Sunday, April 25, 2010

كـــلمات من زمـــن الـــرياح








محظوظ انت لتملك كل القوة في سرك وخفائك ..
وتزور شبابيك الناس المغلقة لتخرج منها الأسرار في جلسة فنجان الشاي..

تهدأ الريح وتقول: انا محظوظ ؟ ياليتني كنت بشر مثلك اسمع صوت الريح وازاول مهنة السر البشرية واملك حق الحب فأملك حق الوجود.

أنا: ولكنك تملك حق الوجود وكيف لا وانت الضارب في كل ميناء وفي كل بحر وعلي كل بر وحتي بين قبلات العشاق السرية .

الريح:امر علي همسات العشاق نسيما لتغازل في جسدي الكلمات فيضرب قلبي رعد الاحساس لاكون الريح
اكون الريح وأجري كما المجنون يمينا ويسارا فاحرك افرع الاشجار كأني اوقظهم "افيقوا ..اني قد عرفت الحب.."
واحرك في شبابيك الناس وكأني اقول لهم "قد عرفت سركم..قد عرفت ما هو الحب في عالمكم "
ولكني لا استطيع الحب..ولكني اعرفه الأن..

أنا: الحب ليس بعيدا عنك ..ألست تستطيع النوم علي القمر والسير علي البحار في وقت واحد؟
ألست تستطيع ان تنام في حضن الزهر وتراقص اي بنفسجة في حديقة رقصة باليه؟
وتستطيع بأن تزور الارض شمال وجنوبا في ثانية او اقل ؟

الريح: نعم استطيع

انا: اذن لا فرق بينك وبين عاشق

الريح: ولكني اريد بأن يلهو شعر إمرأة في حدائق يدي..
وان استسلم من نظرتها حنانا وحنينا وشكا وايمانا..
وان اقتفي اثر نبضي طول الليل في صحراء الحب المليئة بالسراب..
وان انتشي من الحب ويصير كيوبيد طوع يدي..
وأن اتأمل في بحر عينيها واراقص كل ميناء فيه..

انا: هذا ليس كلام الريح..من انت ؟

الريح: الم تعرفني بعد ؟ مع اني اشبهك كثيرا..

انا"في غضب" : كلامك لا يريحني ابدا ..من انت قل لي..

الريح"يخلع قناعه" :انا !

انا: انت ؟؟

الريح: انا نصفك المحروم من العشق ..قرينك الذي هجر العشق منذ سنين ولم ينبض له قلب..

انا: ولكن..ماذا تريد الأن..وما هذا الكلام الذي قلته ؟

الريح: هذا شعور نصف قلبك الذي هجره الحب تماما كحوار ملاك وشيطان..
او جنة وجحيم

انا: لا شئ لدي الان اليك اذهب حيث جأت ..مجرد ريح عابثة..

الريح: ربما اكون ريح ولكني سأحدثك في كل مكان وزمان حتي تفيق..

انا: ماذا تريد مني ؟

الريح: اريدك عاشقا مرة اخري ..قويا..مصلوبا ضعيفا وفي نفس الوقت قويا..

انا: لا شأن لك بي ..قرار الحب اخذته في يديها وهجرت ..

الريح: ولكنك تملك قلبا مهجورا

انا: وبماذا أملئه؟ بريح ؟

الريح: ربما بحب ثاني ؟

انا: لا يوجد شئ يسمي الحب الثاني ..وانا مازالت قتيلا للحب الاول لم اخرج من تحت عبائته الي الأن..

الريح: اتطير معي ؟

انا: الي اين؟

الريح: اليها بضعة نظرات ونغادر عدني بذلك

انا : ولكن لا املك الا الدمع حين سانظر اليها

الريح: اتركه يسيل ويصفي القلب من الم السنين..

انا: حسنا

وذهبنت مع الريح او قريني لزيارتها من وراء اثير لا تراه هي
وكأنها تشعر بي !

عجبا..قامت وتحركت في غرفتها تنظر وتبحث عن شئ ما !
تتحسس جدران الغرفة !
تشعر روح الحب كما ياسمينة تداعب خديها ..
تقلب صفحات كتاب في يديها كأنما تبحث عن نهاية غريبة
او وطن لها في كلمة حب في طيات الورق الابيض..

تسقط دمعة علي ارض الغرفة .تختلط بدمعي ..
يضرب رعد ليس كرعد العالم هذا..
يختفي الريح..ويختفي الجدار الوهمي بيننا..
وتراني واراها..!

واتمني عودة الريح..ليأخذني من هول الموقف هذا
لأعود بشرا كما كنت..
بدلا من ملاكا باكيا امام عينيها ..


Wednesday, April 21, 2010

بين الحــب وبين الــذات






نشوان من سم العشق ومن رقرقة الماء علي همساتي..
ومحاصر من كف عروسة ومن عقد ذهبي ومن وهم الأحلام..
مستسلم لكفوف ملائكة جمال ترش الزهر علي فساتين القديسات..
ومازلت أخير بين الحب وبين الذات..
لأقرر هل اصبح ذات الحب..ام ابقي لحب الذات !

فلسفة تمطر من حضن البحر وتقاتلني باصداف ورائحة بحرية..
ولكن لا يغريني الغرق في بحر هائج مجنون..فأنا في الحب.. سأغرق لكن في سلام..
قلبي حصاد خريف ..خليط من اوراق مقتولة وازهار ذابلة ورسائل حب محروقة..
ينتظر الحب مخلصه الأبدي ..ولكن لم يأتي الا ليزيد الورق عناءا والزهر عذابا..

نشوان من عطر الفكرة ومن زلزلة الشوق اليها ومن كل كيان قد عانق منها أثيرا ..
تكتمل موسيقي القلب من "طرقعة" الكعب العالي ومن "صفير" الأنفاس ومن "فيولين" عذوبتها..
ولكن لا تزال الألحان غرائب وتخاريف عشقية..
أستلقي علي أوجاعي في الليلة الف مرة وألف "إمرأة"..

لا تأتي بشارات من مدن العشق الأبدية في عينيها الا رسول لا يحمل في كل مرة الا فرمان للعشق ..
"الغربة" كلمة تستحق الانحناء والتبجيل في عينيها..
"الدمعة" أميرة فرت من ملك العين لكي تنتحر علي خد او مدمع..
و"الحب" هو سحرها الأسود ذو القلب الأبيض..
و"أنا" رجل يظن نفسه العشق احيانا والموت احيانا !..

مقهور من سلطان النظرة ومقتول بترانيم نسيم عاشق..
لا أحد يعرفني الا كيوبيد ولا احد يفهمني الا السهم الناخر في قلبي..
اعترف امام العالم "عاشق"..التهمة "عاشق" ..الكنية "عاشق"..
وفنار الحب يغازل سفني ولكن البحر بحار ظلام..
لا اعرف كيف سينجو الربان وسفينتنا تموت "بسكتتها البحرية " ..

أحتاج لقتل القلب الرحيم بدلا من حياة القلب الأليم..
احتاج لأن يخرج قلبي من منطقة الفاكهة المحرمة كي اشرب منه واتحدث معه..
وان تخرج هي من واحة النور كي لا يمنعني منها سرابا وطيور عابثة وملطخة بالأوهام..

احتاج لأن نتبادل الأدوار ليوم واحد ..فحينها لن تخرج مني أبدا حين تري قلبي كيف سينبض فيها..
احتاج للرهبة الدائمة في الحب فرهبة الحب هو الأمان الكامل للإحساس..
وان ارتمي في حضن قطعة سكر فهي الوحيدة التي ستشعر ما اشعر به ..
وان ارقص مع القدر علي ارض اخري في حياة اخري كي يحسني..

احتاج واحتاج واحتاج..
ولكن كل ما احتاجه الان هو "نظرة عين "..
كي اخرج من عالم احلامي الي حلم العالم الخاص بي ..
مجرد "نظرة" ..





Monday, April 19, 2010

ده مالــوش بــديل






كل مشكلة في مصر ليها حل ..حكومتنا مبتغلبش في حاجة ابدا ..يعني حمادة يلعب والحكومة تلعب وكله بيلعب علي ودنه..

قالك يا عم شوفلنا حل مش عارفين نكسب ميداليات في الأولمبياد قالولك الحل في قلبظ نحط صور واحنا بنكسب ميداليات بالهبل ولا يهزك خالص يا برنس
طيب مش عارفين نروح كاس العالم ولا نعمل فيه حاجة قالك نعمل فيلم ونروح فيه كاس العالم ونسميه العالمي كمان
طيب مش عارفين نختار حكومتنا يا عم الحاج ومافيش انتخابات نزيهة قالك ولا تزعل خالص مصر مش عارفة تختار حكومتها بس ممكن تختار طعم شيبسي المفضل ليها في اكبر استفتاء !

يعني من الاخر كل حاجة ليها بديل ونظرية البديل في مصر ضاربة في كل مناحي الحياة عندنا اللي عاريز تعمله اعمله في عالمك الافتراضي زي قلبظ وشيبسي

عايز رئيس جمهورية تفصيل؟ بسيطة خش رشحه ع الفيس بوك وهات بتاع خمس الاف واحد معاك وقول ده رئيس جمهورية بناءا علي استفتاء الفيس بوك وعيش ايامك

الانترنت بطئ ومش عارف تشتكي حد ؟ خش اعملك جروب ع الفيس بوك ونفث عن غضبك وابقي قابلني لو حد عملك حاجة ولا حد استجاب لشكوتك

وبالنسبة لانتخابات رئيس الجمهورية احنا ممكن نعمل صورهم في شيبسي ونجمع وش ومناخير وحواجب واللي تجمعه كامل يبقي هو رئيس جمهوريتك يا عم
واحد حزب وطني بقي يجمع عين ايمن نور علي حواجب حمدين علي مناخير البرادعي يقولك "مين ده ؟ حسني ؟ "
لانه متبرمج طبعا علي شخص واحد اكيد مش هيتخيل حد تاني ممكن حتي يطلعله في شيبسي

وبالنسبة لازمة الرواتب وكده واحد كل شوية يقولك الحقونا بناخد 99 جنيه وبتاع والشخص ده طبقا لنظرية البديل اكيد حريف بنك الحظ لانه بيطلع كل عقده في اللعبة دي
وبيحاول يكون مليونير ودايما يكسب الجيم وياخد كل فلوس البنك .

واحنا عندنا كوادر كتير اوي ممكن تبقي رئيس يعني زي مثلا بحراوي "الرجل اللي بيعاكس"
يقولك ايه في الخطبة "يا حنان الشعــب..أحكـم "
وكمان ممكن اللمبي "الحكم الحكم..الشعب الشعب..الحب الحب..من طرف رئيسكم اللمبي "
او كابتن مدحت شلبي ينفع اوي برضه "هلا هلا هلا يا شعبي يا نهـــار أبيـض..ايه الجمال ده..احتجاج ايه..حبيب والديه ولا ..هلا هلا هلا "
يعني الاختيارات كتير اهه امال بيقولك محدش ينفع ايه يا عم ؟

وحتي الكورة ليها دخل كبير في نظرية البديل
يعني التعصب الرهيب للاهلي او الزمالك اهو بديل عن الانتماء السياسي والحزبي الهابط في بلدنا مش لاقيين اوي حاجة ننتمي ليها فبنتحول بجنون لانتماء كروي
ويقولك انا مصري اهلاوي مانشستراوي عمراوي.. ايه يا عم كل ده واحدة واحدة علينا ..
يقوله لسه مكملتش وكمان ريال مدريداوي اي سي ميلاني سلتيكي ليوناوي يعني مسابش دوري في العالم الا اما لجأ عليه ..
بصراحة ارحم ميقولك انا تجمعاوي نصراوي وفداوي والجو الحزبي العجيب بتاعنا ده اللي متعرفش فيه اهداف الحزب الا اما تمضي استمارة
وممكن تمضي عشان تطلع رحلة وخلاص واهو كله بحسابه..

وكان زمان يقولك محلاها عيشة الفلاح قاعد في الارض ومرتاح دلوقتي ولا معادش مرتاح ولا حاجة موبايله الصيني معلق والدش بيقطع والنت مش راضي بكبل ديل الجاموسة
يعني التكنولوجيا بوظتله حياته وكمان بياكل شوربة اندومي في قلب الارض
ولو ارضك بتنده اديها اندومي تبقي تمام وانغام تغني تعـــالي يقولها روحي في داهية بقي وجعتيلنا دماغنا انا عايز سيتي ستارز

والبديل كمان دخل في الجامعات قالك مش عارف تدخل كلية هنعملك بديل بفلوس ويكتبوا فوق الجامعة شعار "بفلوسي يا كلب "

وربما كمان المفتش كرومبو هو البديل اللي بيحقق العدالة الغايبة !
يعني البديل بقي خلاص في كل حاجة في حياتنا حتي الجواز عملوا له خط الخاطبة الالكترونية عشان تحس ان العرايس علي قفا من يشيل ده بديل الجواز الجديد.


الا حاجة واحدة في مصر مالهاش بديل !


Wednesday, April 14, 2010

الشـــفرة المـــصرية




غاويين نخبي حاجتنا بخباثة كده احيانا او نشفرها وطريقة التشفير المصري احيانا بتكون فيها بعض السذاجة

يعني انا مثلا كنت مسمي بنت بكلمها علي الموبايل من ايام الجامعة "شئون الطلبة" ..!
طيب بصراحة دي حاجة تشكك اساسا يعني طالب مخزن ليه شئون الطلبة علي الموبايل
فاللي كان بيمسك موبايلي كان دايما يستغرب
ويقولي " ههههههههه شئون الطلبة؟؟؟ انت بتستعبط؟؟؟ دي اكيد بنت "
وانا استغرب طيب ايه اللي يشكك في حاجة زي دي مش فاهم ؟
فبقول لصاحبي "ايه اللي عرفك يعني ..لا هي شئون الطلبة فعلا "
قاللي "شئون الطلبة مدياك اتنين ميسد كول يا خفيف "

ههههههههههههه اتاري ده اللي كشفني هو شاف ان في ميسد من شئون الطلبة ودي بقي بصراحة مش مبلوعة فعلا
هيطمنوني علي الكشوف يعني ولا النتايج ؟ ميسد من الشئون ليه يعني ؟ ههههههههههه

واحد صاحبي بقي كان تشفيره مختلف شوية كان بيحط بعض الملفات القبيحة جوة فولدر "اسلاميات"
وده عشان والده ..لحد ما كنت معاه في مرة فابوه بيسأله
"هو ليه يا محمد ملف اسلاميات 10 جيجا ومافيهوش غير سورة البقرة ؟ "
قاله "طيب ما هي سورة طويلة يا بابا "
قاله "لدرجة عشرة جيجا ؟ "

طبعا انا فهمت القصة واما ابوه مشي قولتله "انت هتصيع ؟ سورة ايه اللي عشرة جيجا ؟ فك المخفي يلا " هههههههه

طبعا ده من اسوأ انواع التشفير انك تحط حاجة زي دي وتخفيها جوة اسلاميات يعني ده حتي يعني يا اخي اغتشي عيب

واحد تاني بقي كان حاطط كل اسامي اللي عنده علي الموبايل "محمد1..محمد 2..محمد 3..محمد 4 " لحد محمد 45
وبصراحة دي برضه مكشوفة كيك يعني مين محمد ده اللي عنده 45 نمرة وانت بتعزه قوي اتاريها يعني شفرة هو عاملها وحافظ البنات بالرقم وعارف كل رقم بيرمز لإيه بالظبط

واحد تاني بقي يحاول يداري او يلغوش واسلوب "التشفير الملغوش" برضه مفهوم اقولك ازاي
يكون في تلات ملفات ملف منهم اسمه "حاجات خاصة " مثلا تعرف ان ده مش هو اللي خاص ولا حاجة وعايز تشوف سره بجد شوف الملف التاني هههههههههه
لان مافيش حد عنده حاجة خاصة هيكتب "هنا حاجات خاصة" مش بالغباء ده يعني !

البنات بقي بتخبي بصيغة حنينة ممكن تلاقي البنت مسمية حبيبها ع الموبايل "نونة حبيبتي" او "توتة الامورة"
او حاجات كده زي بتوع الكارتون هو دايما البنات اساسا كائن كارتوني في كل حاجة
وحتي الاسامي اللي بيختاروها للموبايل مبالغ فيها
وممكن تكتب شوية رموز كده وفي الاخر اسم لولو مثلا برضه ده يبقي ولد اكيد هههههههه
هم بيدلعوا بعض اه البنت وصحباتها بس مش لدرجة انها تكتب عن صاحبتها لولة حبيبة قلبي مثلا
لأن كده الواحد ممكن يشك في نوعية العلاقة لو كانت بنت فعلا هههههههه
يعني بصراحة لو ولد كاتب علي موبايله "محمود مهجة روحي " او "عمرو حياتي وعمري"
بصراحة هاقطع معاه هههههههه لانه كده مشكوك في امره اوي لو كان دول ولاد فعلا
لأن لو عمرو حياته وروحه يبقي انا ابلع ريقي بقي لان مصيري في خطر انا كمان وانا معاه

وفي ناس بتعمل بقي اسلوب التطفيش بدل التشفير عارف ازاي ؟
يعني يكتب علي صور لبنت مثلا علي الكمبيوتر "محاضرات هامة جدا "
فانت تشوف سيرة العلم وكده تسيب الملف وانت متعرفش اللي جواه ولا محاضرات ولا نيلة
او يكتب "ملفات المشروع الختامي للبحث " يعني صيغة بنت ايه تخليك تقرف من الملف اساسا
وده بيكون تشفير تطفيشي ذكي جدا وبيجيب نتيجة


لكن الاسهل من كل دول اي برنامج تشفير وخلاص يخلي الناس متعرفش تدخل اصلا علي الملف
بدل الحيرة دي كلها برنامج من دول يخليك في امان وسرك في بير يا معلم
لان التشفير كله بقي مكشوف ومعدتش حركة ملعوبة يعني







Tuesday, April 13, 2010

أنـــت بتــاكل ولا ايـــه ؟




ايه اسوأ سؤال ممكن حد يتسأله ؟ بيتهيألي كتير قوي من نوعية الاسئلة الحمضانة اللي منتشرة اليومين دول
زي الاسئلة اللي كلنا عارفينها بتاعة انت جيت؟ انت صحيت؟ انت هنا؟ رغم انا قدامك اهو ايه الاسئلة دي

يعني سؤال انت صحيت ده يوحي بأني بمشي وانا نايم وابتاع انت جيت اكني في حالة انتقال زمني مثلا

لكن لاحظت الاغرب والاعجب بقي بسأل واحد علي شارع في مصر
بيقولي علطول "اه تمام وهو قالك فين بالظبط؟ "
هههههههههه طيب هو طالما قاللي هأسألك ليه ايه يا عم السؤال الرهيب ده ؟

ومرة بكلم واحد صاحبي وانا باكل خيارة بيقولي انت بتاكل ولا ايه ؟
يعني صوت الخيار بالذات مافيهوش شك اكيد باكل امال ده صوت قرمشة سناني من شوقي ليك مثلا ؟
يعني لو حاجة طرية نقول ماشي ممكن تتلخبط في الصوت لكن ده صوت قرمشة خيار يعني اكيييييد باكل
وتبقي واقف في طابور في مصلحة حكومية ساعات وفي النهاية بدل ما يقولك اتفضل او كده يسألك سؤال من كوكب تاني
ويقول "عايز حاجة حضرتك ؟ "
ههههههههه لا ده انا جاي اشوف ان كله تمام بس وماشي ..نازل من بيتي عشان اتاكد ان مصر بخير وكده يعني نازل من بيتي في حب مصر مش عايز حاجة
يعني يا جماعة ايه الاسئلة دي اكيد عايز حاجة يعني

وساعات بقي الكلام المدبلج بتاع بتاع خدمة العملاء بيضايقني فمرة واحد بيقولي
"طيب قبل مناخد استفسارك احب.."
رحت انا مقاطعه وقولت "تتشرف باسم حضرتي ..طيب انا هاشرفك وهارفع راسك كمان اسمي معتز "
هههههههههههههههه مش عارف ليه بتخنق ساعات من كلمة خدمة عملاء دي كل دقيقتين لحظة واحدة يا افندم انا اسف يا افندم ع التأخير
بتحس انهم محترمين زيادة عن اللزوم خلاص يا عم مش كل 30 ثانية تعتذر خنقتني

وتقعد تجيلي رسايل من شركة الموبايل كل يوم باقي علي تجديد اشتراكك في الخدمة اربعة ايام وبعدين تلات ايام
وبعدين يومين وبعدين يوم وكل شوية امسح وراهم الرسايل ياعم ابقي قولي قبليها بيوم وخلاص انت بتذلني بخدمتك ولا ايه ؟
وساعات تقول لحد هاتلي مية يقولك "عطشان؟"
عايز اكل "ايه ده انت جعان؟ "
اه يا جماعة ما انا انسان معدتي مش اسفنج يعني انتوا مستغربين ليه وايه السؤال ده
اه ياعم عطشان وجعان عيب؟ حرام ؟

وساعات بقي في حمام المول واحد غتت يقعد يخبط وطبعا هو برضه بيقول علي اللي جوة بيستعبط فيها
ويسألك احيانا خلصت ؟ ونوعية الاسئلة دي ؟ ايه ياعم هتغيرلي البامبرز ولا حاجة؟
لا مخلصتش وبعدين ايه دخلك انت في شئوني الشخصية دي هههههههه لو خلصت يعني هتتبسط مثلا وهتسقفلي
يا جدعان ارحمونا بقي من الحوارات دي

وواحدة تتكلم ع الموبايل بتاع نص ساعة متوالية وانت مرديتش لسه عليها يادوب بقول "ايوه"
لقيت هجوم زي السيل من الكلام مش لاحق عليها اصلا
وفي الاخر تقولك "حضرتك عايز تاخد فكرة عن العرض؟ "
يا نهار ازرق امال اللي اتقال ده ايه ؟ ده انا فاكرك قولتي عرضين تلاتة اربعة
تطلع دي المقدمة بس ولسه في فكرة عن العرض اقولها لا وقت تاني بقي
تقولك طيب امتي؟ وتفضل تكلمك مترحمكش حتي لو نفضتلها
هم بياخدوا كورسات بجاحة وكده عشان مهاجمة الزبون مش اكتر

وانا هاسألكم سؤال من دول دلوقتي
"ايه ده انت بتقرا الموضوع ؟ "


Monday, April 12, 2010

صبـــــاحو مــــصري







صباحك مصري ؟ بتشتكي دايما من اول ساعة صحيان بسبب اللي بيحصل لو فاتح الشباك؟
اكيد يبقي انت اكيد في مصر ..دايما الصباح في مصر مختلف تماما صباح زي الاكل المصري
تحس انه ملخبط زي الكشري الاكلة اللي اخترعها المحشش الاكبر وحط اي اكلات علي بعض
سواء الاصفر اوا لكشري المصري ابو جبة كلها تخاريف اصيلة لمستر حشاش الاكبر
الصباح المصري بقي بالظبط زي الاكلة دي اخر لخبطة

لو صحيت الصبح وفاتح الشباك مش هتعرف تنام تاني لو صحيت علي 6 كده غصب عنك
ممكن تسمع اصوات العصافير البلدي المصرية اللي بتاكل كل ما يحلو ليها لحد ما تبقي مش قادرة تطير
وواحدة تقف تغني عصفور طل من الشباك وقاللي يا نونو !
ما هو لازم يا ست عايدة العصفور المصري ده يقولك يا نونو لانك بالنسبة لحجم كرشه نونو
ده عصفور بلدي سمين بينهج وهو بيطير متفهمش بياكل ايه بالظبط ويقولك بيأكل العصافير الصغيرة في بقها
ههههههه ده انت متفائل قوي يا عم ده بياكل اكلهم حتي لاحظ ان الصغيرين دايما بيصرخوا
اسوأ حاجة الصبح صوت العصافير الشديد ده لو كان تحتك شجر يبقي هتتبهدل من الصوت ده ناقص يشخروا بليل يا عم الحاج من حجمهم ده
لأ والعصافير التانية اللي بتخبط في الارض دي يقولك عصافير الجنة ! جنية ايه يا عم هي شايفة الارض اساسا لما هتشوف الجنة دي عصافير سكرانة باين

ممكن بقي لو تحتك مصلحة حكومية تسمع صوت الموظفين الصبح بدري قوي علي 7 كده تلاقيه باعلي صوت في حنجرته
"صباح الفل يا استاذ علي "
والتاني باعلي صوت "صباح الجمال يا محمود عملت ايه امبارح في الموضوع ؟ "
ويدور الحوار كأنه في ميك في الاذاعة المدرسية
كأن كل الناس صحيت خلاص ياعم طيب وطي صوتك جايز ناس لسه نايمة
ولكن دايما الاستاذ علي بيعتبر الناس كلها صحيت طالما هو صحي

كان تحت بيتنا بقي حالة خاصة كل يوم واحد بييجي الصبح بيحي المدينة بالكامل بأعلي صوت ليه
"صباح الخيييييييييييييير يا ولاد الك...........
صباح الخييييييييييييير يا ولاد الم.............
صباح الخير يا مع....................."
وهكذا كل يوم بنسمعه وهو بيكنس الشارع وبيلقي علي المدينة تحيتها الغريبة
معرفش هو بيشتم مين بالتحديد بس تقريبا البلد كلها !

وساعات بقي تصطبح علي كذب
زي ميكرفون معدي يقولك "بشرع عظيمة لاهالي المدينة الكرام سيتم اليوم افتتاح محل هريدي
لاحدث الاحذية اسعار خاصة بمناسبة الافتتاح سعر الكوتشي اديداس ب 40 جنيه "
وهنا لينا وقفة اديداس ايه اللي ب 40 جنيه ؟؟؟
يمكن بتاع خالتي اطاطا ؟ احتمال تكون هي صاحبة المحل اساسا.

او تصطبح علي صوت بتاع الانابيب وانا بستغرب مين عايز انبوبة الساعة 7 الصبح بجد ؟
هيشربها ويرجع الفارع ولا ايه ؟ ايه الفطار الغريب ده ؟
ولا قاعد من امبارح يا عيني ودقنه كبرت جنب الدش ونفسه يستحمي يعني ؟
ما حبكتش يعني الانبوبة دي ما انت نازل الشغل اما ترجع بقي

او اصوات اتوبيس المدرسة وده اسوأ شئ لو جنبك اطفال صغيرين راحين حضانة
الاتوبيس ييجي من الساعة 6 زمامير لمدة نص ساعة علي ما محمد يصحي ويفطر وبعدين يرد عليه
طيب يا عم سعيد نازل اهو
وعم سعيد يزمر تاني ..عشان كده الاطفال بتتعلم تسب لعم سعيد من صغرها
بصراحة ليهم حق ده راجل مستفز اوي ومعاه الدادة بصوت عالي كل يوم
"يلاااااااااااااا يا محمممممممممممممممممممممممد"
"يا محمممممممممممممممممممممممممممممممد"
وكأنها بتغرق ع الصبح او محمد ده اللي هينقذ حياتها

او الراجل بقي الروش اللي نازل بدري وبيشيل غطي العربية ولابس نضارة شمس ومعلي الكاسيت ع الاخر عشان يتسلي وهو بيشيل الغطي وبينضف عربيته الصبح
طيب يا عم انت بشكلك ده رايح فين؟ ده سيتي ستارز مبيفتحش بدري كده
انت اكيد رايح تتفسح ده مش لبس شغل خالص

وفي ناس بقي ترمي اطنان من اكياس الزبالة الصبح بدري بحجة ان الزبال ييجي يشيل بدري يعني
طيب ايه كمية الزبالة دي يا حاجة؟ يا تري اتعشيتوا درفيل مشوي امبارح ؟
ولا كلتوا وحيد قرن ع الفحم ؟

والناس اللي بتييجي تقول اي كلام ع الصبح زي واحد جاي في ميكرفون وواقف الساعة 8
يقول
"معايا دليل المدينة سعر الكتيب 10 جنيه
الدليل طبعة جديدة وكلنا محتاجينها "
المهم قعد يعيد الجملة دي حوالي 40 مرة
لحد ما واحد طلعله وقاله
" يا اخي امك علي ام الدليل اللي بتبيعه اتكتم بقققققققققققققققققي"
وهو فعلا عنده حق دليل ايه ع الصبح هو انا تايه يا عم ؟
وبعدين انت شايفني جاي من المريخ ؟ ده انا ابن بلدك
يقولك الدليل مزود بخريطة المدينة وفرحان قوي
مبروك يا عم ع الخريطة بس هي مدينتنا كلها علي بعض 2 كيلو
مش عارف عرفتوا ترسموا الخريطة ازاي اكيد يا دوب فتحوا البرجل اترسمت لوحدها

وساعات بقي تنزل من بيتك الساعة 8 كده تلاقي ناس واقفة قدام محل بتشرب بيبسي
والغريب اننا 8 الصبح مش فاهم البيبسي ازاي بجد يتشرب كفطار ؟


يعني الصباح المصري ليه خصوصياته وطقوسه الغريبة جدا في كل مكان في مصر
وصباح الخير يا مصر.

Saturday, April 10, 2010

قــديم طــحن








كتير ممكن تسمع حد بيقول لحد يااه ده انت قديم طحن ..او يقوله ده الكلام ده من ايام الفراعنة وغيره
لكن فعلا الشخص القديم دايما موجود بينا لكن بيتعرف من عرض بيعرضه او كلمة بيقولها مش بيمشي ابيض واسود يعني اكيد
ومين هم الناس القدام دول :


1 - بتاع الرسايل والرنات:

بقولك ايه يا برنس معاك رسايل ايه جديدة ؟
وطبعا معروف ان دي كلمة كانت مشهورة قوي من ايام الموبايل النوكيا اللي اول ما طلع عمل ضجة
لكن اللي بيقول الجملة دي دلوقتي يبقي شخص غريب الاطوار في عصر الفيس بوك وغيره من التكنولوجيا
لسه بيسأل علي رسايل وساعات هو هو يسأل بقي علي نغمات لكن يمكن شخص النغمات احدث شوية وسؤاله منطقي



2- بتاع الميلات:

فين يا عم ميلاتك الحلوة اللي كنت بتبعتها زمان؟
واكيد ده كلام مات زمانه خالص لان برضه اول ما بدا النت في الانتشار كان دايما الناس تبعت لبعض ميلات
اللي هي زي بتاعة ارسله لميت شخص وتاخد حسنات او صور لهيفاء وهبي او ايميلات لاخبار فنانين ولاعيبة كورة
ومش عارف ميل ايه ولا مسج اللي بيدي حسنات ؟ ده علي اساس حسنات ديجيتال ولا ايه ؟



3 - بتاع الشرايط:

متعملي كده شريط كوكتيل اشغله في العربية...
من اقدم الكلمات اللي ممكن تسمعها حاليا لان دي كانت منتشرة قوي فترة التسعينات
والتمانينات برضه اصل اكيد ماكانش في شرايط كوكتيل ايام ام كلثوم لان هم 8 او 9 مطربين بالكتير
فمش محتاجين كوكتيل..وبعدين كوكتيل علي ايه ؟ علي اسطوانة من الكبار دول؟ لا يا عم يبقي الله الغني



4- عندك رجل المستحيل؟ :

واللي بيسأل السؤال ده انسان وحد جميل قوي
في عصر رطرطة الكتب في دار الشروق وغيره في الفترة الحالية لسه عايز يقرا راجل المستحيل
وطبعا دي كانت هوس الشباب هي وملف المستقبل والعميل رقم 19 في فترة التسعينات برضه
واللي يسألك السؤال ده لازم تلف بسرعة وتلكمه الاولي التي تحطم انفه ثم تجهز عليه كما يفعل رجل المستحيل



5- شوف القناة السادسة عليها ايه ؟ :

اللي يسأل السؤال ده ميتردش عليه اصلا
هو هيعرف غلطه لوحده وهيبطل يقولها تاني
القناة السادسة والسابعة والهيصة دي كانت ع الدش لفترة وبعدين شالوها عشان منظرنا قدام العالم العربي
لأنها كانت فضيحة بمعني الكلمة اللي هو المذيعة تسأل ايه هي عاصمة مصر وحاجات زي كده
وياريت يشمعوها اصلا خالص القنوات دي
وبتاع القناة السادسة ده مكن توريه حاجة شبيهة شوفله تسجيل ع اليوتيوب لتاكسي السهرة ولا حاجة
ولا حتي اماني واغاني مش مشكلة



6-معاك نمر بنات ؟ عايز اعاكس :

وده لسه منه موجود الشخص اللي بيسأل السؤال ده
بس غالبا بيكون مالوش في التكنولوجيا الحديثة لان الفيس بوك والجروبات وغيره مش مدية مجال يا عيني للسؤال ده
لأن ا لنمر والرنات والكلام ده بالهبل فعلا ومش محتاجة الناس تدور
لدرجة ان الشباب مقضيها تليفونات ومبيتجوزش اصلا والعنوسة زادت بسبب الفيس بوك
واكيد في علاقة طردية بين زيادة الناس ع الفيس بوك وبين زيادة العنوسة




وياريت متقعوش في شخص من القدام دول عشان بيفقعوا قوي.

Friday, April 9, 2010

قــــدح الــــرهــبة






الدمع وبضعة أكواب من قدح الرهبة تسير علي أعصابي..
قديس لا يملك إلا العشق هديل حمام يصيح به ..
وموانئ من رائحة الأنفاس العذبة تعصف في صدري..

ثم تصير الصورة خضراء كعيدان الحب وأتقدم خطوة اليها..
مرتاب في الخطوات كمن سيقدم من جسده قربانا أو دم شهيد..
تتزاحم كل حواسي فأسمع اضوائا واري اصواتا وكل الشئ بعكسه..
وتغني معاني الشوق علي عتبات شجوني ..
فأرشد كل لحن الي ضالته والي نبضته لكي يشرب من دمي..

شهد يتساقط من كل جدار..وطبول الرهبة تسيرني الي عشاء الحب الأخير..
ثم تصير الصورة خضراء كعيدان الحب وأتقدم خطوة أخري..
أعيش في عنبر قلقي وجنوني تحت حراسة هذا الحب..
والحراس ملائكة وعرائس ودواوين ولا اعرف كيف سأهرب الا بمزمار او لحن تائه..
لا اعرف كيف سأخرج من جسد الحب ولو يخرج من جسدي هو مرات ومرات..
واسير متيم بعيون خارجة عن كل نصوص فينوس وما لها من سلطان..
ويصير دعائي الأوحد في عزلة تلك العين "أيا قلبي زدني عشقا"..

وأسير الخطوة تلو الخطوة..
وتسير الخطوات حديث القلم وثرثرة للنسمات مع بعض كياني..
شئ يمنعني من الهرب مع ان الهرب سبيلي الأوحد..
وكأن الحب يقول "لا مهرب مني الا الي ..
ولا مخرج من أحضاني الا لأحضان أقراني" ..

لا أجد مفر من عينيها المعصومتين من الخطأ..
ولا نظرتها المستوحاة من بعض تراتيل الفردوس..
لأول مرة أحاول أن اتسلق صدري وأزاحم ضلعي في مكان للنوم ..
واحاول ان اتعاطي احزاني كمخدر يخرجني من تعاليم الحب..
واصاحب كل الألوان كي لا يتأقلم فقط اللون الأسود فوق قلبي..

ومازالت اسير الخطوة تلك الخطوة ..
وانا اسير الخطوة وفي نفس الوقت اسير للخطوة..
لا يعذبني الا الاشجار الجائعة في لمحات الطرق لبعض الحب..
وبعض النقرات والوعود علي جذعها ..

وكأني مسئول عنها وعن حب تائه منذ سنين..
وكأني المسئول عن الشجن في عين الزهر ونبض الندي الضعيف..
وكان الحب جعلني مسئولا عن كل الدنيا وما فيها الا عن نفسي واحساسي..
اعشق كي يرتاح القمر وترتاح الشمس ويرتاح الزهر ولا ارتاح انا ..
ومازالت افقد نفسي في كل صباح واحاول ان اجدها في صباح اخر حين احب..
ولا يزال الحب معلمي وقدوتي الأكبر ..
ومازالت خطواتي تمارس فعل الألم مع انفاسي ولا اجد اللذة..


فمتي يستحيل الالم لذيذا والوجعة بنكهة السعادة..
حين نحب؟؟؟
حسنا ..
سأظل أحب وأتألم..
وياله من تناقض..عجبا !

Sunday, April 4, 2010

بالبــيضة والحــجر يا بــرنس














في احدي الغرف بوزارة الاعلام:

عماد: يا سيادة الوزير الدنيا مقلوبة عالاعلانات دي

الوزير: ايه بس يا عماد كل يوم الدنيا مقلوبة قرفتني باخبارك يا اخي

عماد: يا باشا بيقولوا السلع دي في بعضها مضر وان احنا بنحاول نضلل الناس بالاعلانات الدعائية الكتير دي زي البطاطين والادوية والحلل وغيرهم

الوزير: يعني ايه نضلل الناس ما هم يفكروا في اللي فيه مصلحتهم يا عماد

عماد: ايوه يا باشا بس في دعاوي كتير مرفوعة وكمان علي المفتش كرومبو

الوزير: كرومبو؟ لا الا كرومبو ده انا شريك في العملية دي يا عماد وبتعملي سبوبة حلوة علي قفا الناس العبيطة اللي بتتصل

عماد: طيب ايه العمل يا سعادة الوزير

الوزير: بص احنا هنعمل حملة اعلانات تانية اسمها الاعلانات المضادة ونسيب اعلانتنا زي ما هي

عماد: ازاي يا باشا؟

الوزير: يعنيهم بيقولوا احنا بنضلل الناس لا احنا هنقولهم الرأيين من وجهتين نظر وهم يقرروابراحتهم بقي

عماد: تلميذ

الوزير: قشطة يا وديع قريني



وبدأت الوزارة علي قدم وساق في العمل للتجهيز للحملة الكبيرة وبدأت الاعلانات المضادة في فرض نفسها في جميع قنوات التليفزيون



اعلان الجمال:

الاعلان الحقيقي:

عندك حبوب في وشك؟ ..النمش مضايقك ومعكنن عليكي؟
عايزة تبقي جميلة زي نجمات السينما ؟
ماتقلقيش خالص اتصلي بخط الجمال والموضة واحنا هنرد عليكي فورا وهنقولك كل الطرق اللي هتخليكي جميلة

الاعلان المضاد:

حبوب ايه يا ستي اللي مضايقاكي وبتاع ايه ؟ هو انتي شابة سيس ؟
وبعدين عمرك ما هتبقي جميلة زي نجمات السينما اصلا الا بعمليات تجميل بالوف والوف
وبعدين عايزة تبقي زيهم ليه اصلا ؟ مش انتي متجوزة؟ متقلقيش خالص جوزك مش هيبص برة اصلا لأن اللي اتجوز مرة مش هيفكر يعملها تاني
يعني مش محتاجة القصة الحمضانة دي في حاجة
فكك من الاعلان ده وقومي اعملي لجوزك اكلة ياكلها.



اعلان التخسيس:

الاعلان الحقيقي:

عايزة تخسي 8 كيلو في اسبوعين بس؟
مع الحزام ده هتخسي اكيد لانه بيعمل ذبذبات لتقوية عضلات البطن والارداف
اتصلي بيناوهنقولك احدث وصفات الرجيم والنظام الغذائي

الاعلان المضاد:

8 كيلو؟ ابقي قابليني ..ده علي اساس انك هتتعشي مياة ساقعة ولا ايه ؟
وبعدين حزام ايه بس ؟يعني هتقعدوا من غير رياضة ولا حركة وهتخس ليه جسم هيفاء وهبي بسلامتك؟
وعايز عضلات في اردافك؟ مش غريبة دي حبتين ؟
كانوا بيقولوا زمان هز يا وز ..لكن مع عضلات الارداف هيبقي هز يا نمر ولا ايه ؟
يا عم وبعدين رجيم بقي ونظام غذائي مهلك وتقعد محروم من الاكل
ان شالله ما خسيت يا جدع متاكل براحتك وعيش حياتك ده الاكل ده متعة ما بعدها متعة.





اعلان الحلل:

الاعلان الحقيقي:

معانا عرض جديدمن البيت الجميل
دلوقتي 60 حلة وكوباية بسعر مغري جدا مش هتتخيله ست البيت
من اجود الخامات ليكي مباشرة
وكل حلة بغطاها لتحضيراشهي الاكلات
يلا اتصلوا بينا
السعرفقط 299 جنيه

الاعلان المضاد:

60 حلة ده بيت درافيل بقي مش بشر؟
بتاكلواايه في ستين حلة ؟ ده انتوا لو عشرة في البيت يبقي برضه كتير
وبعدين اجود خامات ايه بالسعر التعبان ده ؟
وكل حلة بغطاها؟ ياراجل ؟ ده انا فاكرها هتيجي بفتحة سقف وسبويلر .
يا ستي كفاية حلل مافيش مكان في الشقة لتخزين كل ده ارحمي نفسك بقي دي حلل صيني تعبانة





اعلان الأسورة:

الاعلان الحقيقي:

دلوقتي اسورة الماجيكو بالوان كتير تنقي منها
تلبسها بس بايديك تخلصك من الام الضهر وكل الام الجسم
الاسورة في منها اسود والوان تانية مناسبةلكل المناسبات
اتصل دلوقتي وريح نفسك
فقط 100 جنيه

الاعلان المضاد:

طيب اقولك ايه اكيد انت مكسوف من نفسك
يعني معقول هتشتري حاجةزي دي ؟
دول بيلعبوا بالبيضة والحجر يا برنس
دي شعوذة رسمي
لما علاج كل الامك ب 100 جنيه امال العيادات فاتحة ليه؟
والوان ايه بس اللي الاسورة بيها؟ طيب طالما انا طول اليوم ضهري واجعني يبقي مناسبات ايه بس اللي هاروحها طول النهار؟
بجد لو اشتريتها يبقي زيك زي اللي اشتري من اعلان العلاج ببيض النعام انتوا الاتنين اشتريتوا العتبة الخضرا بجد





وبعد مرور شهور ....في مكتب وزارة الاعلام..

عماد: يا باشا الحق
الوزير: ايه ياعماد؟ في ايه تاني
عماد الناس بتوع الاعلانات بيحدفوا طوب ع المبني وبيقولوا الاعلانات المضادة خربت بيتهم
الوزير: خربت بيتهم ازاي ده احنا كنا بنحميهم من المندوبين
عماد: ما هم دول المندوبين يا فندم وبتوع الشركات بيقولوا ماعدوش بيبيعوا اي حاجة من ساعة الاعلانات دي ماظهرت
الوزير: خلاص اهدي ياعماد انا هكلمهم



واتفق الوزير معاهم نلغي الاعلانات المضادةبشرط يخش معاهم شريك في اعلانات جديدة
ويحاول يخدع بيها الناس ويقودهم للسلعة
وبدأت اعلانات من نوع جديد تماما :

زي اعلانات ا لصابون في نهايته : غسلت ايدك بالصابون ده النهاردة؟
واعلان اللبن في اخره: شربت كوباية جهينة النهاردة؟
واعلان التليفزيون: لسه ماشتريتش تليفزيون جولدي؟
ونجحت الحملة الجديدة في اغراء الناس للسلعة واكل الوزير منها الشهد
وانتهت الاعلانات المضادة ورجعت تاني الاعلانات المضللة عشان الوزير يعيش..

وسلملي ع الوزير

Thursday, April 1, 2010

عــبـاءة مــرتعــشة






منذ عهدت الحب ولا اري الازهار الا نقوشا وردية في عروق الارض..
ونظرات الناس مراكب ورقية تسير في بحر من دمع القلب..

احاول ان اجعل من طباعي خواتم او عقد من لؤلؤ علي رقبة هذا العالم..
او اطبع قبلة علي خد طفلة كي تبتسم فارسم من بسمتها بقية طفولة قلب..
اتعلم كيف احنط هذا الوقت كي اخرج من مومياء اللاحب..

حين عشقت تحول قلبي الي لوحة موناليزا لا تعرف هل يضحك ام يبكي او يحزن او يتفائل ام يتشائم..
وتحول صدري الي طاولة لمفاوضات النبض او حقل للغم الباقي من حرب النظرة الاولي..
منذ عهدت الحب ولا اجد ساعتي المفضلة ولا فنجاني المفضل ولا اغنيتي المفضلة...
فصيغة الافضل اصبحت فقط في عينيها..

اصبحت الغزلان طقوس يومية في غرفتي وسفن النبيذ عادة اصيلة فوق المخدة..
وحين انام اجد المشاعر تقفز كالدرافيل في كل الانحاء واكون انا لحظة الغروب لتكتمل اللوحة..
حين عهدت الحب اصبحت كل الاشياء ناطقة حتي اناملي تنطق احيانا تحتاج للمس القلم او الكلمات او يديها فكلهم اصحاب القلب..

تتبخر جدراني لأنظر لأزمنة موازية وازمنة مواتية من فوق سريري..
ويتعلم حتي طعامي فن الرقص الشرقي في طبق الصباح ليحاول ان يجعلني استرخي قليلا..
وياخذ قلبي من بعض رحيل الدم بداخلي "نظارته الشخصية" ليقرأ بعض سونيتات الحب وبعض القصائد..
انا لا اقترن بلحظة ولا التصق بامكنة ولكن انا طوع العشق..

حين عهدت الحب صنع القلم مني تسلية او مهرج في بلاطه الخاص..
وصنع القلب مني عباءة مرتعشة يستلهم من بردها الدفء..
وجعلني الموت اخر فكرة انتحار له ان يأس..
واخر فكرة امل له ان كان سيأمل..

انا منذ عهدت الحب ولا يسري بدمي الا الألحان ولا اشرب الا الخرافات والمعجزات..
لم اعد اهتم بلون جدار او لون وسادة ..فكل ما اهتم به هو لون حياتي الان..
ولون القصص الغريبة في قلبي..
وكأن سندريلا تركت حذائها معلق بين قلبي وضلوعي..
واليس دخلت قلبي واعتبرته عجائبها الكبري..
حتي سندباد غزل من دمي بساط له وهاجر لمدينة اخري..
واصبح قلبي فص للحب وفص للعذاب ..
واصبحت شجوني ابخرة تتطاير فوق عيوني فلا اري الا سحب ودخان..
وغرفتي قضبان ممتدة اينما خرجت ذهبت معي لتعيدني اليها ..

لااعرف للحب سميا..ولا وطن ولا اسم ولاهوية..
ولكن اعرف لمعة خنجره في عيني وصوت الخنجر حين يتخبط في كل جدار كقاتل سكران..
منذ عهدت الحب ولا ادري لما اصبح جبيني حقل للأزهار وقلبي مصباح سحري ..
منذ عرفت الحب ..ولا ادري..
هل هو مصيري..ام انا مصيره ؟ ام نحن مصير للقدر ..