Wednesday, October 29, 2008

برنامج جديدجامد

البرنامج ده بيجمع كل برامج الشات والفيس بوك في حتة واحدة ..نزله من هنا:

http://www.digsby.com/?utm_content=old&utm_campaign=nbO&utm_medium=nbO&utm_source=nbO

كلمات من زمن فات



بعض الكلمات التي كانت تستخدم من فترة لم يعد لها اي استعمال الأن وإن إستعملها أحد الأشخاص فيكون إستعمال خاطئ ولم يعد هذا هو الوقت الصحيح لها مثل:


قطة مغمضة: كلمة كانت تستخدم لوصف نوع معين من البنات انقرض منذ عصر الديناصورات ولكن القطة الأن لها سبعة أعين وسبعة أرواح ..


بنشتري راجل: وهي كلمة أعيد إستخدامها بشكل أخر مخالف تماما وهي "إحنا بنشتري ونبيع في راجل " ..


متفتحش عين الولد علي الكلام ده: كلمة بريئة جدا بيستعملها أب وصديقه بسذاجة يحسدون عليها امام الشاب الصغير اللي هم فاكرينه الملاك الحارس وهو بيقول لنفسه في بالونة فكرية "هاهاها متعرفوش حاجة هاهاهاها"..


متاكلش حاجة وحشة من برة : كلمة تم القضاء عليها عندما فسد اللبن والجبنة الرومي واللانشون والفراخ جالها برد حتي فايه اللي فاضل برة وحش مش موجود جوة؟ معدتش فارقة كل يا ابني من برة زي ما انت عايز..


للأطفال " متكلمش حد غريب " : كلمة مالهاش اي لازمة فنحن اربعة وعشرين ساعة بنكلم ناس غريبة سواء علي الانترنت او علي الموبايل او في الشارع ..يعني الراجل بقاله سنة دلوقتي كل يومين يكلمني يسألني هاني الكردي موجود واقوله النمرة غلط لحد مقربنا نبقي اصحاب..مش عارف ليه هو مصمم ان دي نمرة هاني الكردي ومين هو هاني الكردي انا مش عارف


الفساد : كلمة قدمت قوي وفقدت قيمتها من كتر استعمالها كانت زمان كلمة تهز لكن دلوقتي بقت عبارة عن "وضع افتراضي"..


أكمل نص ديني : كلمة كان بيقولها الناس زمان عن الجواز لكن اتضح انها كلمة غريبة جدا في هذا الزمان ..يمكن تكمل نص دينك لكن بتخسر تلات اربع عقلك..لأن الجواز ده زي أكنك واحد رفيع قوي ورايح تلعب مع مصارع سومو ..


انت مش عارف انت بتكلم مين؟ : كلمة مستهلكة جدا واجابتها المستهلكة جدا :هتكون مين يعني؟..وغالبا ما يسأل شخصا ثالث هم مين دول؟ فالبلد مليئة بالشخصيات الهامة حتي اصبح الموضوع غير مهم..


البلد دي فيها حكومة وهاخد حقي: كلمات بريئة جدا لشخص كتاكيتي خالص سكرة عايز ياخد حقه في شئ مهم بالاستعانة بالحكومة .."لا تعليق"


ضل راجل ولا ضل حيطة : كلمة لستات الزمن القديم من ايام الديك ما كان بيكاكي الفجر دلوقتي الديك عنده انفلونزا فبيصحي علي ميعاد المضاد الحيوي..

Monday, October 27, 2008

أفضل الفيديوهات

هنا أفضل الفيديوهات بالكلمات ..منتقاة من أفضل الكليبات تحقيقا للنجاح عبر العالم وأجمل الكلمات والألحان

http://onlyvideoshere.blogspot.com

شرفنا بالزيارة

Sunday, October 26, 2008

فيصل القاسم بيتجوز يا رجالة










دخل فيصل القاسم لأبيه قائلا: بابا أنا لازم أخطب بقي لتحقيق الأمن والإستقرار في المنطقة

أبوه: طبعا يا إبني إنت بس شاور وأنا معاك علطول..



وفي مشهد عاطفي علي النيل:



فيصل: اليوم سأذهب لأبيك لأطلب يدك..ما ردك؟

العروسة: هو إنت بتتكلم كده علطول ولا ده نتيجة زعل؟

فيصل: زعل؟..غير صحيح ..غير صحيح..

العروسة: يا ابني اعدل لسانك بقي الله يخربيت البرنامج ده

فيصل: دعينا نتطرق لنقطة أخري ..أنا أحبك جدا..ما تقييمك لهذه المنهجية الفكرية؟

العروسة: تقييمي ان مافيش عرسان واهو اي حاجة والسلام..




وفي بيت العروسة:



والد العروسة: يا ابني احنا بنشتري راجل وعشان كده هنعوز مهر 100 الف حنيه بس..

فيصل محدثا والده : هو يستغل الأوضاع ويقول بان المهر مائة ألف ..كيف ترد عليه..سأعطيك المجال

والد فيصل: واللهي يا ابني انا شايف انه راجل دني وخسيس..

فيصل: الجو يزداد سخونة والوضع يتصاعد ما ردك علي هذه الإتهامات ..في عجالة ..أمامك عشر ثوان..

والد العروسة: الله يخربيتك انت وابوك عيلة مجانين صحيح بالذمة رانيا ازاي موافقة علي جوازة الهم دي..

فيصل: رانيا يريدون زعزعة الإستقرار وهز جحافل المشاعر بينا ..أمامك عشر ثوان ..سريعا أختي الفاضلة..

رانيا:أختك الفاضلة؟ ..والله عندك حق يا بابا ياريت تورونا عرض كتافكو..وبلاها جواز خالص..ونلتقي بعد الفاصل يا خفيف..



خرج فيصل مهموما الي الشارع محدثا نفسه وفجأة وجد زوجان علي الكورنيش في مشهد غرامي فإقترب ليسأل:


فيصل: أخي الفاضل ..في زمن تفشت فيه المشاعر المسمومة..وفي عصر ضالة الفكر وتغييب العقول ...كيف تجد موقفك من زوجتك بعد سنين من الزواج..؟

الزوج: لا حول الله ..هما بقوا بيشحتوا كده دلوقتي؟..خد يا ابني الربع جنيه ده واخلع من هنا..

فيصل: عزيزي انا فيصل القاسم من الجزيرة ولست شحاذا..

الزوج:معقول معلش يا استاذنا العتب ع النظر بس دخلتك كانت حامية شوية..

فيصل:هل تحب زوجتك؟

الزوج:طبعا ده هي الخير والبركة..

فيصل: إجابة غير منطقية لأن البقرة الحلوب أيضا خير وبركة ورغيف العيش خير وبركة فما ردك؟

الزوج:البقرة الحلوب؟ هاهاهاها والله يا عمنا انا مش فاهم انت عايز ايه بالظبط

فيصل: كام مرة قالت لك لا علي طلبات هامة؟

الزوج "يفكر": واللهي هو.......

فيصل:بأي معدل تطلب منك الأموال شهريا وتتستر تحت قناع البراءة..؟

الزوج: يعني ال.........

فيصل: هل لاحظت بعض أفعالها الغريبة التي لم تفعلها قبل الزواج؟

الزوج: يا عم انا حاسس اني في اعلان "كيف تكتشف ان في بيتك مدمن" في ايه يا عم دي مراتي يعني بحبها وبتحبني ..اخفي بقي برجلت دماغنا..

فيصل: غير صحيح ..غير صحيح..

الزوج: ايه ده كمبيوتر ولا انسان تحب اقوم اوريك ايه هو الصحيح..؟

فيصل: واكون ممنون يا عزيزي..لو اتضحت طلاسم تلك القضية..

الزوج: خد دي ..ودي..

فيصل: أي ..أي ..رفقا يا عزيزي ..رفقا ..

الزوج:انت هتعمل زي أخوك المجنون ..رفقا ايه وبتاع ايه وجعتولنا دماغنا عيلة مجنونة صحيح..

فيصل: لاحظت اختلاف سمات الضرب عن عصر مضي ..ما تعليقك..؟

الزوج: دي هتفهمك كل حاجة ..دي بوكس من حلاوة زمان بقي..خددددددد

فيصل: ااااااااااااااي..غير صحيح....


Monday, October 20, 2008

"s club 7"...never had a dream come true

قديم شوية بس جبار

الحاج صاحب السوبر ماركوووووو







الفرق كبير قوي بين "السوبر ماركت" و"السوبر ماركو" بالفلاحي ..واللي تحت بيتنا ده طبعا "سوبر ماركو"..يعني أما أروح مترو ماركت أجيب شوية حاجات فده مكان منظم ومحترم وعنده كل حاجة والأهم بقي إنه "بيفهم"..

يعني السوبر ماركو اللي تحتينا ده وعلي سبيل المثال:


أنا : في أيس كوفي يا حاج؟..
الحاج: إيه؟ مسكوفي؟

ومش عارف يعني ايه مسكوفي بيتهيألي ده بط باين مش قهوة خالص..



أنا : والنبي يا حاج عندك بيبسي؟
الحاج: لأ
انا: طيب ابعت 6 بريل والنبي


النتيجة إن الحاج بعت 6 بريل بتاع تنظيف الأطباق..طيب هل يعقل ان ده بديل للبيبسي؟يعني لو كان اللي بيتكلم مجنون خليك يا حاج عاقل..
يعني البريل بديل للبيبسي؟ معني كده ان سمنة الهانم بديل لشاي العروسة واهي كلها منتجات وربنا يزيد ويبارك..



انا:والنبي يا حاج إبعتلنا لتر بيبسي و6 أكياس شيبسي


الحاج بعتلنا لتر بيبسي والحمد لله بس معاه 6 كانز بيبسي..طيب يا حاج ما انا جيبت بيبسي معقول هنشرب بيبسي لتر وبعدين نحلي ببيبسي كانز ماهو بالمفهومية كده
لو صوتي مكانش واضح يبقي حاول تخمن حتي..يعني مينفعش اقولك ابعتلي علبة لبان وبعدين بجنيه لبان فرط ..غريبة شوية


الحاج زمان كان بيبيع سجاير وبطل مرة بابا بيطلب من عنده سجاير قالو ابعتلي علبة ميريت ..الحاج جبهاله كليوباترا وده ليه بقي ..اصل الميريت مجتش النهاردة..
يعني ايه مجتش..طيب راحت فين ..طيب اما تيجي ابقي سلملي عليها ..وايه علاقتها بالكليوباترا يا عم الحاج ..كوكو الضعيف ايه علاقتها بالميريت؟..هتجننوني..



*في السوبر ماركت في حاجة اسمها كاشير ..عند الحاج بقي بيقعد يتكلم في التليفون ويلطع الزباين بالساعة واقفين ..

*في السوبر ماركت بيطلعلك ورقة حساب ..عند الحاج بيطلع ورقة جرايد ويكتب اي كلام ويديني اي كلام اديله خمسين يديني 70 ويقوللي هو انت مش دافع مية؟

*في السوبرماركت بتاخد اللي انت عايزه عند الحاج بيبقي في عنصر المفاجأة دايما وده رائع..

*السوبرماركت بتاخد اجود المنتجات قدامك ..الحاج بينصحني دايما بأغرب المنتجات ويقولي لسه جاية مستوردة ويطلع طعمها أخص يع..عايز يخلص البضاعة الغريبة وخلاص


وانا من موقعي هذا فوق السرير بقول ان الحاج مسئول عن انهيار جيل كامل من الشباب ..وعرفت دلوقتي يعني ايه كلمة "قشطة يا حاج" المتداولة في الشارع..
وكأنها متفصلة ع الحاج واللهي ..يعني لو افترضنا اننا في اوروبا مثلا أكيد مافيش حاج..من النهاردة مافيش حاج ..
كل امنيتي بس ان السوبر ماركو يبقي سوبر ماركت..وربنا يجعله عامر ..متتفضلوا معانا ..



Thursday, October 16, 2008

مؤشر أم عمر

"هي ليه عيشة الكيلاني مقصرة في أعمالها؟ "...سؤال مالوش لازمة ومالوش إجابة ..فيه أسئلة كتير بالنظام ده لبعض المطربين والممثلين المظلومين اوي ع الساحة أو اللي مالهومش لازمة ع الساحة أساسا..
يعني عائشة الكيلاني ليه اتشهرت فجأة وليه اختفت فجأة ..وهل في موقع معين ع النت لمتابعة أخبار عائشة الكيلاني؟..مستحيل..

سؤال تاني برضه "يا تري انعام سالوسة هتقدملنا ايه السنة الجاية..وفين الست بتاعة اعلان حلاوة الرشيدي الميزان بتاعة الواد كان عنده حق ؟ "

وبعض الأسئلة الغبية اليومين دول بقي في الجرايد تقولك "من قتل أسمهان؟" ودي طبعا من سلسلة "من قتل سعاد حسني ؟" ومن قتل يحي المشد ؟ ومن قتل مروان ؟ وغيره..

الجرايد بتكلم نفسها وبتقنعنا يعني ان عندها المحقق كونان اللي هيعرف يجيب اللي مجبيتوش الاسكوتلاند يارد ..وطبعا كالعادة الاسكوتلاند يارد متأمرة علينا عشان احنا مصريين ..والوهم اللي اسمه"ايجيبشن هيبوسني هيه"
الاسكوتلاند يارد متأمرة علينا وعايزة تقتل سعاد حسني لأنها كانت بتنافس عندهم انجلينا جولي ..وكانوا عايزين يقتلوا مروان لأنه موقف لندن علي رجل ..رغم ان تقريبا تلات ارباع انجلترا متعرفوش..وطبعا اسمهان قتلوها عشان حلاوة صوتها ..واي هنتريش محلق..

كل ميت كان له ميزة معينة والا ليه اتقتل؟..ده الكلام المعتاد..طيب السادة الصحفيين اللي دلوقتي في 2008 عايزين يعرفوا مين قتل اسمهان نقدر نقولهم كما قال هيثم دبور
a 7 a

يا عم ده الشاهد من دول عجز من عشرين سنة واكيد معظمهم مات اساسا هتسأل مين وبعدين لو عرفنا من قتل أسمهان هنتصرف ازاي ؟يعني هنقبض علي حد معين ولا عشان ننفي التهمة عن ام كلثوم مثلا ولا ليه بالظبط؟

وليه متكونش حادثة عادية اللي ماتت فيها هي او غيرها ليه دايما حاسين بالمؤامرة ..يعني اسمع دي :

واحد بيقول في التليفزيون ان مرتضي منصور ده مؤامرة من الحكومة عشان يلهوا الناس.."من الهبل ما قتل"
واحد اجمد منه بقي بيقولك ان الازمة المالية العالمية والانهيار الاقتصاد ده مؤامرة عشان يدمروا اقتصاد مصر


بجد ليه فكر "الدالي" انتشر في مصر ودي بقت المرحلة "الدالية" كل العالم متأمر ضد الدالي عشان مصري وكده ..وكل العالم بيفلس شركاته وبنوكه وبيسرح موظفيه وبيعلي الضرايب والناس بتنتحر ياتري كل ده عشان الفراعنة؟ "يا تري مين وراهم؟"
وكأن المصري بيطلع يخبط علي صدره ويقول بالعافيه كده "من النهاردة مافيش عالم..انا العالم" وهو محور الحدوتة دي كلها ..سياسيا ورياضيا واقتصاديا وفنيا..

يقولك في الاقتصاد لا ده احنا عندنا احسن اقتصاديين في العالم يا عم ..وفي الطب لا ده احنا عندنا اكبر دكاترة في العالم يا عم ..واحنا في الاقتصاد كل افكارنا وكتبنا الاقتصادية معظمها مرتبط بأفكار ماتت من زمن وكلها روايات تاريخية بدون فكرة جديدة..

ووهم الطب المصري انا شايف انه نفس وهم القدرة الجنسية المصرية كلمة اتقالت من عشرين سنة وصدقناها ومافيش اي دليل وكله كلام فارغ ..يقولك زمان المصري من اقدر الناس جنسيا وده كلام مردود عليه بنسب الضعف والعجز الجنسي اللي عندنا واللي هي كبيرة جدا علي مستوي العالم ..

والاطباء المصريين اللي بنحكي عنهم من عشرين سنة هم نفسهم لحد دلوقتي برضه مبنقولش الا مجدي يعقوب واتنين كمان منهم غنيم ..يعني اللي احنا فرحانين بيه ده كارثة..فضيحة..اتنين بس من كم كل الأطباء اللي في مصر دول اتنين عالميين ولا عشرة يا عم يعني رقم مخزي جدا ..وبرضه بنقول لنفسنا عندنا احسن اطباء علي مستوي العالم ..
عايز اشوف تقرير واحد من عند الغرب كله يقول "الاطباء المصريين ..يا سلام ده احلي كلام دول عباقرة العالم ..ده هم اللي علطول بيمدونا بالجديد في الطب..من غير نظرياتهم مننفعش ببصلة"..وخدنا نوبل في كذا مجال الا الاقتصاد والطب ومش هناخد ..

طيب سيبك من المجالات دي طيب كاس العالم اللي هيجيلنا في تاكس ده ايه نظامه ؟مؤامرة برضه؟وبرضه وكالعادة هيقولك يا عم واللهي ده اجمد جيل جه مصر ده احنا لو موصلناش لكاس العالم كده مش هنوصل..وهييجي جيل اقوي وبرضه مش هنوصل لاننا بنقيس القوة علي نفسنا مش ع الاقوياء ..
احنا ابطال افريقيا عظيم بس العالم مش مهتم ..ابطال افريقيا بيعملوا ايه يعني مسمعناش عنهم ولا في طبق اليوم حتي ..


معلش طولت عليكم بس اللي نرفزني قوي في الاساس الراجل بتاع المؤامرة الاقتصادية ده يا عم خلي الطابق مستور بقي ..اقتصاد ايه بس اللي انت بتتكلم عنه ده بيفكروا يغيروا اسم مؤش البورصة ويسموه "مؤشر أم عمر"

Wednesday, October 15, 2008

وجهان للنهار




البصر هناك..يتفــتح كالزهـرة ليغـلف أوراقـه بكئـوس مـن خمر النظـرة..
ويعــود بحـكمة..


"" لاعاصمَ لَكُمْ منْ العِشْق ,فالعشقْ وصَالْ دونَ إتصَال,ومؤانَسَة ُ دونَ مُجَالسة ْ ,فَاعْلَم أنَ الحُب فيكَ البَصيْرَة ,وإنما ْ أروَاحَنا ْ له ُ مَلاذ ْ ,فمنْ امتن به فقدْ فازْ ,
وإعلم إنْ عَشقت ْ إن الله إصطفاكْ َ, ليتمَ نعْمَته ُ عَليك َ كما أتَمها ْ عَلي سوَاك ْ ,ليصْبح جسدَكْ مُخضَرا ً كجذور ِ الحُبْ ,ويُصْبح َ وطَنَك ْ وَحَواسَك في دَاخِلَ قَلبْ,
فتحمدَ الَلهْ عَليْ بَصر ٍ يتَأمَلْ,وَوجه ُ يَتَجَملْ ,وقَلب إليْ بداية ْ ,وعّذاب بلا نهَاية ْ,فقد سَكَب الحُب عليك َ كأسه ُ,لتصبح َ صُبحا أبيض,وأمَلُ أوعَدْ,وليصبحْ إنْتصارَك إنتصَاره , وَ هَجركْ إنكسَاره ,
ليَنضح في وجهكْ كجَمال طلُوقْ , وإن نمتْ يتمَ عَليكْ ليلُ خَلوقْ ,ويخلقْ من قُلوبَكم فضَة وَعَسجَدْ , وَمنْ أرْواحكمْ عَنبرُ يَتجددْ ,ليخرجْ من سعادتكم ْ جَنة َ غَيركمْ , ويضْرب قُلوب أخْري بسَهْمكم ,
وليصبحْ لكل عاشق ِ منْكُم وَجهَان للنَهارْ , حين يَطلُ عَليها وحيْنَ تَطلْ عَليه ,ويُصبحَ لكُل عاشق منْكُم وجْهَان لليلْ ,حينَ يَريْ القَمَر بعينيهَا وحينَ ترَي القَمر بعَينيه ,فإن خَرجَ لأَرض سَارتْ تلْكَ الأرْض إلَيهْ ,
وإنْ نَامَ عَليْ نَهْر غَطي النَهْر جُفونَه بيدَيه , فإنْ رَأيتمْ عَاشقا ً فتَيمموا ْ بهْ , وَ إعشَقوا ْ عشْق َ مُودعْ , وإتركُوا أروَاحكمْ لنَهار مُبدعْ ,فالعشْق لا يأتيْ مَرتين , وإنْ أتيْ فأيهُما أصْدق , أنتَ أم هُو؟ ,
فالحبُ مرة لا تَليه كَرة , حلم مُلابْ ,يضْنيه العَذاب ,فإنسي فيهْ أَمْسَك ,وأُخْرج مُمسكا قلبكْ لشَمْسَك ,,فالحٌب قَادم ""




وتعود النظرة مورقة جدا كغابات العشق ومازلت أشرب من كاس نظرتها ولا أنتهي..



Sunday, October 12, 2008

العباس ونــورة الأمــورة..السياسة بشكل أخر



شات يوضح بعض أحوال الإخوان المسلمين.."لست مسئولا ان كانت بعض الاحداث والأشخاص تشابه الواقع"




العباس:السلام عليكم..

نورة_الأمورة:وعليكم يا حبيبي..

العباس:محمد موجود؟

نورة_الأمورة:احنا في شات يا حبيبي مش علي كبينة تليفون..

العباس:اه انا أسف..طيب نتعرف

نورة_الأمورة:معاك نورة برنسيسة البرنسيسات وجميلة الجميلات

العباس:تحيا مصر

نورة _الأمورة:اه انت من دول بقي بتوع السياسة؟

العباس:انا اخوان والحمد لله

نورة_الأمورة:اه انت اخوات مسلمين؟..وانا حزب وطني

العباس:اخوات؟ لا ده انتي مدلعاهم شوية

نورة_الأمورة:وعايز محمد في ايه دلوقتي الساعة 2؟

العباس:مش مشكلة دلوقتي ..انتي عندك كاميرا؟

نورة_الأمورة: لحسن محمد يصحي..

العباس:ليه هو احنا هنعمل ايه؟

نورة_الأمورة:امال بتسأل ليه ؟

العباس:انا هقنعك تبقي معانا

نورة _الأمورة:لا ما بحبش ابقي اخوات مسلمين..انا بحب اوي لبان تشيكلس ..

العباس:هنسمحلك بالتجاوز ده..

نورة_الأمورة:وبشوف ميلودي وبخرج بروح وسط البلد كل يوم تحرش ان شاء الله..

العباس:يا ساتر يا رب..ممكن نسمحلك بميلودي..

نورة_الأمورة:ايوه بس ده انا حاطة مواعيد التحرش السنوية علي الكاليندر عندي علي الموبايل..

العباس:طيب وبالنسبة للملابس؟

نورة_الأمورة:لا متقلقش انا بلبس كويس..يعني محجبة

العباس:طيب الحمد لله ..طالما محجبة يبقي مش مهم ..

نورة_الأمورة:انتوا كده فعلا..شعارات فاضية

العباس:لو سمحت يا اخت نورة مسمحلكيش

نورة_الأمورة:يعني التحرش ممكن انما الحجاب لازم يا اخي اتلهي..انت عندك كاميرا؟

العباس:لحسن اختي سلمي تصحي..

نورة_الأمورة:ليه هو احنا هنعمل ايه؟

العباس:مش عارف..فهمت حاجة تانية

نورة_الأمورة:لأ انا بسأل بس..

العباس:عموما النظرة الأولي لي فممكن استخدام الكاميرا..

نورة_الأمورة:حلو اوي التوظيف ده ..مسخرة

العباس:توظيف ايه؟

نورة_الأمورة:النظرة الأولي..ودي مدتها قد ايه..ولا ما اتحددتش بالظبط؟

العباس:لحد ما احني راسي..

نورة_الأمورة:وحد هيحني راسه برضه؟..بس لحسن سلمي تصحي..

العباس:تصحي مش مهم ..هاقولها بشوف انتمائك الحزبي..

نورة_الأمورة:ده علي اساس اني كاتبة"فكر جديد" مثلا ك تاتو

العباس:مش مهم انا بس بطلع لأني بحب اشوف ثقافات مختلفة..انا عضو في حوار الثقافات

نورة_الأمورة:طيب كلم محمد بقي..

العباس:محمد؟ازاي؟..

محمد:ايه يا عباس بتقول ايه لأختي؟

العباس:ابدا يا محمد..انا كنت عايز اعرف هي معانا ولا معاهم..

محمد:تصدق يا اخي انا نفسي هبقي ولا معاك و لا معاهم..كلكوا صنف واحد

العباس: محمد متفهمنيش غلط

محمد:عندك كاميرا؟

العباس: ليه هنعمل ايه؟

العباس:الو..الو

مـــعــادلات

نور الشريف+تيسير فهمي=مستر إكس

إدوارد+سامح حسين=أزمة قلبية

علبة لبن +الحزب الوطني=صحتك في الدولة ديا

عامر منيب+أغانيه=جريمة الصيف الماضي

الشعب+فودافون+الحكومة=رسالة"إسرقني..شكرا

نجوي كرم+فلة+أحلام=ليس كل ما يلمع ذهبا

عبلة كامل+حسن حسني=ليس بالعبط وحده يحيا الإنسان

سعد الصغير+أمينة+بعرور=إطلبوا الهلس ولو في الصين

الشعب-الحكومة=بضاعة بلا لص

حسني مبارك+فودافون=نظام مدة أطول

حسني مبارك+فودافون=نظام إتكلم وإتحكم

حسني مبارك+موبي زون=غير نظامك

الهام شاهين+مصطفي فهمي+قصة الأمس=الحب في زمن الكشري


Saturday, October 11, 2008

مــــوســـيــقَيْ مــــنْ مــاءِ وَظــلْ

(1)
حينا ً سَتُولدُ وجْعَتي..
أ َثَامُ زَهْرة..
وتَنامُ منيْ دَمْعَتي..
كالمَوتِ مُرة ْ..


(2)

وأظلُ أَحْتَرفُ الظِلال..
فيْ ضِلْعِ شَمْس خَطيْئتِي..
لتَهيمَ بيْ أُنثَيْ القَمَرْ..
حيْنَاً ويَشْرَبَنيْ المَطَرْ..
لأَقُولَ أَنْتي حبيبتيْ..


(3)
وأظلُ اَفْتَرشُ الجُنونْ..
وأَرَاهاْ منْ خَلْفِ المَراياْ..
فَأحبُ نَفسيْ مَرتين..
أُلقيْ إليهاْ زَهْرَتينْ..
بالله ِ كَيفَ هُوَ الغُروْر..
يَبقيْ إنتحَاراً في سوايَاْ !


(4)
وأظلُ فيْ لَحنيْ الجمِيلْ..
خَلفَ الأغَانيْ المُمكنة ْ..
لبَقايا ْ نَفس ٍ تَرْتَحلْ..
وبَقايا عِطْرٍ يَغْتَسِلْ..
فيْ سِرها..
في سِحْرِها..
وبَقايا عَيْنُ مُدْمِنة ْ..


(5)
والكُحلُ يُدْنيْ قُطوفَه ُ..
ليصَافحَ الوَعْدَ الجَميلْ..
فتَموتُ مني ْ المُعجزاتْ..
ويَغارُ منهاْ المُسْتَحيل ْ..


(6)
وأظَلُ في لَحنيْ الجمَيل..
موسيقيْ منْ ماءُ وظلْ..
أشْجَارُ جَناتُ حسانْ..
أغْرودةُ كَف الزَمانْ..
ترضيْ بأَغْنية ُ وطلْ..


(7)
وأَحلُ أحْجيَة القَمرْ..
كيْ تَسْتَبيحَ دمي الوُرودْ..
وأحلُ أَحجية الشَجرْ..
فيْ كل أَرض ٍ مظلمة ْ..
وبَقايا شعرُ زائلة ْ..
فيدثر ُ القَلمُ الوجود ْ..


(8)
تغشيْ ضَفائرها الَقَمرْ..
فأغيبُ في حِلم ِ المغيبْ..
وأعودُ قيصَرها ْ الحَبيب ْ..
والدَمعُ يبقي الأحجية ْ..
بين العيون البَاكية ْ..

Tuesday, October 7, 2008

قــصــيدة البـــانجــــو وقـــطـــع المـــانجــــو


هذه القصيدة الفائزة بجائزة الدولة التحقيرية ل 2008 ..ويشرفني الحصول علي الجائزة كأسوأ ما أنتجته الأقلام العربية..فلقد فازت ايضا بعدة جوائز مثل جائزة الأورو متوسط للهبل في الجبل..وجائزة مهرجان عنتر ولبلب والسبع اقلام..وجائزة منتجع دنديط السنوية..ألف شكر ..ألف شكر..
ارجو ان تقرأوا القصيدة باتقان لأنها قصيدة نادرة..
وارجو ان تتركوا ارائكم في هذه القصيدة الحائزة علي كل هذه الجوائز..


(1)



بعض الشباب يفضلون البانجو..فلماذا أنا أكتفي بقطع المانجو.!!


(2)
ولماذا يأتي اليوم بعد أمسه؟
وان كان الفرريزر باردا..
فلماذا لا يجمد نفسه؟


(3)
وان كانت الولادة ..
تحتاج لعملية..
فكيف تولد الكهرباء..
بدون حتي قيصرية..


(4)
ولماذا يسري دائما في المش دود..
ولا يعود؟


(5)
واذا كان الدود في المش..
وان كان لا يسمعنا الذباب..
فلماذا نصيح في وجهه "هش"؟


(6)
واذا كانت الأرض ليست ساخنة..
فلماذا يقفز "الكنغر"..
مع انه يستطيع السير..

(7)
ولماذا ترفض امي دائما ان نشتري بطريق..
مع اننا نمتلك السلاحف..



(8)
وما هي علاقة شلل الأطفال ب"الثلاثي"..


(9)
وان كان العقل السليم في الجسم السليم..
فهل "هيفاء وهبي" ارجحنا عقلا؟


(10)
ولماذا ينتصر دائما مازنجر..
ويقول ابو الغضب انه الأذكي؟



(11)
وان كنا لا نهتم بقشريات الأمور..
فلماذا نستلذ بقشر كنتاكي وقشور المانجو؟


(12)
ارجو من الدولة ان تمنحني الجائزة..
لأفضل قصيدة فائزة


(13)
فأنا في السياسة خبير..
وفي علومها قدير..
فأنا أول من اكتشفت..
ان ..
حمدين صباحي..
أخا لبوحة الصباحي..
وصبح صبح..يا عم الحاج..

"نص حالة" ..حالة عشق صوفية كاملة



جاءت مذهلة.. جاءت معبرة..جاءت كما تمنينا أن تأتي منذ سنوات..أتحدث عن "الأغنية الكاملة" ..كلمات ولحن واداء..

من طراز المستحيل ..من فصيلة البنفسج والزعفران..

صوت أصالة في هذه الأغنية بالذات لا يشابهه إلا "الحلم" ..ولا يقترب منه إلا "الكمال"..
إعصار من النسائم..برد كالحريق ..إحتلال كامل لكل خلية إحساس..
هكذا نقترب من العالمية ليس بحفلات الميوزيك أوورد وجوائز "الضحك ع الدقون"..
دعونا لا نخدع أنفسنا بالعالمية أبدا حينما نتحدث عن عمرو دياب أو اليسا وجوائزهم المزعومة فلا يتذكر الحاضرون اساميهم بمجرد خروجهم من القاعة..
ولكن لو تكررت معنا هذه الحالة عدة مرات لوصلنا للعالمية بسهولة ..حالة الاغنية الكاملة..

عادت أصالة بكل قوة لتنفض عن عباءة الفن التراب المستتر ..تراب من وهن تامر حسني واستسهال سميرة سعيد وزومبي حاتم فهمي وشريف مكاوي وغباء هيفاء ونانسي عجرم
واستظراف ماريا وحضيض دانا وانهيار حماقي واسفاف نجوي كرم وضمور محمد فؤاد واستعباط العسيلي وانهزامية محمد محي..
وهن كل من استسهل الكلمة الجيدة واستبدلها بلحن غربي وتوزيع غريب..
لابد ان تقام الأفراح لهذه العودة..وليست اي عودة ..انها عودة الكلمة..عودة الاحساس الغائب.."عودة الحب الضال"

لم تتملكني هذه الحالة من أغنية عربية منذ ان تملكتني في اغنية
i surrender
لسيلين ديون..

نص حالة اغنية عربية لكن الشعور في العالم واحد احساس واحد..
دعونا نبحث عن عالميتنا في وطننا بدون النظر لجوائز او غيره فالبحث عن الجوائز له ناسه وله اسفافه الخاص..
دعونا نشعر بالاغنية العالمية علي ارضنا دون النظر لفستان اليسا والحان عمرو دياب الخالية من اي كلمات حقيقة ..
اسمعها مرة اخري واقول ..ياااااااه اخيرا
وتذكرني كلمات الاغنية ببيت الشعر مظفر النواب الرائع

أ يقتلك البرد ؟! - أنا يقتلني نصف الدفء و نصف الموقف أكثر..

Monday, October 6, 2008

الشــــاشة الصغيـــرة

تعلمت من الشاشة الصغيرة:

*ان الناس كلها بتتسجن في زنزانة واحدة وكأن مصر مافيهاش الا قسم واحد وسجن واحد ودايما بيتقابلوا جوة وهم عارفين بعض


*ان الصحفي فاضله بالطو احمر ويبقي سوبر مان


*ان الدالي لا يفني ولا يستحدث من العدم


*كل الخيانات بتتكشف.. ولو دي حقيقة كانت خربت


*ان البوليس بييجي مش نتيجة بلاغ ولكن بإحساسه


*ان الفاشل هو المنتصر دايما وهو اللي بياخد الدنيا غلابا زي "هيما" ..و"رضا كابو" في مسلسل قلب ميت


*ان احنا كمصريين ممكن نحارب العالم كله بنور الشريف وتيسير فهمي اللي دوخت أمريكا كلها


*ان انا ممكن انكش شعري ابقي كده متنكر ومحدش يعرفني


*ان المافيا ساذجة جدا وممكن اديها علي قفاها


*ان كل الناس عايشة في قصر او فيلا مافيش حاجة اسمها شقة


*ان واحد شحات ممكن يدمر أحمد عز وثروته في لحظة


*ان الواحد يعيش في حارة احسن عشان الطيبة والجدعنة ..وطبعا هبل في الجبل ولا عاد في كده ولا نيلة انزل اي حارة وشوف اوسخ أخلاق..



ونداء للسادة المخرجين والمؤلفين ..احنا في2008 ..كفاية

Saturday, October 4, 2008

شمعة إنطفت







مش ملك وعد..
مش ملك حد..
ملك لعذابه..
ملك لطريق مافيهوش رفيق..
ملك اللي سماه الصديق..
ملك ارتحاله في هدتي..
ملك انتحاله لوحدتي..
ملك ابتسامة شئ وشئ..
وكأنه مالك كل شئ..
قلبي أنا..
موتي أنا..

سميت لك النبض الوجود..
من يومها مش قادر يعود..
قلبي بقي شبه إنتحار..
خطوة وداع واخدة القرار..
صورة لملامح دنيتي..
رسماها ألوان غربتي..
والنبض مل..
والقلب مل..

مش لايقة ليه في توب الرحيل..
قلتي الوداع شئ مستحيل..
واهو فص قلب وداب خلاص..
مش لاقي من سجني خلاص..
وبقيت ملامة ويل لويل..
حدوتة مرة في كل ليل..
وماعدش حل ..
ماعدش حل..

قلبي وقلبك دمعتين..
خلقوا النهاية بكلمتين..
وفقدت دمعي مع الحياة..
دمعك بيحبي لطوق نجاة..
قلبك بيقدر ليه يخون..
دلوقتي أدور ع العيون..
اللي بكت..
قلبين فراق..
قلب الفراق..

الضلمة في النور إنكسار..
والنور في وسط الليل حصار..
إحساسنا شمعة ليل طفت..
نجماية في الليل وإختفت..
مسابتش ذكري لنور ما كان..
وتحسس الفجر بأمان..
شمعة إنطفت..
نجمة إختفت..




Friday, October 3, 2008

إبتعد عـــن هذا المـــريـــخي






قعدت ابص للسما وقلت يا سلام لو في كائنات فضائية تبقي حاجة روشة طحن ..
بس المشكلة الوحيدة هيبقي شكله عامل ازاي وقعدت اتخيل مين المريخي؟

بس دايما الواحد بيتخيل بس برضه من خلال تجارب مرت عليه قبل كده يعني عشان اتخيل مريخي يبقي احسن لو شفت قبل كده شبه مريخي..
وكتير بنشوف اشباه المريخيين في حياتنا وقلت المريخي ده ممكن يبقي حاجات كتير اوي وكذا شخصية في وقت واحد من كل واحد حتة..


المريخي الأول:
تعابير وجه أحمد جلال عبد القوي "ابن نور الشريف في مسلسل حضرة المتهم ابي" + صوت سامي العدل +شعر هيثم دبور + جسم نبيل شعيل


المريخي الثاني :
إدوارد...وبس


المريخي الثالث:
لبس مفيد فوزي+ شعر محمد منير + صوت محمد نور + جسم ممدوح فرج


المريخي الرابع :
شعبان عبد الرحيم ..وبس


المريخي الخامس:
صوت جورج وسوف مخلوطا بنبرة صوت يوسف داود + عصبية مرتضي منصور + حركات عبد الله بالخير


المريخي السادس:
حركات شادي محمد + جسم عماد أديب+ أمينة شلباية


المريخي السابع:
صوت محمود العسيلي+ شعر انعام سالوسة + حركات سامح حسين


المريخي الثامن:
تعابير وجه تيسير فهمي + جسم شديد قناوي + شعر صدر تامر حسني



ومافيش أكتر من المريخيين اللي ممكن تجمعهم ن خلال التشكيلة الفنية الموجودة في عالمنا دلوقتي
وكفاية اوي سامح حسين جزاه الله كل خير اللي عرفني معني جديد للكوميديا..

تقريبا هو بيقدم كوميديا جديدة مالهاش علاقة بالضحك أصلا ..وبعتذر جدا لإدوارد لأني كنت بقول عليه رخم جدا ولكن طلع اسطورة فنية مقارنة بسامح حسين في مسلسل العيادة الكوميدي ضحكت مشهدين لإدوارد
ولسه بفكر اني افكر ابتسم علي سامح حسين ..
صحيح الواسطة في كل حاجة حتي الكوميديا ..

منهم لله اتنين ..
اللي طلعوا احمد جلال عبد القوي يمثل واللي خلي سامح حسين كوميديان..المريخيين




Thursday, October 2, 2008

قـــدر مــن سقــف أخـــر






سأصب عيوني علي مشهد تجتاح خلاياه العشق...
ليعود حصاني ولا يحمل إلا هزيمة جفني..

أرتاد عقول عاشقة كي أترك أمتعتي ولا أرحل إلا بفكرة..
أتبخر في أنفاس الزهر المتأنق للقاء ربيعه..
أحمل تفاصيلي الكاملة وأخرج من هذا المشهد مهزوم أيضا..
كي يكتب للغرفة قدر من سقف أخر..

يتعود في صدري الحزن علي السلوان ..
وتجالس غربة دمعي حضور ملامحي..
أنا لا أصطفي الألم ولكنه أصطفاني كما يصطفي الله أنبياءه..

ومازالت جدران حمراء بلا أوردة ولا شرايين..
مكتسية بألوان الزهر ومنتكسة بأوجاع ذبولها وعصف خريفها..

وأمد يداي من الشرفة كي تتنفس كلمات أصابعي ولكن لا تسبح يدي إلا في سحب وداع..
سحب راعدة تتنفس بفراق العشاق و لاتمطر الا الأه..
كي يزرع بالمطر القدر القادم كي يكتب للغرفة قدر من سقف أخر..

أحني رأسي كي يتمدد سلطان الدمع علي الجدران..
كي يحتل مملكة اخري في صدري لأخرج من وسادتي ولا تخرج معي الأحلام..
لأنام علي سرير هندي بمسامير فراقي وتحوم أفاعي الأمل حول أذاني..

"من عشق يُعشق ولو بعد حين" قالت الجدران..
ترسم صورتها الجدران وتضيق الغرفة..
ترسم صورتها وتضيق الغرفة ..
ويكتب قدري سقف أخر ..محني بصورتها..
ولكن بعد فوات الوقت..
ولكن شرفني الموت علي جدران بيضاء ..
كما تموت الأزهار في كفن من شهد..
مت أحضن صورتها..
ولم يكتب للغرفة سقف أخر..