Monday, January 26, 2009

هوليود 2006

من أروع الأفلام التي تعتمد في قصتها علي كم هائل من المشاكل النفسية والتمثيل المتقن لكل دور في الفيلم هو الفيلم الرائع


little children
وهو رشح في عام 2006 للعديد من الجوائز منها 3 اوسكار والكثير من الجوائز الأخري
قصة حب غريبة الأطوار تدور بين طرفين كل منهما يملك مشاكله الخاصة مع الزوج او الزوجة وتتخللها العديد
من الأزمات والتسبب بالأزمات أيضا ومحاولات التكفير عن الذنوب ..فيلم اكثر من رائع ..متعدد الجوانب ..
يفهم بأكثر من طريقة ويشاهد أكثر من مرة
وليس غريب علي عام 2006 ان يعطي لنا مثل هذا الفيلم حيث ان هذا العام من اروع ما جائت به انجازات هوليود
يذكرني في التسعينات بعام 94 و95 حيث شهدت فترات تألق رهيبة وأفلام عملاقة
ومن أفضل ما جاء ايضا في 2006 الأتي
:
Glory Road
Tristan & Isolde
If Only
Why We Fight
Annapolis
Something New
Firewall
The Pink Panther
Eight Below
Freedomland
Little Fish
Unknown White Male
Ask the Dust
Find Me Guilty



Chaos
V For Vendetta
Lucky Number Slevin
Mozart and the Whale
The Sentinel
The Lost City
The Break-Up
The Lake House
Edison Force
Gabrielle
Shadowboxer
Little Miss Sunshine
Scoop
The Night Listener
The Illusionist
Aurora Borealis



The Black Dahlia
The Last King of Scotland
The Departed
Flicka
The Prestige
Babel
Blood Diamond
Breaking and Entering

The Pursuit of Happyness
Dreamland
Children of Men

وبقية الأفلام كانت علي درجة واحدة ولكن هذه الأفلام هي الأروع في 2006 في عام متألق ومشع بالابداع









Sunday, January 25, 2009

الصاعق الكهربائي وحكومة احسبها صح

من كام يوم كنت ماشي في المنصورة ولقيت مفاجأة من العيار التخين فعلا..الصاعق الكهربائي بقي في الشوارع..
واللهي بقي في كل شارع ..الصاعق الكهربائي انتشر يا جماعة وهيغرق مصر كلها..والمصيبة الأكبر في إيد مين بقي..
في ايد البلطجية..

يعني هو كان جهاز معمول عشان يبقي دفاع عن النفس للبنات اصبح سلاح هجوم للبلطجية..وده لأننا في مصر المحروسة..
طيب ليه الولاد عموما بيميلوا انهم يلعبوا بأسلحة الموت دي ؟

واللهي اللي شفتهم ميعدوش 16 سنة وبيهزروا مع بعض بالكهربا بعد ما كانوا بيهزروا مع بعض بمسدس الخرز اللي
خرم عين ألاف الأطفال..الحكومة قالت خرم عين مش كفاية احنا نوفرلهم كهربا كام فولت كده عشان يتسلوا
وقريبا جدا سلاح "الأوزي"..هنهزر بيه مع بعض برضه رشاش سريع كده كهزار يعني نعمل زي النكتة بعد ما يموت عشرة
نقول بس بقي لحسن تقلب بجد..

طيب اللي بيحصل ده ليه؟

والله عدة اسباب ..من الصغر اتفرج ع المدرسة..
أسوار شائكة ومغطاة بالزجاج لجرح الطلبة اللي عايزة سندوتشات..
طيب يا حضرة الناظر ما توفر الكلام ده جوة وخلاص ومافيش داعي لاستراتيجية العصابات جوة المدرسة وفي الأخر كله بينط من ع السور..
وبعد كده يلعبوا جميع الألعاب الشيقة لعصابات الشوارع زي:

صنم:لعبة مصرية صميمة بيلف فيها واحد بين مجموعة ساكنة ترزعه كام قفا وبسرعة وبكفاءة
صلح:نفس الفكرة برضه لعبة قائمة ع القفا بس واحد بس بيضرب وانت تخمن مين اداك بالقفا.
عنكب يا عنكب: حيث يتقافز مجموعة من الشباب في شكل هرمي لينهار هذا الهرم في الأخر وتحتاج للياقة

وكمان الأطفال مش بيكتفوا بكده دول بيشوفوا اسبيس تون اللي كلها افلام مرعبة اشي قنابل واشي صواريخ هم شايفين ان ده لعب

فبيكبروا ويظنوا ان كل شئ في الدنيا لعب وبعض الأطفال بيحبوا صور الحروب لأنها بتفكرهم بألعاب معينة!!

وبعدين بالعقل كده يعني ايه سلاح اصلا تدافع بيه البنت عن نفسها ؟؟ما هو اسمه سلاح وخلاص وموجود في كل حتة يعني اكيد الولد هيستعمله برضه للغلاسة
ولا يعني هيتباع للبنات بس؟مافيش في مصر الكلام ده ..لأن اي حاجة بتتباع لأي جد المهم الفلوس وتتحرق البلد..ابعت عيل صغير عنده سبع سنين يجيب علبة سجاير البقال هيديله عشان يكسب ولا هيقوله انت اقل من 16 سنة ولا نيلة..وكذلك الحال في الخمرة حتي..
يعني نعمل ايه دلوقتي "نلبس للحكومة اديداس" علي رأي خالتي اطاطا..ولا نعمل ايه؟
انا قولت احذر خدوا بالكم من الصاعق الكهربائي في كل شارع..والحل اننا نقسمها شوارع..ونعمل يفط بقي
ده شارع مسموح صاعق كهربائي..مسموح استعمال المسدسات..مسموح مطاوي..بس نقسمها صح..
واحسبها صح تعيشها صح..

Friday, January 16, 2009

زهرة خلود







بردان قوي..
وفي قلبي نار..
دي يا أمي لحظة الإنتصار..
جايلك شهيد..
جايلك أذان..
جايلك صلاة..
وضي دموعك دمي وادعي علي الطغاة..
ده شرف كبير..
لو أكون أسير..
لو أكون ضمير..
وبقيت شهيد..
دمعة وطن..
زهر وكفن..
لا مش بأموت..
لو جسمي مات..
قولي الضريح لحظة ميلاد..
أنا بتولد..لو بتجلد..
لو فوقي مبني وقنبلة..
رايح لجنة وسنبلة..
رايح شهيد..
راجع وليد..
بردان قوي..
لكني عايزك تصرخي..
بأعلي صوتك تصرخي..
أنا ابني عاش..
أنا ابني عاش..
شايف يا أمي في السما..
أطفال كتير..
وبصوت وعزة..
بيقولوا غزة..
احنا الدموع هي الوطن..
احنا السجود هي الصلاة..
هي البداية والنجاة..
انا كلي نور..
شوفي الطريق من نوري ده..
فكي الحصار من نوري ده..
قولي لكل الأمهات ..
مين اللي مات..
دي ولادنا لسه بتتولد تحت التراب..
دي شهادة سابت زهرها فوق الخراب..
شايف يا أمي في السما..
زهرة خلود..
ريحة جنود..
عرق الشهيد في المعركة..
نهر العسل..
نبع العسل..
جارنا اللي مات..
تحت الرماد..
بقي طفل نور..
رفرف وطاير في السما..
ساب دنيته راح للهنا..
قولي لكل الأمهات..
مين اللي مات!!
قائد كسيح..
الضعف صالبه كما المسيح..
لكن المسيح كان له الشرف..
قوادنا مصلوبي الشرف..
خلوا اجتماعكم يا عرب علي جثتي..
عيشوا في مرة لأخرتي..
انا جسمي ترابيزة حوار..
لموا الكراسي واقعدوا..
يمكن هتاخدولي القرار..
شيلوا ازايز المية دي..
خلوها ملايانة بدم..
مش ده الأهم !
واللي هيبدأ بالفصيح..
هنقول كسيح..
مبلاش قرف..
مكفاية كلمات الخرف..
قمة وكلام..وانتم نيام..
متقولوا حي علي الوطن..
بدل العفن..
مكفاية حي علي الكفن..
مكفاية موت..
يا أهل الحياة..
يا أهل الترف..
لمولي حقي من التراب..
ولا انتوا عاشقين الخراب..!!
حكامنا حكام القصور..
مافيهمش ولا حاكم جسور..
إلا الكلام..
حاكم وطنا هو الكلام..
صانع وطنا هو الكلام..
قاتل وطنا هو الكلام..
وفي ايدنا سكين الضمير..
ووريد أمل لونه انطفي..
والبرد بقي طعم الدفا..
يا أهل الكلام..
من جنتي
أجمل سلام..

Wednesday, January 14, 2009

قمـــة السكــلانس

بسم الله وعلي بركة الله نبدأ القمة العربية..

فخامة الرئيس علي عبد الله صالح تفضل بإلقاء الكلمة

علي عبد الله صالح:والله انا ما أدري لماذا يغزوا غزة؟..ولماذا يغزوا بسكاكينهم وقنابلهم الأبرياء؟وهل الغز مشتق من غزة؟
فلماذا الغز؟يا غزة؟لماذا الغز يا غزة؟

"تصفيق حار" القاعة

عمرو موسي في سره:والله أي كلام بيتقال..الله يخرب بيوتكم يا أخي

رئيس جمهورية مصر الشقيقة السيد محمد حسني مبارك


مبارك:انا مش عارف هم ليه بيعملوا كده؟..دخلنا في مفوضات وقلنا تسوية ..لكن برضه الضرب شغال..
وده انتهاك خطير جدا..وده كلام خطير جدا..لازم نهدي المنطقة ونحافظ علي سلام شامل عادل ..ونسوي النزاعات دي كلها ولا ايه؟

القاعة كلها في نفس واحد تغني:ولا ايه؟ولا ايه؟..ولا ايه ولا ايه؟..قشطة يا ابو موسي..يلااااااااا

رئيس الجلسة:احم..ياريت يا جماعة نحترم الجلسة دي قمة برضه..

معمر القذافي:يا اخي خلصنا يعني قمة الأهلي والزمالك

الأخ الرئيس زين العابدين..يلقي كلمته

تدخل فجأة موسيقي تونسية "اه يا زييييين..اه يا زين العابدين..يا ورد مفتح بين البساتين"

زين العابدين:شكرا شكرا..واللهي بما اني تونسي قالولي متنسي حرف القاف..وخصوصا اخواتي في القاف المغاربة..فحواري هيكون كالتالي..
انا قلقان..وقلق..وقرفان..من الوضع العربي..نحن والله ما عندنا في تونس حاجة قدر نعملها..اصلا محدش يسمع عن تونس ولا في طبق اليوم..
يمكن سمعتوا عن لطيفة التونسية بس..تاخدوها وتريحونا؟

الحضور كله "ان شا الله..ان شا الله ..ترجع ليا..ان شا الله..ان شا الله..حبيبي ليا"

رئيس الجلسة:يا جماعة مينفعش كده والله هلغي القمة

القذافي:يا اخي الغيها يعني قمة الاهلي والزمالك؟

رئيس الجلسة:جري ايه يا قذافي عايز ايه انت كمان بعبايتك ببابا غنوجك ده كله..متلم نفسك يا اخي..قارفنا بقمة الاهلي والزمالك بتاعتك ..

القذافي:انا المعمر الفاتح العظيم القائد الثوري يتقالي بابا غنوجك؟انت عميل..

رئيس الجلسة:اه يا اخويا عميل ..بس لفودافون..

مبارك:حلوة..واللهي حلوة..هاهاهاها

عمرو موسي:يا جدعان جايين نتكلم عن غزة..ومافيش حد جاب سيرة غير واحد وقال لماذا الغز يا غزة..يعني صباح التهييييييييييس

القذافي:انا هأقول خطتي وكلمتي..علي بركة الله

رئس الصومال:قول قول

القذافي:ايه اللي جابك هنا يا ابني..لا حول الله يا رب..صومال ايه بس ..يا عم روح احضرلك مجاعتين وتعالي بدل ما انت جاي تقرفنا

الرئيس الصومالي:احترم ذاتك..

القذافي:طيب ما علينا..انا شايف بذكائي اننا نلاعبهم ماتش ع الأرض..وفريقهم ضعيف واحنا ممكن نبهدلهم..ايه رايكم يا جماعة..
او نصور ليفني شريط فاضح لحد ما تقولنا "استر عليا "..واهو يبقي كده ردينا عليهم

بشار الأسد: تيييييييييت أم..اللي جابتك يا قذافي..

القذافي:اخرس يا كلب "من فيلم الواد محروس بتاع الوزير"

بشار الأسد:هو انا كل واحد هيقولي اخرس يا كلب؟..ده انا هاوريكم بقي

بوووم طخ..ايييييييييي...بوووووووووووم


مبارك:ابقي فكرني يا عمرو اخد بسكوت من اللي بالفسدق ده اصل جمال بيحبه..

عمرو موسي "في سره":عالم وكلاها والعة..وعالم لايصة

مبارك:بتقول حاجة؟

عمرو موسي: لا ياريس ابدا بالهنا والشفا..

رئيس الجلسة:طيب يا جماعة ناخد الغياب..

القذافي:غياب ايه بروح امك احنا في فصل؟

رئيس الجلسة:تاني يالا..هارميك برة واللهي..المهم..ملك السعودية مجاش لان الكبسة كانت تقيلةجدا..الطباخ الجديد لسه مش فاهم..انه بياكل خفيف خفيف..
يعني يادوبك خروفين..هو عمله خروفين ونص..الأكل وقف في زوره..وبالنسبة لأمير قطر بيلعب بلاي استيشن في احدي القواعد الأمريكية مع مراة بوش وفاضحنا..
وقائد حماس بعت رسالة صغيرة بيعتذر فيها بتقول "انا في ايه ولا في ايه بدين أهلك"..
وبالنسبة للبنان بعتوا نيكول سابا ومش فاهم ايه مغزي ده السياسي؟
ولكن هي شايفة ان الوضع في غزة "توتو ني"..واحترم رأيها جدا..

رئيس الصومال:والله ابغي اقول كلمة..

القذافي:يا عم كلمة ايه بس روح اشويلك عصفورتين ولا العب في الصحراء ايه اللي جابك هنا انت مش فاهم؟ده انتوا حتي معندكوش فريق كورة

الصومال:والله احسن ما يبقي عندنا فريق ويتقطع

القذافي:يتقطع ايه يلا ده انا ابني بخاخ الدم رئيس الاتحاد الرياضي..وعامل احلي فريق وممكن نسك مصر كمان بطل افريقيا لو عايز

مبارك:لا معلش بقي..كده غلط ع الزلط..

القذافي:يا عم انت مغرورين وممكن نسككم دلوقتي..

عمرو موسي:كل سنة يقولوا كده..وبتتهور وترجع تتعور..

القذافي:قال اهلي قال يا اعم احنا عندنا فرق برقبتكم بس الحظ

مبارك:لا إلا الأهلي..الأهلي فوق الجميع

القادة العرب:جميع مين ..ايه الجليطة دي متلموا نفسكم يا جدعان ..بدل منقلبها غم..

مبارك:ايه يا جدعان ده انا مبارك يعني لا قطر تهم ولا تونس تلم..يعني لو اتضربنا منتورمش وان ورمنا منتاكلش..
وان اتاكلنا منتهضمش وان اتهضمنا يبقي طعمنا علقم منتوصفش"من فيلم الكيف"

عمرو موسي:الله عليك يا مزااازنجي

مبارك:متلم نفسك يا عمرو..

عمرو موسي:اسف يا ريس

رئيس الجلسة:تؤجل القمة لأجل غير مسمي..وغطيني وصوتي يا اما..



الجرائد الرسمية العربية في اليوم التالي:

"اتفاقية للتعاون البناء بين القادة العرب"..وزين العابدين يصرح "لماذا الغز يا غزة!"

"احلال خطط جديدة لإحتواء الازمة الراهنة"


واخر عنوان يدل علي الحال العربي

"القادة العرب يصرحون:الوضع زوبعة في فنجان من داخل عنق الزجاجة المتحورة بين المطرقة والسنديان..وايقاف العصا في العجلة..
ووضع العصا للجزرة..وفي خلال اطر البوتقة المنبثقة من اتون الأوضاع المتردية علي الساحة ..لن يكون في الإمكان ابدع مما كان..لكي تشعل فتيل الازمة..
"

تمت

Monday, January 12, 2009

الجولدن جلوب

طبعا كلنا عارفين ان اهم جائزة عالمية هي الأوسكار..بس غالبا بتكون مبنية علي معايير معينة وهأبقي اشرحها ليكم بالتفصيل ولكن الا اراء الناس للأسف ..دايما الفيلم اللي بياخد الاوسكار عليه اختلاف والغالبية يقول ازاي ده يستحق وكده ولكن من الجوائز المحايدة جدا او المنحازة غالبا لأراء الناس ودايما الفيلم الل بيعجبك تلاقيه بيفوز بجوايز هي الجولدن جلوب وهي من اكبر الجوايز العالمية طبعا

ومن الجوائز الأخري

BAFTA Awards
Emmy Awards
Cannes Film Festival
Golden Globe
MTV Movie Awards
Teen Choice Awards



وهنتكلم عن الجائزة الاهم طبعا وهي الجولدن جلوب والمرشحين كلهم ومين فاز
وتألقت السنة دي كيت وينلست وخدت جايزتين وطبعا هي ممثلة قوية جدا ومن زمان مش بس تايتنك ولكن افلام كتير جدا من اهمها طبعا

Sense and Sensibility
واللي مشافش الفيلم ده بجد لازم يشوفه لأنه كان قوي جدا في التسعينات ومعروف ان فترة التسعينات كانت من اقوي فترات الافلام القوية والعميقة والقصص الجامدة جدا واللي افتقدناها شوية في الفترة الاخيرة


أفضل فيلم درامي :

The Curious Case of Benjamin Button (2008)
Frost/Nixon (2008)
The Reader (2008)
Revolutionary Road (2008)
Slumdog Millionaire (2008)

وطبعا الفائز هو
Slumdog Millionaire

ولكل اللي شاف الفيلم هو طبعا كان امر محسوم الا ان في ناس طبعا كانت بتميل ل
Revolutionary Road
ولكن بصراحة اللي فاز فعلا احق بالجائزة بكل المقاييس



أفضل ممثل دور رئيسي - دراما :

Leonardo DiCaprio for Revolutionary Road (2008)
Frank Langella for Frost/Nixon (2008)
Sean Penn for Milk (2008)
Brad Pitt for The Curious Case of Benjamin Button (2008)
Mickey Rourke for The Wrestler (2008)

واللي فاز هو
Mickey Rourke for The Wrestler
ولكن بصراحة من راي الشخصي هو طبعا العبقري
Sean Penn for Milk
ولكن طبعا ميمنعش الاداء المبهر في الفيلم الفائز



أفضل ممثله دور رئيسي - دراما :

Anne Hathaway for Rachel Getting Married (2008)
Angelina Jolie for Changeling (2008)
Meryl Streep for Doubt (2008)
Kristin Scott Thomas for Il y a longtemps que je t'aime (2008)
Kate Winslet for Revolutionary Road (2008)
واللي فازت هي

Kate Winslet for Revolutionary Road

وهي تستحق عليه كمان اوسكار مش بس جولدن جلوب


افضل ممثله دور رئيسي - موسيقي او كوميدي :

Rebecca Hall for Vicky Cristina Barcelona (2008)
Sally Hawkins for Happy-Go-Lucky (2008)
Frances McDormand for Burn After Reading (2008)
Meryl Streep for Mamma Mia! (2008)
Emma Thompson for Last Chance Harvey (2008


والفائزة هي
Sally Hawkins for Happy-Go-Lucky
وان كانت ميريل ستريب ادت اداءا عبقريا في فيلم ماما ميا وذكرتنا بالفريق العبقري "الابا"

وتحت هاسيب لكم كل الجوايز في المهرجان والافلام اللي فازت علي كل المستويات اخراجا واداءا وكل الجوايز


Best Motion Picture - Musical Or Comedy:

Vicky Cristina Barcelona


Best Performance by an Actor in a Motion Picture - Musical Or Comedy:

Colin FarrellIn Bruges


Best Performance by an Actress In A Supporting Role:

Kate WinsletThe Reader


لاحظ انها فازت بجائزتين ودي مفاجأة طبعا


Best Performance by an Actor In A Supporting Role:

Heath LedgerThe Dark Knight



Best Director

Danny BoyleSlumdog Millionaire

والجايزة دي طبعا طبعا طبعا


Best Screenplay:

Slumdog Millionaire


Best Original Score:

Slumdog Millionaire



ودي كانت اهم الجوايز وطبعا لاحظتم الفيلم العبقري
Slumdog Millionaire
وهو بياخد كل الجوايز دي وهو يستحق كل جايزة فيها اكيد

ومستنيين الاوسكار بقي اللي كيت وينلست هتتألق فيه واكيد الجايزة ليها ان لم يكن هناك رأي أخر






Sunday, January 11, 2009

أعجـــب الأقــوال

أغرب أقوال سمعتها في حياتي:



المشهد الأول:

المذيعة بتسأل فيفي عبده:وياتري انتي بتحبي تصميم الازياء من زمان؟
فيفي عبده: طبعا ده كان حلمي اطلع موديل
المذيعة:وماكملتيش حلمك ده ليه؟
فيفي عبده: يعني زي ما يكون كان ليا حلم اكبر اللي هو الرقص وربنا وفقني واللهي كأن ربنا وجهني للحلم ده عشان ابقي رقاصة مشهورة..


ومن امتي يا ست فيفي ربنا بيوجه حد لحاجات زي دي؟؟يلا اهو اي تخاريف بتتقال..


المشهد التاني:

المذيع بيكلم علي الحجار:وبتعتبر فنك ده رسالة طبعا وهو رسالة حقيقية
علي الحجار:طبعا الحمد لله دايما الكلام ده هو اللي بينفع الناس وربنا قال فأما الزبد فيذهب جفاء وأما ما ينفع الناس فيمكث في الأرض
والفن الحقيقي هو اللي بيمكث في الارض لكن الاغاني الهابطة دي تذهب جفاء..



"تفسير رهيب للأية اللهم افتح عليك يا شيخ علي"..يعني هيفاء بتذهب جفاء انما علي الحجار ومحمد الحلو فيمكث في الأرض

المشهد الثالث:

المذيعة لمفسر الأحلام:وهناخد اتصال
المتصلة:واللهي يا شيخ انا حلمت بترابيزة كلها حاجات محشية بسكوت محشي وكنافة محشية ومحشي كمان وكلت منهم حاجة واحدة ايه تفسيرك
الشيخ:اللهم صلي ع النبي وياتري يا بنتي كان محشي ايه؟
المذيعة:هي بتفرق؟
الشيخ:طبعا ده في حشو مشكلة..زي محشي الكرنب مثلا


لا تعليق..لا تعليق..لا تعليق


المشهد الرابع:

عزت ابو عوف:يا سلام الحمد لله جعلنا اداة للتبرعات دي
عمرو اديب:واللهي يا عزت انا حسيت كأن ربنا في الأستديو ساعتها واحنا بنلم التبرعات دي


طبعا هو نيته سليمة لكنها من اغرب الجمل


المشهد الخامس:

المذيعة:يعني انت فقدت اختك واخوك وباباك ومامتك كمان في الحريق ده..
الضحية يبكي:اه كلهم
المذيعة:وحاسس بأيه يا تري؟

"عندما تتجلي الحماقة بشخصها في سؤال واحد"


المشهد السادس:

المذيعة:وري المشاهدين بقي الجايزة
الضيف:انا بشكر البرنامج جدا وانا سعيد جدا
المذيعة:دي الجايزة 100 جنيه بحالهم..يا تري هتعمل ايه بالمبلغ ده؟


"هيشتري شاليه في حي السيدة..ويفتح مول ورا ترعة المريوطية..او يسافر دولة اجنبية مثلا نقول جمصة"


المشهد السابع:

قناة الجرس..
المذيعة:وبجد انا تعبانة النهاردة ومكلتش م الصبح عشان كده الحلقة مش في مستواها ..هأعتذر لكم لأني لازم اتغدي فعلا

"طيب بعد كده المذيع يعتذر برضه عشان يدخل الحمام..او لو وراه مشوار مهم ما هي سايبة بقي"


Thursday, January 8, 2009

نص حــالة..أم حالة عشق؟

عشقت هذه الأغنية مابين الإعجاب وما بين السكر بها..الي درجة جعلتني أتخيلني أرد علي كل كلمة فيها..أو هكذا أملي علي عالم الحلم..نص حالة ..في كل حرف..نص حالة في كل سطر ..جعلت منها حالتي الكاملة..وهكذا تخيلت نفسي في تلك الحالة
في كل سطر نص للاغنية وردي عيها..كما اشتقت أن احدث كلماتها من فترة..




اللي بينا نص حالة


أنا حالة عشق كاملة ..
رب للحب ..وقديس لسلام الداخل..
أمنية تتمزق كل مساء لتخلق أشباح وظنون..
ولا املك نص الحالة..
بل أملك ربع للحب ..وثلاثة أرباع الحالة أنتي..



"نص للحب اللي يمكن..نصها التاني استحالة "..

أنا أدم نصف الكون..
لا اعرف لغة كمال الكل..
لا اعرف إلا لغات النصف..أنا نصف تراب ..أنا نصف بشر..أنا نصف الجنة..
وإن كنت مخير في نصف للحب وأخر للمستحيل..
فأنا نصف الحب..وأنتي حواء..نصف مستحيل..



"استحالة..نرتبط أبدا ببعض "

لا يوجد تحت وسادتنا إلا الأحلام..
ولم يخلق المصير قرينا أخر غير الإنتظار..
فبدلا أن نجعل الإرتباط مستحيل..
تعالي نربط المستحيلان ونخلق فجرا لمعجزة..



"كل ما نحاول نقرب بينا بعد "..

إن كنت أحاول..
قربي منك هو قدر ..وقربك مني هو المحاولة..
ولذلك فالبعد فكرتك..
فهل سيكون الرحيل قراري؟


"زي ما يكون اللي بينا شئ غريب"

كما لون الأحلام..
نبض الجفن ورجف الحواس وارتعاشة القلب..
وكأني مرسوم من ريشة ملاك ..والأن تكتمل اللوحة..
وأنتي كقصيدة مترامية الأطراف..تصلبني بين قافية الحب وبحر الكلمات..


"لعنة الحب اللي بتذل الحبيب"

ذل الحب نعيم وسكون..
لعنات الحب سماوات وشموس..
ترانيم الحب محاولة أخري لخلق العالم..
ان كان العالم بين عاشقين..

"واللي بينا نص حالة "

ربما لكي ولكنها حالتي الكاملة


"واللي عشنا العمر نحلم بيه نلاقيه..بين ايدينا ولسه بندور عليه"

ويظل البحث عن كنز الحب المفقود..
في سفينة إحساس غارقة ..أو شمس لا يسكنها إلا الشروق..
ونظل نحاور أحلامنا ..
ونظلل أنفسنا بعناقيد خافتة للوجد..
ونبحث عن ما في داخلنا ..
في حيرة ليس لها نهاية..
الا الحب..


"زي كدبة عايشة جواها الصراحة"

تناقض أعجبني..
مثل العشق..
هو الحياة..ويعيش داخله الموت..
هو الألفة التي تعيش داخلها الفزع..
والسكون الذي يحتضنه الأعاصير..


"نص ضحكة..نص فرحة"

نصفي يعشقك ونصفي الاخر يتمناك..
إخلقي منهم عاشقا ..
كي يحبك ..وإصنعي منهم نفسا أخر تحبك..
إن كنتي لا تحبين نفسك بالقدر الكافي..
إخلطيهم بالشعر وبالأبيات..
كي تخرج منهم نص الفرحة..
وكل الحب..




"نص راحة !"

تكفينا..
تجمعنا..
والحب نصفنا الاخر..



Wednesday, January 7, 2009

"قلــب فــي بــلاد العــجـائب"

منفي في ملقي أنوثتك الغراء بأمر عيونك..
غدير يتساقط من أيدي ملائكة بيضاء ..ولا اهتم..
قالوا "أشرب منه"..
قلت"أخاف هواها"..
قالوا"بلل رأسك"..
قلت"أخاف الذكري"..
قالوا"ابعد عنه"
قلت"أخاف الفراق"..


حين تغادرين ذاكرة دمائي..
أستلقي علي رصيف الإنفصام..
لأنتظر أنا..
بنفسي..!


حينما نمتي فوق القصيدة..
ذابت الحروف..
وصرت اعيش كل يوم حرف..
"قلب في بلاد العجائب"..


عيناك هي الحد الفاصل..
بين"نصف بشر"..و"النور"..


الزمان يرتجل..
المكان يرتجل..
حتي اخترعا أجمل فكرة..
وجودك..


علي شواطئ "الكافيين"..
رقصتي علي الرمال..
والشاطئ بين عيوني..
وعيوني تتمني النوم..


أحلامي كلها مؤجلة..
لحين وصول أول حلم..


حينما دخلت بسجادتي المسحورة عينيك..
لم اعرف الكوابيس..
لاني تحممت بقدسية الياسمين ..
ومن ينام بين الزهر لا يعرف الا الأحلام..


الحب..رفيق دون طريق..
الهجر..طريق دون رفيق..


الناس بيوت مطمئنة..
فوق كوكب الحب..
في فلك الأشجان..


أريدك أن تري المشكلة ببساطة..
فهي مجرد حرف "عطف"..
أنا "و" أنتي..
انا أمسحه..وأنتي مصممة علي وضعه..


شربنا من كئوس الحب حتي هرب النادل..
وهربتي أنتي..
ومازالت الحانة تدق علي رأسي..



التقي عصفورين علي قلبي..
وتركا جناحيهما امانة هناك..
فطار القلب..
وأسدل الستار..



Tuesday, January 6, 2009

موقعة مصــر الجديــدة وغزة 2070

لم يتبقي بعد غزة عام 2070 الا مصر الجديدة بعد ان دخل العدو عبر المعبر واستولي علي امبابة والمهندسين ومدينة نصر
وكانت مصر الجديدة هي رمز الصمود والتحدي في وجه العدو..



سري جدا-غرفة القيادة:
القائد:هنعمل ايه يا ولاد في العدو ده وكل الجنود الكلاب مبرطعة في سيتي ستارز ومش عارفين نعملهم حاجة..

حمادة"سلاح جو": والله يا ريس العدو ده رخم اخر حاجة ولو لزم الامر نقصف سيتي ستارز..

وائل"سلاح مدرعات":انت بتقول ايه يا وائل ..إلا سيتي ستارز..ده بابا وماما يموتوا من غيره..مش كفاية فيلتهم في القطامية خدوها العدو..

القائد:ايه يا جيل عيال..من ستين سنة كده كانوا بيعملوا يفط ويقولوا الا رسول الله...ودلوقتي بتقولوا الا سيتي ستارز..

نادر"سلاح مع نفسه":والله يا ريسنا احنا نصور المعركة معاهم ونرفعها علي اليوتيوب عشان ماما تشوفني وانا شايل السلاح..

القائد:اخر انتخابات هي اللي ضيعتنا ..الشعب كله انقسم ع الأحزاب والخناقات اللي حصلت واستغل العدو الفرصة..منهم لله السياسيين بتوعنا..

حمادة: الحزب الناشونال كان لأول مرة يتغلب مع انه كان عامل رحلات لمارينا والعلمين بالكارنيهات ومحدش راح..

القائد:احنا لازم نكلم الريس "سمير"..

وائل:بالذمة في رئيس يبقي اسمه سمير؟

القائد:اتلهي علي عينك وشوف اسمك ايه وانت قائد سلاح..


واثناء المكالمة:

القائد:ايوه يا ريس ايه النظام؟

الريس سمير:انت مش بتشوف الجزيرة ولا ايه؟

القائد:ليه ايه حصل يا فندم؟

سمير:انا مبهدلهم تصريحات م الصبح افتح القناة وشوف..




"شريط الأخبار:
رئيس اسرائيل: هنقطعكم بعلقة موت..

سمير يرد علي رئيس اسرائيل: اخاف وأكش من ده الوش.."


سمير:ايه رايك؟

القائد: والله يا افندم هي التصريحات اختلفت شوية عن زمان..

سمير:سيبك م التصريحات دلوقتي ازاي هنحمي مصر الجديدة..؟

القائد:والله يا افندم انا شايف مبدئيا اننا نسيبنا م اليفط الحماسية لأنها ولا بتودي ولا بتجيب..
كنا علقنا علي سوق العبور"سوق العبور يا جماله ..معلمين وقفاله"..وبرضه اتغلبنا هناك..

سمير:يعني الشعارات باي باي..

القائد:هو وائل وحمادة قالوا عندهم خطة كويسة

سمير:اه ..العدو ده لازم يتربي ده حتي غزة بعد ما احتلوها سموها عزة علي اسم مراتي..

القائد:مش كده وبس يا افندم..

سمير:قصدك ايه اتكلم..

القائد:دول عاملين تاتو بصورة مراة حضرتك علي صدرهم..

سمير:تاتو؟؟يعني الحرب بقت كده تمام ..انا هأوريهم..انا عايز احسن واحد بيرسم تاتو عشان يرسم صورة مراة رئيسهم وعلي راسي كمان عشان تبقي واضحة..


وبدأت الإستعدادات في جميع انحاء مصر الجديدة بالعمل الجاد لحماية أراضيها من أقدام العدو..


حمادة: إنت هتأمن المنطقة دي ..وأنت هتحمي ضهرنا وهتقفل الكربة..

عاشور: يا افندم في ضحايا جديدة في سيتي ستارز بيقولوا قتلوا اتنين امن من اللي بيمشوا الناس من علي السور..

حمادة:واللهي أنا نفسي كنت هأقتلهم يا عاشور في يوم من الأيام..

عاشور:بس حضرتك خبير في الحروب يا افندم ازاي عرفت كل ده..؟

حمادة:انا كنت في الجيش المصري يا عاشور "من فيلم جوبا"..

عاشور:ما شاء الله يا افندم حضرتك قدوة واللهي..

حمادة:والراجل اللي هناك ده عايز ينضم للكتيبة ؟ يقدر يعني ؟ هاتهولي كده..

سالم:ان شاء الله يا افندم اقدر اعمل اللي عليا ..

حمادة: ايه مؤهلك يعني ..خدمت قبل كده في الجيش ولا ايه؟

سالم: عمري ما خنت واحد صاحبي "من فيلم تيتو"

حمادة:خلاص يبقي ع البركة..

عاشور:الريس زرع التاتو يا افندم وجاهز

حمادة:عظيم كده يبقي احنا في السليم دلوقتي العدو هنستفزه بالتاتو وهيهجم علينا..

وائل:احنا ودينا كل المعونات للبلاد المأسورة يا افندم..

حمادة:وديتوا البسكوت؟

وائل: ايوه يا افندم بالفانيليا

حمادة:و الزبادي؟

وائل: بالفواكه يا أفندم..

حمادة:وطبعا مانسيتوش التوست والمربي..

وائل: وزبدة الفول السوداني يا افندم..

حمادة:عظيم جدا

وائل: في واحد خارج من السجن يا افندم بيقو عايز يعمل حزب تاني..

حمادة:قوله عند أمه يا وائل..جتهم نيلة ملوا البلد..

وائل:احنا من ساعة ما فتحنا انشاء الأحزاب ع البحري يا افندم وكله هاص..

حمادة:اه يا وائل في حملة "حزبني يا " اللي عملناها كله قال يلا فرصة وضيعوا البلد..

وائل:يا افندم بيقولوا من ساعة ما عملنا خدمة "جندني ..شكرا" وانضم للجيش بتاع مليون فرد..

حمادة:ان شاء الله هننتصر ..دي مصر الجديدة يا وائل..رفعتوا التجهيزات ع اليوتيوب؟..

وائل: لا يا افندم قطعوا الكابل وبيقولوا سفينة رمت الهلب..

حمادة:تاني ..ده احنا بقالنا ستين سنة في نفس الكلام ده..

وائل: بس احنا حولنا لكابلات تانية وكل جنودنا بيرفعوا الملفات يا افندم وبيلعبوا العاب استراتيجي عشان الحرب..

حمادة:قولهم يهتموا يا وائل بلعبة
call of dutyانا اتعلمت منها حاجات كتير في حروبي..

وائل:أكيد يا افندم..


وفي تاريخ ستة ستة الساعة 6 دخل العدو بكل معداته وقطع جميع الخطوط الأرضية والكهرباء..

الجنود المصريين: النور قطع يا ماماااااااااااا..

حمادة: متخافوش افتحوا موبايلاتكم ونوروا بيها..انا عارف انكم بتخافوا من الضلمة بس ازاي متعلمتوش كده في الصاعقة..

الجنود:يا افندم احنا كنا بنتعلم في الصاعقة ازاي نقدر نعيش من غير انترنت ..وازاي نستحمل لو مافيش كاتشب ع الهمبورجر..ومات ستين في الاختبار ده..

حمادة:ربنا يستر علينا..

وائل: احنا الليزر عندنا عطلان يا افندم مش هنعرف نحارب ولكن عندي فكرة..

حمادة:قول فورا

وائل:احنا عارفين ان المقاومة كانت بتضربهم بالطوب وبيجيب نتيجة..احنا ممكن نقاومهم بالموبايلات اللي معانا..ونحدفهم بيها..

أحد الجنود"يرتعش": لا موبايلي لا مقدرش مقدرش..اهي اهي.."من فيلم الطريق الي ايلات"..احم "مش بالظبط يعني"..

حمادة: انت اسمك ايه يلا؟

الجندي: علي راضي الصغير يا باشا..من فيلم"البلياتشو".."الزمن ناتشو".."افاه حرقه بجاز" او اي كلام اهبل..

حمادة:وخايف تضحي بموبايلك عشان مصر..؟


فجأة تملأ مصر الاغاني الوطنية المستفزة للمشاعر..

"مصر يا مصر يا مصر يا ..الفرعونية..
مصر يا مصر يا مصر يا الطعامة ديا..
مصر يا مصر يا مصر يا ..بعيون شقية"


الجندي:انا تحت أمر مصر وانا اول واحد هأرمي موبايلي..



وبعد مية وخمسين سنة....

طفل:وبعدين يا تيتا وازاي انتصرنا في الحرب دي..

الجدة: كل الجنود رمت موبايلاتها والعدو مستحملش ده وكانت موبايلات تقيلة مش زي موبايلات اليومين دول..

طفل:وبعدين؟

الجدة:استدعوا كل الوحدات اللي في سيتي ستارز وجت فورا وبكده قدرنا تاني ناخد سيتي ستارز لينا ولأرضنا..

طفل:وهم عملوا ايه؟

الجدة:هم خدوا مصر الجديدة ولكن غلبناهم في المهندسين وفي امبابة وفي شبرا وقطعناهم في مدينة نصر..
وفجأة انقلبت المعركة كلها وخدنا كل الاراضي عندما دخل جنود السيدة حاملين يفط"حاسب يا عم حاسب يا اخويا حاسب يا شقيق.انا برضه من السيدة واعرف كل الأفئدة"

الطفل: وفعلا كانوا عارفين كل الأفئدة؟

الجدة: مش دي النقطة يا غبي..المهم كانوا عددهم كبير جدا وقدرنا ناخد حتي مصر الجديدة وخدنا منهم اسري..

الطفل: وجنود المول اللي بيمشوا الناس من ع السور؟

الجدة:ل دول احنا قتلناهم بايدينا ..لانهم مستفزين جدا..



ومن نصر لنصر دايما يا مصر