strings Attached

Larry Crowne

New Year's Eve

A Little Bit of Heaven

Crazy, Stupid, Love






fantasy :

The Adjustment Bureau

i am number four

Limitless

Sucker Punch

Beastly

Priest

Season of the Witch

Thor

Cowboys & Aliens

Super 8

Conan the Barbarian





horror :


The rite

Scream 4

Final Destination 5

Underground

Hostel Part 3

Bag of Bones

Dream House

11-11-11

Dont Be  Afraid Of The Dark

Fright Night

The Caller

The Thing

Wrong Turn 4

Paranormal Activity 3




animation :

Rango

Mars Needs Moms

Gnomeo & Juliet

Rio

The Smurfs

Dragons: Gift of the Night Fury

The Adventures of Tintin

Puss in Boots




وكانت هذه افضل افلام 2011 حسب نوعية كل منها وننتظر المزيد من الانتاجات الضخمة للعام الجديد .

Sunday, January 1, 2012

سنـة عدت وأمل قادم وأبرز أحداث وشخصيات العام






سنة جديدة سعيدة وتحمل الخير لمصر ان شاء الله..سنة يعيش فيها الشعب المصري حريته الكاملة ويتمتع بحقوقه الكاملة من غير عائلة الظلم والطغيان اللي سرقت كل خير البلد..
أول سنة بعد الثورة ..أول سنة يشم فيها المصريون الحرية اللي بجد مش حرية السقف بتاعة مبارك وعصابته..اول سنة بعد سنة مليئة بالاحداث منها العظيم ومنها الكارثي..
سنة فاتت كانت مليئة بشخصيات جديدة ظهرت علي الساحة وشخصيات اختفت تماما ومعادش ليها وجود فجأة بعد الثورة..
سنة أسقطت انظمة وكان ليها اجمل اسم  "سنة الربيع العربي"..فعلا ربيع وزهرته الحرية وعبيره العدل والحق..


ومن اهم احداث وشخصيات السنة :

أجمل حدث : الثورة المصرية العظيمة اللي اسقطت نظام من افسد النظم في العالم

أكثر شخصية فنية مؤثرة في الثورة : خالد الصاوي

أجمل مشهد : مشهد المسيحيين وهم بيحموا ظهور المسلمين وهم بيصلوا في التحرير

أصعب يوم : يوم جمعة الغضب

أسوأ مشهد : مشهد القاء الملتوف من علي اسطح المباني ومشهد حرق المجمع العلمي

أهم شعار : ارفع راسك فوق انت مصري

أقسي حدث : الزلازل اللي كانت في اماكن كتير حول العالم منها تركيا واليابان

أسوأ توقعات : توقعات نهاية العالم كالعادة زي كل سنة اما يقعدوا يقولوا العالم هينتهي يوم كذا وميحصلش حاجة طبعا

أسوأ شخصيات العام : عمرو مصطفي وتوفيق عكاشة وسبايدر وطلعت زكريا

أبرز شخصيات العام : البرادعي واسماء محفوظ واسراء عبد الفتاح ووائل غنيم

شخصيات فص ملح وداب : ممتاز القط واسامة سرايا وغيرهم

أسوأ إعلامي : توفيق عكاشة

أسوأ موقف فني : سماح انور

أصعب حدث أدبي : عندما فقدنا أسطورتين مثل انيس منصور واحمد بهجت

أغبي تصريحات : القذافي اما قال "مبارك لا يملك ثمن ملابسه"
ومحامي مبارك اما قال " مبارك هو اول من أيد الثورة"

أشهر جملة للمخلوع :  "إما انا او الفوضي" وجملة "لم اكن في يوم طامعا في سلطة او جاه"

أطرف صفحة ع الفيس بوك في العام الماضي : صفحة عن مناخير الرئيس وهو بيلعب فيها في المحاكمة

أكبر مفاجأة  : سيطرة الاخوان علي البرلمان بعد ان كانت تلقب ب "المحظورة"
وحبس العادلي في نفس زنزانة خيرت الشاطر التي خرج منها حرا

أسوأ أحداث رياضية : نزول الجماهير اكثر من مرة في الاستاد والعراك مع قوات الامن
وبقاء سمير زاهر ورجالته في اتحاد الكرة المصري

أشهر شخصيات العام : الراجل اللي ورا عمر سليمان-الراجل ابو جلابية- الست اللي ورا القذافي-سيدة الحواوشي

أشهر صابع : صابع الفنجري

أسوأ جملة من ابناء مبارك : اما قالوا "مبارك من نسل الرسول "

أشهر قائمة : القائمة السوداء للفنانين

أسوأ تمثيلية : تمثيلية سرير مبارك في القفص

إعلامي العام : يسري فودة

أسوأ تصريح : اما شفيق قال "هاجيبلهم بونبون وشيكولاتة في التحرير"

أجمل عودة : عودة عايدة الايوبي صاحبة الصوت العذب  للغناء بعد الثورة

أغبي جملة : جملة ممتاز القط اما قال في برنامج "مجلس الشعب القادم هو اقوي مجلس وانزه انتخابات هي اللي حصلت وتمثيل المرأة سيكون قوي جدا"  قصده عن المجلس المزور اللي كان ايام مبارك اللي متمش الحمد لله

أسوأ تصريح لرئيس : اما قال مبارك جملته الشهير "خليهم يتسلوا" في قمة الاستهزاء والغباء السياسي

أفسد شخصية في العام : أحمد عز وصفوت الشريف..انا اعتبرهم في رأي الشخصي أفسد من مبارك وأبنائه

أقوي شخصية نسائية: جميلة اسماعيل

من اقوي المشاهد تاثيرا في العالم العربي : مشهد "بن علي هرب" اللي كان في فيديو اتشهر جدا بعد ثورة تونس وراجل بيصيح في الشارع بالجملة دي في قمة الفرحة بسقوط بن علي

من اجمل المشاهد : مشاهد الافراح اللي كانت بتتعمل في التحرير في وسط الثورة

أشهر ألفاظ :  "فلول"  "متلونون"  "متحولون"  "أجندة "  "حزب كنبة"

أطهر ناس : شهداء العالم العربي في الثورات

أكثر الكلمات انتشارا : "زنجة زنجة" للقذافي


كانت سنة طويلة جدا مليئة بالاحداث الجميلة والحزينة لكن السنة الجاية ان شاء الله تكون اجمل سنة تعدي علي مصر واهل مصر ..وكل سنة وانتم جميعا بخير ..