Wednesday, June 29, 2011

ميدان التحـرير ..هل هو ثـورة أم وطـن ؟؟






الجميع الأن من فلول النظام السابق يتهافت لتشويه سمعة التحرير بأي طريقة تجوز لهم..أحداث مدبرة بدهاء ومكر الثعالب لتساعد وتصب البنزين فوق النار بالنسبة لمن هم متحاملون أصلا علي ميدان التحرير ويربطون جميع الأحداث المؤسفة في الفترة الاخيرة بالثورة وبالتحرير..!
الكثير ممن بكوا لمبارك وصفقوا له وقالوا عنه "بابا مبارك" هم من يسبون في الثورة فور وقوع أحداث مثل التي تحدث في ميدان التحرير أو اي كارثة في اي مكان في مصر ..حتي مباراة الاتحاد السكندري التي نزل فيها الجماهير الي ارض الملعب نسبها البعض الي الثورة وقالوا في كل صلف "ثورة حرامية" !!!

خلط أوراق غريب جدا وتفكير غير منطقي علي الاطلاق في ربط ملعب كرة قدم بالثورة وان ينسبوا مجموعة من البلطجية للثوريين المصريين الشرفاء ومازالت الاصوات تتعالي للأسف الشديد في جميع المنتديات علي الانترنت وفي جميع التعليقات في المواقع الاخبارية ويقولوان بكل جرأة "الثورة ضيعت البلد" ..!
لا اعرف اي بلد يتحدثون عنها اصلا فكل ما نعرفه ان في عهد الفاسد مبارك لم تكن هناك مصر أصلا !! كما قال الشاعر "خايف افتح الشباك ملاقيش مصر" ..فعلا كنا لا نجد مصر في أي مكان مهما بحثنا عنها
..لم تكن مصر العزيزة الكريمة الأبية القوية بل كانت مصر المهانة الضعيفة السلبية العاجزة الفقيرة ..فلا اعرف ماذا اضاعت الثورة في مصر فكما يقول المثل المصري "ايش ياخد الريح م البلاط" ..أو كما يقال "أنا الغريق فما خوفي من البلل" ..وربما لم يترك لنا مبارك حتي البلاط فقد أستأثر به لنفسه وترك للمصريين الريح فقط ليعيشوا في برده وعصفه .

حوادث الكنائس كانت تحدث بعد الاعلان عن حكم للعادلي السفاح وحوادث ماسبيرو بعد حكم اخر والجميع يلاحظ الأن ان بعد كل حكم ضد النظام السابق في اي جهة او هيئة تحدث الكوارث تباعا مثل حادثة ميدان التحرير الاخيرة التي خرجت لنا فجأة بتدبير واضح للعيان بعد الحكم بفض المحليات ..بالتأكيد انها ليست من قبيل المصادفة ولكن انهم الأباطرة وتايكونات الفساد الذين نهشوا في المجالس المحلية وأكلوا الحرام نارا في بطونهم وأستعذبوا طعم الحرام الي ان صار في عيونهم حلالا طيبا مباركا.

المحليات التي فضحت ولم تستر يوما عرض البلد وخاضوا في عرض الشرف نفسه وسلموا انفسهم جثث هامدة لملكوت الفساد وسلطان الاستبداد وسار فيها الكل علي شعار "احترامي للحرامي" كما تقول الاغنية أخرجت لنا الأن بعض الغيلان ومصاصين الدماء للإنتقام ولكن من من تحديدا ؟ انه الانتقام من مصر التي هي بالطبع ليست أمهم ولكن هي حصالة نقودهم فمعظم التابعين لغول النظام السابق بلا انتماء حقيقي ولا فضيلة ومستعدين للتنازل عن جنسيتهم مقابل ابخس الأثمان .

ان الأوان في الاسراع في الاحكام وخصوصا علي العادلي "ابو لهب" الذي اصاب وقتل مئات المصريين وعذب الألاف في عهده البائس ..ولكن كلا الطرفان يستحقان اللوم الان فالطرف الاول الحاكم يستحق اللوم للتباطؤ الواضح في تنفيذ الاحكام الواضحة للعيان مثل الاعدام للعادلي السفاح مثلا فأي ورق يستحق ان ينظر ويراجع لاتخاذ القرار ؟؟ هل للسفاحين مشانق حريرية ؟؟ هل للقتلة حكم أخر غير الاعدام ؟؟

اما الطرف الثاني صاحب الحق فيستحق اللوم لاتخاذه ميدان التحرير وطنا وليس مكانا لتحرير الوطن ..لاتخاذ الميدان غاية وليس وسيلة ..فلا احد يتخيل ان تكون كل طلبات المصريين في السنوات القادمة فقط من الميدان !! ألا يوجد وسيلة للتظلم أو للجلوس علي مائدة حوار ؟؟ نعتقد جميعنا ان الوضع تغير وان الحوار اصبح موجودا وقائم مع وجود هذه الائتلافات جميعها والاحزاب والحركات التي تتفاوض مع الحكومة والمجلس العسكري في امور كثيرة فلماذا لا نجلس معهم ونتفاوض أولا وثانيا وثالثا ورابعا ثم نثور خامسا !!

وأنا دائم اللوم وجميعنا دائمون اللوم علي الامن المصري ولكن الامن المصري احيانا يكون علي صواب وليس مخطئأ دائما فمن يلومه علي تصرفاته أحيانا يخطئ..فالأمن وان كان يتعدي ويتخطي خطوطه وحدوده احيانا ولكن ايضا موضوع القنابل المسيلة للدموع ومكافحة الشغب موجودة في كل دول العالم فلا تصوروه علي انه افسد نظام امني في العالم فهناك خلط ما بين ظلم الامن وتخطيه حدوده وما بين قيامه بواجبه في بعض الظروف وحتي لو كانت قليلة ..فمثال اليونان قريب علينا ونجد الامن يلقي كافة اشكال القنابل علي المتظاهرين رغم انهم يعانوا من مشاكل اقتصادية طاغية وعميقة جدا ولهم لك الحق ان يثوروا ولكن لابد احيانا من التفرقة بين المطالبة بالحقوق وما بين الشغب ..ومثال اخر هو المثال الكندي الذي شاهدناه من فترة وتدخل الامن بعنف وقسوة لتفريق جموع مشاغبين من جمهور فريق لمباراة
هناك !
وحتي في النمسا حدث هذا ايضا وفي الارجنتين عقب هبوط احد الفرق الشهيرة هناك وكان الشغب دامي وتدخل الامن اقسي !
ورأينا العديد من الفيديوهات والمقالات تتحدث عن التدخل العنيف للأمن في اسبانيا لتفريق المتظاهرين هناك ايضا رغم مطالبتهم بحقوقهم !وفي انجلترا ايضا نجد ذلك حتي اسماها البعض موقعة الجمل
الانجليزية !!


فمن المهم اولا ان نعرف حدود الامن وواجباته وبين خطوطه الحمراء التي لا يجب ان يتعداها ..وفي كل مرة لابد من معرفة من الذي بدأ بالشغب او الاستثارة ولا نلقي دائما وبشكل افتراضي مجهز اللوم علي الامن ..نعم هناك تجاوزات صارخة من الامن في احيان كثيرة ولكن هل هذا دائما ؟؟ ألا يستفز ايضا بعض الناس الأمن استفزازاز عنيف ويلقي عليه الزجاجات والطوب بشكل رهيب مجحف !!

اذا فالجميع يطالب الحكومة بضرورة وجود جهات رقابية علي الشرطة المصرية لتحديد التجاوزات من عدمها ومحاسبة المخطئ مثل النموذج الامريكي مثلا الذي يتم فيه محاسبة اي شرطي فاسد فور صدور دليل عليه من جهات عدة عملها الوحيد هو ملاحقة الفساد الشرطي ..ولكن نطالب ايضا الجميع بأن يكون ميدان التحرير للظروف القصوي حتي لا يفقد هيبته وكونه رمزا خالد للثورة المصرية التي ستكون في مناهج مدرسية للعديد من الدول ..

فحافظوا علي الميدان ولا تدعوه احيانا للأوغاد والمتحرشين كما حدث مع المذيعة التي تحرشوا بها من قبل من قبل بعض المنحرفين الذين يستغلون احيانا الظروف ليشغلوا الميدان بلا اي هدف .

ولابد ان نترك القضاء المصري يقوم بواجبه الكامل وحتي الأن ربما نجد التباطؤ واضح ولكن ليس تواطؤا علي الاطلاق وربما يعيب البعض علي بعض المواطنين الالتفاف حول المحاكم ومحاولة التأثير علي رأي القضاء وفعلا هي نقطة سلبية ولكن تحدث ايضا في كل دول العالم من ايام مالكوم اكس والمحاكمات وفي عدة قضايا كان "السود" في امريكا يلتفون ويرفعون اللافتات حول المحاكم عندما تكون قضية رأي عام وايضا في موضوع الغاء عقوبة الاعدام في عدة دول اوروبية .
بل ان اكثر من هذا عندما تم قتل مواطنة مصرية داخل محكمة المانية امام اعين الجميع وامام الامن وامام القضاة بكل تسيب وفوضي رغم ان المحاكمة في المانيا !!!

اذن فهذه السلبيات تحدث فعلا ولكن كما نلوم علي المحاكم البطئ نلوم ايضا علي بعض المواطنين التسرع الرهيب والمطالب المتزايدة في وقت قصير ربما معهم كل الحق في قضية العادلي ولكن القضايا الاخري تسرعوا فيها اكثر من اللازم ..فقط لنعطي المزيد من الوقت للقضاء ونحن نثق في القضاء المصري ونثق علي قدرته في انجاز مطالب الثورة ايضا مع الحكومة الحالية.

اذا فكل ما أريد أن اوضحه ان الامن له سلبيات كثيرة ولكن ليس دائما هو المخطئ ..
وان التحرير لابد ان يكون وسيلة وليس غاية ونجد وسائل اخري شرعية للحوار وتحقيق متطلبات الثورة او بقيتها ..
وان لا نعطي الفرصة للعابثين ان يتواجدوا في الميدان العظيم ويلوثوه بافعالهم المارقة والأثمة ثم يضعوا نفسهم في مشهد الضحية رغم ان الامن احيانا يكون في موقف لتفريق المشاغبين وليس المتظاهرين.
وان نلتف جميعنا الأن حول مصر لحمايتها من نهش الفلول الذين يتساقطون كأوراق الخريف الان بعد ان ظهرت كل خطاياهم.



Monday, June 27, 2011

قراءة ورقية أم الكترونية ؟؟؟بتحب ايه اكتر ؟؟






من ساعة ما اتعود الناس ع الانترنت وبقت حياتهم بالكامل عليه والتسوق طبعا جانب مهم قوي من استخدام الانترنت .
لكن دايما اللي بيحصل ان ناس كتير قوي معندهاش الثقة الكاملة في الانترنت ويقولك اشتري من السوق والمحلات العادية اضمن واجرب الحاجة بنفسي..فعلا ده ممكن يكون من مميزات التسوق التقليدي لكن الشراء من علي الانترنت برضه ليه مزايا كتير جدا..وانتقل الهاجس ده عند الناس بالتدريج ليصل حتي لقراية الجرايد..! ناس تقول "لا انا اما بقرا علي الانترنت مبحسش اني قريت" !! وده طبعا ايحاء فقط لان هي نفس المقالة بنفس الكلمات اللي اختلف بس هي الطريقة مش اكتر يعني المعلومة ثابتة انما طريقة الحصول عليها مختلفة فقط.

تأثيرات كتير جدا حصلت علي الكتب الورقية من ساعة ما ظهرت الكتب الالكترونية ظهرت بل ان بعض شركات الطباعة لاوراق حصل عندها عجز كبير بنسب متفاوتة وبعضها خرج من المجال نهائيا واتجه لمجالات اخري .

كان الاعتماد بشكل كامل علي الكتب الورقية من سنين وسنين لحد ما ظهرت كتب الكترونية قللت مبيعاتها نسبيا ولكن ظلت القراءة صعبة علي الكمبيوتر للكتب دي وخصوصا اما يكون الكتاب بحجم كبير جدا وكانت الشاشات القديمة بتتعب العين فعلا لو قعدت عليها فترة طويلة
ولكن ظهرت الشاشات ال "ال سي دي" وخلت الناس اكثر جرأة وعشق للقراءة علي الكمبيوتر لانها اريح للعين في الساعات الطويلة من العمل امامه..وكانت الضربة القاسمة للكتب الورقية هو ظهور "الكيندل" وهو جهاز الكتروني للقراءة باضائة خفيفة تماما تحس انك بتقرا كتاب مش ماسك جهاز وتقدر تشيل عليه الوف الكتب وتقلب فيهم بسرعة رهيبة وكان الاكثر مبيعا علي امازون وهو من انتاج وابتكار "امازون" وتقدر تشتري من عليه كمان كتب وتدخل لالوف المكتبات تحمل الكتاب في ثواني وتقراه .

وفي اللحظة دي انتهي موضوع وهاجس "وجع العين" والكلام عن صعوبة القراءة علي الكمبيوتر او الاجهزة لان الكيندل كان مريح بشكل كبير جدا لو قعدت حتي ساعات تقرا عليه ..لحد ما ظهرت الضربة القاسمة ايضا للكيندل نفسه وضربة موجعة رهيبة وقاسمة للكتب الورقية يمكن حسمت المنافسة بينهم او بتحسمها تدريجيا وهو ظهور "الاي باد".

شركة بحثية اسمها "تشينج واف" عملت ابحاث وقالت ان الاي باد قلل جدا بشكل ملحوظ مبيعات اللابتوبات والكمبيوترات العادية وقالت ان اجهزة التابلت عموما انتشارها تدريجيا بياكل من حصة الاجهزة واللابتوبات.

ستيف جوب في شركة ابل كان حاسم ومصمم في تصريحاته للارتقاء بعالم الكتاب الالكتروني وقال في تصريح شهير ليه "امازون قامت بعمل جيد في جهاز "الكيندل" ولكن لابد ان نقف علي اكتافهم الان لننظر لأبعد من هذا" وزي ما قال الصحفيين ساخرين من التصريح "تقصد انك هتقف علي رقبتهم مش اكتافهم" !!

ستيف جوب مكانش هيدخل المجال ده تماما او المنافسة يعني في عالم الكتب الالكترونية لان هو نفسه قال قبل كده "الناس مش بتقرا كتير واربعين في المية من الامريكان بيقروا كتاب واحد السنة اللي فاتت"
ولكن قال طيب ما نحاول نحل المعضلة دي طالما بنسهل عليهم جدا ونفتحلهم ابواب المكتبات العالمية ..وكانت المنافسة ساخنة جدا ومشتعلة بين امازون وابل وجوجل في عالم الكتب الالكترونية وقال ان امازون غلطت غلطة كبيرة اما ثبتت سعر الكتب علي 10 دولار .

وفي مقالة من "نيويوركر" قال الصحفي ازاي ستيف جوب بدهاء وحنكة ضرب امازون كمان ضربة قوية بخلاف ان الجهاز اقوي بمراحل ؟ كمان اتفق مع خمسة من "الستة الكبار" او يعني اكبر ست شركات في النشر في العالم انهم يبيعوا كتبهم عن طريق متجر ابل ده طبعا غير الضربة القاتلة للكيندل ان اصلا الاي باد صوت وصورة والوان بينما الكيندل "ابيض واسود" !


وعشان نعرف تهديد الكتب الالكترونية الحقيقي وازاي انصرفت الناس ليها بدل الكتب الورقية نشوف النسب دي في احصائية من "ديفيد هول" بتشوف توقعات للكتب الالكترونية كنسبة من اجمالي الكتب حسب دراسات كتير عشان يعملوا الدراسة دي :

2011: 15%
2012: 20%
2015: 40%
2020: 60%
2025: 75%

وطبعا واضح جدا ازاي هم متوقعين ان العصر الجاي هو عصر الاي بوك مش عصر الكتب الورقية الل هتبدأ يبقي كلها الكتروني في يوم من الايام لسهولة قرائتها واستخدامها.
ده غير انهم قالوا ان اصلا مبيعات الكتب الالكترونية زادت 200 في المية عن السنة اللي فاتت.

ولكن طبعا كل الكلام بقي عن "ايهم اكثر اخضرارا" او يعني كلام عن "البيئة النظيفة الخضراء" يبقي ايهم افضل ودي موجودة في دراسات كتير قوي وشايفين ان ده من اهم الجوانب في الوقت اللي عايزين فيه بيئة نظيفة يبقي ايه مشكلة الكتب الالكترونية في النقطة دي ؟

طبعا الكتب الالكترونية او العادية الاتنين بيحتاجوا طاقة في عملية التصنيع ولكن الكتب الالكترونية بتحتاج طاقة اكبر في عملية انتاجها وتصنيع محتوياتها وكمان ان الكتب الورقية مبتستهلكش طاقة كل ما تحتاج تستخدمها بينما الكتب الالكترونية دائمة الاحتياج للطاقة وبتستهلك "كاربون" اكتر في عملية الانتاج وعشان كده طبعا الكتب الورقية تكسب النقطة دي .

انا من راي ان الناس لازم تتعود علي القراءة بشكل كامل علي الانترنت او التابلت لان هو ده المستقبل القادم وهيكون الاعتماد بشكل كامل ومعظم مبيعات الكتب بالشكل ده وناس تانية تشوف ان الكتب الورقية افضل ولكن تعالي نشوف مميزات وعيوب الموضوع ده :



مميزات القراءة علي الانترنت :


1- كمية الصحف اللي تقدر توصلها من كل دول العالم بضغطة زرار واحد مهولة جدا ولو فكرت انك هتدفع فلوس عشان تشتري كم الجرايد دي يبقي هتصرف مئات يوميا وده مستحيل اصلا لانك مش هتلاقي مثلا جنب بيتك واحد بيبيع صحف انجلترا او امريكا بالكامل !!

2- عملية "سكيب ريدينج" او التخطي السريع طبعا دي بتصب لمصلحة "التابلت" او "الاي بوك" عموما باي وسيلة تقراها بيها لانك بزرار واحد بتوصل للي انت عايزه ولوجود خاصية "البحث" بتوصل في ثواني للكلمة اللي عايزها في الكتاب بينما في الكتب الورقية لازم تعلم بقلم فسفوري مثلا !

3- كمية الكتب المهولة اللي ممكن تشيلها في جهاز واحد صغير في ايدك ممكن يكون بحجم مكتبات عملاقة بيتك ميكفيهاش اصلا.

4- الوصول السريع للكتاب لانك لو دخلت علي امازون مثلا وهتستري كتاب عادي هيوصلك بعد اسبوع تقريبا اما لو اشتريت كتاب الكتروني يبقي هيوصلك بعد دقيقتين .

5- لو في مكان عام مثلا مش هتقدر تشيل مكتبة بالكامل معاك في اي مكان ولكن بجهاز واحد للقراءة الالكترونية زي اي باد ممكن تشيل مليون كتاب في شنطة واحدة .

6- تنظيم المكتب الالكترونية بمجرد فتح ملف ووضع ملفات فرعية بسهولة فائقة اما تنظيم مكتبة بيت فيحتاج مجهود غير طبيعي ولو حبيت تعيد التنظيم يبقي هياخد مجهود اكتر بينما تنظيم مكتبة علي الاي باد او الكمبيوتر بياخد ثواني.

7- ممكن تفتح عشر جرايد في وقت واحد وتاخد مقالة من هنا علي مقالة من هنا تقراهم في وقت واحد بينما مش معقول هتشتري عشر جرايد تفتحهم جنب بعض في البيت.

8- سهولة المشاركة مع الناس علي الفيس بوك او غيره من مواقع التواصل اما زمان كان لازم تعمل اسكان علي "سكانر" لمقالة عشان توريها للناس في الايميل مثلا.

9- انتهاء حجة "وجع العين" بعد ظهور عالم "التابلت" حيث انها اريح للعين بنسبة لا تقل عن تمانين في المية من الكمبيوتر العادي.

10- كان زمان يقولوا الكتاب العادي ممكن اقعد بيه ع السرير مثلا انما الكتب الالكترونية لازم كمبيوتر دلوقتي الموضوع ده بيرضه اختفي وتقدر تقعد مع التابلت في اي مكان تحب زي الكتاب العادي بس كمان بدل ما كل شوية تقوم تجيب كتاب من المكتبة وترجع تقعد ع السرير دلوقتي مكتبتك كلها في ايدك.

11- الكتب المسموعة كمان اما ظهرت بدأت تاكل الجو من الكتب العادية بشكل كبير .

12- لو عايز توري واحد مقالة في الشارع مش معقول هتمشي بالجرايد كلها تحت ايدك بينما ممكن تفتحهاله بسهولة ع الموبايل او التابلت بتاعك.




مميزات التسوق عبر الانترنت عن التسوق العادي :


1- كمية الحاجات اللي ممكن وتوصلها في موقع زي امازون او غيره من مواقع الشراء محتاجة ولا الفين محل مثلا تروحلهم علي رجلك عشان تتفرج .

2- الاختيار الدقيق بالفيديوهات وتشوف تقييم الناس كلها للسلعة من كل دول العالم وتختار لونها وتاخد وقتك جدا في البحث علي الانترنت عن مدي كفاءة السلعة دي بينما في المحل العادي لازم تاخد القرار في دقيقة عشان في زباين تانية.

3- البحث عن سلعتك بكلمة او جملة بتبحث فيها في الموقع بسرعة بينام عشان توصل لسلعة معينة في محلات عادية لازم تتصل عدة اتصالات وتزور عدد من المحلات وممكن متلاقيش طلبك في النهاية.

4- وانت بتشتري من علي الانترنت بتعمل مقارنات بجداول مقارنة علي المواقع بين مجموعة مختلفة شبيهة بنفس نوع السلعة وده بيساعدك في اتخاذ القرار.

5- موضوع ان السلعة تطلع معيوبة ده عامل مشترك في الحاليتين يعني ممكن من المحل برضه تطلع معيوبة وبيحصل كتير جدا ولكن حتي الانترنت اضمن لان في سياسة استرداد محترمة ممكن متلاقيهاش في المحلات العادية.

6- ممكن يكون الملحات العادية ليها الميزة في موضوع الملابس او الاحذية عشان المقاس ولكن لو عارف مقاسك بالظبط يبقي الانترنت البضاعة فيه اكتر بمراحل والاختيار اسهل.

7- كمية الاغاني وسي ديهات الالعاب مش ممكن ومستحيل تلاقيها في محل واحد لن المساحة مستحيل تكفي ملايين السيديهات المتوفرة عشان تشتريها علي الانترنت بسهولة.

8- ممكن تعرف ايميل بعض الناس اللي اشتروا السلعة وتسالهم عن رايهم انما في المحل مش هتعرف مين اشتري قبلك عشان تسأله الا لو حد تعرفه.

9- الشراء علي الانترنت مش هيخدعك ولكن بعض المحلات ممكن تحاول اضافة مزايا وهمية علي السلعة عشان تبيع بسرعة لان مافيش تقييم للزبون نفسه انما علي الانترنت كل مواقع الشراء فيها تققيم الزبون نفسه.

10- كمية المشاوير اللي هتعملها عشان تشتري قميص وبنطلون وساعة مثلا كتير جدا انما علي مواقع الشراء في دقيقة تنقي وتقارن وتشتري.

11- الافلام المعروضة للبيع ممكن تشوف حتة منها بسرعة علي اي موقع فيديو انما في المحل مش هتلحق تشوف عينة من كل فيلم قدامك لانك لازن تاخد القرار عشان مش هتبات في المحل.

12- الشراء من ع الانترنت بيخليك تاخد راي الاسرة كلها والاصدقاء عن طريق الفيس بوك مثلا بتبعتلهم صفحة المنتج وتاخد رايهم اما في المحل هتاخد راي الاخرين ازاي غير بالتليفون او انك تاخد تلاتين واحد معاك المحل !!




يعني تحس ان الانترنت يكسب حاليا ويقش كل حاجة سوار في عالم الشراء او في عالم القراءة طبعا والتعود علي كده اصبح ضروري لان لسه التابلت هيتطور اكتر من كده كمان وهتكون القراءة الالكترونية هي الاساس بل ان بعض المقالات بتقول ان في يوم من الايام هيكون اللي ماسك كتاب ورقي في ايده غريب جدا بسبب التعود الرهيب علي الكتب الالكترونية واللي هيوصل لنسب مئوية من الاستحواذ علي عالم الكتب غير مسبوق ابدا.


Saturday, June 25, 2011

"أبو لمعــة" السكرة والفشرة المدورة







"الفشر" مش هو نفسه "المعر" و "الجخ" والفشار المصري أو شخصية "أبو لمعة" الشهيرة اللي دايما تبقي لقب علي اي فشار شخصية مشهورة قوي وموجودة في كل مكان .
ومش موجود بس في الشارع زي زمان ده بقي موجود ع الفيس بوك وفي كل صفحات الانترنت الاخبارية والرياضية وكل حتة.

ومع تطور التكنولوجيا اصبحت شخصية ابو لمعة اكثر اتقانا واحترافية طبعا لان الكدب اللي مكانش ليه رجلين بقي ليه ييجي تمن ارجل و16 كمان ويزحف وينتشر ويستمر !
ودايما شخصية الفشار بتقول كتير كلمة في النص بتوحي بالفشر زي كلمة "يلا"
يعني مثلا ايام الثانوي ييجي الشرقاوي يقولنا "امبارح يلا كان في حلقة يلا علي قناة تي في لاند يلا والراجل اللي ع الموتوسيكل يلا عمل.....في البت يلا وكانت حتة حلقة يلا ملهاش حل" والغريبة انه بيبان علي اسلوبه وهو بيلهث كده انه بيفشر والمفاجأة والصدمة اما يكون الاخرين بقي شافوا الحلقة اساسا ومافيهاش اي حاجة
ويقوله "قصدك يا شرقاوي الحلقة اللي بتيجي بليل اللي اسمها...."
الشرقاوي" اه يا جدعان"
يقوله"انت فشار يا شرقاوي والحاجات دي محصلتش وحلقة امبارح الوحيدة اللي كانت محترمة علي حظ امك"
الشرقاوي يقول "يا عم وانت ايش عرفك هو انت مشترك؟"
يقوله" ما هي بتفتح مجانا يا شرقاوي ع المسلسل ده بس..يلا" !!

طبعا كلنا عارفين قناة تي في لاند ومسلسل "باي ووتش" في تكوين وعي الشباب المراهق اثناء الثانوي !!! دي كانت قناة بتفتح يادوب ساعة واحدة مجانا في اليوم بليل وطبعا نظرا لان القناة الاولي والتانية هي اللي كانت عند الناس زمان واخر حلمنا كان السادسة والتالتة فطبعا كله يقعد يبحث علي القناة دي عشان يشوف الساعة المجانية ويشوف اي حاجة غير برنامج "تياترو" او "كنوز مسرحية" او البرامج اللي بتجيب عقم للشباب عموما ومش بس بتقطع الخلف دي ضارة جدا بالصحة زي سجاير كوكو الضعيف كده !!

الشرقاوي قال يدور علي حاجة تانية بعد الفشرة دي راح درس علم النفس
وقال في المجموعة "يا جماعة ابلة ...بتلبس لبس جامد قوي في الحصة ياعم روح خد درس في بيتها بدل المدرس القحف ده" !!
طبعا تاني حصة علي طول كانت مجموعة ابلة...خلية نحل الصلاة ع النبي يعني والاستاذ عصام بينش ويهش ..
وسأل استاذ عصام انا وواحد كمان ثبتوا علي موقفهم "هو في ايه يا جماعة فين العيال؟"
قولت " راحوا عند ابلة...اصل الشرقاوي بيقول انها بتريح"
الاستاذ" اييييه؟؟؟"
قولت" بتظبط يعني "
الاستاذ "ايييييييه؟؟"
قولت "يا عم انا مالي بيقول يعني جيبتها متفصلة بشكل مثالي كما ينبغي للنفسية المستريحة بدل حضرتك يعني وحصتك الناشفة"
قاللي " وانت مروحتش معاهم ليه ؟ والله انت محترم"
قولت "والله يا استاذ اصلي عارف ان الشرقاوي فشار"
قالي "ايييييه؟؟؟"
قولت "قصدي يعني شرح حضرتك ميتعوضش" قالي "بحسب" !!!


الشرقاوي رجع من جديد وقال يفشر ع المدرسين بقي المرة دي وكان الاستاذ مدحت بيموت غيرة من مدرس تاني اسمه عبد الله لدرجة ان مدحت كان بيقعد يتكلم طول الحصة عن عبد الله وانه مبيفهمش حاجة في الجيولوجيا اساسا والمفروض ميديش دروس ..ولما الشرقاوي يزهق قوي في الحصة وعايز يروح هو عارف التكة دي عند الاستاذ مدحت فيقول "ثانية واحدة يا استاذ"
مدحت يقوله "في ايه يا شرقاوي؟ عايز حاجة"
الشرقاوي " يا استاذ انا كنت بحضر الاول في مجموعة عبد الله وشرح الحتة دي بطريقة تانية خالص مش كده "
يقوم الاستاذ يقول "يخرب بيتك انت بتقول ايييييييه.اخرررررس عبد الله بتاعك ده حيوااااااااان مبيفهمش حااااااااجة وادي مية جنيه ع الطرابيزة قوله اما تروحله طالما ليك علاقة بيه يجاوبلي ع السؤال ده واديله ميت جنيه..وكلكوا برررررررة مافيش حصة النهاردة بررررررررررررة"

طبعا الشرقاوي نجح في الوصول لغرضه بانه نرفز الاستاذ ع الاخر لدرجة ان مراخيره بتغلي زي القطر البخار وشاط في الطلبة كلهم فجأة وروح الشرقاوي مستريح بعد ما وقع الاتنين في بعض مع ان الاستاذ عبد الله اساسا مقالش حاجة خالص ولا شرحله حاجة !!

وطبعا من اساليب الفشر كمان "التزويد" و "التهويل" و"النفخ" في القصص يعني مثلا واحد يقولي قريب سواق رئيس الجمهورية بيقول ان الريس تقريبا بيموت واحد خد المعلومة دي منه وجه قال لواحد تاني جه التاني ده قاللي "سواق رئيس الجمهورية بيقول الريس بيموت " المهم علي وصلت المعلومة لاخر واحد كانت ازاي ؟؟ "قيادي في القصر الجمهوري بيؤكد ان الريس بيموت لانه قريب واحد صاحبي" !!

والفشر بيختلف حسب المرحلة السنية يعني الفشر في ابتدائي واعدادي ممكن يوصل لان واحد عرف ازاي يتحول لسبايدر مان بس مش هيطلع السر دلوقتي !! انما في ثانوي بيكون اكثر منطقية وغالبا بيكون الفشر علي موضوع البنات او قصص بطولية زي مثلا واحد صاحبي كان بيؤكد ان طلع عليه 6 كلاب وهو ماشي في الشارع الفجر قام بصلهم بتحدي لدرجة انهم جريوا بعيد من الرعب !!!!!

او واحد تاني كان بيطلع سطوح العمارة وياخد العيال معاه عشان يقولهم ويقنعهم انه لو مسك ماسورة "طبق الدش " بايديه الناس هيلاقوا التليفزيون بيشوش !! علي اساس ان الماسورة بيصبوا فيها المسلسلات !!!

يمكن يكون ده "ابو العربي" شخصية شهيرة برضه من شخصيات الفشر المصرية..اللي ممكن تحكيله قصة ييجي بعدها باسبوع يقول انها حصلتله !! ودي كانت موجودة في شخصية "الشرقاوي" يقولك "كذا كذا" يقوله واحد "يا شرقاوي ده انا اللي حكيتلك الحكاية دي الاسبوع اللي فات" !!!

ومن اشهر شخصيات الفشر المصرية الراجل اللي طلع اشاعة موبايل "3310" وقال انه بيتكلم ببلاش بس شيل الشريحة واصاب الناس بالهوس ساعتها وكله شال البطارية بسرعة وعايز ياكل حق الشركة ويتكلم ببلاش ساعات وساعات زي ما قال الراجل الفشار اللي طلع الحكاية دي .وبدأ الفشر يزيد ويوصل ان الموبايل ده ثروة ومحدش يبيعه وانه هيتكلم مدي الحياة ببلاش بالحركة دي بتاعة رفع البطارية ولازم كله يحتفظ بيه وبدأوا يتكلموا في اسعار خيالية يمكن اضعاف تمنه في اشهر حركة نصب في مصر !!

وفي كمان "فشر التدبيس" زي مثلا تقوله "العروسة دي حلوة؟" يقولك "دي بدر منور يا ابني مافيش في جمالها اتنين " واول ما العريس يشوفها يقول "منه لله اللي كان السبب" لان التدبيس في جوازة تدبيسة كبيرة تمتد مدي الحياة !

في كمان الفشرة الشهيرة بتاعة "الليزر" كان المصريين من فترة طويلة مهووسين بقلم ليزر صيني حقير التجار اقنعوا الناس انه بيحرق الحاجات لو ركزت عليها بالقلم فترة طويلة !! قال يعني شعاع ليزر بجد والناس جريت واشترته بمتين جنيه وهو واقف علي التاجر بعشرين جنيه لانه ردئ جدااااا..واستفاد التجار وكسبوا الملايين من اقلام الليزر عشان الاشاعات السخيفة دي !


وايام المدارس طبعا العملية سداح مداح وكل واحد يقولك الاسئلة المتوقعة ويقول "خدوا الامتحان اهو يا جدعان" ويطلع ولا سؤال منه والعيال تنفخه بعد الامتحان .

ومن ساعة ما الانترنت ظهر والفشر زاد جداااا وكل ما تسأل حد عرفت الحكاية دي منين يقولك من ع النت لدرجة ان برنامج "ارجوك ما تفتيش" بيسأل ناس في الشارع "عرفتوا ان خط الاستواء مسحوه" قاله "اه عرفنا من ع النت" !! يعني دي بقت اسهل جملة دلوقتي ومتعرفش تكذبها الا لما تدور انت كمان ع المعلومة دي .

يعني كدبة ابريل تحس انها ممتدة شهور طويلة في بعض الاحيان لبعض الشخصيات..
واشهر انواع الفشارين بين اوساط الشباب هو "الحرمجي الفشار" يعني اللي قعد يحكي عن مغامراته النسائية طول النهار وعمل ايه وسوي ايه وكأنه بيحكي عن شئ يعني يفخر بيه مثلا او شئ مهم اصلا ويمتد الفشر ويقولك اول ما رحت بقي انبهروا بيا برة يلا وكانوا كلهم بيحلموا بيا وبتاع ..علي اساس ان الغرب كله مستني الفرعون المصري كالعادة زي المسلسلات العربية !!! او زي مسلسلات "اوكرانيا" كده اما واحد مصري يسافر برة يبقي رئيس منظمة دولية للمخدرات او رئيس المافيا !!! وابو بلاش كتر منه هو حد شايف حاجة "جخ" "جخ" واديها يا معلم والسميعة ما اكترهم..!


والمبالغ نوع من انواع الشخصية الفشارة او ابو لمعة بس بشكل تاني كل حاجة يقولك "ده كان اجمد يوم في حياتي" اااه "الفيلم ده اجمد فيلم شوفته في حياتي" ..وهتلاقي ان كل حاجة في حياته هي الاجمد والاحلي والاقوي دايما زي شعار برنامج "صدي الملاعب" !

و "الفشار المقنع" زي مثلا بتاع البطيخ يقعد ماسك البطيخة يخبط عليها ويطبل ويقولك دي اجمد واحدة يا بيه وتروح البيت تلاقيها معفنة اساسا ولا ليها طعم قال يعني كان بيخبط بجد وواحد رد عليه قاله حالة البطيخة من جوة او ده علم جديد من جامعة البطيخ في كاليفورنيا هو دارسه مثلا ..علم التخبيط ..

واشهر فشرة كانت قريب جدا اما قالوا الناس نازلة التحرير من فترة وبدأت رسايل تيجي علي الموبايلات وتقول "اوعوا تنزلوا التحرير اصل هيحصل احتكاك وبعدين يخش عناصر تضرب في اللي جوة فتدخل القوات تضرب فيدخل ناس تستعين بحماية دولية ويبدأ الضرب بالقنابل" وشوية حبشتكنات في الرسالة تحس انها حرب عالمية جديدة وكل الحكاية ان واحد قعد يفشر وصدق فشرته !

وبعد مصطلحات المبالغة للفشار هتلاقيها مثلا جملة "حتة دين كذا" او "بتاعة بلادها يا معلم" او "من الابرة للصاروخ" او معدي الفلنكات" او بعض مصطلحات المبالغة التانية..


واكيد كان اكبر فشار في مصر كلها هو حسني بتقاريره بتاعة كل سنة بتاعة الحكومة وان الناس كلها اغنياء وكده وحاسس ان كل مصر بتلعب جولف يا عيني لانه موفر الملاعب بمساحات كبيرة قوي سعادته وشايف ان الجولف للجميع !


Thursday, June 23, 2011

"هانج أوفر" الجزء الثاني..وأفلام التورط في الحوادث الغريبة






فيلم كوميدي رائع ومن المتصدرين في البوكس اوفيس ومحققا ايرادات عالية جدا بالنسبة للأفلام الكوميدية عموما .
سلسلة "هانج اوفر" التي نتمني ان نري منها المزيد من الاجزاء هي سلسلة مميزة جدا من نوعية افلام "التوريط" او كما اسميها افلام "المتاهة"!

من نوعية الافلام التي تجد الأحداث فيها تتابع بشكل غريب جدا وغير منطقي وبشكل مضحك وهستيري جدا ولا تعرف كيف تورطوا في هذه الأحداث أو تلك الا في نهاية الفيلم .

"فيل" و "ستو" و "الان" يقعون معا في أحداث غريبة جدا اثناء الاحتفال بزفاف "ستو" فيكثرون في الشرب وتعاطي الممنوعات التي طبعا يورطهم فيها المشاغب "الان" كالعادة.
وتتوالي الاحداث الكوميدية الصاخبة حينما يجدون نفسهم في احد الاحياء حيث كان من المخطط فقط ذهابهم تايلند ولكن بعد ذهابهم هناك وجدوا انفسهم يستيقظون في فندق غريب ليبدأ اللغز .
يجدون قردا صغيرا معهم المفروض ان علي ظهره "شفرة" لعملية نقل حساب ل "بول جياماتي" صاحب الطلة المميزة في هذا الفيلم وضيف الشرف ويجدون معهم ايضا كاهنا صينيا علي كرسي متحرك لا يعرفون من اين اتي او كيف كان يتابعهم في الرحلة ويجدون نفسهم متورطين في اختفاء اخو العروس الذي كان يصحبهم في الرحلة ولا يجدونه في النهاية الا في نفس الغرفة التي استيقظوا فيها فاقدي الوعي

أحداث كثيرة جدا من هذه النوعية وبنفس فكرة الجزء الأول ولكن بنفس النجاح ايضا حيث لا تشعر بالتكرار بل ان المفاجأة اكثر وأكثر في هذا الجزء الشيق من الفيلم .



واذا أحببت هذه النوعية او الافلام من نفس الفئة التي تجد فيها الاحداث غريبة وكوميدية وغير منطقية في نفس الوقت فأنت في حاجة لمشاهدة هذه الأفلام ايضا :



Superbad

فيلم ممتاز جدا وكوميدي ملئ بالأحداث لطلبة في مرحلة المدرسة يجدون انفسهم في حفلة لا يعلمون عنها اي شئ وينتحل صديقهم صفة اخري كي يكسب اعجاب الفتيات الي ان تتم صداقته مع ظباط الشرطة الذين يعجبون بشخصيته وتجد نفسك وسط احداث متسارعة جدا وغريبة في الفيلم وكوميدية بشكل لافت وليس غريبا علي "جونا هيل" ان نجد له فيلما كوميديا اخر ناجحا بهذا الشكل
فهو نجم متألق جدا في
اعماله الكوميدية وله بصمة مميزة فيها




Very Bad Things

من أجمل افلام كاميرون دياز حيث تقوم بدور العروسة التي تنتظر زوجها الذي ذهب لحفلة عزوبية في احد الفنادق وتحدث المفاجأة ويتم قتل "عاهرة" في الفندق بشكل غير مقصود ثم يقعون في مشاكل بالجملة واختلاف في الرأي حول الحادث وتتوالي الجرائم تباعا لعدم فضح السر والخروج من هذه الازمة سالمين ولكن رغم ان الفيلم ملئ بالقتل الا انه كان في اطار كوميدي وهذا ما يعطي للفيلم طابع غريب جدا وتجد في كيفية الاحتفاظ بالسر جميع انواع الشخصيات الجرئ والمرتعد خوفا من انكشاف الامر والمتوتر دائما ويتعاطي العقاقير المهدئة .




Pineapple Express


ليس فقط لاني اعشق "سيث روجان" وكل افلامه ولكن لأن هذا الفيلم فعلا من اقوي افلام الكوميديا التي شاهدتها ..فيلم كوميدي لا يختلف علي تميزه اثنان ويشهد له ايضا تقييم موقع "اي ام دي بي" وغيرها من المواقع التي تضعه دائما في تصنيف رائع في الافلام الكوميدية

لا يعرف كيف يجد نفسه شاهدا فجاة في جريمة ويهدده افراد عصابة هو وصديقه تاجر المخدرات الذي كان يذهب عنده لتناول المخدرات وسرعان ما اصبحا اصدقاء ويتورطان في احداث بالجملة بسبب تعقب العصابة لهم من خلال نوعية المخدرات التي يتناولها كلاهما ..فيلم كوميدي جدا ومن اقوي الافلام الكوميدية علي الاطلاق واقوي فيلم ل "سيث روجان"



My Boss's Daughter

أشتون كاتشر في واحد من اقوي افلامه حيث يعطي المدير له كافة الصلاحيات للحفاظ علي بيته اثناء السفر ولكن سرعان ما ينقلب البيت رأسا علي عقب من خلال الضيوف التي تتوافد علي اشتون كاتشر في المنزل وابن المدير نفسه الذي يملك علاقة سيئة بوالده وتدخل عناصر غريبة واصدقاء لهذا الابن الي المنزل حتي ان الاحداث تنتقل احيانا الي بيت الجيران اثناء رحلة البحث عن "البومة" التي اكد له المدير انها اهم ما في المنزل ولكنها تطير بعيدا وتحلق خارج المنزل وسط اهمال شديد من اشتون كاتشر
الفيلم متميز جدا وملئ بالاحداث السريعة وهو وجبة كوميدية دسمة جدا.



Ready or Not

متأخرين عن حفل الزفاف ويجدون انفسهم اثناء حفل عزوبية في "المكسيك" محاولين العودة للزفاف في الوقت المناسب والخروج من الحدود المكسيكية حيث يبدأون في تكوين الصداقات هناك والتعرف علي
الكثير من الاسرار في اطار كوميدي وسط قلق بالغ من العروس والاسرة بالكامل حول مكان وجودهم الحقيقي




Dinner for Schmucks


"ستيف كارل" يفعلها مرة اخري ويضع نفسه في قالب وشخصية جديدة عليه ولكن كالعادة شخصية كوميدية لاقصي درجة فماذا تتوقع من بطل مسلسل "ذي اوفيس" او افلام مثل "ديت نايت"

يقنع المدير احد افراد شركته انه لابد ان يذهب للعشاء وبصحبته احد الافراد ويكون هذا العشاء "للحمقي" من مجموعة من المستغلين حيث يعطوا الجائزة في النهاية لأحمق من في الحفل ويسخرون منهم
ويصحب "بول رود" معه "ستيف كارل" للحفل وتتوالي الاحداث في الحفلة الكوميدية الرائعة والمليئة بالفكاهة ويبدأ ستيف كارل في اعادة تصحيح ما سببه لبول ردو من مشاكل في علاقته العاطفية.



Death at a Funeral

فيلم رائع جدا عن جنازة ولكن بشكل كوميدي تنكشف اسرار المتوفي بعد موته وفي اثناء الجنازة وعلاقته الغريبة بقزم يطلب حقه في الميراث وايضا تحدث عدة مفارقات كوميدية في اثناء الجنازة من خلال عم الابناء وزوجاتهم وزوجة المتوفي وتنقلب الجنازة الي مسرحية هزلية بسبب تناول احد الافراد الحاضرين مخدر بدل المهدئ عن طريق الخطأ ويقوم بعدة تصرفات غريبة جدا في وسط الجنازة وامام حماه القادم ايضا والذي كان يريد رؤيته من فترة.




وهذه المجموعة هي الاقرب للفيلم الرائع الكوميدي "هانج اوفر 2" وتدور في نفس القالب من الاحداث الغريبة والمواقف المضحكة المتتالية في الفيلم.




Wednesday, June 22, 2011

الثورة في عيون شهرزاد





إحكي وقولي يا شهرزاد..
ايه اللي حاصل في البلاد..
مسكت كتاب ثورة شباب..
دي حكاية بدايتها في سنة..
نهايتها تاخد كام سنة..
هاحكيها غنوة ودندنة..
كان يا ما كان سلطان زمان..
قهره بينهش في الزمان..
تقدر تقول نار ع العلم..
لو حرفي قول نار في العلم..
وفي ايده صورة وصولجان..
يحلم بحكمه مدي الزمان..
قال شهريار: قصدك أنا ؟
ضحكت وقالت شهرزاد..
يعني ابطل اقول انا ؟
هز الشنب قال : كملي
ولا سيرتي تاني تدللي..
قالت ده سيفك من ورق..
مسرور خلاص كارت اتحرق..
انا بحكي عن تار او مغول..
تعبان وملفوف ع العقول..
حرية : مالية تكيته..
وضمير بعيد عن حضرته..
أساميه نقوش علي بدلته..
قال شهريار : مارد أثيم
ردت عليه : طبعه اللئيم
خلي الشباب باع كليته
وعجوز يموت من حسرته..
والحلم مخصي في حضرته..
قال شهريار: فطرة مريض
قالت: وشوف ابنه البغيض
حالف عدوه علي البلد..
واداله من خير البلد..
باع الكرامة في المزاد..
والحاشية تنهش في البلاد..
لا ارادة حرة ولا اختيار..
قال المريض: خدت القرار
انا حاكم الشعب الجديد..
هتشوفوا ايدي من حديد..
زرعك وقلعك قلعتي..
خيطك نسيجك بدلتي..
قوتك وشربك أكلتي..
قال شهريار: مسك البلاد ؟؟
ردت وقالت شهرزاد
ربك بيستر ع العباد
العدل سيفه علي القرار..
قال شهريار: الشعب ثار ؟
قالت : وثورة للتاريخ..
ثار التاريخ علي من كتب..
بالزيف تاريخ اسود كتب..
وقفوا في ميدان واسع فسيح..
ولا قولت أمن وعصف ريح..
وشهيد بيسقط او جريح..
قراقوش حكم تلاتين سنة..
قالوا نقف ييجي ميت سنة..
لكن تعود شمس النهار..
اللي بقت لعبة لكبار..
ولا ليها ارض ولا سما..
وضميرهم الحر اتعمي..
وقفوا وهتفوا بإسم مصر..
والكلب يخطب جوة قصر..
ينبح يقول "انا ابنكم"
وابوكم اللي قاعدلكم..
راح اموت هنا واكتب تاريخ..
ونسي العويل ولا الصريخ..
ينبح يقول "شعبي العزيز"..
وأمنه ولا ليهم عزيز..
ينبح يقول "دي ضربتي"..
ومقالش كلمة "سرقتي"..
الكلب دور ع الملاذ..
عايز صديق يوفي ببلاش..
ووزيره قاله :معطلكش..
والتاني قال :انا معرفكش..
كروان بيصدح في الميدان..
الملك لك يارب لك..
مش ليك يا حسني ..الملك لك..
قال شهريار: اسمه جميل
قالت: لكنه بدون دليل
قال ايه "مبارك" ..ده لعين
ولا ليه وطن ولا اي دين..
قتل الألوف جوة الميدان..
والدم صلي في المكان
وجاب "جمال" علشان "جمال"
والقبح شافه من الجمال..
وخلي شعبه "غزوته"..
أظهر ضغينته وقسوته..
وخرج يقول "انا ابن مصر"..!!
"انا جيبت ليكم الف نصر"..
يا جبان متنطقش اسم مصر..
متقولش الا "انا ابن قصر"..
يا طاغوت وعرشه في وسط نار..
وديابته سارحة في كل دار
اخرج ذليل من ارضها..
يا شيطان بيحكم شعبها..
يا طاعون وطال جسم البلد..
والقئ ضمير منه اتوجد..
ثار الجميع طردوا الشيطان..
أصفاده بقيت في المكان..
خرج مساجينه عقاب..
وقال "تدوقوا من العذاب"..
ورجع يقول "أنا أمنكم"..
وسوزان دي برضه أمكم..
وجمال ده ابني وابنكم..
ثار الجميع : قال ارحلوا..
سجد الجميع مدنة وعلم..
لإله وحرية وقلم..
سقط النظام وسط الحطام..
اهو قال لابنه "انت السبب"..
انت اللي جيت وخربتها..
وسوزان تقول "انتوا السبب"..
والحية كانت ميت سبب..
سرقت طفولة شعبها..
سرقت كتابه ولعبته..
سرقت علاجه وقوته..
سرقت علامه وعزته..
قال شهريار : والحاشية فين؟
قالت : اقولك حاشيته..
قواد بيحكم كلمته !
طبال أمين علي حزبته..
رقاص في إعلام حضرته !
يعني دي حاشية من الهوان..
وسبارسجي وشمحطجي..
وسلنطحي او حرمجي..
قال شهريار : مسروره فين ؟؟
قالت : ده سيفه اتحرق..
"مسرور" ده امن دولته..
كان كل حلمه وقبضته..
الثورة كسرت عتمته..
قال شهريار: قصة كفاح..
قالت : لكن الديك ما صاح..!
نفسي اقف واقولهم..
يا شعب ليكم كلكم..
بخروها بعود محبة..
أو كنيسة او بجامع..
بخروها بشئ يسامح..
المواجع والمدامع..
بخروها بلون شبابكم..
واحفظوها من جنانكم..
وقفوها وبوسوا راسها..
واحفظوا بالحب ناسها..
واحفظوا بالحب ناسها..





Monday, June 20, 2011

التجربة البرزيلية وطريق الحلم المصري






مصر في المرحلة دي عايزة تجربة تمشي عليها وتطبق خطواتها للنهوض بالاقتصاد المصري
ومن التجارب الرائدة هي تجربة دول امريكا اللاتينية والمرشح الرئاسي حمدين صباحي اتكلم كتير عن التجربة البرازيلية وشافها حل مثالي للنهوض بمصر ودخولها لمرحلة جديدة بقوة وثبات وكمان قابل بعض الشخصيات من البرازيل والدول اللاتينية للتحدث عن التجربة الرائدة دي.
طيب ايه ملامح التجربة البرازيلية دي وليه ركز عليها بالذات رغم ان في تجارب كتير ناجحة زي التركية او الماليزية او غيرها كتير ؟

التجربة البرازيلية تجربة رائدة جدا ودلوقتي البرازيل من اقوي عشر اقتصاديات في العالم والاولي في امريكا اللاتينية ومن اكبر منتجين البن والمعادن وعندها ميزة تنافسية في اكتر من سلعة.
وليها تجربة رائدة لاخراج السكر والكحول من قصب السكر وكمان من اكبر منتجين "الهيدروالكتريك" باور .
وكمان ليهم تجربة رائدة في الكشف عن البترول للتقليل من الاعتماد علي البترول المستورد من الخارج.


وهنا التجربة دي هتنقسم الي قسمين في عصرين اولها عصر "كاردوسو" وثانيها عصر الرئيس "لولا دا سيلفا" وخلال فترة الحكم دي خرج اكتر من عشرين مليون برازيلي من الفقر بفضل سياسته في الرعاية الاجتماعية والادارة الاقتصادية المتميزة.


وهنشوف في كتاب رائع عن التجربة البرازيلية اسمه
the new brazil from backwater to bric
سمات وملامح التجربة دي وايه النقط اللي البرازيل قوية اوي فيها وعملت ايه للوصول للي هي فيه دلوقتي .

مجمل الناتج المحلي
gdp
في البرازيل بينمو بشكل متزايد والاستثمارت الاجنبية المباشرة في البرازيل في عام 2010 كانت كبيرة جدا في عام 2010
اكتشافها للبترول والغاز في سواحلها الجنوبية خلاها مش بس مكتفية بالبترول بتاعها دي كمان بقت بتصدر لانها عملت اكبر تنقيب عن البترول في الاماكن دي بالاستعانة بكبري الشركات العالمية.

وكان اكبر برنامج لمكافحة الفقر في البرازيل في فترة "كاردوسو" واتطبق بشكل كامل في فترة "لولا دا سيلفا"


انضمت البرازيل للقوة الرباعية المسماة ب
bric
وهي قوة اقتصادية هايلة مكونة من البرازيل والصين وروسيا والهند ومن قوتها اصبحت منافس لل
G-7
او اجتماع الدول القوية صناعيا او وزراء المالية في الدول دي لمناقشة جوانب اقتصادية وكانوا بيحتكروا عملية اتخاذ القرارات لان مكانش ليهم منافس لكن دلوقتي في اكتر من منافس.


البرازيل في فترة حكم كاردوسو كان ليها سلبيات وايجابيات يعني هو اول ما مسك الحكم كان برنامج الخصخصة شغال جامد جدا ووصل لشركاتا لاتصالات وشركات الحديد والكهرباء وطبعا تطبيق البرنامج بشكل محترم وبدون اختلاسات وسرقة زي ما حصل في مصر مثلا كان ليه اثر ايجابي علي البرازيل وساعدها الربح اللي جنته من الموضوع ده لتجنب ازمة خطيرة كانت هتقع فيها وكان الرئيس كاردوسو محبوب في المرحلة دي وشايفين فيه امل كبير لاقتصاد اقوي ودولة اقوي

وكان في خطة او برنامج لاعادة توزيع الاراضي بتغيير بعض القوانين
Land Reform Program


وفي جانب الطاقة شافت الحكومة ان الاستعانة بالشركات الاجنبية هيزيد التنافس جدا في البرازيل وهيعود بالنفع عليهم فاستعانت بالشركات العملاقة في اخراج الغاز والبترول ولقت اكتشافات هايلة وكبيرة جدا وكمان في شركاتا لاتصالات دخلت السوق شركات اجنبية لزيادة التنافسية.

يعني كان خطوط حكومة كاردوسو العريضة هي زيادة التنافسية والاستثمار وزيادة في توصيل الخدمات وان الاقتراض لا يزيد ابدا عن الانفاق .


ورغم نجاح حكومة كاردوسو في العديد من المهام لكن واجهته العديد من المصاعب والصدمات زي ازمة المكسيك والعملة بتاعتها واثرت علي كتير من الدول في تاثر يعرف ب
tequilla effect

وتحت فترة حكومة كاردوسو التضخم قل بشكل ملحوظ ومعدل النمو زاد والاستثمار المباشر زاد عدة اضعاف.

وبعد كده انخفضت قيمة العملة البرازيلية وحصلت مشاكل عديدة اقتصادية وكانت الفترة دي ليها ايجابياتها وسلبياتها الكتير جدا وجت فترة جديدة للرئيس الجديد "لولا دا سيلفا" بعد "كاردوسو"


جت الفترة المزدهرة بتاعة "لولا دا سيلفا" وقدر يسيطر علي التضخم وميزان اللبرازيل التجاري قدر يعود لقوته مرة تانية .
لان كان في تاثر قوي وضغط علي الاقتصاد البرازيلي قبل ما يمسك "لولا دا سيلفا" وفي اواخر عصر "كاردوسو" بسبب ازمة كبيرة في الارجنتين اثرت سلبيا علي البرازيل.
فكان لازم لولا دا سيلفا يمسك زمام الامور بقوة وحكمة لتجاوز الازمة الاقتصادية دي.
وعمل نظام جديد لسن المعاش وبرنامج ونظام خدمة اجتماعية جديد كليا لمساعدة الغير قادرين لو قل دخلهم عن نسبة كحد ادني وكمان قلل الضرايب بشكل ملحوظ في فترة حكمه.

وكانت خطوة قوية جدا في فترة الحكم دي انشاء صندوق او ما يسمي ب برنامج "سلة الاسرة"
Bolsa Família (Family Basket) program


وده برنامج لمساعة الاسر الفقيرة في التعليم والحصول علي الغاز والحصول علي الطعام الكافي لهم ومن نجاح البرنامج ده انه في سنة 2009 كان شمل بالفعل وغطي 11 مليون برازيلي.


وكان التعليم طبعا في اولويات عمل "لولا دا سيلفا" ورفع مرتبات المدرسين وانشأ العديد من المدارس للنهضة بالعملية التعليمية.
وبدأت معايير التصنيف الائتماني وشركاتها زي "مودي" تقول ان البرازيل فرصة قوية جدا للاستثمار.

وفي الفترة دي كانت الخدمات المالية والمصرفية بتشهد تطور قوي أثر علي الاقتصاد البرازيلي بشكل ايجابي.
وفي زيارة لولا دا سيلفا لاوروبا قال "انا كنت بحلم باستثمارات بقيمة 100 بليون دولار لكن دلوقتي بقول انها هتوصل ل 300 بليون "

ومن انجازات دا سيلفا كمان "الطاقة النظيفة" وراح محطة بنزين بنفسه في البرازيل وقال ان العربيات مش بس هتعتمد علي "الجازولين" ولكن كمان "الاثانول"


لولا دا سيلفا رئيس ليه انجازات جبارة ورغم انه عاني من الفقر الرهيب وكان بيعمل "ماسح احذية" وكمان "بائع خضار" لكن كانت فترة حكمه من اقوي عصور البرازيل وكان من اكبر اللي حاربوا الجوع علي مستوي العالم ونال العديد من الجوائز العالمية وكان بيسمي دايما "نصير الفقراء والمحرومين"


وكمان من الكتب اللي اتكلمت عن اقتصاد امريكا اللاتينية بشكل عام وقوته كتاب اسمه
the new brazil from backwater to bric



وفعلا التجربة البرازيلية نموذج لدولة اصبحت من اقوي دول العالم اقتصاديا بسبب الخطط الطموحة لرئيسها والاهتمام بالفقراء والعمال والمدرسين اولا والعدالة الاجتماعية من رئيس فعلا عاني من الفقر والحرمان فعرف فعلا ازاي يقدر يساعد الفقراء دول اللي هو كان منهم وعايش وسطهم معظم حياته من طفولته لحد ما كبر وكان في النقابات العمالية وعاني في حياته كتير جدا.
التجربة البرازيلية تجربة رائدة ولو مصر اتبعتها ولقت فعلا الفكر والتخطيط ده هتبقي مصر من اقوي الدول اقتصاديا في يوم من الايام وده حلم كل مصري .



Saturday, June 18, 2011

أحداث "فانكوفر"..والجمهور المصري..وأخطاء التعميم




ما الذي يحدث في استادات الكرة في مصر ؟ لماذا تفشي الشغب في الملاعب المصرية الي هذا الحد ؟ هل هذه أخلاقيات الجماهير المصرية ؟ أم هي الجملة الشهيرة المصرية "القلة المندسة" ؟
ان التعميم من أبشع الأخطاء التي يقع بها البعض محاولين تلخيص الوضع الكروي الأن بإنه من نتاج الثورة السلبي او ان هذه اخلاقيات المصريين عموما التي لم تظهر الا بعد الثورة وان الحرية في ايدي المصريين "عجبة" !

لن نتحدث عن حجة الغياب الامني التي طال استخدامها في الفترة الاخيرة وكانت الحجة التي علق عليها البعض بعض المشاكل التي نواجهها في الاستادات وايضا الشوارع المصرية ولن نتحدث ايضا عن اخلاق المصريين التي لم تتجاوب مع كنز الحرية التي وجدوه وأساءوا استخدامها لانها اصبحت حجج باطلة
الجملة الشهيرة التي يطلقها بعض الناس الان هي "اتفرج يا عم ادي نتايج الثورة" ولا اعرف ما الذي يربط الثورة بنتيجة مباراة كرة قدم حتي من قريب او من بعيد ! وربما تناسي البعض الفيلم الشهير
Green Street Hooligans
الذي ستري به كمية الهرج والمرج والعنف والبلطجة والاسلحة البيضاء والمسدسات والتحالفات الشيطانية والكوكايين وغيرها في وسط الجماهير الانجليزية العريقة !!
"الهوليجانز" والعنف الشائع بينهم والتي لا تستطيع اجيانا قوات الامن السيطرة عليه وتنقلب الي حرب شوارع لماذا لم يقل البعض "هم الانجليز كده" !!

عنف غير مبرر بين الجماهير الانجليزية حتي اندية الوسط وليس فقط الاندية التي تنافس علي الدوري بل ان الوضع يصل الي الطعن في الشوارع والانتظار امام القطارات والسكك الحديدية لضرب الجمهور المنافس ..ربما وصل الينا في مصر بعض هذه الاخلاقيات مؤخرا ولكن هذه الاخلاقيات فعلا موجودة في العالم بأسره.
الجمهور التركي الذي أحرق ملعبه بعد ان احتفل فيه علي سبيل الخطأ لأنهم ظنوا انهم حصلوا علي البطولة ثم تفاجأوا في النهاية ان احتفالهم كان نتيجة خطأ في تناول الخبر وان الفريق المنافس هو الذي حصل علي الدوري فقاموا بحرق الملعب بالكامل ..هل الشعب التركي كده ؟؟

وعن ظاهرة اجتياح الملعب وعدم النظام فحدث ولا حرج واخرها كان في المانيا عندما حصل بوروسيا دورتموند علي الدوري الالماني واجتاح الجمهور ارض الملعب بعشوائية تامة للإحتفال رغم ان هذا ممنوع تماما حتي لو علي سبيل الاحتفال ..فهل الألمان لا يحترمون النظام ؟؟
وجمهور مانشستر وروما التي فرض عليهم العقوبات من اتحاد كرة القدم لخروج جماهيرهم عن النص تماما منذ عدة اعوام وكانت مشاجرات عنيفة جدا اثارت الذعر بين الطرفين .
وايضا لا نترك حادثة جمهور ليفربول في أثينا والشغب والتلفيات التي احدثه الجمهور في الشوارع بلا مبرر واضح في هذه المباراة.

واصابة 150 في احداث "فانكوفر" في كندا بعد مباراة الهوكي وحرب شوارع كاملة مع الامن ..حتي الشعب الكندي ؟؟؟


التعميم والحكم علي شعب معين او حتي جمهور معين من خلال افعال القلة منه هو سبب رئيسي من اسباب تفشي العنصرية في العالم فالحكم علي الاسلام مثلا في الغرب لم يأتي الا من افعال القلة الذين يسيئون اليه وكذلك التعميم علي العالم العربي بكل عنصرية في وجهة النظر الغربية انهم مجرد بشر يرتدون جلاليب ويأكلون "الكاجو" كما يصورون في افلامهم لم تأتي ايضا الا من خلال التعامل مع البعض وتعميم المبدأ علي الجميع وكذلك التعميم من خلال وجة النظر العربية للمجتمع الغربي انهم مجموعة منحلين وانهم يعيشون في ماخور كبير ربما جائت من خلال مبدأ التعميم الخطير ايضا من خلال بعض الافلام او التعامل مع قلة منحرفة من هذه المجتمعات.

ودراسات كثيرة تشير الي ان مبدأ التعميم هو صفة غالبة للمتشائمين ..حيث دائما ما يعمم من خلال تعامله مع حادثة وحيدة اليمة وهو ما يرسم صفات شخصيته المتشائمة .
حتي المنطق يرفض تماما مبدأ التعميم في علم المنطق نعرف التعريفات عدة انواع مثل الجامع المانع او المانع الغير جامع او غيره ولكن لا نستطيع مثلا بحكم منا ان نقول "الغرب فاسد" !! او ان يقول الغرب عنا "العرب ارهابيون" فهو تعريف غير منطقي ولا يمنع دخول فئة اخري تحت صفة الارهابيون او اي صفة اخري فمبدأ التعميم عموما وجعل التعريف كأنه جامع مانع علي طريقتك غير منطقي ويرفضه البشر جميعا الا المتشائمين والعنصريين منهم .

وحتي في شغب الملاعب ستجد العنصرية تبدأ بالتعميم دائما مثل جمهور ما يقول عن الاخر "كل الاهلاوية كذا" او "كل الزملكاوية كذا" مما يضطر الفريق الأخر للرد بقسوة دفاعا عن كيانه لان الاهانة لم تشمل قلة منهم القلة المخطأة بل شملت الجميع فيتم الدفاع عن الجميع ويبدأ العنف من مبدأ التعميم الخاطئ.

وهذا النوع من التعميم الضار يسمي
Hasty generalization
التسرع في الحكم علي مجموعة بذنب مجموعة صغيرة قام عليها تقييمك او تكوين رأيك بشكل سلبي ..وهذا ما يحدث في التقييم في مصر علي اكثر من صعيد سواء تقييم مجلس ادارة كامل علي انه فاسد لان رئيسه فقط متهم او حتي تقييم التجربة الديمقراطية في مصر عل انها اصبحت "فوضي" بسبب بعض الاحداث السلبية التي عادة ما تحدث في اي مكان .
وتري التعميم المتسرع في كل مكان علي صفحات الانترنت مثل اخبار عن "رجم" إمرأة مثلا في دولة ما فيتهم الغرب الإسلام بانه دين "عنف" دون أن يدركوا حتي بقية جوانبه واحكامه وأوامره ولكنهم يتخذون الحكم المتسرع في نوع من الجهل احيانا والتسرع احيانا اخري.

وكذلك يتم الحكم في مصر علي اوساط بالكامل سواء مثلا الوسط الفني او غيره بحكم سلبي نتيجة افعال البعض منه والتعميم ايضا علي بعض الوظائف مثلا مثل السباك او البواب او النجار او غيرها من الوظائف بأن اصحاب هذه الوظائف غير مثقفين او لا يعتد برأيهم رغم ان هذا غير صحيح وجميع الوظائف في الخارج تعامل باحترام كامل ويقدروا جيدا دور كل وظيفة حتي "عامل القمامة".

ويتم تجهيز "القالب" حسب رغبة المقيم لوضع الجميع فيه مثل الحروب الدائرة هذه الأيام في جميع صفحات الانترنت وفي اليوتيوب ومواقع اخري بين التيارات المختلفة من "ليبراليين" و "علمانيين" و "تيارات دينية" فيتم تخوين بعضهم البعض بل واحيانا تصل الاتهامات الي حد التكفير !


ولهذا لابد ان لانأخذ الجميع بذنب القلة في اي حدث لان التعميم الخاطئ هو سبب اتخاذ الرأي المتسرع والمبني علي الخطأ فلا نريد ان نسمع عبارات مثل "هم جماهير الكرة المصرية كده" أو "هم العلمانيين او الليبراليين كلهم كده اصلا" وعبارات مثل هذه التي لا تبني علي اي منطق لوا تساعد في تكوين أي رأي ولكن الحياد الكامل مطلوب في كل قرار لأن عملية تكوين الرأي هي الخطوة الأولي والحاسمة لإتخاذ قرار سليم وموضوعي.

Thursday, June 16, 2011

هو الجري نص الجدعنة ؟؟.."مخزون الطاقة النووية السلبية"





الشعب المصري كان سلبي قوي قبل الثورة مش كده ؟؟ وعايز تسأل عن السبب ؟ في اسباب كتير بس في كمان في حياتنا اليومية والجمل المتداولة اللي يخليك سلبي للصبح يعني ..
لو جيت في الشارع شفت خناقة مثلا وعايز تخش تحوش اول حاجة هتتقالك ايه ؟ "ابعد عن الشر وغنيله" ..يقولك "واحنا مالنا يا عم خليهم يتصافوا سوا ملناش دعوة"..!
وجملة "ملناش دعوة " دي في منها صيغ كتير قوي في جملنا المصرية زي مثلا "ما انا كافي خيري شري" "يا داخل بين البصلة وقشرتها" "الباب اللي يجيلك منه الريح سده واستريح" !
يعني تحس انه مش عايز يواجه اي مشاكل يعني يعيش حياة سالكة ومثالية وسهلة وبسيطة جدا انما لو في اي عائق يبقي استسلم واقول "ابعد عن الشر" .


حتي لو في حاجة ممكن تجيبله منفعة بس صعبة حبتين تلاقيه مش عايز يعمل المجهود ده حتي لو مضمون ويقولك الجملة الشهيرة "يا نحلة لا تقرصيني ولا عايز منك عسل" !
يعني مش عايز نسبة مخاطرة ولو حتي واحد في المية طب ازاي ؟؟
وعن العشوائية كمان في اتخاذ القرارات والسلبية المطلقة تلاقي مثل يقولك "مطرح ما ترسي دقلها" ..ودي عاملة زي الاغنية بتاعة "علي حسب الريح ما يودي الريح" ..
يعني مافيش حاجة معينة تعملها الا حسب المقادير ما توديك ومطرح ما ترسي !

ولو جه واحد سنه كبر مثلا وعايز يعمل حاجة بتاعة شباب المفروض الناس تشجعه عادي ولكن عندنا الجملة المثبطة للعزائم "بعد ما شاب ودوه الكتاب" مع ان برة يقولك الحياة تبدأ بعد الستين وناس تقول بعد الاربعين !! انما عندنا يقولك الحياة تنتهي بعد التلاتين !


حتي اما واحد ييجي يخلف تلاقي برضه طلعله مثل يعكنن عليه زي مثل "يا مخلف البنات يا شايل الهم حتي الممات" وحتي فرحة الجواز ممكن تكسرها بجملة "ادبحلها القطة" و مثل "يا مأمنة للرجال يا مأمنة للمية في الغربال" ! ليه كل مناسبة بنحاول نبوظها بمثل ؟
وليه الارادة والتحدي بنقمعها باسم القدر ! طيب ما هو طبعا القدر هو اللي هيحدد كل حاجة لكن المحاولة واجبة برضه انما يطلعلك مثل يقول "اجري يا بني ادم جري الوحوش غير رزقك لن تحوش" ما هو فعلا هو رزق لكن مافيش مانع انه يجري جري الوحوش ويحاول يعني يزود رزقه !!


وبالنسبة للحكومات بقي وكده يطلعلك مثل "عيش نملة تاكل سكر" وكمان "يا غولة عينك حمرا" بتتقال علي الحكومة برضه ..لكن اكتر جملة سلبية في العالم كله هي بتاعة عيش نملة تاكل سكر دي مش سلبية بس دي تضيع امم بحالها لو كان ده مبدأ !

الحكومة علمت الناس الخوف كمان في الجملة والمثل الشهير "من خاف سلم" ودي علي سبيل يعني ان المواطن يقول "يا حيطة داريني" طبعا اكيد الشعار ده الناس اتعلمته من دروس امن الدولة ويمكن هي اللي طلعت المثل ده !!

ولو في اي موقف محتاج شهامة او قوة او انك تكون ابن بلد لا متدخلش تحوش لانه هيقولك "الجري نص الجدعنة"..امال الجدعنة الكاملة ايه بقي ؟ اكيد انك تهرب تماما من الموضوع او الموقف اللي انت فيه ..يا عيني ع القوة والسيطرة .


ولتبرير كل حاجة انها بالحظ مش بالتخطيط ولا كده يعني يطلع المثل المثبط برضه اللي يقولك "قيراط حظ ولا فدان شطارة" ! يعني م الاخر متحاولش واقعد استني حظك وخلاص.والللللعب يا حظ واقرص ع الزهر ..رغم ان في عهد حسني كان "قيراط واسطة ولا فدان شطارة" مش حكاية حظ.

الغريبة انك تسمع جملة دارجة في الشارع برضه بتقول "عيش ندل تموت مستور" ! ايه القيم الجامدة دي كلها ؟ دي حكمة عظيمة واللي مطلعها اكيد سبارسجي او افيونجي !
طبعا دي اكيد كانت حكمة كل فرد مجلس شعب في دايرته وتلاقيها شعار حملته الانتخابية كمان لانه بيستندل مع كل ولاد الدايرة.

وعشان الواحد يعيش مستريح وميدخلش نفسه في اي مشكلة او يحاول حتي انه يكون ايجابي مرة تلاقي جمل بتترمي عليه زي "انت هتفتح علي نفسك فاتوحة؟؟" "انت هتفتح طاقة جهنم" "انت دخلت عش الدبابير" "انت رحت للنار برجليك" ! طبعا اللي يسمع الجمل دي اكيد يترعب وميحاولش يكمل اللي كان ناوي يعمله لان الجمل نفسها مرعبة وتحس ان توفيق الدقن بيهمسلك بيها في ودانك !


وعشان عدم الإلتزام بالمواعيد يكون مبرر وشكله حلو كده بنحاول نبتكر جمل رنانة عشان التأخير يبقي لذيذ ! زي مثلا "الغايب حجته معاه" او الجملة الشهيرة "كل تأخيرة وفيها خيرة" ومش عارف مين قال ان كل تأخيرة وفيها خيرة ؟ دي جملة خرف واي كلام ده التأخير عن المواعيد مش بس بينرفز ده ساعات بيتسبب في مشاكل لا حصر لها ..قال فيها خيرة قال ..نفسي اعرف مين اول واحد طلع الجمل دي لانه يستحق حكم عسكري !


يعني عندنا كمية جمل سلبية توقف المراكب السايرة زي ما بيقولوا ..يعني اكيد بكمية الجمل دي كان لازم مصر تتأخر في الثورة تلاتين سنة ..دي جمل وأمثلة تحس انها صناعة النظام فعلا !


Tuesday, June 14, 2011

حرامي من عـالم سمسم







يا سلام علي ايام الانفلات الامني واول ايام خالص لهروب المساجين في مصر بانتظام كل يوم يهرب ييجي اربع الاف مسجون وخمس الاف مسجون والمشهد قدام التليفزيون في كل بيت مصري :

الأم : هو ده في كل المحافظات ؟؟ ده في خبر عاجل تحت كمان..
الابن: لا ده هرب كمان عشر الاف في كام سجن تاني خبر عادي يعني


والغريب ان الاشاعات في الايام دي كانت بشكل مبالغ فيه جدا هو صحيح هرب مساجين بشكل رهيب لكن الاشاعات كانت اكبر بكتير من الحدث نفسه وكأن الحرامي راجل عبقري ومنظم نفسه وبيخطط ولا المافيا الحقيقية !!
كنت اكلم واحد صاحبي اقوله هو ايه اصوات الرصاص دي ؟ يقولي حسب ما سمع من اشاعات "دي عصابات بتيجي من بلاد تانية لسرقة ونهب وحرق الاماكن هنا" !!
طبعا الوصف كان مبالغ فيه اوي يا راجل ده هولاكو مكانش بيعمل كده في كل حتة يعني ده حتة يجيله ملل من كتر البلطجة دي ..طيب سرقة ماشي انما ايه حرق دي؟؟ هم هيحرقوا الامكان ليه يعني بعد ما يسرقوها هو شغب وخلاص ؟؟

واحد تاني يقولي في تاني يوم الانفلات الامني ده بيوقفوا الناس ع الصحراوي والدائري ويغتصبوهم كلهم رجالة وستات !!! رجاااااااااالة ؟؟؟؟؟كمان ؟؟لييييه احنا بقينا فين هنا ؟انتوا بتجيبوا الكلام المهبب ده منين تيجي تقوله تعرف حد حصله كده يقولك الكلمة الشهيرة طبعا "سمعت" !

كنت خايف جدا في الايام دي وكل الناس كانت خايفة حتي لو مش خايف علي نفسك اهو خايف علي بيتك وفي وسط الخوف ده كله يجيلك تليفون مهم جدا يزيد الامر اشتعالا وشعللها شعلل :

التليفون : انت في البيت ؟
انا: ايوه في البيت هاروح فين في الاحداث دي يعني ؟
التليفون: انا سمعت ان منطقتكم داخل عليها خمس الاف واحد شايلين شعلات وبيولعوا في البيوت كلها
انا: مين قال كده
التليفون: حد صاحبي شاف الناس دي خارجة ومتجهة ناحيتكم


تليفون زي ده يعمل فيك ايه وانت قاعد تقرا اخبار عاجلة عن هروب مساجين ؟؟ تبول لا ارادي مثلا ؟؟؟ ركبك تقف مكانها متتحركش؟؟ تقريبا جالي شلل رباعي وخماسي وكل الانواع ومقدرتش اتحرك من مكاني وعيني بدأت ترعش في مكانها كده ساعة المكالمة دي اللي كلها اشاعات اكيد ..خمس الاف واحد ؟؟ وبيحرقوا البيوت ؟؟ده محصلش في البوسنة والهرسك يا جدعان !! ويحرقوا البيت ليه ؟؟ ده انا لو قائد الحزب الوطني نفسه مش هيحرقوا بيتي ولكن هيحاكموني ! في نفس الوقت ده اشم ريحة دخان واقول اااه الاشعات بجد لوا ايه ؟؟ دي ريحة حرق البيوت ؟؟ معقول ده بيحصل ؟؟ يطلع واحد بيحرق كيس زبالة في الشارع تحت والريحة هلت علينا .

طيب سامع صوت زعيق جامد قوي وكسر زجاج هل دي صيحات الغضب وطبول الحرب وبدأوا الهجوم التتار ؟؟؟ لا تطلع خناقة عادية جدا في الشارع !
اكلم علي صاحبي اقوله "يا علي هو الناس هجموا ولا لسه يا ابني" يقولي "لا هم مهجموش هم خلوا الميعاد بكرة " !!!
طبعا هتقولي ناس مين اللي هجموا..دي اشاعات كانت طالعة وحتي الميكرفونات ماشية في كل مكان في الشارع تقول احموا منطقتكم في عصابات عايزة تهجم علي البلد تحذير في عصابات عايزة تهجم علي البلد !! اموت واعرف هم عرفوا منين خطة العصابة !! هل العصابة ماشية علي "كاليندر" معينة والنهاردة يوم المدينة دي !!

ومنين علي عرف ان العصابة أجلت الميعاد وبقي بكرة هم بيبلغوا الناس بالتليفون !! وبعدين كل اصوات الرشاشات دي ولاعصابات لسه هتيجي بكرة امال ده كله تسخين ؟؟ قنابل يديوية ورشاشات وتهريب مساجين في مدينة قدامنا علطول كل ده تسخين ؟؟
قال "لاااا ده مش تسخين الموضوع كله ان مأمور السجن تحالف مع مساجينه لرد عدوان مساجين بلد تانية فانقلبوا عليه المساجين كلهم وتحالفوا مع بعض للهجوم علي المامور والمدينة" !!!
ده ولا اروع فيلم حلمنتيشي من حواري هولندا !! تحالف وهجوم ومؤامرات وكلام زي الفل ..طيب طالما الوضع كده بتقولولي انزل ليه احمي العمارة وانا ماسك سكينة ؟؟ ده البلد كلها صوت قنابل ورشاش..السكينة دي افتح بيها رغيف مش اهجم علي واحد برشاش يا جدعان.

لا واللي يشعلل الوضع اكتر ان واحد كل يوم بليل الساعة تلاتة الفجر يعدي بموتوسيكل منه لله يقول وهو ماشي بالموتوسيكل "اصحواااا يا بشر..البلد بتوللللللع" وبعدين يضحك ضحكة شريرة زي البأف ! اقذر نوع اشتغالة يحسسك ان البلد فيها معارك وحروب اهلية بكلمة "البلد بتولع" وهو بيهزر بسلامته .

طيب اعمل ايه ؟؟ احنا في اعدادي خدنا مادة معفنة كده او كتاب صغير بتاع كيف تقي نفسك من الزلازل ومخدناش حاجة ابدا عن البلطجية وحاملي الرشاش ! أهاجمهم بايه يعني ؟ صاعق كهربائي ؟ مش ممكن طبعا ده تلاقي المسجون ده بيفطر صاعقين ع الصبح في السجن ..ماما قالت نهجم عليه بازازة بايجون وعصاية مقشة كنوع من الوقاية يعني لو الحرامي دخل ! طبعا ده اسلوب وقائي بس لو الحرامي هرب من سجن في عالم سمسم !!

يوم واتنين قعدت اطبق مش عارف انام لحد اليوم التالت خلاص معدتش عرف انام الا اما اسمع صوت رشاشا خفيف كده من بعيد ومعرفش مصدره ولا حد يعرف يفسر ايه حصل امبارح بالظبط !
هل دي كانت شرطة بتهاجم بلطجية ولا بلطجية بيضربوا رصاصا بمدافعهم ولا ايه الحكاية بالظبط ؟ احسن الواحد ميسألش لحد ما الموضوع يفوت.

ناس كتير فكرت في اشاعات من نوع تاني "دول بيقفوا تحت ويهددوا الناس بالميكرفون يا اما تنزل يا هاطلع اولع فيك" ! طيب ساعتها فكرة وقلت لو طلعلي فعلا الحرامي وعايز يسرق كل حاجة ايه الحاجات اللي عايز احافظ عليها بعيد عن عيون الحرامي لقيت اني عايز احتفظ بجد ب "الهارد" بتاعي !!!!
لدرجة اني فكرت اخبيه تحت السرير عشان الحرامي ياخد التليفزيون وكل حاجة ماشي انما مش هتلمس هاردي ابدا وكأني بتكلم عن شقا عمري مثلا .

اقف في البلكونة ناس رايحة جاية بموتوسيكلات اقول "اااه اكيد دول اللي بيخططوا وبيراقبوا المكان كويس للهجوم الليلي الوشيك" كان فاضل اجيب ماكيت كده واحط خطة عسكرية زي صلاح الدين والا اجيب جعبة سهام واضربهم من البلكونة من كتر التفكير التأمري في كل واحد معدي في الشارع لدرجة ان واحد كان بيقرا الجرنان في الشارع شكيت وقعدت أتأكد ان الجرنان مش مقلوب وان ده يكون بيستعبط ولا حاجة .


كل ده طبعا ومكالمات القناة الفضائية المصرية العجيبة شغالة الله ينور كل شوة واحدة تصرخ في التليفون "الحقوووونا احنا في شارع مش عارف مين والبلطجية طالعين ع السلم اهو"
يا شيخة ؟؟؟ طالعين ع السلم ؟ طيب ما تروحي تحضريلهم حاجة ساقعة ولا حتة جاتوه بدل ما تتكلمي في التليفون ؟ يعني بلطجية طالعين ع السلم وانتي ماسكة التليفون بدل ما تجهزي اي حاجة ولا تعملي اي حاجة للمقاومة ؟؟ ولا حبكت تقولي وصيتك الاخيرة للتليفزيون يعني .


ولا واحدة تانية تتصل تقول "فين الجيش ؟؟ انا اللي اتكلمت امبارح وانتوا مبعتولناش حد" ! حاجة غريبة قوي المكالمة دي كمان طيب من امبارح وانتي لسه عايشة وزي الفل اهو امال في مكالمة امبارح كانت البلطجية خلاص بتقرب ازاي ؟ ولا رجعوا في كلامهم وقالولكوا هنيجي بكرة؟؟ اما قناة الفضائية دي فبركة من العالي صحيح .

اهم حاجة في الموضوع ان الجيش ساب ارقام للاستغاثة وعينك ما تشوف الا النور يا معلم ولا رقم بيرد اصلا وكله خارج نطاق الخدمة ..طيب استغاثة ايه بقي ده خوف زيادة لما اتصل حتي بالجيش وما يردش يعني تحس ان محدش هيساعدك لو عملت ايه .


قالوا لجان شعبية اتطمنت قوي وقولت المنطقة هتتأمن الحكومة فتحت الانترنت ورجعته من هنا واللجان رجعت بيوتها وسابت المناطق من هنا ..يا لجان سييييييس يا ...!
يعني قطع الانترنت هو اللي خلاكوا تحموا المناطق انما اما رجع الانترنت خلاص بقي بخ وكل سنة وانت طيب وكل واحد يحمي نفسه انا رايح اقعد ع الفيس بوك يا عم .
طبيعي يعني وانا هانتظر ايه من لجنة كاملة واقفة بتاكل "كريب" !!

افتح قناة روتانا سنيما وانا سهران خايف من هجوم البلطجية المحتمل الاقي فيلم "المشبوه" اييييييييه كلكوا عليا ولا ايه ؟؟ يا عم التليفزيون مش ناقصة رعب والنبي انت متأمر عليا انت كمان !
تاني يوم القناة تجيب "وش اجرام" خلاص قشطة قوي كده بلاها تليفزيون اسمع الراديو هتلاقي كالعادة واحد بيقول كل ارقام الجيش اللي مبتردش او شوية اغاني وطنية كأننا في فيلم "احنا بتوع الاتوبيس"حتي لو جعت بليل مش هاطلب دليفري..حاسس بذنب لو طلبت بيتزا لاني هاحس اني عفاف شعيب الجديدة ! يعني عفاف شعيب عملت عقدة للناس من كلمة بيتزا وزمان كل مطاعم البيتزا فعلا بتكرهها دلوقتي بسبب العلاقة السلبية بين الناس والبيتزا بعد الثورة .


الغريبة ان في الايام دي تلاحظ ان مكانش حد ابدا بيطمن حد ولكن الشعب المصري كالعادة اشتغل بهوايته المفضلة "التهويل" و"التزويد" يعني واحد اتسرق مثلا علي الطريق وعلي ما القصة تتنقل من واحد لواحد توصلك في الاخر علي انهم "خطفوه ودبحوه وسرقوه" ..عادتنا ولا هنشتريها ! كالعادة الخدمة المصرية "ارعبني شكرا" .

لكن اكتر حاجة تنرفز الناس اللي بتبعت استغاثات علي الانترنت ! بجد شئ مستفز يعني مين اللي هيهتم بشكوي علي الانترنت في وقت زي ده ؟ ومين اصلا فاضي من الشرطة الغايبة ولا الجيش يبص علي شكوتك دلوقتي وانت عمال تحكي قصة حياتك في رسالة طويلة وفي مواقع مجهولة كمان .

وتبدأ تحليلات الاطفال السياسية في الظهور كمان في الايام دي ومثلا طفلة تقول "حسني مبارك ده حرامي" اقولها "اه فعلا بس انتي عرفتي منين؟" تقولي "اصله سرق فلوس مامي" !!!
جريمة روشة قوي لحسني انه سرق فلوس مامي وبابي حسب رأي الاطفال..وطبعا حسني مبارك بالنسبة لهم لا يمثل الا افلام كارتون قصيرة انتشرت ع اليوتيوب وبقوا بيستمتعوا بيه كبطل كارتوني وهم مش عارفين انه حقيقي مش زي "سبونج بوب" يعني !


وتبدأ القصص والتحليلات بتاعة قالقهاوي في الظهور بكثرة زي مثلا "بيقولك خلاص كده الشرطة مش راجعة تاني الا بعد عشر سنين" واحد يقوله " يا راجل انا سمعت ان مش هيبقي في شرطة اصلا وكل واحد يحطكم منطقته" !!
كأنهم بيتكلموا عن مسلسل رمضاني ودي الحلقة الاخيرة مثلا ..معادش في شرطة!! اموت واعرف مين اللي قاله التحليل الجامد ده .



يعني كانت اول ايام الانفلات الامني هي الايام اللي فعلا ظهر فيها كل انواع الشعب المصري من "مهولاتي" و "مطيباتي" للي بيفتي واللي بيهري واللي بيحاول يكون محايد والنوع الشهير قوي بتاع "حكاوي القهاوي" ..لكن الفايدة الوحيدة للايام بتاعةا لانفلات دي ان الناس قلبها قوي قوي حتي الاطفال لو سمعت صوت رشاش بليل معادتش بتخاف يعني جيل جديد هيبقي قلبه جامد جدا ولا حاجة تهزه ..جيل يقرقش الزلط.



Sunday, June 12, 2011

اوعي تقولي دي ماركة جامدة






كان زمان يقولك "الأصلي يعمر والتقليد يدمر" اما دلوقتي فحتي الأصلي اصلا بيبقي ساعات متدمر !
معادش مقنع ابدا انك تيجي تشتري حاجة واحد يقولك "دي ماركة مضمونة" او "خد دي وحط في بطنك بطيخة صيفي" لأن من الاخر معادش فيه اي ماركة عالمية مضمونة مية في المية زي زمان.
مش عارفين هل السبب هو قسم الجودة في الشركات ؟ ولا التصنيع نفسه فيه خلل؟ ولا التخطيط نفسه للمنتج كان غلط ومكانتش الدراسات بتتم عليه علي اكمل وجه ؟
كانت الكلمة الشائعة عن الماركات العالمية يقولك "مافيشهاش غلطة" دلوقتي كلها عيوب للأسف وماركات مكانش حد يفكر انها هتكون فيها اي عيب.


الفيس بوك نفسه الموقع العالمي ده ملئ بالأخطاء بالجملة من بطئ في احيان كتيرة واخطاء في حسابات المشتركين ومافيش وسائل امان كافية ولو جيت تنزل بياناتك بيسألك علي بعض اصدقائك هل تعرفهم ام لا عشان يتأكد انك صاحب الحساب ويجيبلك احيانا صورة "فانوس" او "عامود" ويقولك مين ده ويكتبلك اسامي في الاختيارات !!!!
فضيحة بصراحة اما تحس انك بتتعامل مع الة غبية مش مع بشر يعني لازم يعرفوا ان ده مش وش بني ادم وانا مش هاعرف كل صور الفريندز اللي عندي واحفظهم عشان تعرف اني صاحب الحساب !!
ده بالاضافة لمسح معظم البيانات القديمة للمشتركين او حاجاتهم اللي فات عليها كذا سنة مثلا وقسم الشكاوي اللي مبيردش اصلا يقولك اصلكوا كتير فهرد علي مشكلتك لاحقا ويقعد شهرين وميردش اصلا في الاخر !
وساعات كتير تكتب كومنت او لايك وبعد شوية تيجي تلاقيه مش موجود ويقولك خطأ ! يعني عيب اوي علي موقع بالحجم ده كمية الاخطاء اللي فيه تهد جبل يعني .


اما ويندوز 7 رغم ان مايكروسوفت عملت فيه مجهود جبار الا انه ملئ بالأخطاء من شاشة زرقا بتحصل عشوائيا الي "كراش" بيحصل للاكسبلورور بدون سبب ولازم تقعد تعمله حركات عشان يتصلح الي الايقونات اللي بتتغير لوحدها احيانا الي حتي خاصية ترتيب الايقونات اللي لغوها بدون سبب وكانت الشكوي الرئيسية لمعظم الناس لان ترتيب الايقونات بقي بكذا طريقة بس مافيش طريقة يدوية ولكن لازم بحاجات معينة بالتاريخ او بالموضوع او بحاجات كتير اوي تانية انما مينفعش ترتب بطريقتك انت ..وطبعا الناس اللي شارية نسخة ويندوز من شركة كبيرة زي مايكروسوفت مش مطلوب منها تقعد تدخل علي المنتديات عشان تشوف حل لكل مشكلة حتي لو حد قاللي "ماهو الحل موجود ع النت" مش مطلوب من العميل انه يشتري الحاجة وبعدين يقعد يدور علي حلول مشاكلها !!


شركة عالمية رهيبة زي "أبل" تقع في اخطاء برضه اما المنبه بتاع الايفون يعلق تماما عند معظم الناس في العالم في اول السنة ويقولولهم هاتوه التوكيلات نظبط العيب ده وفي اليوم ده يقولك ناس كتير اتغيبت عن شغلها لانهم بيظبطوا المنبه بتاع الايفون ومتعودين عليه ولكن الخلل اللي اصاب المنبه خلاهم ميروحوش.
وكمان الايفون اصلا نزل منه كمية معيوبة برضه وكانت بيحصلها حالة "موت" ده غير الاي باد 2 والعيب اللي كان فيه في الاول من ظهور خطين سود كده علي الشاشة في اول استخدام !


اما شركة نوكيا فحدث ولا حرج خصوصا المنتج الجديد "ان 8 " اللي زهقونا اعلانات عنه وكأنه هيجيب الديب من ديله وكأنه حاجة محصلتش في التاريخ والناس تجري علي الاسواق عشان تجيبه عشان تتفاجأ في النهاية بجهاز "بيموت" !
تلات ايام وتلاقي الجهاز "مات" مافيش اي استجابة وتيجي تبحث علي النت تلاقي فعلا شركة نوكيا نفسها اعترفت بالموضوع وقالت فعلا في حالات موت في الجهاز وجاري تخطيها في الاصدارات القادمة ويبدأ اصحاب الحلول في انهم يقولوا الحل للمشكلة وتكون الفضيحة لشركة نوكيا "حط الجهاز في الفريزير كام دقيقة يخرج شغال" !!!
فعلا ده كان الحل لمشكلة موت الجهاز ولكن حل مؤقت لانه هيقع تاني وميحطش منطق تماما..ده اصلا بالاضافة لان الجهاز مكانش بقوة انتظاره ولهفة الناس عليه لانك هتلاقي جهاز عادي في النهاية وليس جهاز خارق يعني ولا حاجة زي الاعلانات مكانت مصورة للناس بل ان مثلا موضوع البطارية اللي مزروعة فيه وصعب جدا فكها دي مشكلة كبيرة لان لو الجهاز هنج وعايز تشيل البطارية ابقي قابلني بقي وهتكون مشكلة عويصة عكس موديلات نوكيا السابقة اللي البطارية بتتشال فيها بسهولة .


شركات السيارات طبعا أصبحت في وضع حرج برضه بعد كم المشاكل اللي عندها في الفترة الاخيرة وكل شوية نسمع عن العربيات اللي بتتسحب من الاسواق لسبب او لأخر وكبري الشركات العالمية بتسحب سياراتها وتقول خلل فني !

شركة تويوتا تسحب سيارات 2010 من السوق الامريكيه والاروربيه وكمان المفاجاة في شركة كبيرة زي مازدا اما تسمع خبر زي ان في عناكب في خزانات مازدا تجبر الشركة على سحب سياراتها من السوق وكمان شركة سيارات "كيا" تسحب نحو 21 ألف سيارة صغيرة لوجود خلل فني فيها

وشركة "بي إم دبليو" العملاقة العريقة كمان تسحب 150 ألف سيارة ومعاها شركة تانية كبيرة جدا ويمكن من اشهر الشركات علي الاطلاق شركة جنرال موتورز ودي بقي سحبت 1.5 مليون سيارة بسبب تسرب في الزيت


وبعيدا عن السيارات ومشاكلها كمان شركة يابانية كبيرة اكثر من2 مليون علبة من النقانق والبيتزا من السوق للاشتباه في امكانية احتوائها مواد كيميائية !
وكمان نشوف شركات اللاب توب والمحمول تاني مثلا عندك اتش بي تسحب 162000 بطارية كمبيوتر محمول لاسباب تتعلق بارتفاع الحرارة وشركة سوني تسحب 440 ألف جهاز محمول من الأسواق
وشركة توشيبا كمان تسحب 41 ألف كمبيوتر محمول "عرضة للاشتعال"


وعالم الصحة والادوية لم يسلم برضه من العيوب الفتاكة دي وطبعا هنا اخطر بكتير لان دي ادوية يعني حتي الدوا اللي المفروض يعالجك لا ده بيزيد امراضك وساعات امراض خطيرة كمان زي الصين
تسحب عقار تخسيس من الأسواق لتسببه زيادة ضغط الدم
وموضوع العقار اللي اسمه ميثوتريكسات لعلاج السرطان سحبوه من السوق لوجود عيوب فادحة فيه .


وطبعا اخر حاجة سمعناها موضوع فضيحة صندوق النقد الدولي وانه كان بيتعرض لاختراق أنظمته المعلوماتية طيلة شهر !! شهر كامل وصندق النقد الدولي بحجمه ده وكم الموظفين اللي فيه والمفروض المسئولين عن تأمينه تماما مكانوش يعرفوا حاجة زي دي ..فعلا فضيحة عالمية بكل المقاييس وتخلي الواحد معدش يثق ثقة كاملة في اي كيان عملاق خلاص

فعلا كلمة "كيان عملاق" دي بقت ع الورق بس انما كمنتجات او اخطاء بنشوفها من الكيان ده بتخلينا نشك في كل منتج ونشوف تجربته الاول وعشان كده شركة عملاقة زي الامازون بتعمل تحت كل منتج "ريفيو" ونشوف اراء الزباين اللي اشترت المنتج ده قبلك عشان تشتريه بناءا علي تجربة الناس مش بناءا علي اسم المنتج نفسه او ماركته وده جزء مهم جدا ان كل واحد بيقول رأيه في المنتج ويدي تقييم ودرجة عشان تعرف عدد الناس اللي قالت عليه حلو
او ممتاز او سئ .


يعني قبل ما تشتري اي حاجة دلوقتي متقولش كلمة "دي ماركة" لا لازم تسأل اللي اشتروها قبلك وتعرف رأي الناس عنها لان كلمة "الأصلي" خلاص انتهت وكل الاصلي بيسحب منتجاته وبيطلع عيوب في الدفعات الاولي لمنتجاته وفعلا "إسأل مجرب ولا تسأل طبيب" ولازم كل اللي هيشتري حاجة يسأل اللي مجربها افضل بكتير من الاعتماد علي اسم المنتج .




Friday, June 10, 2011

لعبة الحقائق





اوراق الضغط وأساليب الضغط في العالم سياسيا او اقتصاديا او حتي رياضيا ليها اساليب وطرق مختلفة لكن المهم تؤدي غرضها اللي هو ربح الجولة او المعركة بالكامل .
في الفترة الاخيرة شوفنا كتير قوي من اوراق الضغط واللعب ع المكشوف وكل واحد يحط ورقه في اللعبة السياسية حتي لو كانت بأساليب ملتوية .
مثلا عندنا في مصر دلوقتي موضوع اساليب الضغط او الاوراق السياسية كتيرة ومتعددة زي مثلا محاولات الضغط علي احد المرشحين للرئاسة او محاولة زعزعة برنامجه ببعض حملات التشويه زي مثلا الناس اللي تفضل تتكلم عن البرادعي وتقولك "ده عميل" والكلام ده اللي هو خارج المنطق تماما

وكمان في الحوارات والمناظرات بيستخدموا أسلوب اسمه
straw man

وده بيستخدم عشان تشويه حجة اللي ضد الشخص ده في اي مناظرة وقلب الطرابيزة عليه زي مثلا اما واحد يقول "الحرية ليها مزايا كتير" التاني يحاول يوقعه في الكلام عشان ينتصر في الحوار ويقول "اااه يعني قصدك تقول ان ليها عيوب؟؟ يعني انت ضد الحرية ؟؟" والاسلوب ده في الحوار منتشر قوي في مناظراتنا المصرية والعربية وفي معظم البرامج ويعتمد علي التقويل بشكل كبير !

طيب زي ايه محاولات الضغط علي الخصم للانسحاب واللعب السياسي بدهاء في الفترة الاخيرة ؟

مثلا عندك دونالد ترامب رجل الاعمال بدأ يحاول الضغط علي اوباما وزنقه في خانة اليك بإدعاء انه حامل شهادة ميلاد مزيفة وقعد يقول هافضحه وهأكشف الحقيقة ويثير بلبلة وخلاص حوالين اوباما وزوبعة حول نشأته وميلاده ويخليه حديث وسائل الاعلام فترة طويلة حتي لو كان الموضوع كله محض افتراء من مرشح منافس للرئاسة .

كمان اوباما برضه كان بيتكلم عن قضية فلسطين ويادوب بس اتكلم عن حدود 67 وطبعا نتيناهو مسكتش وبدأ يخطب خطبة طويلة وكل ما يجيب سيرة حرية اسرائيل يقوم اللوبي اليهودي كله ويقف تصقيف حار طبعا وده كأنه رد قاطع علي كلام اوباما عشان يقولوله اللي بتقوله ده مش هيحصل ابدا واسرائيل دايما لازم كل اللي هي عايزاه وكان التصفيق حار جدا طول الخطبة بتاعة نتنياهو وكانت خطة بينفذها مع اللوبي اليهودي للضغط علي اوباما ومحاولة ارجاعه عن كلامه ده وموقفه ده.

الفيفا وموضوع بن همام المرشح القطري لرئاسة الفيفا دي بقي قصة كبيرة من ساعة ما قطر خدت تنظيم كاس العالم اعتبر الامريكيين بكل عنصرية ان دي فضيحة وان ازاي الملف القطري العربي ده يكسب الملف الامريكي في انه ياخد تنظيم كاس العالم وبدأت المناوشات والصحف الامريكية تكتب بكل عنف عن ان في رشاوي في الموضوع بدون اي دليل واضح ولكن السيطرة الكاملة الاعلامية والنشر بكثافة يخلي الناس تصدق ويخلق رأي عام في اتجاه نياتهم واهوائهم
وفعلا نجحوا في ده وبدأوا يحاولوا الوصول لدليل بأي طريقة ولكن في نفس الوقت كمان "بن همام" اترشح لرئاسة الفيفا هنا وقفت امريكا بقي وقالت دي كبيرة عليه قوي وبدأت امريكا في اثارة الزوابع الحقيقية ومحاولة التشكيك في بن همام علي اساس ان بلاتر اصلا غير مرتشي !!
وبدأ التحقيق معاه في قضايا رشوة لحد ما طبعا اتعلق كافة نشاطه الرياضي وانسحب من انتخابات الرئاسة وكسب بلاتر الليلة كلها واخد الجمل بما حمل وكانت خطة قذرة ومدبرة من اولها لاخرها في الفيفا او امبراطورية الفساد العالمية وكانها المافيا !


أسانج صاحب موقع ويكليكس بدأ يعلو نجمه في الفترة الاخيرة وبدأ يقول الي محدش عايز يواجهه وبدأ في نشر الوثائق اللي كانت بتقع علي بعض الدول زي الصاعقة وبتقطع علاقات دول بأخري طبعا محدش سكت للراجل ده وبدأوا في فتح ملفه بقي وإثارة القضايا القديمة ليه وطلعلوه قصة وفضيحة جنسية فجأة من ملفاته عشان يهدي اللعب شوية ودي ورقة ضغط ذكية منهم طبعا لمحاولة اسكات واخماد المارد "ويكيليكس" لان كده اصبح خطر علي امريكا نفسها ان لم تكن القصة كلها تدبير امريكي اصلا !


من اكتر اساليب الضغط كمان بنشوفها في المناظرات الامريكية بكثرة للرئاسة زي مثلا اوباما اما كان بيشكك ويضغط علي منافسه في الانتخابات ويقول "ده مبيعرفش يبعت حتي ايميل ازاي هيكون رئيس الولايات المتحدة ؟؟" وطبعا منافسه مسكتش وقال "انت يا اوباما مالكش اي علاقة بالجيش والحاجات العسكرية دي هتتعامل معاهم ازاي؟؟"
وبدأ كل طرف منهم يضغط بكل اوراقه علي الاخر لمحاولة كشفه امام المجتمع وانه ياخد نقطة علي حسابه ويتقدم الي الامام.


الثورة الليبية واسلوب الضغط فيها علي الثوار ايضا زي ان قناة ليبا تقعد طول النهار تجيب فيدوهات لثوار وهم بيقتلوا او بيضربوا الناس الل بيهاجموهم وميجيبوش اي حاجة لما الثوار تموت قدام عنيهم او يترمي عليهم قابل وصواريخ من القذافي ! يعني غير محايدين علي الاطلاق وعايزين بس يكونوا صورة قدام الرأي العام ان الثوار قتلة ومش علي حق ابدا !!

طبعا ده شوفناه عندنا في مصر في الثورة برضه وكمان في الانتخابات الرئاسية السابقة اما حاول ايمن نور يدخل المعادلة السياسية ويرشح نفسه طبعا طلعوله قضية التوكيلات المزورة عشان يضغطوا عليه باسلوب رخيص ويخرجوه برة من القصة كلها ودلوقتي بعض المرشحين بيعمل كده في بعض المرشحين برضه كل واحد يقول ع التاني في مؤتمر "ده عميل وصناعة امريكية" والتاني يقول عنه "ده ميعرفش حاجة عن مصر" عشان يظهر قدام الرأي العام ان هو اللي علي حق والتانيين مينفعوش خالص يبقوا رؤساء.

وطبعا كمان عارفين ازاي السادات زمان استخدم الاخوان كورقة ضغط في عالم السياسة ضد بعض الحركات الاخري وبدأ يديهم الحرية عشان يكونوا في مواجهة الاطراف الاخري بدهاء سياسي.


يعني اوراق الضغط والألاعيب السياسية من قوي الأسلحة اللي ممكن طرف يقضي بها علي الطرف الاخر والكلمة اقوي من الف سيف في عالم السياسة او عالم المكر والخداع.


Wednesday, June 8, 2011

المصري وارقامه السحرية







هو ليه كلنا كمصريين مهتمين قوي دايما بموضوع الارقام بتاعة ثروة مبارك وعائلته كلها ؟ يعني مبارك سرق وخلاص فاسد وخلاص انما ليه عايزين نعرف الرقم بالجنيه وبالقرش ؟

كل يوم تطلع الجرايد تقول رقم شكل وارقام بعيدة قوي عن بعضها والناس تقعد تحسب الموضوع من الاول وعايزة تعرف كل وزير كمان معاه كام بالظبط وبالجنيه !
ولكن المصري من زمان في كل كلامه هتلاقيه مهتم بلغة الارقام مش بس عشان ثروة مبارك وكده لا ده من زمان جدا وهو بيقول مصطلحات في حياته اليومية كلها ارقام زي ما اتكلمنا قبل كده عن مصطلحات تانية تعالوا نشوف مصطلحات الارقام المصرية اللي دايما بيستخدمها كل مصري :


الجملة الشهيرة قوي "ده انا بضرب اخماس في اسداس"
دي يعني الحيرة بعينها انه يضرب اخماس في اسداس ونفسي اعرف مين اول واحد قال الجملة العبقرية دي ؟ اكيد موظف في المعاشات ولا حاجة ولكن ايه اللي هيخليه يضرب الارقام دي اصلا ؟؟ واي حد ليه اصلا يضرب كسور في بعض عشان يتسلي ؟؟ بس هي جملة فريدة من نوعها وغريبة جدا

كمان الجملة بتاعة "ومتقولش تلت التلاتة كام" دليل علي الحزم بقي يعني متقولش حتي تلت التلاتة وبرضه جملة اغرب من اللي فاتت ومعرفش ايه علاقتها بالحزم في الموضوع بس شاع استخدامها زي العجين اللي متلخبطوش كده !
واما واحد بيغيب قوي عليك هتقوله برضه جملة بلغة الارقام "انت غبت وقولت عدولي" يعني برضه ارقام وعد ودايما العقلية المصرية رقمية قوي "ديجيتال" !!

وصل الامر لدرجة ان اما نيجي نشتم برضه بنستخدم الارقام زي مثلا "اه يا بنت ستين في سبعين" وايه يعني الشتيمة في دي ؟؟ هي الظاهر شتيمة ومكملتش اساسا !
لا والشتيمة التانية برضه "يا ابن ستين..." او الجملة بتاعة "دي حاجة ملهاش اي تلاتين لازمة اساسا" .
وحتي اما بيتكلم المصريين عن الحقوق بتاعتهم يقولك "هاديك حقك تالت ومتلت" وكمان ممكن يقول "علي داير مليم" .
وفي كمان اما ييجي الناس تتقي شر الناس الاخري بيقولوا ايه "خمسة وخميسة" في وشهم ويشاورا بايديهم كلها
وحيت العربيات الناس بتلف بيها في الشارع وتعمل "خمسات"
وفي الماتشات كلها لغة ارقام زي الكورة في "التمانيات" مثلا ومعظم مصطلحات الرياضة فيها ارقام بالطريقة دي
وكمان اما واحد يعلي قوي او يحصله موقف سئ جدا بيتقال انه كان "في سابع سما ونزل سابع ارض"
وكمان الواحد اما ييجي يشهد علي حاجة انها حلوة بيقول "انا ابصم بالعشرة" علي كده وكمان ممكن يقول رايه في الحاجة دي ويقول "دي مية مية" او "عشرة علي عشرة" !

اما المبالغة الرقمية المصرية فدي موجودة يعني اما تقوله شوفت فيلم كذا ممكن حد يقول "ده من ميت سنة يا عم" وهو من سنتين مثلا !
او واحد تاني يقول "ده من ايام اهل الكهف" !!
ولو كلمت واحد علي التليفون وابنه مثلا رد وتقوله اديني بابا هيقولك" ثانية واحدة" مع ان الواقعي بيقول دايما "دقيقة واحدة اناديه" اما المبالغ فممكن يقول "عشر دقايق اناديهولك" !! ده علي ساسا انه هيناديه من سطح العمارة مش من الاوضة التانية !

والحاجة اللي المصري متأكد منها قوي بيستخدم فيها برضه لغة الارقام زي مثلا "شوفتهم بعينيا الجوز"
ولو جيت تطرق حد من قدامك تقوله "وريني عرض كتافك" وساعات "هز طولك" !
وطولك بالمتر ونظرك يتقال عليه "ستة علي ستة" ووزنك بالكيلو ! كل حاجة رقمية جدا مش بس مصطلحاتنا .


وحتي اما تتكلم عن واحد تالت بتقول "فلان وعلان وترتان" والجملة الشعبية الشهيرة بتقول "سبعة صنايع والبخت ضايع" !
ودايما الناس عندها اعتقاد في تكرار المحاولة في الجملة "التالتة تابتة" ليه بالذات المحاولة التالتة محدش عارف !!
وعن التضحية بيتقال "اولعلك صوابعي العشرة شمع" برضه باستخدام لغة الارقام.

والجواز اكتر حاجة بنتكلم فيها بلغة الارقام زي "اليوبيل الفضي" و"الذهبي" و"الماسي" وغيره حسب عمر الزواج.
ولو واحدة زي القمر بيقولوا عليها "قمر 14"

وحتي الطلاق بيكون بالتلاتة ! رقم تلاتة دايما رقم تأكيدي في كل الحالات ولكن بالذات في الاستخدام المصري زي الشتيمة حتي "ده انت طلعت تلاتة...." وشتايم من انوع ده.

يعني مش غريب علينا ابدا اهتمامنا بالارقام واحنا معظم مصطلحاتنا وكلامنا اليومي كله ارقام في ارقام اصلا ايها الشعب الديجيتال .




Tuesday, June 7, 2011

نصايح اخر حاجة من زعيم مخلوع وشرب قهوة سادة






في كل ثورة في العالم العربي الموضوع ماشي بالترتيب والغريبة ان محدش بيتعظ..يعني تلاقي الخطوات واحدة زي قطع الانترنت وحرق السجون وضرب المتظاهرين والشعب كله يقعد في ميدان معين ويقول سلمية..نفس الخطوات بالظبط لكن الزعماء بعضهم مفهمش الدرس وبيكرر نفس الخطوات يعني ايه لزمة انك تقطع الانترنت رغم انك شوفت ان ده منفعش في مصر ومأثرش ع الثورة بالعكس ده زادها اكتر !

وليه تقتل في المتظاهرين وتخلي الموضوع فيه شهداء رغم ان ده هيزود الموضوع..هم الزعماء دول بيفكروا ازاي ؟؟
لكن اي زعيم عربي جاي هيسأل الاول اي زعيم مخلوع من دول اللي قامت عنده ثورة وهيقوله الحقني اعمل ايه بالظبط ؟؟ انصحني ارجوك

ونشوف وصايا الزعيم العربي المخلوع :



أولا : متقعدش تسخن الشعب عليك بجمل غبية تستفزهم زي مثلا يطلع رئيس وزرائك يقول "الشعب لم ينضج سياسيا" والكلام الفارغ ده..ده انت اللي منضجتش يا معلم والشعب مستوي وناضج ع الاخر وجاهز للثورة او تقعد تقوله "خليهم يتسلوا" بشكل استفزازي اهو التصريحات دي تخرج الشعب عليك يبهدلك .


ثانيا : لو لقيتهم طلعوا مظاهرة اجري من اول يوم علطول وزود المرتبات ومتبعتش اي افراد امن يضربوا في الشارع بل بالعكس ابعت افراد مدني يعملولهم خيم لذيذة جدا وبالوان كمان وقولهم "الريس بيمسي وباعتلكم الخيمة دي وصباح الديمقراطية يعني"


ثالثا : في اول يوم مظاهرة حاول تعمل مشهد تنحي وتظهر انك زعلان من شعبك وكده واجر ناس تخرج تقول "لا تتنحي لا تتنحي" وادفعلهم علي قد ماتقدر وارجع تاني وقول رجعت بناءا علي رغبة الشعب العظيم


رابعا : سلك امورك بدري بدري وخلي فلوسك متجمدة احسن في شكل الماظ لان الفلوس هيجيبوها هيجيبوها مهما حاولت تخبيها في اي بنك انما لو في شكل الماظ او احجار نادرة وخبيها في قصرك تحت الارض في مكان ميخطرش علي بال حد ابدا عشان تطلع انك شريف لو جم يحاكموك بعد كده


خامسا : حاول تلحق نفسك وتعمل ائتلاف بسرعة تكون افراده كلهم من حزبك اصلا ويعملوا معارضين بسرعة ويقعدوا يتفاوضوا معاك رغم انهم منك اساسا بس محدش يعرفهم او مش مشهورين خالص عشان تدخل ع الناس بذكاء


سادسا : بعد ما تظبط كل ده انزل بنفسك الميدان بالطيارة من اول ساعة تظاهر وكلمهم وجها لوجه من غير ما الامن يضرب ولا واحد ولا بعصايا حتي عشان يقولوا راجل محترم وابن اصول فعلا


سابعا : حاول تعمل زي القذافي وتقول انا مش رئيس اصلا عشان اتنحي ولو كنت رئيس كنت اتنحيت من زمان ورميت الاستقالة في وشكم يعني !


ثامنا : جهز الميدان المؤيد من بدري واملاه ناس زي ميدان مصطفي محمود كده ووزع عليهم اكل هناك وخليهم يباتوا ايام وليالي في حب الزعيم


تاسعا : ولا تهرب مساجين ولا حاجة بالعكس زود الامن تماما خارج الميدان المعارض وعلي كل البيوت وعلي كل السجون بحيث ان الناس اصلا اللي في البيوت متكونش مهتمة تماما يمشوا ولا ميمشوش
لان الوضع والامن مستتب فمش هيهتموا باللي في الميدان ولا يشوفوا اخبارهم لان كل حاجة زي ما هي


عاشرا : متعتقلش اي حد بالعكس خرج كل المعتقلين السياسيين ونزلهم بنفسك الميدان والمعارضين هيحسوا انك اشتغلتهم جامد بالحركة دي ولا بتستخدم قمع ولا سلاكة !


حادي عشر : طلق مراتك او السيدة الاولي وقول "تصدقوا فعلا طلعت ولية فاسدة وطفلة الحشرة !!" عشان يعرفوا ان هي كانت السبب وانك خلاص تبت فعلا وطلقتها وياريت تعمل حركة افلام وتضربها بالقلم زي الافلام العربي قدام التليفزيون ع الهوا وتقول "انتي طالق طالق طالق"


ثاني عشر : انزل كل فول وطعمية فجأة في اي محل وهات كام صحفي يصوروا الموضوع ده واكتب تحت الصورة "الزعيم حبيب الفقراء دائما"


ثالث عشر : انزل بسرعة اي قرية عندك واشرب كوباية شاي مع اي واحد واتصور معاه وحطها صفحة اولي فتخلي بعض الناس تعيط في البيوت وتتعاطف معاك ومتنساش تطلع في خطاب وتقولهم "ساموت في هذه الارض" عشان الناس تسح بالدموع يا عيني


رابع عشر : جهز القناة الفضائية بتاعتك وظبطها كده علي اساس انها تصور دايما ميدان المعارضة خالي وخلي الناس تتكلم تعيط من حبك ويقولوا "من حبك مبنامش الليل" ويقولوا فيك شعر ويغنوا ع الهوا


خامس عشر : غير الحكومة بسرعة وقول "تصدقوا فعلا بعد كل السنين دي اكتشفت انها حكومة فاسدة زي مراتي هي كمان!!" وطلع قرارات بمحاسبة اللي كانوا فيها بسرعة قدام الناس مع انك هتسفرهم برة اصلا


سادس عشر : لو الناس رضيت عنك وسابوك الكام شهر الفاضلين الحق بقي اعمل فيها عم الحكيم وطلع كتاب بسرعة عن قصة حياتك واخلاصك لوطنك وبعض افكار وسميه الكتاب الفوشيا او اي لون تاني غير القذافي


سابع عشر : استعين بفكرة "شفيق" ووزع بونبوني فعلا علي الناس في الميادين ورشهم بعربيات" ماونتن ديو " وفرقع العاب نارية كنوع من الهزار معاهم بدل الغاز والكلام الفارغ ده اللي هيقلب عليك الدنيا
ويقلب عليك منظمات حقوق الانسان


ثامن عشر : موت واحد من قرايبك في الفترة دي واعلن الحداد وقول انك حزين قوي علي حال البلد وان واحد من قرايبك مات نتيجة الاحداث دي عشان تصعب ع الناس اكتر ويعرفوا انها مش بايدك بل انك متبهدل بسببها زيهم


تاسع عشر : بدل ما تقطع الانترنت زود سرعته في الفترة دي وقولهم ليكوا شهرين مجانا لكل مشترك !! وليكوا الف رسالة مجانا يا محتجين يا كتاكيت !!


عشرون : اعمل استفتاء علي زيرو تسعماية وقول "هل انت محتج ولا حبوب؟" وحاول تخلي النتيجة في صالحك وان كلهم حبوبين ومعاك علطول


واحد وعشرون : متعملش موقعة جمل وكلام فارغ من ده بل بالعكس نزل كلاب لولو في الميدان مكتوب عليها اسمك بشياكة عشان الناس تعرف انك بتعرض وجهة نظرك باحترام ولبس المؤيدين طقم معين ثابت موحد عشان ميتلخبطوش مع المعارضين في النص


ثاني وعشرون : حاول تجهز كميات من الشاي بالياسمين لبعض الاقلام وناس من هيئات ومنظمات مدنية عشان يهتفوا باسمك ويقولوا انك راعي الامن والامان


ثالث وعشرون : متخوفش شعبك وتقولهم "لو مشيت البلد هتضيع" لان ده مبيجيبش نتيجة قولهم "انا ممكن امشي ومش هيحصل حاجة بس العشرة اللي بيننا دي تضيع كده ؟؟ يرضيكوا كده؟؟ مش هاوحشكم طيب؟؟؟"


رابع وعشرون : خرج معتقلين من المعتقلات اللي تحت الارض واديهم فلوس بالهبل وخليهم يقولوا تصريح اهبل ويقولوا "انا قضيت اجمل سنين عمري في المعتقل السري وكانوا بيأكوني ايس كريم بعد الغدا"


خامس وعشرون : بدل الناس اللي بتحدف ملتوف من فوق العمارات لانهم تبعك خليهم يحدفوا ورق بانجازاتك ومعاه شوية ورود علي الناس في الميدان عشان يبقي المنظر حضاري وراقي قدام العالم والسياحة متهربش


سادس وعشرون : اذكي وقت بقي للمرض في الوقت ده من بدري يعني اول ما يحتجوا اعمل نفسك اتصدمت وجالك القلب والناس كلها هتبقي معاك علطول وقول "انك اتصدمت من شعبك اللي عاش معاك سنين ازاي يعمل كده " عشان تجمع ناس كتير حواليك


سابع وعشرون : عشان الناس تصدق انك مش سبب البلطجية اللي في الشارع قول في تصريح "البلطجية سرقوا قصري الرئاسي وقشطوني" !!!




وياريت اي زعيم عربي عنده ثورة يسمع الكلام ده وهيفضل في الحكم بذكاء بدل ما يمشي علي نفس الخطوات الغبية ويقعد يضرب في الناس وخلاص

من زعيم عربي مخلوع..مع الشكر


Sunday, June 5, 2011

لو كنت وزيرا لأخذت هذه القرارات فورا





في تلك الفترة العصيبة التي تعيشها مصر وفي فترة النقاهة من الحكم الفاسد والغاشم لابد ان نحافظ علي الثورة وعلي مصر ببعض الحزم
بعض القوة في التعامل مع الخارجين علي القانون ولن يستغرق جمع هؤلاء المغتصبين الاوغاد اكثر من خمسة ايام علي الاكثر
القوة الان مطلوبة تماما فقط للتعامل مع البلطجية ودون تجاوز لحقوق الانسان او اهانة لاي احد حتي لو كان مجرم فتتم معاملته بكرامة وادمية داخل القسم
ولو كنت وزيرا للداخلية لكانت هذه قراراتي الان في جميع المحطات التليفزيونية ..سأقوم بضم البث لجميع المحطات لاذاعة البيان الاتي علي مسمع كل مصري وخصوصا اوجه كلامي لكل مجرم علي وجه التحديد او متحرش او مغتصب او قاطع طريق :


البيـــــان :

بسم الله الرحمن الرحيم..
ايها الشعب المصري العظيم
لقد عشنا معا اياما عصيبة في فترة ما بعد الثورة من انفلات امني وتبجح وجرأة للخارجين علي القانون لم نعهد لها مثيلا
وقد طالب الكل بضرورة الحزم مع هؤلاء والضرب بقوة وحتي ان البعض قد طالب بتطبيق الاحكام العرفية علي البلاد
والأن اقول لكم انني وباسم الوزارة وباسم الحق والعدل والامن والامان لبلدي العظيم مصر كنانة الله في ارضه قررت ما يلي :


1- وضع اكثر من عشرين فرد حراسة لكل قسم شرطة مجهزين بالمدافع الرشاشة لمواجهة الخارجين علي القانون و"الضرب بالرصاص الحي" لكل من يلقي او يحمل زجاجة ملتوف واحدة لانهم يريدون احتراق الاقسام وغيابها عن اداء دورها لكي يعيثوا في الارض فسادا ومن يحمل الملتوف هو ليس بطالب حق ولكنه مجرم عتيد في الاجرام وقيد يكون قاتل او مسجل خطر طليق بينكموسنعطي الاوامر للضرب في المليان لكل من يتهجم علي الاقسام لحمايتكم اولا وحماية اقسام الشرطة التي هي جزء من ممتلكات هذا الشعب العظيم


2- الاعدام شنقا بدون محاكمة لكل مغتصب ثبتت عليه تهمة الاغتصاب باي وسيلة كانت علي ان تكون بعض الاحكام علنية والشنق في ميادين عامة لبعضهم كي يكونوا عبرة للاخرين وكي يكونوا رادعا ووازعا لكل من تسول له نفسه علي الاقدام علي هذا الجرم الفج


3- الحكم بالسجن لمدة عشر سنوات لكل متحرش باليد كي نحافظ علي سمعة هذا البلد الطاهر الامين من امثال هؤلاء الرعاع الخونة المرضي ونطهر انفسنا من شرورهم


4- الاعدام شنقا لمختطفين الاطفال والنساء لطلب الفدية او التهجم عليهم واغتصابهم عنوة


5- السجن عشر سنوات لكل محرض علي قطع طريق كنوع من الاعتراض علي اي قرار لان قطع الطرق كارثة حقيقية تهدد صحة الاف المواطنين علي الطرق وتعطل مصالح الملايين من اجل قلة لا تعي كيف تطلب حقها


6- الاعدام شنقا لكل من قتل شرطي او عسكري اثناء تادية عمله


7- الاعدام شنقا لكل من دخل حي سكني وروع الامنين باستخدام المدافع الرشاشة وروع النساء والاطفال في بيوتهم بكل انحطاط وتبجح


8- السجن المؤبد لكل من سرق سيارة علي الطرق الصحراوية ونصب الاكمنة والافخاخ لسرقة هذه السيارات


9- السجن عشر سنوات لمن يحتج علي اي شئ بخلع ملابسه في الطرق العامة لانه يخدش حياء المواطنين ولا يطالب بحقه بطريقة متحضرة وادمية


10- الاعدام شنقا لمن يسرق حقوق الاطفال المرضي او العواجيز مثل مستشفي السرطان او غيرها


11- السجن المؤبد لكل من يقود حافلة او مقطورة وهو مخمور او متعاطي احد عقاقير الهلوسة


12- السجن عشر سنوات لكل حامل سلاح غير مرخص والسجن المؤبد لحامل اكثر من سلاح في حوزته


13- السجن خمس سنوات للتحرش اللفظي بالنساء


14- السجن خمس سنوات والفصل نهائيا من الخدمة لكل مدرس يتعامل بوحشية مع الطلبة كي ننقي بلدنا الحبيبة من امثال هؤلاء الوحوش الذين يخرجون اجيالا كسيحة ضعيفة


15- السجن عشر سنوات لكل من يسير في الاتجاه المعاكس من الطريق باقصي سرعة ويسبب الحوادث في الطرق العامة


16- الاعدام شنقا لكل مقتحم لمنزل لسرقته او التهجم علي النساء فيه ويكون الاعدام في الميادين العامة ايضا


17- الاعدام شنقا لكل من يهجم علي مستشفي بالاسلحة ويخطف المرضي ويثير الرعب بين الاطباء وحالات الهلع


18- الاعدام شنقا لكل من يسرق اعضاء المرضي لبيعها لاحد المتاجرين باعراض وباعضاء البشر


19- الجلد حتي الموت لكل من يشوه الناس باستخدام مية النار او غيرها من وسائل التشوية لما يسببه من اضرار نفسية لا تنتهي


20- الحبس لمدة خمس سنوات لكل من يستخدم المسدسات في الشوارع ولو كانت مسدسات للصوت لما يسببه من ارهاب وترويع للاطفال والمواطنين


21- الاعدام شنقا لكل محرض علي احداث فتنة طائفية او حرق جامع او كنيسة او اي مكان عبادة


هذا والله الموفق ووفق الله مصر لما فيه الخير وادام علينا نعمة الامن والامان




Saturday, June 4, 2011

لا تتحرشــوا بمصر






صورة مصر بعد الثورة هي الصورة الايجابية اللي عايزين كلنا ننقلها للعالم كله عن "مصر القادمة" و "مصر التي نريدها" و "مصر الأفضل"..
الشباب المصري قادر جدا علي فعل ده خلال سنوات قليلة باصراره وعزيمته ولكن مع توافر الظروف والمناخ الجيد تماما بعيدا عن اي فساد جديد

ولكن للأسف في بعض الحاجت اللي تحصل وتحاول تشوه صورتنا برة قدام صحف العالم كله بالذات في الايام اللي فاتت دي سواء من مؤامرات او من بعض بقايا مبارك ومخلفاته من جهل وامية وغيره من مشاكل بالجملة سابها مبارك زي تركة تقيلة جدا علي ضهر مصر وشباب مصر ..
مبارك بفساده قدر يسيب لنا شبح يهدد مستقبل مصر ويفضل يطلعلنا كل فترة وهو شبح تشويه الصورة وده بيحصل بتعمد او بغير تعمد في الصحافة والاعلام الغربي زي ما قدروا الثورة وضعوها علي الاعناق دلوقتي مركزين قوي علي الاخبار السلبية المصرية بطريقة فجة وعلي الصفحات الاولي ..


ممكن يكون ده عادي لكن التركيز زاد قوي حتي علي المواضيع اللي مكانتش يتفردلها صفحات اولي في جرايد انجليزية وامريكية زي التعليم المصري مثلا..في ناس تقول ده عشان يبرزوا الدور التقيل لمصر والصعب بعد الثورة او ناس تقول ده عشان يبينوا هي مصر كانت فين وليه قامت الثورة وناس تقول دول مزودينها جدا الايام دي.


كان غريب جدا موقف الناس من "لارا لوجان" الاعلامية الشهيرة اما جت مصر ونزلت ميدان التحرير وتم التحرش بها بافظع الطرق والفيديوهات والصور موجودة وبالجملة وطلع ناس كتير جدا يقولوا دي متعمدة ودي كذابة ودي عايزة تشوه صورة مصر في عيون العالم !!
وطلعت وهي بتبكي في برنامج شهير جدا "60 دقيقة" الامريكي وكانت منهارة كل ما تفتكر المشهد لدرجة انها قالت دول كانوا بيفكوا ملابسي الداخلية !!

طبعا دول قلة ودول بعض البلطجية ولكن عشان نتقدم فعلا لازم نعترف بده ولازم نعترف بكل اخطائنا ومنمشيش بمبدأ مبارك ان كله ضدنا وكل دول عايزين يدمرونا وكل دول عايزين يشوهوا صورة مصر وخلاص..
الاصلاح الحقيقي يبدأ من المواجهة الحقيقية ولازم نعرف اصغر نفطة ضعف عندنا واقوي نقطة عندنا عشان نعرف عيوبنا فعلا

المشهد المخزي فعلا هو كمان في صحيفة "ديلي ميل" وكمان عنوان ضخم ورئيسي في الجريدة عن المدرس المصري المتوحش وضربه للتلاميذ والافظع انهم جابوا الفيديو كمان جوة موقع الجريدة الرسمي عشان العالم كله يتفرج ويشوف وحشية المدرسين المصريين طبعا احنا مش هنلوم الصحيفة زي ما كان بعض الناس بتلوم "لارا لوجان" ولكن لازم نتدارك فعلا العيوب دي ونعرف ان عندنا مدرسين في بعض الاماكن لا يصلحوا لتعليم حيوانات حتي..ومدارس لا ترقي لتكون مسكن للخفافيش ..وده بالتالي بيطلع طلبة مغيبة تماما عن الواقع وبالتالي بيخرج مستقبل مجهول ومظلم.


وفي التحرير يستغل بعض البلطجية غياب الثوريين الحقيقين وينزلوا التحرير ويتحرشوا بمراسلة وكل حجتهم انها اسرائيلية وكأن ده سبب كافي ان جسمها يكون لهم !!
حاول البعض بكل شهامة انه يبعد الذئاب دول عنها وحاول ظابط شرطة كمان لكن ضربوه لحد ما راح المستشفي في حالة صعبة .
مين دول؟؟ وهل مدفوعلهم لتشويه سمعة مصر ؟؟ هل هم مأجورين عشان يظهروا للعالم كله سمعة ميدان التحرير الجديدة ؟؟
الغريب انهم مش عارفين انهم كده مش بيتحرشوا بواحدة ..دول بيتحرشوا بمصر وبسمعة مصر.

والفضيحة كمان اللي تمت في الفترة الاخيرة من محمود عبد السلام عمر رئيس سابق لبنك اسكندرية ورئيس مجلس ادارة سركة المكس للملاحات الحالي وهو تحرش بعاملة فندق بيير بنيويورك وحتي لو لسه هنعرف هيتحكم عليه بايه بالظبط بس الخبر خد صفحة كبيرة في صحف عالمية واسم مصر مكتوب بالبنط العريض .وكأننا في الفترة الاخيرة قدرنا اننا نكون في الصحف دايما بصورة سلبية بعد ما كنا من فترة بنطلع بصورة حضارية جدا واننا بننضف ميدان التحرير والصورة السلمية اللي ظهرت لينا في كل صحف العالم وكلام كل الزعماء والفنانين وغيرهم عن مصر وعظمة مصر بدأ شبح التشويه يضربنا يمين وشمال ويخبط بينا عرض الحائط

كمان حوادث الفتنة اللي حصلت زي امبابة وغيره الصحف بتفردلها صفحات كاملة في العالم كله وعواميد صحفية وده طبعا يرعب اي سائح يفكر بس انه ينزل مصر وسط الاخبار السلبية دي كلها .

كمان الصحف الانجليزية مش بس بتركز علي سلبيات مصر ولكن ايضا العالم العربي والاسلام له نصيب طبعا واخر حادثتين كانوا ان واحدة وضعت صورها ع الفيس بوك وهي بتسوق ومرتدية النقاب اتقبض عليها في دولة عربية فورا !

والحادثة الاخيرة عن البنت اللي في اوكرانيا اللي شاركت في مسابقة جمال ..شافها شباب مسلم ورجمها حتي الموت ومسكوا واحد منهم اعترف وقال انا طبقت الشريعة ولو مسكتها ميت مرة انا مش ندمان وهاطبق الشريعة في كل مرة من المرات دي !!

وطبعا هم ركزوا علي الحادثة دي جدا وخصوصا علي جملة "تطبيق الشريعة" وحاطينها بين قوسين لان دي الجملة اللي تهمهم طبعا وبيحاولوا يبرزوها عن الدين الاسلامي بكل عنصرية احيانا !

وكمان رغم اختلافنا مع بن لادن او اتفاقنا معاه لكن الصحف الامريكية بدأت في اظهار صورته بشكل غير لائق في مواضيع غريبة جدا زي مثلا خبر انه عنده كميات من الفياجرا في البيت او الخبر التاني انهم لقوا شرايط جنيسة وصور اباحية !!!

طبعا ده كله هدفه الرئيسي ان يعني يقولوا للعالم "ادي المسلمين اهم اللي بيربوا دقونهم ده شكل من برة بس انما هم مهووسين بالجنس وغيره من افعال مشينة ومرضي كمان" !!!

ده اللي كان عايز يوصله الاعلام الامريكي اللي ياما كذب من ايام حرب فيتنام لحد حرب العراق ودايما بيكذب ودايما مبدأ التشويه والغاية تبرر الوسيلة هو الحاكم والمسيطر علي اخباره بشكل ملحوظ.
يعني سواء اعتبروا بن لادن ارهابي او لا زي ما بعض العرب متعاطفة معاه لكن ايه لزمة اظهار موضوع الفياجرا والحاجات دي بعض قتله ؟؟

كل اللي عايزين نوصله دلوقتي ان صورتنا السلبية بتوصل برة وللعالم بشكل اسرع من الصورة الايجابية فده مش تثبيط ولكن تحفيز لنا جميعا اننا دايما نحاول نظهر مصر في شكلها الحضاري اللائق
عشان السياحة ترجع فعلا بشكل كامل او ميكونش في اخبار حتي عن مصر ولا سلبية ولا ايجابية زي ما بيقولوا

no news is good news

يعني لاما نظهر بصورة ايجابية وحضارية تماما مش بصورة "الراجل ابو جلابية" وغيره من الصور اللي بتحطنا في موقف وفي خانة سلبية قدام عيون الغرب لاما منظهرش خالص احسن ولا سلبي ولا ايجابي

لان السياحة مش هترجع الا لما الاخبار دي تنتهي تماما وتخرج مصر عشان تلبس تاج حريتها تاني ويرجع السياح لمصر من تاني ويرجعلها اسم ولقب بلد الامن والامان وبلد الحرية والسلام .

Friday, June 3, 2011

صفحة بيس يا مان علي الفيس بوك

لجميع متابعي المدونة والزوار الكرام


لمتابعة مدونة بيس يا مان علي الفيس بوك يرجي زيارة العنوان التالي



http://www.facebook.com/pages/%D9%85%D8%AF%D9%88%D9%86%D9%80%D8%A9-%D8%A8%D9%8A%D9%80%D8%B3-%D9%8A%D8%A7-%D9%85%D9%80%D8%A7%D9%86/124256150922542