Wednesday, December 26, 2012

شـمــس وقـمــر 39






** كلمة لكل رجل ..
"الفتاة المناسبة"..ليست من ستقابلها بتدبير "المناسبة"  !


** الحاكم الصالح ليس فقط من يفي بالدين..
بل من يدين بالوفاء ..


**  قبل حكم الاعدام يسألون "ما طلبك الاخير قبل ان تموت"
والأولي ان يكون السؤال قبل الوقوع في الحب "ما طلبك الاخير قبل ان تعشق"


** في طفولتنا نسأل عن كل شئ..
وكلما كبرنا سقط سؤال منا..
الي ان يبقي سؤال واحد "متي نجد الحب الحقيقي"


** قالوا "لا يستحق الحياة من عاش لنفسه فقط"
ولكن يستحق الخلود من عاش لعشقه فقط..


** لا يوجد سؤال يطرح نفسه..سوي الحياة..
ولا توجد اجابة تطرح نفسها الا الحب..


** لأن الشر داخل البعض منا فنحن نطلق علي بعض الناس "ذئاب بشرية"
مع اننا نثير استغراب البشر بهذه الجملة ..والذئاب ايضا تتعجب..


** قد يتفوق الانسان علي نفسه..
ولكنه ابدا لن يتفوق علي قلبه..



** لا تجعل من ألسنة الناس عائق لحلمك..
بل اجعل منها سجادة حمراء تصل بها الي حفلة الأحلام..!



** قالت : هل أحببتني من أول نظرة ؟
قلت : بل قبلها
منذ ان كانت نظرتك مجرد فكرة..
فالحب الأول دائما ..يسبق بخطوة.



** تحرير الدول في استقلالها
وتحرير القلوب في احتلالها..




** نهرب من الحاضر الي ذكريات الماضي
ونهرب من الماضي إلي أمال المستقبل
فهل خلقت الحياة لتكون خطوات للهروب الدائم ؟



** اذا هجرت الملائكة قلبك.فاهدم بقايا جسورها..
فقد تصبح في يوم ما جسورا للشياطين.
فمكان الخير المقتول قد يصبح نبتة شر قادم.



** لا تقل أبدا وقعت في الحب ..
بل قل  ارتقيت اليه..



** لا تعجب بفضيلة الصمت اذا ما دفعتك الي صمت فضائلك..



** قالت : أشكرك علي هدية الأمس
قلت : أما أنا  فأشكر عينيك علي هدية الأمس والحاضر والمستقبل



** البشر كالبحار لن تجد من تغلب عذوبته ملحه الا بمعجزة.



** اليائس يهرب من الحياة
والمتفائل يهرب بحلمه مع الحياة

Thursday, December 20, 2012

نهاية العالم بكرة..حد لسه بيصدق الحكايات دي ؟؟







كل فترة بيطلع موضوع "نهاية العالم" ويطلع حد يقول تاريخ معين هيكون فيه نهاية العالم ويحاول يجيب الادلة بقدر استطاعته..لكن اكيد مافيش دليل عنده لان كلنا عارفين ان محدش في الدنيا دي عارف نهاية العالم يوم ايه ولا سنة ايه .
"وَمَا تَدْرِي نَفْسٌ مَاذَا تَكْسِبُ غَدًا وَمَا تَدْرِي نَفْسٌ بِأَيِّ أَرْضٍ تَمُوتُ"


لكن العالم من زمان مهووس بنهايته..شئ غريب جدا انك تلاقي جدول كبير جدا علي الويكيبديا لكل توقعات نهاية العالم وتتعجب اما تعرف انها من اول سنة 634 قبل الميلاد !!
وكان الرومان في الفترة دي مرعوبين من نهايتهم في السنة ال 120 من انشائها .

تخيل ان من قبل الميلاد وهم عمالين يقولوا العالم هينتهي قريب !! واضح انهم مبيزهقوش ابدا.
طيب بلاش نرجع لزمان قوي كده خلينا بس في الكام سنة اللي فاتوا ..تفتكر كام تنبؤ بنهاية العالم حصل في الالفينات بس ؟

قالوا ان العالم هينتهي في 2000  وبعدين قالوا 2001  وبعدين قالوا  2006 وبعدين 2007 و 2008 و 2010 وكان من اشهرها كمان توقعات بتاعة 2011 اما حصلت زلازل كتير في اماكن متفرقة من العالم فحاول بعض العلماء يبنوا عليها النظريات لنهاية العالم ومحصلش كالعادة .

واحد اسمه    Ronald Weinland
قال ان المسيح هيرجع للارض في 2011 والعالم هينتهي ولما لقي نظريته فشلت قال خلاص في مايو 2012 وبرضه محلض حاجة من توقعاته .

حضارة المايا المرة دي هي اللي عمالة تقول ان نهاية العالم في 21 ديسمبر 2012  وطبعا لان العالم اتعود خلاص علي التوقعات الخاطئة دي فمحدش عاد بيصدق والغريب انك بتلاقي بعض الناس بيطلعوا ويحاولوا يقولوا للناس متصدقوش ..بستغرب جدا ان حد لسه بيصدق رغم ان كل سنة التوقعات والتنبؤات دي موجودة من زمان جدا وكمان من قبل الميلاد !!

طيب هل ده اخر توقع ؟ يعني احنا بنقول ان من قبل الميلاد بيتوقعوا لكن هل بتاع 2012 هو الاخير..؟
لا لسه كتير كمان يعني واحد متوقع حسب الجدول ان نهاية العالم من 2018 الي 2028 يعني ده فاتح الموضوع شوية قال يمكن تصيب.
وواحد اسمه "رشاد خليفة" بيقول نهاية العالم في 2280
وحسب التلمود بيتوقع اليهود نهاية العالم سنة 3240

يعني الموضوع مفتوح قوي والتوقعات ملهاش نهاية فياريت محدش يصدق او يلتفت للموضوع ده ..احنا كمسلمين عندنا علامات كتير ليوم القيامة بعضها ظهر وبعضها لسه محصلش خالص
عشان كده مش هنصدق الكلام ده بسهولة لاننا مؤمنين بالله وبالعلامات اللي ذكرها لينا ليوم القيامة.
والاخوة المسيحيين عندهم علامات برضه لنهاية العالم  حسب "رؤية يوحنا" اللي فيها علامات نهاية العالم و"الاختام السبعة".

كان في زمان منجم شهير جدا اسمه "نوستراداموس" كان ليه كتاب اسمه "كتاب التنبؤات" وقال في رأيه ان نهاية العالم هتكون في 3797 وكان ليه الكثير من التنبؤات التانية اللي بعضها حصل فعلا
عشان كده لسه في ناس متمسكة بكلامه ومصدقاه .


من الغريب جدا ان في دول زي الصين واخدة الموضوع بجد ان نهاية العالم 21 /12/2012 صحيفة التليجراف بتقول انهم عمالين يشتروا شموع وغيره من الطقوس لانهم بيستعدوا فعلا لنهاية العالم في كل انحاء الصين .
والصينين اصلا عندهم كتاب اسمه
Tui Bei Tu
في تنبؤات عن مستقبل الصين لكن مذكرش نهاية العالم فيه لكن هم مهوسين اليومين دول بحكاية نهاية العالم .

ومش بس الصين ده كمان في اوروبا مخبأ بين فرنسا والمانيا علي الحدود هيفتحوا ابوابه للي خايفين مقابل 7 يورو !!!
يعني بيستغلوا الحدث لتحقيق ربح علي حساب الناس المذعورين والمصدقين الموضوع ده .



وطبعا احنا عارفين ان السينما العالمية مسابتش موضوع نهاية العالم ده لكن كتير من الافلام اتعمل عن نهاية العالم باكثر من طريقة يعني مرة قالوا ان الكواكب التانية هيحاولوا يغزونا ومرة قالوا نهاية العالم علي ايد النباتات زي فيلم
the happening
وساعات بفيروس قاتل زي فيلم
12 Monkeys (1995

ومرة قالوا انه هيكون بفعل النيازك..المهم الطرق اتعددت ولكن من اشهر الافلام اللي اتكلمت عن الموضوع بتاع نهاية العالم :

Deep Impact (1998
I Am Legend (2007
The Day After Tomorrow (2004
Children of Men (2006
Beneath The Planet of the Apes
2012
Armageddon
War of the Worlds

وغيرهم كتير قوي من الافلام اللي اتعملت عن موضوع نهاية العالم.



في مقالة قريتها في صفحة انجليزية بتتكلم عن اغرب 8 تنبؤات بنهاية العالم .
بيقولك الموضوع زاد قوي بتاع نهاية العالم لدرجة انه طول عمره فيه اشتغالات كبيرة..اكبر مقلب في عملية نهاية العالم دي كانت حكاية
The Prophet Hen of Leeds

دي فرخة كانت بتبيض بيض مكتوب عليه "المسيح سيأتي قريبا" وده حصل في ليدز في 1806 والغريب ان ناس صدقت وبعدين اكتشفوا المقلب ان واحد اللي كاتب علي البيض ده بطريقته ومخليه كأن الكتابة حقيقية فعلا .

وفي سنة 1997 واحدة اسمها نانسي قالت ان كائن فضائي اسمه "زيتا" قالها احذري من الكوكب اكس ..!! اللي هيضرب الارض قريبا.
وبرضه ناس صدقت وطلعت الحكاية كلها ملفقة.


تنبؤات كتير ومقالب اكتر وحكايات خرافية في موضوع نهاية العالم لكن احنا مش هنصدق ومش منتظرين ان "ناسا" تطلع زي ما طلعت تطمن العالم عشان تطمنا لاننا متاكدين حسب دينا ان ربنا وحده اللي يعرف نهاية العالم ومافيش مخلوق مهما تنبأ هيقدر يحدد يوم ولا حتي سنة ولا حتي قرن هينتهي فيه العالم .
وزي الجملة ما بتقول "كذب المنجمون ولو صدفوا"

Monday, December 17, 2012

هؤلاء جميعا ساندوا الحق







برغم موجات العنصرية التي تعلو وتنخفض احيانا في كل ربوع العالم الا اننا تعودنا ايضا علي ان نجد من يدافع عن الحق في كل بقاع الارض حتي ولم تكن قضيته..
حتي وان لم تكن القضية تعنيه من قريب او من بعيد ولكن يكفيه انها قضية تخص الانسانية..

الاحكام المطلقة مرفوضة ..فليس الغرب دائما هو المشكلة..فاننا نجد نماذج غربية متعددة عرفت بمساندتها للحق في قضايا لا تخص وطنها بل احيانا تخص دول هم علي عداء معها ولكنه يشهد شهادة الحق ولا يتحدث الا صوت ضميره .

ومن اشهر هذه الامثلة التي كانت دائما مع الحق حتي ولو ضحت بمنصب او اختلفت مع كل من حولها :


1- هيلين توماس :

صحفية امريكية شهيرة وعضو في فريق البيت الابيض للصحافة ..كانت لها العديد من المواقف الجريئة دفاعا عن الحق ووقوفا في صفه عندما كانت تهاجم بشدة الرئيس الامريكي جورج دبليو بوش وقالت انه الرئيس الأسوأ في امريكا علي مر التاريخ لانه افقد امريكا معظم أصدقائها..وقالت في تصريح اخر لها عن اسرائيل : "هؤلاء الناس محتلون وعليهم ان يرجعواالى ألمانيا أو بولندا...أخبرهم أن يخرجوا من فلسطين» وهذا التصريح كلفها الكثير حيث اعتبره الكثيرون تصريح عير مسئول في وجهة نظرهم.



2- ريتشيل كوري :

امريكية ويهودية ولكنها كانت تدافع عن القضية الفلسطينية بكل قوة وكانت توصف انها "شهيدة الدفاع عن حقوق الفلسطينيين" ..
قتلتها جرافات الإحتلال الاسرائيلي عندما حاولت ايقاف الجرافات التي تهدم منازل الفلسطينين
وتركت مذكرات لها تروي فيها عن مأسي الشعب الفلسطيني من طغيان الاحتلال.



3- وفي كتاب للدكتور عماد نصر ذكرى ذكر مثالين علي نفس الفكرة وهم :

الكاتب الرائع برنارد شو عندما كان له موقف شجاع وهاجم المحكمة واللورد كرومر بسبب حكمهم الظالم علي مصريين في حادثة دنشواي
وايضا الكاتب البير كامو الذي دافع عن حق الشعب الجزائري في الاستقلال.



4- إميل زولا :

كانت له رسالة بعنوان "اني اتهم" وهي رسالة ارسلها للرئيس الفرنسي لتتهم احد شخصيات الجيش في هذا الوقت بانه منحاز وعنصري ضد اليهودي "دريفوس" والتي عرفت بقضية دريفوس الشهيرة التي كان بطلها زولا وضحي بمستقبله من اجل العدالة.



5-نعوم تشومسكي :

من اكثر الامريكيين نقدا لسياسة امريكا تجاه العالم وتمحورت عدد من اعماله حول نظريات المؤامرة سواء من جانب الاعلام الغربي او من جانب سياسة امريكا الخارجية والتي عراها تماما في كتابه الشهير والذي فضح فيه الولايات المتحدة "ماذا يريد العم سام" .



6- جان بول سارتر :

فيلسوف وروائي فرنسي شهير كان له دور هام في حصول الجزائر علي استقلالها من خلال كتاباته.




وممن دافعوا عن الحق حتي ولم تكن قضيتهم في هذه الايام :

1- رغم ما نراه من احداث عنصرية تجاه لاعرب والمسلمين احيانا في امريكا والغرب الا ان احيانا نري بعض الصور المشرقة فمثلا رأينا مبنى "إمباير ستيت" في نيويورك باللون الأخضر احتفالا بعيد الفطر للمسلمين .


2- رغم وجود العديد من الصحفيين ذوي الاراء العنصرية الا ان في حادثة اهانة الرسول الاخيرة ظهرت صحيفة الجارديان لتافع عن الرسول وتكتب عنه مقالة لرد الاتهامات ضد الفيلم المسئ للرسول
وفردت الصحف الغربية مساحات لمسلمين وعرب ليكتبوا مقالاتهم دفاعا عن الرسول ومنهم مفتي مصر.


3- متحف في لندن بعنوان "الف اختراع وواحد" ليظهر اسهامات الحضارة الاسلامية للعالم .


4- شركة "أودي" لتصنيع السيارات توقف تضامنها مع الاسد تضامنا مع الشعب السوري .


5- اما علي الصعيد الرياضي فرأينا العديد ممن ساهموا في قضايا لا تخصهم ولكن لانهم رأوا الحق فقط ووقفوا في جانبه مثل :

* كريستيانو رونالدو يتبرع لأطفال غزة.

* كانوتيه ونجوم اوروبا يعترضون علي تنظيم اسرائيل لبطولة اوروبا لسن 21 وقالوا انها تعتبر مكافأة لهم علي قتل اطفال فلسطين .

* نجم يوفنتوس الإيطالي فيدال قال في احد تصريحاته : لا لاسرائيل ولا للصهيونية نعم لغزة




6- المانيا  ترفض السماح للقس الاميركي المتطرف تيري جونز بدخول اراضيها





رأينا العديد من المواقف والشخصيات التي حاولت بكل جهدها نصرة الحق حتي وان لم يكونوا معنيين بالقضية ولكنهم معنيين بالانسانية ..فالحق اقرب احيانا من القضية ..والانسان أقرب من الجنسية واللون والديانة..
كن دائما مع الحق تنتصر .


Wednesday, December 12, 2012

عربية ام حسين..عربية مصرية جداااا






كل فترة واحد بيطلع يقول احنا عايزين نعمل اول سيارة مصرية ..دول كتير عملت عربيات واحنا قادرين اننا نصنع عربية مصرية ..لكن السؤال ايه مواصفات عربية مصرية ؟؟
كلنا عارفين عربيات مواصفات خليجي مثلا لكن لو عملنا عربية مواصفات مصري تليق بالطرق والمرور المصري ازاي نحل المعادلة دي ؟
كلنا عارفين حسين .."قولهم حاجة انت يا حسين" ..عشان كده قررت ان العربية تبقي اسمها "عربية ام حسين" ونشوف ايه المواصفات اللي ممكن تكون في عربية مصرية :



1- مستشكف بلاعات :

طبعا في مصر "في كل شارع في بلادي تلاقي بلاعة ده شئ عادي"..وعشان كده اللي بيعملوا عربية مصري المفروض يحطوا مستكشف بلاعات بدل الجي بي اس ..
وتحديد نوع البلاعة اذا كانت عالية ولا مخفية ولا خازوق كبير في الارض.



2- زمارة ياسر جلال :

كلنا عارفين الكوميك الشهير بتاع ياسر جلال بتاع "يا حارة وسخة"..انا بقترح ان المقطع ده يكون صوت الزمارة في العربية بسبب الزحمة والاختناقات المرورية الدائمة اللي مش عارف يحل المشكلة دي كل خبراء المرور في مصر من سنين طويلة لان مصر محتاجة تخطيط من جديد لعشرين سنة قدام ..

مصر هي البلد الوحيدة اللي ممكن تلاقي حاجات مش باينة في المراية جنبك لان الموتوسيكل ممكن يكون لازق فيك بالفعل لدرجة انه مش باين في المراية اصلا..
واحنا البلد الوحيدة اللي عندنا الخطوط اللي علي الارض بتاعة عبور المشاة بتخلينا نهدي السرعة مش عشان الناس تعدي ولكن عشان بنفتكرها مطب مفاجئ كعادة الشوارع والمطبات اللي بتيجي علي سهوة وتلبس المطب..

واحنا المكان الوحيد اللي بتلاقي اللوحات الارشادية فيه عايزة تحيرك ..في يافطة شهيرة علي الطريق لو سافرت اي مكان ورجعت القاهرة تاني هتلاقي يافطة بتقول "بنها 5 كيلو" 
وبعديها بشوية وبعد ما تمشي كتير هتلاقي "بنها 6 كيلو"  !!!!
يعني المسافات بتزيد ودي معجزة اصل الارض دائرية والمسافات بتتغير علي الطريق..



3- زقاقة كهربا :

تدوس علي زرار صغير جوة يطلع دراعين من العربية يزق الناس اللي عمالة تلحوس العربية بايديها في كل مكان ..
عادة غريبة عندنا عند بعض الناس تلاقيهم طول ما هم ماشيين جمب العربية في الزحمة يحسسوا عليها وهم ماشيين كأنها وحشاهم قوي ..شعب عشري بطبعه..
وده دور الزقاقة الكهربا في العربية المصرية انها هتزق الناس بعيد وتنفع كمان في زق البياعين الغريبي الاطوار زي بياعين الجزر علي الطريق ولا اللي بيبيعوا "ليفة" كاني هنزل استحمي في ترعة مثلا ايه القرف ده.

وكمان الناس اللي بتمسح العربية بالعافية ويقولك انا مسحتها يا بيه ده محتاج قفا كبير من الزقاقة دي بدراع متعدد المقاسات ..



4- تنفس صناعي :

زي اللي بينزل في الطيارات في حالة الطوارئ انت في مصر هتحتاجه في عربيتك لان ساعات وانت مسافر علي طرق معينة بتحتاج فعلا تنفس صناعي من كتير الروايح الغير معلومة المصدر روايح مريخية بكل المقاييس..
مش بس قش الرز اللي بيفشخ الناس علي الطرق لكن كمان الشكمانات بتاعة الرعبيات اللي بقالها خمسين سنة اللي بتعيم الواحد وهو سايق وتخليك تقفل القزاز بسرعة رغم ان المفروض اني افتح القزاز عشان اتهوي لكن عندنا بنقفل القزاز بسرعة ونحاول نتنفس ونشم هوا نضيف جوة العربية عشان كده محتاجين جهاز التنفس الصناعي..
يعني مش غريبة انك تقف في اشارة وجمبك عربية نص نقل عليها بقر مثلا ده مشهد نادر الوجود في العالم..



5-  صاعق :

بعد ما تركن العربية برضه بتفضل المأساة ..تقفل وتركن وتطلع بيتك ممكن تنزل تلاقي العربية متعلم عليها بمفتاح او كاتبين عليها قصة حياتهم لو كان عليها تراب واكيد هيكون عليها تراب طحن طبعا من الجو الرائع والبديع والغير ملوث المحيط بينا..

من غرائب الشعب المصري انه بيعامل العربيات علي انها شجرة ..وتلاقي "للذكري" وقلوب واسامي وساعات شتايم طبعا علي التراب اللي علي سطح العربية كله..

والعربية في مصر ليها استخدامات اخري كتير ..ممكن تنزل تلاقي ناس فارشة عليها اكل وبتاكل ده شئ طبيعي جدا او واحد نايم علي الكبوت ومأنتخ ما هي تكية ابوه ..
ولو سألت واحد منهم "ينفع كده؟" ممكن يقولك "اه ينفع"  .."احم طيب انا بسأل بس" !!
وعشان كده العربية محتاجة تكون متوصلة بسلوك كهربا عشان اللي ييجي يلمسها يتنفخ كهربا في ساعتها..



6- جهاز الاعتصامات :

طبعا في كل شارع في مصر بقي فيه اعتصام او اضراب او مظاهرة صغيرة..
يبقي انت مينفعش معاك غير عربية مواصفات مصري يكون في جهاز لتحديد اماكن وتجمعات المتظاهرين باليوم والتاريخ عشان تتحاشي المكان ده وتروح تلعب بعيد..
لانك لو دخلت في وسط مظاهرة بالغلط وخبط واحد في عربيتك غصب عنك يبقي هتتفشخ ويقولوا عليك بتدهس المتظاهرين وتلبس تهمة يبقي الافضل انك تعرف كل الاماكن قبل ما تنزل من بيتك..

طبعا مش محتاج تسمع النشرة المرورية اللي بتيجي في الراديو لانها هتقولك كل الشوارع مقفولة "لف وارجع تاني..لف وارجع تاني"
كل ما تفتح الراديو تلاقيهم بيقولوا "يا جماعة المحور واقف ومختنق تماما وكل الشوارع المحيطة بيه"  ربان يطمنكوا ع الصبح ده يوم زي الفل..وتحس انك ساعتها عايز تقول بصوت عالي "لقد وقعنا في الفخ" زي عادل امام..



7- شتامة كهربا :

طبعا مش غريب ابدا انك تكون ماشي في امان الله وسايق تمام التمام وتلاقي واحد فاتح ازازه وبيقولك "يا حماااااااار"
والغريب انه هو نفسه ماشي مخالف وبرضه بيشتم ..وعشان الشتايم مستويات ومراحل لازم يكون عندك "شتامة كهربا " بكل المستويات..
المستوي الاول : "بيبي فيس"  ده اول ما تدوس عليه يشتم الناس الراقية ويقولها يا وحش..يا ندل..
المستوي الثاني : عربية ملاكي  ..دول يتشموا بالفاظ متوسطة زي يا حمار يا غبي
المستوي الثالث : نص نقل ..ممكن تشتمهم بالفاظ زي ابن الكلب او خلافه لو شتموك يعني..
المستوي الرابع : توكتوك..لو ظبطت الجهاز علي المستوي ده يبقي هو كفيل بالتعامل مع كافة الالفاظ وصولا الي "يا ابن الم.."





ودي مواصفات عربية "ام حسين" المصرية ..ومع الطرق المكسرة والمرور اللي في مصر يبقي فعلا "قولهم حاجة انت يا حسين" ..
الومفروض تبقي في يفط قبل المطبات او البلاعات مكتوب عليها  "بلاعة بعد 100 متر..بالهنا والشفا يا جميل..البس"  !!

Wednesday, December 5, 2012

هتقول نعم ولا لأ للدستور الجديد..المزايا والعيوب في دستور مصر







هتصوت بنعم ولا لا علي الدستور الجديد لمصر ؟؟

ده السؤال اللي كتير منا بيسأله في الفترة الاخيرة البعض محتار والبعض مقراش الدستور كله والبعض حسم موقفه من فترة وعارف هو هينزل يقول نعم ام لا ..
قبل ما تدي صوتك وعشان تعرف ايه اللي اتغير وايه اللي لسه ما تغيرش من الدساتير اللي فاتت لازم تدي لنفسك وقت كافي وتقرا مثلا دستور 23 و كمان دستور 71 وتقارنهم بدستورك الجديد..

في ناس ممكن تقول لكن دستور 71 اقراه ليه وهو اصلا عليه معترضين كتير ؟ لكن الفكرة تعرف ايه اللي تم تعديله بالكامل وايه اللي بقي زي ما هو حتي لو اتعدلت الصيغة وايه المواد اللي كنت تتمني تتغير لكن فضلت زي ما هي في الدستور الجديد .

الدساتير في دول العالم توافقية ..سواء تركيا او اول دستور امريكي في 1784 عن طريق جميعة تأسيسية ..او دستور زي اللي حصل في اندونيسيا واللي اتكلم عليه الصحفي وائل قنديل وقال ان بعد الثورة هناك واما جم يعملوا الدستور كانت المفاجئة ان مسيحي يرأس لجنة الدستور في اكبر دولة اسلامية !!
يعني مش فكر اقصائي او تحكم مجموعة معينة بدستور البلاد ..وده نفس اللي حصل في تركيا رغم ان حزب ليه الاغلبية الا انهم اما جم يعملوا الدستور الكل اتجمع من أجل دستور توافقي للبلاد
رغم انه كان يقدر يسيطر ويحط دستور احتكاري لكن التوافق في وضع دستور للبلاد هو الحل.


الدستور زي ما احنا عارفين هو ابو القوانين وهو اللي بيحدد نظام الحكم والحكومة ..وعشان كده لازم نقراه بتأني ونحدد قرارنا السليم لانه مستقبل البلد.


في مقالة قرأتها ل "محمد زكريا توفيق" في "الحوار المتمدن"   يذكر فيها بعض من اقوال الاباء المؤسسون للدستور الامريكي ..وفي الاقوال دي هتلاقي دروس كتير مستفادة في كيفية التوافق في وضع الدساتير :

جننج بدفورد:
إذا امتلكت الأغلبية كل السلطة، من الذي يمنعها من تدميرنا جميعا؟

روجر شيرمان:
أنا ضد تمكين أي فرد من فرض سلطته على الكل. لأنه لم يوجد حتى الآن من فاقت حكمته وعلمه الجميع.


جون ديكنسون:
لا أوافق على مزج السلطة القضائية بالسلطة التنفيذية. الأولى تشرح القوانين، والثانية تنفذها.



لكن هل الدستور المصري توافقي بدرجة كبيرة بلاش نقول مية في المية لان مافيش توافق هيكون بالنسبة دي لكن علي الاقل 80 في المية ؟؟
بعض المنسحبين من اللجنة التأسيسية كانت ليهم اسبابهم منها مصلحة شخصية ومنها ناس خايفة علي البلد فعلا..



لكن ايه أبرز الاعتراضات علي الدستور المصري اللي ظهرت علي السطح ودارت حولها كل النقاشات الفترة الاخيرة ؟؟

1- العديد اعترض علي المادة رقم 198 الخاصة بالمحاكمات العسكرية واللي كان عندهم أمل ان الكلام ده يتلغي تماما ولا لمحاكمة المدنيين امام القضاء العسكري واعترضت بشدة مجموعة "لا للمحاكمات العسكرية للمدنيين" علي المادة وقالت ان المادة مبهمة وتسمح باستمرار محاكمة المدنيين امام القضاء العسكري .


2- اما المادتين 195 و 147 قال عنهم الخبير العسكري محمد بلال في جريدة الدستور :  ان المادة التي تنص " علي أن  وزير الدفاع هو القائد العام للقوات المسلحة ويعين من بين ضباطها "، تعد مادة عائمة ومطاطة وفضفاضة وقابلة للتأويل والتفسير، حيث أن المشرع لم يحدد أي من الضباط يعين وزيراً للدفاع، مشيراً إلى أنه هناك ثلاث فصائل لضباط القوات المسلحة، وهم الضباط العاملين وضباط الاحتياط والضباط العسكريين المتقاعدين.


3- وجدل كبير بيدور عن حرية تكوين النقابات ان المادة 52 بتدي الحق في تكوين النقابات لكن نبيل الصياد احد رؤساء النقابات المستقلة بيقول ان رغم الحرية دي الا انهم اهملوا حق الاخطار زي الجمعيات والاحزاب السياسية وكمان قال الصياد :  هل يعقل بعد مطالبة العمال بحد أدنى وحد أقصى للأجور أن يوضع فى المادة (14) ربط العمل بالإنتاج ودون تحديد ساعات عمل، عن أى فوارق بعد ذلك يتحدث فى ذات المادة موضحا أنه لو قرر صاحب العمل التوقف عن الإنتاج دون سبب سيتم تشريد العمال وإغلاق منازلهم.



4-اما عن الصحافة وحريتها ففي جدل كبير دائر هل اعطي حقوق اكتر ولا بالعكس اخد من حرية الصحافة كتير ؟
صحفيين كتير اتكلموا ان لا يليق بدستور بعد الثورة يبقي علي امكانية حبس الصحفيين وفريدة النقاش قالت كمان ان المجلس الوطني للاعلام بيعينه رئيس الجمهورية فبيصبح خصم وحكم في نفس الوقت وتم ذكر تفاصيل المجلس الوطني للاعلام في المادة 215
واعتراضات بالجملة علي المواد الخاصة بالصحافة خلت الصحف تحتجب عن الصدور بسبب ما يرونه من تقييد ليهم في الدستور الجديد .



5- اما بالنسبة للكلام عن الاجور فان الكلام الدائر في برامج عدة ان المادة 14 لم تربط الحد الاقصي والادني للأجور وهي من اهم المطالب التي كانت الشغل الشاغل بعد الثورة ولا حياة لمن تنادي
وكمان النقطة بتاعة ربط الاجر بالانتاج دي نقطة خطيرة جدا ولا تحترم ادمية العمالة في مصر.



6- ازاي رئيس الجمهورية في الدستور الجديد ليه الحق ان يعفو عمن يشاء ؟؟ في اي دولة في العالم الكلام ده ؟؟ الدستور الجديد لم يراعي الفصل بين السلطات بل ان التدخل الرئاسي في القضاء وفي الأجهزة الرقابية واضح جدا في اكتر من مادة.



7- وطبعا الاحتجاج الاشمل ان الدستور اتعمل يعتبر من فصيل واحد بعد انسحاب عدد كبير برغم ان بعض المواد كان موافق عليها المنسحبين قبل الانسحاب..وقال حافظ ابو سعدة رئيس المنظمة المصرية لحقوق الإنسان في تصريح له : " الدستور المقترح أسوأ دستور كتب فى تاريخ مصر الحديثة ويأخذ مصر الى عصور الظلام"



طيب ايه مزايا الدستور ولا كله عيوب ؟؟

الاستاذ فهمي هويدي كتب مقالة بعنوان :"لنفصل بين الإعلان والدستور"  ذكر فيها بعض اهم الايجابيات من وجهة نظره في الدستور الجديد ومنها :
تقييد سلطات رئيس الجمهورية ــ ضبط العلاقة بين سلطات الدولة ــ التوسع في باب الحقوق والحريات الذي بمقتضاه أصبح تشكيل الأحزاب والجمعيات وإصدار الصحف مثلا، يتم بمجرد إخطار الجهات المعنية، ودون أية اشتراطات أو إجراءات أخرى مسبقة


كل دستور ليه مزاياه وعيوبه وكل واحد حسب قرائته للدستور ..حريتك انك تقول نعم أو لا لكن المم تقرا كل النقط بتركيز وتقاربن بين الدساتير وتاخد وقتك كامل في التفكير في قرار هيغير مستقبل مصر اللي كلنا عايزينه يكون للأفضل طبعا.

تقول نعم أو لا المهم يكون باقتناعك انت بضميرك انت وقرائتك انت للدستور مع الاستعانة اكيد برأي الخبراء في الاعلام والصحف واهل القانون والدستور طبعا لانهم بيزودونا بمعلومات وحقائق عن الدستور وتفاصيل مهمة جدا .

اسمع كل الاراء وكون وجهة نظر وقناعة شخصية بدون تحيز لاي فصيل او هوي سياسي معين ولكن خلي كل تفكيرك وولائك لمصر ..مصر فقط..مصر فوق الاهواء والمصالح الشخصية..
شارك في دستور بلدك بس عشان مصلحة بلدك.

Tuesday, November 27, 2012

ألة الزمن..شخصيات كان نفسي أعيش معاها





لو دي الة الزمن نفسك فعلا تركب فيها وتسافر بعيد ؟؟

حلمت في يوم ترجع لزمن فات ؟ تركب الة الزمن وترجع اي فترة انت تحبها وكمان تقعد مع شخصيات معينة كان نفسك تقعد معاها ؟
كلنا بنحلم بكده وكل واحد فينا ليه مجموعة من اللي بيتمني انه كان عاش معاها او كان عايش في الزمن بتاعها.

الماضي والذكريات والذاكرة اللي نفسك تكون محمل بيها من فترة عشتها ايه هي ؟
زي ما بتقول احلام مستغانمي "نحن لا نشفى من ذاكرتنا . ولهذا نحن نكتب, ولهذا نحن نرسم, ولهذا يموت بعضنا أيضا. "

سعيدة ام حزينة؟..ذكريات نفسك تفتكرها من الماضي ولا نفسك تمحيها من حياتك ؟
هل الماضي اللي كان نفسك تعيش فيه كان هيغير مستقبلك ؟

باولو كويلو بيقول "ليست افعالك في الماضي ما سيؤثر في الحاضر ان ما تفعله في الحاضر سيفتدي الماضي وبالتالي سيغير المستقبل"

هل عايز ترجع للماضي عشان تكتب لنفسك حاضر جديد ؟ ولا مجرد رحلة في عقول بعض العظماء كان نفسك تعيشها ؟

من الشخصيات اللي تمنيت اني اعيش معاها فترة من عمري واركب الة الزمن واروحلها :

1- سيدنا محمد والامام علي وعمر بن الخطاب وسيدنا عيسي وهم من اسياد الحكمة في هذا العالم

2- اقعد مع شكسبير وهو بيكتب "ماكبث"

3- جبران خليل جبران وهو بيكتب "النبي"

4- توفيق الحكيم وهو بيكتب "شهرزاد"

5- اعيش مع غاندي فترة من الزمن

6- بيتهوفن وموزارت

7- اعيش فترة مع العبقري
Ingmar Bergman
وهو بيخرج فيلم
persona


8- تولستوي ودانتي

9- مع دوستويفسكي وهو بيكتب الجريمة والعقاب

10- نزار قباني وهو بيكتب بلقيس.. ومصطفي صادق الرافعي وهو بيكتب رسائل الورد

11- باولو كويلو وهو بيكتب "الشيطان والانسة برايم" اللي حللت كل نزعة من نزعات الانسان وصراع الخير والشر جواه بكل عبقرية.

12- إرنست همنغواي وهو بيكتب "العجوز والبحر"


13-فرق كتير وابرزها
queen
rolling stones
ومطربين زي
bob dylan
john lennon
phill collins


14- الباتشينو في فيلم "جاد فاذر"

15- احضر تصوير الفيلم العبقري
One Flew Over the Cuckoo's Nest

16- سيلين ديون وهي بتغني
i surrender

17- اقعد مع "فريدريكو فيلليني"

18- اقعد مع
hans zimmer
واستمتع بموسيقاه

19- مصطفي محمود وهو بيكتب "المستحيل"  والعقاد وهو بيكتب العبقريات

20- ماجدة الرومي وهي بتغني كن صديقي

21- احضر اخراج فيلم مع العبقري "هيتشكوك"

22- علي احمد باكثير وهو بيكتب مأساة اوديب او هاروت وماروت

23- حسان بن ثابت وابو القاسم الشابي وايليا ابو ماضي واحمد شوقي والمتنبي

24- الذهاب مع فرويد الي عصر الفراعنة والاستماع الي تحليله لشخصية كليوباترا

25- الجلوس مع "فيفيان لي" اثناء تصوير
A Streetcar Named Desire
وفيلم
gone with the wind

26- كيفين سبيسي وانتوني هوبكنز ولورانس اوليفير وشون بين وبول نيومان ومارلون براندو

27- ارسطو والفارابي




وكل واحد فينا نفسه يرجع بالزمن ويقعد مع ملوك او فنانين او شخصيات كتير اثرت في حياته..يا تري نفسك تقعد مع مين من زمن فات ؟؟

Thursday, November 22, 2012

البنات علي الفيس بوك




فروق كبيرة بين الولاد والبنات علي الفيس :



1- اما حد يعلق للبنت علي صورة في العيد مثلا يقول "تحفة طقم العيد"
ويقولوا للولد "حلو الخروف اللي جنبك ده"  !!


2- الولد يفتح ال
subscripe
يشترك عنده 100
البنت لو فتحته يبقي 10000 في يومين


3- البنت اما بتحط صورة خطوبتها..كله بيشير الصورة ويقولوا "شوفوا توتو كانت قمر ازاي"
والولد اما يحط صورة خطوبته اصحابه يشيروا ويقولوا "شوفوا خطيبته جامدة ازاي" !!


4- الولد اما بيبعت لبنت طلب اضافة بتشوف هو مين الأول تعرفه ولا لأ..
انما الولد لو ضافته بنت بيضيف من غير ما يفكر ..


5- الولد لو قلب عمرو حمزاوي برضه لايكاته محدودة
انما البنت لو قالت "ريان يا فجل" تاخد مية لايك.


6- الولد اما يبعتلك طلب عشان تكون جاره في لعبة تقول "هي ناقصاك ياعم"
انما لو بنت بعتتلك تقول "النبي وصي علي سابع جار"


7- البنت اما بتكتب انها اتخطبت تبدأ النميمة
والولد اما يكتب انه خطب يقولوله "تعيش وتاكل غيرها"


8- الولد اما يبعت لصاحبه "بوك" يقوله "انت عبيط يلا؟"
انما لو بنت بعتتله "بوك"  يقول " زغزغيني كمان يا بيبي"


9- اللينك اللي بتعمل عليه واحدة جامدة كومنت انه حلو
تلاقي كل اصحابك دخلوا قالوا انه حلو..زي مشهد فيلم التجربة الدنماركية اما قالوا عن نيكول سابا "مبسوطة..دي مبسوطة"


10- صعب قوي تلاقي تحت صورة ولد مكتوب "وااااو"
انما علي صور بنت ممكن توصل لدرجة "بوس الواوا"


11- الولد اما بيعمل اي حاجة بيضيفها في "الانفو" حتي لو دورة "اي سي دي ال" مالهاش اي تلاتين لازمة.


12- البنت اما تحط صورة عربية جديدة يقولولها  "لايقة جدا علي شخصيتك"
والولد يقولوله "حلوة اوي الطاسات دي جبتها بكام يا برنس ؟ "


13- الولد اما يكتب رقمه لحد في الكومنت كله بيخرج ويشوف لينك يتفرج عليه
البنت لو كتبت نمرتها بسرعة كله بيطلع ورقة وقلم


14- البنت اما بتخلف ممكن تحط صورة البيبي
انما الراجل ممكن يحط صورة جيبه الفاضي !


15- الولد اما بيكتب "خخخخخ" يبقي بيشخر
انما البنت اما بتكتبها يقولوا "نامت وبتشخر"


16- الولد ممكن يكتب "مرتبط" كل يومين علي اساس انه مقضيها
البنت مبتقدرش تعمل كده .


17- الولد كل صوره متصورة علي سهوة وبهرتلة
البنت لازم تظبط صورتها بالزاوية والمنقلة


18- الولد لو كتب "انا تعبان" يتقاله "بكرة تقوم زي الوحش"
اما البنت لو "تعبانة" يتقالها "خدي يومين راحة يا سوسو"


19- الولد اما يضيف بنات كتير يبقي "حرمجي"
انما البنت اما تضيف ولاد كتير تبقي "اجتماعية"


20- الولد ممكن يقرف صاحبه ويقوله "ضيفني يا عم" في المسج
انما البنت بتبعت مرة واحدة ولو مضفتش تبقي مسألة كرامة.


21- بعض الولاد الفيس بالنسبة ليهم "هروب من المدام"
وبعض البنات الفيس بوك بالنسبة لهم "خاطبة"


Monday, November 19, 2012

لقاء مع حبيبتي علي عزف الأسرار








"حين خلقني الله..لم تجد الأرض متسعا لأسراري..
فأختار الوجود عينيها ..واختارت عينيها قلبي..
ليكون أبدية سرها هو سر أبديتي
"



في لحظة غروب لا أراه ولا يراني..
جلسنا أمام الشمس لكي تتأملنا عاشقين..وحلم تريد الشمس أن تلمسه كل نهار..


قالت حبيبتي : وكأنك تخفي شئ ما..حين أكون انا سرك فكل ما تخفيه في عينيك يبشر به نبضي..أنا لا أشعر بك..بل أنا شعورك نفسه..قل لي ما تخفيه بين ضلوعك..


قلت : ما أخفيه قلب يتعبد للجمال ويرتجف..وأمنيات تطير مني لتصنع المسك من رموشك ..ونبض يصنع من وعودك منوم كي يستطيع ان ينام في محرابه ولو دقيقة أمام حسنك..


قالت : تخفي شئ أكبر..ألا تعرف أن المرأة هي اول من فك غموض لغة العيون كما تم فك غموض لوح رشيد ؟ وخصوصا لو كان الغموض من عيون من تعشق .


قلت : سأقول لكي كل أسراري ..كي لا يبقي مني الا العلانية..سأتجرد أمامك كما لوحة فنية عارية ..فيتعري معي الحب..وتسترنا عينيك..


قالت : كلي اذان صاغية ونبضات حائرة ..


قلت :

هل تعلمين ؟
إني حين اكون بعيدا عنك أصنع من وحدتي بحرا لا اجد علي شاطئه إلا أنتي..
وأصارع أمواجه كي أهرب من "عالم الوحدة" إلي "توحيد عالمك"..

إني حين انظر في عينيك أصبح كأسطورة "نرسيس"
مجنونا بجمالي الذي أراه فيهما..
مجنونا حتي الغرق ..
وحين اموت فيهما تخلق عينيك "زهرة النرجس" كي تشهد بتكبري فيك وأنانيتي في عيونك.


 هل تعلمين إني في كل ليلة أسافر مع كيوبيد..
أسافر معه في رحلة خاصة الي "جناح كبار العشاق"
ولا أعود الا منتصرا عليهم..
فانا لم اعرف من هزيمتي امام نورك الا نور النصر ..

هل تعلمين اني أرسم فلكي الجديد..
اخلق كون لا أعرفه علي صفحاتي..
وأضعك كوكب متفرد في مجرة جديدة
أسميتها "مجرة سكة العشقانة" ..



اني في كل ليلة أتوسل كي أنهي صراع يدور..
صراع بين زهرتي أوركيد..
تتقاتل كي تخرج إحداهما من عروقي..
كي تصل الي شذي جمالك ..

هل تعلمين اني في كل ليلة
أرسم ملامحي علي رمل البحر..
وأبعثرها كما "خط الأطباء"..
لتشكلها الرياح ألف عاشق جديد في ألف قصر رمل ..



إني أصوم اليكي كصوم "غاندي"
يصوم كي ينقذ وطن..
وأصوم كي أحاول قتل إحتلالك لوطن قلبي وكياني..


هل تعلمين اني جعلت من مشاعري "حصان طروادة"
واحتللت بها قلاعك وحصن قلبك..
ولكني مت في النهاية كما "أخيليس"
بسهم جمال قتلني من "رأسي الي إخمص قدمي"


اني صنعت من فصول السنة أربعة عرائس..
وخيرت القمر ما بينهم كي ألهيه عنك..
لكنه إختارك في النهاية..
وما أغرب ان يكون منافسي في العشق كمن اعشق كليهما "قمر"..



هل تعلمين اني خلقت من قصائدي النبيذ..
وشربتها حتي الثمالة..
وظن الشعر اني سأغرق فيه ..
ولكنه كان الغريق في بحر عشقي..


هل تعلمين انهم كانوا يرون مستقبل البلاد في خطوط الألم من التعذيب علي جسد المحاربين قديما..
وكذلك انا..
أري في علامات العذاب من سوط نظراتك مستقبل قلبي وغرامي..



اني جعلت من صدري ساحة لرقصة باليه..
ترقصها فراشات تحوم حول نور وجهك..
وما ان ينتهي عرضها علي صدري "بحيرة البجع"
حتي يصبح قلبي "بحيرة للدموع"


هل تعلمين حبيبتي
ان حبك جرحي الأكبر
وانا الغريق فيه
أخاف ان يندمل فأظل حبيسا داخله
وأخاف أن يبقي مفتوحا فتقتلني الأه..


ان جمالك وروحك ورقتك هم مثلت برمودا
الذي أسقط كل محاولاتي للفرار..
وأسقط داخلي أي محاولة لأخذ القرار..


هل تعلمين اني عرفت سر الحب..
وان قال لي ذات ليلة "لا أصل لنشوة روحي الا حين أراكما معا"


هل تعلمين اني حين اعزف علي إحساسي..
يسقط المطر..
ويكون البرق محاولة القمر لأخذ صورة لي..
والرعد منافسة لي في العزف السماوي..


هل تعلمين ان الاحلام تحج حول قلبي..
لأنها تري قلبي بجمالك أطهر أماكن الحب..

يا ليتك تعلمين ما أشعر..
وما خفي كان أعشق..!



قالت وهي تدمع  : ليتك تبقي سري الجميل بدلا مع علن جريح..
أحبك سرا وجهرا..
جنونا وعقلا..
شكا ويقينا..


قلت : أحبك بكل ما تحمله الكلمة من..دموع..!

Saturday, November 17, 2012

الفساد وقانون الإخصاء..ورسالة الي رئيس مصر






بسم الله والصلاة والسلام علي رسول الله ..أما بعد..

سيدي الرئيس..
رئيس أرض الكنانة وأم الدنيا والمحروسة مصر..
ان الحادث الذي وقع اليوم لهو فاجعة لكل ام مصرية وكل مواطن مصري ومأساة أقول عنها كما قال قاضي بريطاني في قضية تخصهم "يرتاع لها ضمير الأمة"
ان العين لتدمع لدماء أطفال ذكية لا ذنب لهم الا انهم عاشوا بقايا نظام أثم وبداية نظام أظنه صالح وشئ بداخلنا يصيح بعد قدرته الكاملة علي الإصلاح.
ان صرخة الأمهات اليوم تذكرنا بصرخة "الخنساء" وحزنها علي أبنائها ولكن هم ماتوا لقضية أما من استشهدوا اليوم ماتوا بسبب جحيم الفساد والهمال الصارخ في كل القطاعات.

كما قال عمر بن الخطاب "فإن والله لإن أعزل كل يوم والياً خير لي من أن أصبر على ظلمه ساعه وإلا أنا شريكه في الظلم"
كنا نريد حاكما كعمر بن الخطاب واستلهمنا فيك الصلاح والتقي وعفة اليد وصلاح القلب ولكن كل يوم يمر دون اصلاح حقيقي من الجذور تسقط من اغصانك ورقة..
واذا تساقطت كل الاوراق فأظنه "الخريف"..ولا نريد خريفا لمصر بل ربيعا ينبض بالحياة والأمل والحلم لمصر .


كلما تأخر الإصلاح سقطت عن الحاكم صفة الصلاح..سيدي الرئيس لا يوجد رئيس بدون عيوب واسمح لي ان انقدك بكل موضوعية في بعض هذه العيوب وأهمها :

أولا : التخبط في القرارات والرجوع عن القرار تلو الأخر مما يفقد من هيبتكم بسبب بعض الاستشارات القانونية من حاشيتكم التي اظنها تحتاج للمراجعة.

ثانيا : تغليب مصلحة فئة علي الشعب المصري والأخذ بثأرهم أسرع من غيرهم كما رأينا من اغلاق القنوات الفضائية بسبب اهانة بعض منهم بينما باقي القضايا تكون حبيسة الادراج.

ثالثا : عدم مخاطبة الشعب بكل شفافية عن الوضع الاقتصادي وبدلا من هذا يسمع الشعب كل يوم عن حزمة من المليارات تدخل البلاد ولا يشعر بأي شئ تغير في حياته .

رابعا : عدم وضع خطة كاملة الاركان بكل تفاصيلها لمحاولة تحقيقها في السنوات القادمة واستبدال هذا بعدد من الكلمات الرنانة التي لم نستفد منها في ظل النظام البائد فما أسهل الكلمات والوعود.

خامسا : نري بعض الفاسدين في كل الوزارات يرقون الي مناصب أرفع رغم انتمائهم السافر للنظام القديم قلبا وقالبا وفي الصحف ايضا .

سادسا : التحدث الدائم عن الفاسد الذي ينخر في البلاد دون ان تتحدث عن كيفية مكافحته فنحن نعرف جيدا كم الفاسد في مصر التي خلفها النظام السابق ونريد حلولا لا وصفا تفصيليا .

سابعا : محاولة رسم صورة من قبل بعض افراد حاشيتك ان كل من ينقدك من "الفلول" وهي صورة جديدة ومبتكرة وعبقرية من صور الديكتاتورية الجديدة وارجو محو هذه الصورة فكل من ينقدك من الثوار ومن الفلول مصريون في النهاية .



سيدي الرئيس ان الحادثة التي راح ضحيتها العشرات من الأطفال لو كانت في دولة ذات هيبة وقوة ومكانة وكنت اريد مصر هذه الدولة ..لكانت الحكومة بالكامل تقدم استقالتها اليوم .
سألوم مبارك الفاسد لا شك..سألوم 30 عاما من الفساد والاهمال والرشوة والمحسوبية لا شك..
سألوم القمع والقذارة والعمالة وطاغوت حكم شلة مبارك الفاسدة لا شك.
ولكني سألومك أيضا علي التباطؤ في الاصلاح الجذري ..إصلح سيدي من الجذور كي لا نحصد المرار ونجني الهوان.

ان القلب ليحزن عندا يري العدالة الصارمة في الخارج ولا توجد في مصر..
القلب يحزن عندما يري محكمة بريطانية تغرم بقالا 100 الف جنية استرليني لإنزلاق سيدة بسبب حبة عنب يبيعها..
القلب ليحزن عندما يري غرامات في اسرائيل بسبب تعذيب كلب..
القلب ليحزن عندما يري تعويضات لمن تضرر بموجات المحمول في الخارج امام المحكمة ويتم الحسم في القضية لصالحه امام اعتي الشركات..
انها صور من العدالة في الخارج..العدالة التي نريدها في بلدنا الغالي مصر ولكن للأسف نسمع عنها فقط في الاخبار لتظل مصمصة الشفاه قائمة والتحسر علي العدالة الغائبة.


ضع حزمة قوانين جديدة..ضع عقوبات رادعة..اجعل الاهمال والتسيب في العقوبة كما عقوبة القتل..فالاهمال شريك دائم للقتل واستحلال الدماء..
هل تذكر سيدي محاكمات نورمبرج بعد عصر هتلر ؟ هل تعرف ان هتلر وصل به الشطط الي وضع قوانين مثل "قانون الاخصاء" لمعارضيه وبعض المخالفين وغيرهم..
هو قانون عنصري لا شك..ولكن اسمح لي ان اكون عنصريا ضد الفاسدين بعض الشئ..
غياب العدالة الناجزة سيدي جعلني مشتاقا لرؤيتهم مخصيين ومعلقين علي الحبال في الميادين..
كلما غابت العدالة زادت شهوة الدم عندي وعند غيري واستعددت لقتل الفاسد والمهمل كلما زاد جبروته وعصيانه لروح وطنيته ..
اسمح لي ان اقول كلام مجنون بسبب غياب العدالة.."اريد قانونا للإخصاء" !!
اعذرني علي كلماتي ولكن غياب العدالة في كثير من القضايا مثل مجزرة بورسعيد وموقعة الجمل وخروج المجرمين مجرم تلو الاخر حرا طليقا جعلني افكر بطريقة هتلر..
هؤلاء لا يستحقون الرحمة..او بطريقة جوزيف غوبلز مع تعديل كلماته "كلما سمعت كلمة مهمل وفاسد تحسست مسدسى"

تقول الكاتبة احلام مستغانمي " يقضي الإنسان سنواته الأولى في تعلم النطق، وتقضي الأنظمة العربية بقية عمره في تعليمه الصمت"
ولكننا لن نصمت وستظل كلمات الشعب المصري قنديلا ينير لكل حاكم طريقه ويهيده الي الطريق الرشيد..


انا لا اريد ان ازيحك عن الطريق بل اريد انا والشعب المصري بأكمله ان نهديك الي صراطه..
ولا نريد ظلمك بل كنا نأمل في عدلك..
ولا نريد معاقبتك بل نريد المحاسبة الدائمة ومحاسبة نفسك ايضا..


ثلاثة قصص شهيرة عالمية سأقولها لك ثم أنهي خطابي..
ثلاثة قصص ستتأملها بعناية..من قصص قديمة قرأتها ستذكرك بالعدل والرحمة وتطبيق القانون..
اسمح لي ان استعرضها معك لعلها تهز اعماقك..


القصة الأولي :

"كان احد ملوك أسبانيا مصدر فخر سلالته لكنه كان ايضا معروف بوحشيته تجاه الضعفاء من شعبه ذات يوم فيما كان يعبر مع مرافقه حقلا في أرغون حيث لقي والده حتفه منذ سنين خلال احدي

المعارك التقي برجل تقي يحرك كومة هائلة من عظام الموتي
سأله الملك : "ما الذي تفعله هنا ؟"
اجاب التقي : " المجد لجلالتك عندما علمت ان ملك اسبانيا قادم قررت جمع عظام المرحوم والدك لأسلمك اياها لكنني فتشت كثيرا ولم اجدها ..انها شبيهة بعظام الفلاحين والفقراء والمتسولين والعبيد"

سيدي الرئيس انها قصة المساواة والعدل..ارجو ان تأخذها نبراسا لطريقك..


القصة الثانية :

وصلت ذات يوم دعوة لناسك عجوز لارتياد بلاط أكثر الملوك نفوذا في عصره
قال له الملك : "احسد رجلا قديسا يرتضي بالقليل"
اردف الناسك : "اسد جلالتك اذ ترتضي بأقل مما لدي"
اجاب الملك متعجبا شاعرا بالاهانة : "كيف لك ان تقول هذا فيما هذه البلاد ملك لي؟ "
اجاب الناسك : "بالظبط..انا املك موسيقي الافلاك املك أنهر العالم بأسره وجباله أملك القمر والشمس لأن الله يسكن روحي لكن ليس لجلالتك سوي هذه المملكة"


القصة الثالثة :

كان الفيلسوف أرسطوبوس يحاول استماتة ذوي النفوذ في بلاط دنيس طاغية سيراقوسة
وذات بعد ظهر يوم التقي بديوجين وهو في صدد اعداد طبق متواضع من العدس.
قال ارسطوبوس : "اذا القيت بالمديح علي دنيس لن تضطر الي تناول العدس"
اجابه ديوجين : "لو عرفت الاكتفاء بتناول العدس لن تضطر الي مدح دنيس"

وهذه القصة سيدي الرئيس الي حاشيتك لعلهم يستفيدوا منها قدر الامكان.



نريد الحق سيدي الرئيس ..الحق الذي ذكرته كل الاديان..الذي قال عنه السيد المسيح : اعرفوا الحق والحق يحرركم"
نريد العدالة..نريد القصاص والقانون..نريد اجتثاث الاهمال والمهملين وقتل الفاسدون في جحورهم الهشة النتنة..
لا تترك لنا في هذه البلد فاسدا ولا تاجر دم..
لا تترك لنا في هذه البلد من يريد ترويعها وايقاظها مفزوعة علي كوابيس موت ودمار احلام..
احلم معنا سيدي الرئيس..
نريد ان نشركك معنا في حلمنا المصري لا ابعادك عنه..
لا نريدك كابوسا جديدا فيكفينا ما ذقناه من فساد النظام السابق العفن..
نريدك رئيسنا الصارم العادل قاتل الفساد ..فلا تعيد ذكرياتنا الاليمة ..
ان اردت البقاء معنا فابقينا مع مصر يد بيد..
وان اردت ان تحلم معنا فسنشركك في الحلم..نريد الحلم صورة لنا جميعا علي بوابات المحروسة..
نريد الحلم علما وعملا وراية وفنار..
نريد ان نبقي علي الطريق سيدي الرئيس لان ان يدهسنا علي الطريق قطار فساد أخر ..

ارجو ان تتقبل نقدي وصرختي كما صرخة كل مصري من ابنائك..
والسلام علي مصر..سلاما علي مصر واهلها وشعبها القوي الأبي.

Tuesday, November 13, 2012

عشرين سبب يخلوك تكسر موبايلك فتافيت







ساعات كتير تبقي عايز تكسر تليفونك او ترميه للسمك حتي او ترميه حتي في الحمام زي اعلان اتصالات كده ودي مجموعة اسباب بتخلي الواحد عايز يدغدغ التليفون حتت :


1- اما يجيلك 40 ميسد اول ما تصحي تلاقيهم من نفس الشخص ..يتصل بيك 40 مرة عشان يحسسك ان في امر خطير يعني وفي الاخر يطلع موضوع مش مهم ميستدعيش كل الهيصة دي.


2- اما كل شوية تلاقي نفسك كسبان مليون دولار في مسابقات وهمية او عربية هامر ويدوك رقم تليفون تتصل بيه عشان تستلم الجايزة اللي هتلاقيها في ما وراء المشمش ان شاء الله.


3- اما يجيلك رسالة "اتصل بي حبيبي للتعارف والدردشة " ..حبيبك منين ؟ حبك برص !!


4- اما كانوا كل خمس دقايق الجيش يبعت رسالة ايام الثورة ..خلاص يا عم انت جاي تشعللها ولا تهدي الناس دي رسايلك تحسس الناس ان البلد راحل فطيس اساسا مش بتطمن حد.


5- رسايل المواقع الاخبارية اللي بتخلي الناس تندم انها اشتركت فيها وتلاقي ماسورة اخبار ضاربة في تليفونك حتي لو خبر عن لطفي لبيب !!


6- اما تفتح برامج الشات علي موبايلك وتلاقي ميت واحد بيكلمك في وقت واحد..يبقي الواحد سايب الفيس شوية عشان يهدي اعصابه يلاقي نفسه كأنه في محطة مصر علي "الواتس اب" علي الموبايل .


7- اما تجيلك رسايل "انشرها ولك الاجر" اللي بقت فكرة فكسانة من عشر سنين وهي بتكون رسايل شحاتة غالبا في الاخر وكلها قصص كدب اساسا .


8- اما واحد من النصابين القدام يكلمك ويقولك "حضرتك انا حولت رصيد ليك بالغلط ياريت تديهولي تاني" والافضل تقول للنصاب ده  "هو دخول الرصيد زي خروجه ؟ " لانه طبعا ولا ليه جنيه حتي ولا حاجة ده نصب بتاع بلاده .


9- اما بتاع خدمة العملاء يقولك "كلمنا بعد ساعة اصلنا بنحدث قواعد بيانات الشركة" وهو تلاقيه كان بيلعب "سوليتير" ولا حاجة علي الكمبيوتر ولا تحديث ولا بتنجان.


10- اما واحد يبعتلك رسالة معفنة لمجرد ان الشركة عملت عرض ان الرسايل ببلاش واهو يستغلها والسلام وابو بلاش كتر منه .


11- لما ابوك يكلمك فاكرك في درس واصحابك حواليك يعملوا اصوات بنات .


12- لما كل شوية يجيلك نفس المكالمة "استاذة طماطم لو سمحت ؟ "   او    "الاستاذ بعكيكي موجود ؟"


13- لما تليفونك يرن "بوسطة يا باشا" وانت في عزاء .


14- لما تليفونك يفضي شحن وانت علي الدائري وكاوتشك نايم في عز الليل .


15- لما واحد يقولك "ممكن اتكلم من عندك دقيقة" ويقعد عشر دقايق .


16- لما واحد يشوف تليفونك ويقول "يااااه هو الموبايل ده لسه بينزل منه"  تحس انك قديم فحت.


17- لما تتزنق في الاسانسير وفي نفس الوقت متلاقيش شبكة في التليفون.


18- لما واحد بيقلد صوت واحدة يعمل نفسه بيعاكس ويقولك عايز كارت شحن ..اما شاب لامؤاخذة صحيح .


19- لما تخش ع النت في المواصلات من موبايلك وتلاقي واحد جنبك عينه لازقة في الموبايل بيقرا معاك بريحة امه دي .


20- لما تقعد ترن علي حد ومضطر تسمع الكول تون الزبالة اللي هو حاططها ..لا وتيجي رسالة "لو عايز الكول تون دي اضغط نجمة"  ..دي كول تون اعوزها بالذمة ؟؟


Wednesday, November 7, 2012

انتخابات أمريكي وانتخابات كفر البطيخ






ايه الفرق بين الانتخابات الامريكية والمصرية ؟؟ يا راجل ده سؤال برضه ده زي الفرق بين الكافيار والفول :



1- اما اوباما نجح محدش طلع يقول "لا لأوبمة الدولة" 

2- رومني اعترف بالهزيمة مطلعش يقول "عندي كل الورق والمستندات اللي تؤكد فوزي"

3- رومني مسألش اوباما في المناظرة وقاله " قد ايه الجرجير في الربطة..او طريقة تزغيط البط الامريكي"

4- محدش من اللي بيصوتوا شرب الحبر الفوسفوري جوة اللجنة لأن مافيش حبر اصلا

5- كل واحد بيخرج يقول  " افتخر اني اديت صوتي"  هنا بيخرج يقول  "نفخونا في اللجنة يا باشا"

6- اوباما مبيوزعش أنابييب علي نيويورك

7- شكل اللجنة يفتح النفس وهنا شكل اللجنة قريب من "المبولة"

8- شوف الفرق بين استطلاعات الرأي اللي كانت صحيحة جدا واستطلاعات الرأي عندنا اللي بتهذي في كل الجرايد وكل جريدة بشكل واصوات اي كلام حسب ميول الجريدة

9- الانتخابات الامريكية تحس انها اخراج "سكورسيزي" وانتخابات مصر من اخراج "السبكي"

10- رومني مش هيسافر دبي بعد الهزيمة

11- اللي بيصوت الناس بتعرفه من البادج اللي معلقه انما هنا بنعرفه من صابعه لمدة شهر لان الحبر مبيطلعش اساسا

12- محدش بيزق في الطابور وكأنهم بيوزعوا عيش

13- اللجان بتوزع حلويات علي الناخبين مش زي هنا "اخلص يا استاذ لو سمحت"..وكل اللي عرفناه عن الحلويات في السياسة هو "بونبوني شفيق"  !

14- اللي بيصوت بيدوله كرسي يقعد انما هنا "تصويت ع الواقف"

15- معسكر المرشح منهم بيعمل بكل جهد مش قاعد يتابع النتيجة علي قناة الحياة

16- اوباما مش هيفتح جاكيت بدلته في الميدان ويقول "اهو جيتلكم من غير واقي من الرصاص"

17- المناظرة بين المرشحين بتخلي واحد ينجح جماهيريا علي حساب التاني مش زي مناظرة موسي وابو الفتوح اللي وقعت الاتنين

18- مافيش طفل امريكي دوار او قلم سحري

19- وقت الانتخابات بالدقيقة والثانية مش ماشية بنظام ربنا يسهل ونمد ساعتين كده

20- برامج الرؤساء بتتفحص بالسطر وبالكلمة انما عندنا تحس انها برامج اليوم المفتوح

21- اوباما بيوعد وبيقول "هاحاول" مش بيقول هاعمل في 100 يوم وميعملش

22- الناس داخلة مبتسمة وهنا خايفين ليكون في ملتوف قدام اللجان

23- زوجات الرؤساء ليهم دور مهم جدا انما هنا زوجات المرشحين في البيت بيعملوا محشي

24- رومني مش هيطلع يقول "اما انا او الفوضي"

25- محدش قدام اللجنة هيقولك "علم ع الهلال"

Tuesday, November 6, 2012

شمــس وقمــر 38






**العَالم هُو السيرك الذي لا تَخْضع فيه الاسُود لمدَرب..
 ولا الافَاعي لزمَار..
ولا الحُصَان لفَارس..
 فكلهُم قد يَخْضَعون كرها لصَاحب "الكُرباج" ولكنَهم يَخضَعون طَواعيَة لصَاحب "الحقيقَة".



** قَالت : انتَ حلمُ حَياتي..
قُلت : وانتي دَائما حَيَاة حلمي..!



** قَالوا للمُتَزوجين .. "ادبح لها القطة"
ولكن في هذه الأيَام..
حتي القطط تخشي الفئران ومكرها !



** قَد تُلخص حَالتَك في الهَجْر أغنيَة وَاحدَة..
أما في الحُب..
يَكون قَلبَك تَلخيصُ لكُل الأغَاني..



** يَقولون دَائمَا "لا تَحْبس دُمُوعَك"..
وكأنَ الكُل يَتَناسي أنَ دُموعَنا مَن تَحبسَنا دائما !



** صيغَة المَاضي أجمَل دائمَا للحَاكم..
فما اجمَلُ أن تَسْمع كَلمة "فعلت حكومتنا"
بدلا من صيغَة المُستقبل "سَنفعل"  !



** قَالَت : أريدُ ان أسمَعَك تقُول لي أحُبك بكل اللغَات..
قُلت : إسمَحي لي ببضعَ سنيْن لأخْتَرع لغَة جَديدة تَسع مقْدَار عشْقي لك...فَلغَات العَالم لا تَكفي.



** الفَرق بَين الحُب والأغنيَات..
ان الأغنيَة قَدْ تَسمَعُها أكثر من مَرة كي يَدخُل اللَحن الي قَلبك..
أما الحُب هوَ الأغنيَة التي تَسمَعها مَرة واحدَة لتَدخُل بقَلبك الي لحن الحُب..!



** في طفُولتنَا قالوا "لا تَنزل بالحُروف من عَلي السطر" ..
ولكن عندَما عَشقنا نَزلت كُل الحُروف قَهرا وتَبَقي حَرف "حاء" و "باء" وبَينهُما قَلب عاشق .



** تَخرجُ المَرأة من ضلع أدَم..
وبعد أن يَعيش تَجْربة الزَواج..
يُحاول ان يكسَر كل ضُلوعَه كي لا تَخرج إمرأة أخري !



** قَالت : هَل نَركب المَركب ونَصل بأحلامَنا الي شَمْس الحُب..
قلت : هي رحلة ذهَاب وعَوْدة..ولكنَ رحلَتي في عَيْنيك أجمَل ..لأنهَا بلا عَوْدة..



** كل الكَلمات بالنَوايا..
الأشرَار يرون كَلمة "حاجة أصفرة"  خمر..
والأخيَار يرونها  "ميراندا او ينسون"  !!



** الشَياطين تُجيْد اللعب بالألفَاظ..
لدرجة انهَا تُجيد كَسر "الحيلة" عَن طَريق "الحيلة" .



** قُبلَة الحَيَاة هي الحُب..
قُبلَة المَوت عند الهَجر..
لكن لا أعتَرف بقُبلَة الوَداع..
فالوَداع لا يعرف لغَة القُبلات ..



** الحَاكم الفَاسد لا يَمْلئ حَقائبه بالأموال..
بل يَملأها بجُثَث ضَمائر مُعَاونيه أولا


**  الزوجُ القَوي يَجْعل من زَوجَته ملكة..
والزوجُ الضَعيف يَجْعل من مَلكتَه زَوجة.. !



** قالت : كَيفَ تَربُط بَين العشق والسيَاسة ؟
قلتُ : لأنَ العشقَ في عَيْنيك "سَيد قراره"  !



** قَالت : بَيننا كيميَاء وَاحدة ..
قلتُ : بَل نحنُ في نَفس التَجْربة..يُحضر بقلوبنَا كيوبيد في مَعمله وَصفَة الجُنون والهَوي..



** لا يَري العَاشق في حَبيبته عُيوب..
ليسَ لأن الحُب أعمَاه..
بل لأن الحُب مَده بالبصيرَة وليسَ بالبصَر



** قالوا "وهل يخفي القمر"
قلتُ : نَعم يَخفي أحيَانا أمام وَهَج رجل يُحب..



** الحُب لوحَتنَا السريَالية..
يرسمُهَا كيوبيد بكل جنُون..
ونَراها بتفسير اكثر جُنونا  !



** كل منَا له قَرين..
وحينَ نَعشَق يُصبح لنَا ثَلاثة..
قرينَك وحبيَبتك وكيوبيد مَعهم .



** أروَاحُنا خُلقَت بجَوهر الحُب ومَظهر الحَياة .


** العَدالة عَمياء
 ولكن الحَاكم الفَاسد يُعَلمها في كل يَوم لغَة "برايل"   !



** قَالت : هَل هَذه الزَهْرة لي ؟
قلتُ : بَل أنتي لهَذه الزَهْرة  !



** حكمَة العَازب " فَتش عن المَرأة "
حكمَة المُتزوج "إبحَث عن إمرَأة أخري"  !



** قالوا لي : نُريد للحُب تَصور وليسَ تَعريف جديد
قلت : حَتي ولو كَانت صُورة غريبة ؟
قالوا: بلي
قلت : هُوَ قَمر يَتَعاطي الكُوكايين عَلي شَاطئ بَحر يجف وتَمُوت فيه عَرائس البَحر أمَام عينيه



** لا يُوجَد للحُب شهَادة ميلاد
فهو ابن ضَال يَتَخبط في قُلوب البَشَر كل يوم .



** قَالت : كَلما ألتقَيَنا سمعتُ هذه الأغنيَة
قلتُ : أري الأغنيَة تُرَاقص الصُدفَة علي شَاطئ عَيْنيك .



** الحَقيقة تَرحلُ فينَا كعَابر السَبيل كل يَوم..
ولكننا لا نَعرفهُ الا في لحظَة الخدَاع .

Thursday, November 1, 2012

الروتين المصري قبل الثورة وبعد الثورة ..بالصلاة علي النبي يعني واحد





كلنا مجربين الروتين المصري
وطالعين عيننا مع كمية البيروقراطية وملل الإجراءات الحكومية في اي مكان سواء المرور او المحاكم او الكهرباء او اي جهة من دول.
يكفي انك تقضي فيها ساعة واحدة تخليك ماشي تقول "بررررلم" وتكلم نفسك في الشارع..يعني تقدر تقول "الروتين المصري أم الاجنبي"

تجارب كتير مريت بيها في الروتين المصري لكن المرة دي شوفت الويل فعلا شوفت فيلم كوميدي كامل في 3 ايام روتين مصري وفعلا حصري حصري يعني.
طبعا يبدأ اليوم من واحد قاعد في عربية قدام المرور ويقول "يافتاح يا عليم يارزاق يا كريم" والجملة دي المفروش انها مبشرة بس عندنا في الروتين المصري هي جملة روتينية توحي بان اليوم مش
معدي والمصلحة مش هتتم بأي حال !!

زيها زي جملة "اصطبحنا وصبح الملك لله" تبان كده انها جملة دينية وفيها امل ..ولكن هي بتتقال عندنا في المصالح الحكومية دليل علي ان اليوم هيكون "حمادة بالجنزبيل" .


والأستاذ "ديك" دايما برضه من الشخصيات الواجب تواجدها في اي مصلحة حكومية..ممكن واحد يسأل مين الاستاذ ديك ..أقوله اللي بيكون قاعد طول اليوم في الطابور يقول جملة واحدة "يا ديك أمي"..!!!
ده بيكون ليه دور مهم في تطفيش الناس وغالبا الناس بتقعد تواسيه وساعات بيطفش في الاخر لان الديك جاب اخر خلاص والحكومة طلعت عينه من كتر الطوابير من الصبح.

غير الاستاذ ديك..في الاستاذ "سنة حلوة" بتاع "كل سنة وانت طيب"  ..كل حاجة بيحولها مناسبة..يقف جنبك لقاك خلصت الورق يقولك "كل سنة وانت طيب"
ركبت نمرة عربية "كل سنة وانت طيب"  عملت اي حاجة "يبقي كل سنة وانت طيب"  هز جيبك يعني ولاغيني ..او بالمصري "ابجني تجدني"

هو ليه راسم الابتسامة الكبيرة دي مع ان دي مش عربية فيلم "ترانسبورتر" ولا عربية جيمس بوند !! دي مجرد نمرة لا راحت ولاجت..بس هو لازم يصطبح يعني..
او زي ما بيقولوا  "يعمل استمورننج بالكام اهيف اللي هتديهومله"  ..ايه اللغة دي ؟؟ معلش انا دخلت المرور ولازم اتكلم باللغة الصح يعني .



تكون داخل علي المرور تلاقي توكتوك جاي في وشك واحد جنبك يقول "امتي بقي يشيلوا التوكتوك من جوة البلد دول بيعملوا بلاوي" ..وبعدين نتفاجئ انا وهو ان ظابط نازل من التوكتوك !!
نبص لبعض ونقول بجملة معبرة "هي دي مصر يا عبلة" .
توكتوك ايه اللي هيشيلوه ده الرئيس حياه والظابط قاعد جواه يبقي خلاص يا باشا انساه .
طبعا اكيد مش بياخد من الظابط اجرة ولا العساكر ولكنه موقع معاهم اتفاقية زي الاتفاقيات الدولية "الأمن مقابل الغذاء".. وكله في الأمان .

وتقف في طابور المرور والناس تقول "هو جه ولا مجاش"  ويفضل السؤال داير لمدة ساعتين هو مين يا اخواننا اللي جه ولا مجاش واحد يقولك "الظابط" ..
الظابط في المرور اشبه بمستر اكس كل الناس منتظراه لحد ما يخش بنضارته السودا يبص عليهم بصة كده من تحت النضارة ويمصمص شفايفه ويخش المكتب ويتحول السؤال الي "هو الباشا هيخرج امتي من المكتب"  !!

وكلنا في انتظار خروجة الباشا الكبير وسلام مربع للباشا اللي هيتكرم بنظرة للعربية عشان تحط نمر ممكن تطلع نمر شتيمة في الاخر زي مثلا "ه ف أ"  ولا "ع ر ه" ولا حاجات من النوع ده وانت وحظك يا برنس ده الموضوع وصل للشتيمة بالانجليزي كمان  زي "د و ج"  !! يعني بتشتونا بكل اللغات يا حكومة .


طبعا جوة المرور مهنة اختراع مصري اسمها "المخلصاتي" ده واحد بياخد منك قرشين ويخلصلك الورق اللي مستحيل تخلصه لوحدك ولو قعدت للصبح لان قدام الورق الحكومي كله بيبقي باشا يعني اي موظف كده بيعيش دور الباشا وانت بتمثل مشهد "الارض لو عطاشانة" وبيذل اهلك جوة.

المهم يخرج الظابط ونضارته في ايده وساعات بيحطها علي طرف شفايفه وكانه بيقولنا زي خالد صالح في فيلم تيتو  "أنا بابا يلا" .
ويتحول الوضع الي المرحلة التالتة في الروتين المصري "هو الظابط هيدخلنا امتي بقي" !!

تشاء الظروف اني اكتشف ان الحرامية بقي ليهم رتب يعني الحرامي بقي بكل فخر بينادوه قدام الجميع  ويقولوا "يا حرامي" ..الحكاية ان المفتاح علق بتاع العربية سألت كام واحد معرفش وبعدين قالولي مافيش غيره "حمادة الحرامي" ..والغريبة ان حمادة الحرامي ساكن ورا جهة حكومية وهي المرور ويدخل حمادة الحرامي بكل فخر واعتزاز ويظهر وكانه بيمشي بالبطئ من كتر الثقة  زي مشاهد الافلام والكل يوسع لانه هيحل مشكلة المفتاح ويدخل العربية ويحاول.

يعني انا سايب جوة العربية حرامي بشحمه ولحمه عشان يحل المشكلة ..مصر فيها العجب برضه ..حرامي متعاون ومخلص للوطن وللشعب.

ويخرج الحرامي من العربية ويبصلي نظرة كانه لسه مخلص كشف ويقولي "المفتاح لوك جوة ماليش فيه " ويخرج الحرامي من العربية بخفي حنين في مشهد مهيب والكل يوسعله ويحني رأسه احتراما للحرامي الخبرة والغريبة انه لابس مخطط زي عصابة القناع الاسود بالظبط فاضله نمرة علي صدره ويبقي مشهد خرافي .

المفتاح دلوقتي معلق وواحد واقف ورايا في الطابور لكن تشاء الظروف ان اللي ورايا كان الاستاذ ديك شخصيا ..وقال في صوت جهوري "هي العربية وقفت..ياااااا ديك أأأأأأأأمي" !!
ومشي من الطابور خالص ومش بعيد يكون راح انتحر لان بعد كل الطابور ده العربية عطلت قدامه ومافيش مكان يعدي والظابط هيقفل الباب يبقي يا ديك امنا كلنا النهاردة ..

المهم المفتاح دار بالصدفة مش عارف كانت ايه المشكلة بالظبط ولقيت الطابور قدامي بدأت تدب فيه روح "العلاوة" ودي كلمة مصري مشتقة من فعل يرشي فهو مرتشي..
الرشوة جوة المكتب بتكون فلوس لكن في الطابور بتكون ساندوتشات فول وكوباية قهوة ودخلني قبلك وحياة ابوك..يعني المواطن يفطر فول ويتعشي فول وفي الاخر رشوته تكون فول برضه .

وكله بياخد طفاية حريق يحطها في العربية لكن واحد اشتكي وقال الطفاية بتاعتي فيها عيب مش عارف ايه ..الظابط بصله من بعيد وكان ناقص يقول زي فيلم اللي بالي بالك "هاتولي الكلب ده"
طبعا احنا عارفين ان كلمة "شكوي" مش موجودة في القاموس المصري انما ممكن تكون موجودة في حرف الألف مثلا ابتهال او في حرف التاء تضرع لله انما الشكوي في مصر مش موجودة لو خدت حاجة فيها عيب يبقي "سكتم بكتم".

وتلاقي فيلم البؤساء شغال جوة واحد قاعد وجنبه سبع فناجين قهوة شكله قاعد من امبارح وواحد بيسبح بسبحته وواحد بيدعي علي الحكومة وواحد طبعا اكيد بيلعب "انجري بيردز" وصوت ضحكة العصافير الشريرة اشبه بصوت ضحكة الظابط كانه بيقول "هع هع" زيها كده .

ايه ده ورقك مش كامل ..دي جملة مثالية في المصالح الحكومية بديلا عن الجملة القديمة "فوت علينا بكرة يا سيد" وهو ده التجديد في البيروقراطية المصرية تبديل جملة بجملة والفعل واحد.
روح هاتلي شهادة مخالفات.."وات ذا فك" هاروح جهة حكومية تانية ..المرة دي المحكمة ..ياللهول..او يا ليلة زرقا..او الافضل جملة الكبير قوي "يا واقعة مربربة" .

طبعا المحكمة مبني خشبي متهالك ايل للسقوط تحيطه الملفات من كل الجهات كالجزيرة ويجلس في وسط الملفات موظف يغط في نوما عميقا ومش ناقصله غير المنبه جمبه بس هو مش عايز يصحي ..رحت صحيت موظف وسالته اجيب منين الشهادة دي بصلي شذرا وقالي فوق مش هنا وكمل نوم فوق الملفات اللي عليها عناكب زي افلام الرعب.

طلعت فوق لقيت واحدة تقريبا معدية سن المعاش من خمسة وعشرين سنة قالتلي "خد الورقة دي صورها عشر نسخ" !!
وهنا اتحولت للكابتن شوبير وقولت لنفسي "ليييييه..ليييييه؟"..

الموظفة قلبها علي البلد..عايزاني اصور عشر نسخ من ورقة حكومية عشان تقضيلي المصلحة يعني هي زي يوسف شعبان كده في رافت الهجان وكانها هتخبط علي كتفي وتقول "الرشوة دي مش عشاني دي عشان مصر يا رأفت" ..مصر ..مصر..

صورتلها الورقة وقولت هانت قالتلي استاذ مجدي هييجي كمان شوية ابقي تعالي..ابقي اجي ؟؟ وانتي مبتجيش ليه ده انا ببقي هناك !!
استاذ مجدي دخلتله لقيت اتنين موظفين بيبعتوا لبعض نغمات .."تكنولوجيا عالمية علي ارض مصرية" 
هو ده ادخال الكمبيوتر في الهيئات الحكومية نغمات وبلوتوث وشغل عالي يعني امال ايه..
قولتلهم فين الاستاذ مجدي طلع مكتب تاني قولت الحمد لله ان مش بتاع البلوتوث لحسن يقولي وريني نغماتك..

استاذ مجدي بقي موظف بتاع بلاده..ده النوع اللي بيختم من غير ما يبص ..تقوله سلاموا عليكوا يروح داقق الختم علي الورقة ويرزعه زي رزعة الدومينو والطاولة علي القهوة بالظبط..
يعني ممكن تكتبه ورقة علي نفسه هيختمها ويمضيها عادي بكل ضمير يعني.

رجعت تاني المرور لقيت الظابط قفل الاوضة مش عارف بيشرب قهوة ولا بياكل دلوقتي ..بص بقي احنا ضحينا بالطابور والل في الطابور عشان الباشا يعيش..
وبعد كل ده يبقي هنكمل يوم تاني ان شاء الله ..طبعا الراجل لقيته ورايا تاني وزعق "ده انا هنا من 6 الصبح يا ديك ااااااااااااااااااااااااااااااااااااااااااامي"
المرة دي كان الصوت عالي قوي ..الظابط خرج "مين اللي بيزعق ده ؟"
جاله ميت واحد ناقص يبوسوا راسه "مافيش حاجة يا باشا دي مشكلة بسيطة كده" وناس تسكت الراجل "اسكت انت خالي الباشا يخلصلنا الورق متعكرش مزاجه"

يعني المواطن المصري شغلته في الطوابير مش تخليص المصلحة ولكن المهم "مزاج الباشا"
حيث كده بقي يا باشا "ثانية واحدة اتحزم واجيلك"..!

المخلصاتي نفسه خلص يا عيني ومقدرش يقف قدام الروتين وقالي بنبرة حزينة "للاسف هنكمل يوم تاني النهاردة مش هنخلص كله"..
يعني في مصر وقدام البيروقراطية دي "المخلصاتي مش عارف يخلص" !!
فعلا المكان كله عايز بتاع ميلودي يتحدي الملل يكسره كله ويمسك كل الموظفين ينفخهم في الاوض جوة.

خرجت من المرور والساوند تراك شغال في خلفية المشهد زي الافلام "عدت لا اعرف من اين ولكني اتيت" ..
ايه يا سيدي ده غير الساوند تراك ده حط بتاع عبده موتة "مافيش حد صالح كله بتاع مصالح"
وانا خارج اديت تحية لحمادة الحرامي وشكرته علي محاولة المساعدة وشكرت الراجل اللي حاول يرشيني بكوباية قهوة عشان ياخد مكاني في الطابور والاستاذ اللي كل ساندوتش فول
وحمادة اللي رجع علي الارض والطفل اللي قفل السنتر لوك علي عربية ابوه والمفتاح جوة وحييت المخلصاتي  وحييت الاستاذ ديك وقولتله "يا ديك امي" عشان يرتاح ويحس ان حد مشاركه المشكلة ذاتها ..وخرجت من المشهد ونزلت الستار .

وانا خارج قابلني شخصية لطيفة قوي قالي "خدني معاك عند الكوبري اللي هناك ده"..
قولتله "مش طريقي واللهي"
قالي "متخافش انا مش حرامي او بلطجي" !!
ده راجل امور قوي علي اساس ان البلطجي معاه كارنيه النقابة وكده يعني انما هو مش حرامي ..قال يعني في حرامي بيقول علي نفسه حرامي ايه العالم دي !! دي جملته دي اصلا تشكك اكتر .


جيت اروح مكان تاني وقفني عسكري في منطقة بعيدة وقالي "انزل" قولتله "بالنسبة للنمر" انا لسه جاي من المرور ..قالي "نمر" ؟؟
ده هو كان موقفني اصلا عشان الحزام ولون القزاز واسباب اخري ومش واخد باله ان مافيش نمر علي العربية ..يعني انا جيت اكحلها عميتها ..
المهم مشاني بعد ما شاف بعض الورق بتاع المرور علي خير يعني.
وختام المشهد انه كان بيحي واحد بتاع توكتوك في الكمين وعداه مع انه وقفني انا !!

التوكتوك بقي ليه احترامه جدا بعد تحية الرئيس مرسي ليه معادش حد يادر يكلمه طبعا بقي بيضربله تحية في الكمين لانه اكيد بيركب معاه كل يوم توصيلة ببلاش.


وغالبا في نهاية اليوم الروتيني المصري بتكون مش مستغرب ان الورق أتأجل..عارف ليه ؟؟
لان مش معقول تستغرب ان ورقك اتاجل في يوم دخلت فيه الحرامي العربية وصحيت موظف اثناء تادية وظيفته وصورت ورق ملوش اي تلاتين لازمة ولاقيت ظابط نازل من توكتوك !!!
يبقي هتسغرب ليه بقي واليوم كله زي برنامج غرائب وطرائف بتاع زمان !! كان زمان المذيع بيقول دلوقتي "الف كل الجهات الحكومية اجيبكم طرائف نوادر عجائب غرائب" .


يعني الروتين عندنا مش وقت بيضيع ده بيبقي عامل زي فيلم القطار ولا الطائرة المفقودة  ولا فيلم بين السما والارض ..كان الناس خلاص بتموت مثلا وبتحكي عن ذكرياتها في الجهات الحكومية من كتر الروتين اللي شافوه.

وتخرج من المكان وتبقي عايز تقول للحكومة علي راي الشاعر "ديك ابوهم اسمه ايه ؟ " !

Thursday, October 25, 2012

الفرق بين أطفال زمن ماما نجوي واطفال زمن الواوا أح








الأطفال اختلفت كتير قوي عن زمان سواء في اجابة اسئلة او حتي الأسئلة اللي بيسألوها لأهلهم ودي بعض الاختلافات :


1- السؤال : مين هو سعد ؟
طفل زمان : سعد زعيم الثورة
طفل دلوقتي : سعد بتاع العنب


2- مين مصطفي كامل ؟
طفل زمان : زعيم مناضل
طفل دلوقتي : مطرب شعبي شديد


3- مين الحسن والحسين ؟
طفل زمان : شخصيات اسلامية عظيمة واحفاد الرسول
طفل دلوقتي : طعم ما يختلفش عليه اتنين


4- تعرف الملتوف ؟
طفل زمان : يعني ايه ملتوف ؟
طفل دلوقتي : اه بحضره مع بابا ساعات


5- طفل زمان كان بيسأل : هو انا جاي منين ؟
طفل دلوقتي : هو انا هاروح فين بعد ما اتخرج ؟


6- قول شخصية مشهورة اول اسم منها توفيق.
طفل زمان : توفيق الحكيم
طفل دلوقتي : توفيق عكاشة


7- سمعت عن الجدول الدوري ؟
طفل زمان : بناخده في العلوم
طفل دلوقتي : اه طبعا وبشجع مانشستر يونايتيد


8- ركبت الحنطور قبل كده ؟
طفل زمان : مرة ركبته مع بابا
طفل دلوقتي : وبتحنطر


9- قبل ما تنام بتعمل ايه ؟
طفل زمان : بشرب اللبن
طفل دلوقتي : الأستاذ ابو الليف علمني اني قبل ما انام في حاجات لازم اعملها .


10- بتقول لمامتك ايه قبل ما تنام ؟
طفل زمان : تصبحي علي خير
طفل دلوقتي : مساء الانوار


11- مين موسيقار الأجيال ؟
طفل زمان : عبد الوهاب
طفل دلوقتي : محمود العسيلي


12- انت بتحترم الكبير ؟
طفل زمان : طبعا احترام الكبير واجب
طفل دلوقتي : أكيد يعني ده عمدة المزاريطة


13- تعرف مين هي الست ؟
طفل زمان : ام كلثوم
طفل دلوقتي : الست لما


14- الطفل كان يسأل عن الحنية..
دلوقتي يسأل يعني ايه لجنة تأسيسية  !!


15- شخصية فنية محترمة تبدأ بحرف الألف
طفل زمان : أسمهان
طفل دلوقتي : السبكي


16- تعرف ابو فراس الحمداني ؟
طفل زمان : لأ
طفل دلوقتي : اعرف ابو وديع


17 - اجمل اغنية اطفال سمعتها ؟
طفل زمان : اغاني صفاء ابو السعود
طفل دلوقتي : بوس الواوا


18- طفل زمان كان بياكل رز مع الملايكة..
طفل دلوقتي بياكل ممبار مع الشياطين  .


19- تعرف مكان الدول علي الخريطة ؟
طفل زمان : بعضها
طفل دلوقتي : اعرف "الألماني" و"خالتي فرنسا" و"ماما امريكا"  !!


20- برنامجك المفضل ؟
طفل زمان : ماما نجوي وبقلظ
طفل دلوقتي : هزي يا نواعم


21- وفي النهاية خد كيس الشيبسي ده
طفل زمان : شكرا ياعمو
طفل دلوقتي : لا اصحي معايا متنامشي انا مباكلشي كرانشي  !




Saturday, October 20, 2012

هوليود..هروب وحنين الي الماضي..لعشاق السينما







الماضي في أفلام هوليود كان محور افلام كتير عظمية في تاريخ السينما ..سواء الماضي بذكرياته المؤلمة او الحنين الي الماضي او الرغبة في الهروب منه مهما كان التمن..

هنستعرض مجموعة من اجمل الافلام الشهيرة جدا اللي كانت محورها الموضوع ده وطالما اتكلمنا عن الذكريات والماضي يبقي اكيد هنتكلم عن الفيلم العبقري
Nuovo Cinema Paradiso
فيلم من اروع الافلام القديمة من سنة 1988  وبيتكلم عن طفل صغير اتعلق بالسينما من صغره وكان ليه صديقه شغال في قاعة العرض وتربط بينهم علاقة قوية جدا وكبر الولد ودخل في قصة حب
لكن مع بنت من عيلة غنية وزي كتير من العلاقات انتهت القصة نهاية غير سعيدة ونصحه صديقه الاكبر سنا انه يهجر المدينة تماما وميرجعش الا لما يكون ناجح جدا وفعلا ضحي بكل شئ حتي بسعادته وهجر صاحبه وامه وكل شئ والسينما اللي بيحبها عشان ينسي قصة الحب دي ويسمع النصيحة وميرجعش الا لما يكون غني وناجح وفعلا اتحقق الحلم ده ورجع بعد سنين طويلة جدا لقي السينما بتتهدم ومعاها كل ذكرياته القديمة  وصديقه العامل في صالة العرض توفي وكان اعز اصدقائه..
الفيلم بيبدأ بحاضر الشاب ده وهو كبير وبيبدأ في الرجوع لرحلة الماضي ويتذكر لما كان طفل وذكرياته الجميلة في بلده قبل ما يهجرها ..
الفيلم تقدر تقول انه من اروع ما قد تشاهد علي كل الاصعدة سواء موسيقي او اخراج او تمثيل ومن اكثر الافلام تأثيرا وعمقا وحزنا في نفس الوقت.


طبعا من اعظم الكلاسيكيات منقدرش نسيب الفيلم العملاق Citizen Kane  فيلم من سنة 1941  لكن فيلم عايش جوة كتير مننا لحد دلوقتي
تم تصنيفه من قبل علي انه اقوي فيلم في العالم وينافس دائما فيلم
Vertigo
المواطن كين فيلم من اخراج  المخرج القوي
Orson Welles
وده اللي اخرج الفيلم اللي اتكلم عن فساد في قطاع الشرطة اللي كان اسمه
Touch of Evil
والفيلمين مصنفين من اقوي الافلام علي imdb  من اقوي 250 فيلم .

الفيلم ماشي علي طريقة اسمها
chronological order
الطريقة دي زي اللي شوفناها في الفيلم الشهير
Memento

بيكون في طريقة عرض الفيلم اتجاه لعرض الحاضر وفي نفس الوقت اتجاه تاني في الفيلم لعرض الماضي بالكامل لحين التقاء الطريقين مع بعض في نهاية الفيلم ..وممكن كمان نعتبر الفيلم ماشي في اتجاه تاني شبيه بفيلم
Who's Afraid of Virginia Woolf?
بتاع الثنائي الهوليودي الشهير اليزابيث تايلور وريتشارد برتون الل كانوا مع بعض برضه في الفيلم القوي كليوباترا.

ووجه الشبه هنا انك بتكون امام الشاشة تبدا تتكشف الاحداث قدامك تدريجيا يعني كأن الفيلم بيبدا من النهاية وانت عايز تعرف ايه هي البداية وايه اللي وصل الامور لكده ودي في الأفلام بتكون قمة الاثارة والتشويق .
فيلم
Citizen Kane
من اقوي الافلام اللي بتتكلم عن الحنين الي الماضي البرئ..بعد ما تشوف قسوة الحياة وقمة المال والمجد لكن برضه نقصاك حاجة..نقصاك البراءة اللي كانت بتشوفها وانت طفل وبتشوفها في عيون الناس..الفيلم بيتكلم عن عملاق من عمالقة النشر والنفوذ السياسي بعد نسبه السياسي من جوازه لابنة زعيم وقائد سياسي ويبدا يدخل في قصة حب جديدة والقصة تنتشر عن فضيحته لحد ما يتجوز الحب التاني ده ويفتكر ان دي نهايته السعيدة لكن برضه ميلاقيش السعادة الكاملة معاها وتهجره ويموت وحيد ويدور الفيلم كله عن سر اخر كلمة نطق بيها وهو بيموت ويتضح في النهاية ان الكلمة دي كانت مكتوبة علي "زلاجة" كان بيلعب بيها وهو طفل وبتعبر عن شوقه للطفولة وقال المخرج نفسه في شرحه لنهاية الفيلم ان الحاة دي اسمها
transference


لو اتكلمنا عن افلام الماضي بخيره وشره من الأفلام المأخوذة عن قصص شهيرة جدا يبقي اكيد هنتكلم عن قصتين هما
Wuthering Heights
القصة الشهيرة للكاتبة ايميلي برونتي والفيلم الماخوذ عنها من انتاج  1939
وكمان فيلم
les miserables
قصة فيكتور هوجو الشهيرة والفيلم المأخوذ عنها انتاج سنة  1998

في الفيلم الأول بنشوف الماضي وذكرياته ورجوع الحب من الماضي مرة اخري بعد قصة حب قتلها الزمن ازاي الحب ده بيتجدد مرة اخري اما يعود مرة اخري
Heathcliff
اللي بيقوم بدوره الممثل الكبير
Laurence Olivier
يعود مرة اخري لصديقة طفولته وحبيبته  Cathy
اللي بتقوم بدورها الممثلة
Merle Oberon

يعود البطل والحبيب القديم من ذكريات الماضي بعد ما تكون اتجوزت ولكنه يرجع غني واقوي مما كان وكانه بينتقم من الظروف اللي خلته يخسر حبه الاول ولكن البطلة تكون اتجوزت ويبدأ يدب الحنين مرة اخري في قلبها وتموت علي ايديه في نهاية الفيلم من عذاب الحب في نهاية مؤلمة وحزينة جدا ..وهو من اروع الافلام الرومانسية .

في فيلم "البؤساء" اللي اتعمل كذا مرة طبعا لكني بحب نسخة  1998 بطولة "ليام نيسون" و "اوما ثورمان"
بيتكلم عن صراع بين بطل الفيلم
Jean Valjean
اللي كان محبوس زمان لكنه اصبح شخصية شهيرة جدا في المجتمع ولكن يعود محقق قديم عارف تاريخه كله ويواجهه بتاريخه ويحاول حبسه مرة اخري وهو الشرطي اللي اسمه
Javert
وطول الفيلم صراع ما بين الاتنين وهروب بطل الرواية وطبعا الفيلم ملئ بالدراما في احداثه ومنها رعايته لطفلة عاملة قديمة عنده ماتت ووصته ببنتها ورباها معاه رغم ظروفه الصعبة وكمان احداث ثورة تم قمعها في فرنسا من قبل النظام..وفي النهاية يعيش البطل حرا طليقا بعد انتحار المحقق .


فيلم الدراما واالمغامرات الرائع
hugo
الفائز بخمسة جوائز اوسكار من اخراج العبقري مارتن سكورسيزي ..ايضا يدور في نفس الفلك عن الماضي والهروب منه والرجوع اليه مرة اخري ..الفيلم عن نجم من نجوم السينما قديما ومن عمالقة انتاجه وهو شخصية
Georges Méliès
الذي يقوم بحرق اعماله بعد نجاحه الساحق قديما محاولا الهروب من هذا الماضي ويقابل الطفل الصغير هوجو اليتيم الذي يترك له والده انسان الي يحاول الوصول الي سره والحصول علي المفتاح الذي يحرك هذا الانسان الالي ويكتشف ان صانع هذا الشئ هو نجم السينما نفسه ويسترجع معه الذكريات القديمة عن اعماله السينمائية .


ونتحدث عن الفيلم الدرامي الرائع المبهر
Sunset Blvd
الفيلم من الخمسينات سنة 1950  وهو عن النجمة السينمائية القديمة التي تسمي في الفيلم "نورما" التي قامت بدورها الممثلة الرائعة
Gloria Swanson
وهي تعاني من العيش في نجومية الماضي من ايام الافلام الصامتة وتتناسي دائما ان شعبيتها قد انتهت تماما لدرجة ان خادمها يرسل لها رسائل معجبين وهي تظن ان الناس يتذكرونها حتي الأن وتعيش في نجوميتها الزائفة وتدخل في قصة حب مع مؤلف اصغر سنا وتحاول ان تأسر قلبه وتخطفه من حب فتاة في سنه الي ان تقتله في النهاية وتخرج امام الكاميرات والشرطة وهي تحضر نفسها كأنها ذاهبة الي فيلم جديد لها ..من اروع افلام العقد النفسية .


اما عن فيلم الرومانسية المذهل
The English Patient
فانا اعتبره افضل افلام التسعينات بلا منازع حاصل علي 9 جوائز اوسكار من بطولة رالف فينيس وجوليت بينوتشي .
عن ممرضة تحاول انقاذ حياة مريض حالته خطرة جدا ويحاول ان يسترجع معها ذكريات ماضيه  وقصة حبه الاليمة وكيف ماتت حبيبته وهو يحاول ان ينقذها ثم يطلب في النهاية من الممرضة ان تزيد له الجرعة كي يرتاح من عذابه بعد ان يتذكر القصة كاملة .
والفيلم يسير بطريقة "الفلاش باك" وهو يتذكر كل تفاصيل حياته..فيلم من اعظم افلام السينما.


وهناك الفيلم الدرامي
A History of Violence
حيث يتورط رب الاسرة في عملية انقاذ تجعل منه بطلا ولكن تكتشف الاسرة فجاة ماضي هذا الأب العنيف وغرقه في نزاعات وخصومات قديمة .
والفيلم تم ترشيحه لجائزتي اوسكار .

The Son of No One
فيلم من بطولة الباتشينو و تشانينج تيتوم ..حيث تقوم مجموعة بمحاولة النيل من شرطي وكشف ماضيه القديم امام الجميع اذا لم ينفذ شروطهم كاملة .

ونفس فكرة الفيلم تنطبق ايضا علي فيلم
Linewatch
حيث تطلب العصابة من شرطي كان معهم قديما العودة اليهم في عملية ولكنه يرفض وهنا تبدا بداية المشاكل في حياته لانه يرفض العودة الي ماضيه .


اما عن فيلم
On the Waterfront
الحائز علي 8 جوائز اوسكار بطولة النجم العملاق
Marlon Brando
فهو من اجمل واقوي اعمال السينما عن فساد النقابات العمالية القديمة ودخولها في حروب مع من يعاديها وقتلهم ويتورط البطل في احدي عمليات القتل ولكنه يقع في حب اخت الضحية ويعترف لها بذنبه ويحاول التطهر من ماضيه ولكن العصابة لا ترضي بهذا ويحاولون تصفيته بعد قتل اخوه ولكنه يثبت علي موقفه وينتصر في النهاية ويشهد في المحكمة علي زعيم العصابة نفسه بلا خوف ولا تردد.


فيلم
American History X
بطولة ادوارد نورتون هو من الافلام التي توضح لك كيف ينتقم منك الماضي ويحاول القضاء عليك حتي وان اعلنت التوبة عن اخطائك ..بطل الفيلم عنصري ونظم جماعة عنصرية تقتل وتسرق وتستحل اعراض الاجناس والاعراق الاخري في بلده لانه يراها هجرة دمرت بلاده بسبب مقتل والده في قصة قديمة من احدهم ولكنه يسجن في مرة ويتوب عن ماضيه ويحاول ابعاد اخيه عن نفس الطريق العنصري الخطير ولكن يتم قتل اخوه علي يد من عاداه قديما في مشهد مؤثر يبكي له الاخ الاكبر وتكون نهاية الفيلم الدرامية الحزينة .




هوليود مليئة من سنين طويلة بافلام عن الحنين الي الماضي والهروب من الماضي ايضا ..وفي كلتا الحالتين تحافظ هوليود علي رونقها وروعة افلامها وابداعها دائما .
وتبقي افلامهم عن الماضي.ماضي وحاضر ومستقبل يعيش في قلوب عشاق السينما وعشاق زمن الفن الجميل .

Wednesday, October 17, 2012

شـمـس وقمــر 37






** الرَجٌل لا يٌريْد إمرَأة تَبحَث فيْه عَن "الأمَان"
بل يُريدُ إمرَاة تَبْحث مَعهُ عَن "الحُب والإيمَان"


** لا تَخفْ..حتي وان فَشَلت فيْ البدَاية
فالخَوفُ من فَشَل البدَايَة..هُو بدَايَة الفَشَل .


**قَالوا " اضْحَك تَضْحَكلك الدُنيا"
والحَقيْقة هي "اعشَق تعْشقك الدُنيا"


** مَدرَستان في الهَجْر :
ان تَترُك الأمْر للقَدَر
او تَسْعي الي حَبيبَك مَرة أخْري بكُل طَاقتك
وكلا المَدْرَستين بلا مُعَلم  ..
يَبْقي الحُب هُو المعَلم الأوَل.


** من مَكر الانْسَان ..
إنهُ حَتَي حيْن يَتَجمل.. يقُول "سَأضعُ قنَاعا" !



** قَالت : حُبُك يُعَذبني ..
قلتُ لهَا : اما انَا ..فحَتَي عَذَابي يُحبُك  !



** المَرأة تَسأل في شجَارَها معَ مَراة مثْلها  "مَن الذي بَدأ" حَتي يُصْبح اعتذَارها بكَرامة..
اما في الحُب فتَسأل "مَن الذي أنهاه" كي يُصْبح رَحيلهَا بكَرامة..
فهي دَائمَا تَجد في الأعذَار حَياة جَديدة .



** جَمَال العَاشق انهُ يَري نفْسَه "عشْق القَدر"
وليس فَقط انهُ  "قَدَر العشق" .



** الرَجُل يَتألم مَرتَين :
عندَمَا يَنزل عَن عَرشه امَام عُيون إمْرأة..
وعندَمَا تَصعَد هي عَلي هَذا العَرش بكَعب حذَائها للمَرة الأولي..
وفي الحَالتَيْن يَكُون "الألَم اللذيذ" .

** القَوي يَسأل "كيَف تُريدها"
والضَعيف" كَيفَ سافعَلها"



**الكَلمَات دائمَا تلمسُ الجرَاح ونَادرا مَا تُعَالجها ..
ولذلك تَسمَع دائمَا جُملة "جيت علي الجرح"



** قُلوبنا مَرسُومة في قَاع الفنجَان
الحلمُ يَشْربه ..
والحُب عَرافة تَقرأه .


** لن نَكون أبَدا اقوَي من القَدر ..
ولكن نَسْتَطيع بقُلوبنَا ان نكسَب تعَاطفه عَلي الأقَل !


** الحُب لا يؤمن بشَرف المُحَاولة..
الحبُ يُقَرر ..لا يُحَاول..
فطَعنَته الأولي هي الأخيرَة .



** قَالت : أحيَانا أشعُر انك تَعيش في عُيوني
قلت : رمشَك "بَسمَلة" تَحفَظني وقَلبي في عُيونَك أية نُور ..



** يَفقد الرجُل نصف رَاحته حينَ يُحب..
ويفقد نصفَ قَلبه حينَ يَهْجر..
ويفقد كل عَقله حينَ يَتَزوج !



** من يُؤمن بالحُب الثَاني..
هوَ نَفسَه مَن يَري الحُب مُجَرد "تَجربة حيَاة".
مع ان الحُب حَياة كَاملة..


** الحَاكم العَادل يَقفُ امَام الشاشات ويُعلن "ظهُور الحق"
بينما الحَاكم الفَاسد كل ما يُطَالب به عَلي الشَاشات هُو "ظهُور وجهه"



** الحُب أعمَي..
ولكنَ الله يُنير طَريقَه الي قُلوبَكم .


** قَالت : هَل أحضَرت لي تلكَ الزَهرة ؟
قلتُ : هي ليسَت لك تحديدَا..هي شَاهد كيوبيد عَلي مَا تفعَله بي عَينيك !



** الوُعود كمَا الزُهور..
اذا ذبَل وَعد فَلا تُحَاول احيَائه مَرة أخرَي..
فالوُعُود النصفَ مَقتُولة لا تَتَحقق..



** لأننَا لا نَعرف أين يَضْربنا الحُب تَحديدا ولكنهُ يَتَفلت في أجسَادنا..
ولذلك دَائمَا يقُول العُشَاق "احبُك من الوَريد الي الوَريد"



** قالوا كيفَ لا تأمَن لهذا..انهُ مَلاك..
قلتُ : لا أأمن لبَشري بجنَاحين ..ولا لمَلاك يَمشي عَلي قَدمَين..
فالخداعُ دَائما يَأتينا بفُستَان السَهْرة !!



** الأرواحُ لهَا ثَلاثة حَالات :
في الصَدَاقة تَجْتمع..
في الارتيَاح تتَرقب..
في الحُب تَتلاشي..وتُصبُح واحدة..



** قَالت : هَل سَتُمطر الأن ؟
قلتُ : كَيف اشعُر بالمَطر وانا امَام فُصول الحُب الأرَبَعة ..

Sunday, October 14, 2012

الحرق بالجاز في ليالي الجواز..الجزء الثاني والعشرون..جوزي مدمن فيس بوك






سعيد من بعد ما عمل الاكونت علي الفيس بوك وحياته اتغيرت تماما..كان في الاول عمره ما اقتنع انه يعمل كده لكن اصحابه اقنعوه انها فكرة جامدة وفعلا سمع نصيحتهم لكن جت علي دماغ الكل في الأخر وحياته اتلخبطت جدا لانه بقي مدمن فيس بوك وبقي لازم ياخد الجرعة اليومية ويمكن كل دقيقة كمان ومعادش بيقدر يقوم من عليه :



وفي منزل حماته :

سمية : مش قادرة يا ماما خلاص سعيد اتجنن رسمي من الفيس بوك .

ام سمية : انا يا بنتي اعرف دكتور مسالك كويس

سمية : مسالك ايه يا ماما ؟؟ ده موقع ع الانترنت بقي بيقعد عليه طول النهار ومبيقعدش معايا طول اليوم واهو جاي دلوقتي وهتشوفي بنفسك ايه اللي بيحصله اان مش قادرة اعيش معاه خلاص.


ويرن جرس البيت :

ام سمية : اتفضل يا سعيد يا حبيبي ازيك ياخويا ؟

سعيد : it's complicated

أم سمية : لا حول ولا قوة الا بالله يا ابني ده واضح ان موضوع الفتيس ده مأثر عليك

سعيد : فتيس ايه ؟؟ كنتي عايزاني في ايه يا سمية ؟

سمية : انا حامل يا سعيد

سعيد : وااااو حامل ؟ لايك..لايك

ام سمية : انت بتعمل ايه بصابعك علي بطنها يا ابني بتزغزغها ؟

سعيد : لا يا حماتي انا بعمل لايك بصابعي عليها

ام سمية : وماله مايضرش يا ابني المهم تكون مبسوط

سعيد : الا مبسوط يا حماتي ده انا طاير من الفرحة خدي ال "بوك" دي ..اوووعي

ام سمية : لا بغير يا ابني من البوك بتاعك ده اللي معرفوش..

سعيد : بتغيري يا حماتي.؟ لول..وميت لول عليكي

ام سمية: ربنا يشفيك يا ابني واضح ان الموضوع كبير

سعيد : بتقولي حاجة يا حماتي ؟

ام سمية: لا يا ابني بقول ربنا يسعدك

سعيد: انا كده يا حماتي  اقدر اغير صورة البروفايل بتاعتي واحط اي صورة اطفال وكده يعني واكتب استيتس جديدة النهاردة اني بقيت اب

ام سمية : دي حاجة تبع السونار يا حبيبي ؟

سمية : لا يا ماما دي حاجة تبع الجنان الرسمي اللي انا عايشة فيه ..

ام سمية : ربنا يشفيك يا حبيبي




وبعد تدهور الحالة بعد سنتين :

طبيب نفساني : واضح ان الحالة خطيرة مضحكش عليكي يا استاذة سمية ودي الظاهر انها قلبت بحمي ونزلة فيسبوكية حادة ومزمنة
 حاولي تبعدي عنه الكمبيوتر فترة لانه بالطريقة دي كام شهر وهيكلم نفسه في الشارع

سمية : حاضر يا دكتور بس وطي صوتك هو جاي علينا اهو تاني

سعيد : خد يا دكتور النتيجة دي بتاعة المكتب بتاعي "انشرها ولك الأجر"

سمية: شايف يا دكتور اهي دي من جمل الفيس برضه واضح ان الحالة مستعصية قوي

الطبيب : استاذ سعيد انت حضرتك بتقعد كام ساعة علي الفيس يوميا ؟

سعيد يتقمص دور الشيخ حازم صلاح ابو اسماعيل  : "أنا سعيــد انك سألت السؤال ده"

الطبيب : ايوه يا سيدي يعني كام ساعة تقريبا ؟

سعيد : بسيبه ساعتين واقعد طول اليوم..ما تضيفني حضرتك عليه

الطبيب : طيب ممكن تقلل الوقت شوية لان كده غلط عليك

سعيد : لا يا دكتور اسمع مني الكومنت ده

الطبيب : اتفضل يا سيدي قول الكومنت

سعيد : انا ورايا الف جروب وميت ارض مزروعة ازاي عايزني اسيب كل ده ؟

الطبيب : حضرتك شغال في الاراضي ؟

سمية : لا يا دكتور هو فعلا شغال في الاراضي بس هو يقصد المزرعة السعيدة للأسف

الطبيب : المزرعة السعيدة ؟

سعيد : ايه الهبل ده اسمها فارم فايل

سمية : معلش يا سيدي مغلطناش في البخاري

الطبيب : وده أثر علي شغله كمان اكيد

سمية : طبعا يا دكتور ده راح للعمال وقالهم انا عايز الزرع يطلع كل عشر ساعات بأي طريقة تخيل ؟؟

الطبيب : اشمعني كل عشر ساعات يعني ؟

سمية : زي اللعبة الزفت اللي بيلعبها يا دكتور وبدا يزين المكان كله بتكاليف ملهاش لازمة ويقول عشان الارض تبقي منظرها حلو والمزرعة تبقي جامدة

الطبييب: لا ده كده الحالة فرطت خالص

سمية : تخيل يا دكتور انه وهو نازل الصبح بيسيبلي ايه علي التلاجة ؟

الطبيب : ايه ؟

سمية : بيسيبلي ورقة فيها ملحوظات ومكتوب عليها
notifications

الطبيب : يا ساتر

سمية : ده بيعزمني علي العشا من مكتبه ويعملي
event
بدل ما يكلمني علي التليفون !!

الطبيب : وقدرتي تستحملي ده كله ؟

سمية :لا والادهي من كده ان اي زوج بممكن يهدد زوجته بالطلاق في حالة الخلاف الكبير انما المحروس هددني مرة بعد خناقة كبيرة انه هيعملي ""بلوك" !!!

الطبيب : وعملك بلوك ؟

سمية : لا صالحني وجابلي هدية

الطبيب : طيب دي حاجة ممتازة

سمية : لا هدية علي الفيس بوك صندوق بيطلع فيه حظك ايه.. لعبة يعني

الطبيب : يعني حتي الهدايا بقت ع الفيس ؟

سمية : ده مرة ادي فلوس للشحات وقاله خد "الجيفت" دي وانت وحظك !! طبعا الشحات تنح

الطبيب : قال للشحات "جيفت" ما هو لازم يتنح طبعا

سمية : مرة قاللي هاجيبلك دهب ..لقيته باعتلي دهب وبترول في اللعبة وقالي مبروك يا حياتي !! ومرة جيت اديله بوسة ..قالي ابعتيهالي علي الوول ع الفيس  !!

الطبيب : بصي يا استاذة سمية الحالة مستعصية قوي بس هنحاول فيها ..ياريت تحاولي تبعدي عنه الجهاز فترة اسبوع علي الاقل حتي مهما كانت الاعراض عليه بس لازم يبعد فترة..



وبعد مرور اسبوع :

سعيد "متقمص دور احمد مكي" :  يا سمييييييييييية..عايز الفيس بوك حالا لاما هارتكب جريمة ..

سمية : لول

سعيد : لول ؟؟ انتي اتعديتي ولا ايه ؟ هو فيروس في الجو ؟؟

سمية : انا سعيدة انك سألت السؤال ده..ممكن أعمل "كومنت" ؟

سعيد : لا حول ولا قوة الا بالله ..ايه اللي حصل يا حماتي لبنتك ؟؟

ام سمية : هي يا ابني قعدت طول الاسبوع متواصل علي الفيس زفت ده وهي حرماك منه ادمنته هي وجاتلها الحالة

سعيد : يعني اخف انا تجيلها هي ؟

ام سمية : دي جت كمان لابوها وماشي يقولي خدي "البوك" دي ويزغزغني ..

سعيد : ده الموضوع معادش يتسكت عليه بقي..وادي الكمبيوتر كله بووووووووووووم طررررررررراخ..




وبعد فترة وفي سبوع طفلهم الجديد :

رجع الادمان تاني لكل الاطراف لدرجة انهم كتبوا كارت السبوع بالشكل ده :

notification :

اسمع كلام امك ..ما تسمعش كلام  أ "poke"
lol  علي كل الحاضرين

  

Thursday, October 11, 2012

مولاتــي..سيدة الممــالك الأربعـة






أكتبُ كَلماتي عَلي ضوء شُمُوع..
كي تَبقَي عَلي نصْف ظَلام يشْتاقُ الي نُور عَينيها..
كي تتعانقُ كَلماتي معَ هَدهدة الشَمْعة ورهْبة الظلام .

أسَافرُ  في مَكاني بالقَلم فيْ كُل زمَان ..
واجعَلهُ ريشَة عُود وسطوري أوْتار..
كي أجمعُ لحْن أنُوثتها مَع لحن حروْفي وتَبدأ حَفلة رَقص كيوبيد مَع نَبضي ..

سأسَميها مَجازا ً "سيدةُ المَمالك الأربَعة" ..
مَملكةُ الجَمال والرقةُ والأنوثة والسحر...
قالوا : هل هَذا الاسمُ حَقيقي ؟
قلت : سأقولُ كمَا الأفلام "ربما تَشابهت بَعض تفاصيْل الوَصف مَع الواقع" ..
ولكنها أكبرُ منْ أي وَاقع ..وأعْظم من أي حلم..

هي..
مُخضبةُ بدمَاء وبَصَمات الزَهر عَلي جَسَدها..
حين يحجُ الياسَمين اليهَا ويرفعُ القَمر عبَارة "عشقُ مَبْرور" ..

 فوَاحةُ سُبل للتَائهين..
ولا سَبيل منهَا الا اليهَا ..
ولا طريقُ لعَينيهَا الا عَلي اجْنحَة الفَرَاشات أوْ مَوكب أحْلام ومَجَاذيب غَرام ..

"كلاَسيكية" النَظْرة والهَمْسة..
"فاجُومية" في جُنونها وعُنفوَانها..
"نزَاريَة"  في رقَتها وسحْرها..
وكأنها رَوْح الشعْر حينَ تَغرق"بُحوره" فيْ أبديَتها ..

أنَا وهي "قصَة حُب"
ولكني "القصَة" فَقط..وهيْ "الحُبُ" ذاته..


تَزور في عَينْيها "نهرَ الغَفْران"
تَتطهَرُ خَطايا قَلْبك بالجَمَال..
والقُبْحُ فيكَ بالحُسْن فيهَا..
ويكونُ قَلبَك بَعْدها "العَارفُ بالله وبالحُب"
ويظلُ وجْهَها "العارفُ بالجَمَال"  !


شَفتاهَا سرير للقَمَر..
حينَ يَعُود مُصَابا ًكُل ليلة من النُور الصَارخ فيْ شُرفتَها ..
وعَيناها أكْسيرُ للجَمَال..
يُدَاوي به غيرتهُ
وينتحرُ به عَلي جَسَدها ويكتبُ عَلي قَبْره "هُنا وُلدتُ وهُنا أرقدُ فيْ سَلام" !

ليْسَت تلميذة الرَوْعة..
بل تُقَلدُها الروْعَة..
 وتُصبحُ مثل ابنَتها التيْ تُقلدها حَتي في وَضْع المكياج فيْ شَكل عَبَثي أمَام المَراة كَمَا الاطْفال..
فَتَحتضنها فيْ شَفَقة..
ويَكاد يَنفجرُ القَلب فيْ وَهَج مَشْهد لا يُصَدق.. ولا تَعْرفُ هَل هُو "دراما" "أم كُوميديا عشْق سَوداء" !
ويَبْقي مَشهد للتَاريخ فيْ عَينيها ..لا "فنُ سَابع" او ثَامن..
بَل هي "الفَنُ الأوَل" ..

حينَ أراهَا..
يُصْبحُ جَسَدي جذْع شَجرة..
تكتبُ رُمُوشهَا فَوْقي "للذكْري الخَالدة"
وتظلُ الحيْرَة فيْ عَقْلي بينَ "خُلود الذَكري"..و "ذكرَي الخُلوْد" فيهَا..

حينَ أرَاهَا..
لا يكونُ لقَائَنا وجْه لوجْه كأي لقَاء..
بل يكونُ قَلبْا لقلْب..
روحا ًلرَوح..
عَقل لعَقْل..
جُنون لجُنون..
ولا تَعْلم رَوْحي بأي أرْض تَمَوت فيهَا..
ولا تَعْلم بأي أرْض تَعْشق..
فأينَمَا أكونُ أمَامَها.."يُدركُني العشْق" ..


حينَ أراهَا..
تلتفُ "نُون النسْوَة" حَوْلَ رَقَبتي كَطَوق الاعْدَام..
وتُحَالُ أوْرَاق عشْقي اليْ القَمَر..
ولا حُكمُ الا قَتْلي بصَاعقَة النَظَرات والهَمَسات..
ويظلُ قَلْبي مُسْتسلم للقَضَاء والقَدَر..
قضاء عينيها وحسنها وقدر السماء والحب ..

قالوْا انَ "الصَمْتُ فيْ حَرم الجَمَال جَمال"
ولكن الصَمْت فيْ حَرم جَمَالها تقديْس ورَهْبة..
تَشعرُ مَعهَا برَوْعة الخَوف..وفيْ نَفْس الوَقْت الخَوف منَ الرَوْعة ..

حينَ تَراهَا ..
تَشعرُ انكَ وَصَلت لسدْرة مُنْتهَي الجَمَال..
وصلتُ لأعْمَق دَرجَات فلسَفة الجَمال..
وصلت لسَبب خَلق الله للجَمَال..
ومَا أقوَي وأصْعَبُ أنْ تَصل بضَعْف أدَميتك وانْ تَقفَ فيْ حَضْرة الجَمَال بذَاته..
لوْ كَانت فيْ زَمَن الاغْريق لمَا تَحدثوا عنْ الهَة الجَمال..
ففي حُضُور عَيْنيها تَخرُ الهَة الاغريق صَريعَة وعَاشقَة..
وفي عَيْنيها..تَنْتحر "فينُوس"  !


حينَ اقفُ بينَ يَديهَا..
أنظرُ الي السَمَاء..
أنتظرُ سقُوط تُفَاحة أدَم..
فالأن أنا أسقُط منْ جَنتي الي جَنَة عَيْنيها..
وانا امَامَها الان فيْ لحظَة سقُوطي منْ جَنة واقعي الي جَنَة خَيَالها وحُسْنها..
سقطتُ..ومَازالت يَدي مَمْدوُدة الي الشَجَرة لأقطفَ تُفَاحة أخيْرة
تخْرجني منْ عَذاب جَنْتها..


 سيدةُ المَمَالك الأربَعة..
لا سَيْف لي ولا سُلْطان..
ليسَ لي الا عَذَاب عَيْنيك والف سَجْان..
ليسَ لي الا مَزَامير عشْق ترَاقص فيْ عَقْلي الف شَيْطان وجَان..
ليسَ ليْ الا كَأسي وبضْع حكايات هَوَي..
وخَنْجر اتَسَلق به عَلي كُحْل عَيْنيك واسقطُ "شَهَيد غَرَام"..
سأقفُ امَام عَيْنيك كمَا الشَحَاذ أقُول بصَوْتي :
 "اعْطيني ممَا أعطَاك الحُب"
"اعطيني ممَا اعطَاك الجَمَال"
"اعطيني ممَا اعطَاك الخُلود"..
لله درك أقفُ سَاعَات ومَا اخَذت منْك شَئ ..
لأني حيْن أقف أمَامك..أكون مَلكْت الدُنيا وما فيهَا ..

دعيْني اصنعُ للشَمْس ردَاءا منْ حُمْرة خَجَلك..
وأصنعُ للقَمر وسَادة منْ نُور طَلتك..
واصنعُ لكيوبيْد نبَيذه المُفضل من دمُوعك..


دعي الايَام فيْ أصَابعي كمَا الخَاتم السحري..
كلما مَسَحت الخَاتم رأيْت أيَامي تَتحني بعَينيك..
وتعودُ سنيْني كمَا أمْواج البَحْر ..
لتشْرق منْهُم شَمْس جَمَالك..
وتغربُ فيهُم ألحَان ليْلك ..


دعيْني اخْلق منْ حُروف اسْمك سَيفا أغْزو به كُتُب الشَعْر..
وطَوْق نَجاة كي لا اغْرَق بينَ حُرُوف "الحَاء" و "البَاء"
وأفتحُ ذرَاعي ما بينَ طَرف الدُنْيا وطَرف فُسْتانك..
فأكون حضنت العالم أجمع ..


دَعي بَرائَتك تَحْضنُ طُفُولتي..
لتعيدي الي نَبْضي "بَرَاءة الطفُولة"
وتعيدي الي العشْق "طُفُولة البَراءة " المَفْقودة ..

دعي "بَنَات" أفْكَاري..
ترتبُ لكي سَريْرك..
وتغزلُ خصَالَ شَعْرك عَاج وعَسْجد..
وتخيطُ لكيْ فَسَاتينك من حَبَال القَمَر..
وتبحثُ فيك عنْ حلمي الغَارق كمَا سَفينة "تايتنيك" ما بَين ضلُوْعك..


كونيْ نبُوءة ولوْ حَزينَة فلَنْ أبْكي..
كوني وَحْي السَمَاء الي صَدْري ولنْ اصيحَ ألمَا.ً.
كوني أحْزَان شكْسبيرية عَلي قَلَمي..
حركي الغَابَات تُعْلن هَزيمتي امَامك..ولنْ اصْرُخ كمَا فَعَل "مَاكْبث"
ولن اقوْل كَما قال هَامْلت "اكونْ او لاَ اكون"
بل ساصيحُ "تَكونينَ فيْ قَلْبي أوْ لاَ اكُون"


"سَيْدة المَمَالك الأرْبَعة" ..
في غسَق رَحيْلك..
دَعي صبَايا بينَ يَدَيك
وشَبَابي بينَ نَبَضَات قَلْبك
وشَيْخوختي بينَ خصَال شَعْرك..
فاذا ما رَحَلتي تَبَقي لي جَسَدي النَحيْل..
واذا مَا عُدتي..عَادوا جَميعَا ..رجُلا جَديدا..وأمَلا جَديدا..وأدَم جَديد..

Monday, October 8, 2012

مبارك ونظامه..سنوات من الفساد بالأرقام







"قوة الشعب مثل الشمس..لا أثر لها اذا تفرقت اشعتها وتشتت ..ولكنها تعمل عملها اذا تجمعت وتكتلت ونظمت "

توفيق الحكيم



ساعات بستغرب قوي من بعض كلام الناس عن مبارك كأنه فعلا كان رئيس له تجربة رائدة بل ان البعض بيدافع عنه علي اساس انه كان في عدالة "عمر بن الخطاب" والناس مش واخدة بالها مثلا !!!..
او ان مصر كانت من اعظم دول العالم واحنا مش واخدين بالنا..مش شايفين تقييمات مصر في اي استطلاع سواء من الاكثر فسادا او الاقل شفافية او علي مستوي الجامعات كان ترتيبنا فين ..

ناس كتير بتحاول تقلب الحقائق وتدافع عنه باستماتة وكانه فعلا "أب" مش رئيس طبعا عندنا احنا فقط في دول العالم الرئيس اب انما في اي دولة بيتم توجيه نقد له وبيتعصر في الاسئلة زي ام بيحصل في اي انتخابات برة والناس بتحرجه بوابل من الاسئلة في كل الاتجاهات والنشاطات لدرجة حتي اسئلة عن هيعمل ايه لخدمة الحيوانات لو مسك رئيس او جمعيات حماية الحيوانات للناس اللي بتدافع عنهم باستماتة او نجوم زي باميلا اندرسون اللي بتدافع عن الحيوانات كأنهم قرايبها بالظبط .

دلوقتي بيظهر ناس كتير ومنهم لميس جابر تدافع باستماتة عن كل ما هو مباركي لدرجة انها في اخر حوار ليها علي قناة المحور كأنها مش عاجبها اي حكم وبتقول كل الناس دي المفروض مكانتش تتسجن وحاجات من النوع ده وتتحجج بقراءة التاريخ !!

مش عارف من امتي كانت قراية التاريخ حافز للدفاع عن الطغاة !!! شئ مش منطقي وغريب جدا والمذيعة احرجتها اكتر من مرة وقالتلها ازاي ده في منهم خد احكام بالفعل ترد وتقولها "اي كلام"

الفكرة في لميس جابر وكل اللي بيتكلم علي طريقتها ان خلاص "سبق السيف العذل" يعني هم حتي لو عرفوا وتيقنوا بالأدلة ان مبارك ونظامه فاسد تماما ومسرطن بالفساد برضوا هيفضلوا يدافعوا زي ما تقول نوع من العناد او "المقاوحة" يعني مستحيل بعد دفاع كل الفترة اللي فاتت دي فجاة يتقلب موقفه تماما ويطلع انه كان غلطان ووجهة نظره كلها فاسدة فهيفضلوا يدافعوا ويقاوحوا حتي لو كل الناس عرفت الحقيقة كاملة وبانت زي الشمس .


وهأذكر بعض النقط عن الفساد المالي في عصر مبارك طبعا من غير ما نتكلم عن الفساد في التعليم والصحة والمرافق وغيره من الوف الحاجات اللي انتوا عارفينها لكن هنتكلم عن شوية ارقام واحكام واخبار من الجرايد هي بمثابة فضيحة لمبارك وحاشيته الفاسدة :



1-  لنقرأ الخبر ده بعناية وتدقيق ..خبر بيقول :

كشفت هيئة '' الأمن القومي '' بالمخابرات العامة بعد إجراء التحريات عن الرئيس السابق محمد حسني مبارك وأسرته أنه أسس مع رجل الأعمال الهارب حسين سالم ومنير ثابت شقيق زوجته شركة ''وايت وينجز'' بالعاصمة الفرنسية باريس للإتجار بالأسلحة.
وذكرت المخابرات العامة - حسب عدة تقارير صحفية - بأنها قامت بفحص البلاغات التي قدمت إليها والبالغ عددها نحو 19 بلاغا في القضية رقم 1 لسنة 2011 والذي يباشر التحقيق فيها المستشاران عاشور فرج واحمد حسن المحاميان العامان بالمكتب الفني للنائب العام حيث تواصل النيابة العامة تحقيقاتها في وقائع الفساد المثيرة للرئيس السابق وعائلته

ورصدت التحقيقات من خلال تلك البلاغات مجموعة من التهم في حق الرئيس السابق محمد حسني مبارك تتمثل في بلوغ ثروة مبارك 70 مليار دولار بالبنوك السويسرية والبريطانية والأمريكية وأنه قام بتهريب معظم أمواله عن طريق مجموعة ايكوتريد المصرفية بسويسرا.
وذكرت التحقيقات أن مبارك قام بفتح حساب مصرفي ببنك باركليز الدولي لصالح المدعو بيتر اسكويرتيد  قائد القوات الجوية السابق بسلاح الجو الملكي البريطاني ومدير مصرف المركز الخليجي،

حيث قام بتفويض الأخير بإيداع جميع ودائعه البنكية بمجموعة ايكوتريد المصرفية.
و بتاريخ 25 يناير 2011 حول مبلغ مالي يقدر بحوالي 50 مليار جنيه مصري بأسماء مستعارة بخلاف امتلاكه ثروة عقارية بمصر تقدر بمبلغ 35 مليار جنيه تم جمعها نظير استغلال نفوذه وهو أسرته.



2- حتي اموال الزلازل لم تسلم واتحقق مع مبارك في اتهامه بالاستيلاء علي اموال الزلازل .



3- مبارك استولي علي اراضي لهيئة الثروة السمكية والخبر المنشور بيقول :

قال محمد فتحى عثمان ، رئيس الهيئة العامة للثروة السمكية ، في اقواله امام جهاز الكسب غير المشروع إن الأراضي البالغ مساحتها 119 فدانا تتبع هيئة الثروة السمكية وانها كانت مخصصة للمنفعة العامة , غير انه جرى توزيعها على الضباط الطيارين أعضاء الجمعية دون وجه حق.
وأوضح عثمان أن الرئيس السابق حسنى مبارك أصدر قرار جمهوريًا باستقلال الهيئة ، حتى يتمكن من الاستيلاء على أراضيها بمعاونة أركان النظام البائد.



4- من البجاحة ان سوزان ثابت تطلع وتتهم بنوك سويسرا بنهب 240 مليون دولار من اموالها ده بدل ما تداري علي فضيحة المبلغ الضخم ده اللي طبعا عارفين هي جابته منين .



5- جمال زهران حسب تصريح ليه بيقول :٣٣٤ مليون دولار في بنك القاهره باسم سوزان مبارك



6- اما عن فضيحة التبرعات وسرقتها كمان يعني حتي فلوس التبرعات والخير بتتسرق ..هتلاقي خبر بيقول :

كشفت مستندات ومخاطبات رسمية بين وزيرى الصحة والمالية بالنظام السابق، ومسؤولى البنك المركزى، عن أن سوزان ثابت، زوجة الرئيس السابق حسنى مبارك، جمعت تبرعات من جهات خارجية وداخلية، بملايين الجنيهات لصالح مرضى الفشل الكلوى، وأنها أودعت تلك الأموال فى حسابات سرية خاصة بها فى بنوك مصر الدولى ومصر لتنمية الصادرات والأهلى المصرى.

وبينت المستندات والمخاطبات، التى حصلت «المصرى اليوم» على نسخة منها، أن «سوزان» جمعت تلك التبرعات قبل وبعد عام 2006 دون الحصول على موافقة من وزارة الصحة، وأنه فى عام
2009 خاطبت وزارة التضامن الاجتماعى للحصول على تصريح بجمع التبرعات. وأوضحت المستندات التى تلقتها نيابة الأموال العامة للتحقيق فيها أن المسؤولين فى وزارتى الصحة والمالية، خاطبوا محافظ البنك المركزى لاستثناء حسابات زوجة الرئيس السابق من ضمها إلى البنك كباقى الصناديق الخاصة بالوزارات والهيئات الحكومية، ووافق محافظ البنك على ذلك.

وأفادت بأن يوسف بطرس غالى، وزير المالية الأسبق، أصدر قراراً بوضع جميع حسابات الصناديق الخاصة بالوزارات والهيئات الحكومية وكذا الحسابات الخاصة بالتبرعات، فى حساب «الخزانة الموحد» بالبنك المركزى، وهو ما أثار غضب «سوزان»، ورفضت تطبيق القرار على حساباتها الخاصة، وأصدرت تعليمات ـ بحسب الخطابات المتبادلة بين مسؤولى الوزارة ـ بموجبها أرسل ممتاز السعيد، وزير المالية الحالى، وكان وقتها رئيس قطاع مكتب الوزير، خطاباً إلى نبيل عبدالعال، وكيل محافظ البنك المركزى وقال فيه: «إلحاقاً لكتبنا لسيادتكم بشأن فتح حسابات جديدة بحساب الخزانة الموحد، وحيث ورد إلينا كتاب السيد الأستاذ رئيس الإدارة المركزية لشؤون الأمانة العامة بوزارة الصحة والسكان والذى يشير إلى أنه توجد حسابات تبرعات خاصة بالسيدة الفاضلة حرم رئيس الجمهورية بالبنك الأهلى المصرى، وبنك مصر الدولى وبنك مصر لتنمية الصادرات، وأن أرقام هذه الحسابات معروفة لدى جمهور المتبرعين ويطلب سيادته الموافقة على استمرار العمل بهذه الحسابات فى البنوك التجارية المذكورة أعلاه، وذلك حفاظاً على استمرارية التبرعات، وفى هذا الصدد أتشرف بالإحاطة بأنه نظراً للاعتبارات التى أبداها السيد وكيل وزارة الصحة، فإنه من الرأى أن يستمر العمل بهذه الحسابات فى البنوك التجارية المذكورة على النحو المعمول به حالياً. وتفضلوا بقبول فائق الاحترام»، وحمل الخطاب توقيع «السعيد» وخاتم شعار الجمهورية بتاريخ 19 ديسمبر 2006.






7- من اهم اعوان مبارك كان احمد عز في لجنة السياسات واللي ثبت خلاص بالدليل القاطع فساده وتورطه في جرائم مالية وغسيل اموال مش عارف ازاي لسه في ناس بتقول اصل مافيش ادلة علي فساد النظام .. وكان الحكم بالسجن 7 سنوات لأحمد عز وتغريمه 19 مليار جنيه لادانته بغسل الأموال



8- الحكم علي بعض الشخصيات البارزة في الحكومة السابقة زي الاحكام الصادرة ضد زهير جرانة الوزير السابق والحكم بحبس أحمد نظيف ثلاث سنوات وتغريمه 9 ملايين جنية .



9- في مقالة الاستاذ فهمي هويدي اللي هي مقالة بمثابة قنبلة مدوية اسمها "بلايين مصر المنهوبة"  بيقول الاستاذ فهمي في مقالته الشهيرة عن فضائح النظام بالارقام :

نشرت صحيفة «الجارديان» تحقيقا حول النتائج التى توصل إليها مندوبو هيئة الإذاعة، ومن البرنامج والتحقيق المنشور، عرفنا الكثير الذى ظل مسكوتا عليه طوال الأشهر الماضية. فى المقدمة من ذلك ما يلى:

•أن قادة ست دول عربية نهبوا نحو 300 بليون دولار من ثروات بلادهم على مدى الأربعين سنة الماضية. والدول هى مصر والعراق (فى ظل صدام حسين) وتونس وليبيا واليمن وسوريا، وهذه الأموال كان يمكن أن تزيد خلال تلك الفترة إلى أكثر من تريليون دولار، لو استثمرت فى التنمية البشرية والصناعية والبنى التحتية.


صدر قرار بريطانى بتجميد أصول بقيمة 85 مليون جنيه إسترلينى يملكها مبارك وزوجته ونجلاه، إضافة إلى 15 آخرين من الأعوان. إلا أن تحقيقات الـ«بى بى سى» بينت أن ممتلكات وأصولا أخرى لم يشملها التجميد، منها منازل فاخرة فى منطقتى «تشيلسى» و«نايتس بريدج» الراقيتين فى لندن. إضافة إلى شركات تجارية ظلت تمارس نشاطها لعدة أشهر بعد صدور قرار التجميد.

أثناء التحقيقات التى أجريت حول تصرفات أسرة مبارك فى جنيف، تبين أن قرينة الرئيس، السيدة سوزان مبارك كانت تقيم فى جناح ملكى فى فندق فور سيزونز، بكلفة 15 ألف دولار فى الليلة الواحدة (أكثر من 90 ألف جنيه مصرى).





10- في الموقع العالمي "ياهو" نشروا تقرير مهم جدا اسمه
8Of The Richest Dictators In History

وكان طبعا حسني مبارك من ضمن اهم اغني ثمانية ديكتاتوريين في العالم .




11- ملفات البورصة المصرية والتلاعب فيها السنوات الماضية ومن ضمن المتهمين بالتلاعب جمال مبارك وعز وغيرهم من اللي استباحوا فلوس الشعب المصري ونهبوا حتي صغار المستثمرين
وكان هناك اكثر من ملف للفساد والتلاعب بالبورصة المصرية في السنوات الماضية .



12-  اما عن قنبلة اخري مدوية فهو الفيلم التسجيلي اللي عرضته قناة الحياة بإسم "مليارات مصر المنهوبة"  ومن الحقائق اللي هلخصها من الفيلم ده وملخص سريع للمعلومات في الفيلم :

أولا : مصادر مقربة من البنك الدولي   بتقول  54    مليار دولار لم يستدل عليها في ال 8 سنوات الاخيرة في مصر

ثانيا :  الخبراء في البنك الدولي يقدرون الاموال المنهوبة في مصر ب  134 مليار دولار علي مدي ثلاثين عام

ثالثا :  في مايو 2012  صدر حكم قضائي في سويسرا قد اكتسب التوصيف القانوني لجهة تمارس "الجريمة المنظمة"

رابعا :  صرح المستشار عاصم الجوهري ان الاسرة الحاكمة كانت اسرة فاسدة وبالتالي فالفساد متأصل في كل المؤسسات وهو فساد مؤسسي ..
افادت التقارير ان الاصول المصرية عرفت طريقها الي الرياض والدوحة ودبي ونيقوسيا ولندن ومدريد وبانما وسويسرا




13-  وشوف الخبر ده كمان :

قال محمد الغيطى عن كواليس فيلم  "حائط البطولات" وأنه لم يرى النور حتى الآن لأن حسنى مبارك لم يذكر فى سيناريو الفيلم، وأضاف الغيطي أن الحفلات والأوبريتات التي كان يتم عملها أمام مبارك في نصر أكتوبر يعد إهدارا للمال العام وإهانة لنصر أكتوبر وكل ما صرف عليها كان يمكن أن يصرف على عمل فيلم ضخم يوثق لحرب أكتوبر.





دي بعض الحقائق للمدافعين عن نظام مبارك البائد ..وحتي لو كنا مش مع النظام الحالي او معاه ..فده مش مبرر ان النظام السابق كان يستمر في طغيانه ونقول "اصلهم خبرة"  مش لسه ناس هتجرب فينا !!

يعني النظام القديم خبرة بس خبرة في الفساد فعلا ..لازم كل مصري يتعلم يتعامل مع النظام بالارقام والورقة والقلم مش بالعواطف واصله كان بتاع الضربة الجوية وكانه حارب لوحده مثلا ومكانش فيه عبقري زي الشاذلي او عبقري اخر زي السادات اللي كان بيتجاهل دورهم ويكون الاوبريت عليه لوحده !!


نظام فاسد بكل ما تحمله المعني من كلمة والغريب ان يبقي فعلا من يدافع عنه بدون اي سبب او دليل ..اللهم ارزق مصر بمن يصلح دائما ومن يحكم بعدل عمر .