Wednesday, December 26, 2012

شـمــس وقـمــر 39






** كلمة لكل رجل ..
"الفتاة المناسبة"..ليست من ستقابلها بتدبير "المناسبة"  !


** الحاكم الصالح ليس فقط من يفي بالدين..
بل من يدين بالوفاء ..


**  قبل حكم الاعدام يسألون "ما طلبك الاخير قبل ان تموت"
والأولي ان يكون السؤال قبل الوقوع في الحب "ما طلبك الاخير قبل ان تعشق"


** في طفولتنا نسأل عن كل شئ..
وكلما كبرنا سقط سؤال منا..
الي ان يبقي سؤال واحد "متي نجد الحب الحقيقي"


** قالوا "لا يستحق الحياة من عاش لنفسه فقط"
ولكن يستحق الخلود من عاش لعشقه فقط..


** لا يوجد سؤال يطرح نفسه..سوي الحياة..
ولا توجد اجابة تطرح نفسها الا الحب..


** لأن الشر داخل البعض منا فنحن نطلق علي بعض الناس "ذئاب بشرية"
مع اننا نثير استغراب البشر بهذه الجملة ..والذئاب ايضا تتعجب..


** قد يتفوق الانسان علي نفسه..
ولكنه ابدا لن يتفوق علي قلبه..



** لا تجعل من ألسنة الناس عائق لحلمك..
بل اجعل منها سجادة حمراء تصل بها الي حفلة الأحلام..!



** قالت : هل أحببتني من أول نظرة ؟
قلت : بل قبلها
منذ ان كانت نظرتك مجرد فكرة..
فالحب الأول دائما ..يسبق بخطوة.



** تحرير الدول في استقلالها
وتحرير القلوب في احتلالها..




** نهرب من الحاضر الي ذكريات الماضي
ونهرب من الماضي إلي أمال المستقبل
فهل خلقت الحياة لتكون خطوات للهروب الدائم ؟



** اذا هجرت الملائكة قلبك.فاهدم بقايا جسورها..
فقد تصبح في يوم ما جسورا للشياطين.
فمكان الخير المقتول قد يصبح نبتة شر قادم.



** لا تقل أبدا وقعت في الحب ..
بل قل  ارتقيت اليه..



** لا تعجب بفضيلة الصمت اذا ما دفعتك الي صمت فضائلك..



** قالت : أشكرك علي هدية الأمس
قلت : أما أنا  فأشكر عينيك علي هدية الأمس والحاضر والمستقبل



** البشر كالبحار لن تجد من تغلب عذوبته ملحه الا بمعجزة.



** اليائس يهرب من الحياة
والمتفائل يهرب بحلمه مع الحياة

Thursday, December 20, 2012

نهاية العالم بكرة..حد لسه بيصدق الحكايات دي ؟؟







كل فترة بيطلع موضوع "نهاية العالم" ويطلع حد يقول تاريخ معين هيكون فيه نهاية العالم ويحاول يجيب الادلة بقدر استطاعته..لكن اكيد مافيش دليل عنده لان كلنا عارفين ان محدش في الدنيا دي عارف نهاية العالم يوم ايه ولا سنة ايه .
"وَمَا تَدْرِي نَفْسٌ مَاذَا تَكْسِبُ غَدًا وَمَا تَدْرِي نَفْسٌ بِأَيِّ أَرْضٍ تَمُوتُ"


لكن العالم من زمان مهووس بنهايته..شئ غريب جدا انك تلاقي جدول كبير جدا علي الويكيبديا لكل توقعات نهاية العالم وتتعجب اما تعرف انها من اول سنة 634 قبل الميلاد !!
وكان الرومان في الفترة دي مرعوبين من نهايتهم في السنة ال 120 من انشائها .

تخيل ان من قبل الميلاد وهم عمالين يقولوا العالم هينتهي قريب !! واضح انهم مبيزهقوش ابدا.
طيب بلاش نرجع لزمان قوي كده خلينا بس في الكام سنة اللي فاتوا ..تفتكر كام تنبؤ بنهاية العالم حصل في الالفينات بس ؟

قالوا ان العالم هينتهي في 2000  وبعدين قالوا 2001  وبعدين قالوا  2006 وبعدين 2007 و 2008 و 2010 وكان من اشهرها كمان توقعات بتاعة 2011 اما حصلت زلازل كتير في اماكن متفرقة من العالم فحاول بعض العلماء يبنوا عليها النظريات لنهاية العالم ومحصلش كالعادة .

واحد اسمه    Ronald Weinland
قال ان المسيح هيرجع للارض في 2011 والعالم هينتهي ولما لقي نظريته فشلت قال خلاص في مايو 2012 وبرضه محلض حاجة من توقعاته .

حضارة المايا المرة دي هي اللي عمالة تقول ان نهاية العالم في 21 ديسمبر 2012  وطبعا لان العالم اتعود خلاص علي التوقعات الخاطئة دي فمحدش عاد بيصدق والغريب انك بتلاقي بعض الناس بيطلعوا ويحاولوا يقولوا للناس متصدقوش ..بستغرب جدا ان حد لسه بيصدق رغم ان كل سنة التوقعات والتنبؤات دي موجودة من زمان جدا وكمان من قبل الميلاد !!

طيب هل ده اخر توقع ؟ يعني احنا بنقول ان من قبل الميلاد بيتوقعوا لكن هل بتاع 2012 هو الاخير..؟
لا لسه كتير كمان يعني واحد متوقع حسب الجدول ان نهاية العالم من 2018 الي 2028 يعني ده فاتح الموضوع شوية قال يمكن تصيب.
وواحد اسمه "رشاد خليفة" بيقول نهاية العالم في 2280
وحسب التلمود بيتوقع اليهود نهاية العالم سنة 3240

يعني الموضوع مفتوح قوي والتوقعات ملهاش نهاية فياريت محدش يصدق او يلتفت للموضوع ده ..احنا كمسلمين عندنا علامات كتير ليوم القيامة بعضها ظهر وبعضها لسه محصلش خالص
عشان كده مش هنصدق الكلام ده بسهولة لاننا مؤمنين بالله وبالعلامات اللي ذكرها لينا ليوم القيامة.
والاخوة المسيحيين عندهم علامات برضه لنهاية العالم  حسب "رؤية يوحنا" اللي فيها علامات نهاية العالم و"الاختام السبعة".

كان في زمان منجم شهير جدا اسمه "نوستراداموس" كان ليه كتاب اسمه "كتاب التنبؤات" وقال في رأيه ان نهاية العالم هتكون في 3797 وكان ليه الكثير من التنبؤات التانية اللي بعضها حصل فعلا
عشان كده لسه في ناس متمسكة بكلامه ومصدقاه .


من الغريب جدا ان في دول زي الصين واخدة الموضوع بجد ان نهاية العالم 21 /12/2012 صحيفة التليجراف بتقول انهم عمالين يشتروا شموع وغيره من الطقوس لانهم بيستعدوا فعلا لنهاية العالم في كل انحاء الصين .
والصينين اصلا عندهم كتاب اسمه
Tui Bei Tu
في تنبؤات عن مستقبل الصين لكن مذكرش نهاية العالم فيه لكن هم مهوسين اليومين دول بحكاية نهاية العالم .

ومش بس الصين ده كمان في اوروبا مخبأ بين فرنسا والمانيا علي الحدود هيفتحوا ابوابه للي خايفين مقابل 7 يورو !!!
يعني بيستغلوا الحدث لتحقيق ربح علي حساب الناس المذعورين والمصدقين الموضوع ده .



وطبعا احنا عارفين ان السينما العالمية مسابتش موضوع نهاية العالم ده لكن كتير من الافلام اتعمل عن نهاية العالم باكثر من طريقة يعني مرة قالوا ان الكواكب التانية هيحاولوا يغزونا ومرة قالوا نهاية العالم علي ايد النباتات زي فيلم
the happening
وساعات بفيروس قاتل زي فيلم
12 Monkeys (1995

ومرة قالوا انه هيكون بفعل النيازك..المهم الطرق اتعددت ولكن من اشهر الافلام اللي اتكلمت عن الموضوع بتاع نهاية العالم :

Deep Impact (1998
I Am Legend (2007
The Day After Tomorrow (2004
Children of Men (2006
Beneath The Planet of the Apes
2012
Armageddon
War of the Worlds

وغيرهم كتير قوي من الافلام اللي اتعملت عن موضوع نهاية العالم.



في مقالة قريتها في صفحة انجليزية بتتكلم عن اغرب 8 تنبؤات بنهاية العالم .
بيقولك الموضوع زاد قوي بتاع نهاية العالم لدرجة انه طول عمره فيه اشتغالات كبيرة..اكبر مقلب في عملية نهاية العالم دي كانت حكاية
The Prophet Hen of Leeds

دي فرخة كانت بتبيض بيض مكتوب عليه "المسيح سيأتي قريبا" وده حصل في ليدز في 1806 والغريب ان ناس صدقت وبعدين اكتشفوا المقلب ان واحد اللي كاتب علي البيض ده بطريقته ومخليه كأن الكتابة حقيقية فعلا .

وفي سنة 1997 واحدة اسمها نانسي قالت ان كائن فضائي اسمه "زيتا" قالها احذري من الكوكب اكس ..!! اللي هيضرب الارض قريبا.
وبرضه ناس صدقت وطلعت الحكاية كلها ملفقة.


تنبؤات كتير ومقالب اكتر وحكايات خرافية في موضوع نهاية العالم لكن احنا مش هنصدق ومش منتظرين ان "ناسا" تطلع زي ما طلعت تطمن العالم عشان تطمنا لاننا متاكدين حسب دينا ان ربنا وحده اللي يعرف نهاية العالم ومافيش مخلوق مهما تنبأ هيقدر يحدد يوم ولا حتي سنة ولا حتي قرن هينتهي فيه العالم .
وزي الجملة ما بتقول "كذب المنجمون ولو صدفوا"

Monday, December 17, 2012

هؤلاء جميعا ساندوا الحق







برغم موجات العنصرية التي تعلو وتنخفض احيانا في كل ربوع العالم الا اننا تعودنا ايضا علي ان نجد من يدافع عن الحق في كل بقاع الارض حتي ولم تكن قضيته..
حتي وان لم تكن القضية تعنيه من قريب او من بعيد ولكن يكفيه انها قضية تخص الانسانية..

الاحكام المطلقة مرفوضة ..فليس الغرب دائما هو المشكلة..فاننا نجد نماذج غربية متعددة عرفت بمساندتها للحق في قضايا لا تخص وطنها بل احيانا تخص دول هم علي عداء معها ولكنه يشهد شهادة الحق ولا يتحدث الا صوت ضميره .

ومن اشهر هذه الامثلة التي كانت دائما مع الحق حتي ولو ضحت بمنصب او اختلفت مع كل من حولها :


1- هيلين توماس :

صحفية امريكية شهيرة وعضو في فريق البيت الابيض للصحافة ..كانت لها العديد من المواقف الجريئة دفاعا عن الحق ووقوفا في صفه عندما كانت تهاجم بشدة الرئيس الامريكي جورج دبليو بوش وقالت انه الرئيس الأسوأ في امريكا علي مر التاريخ لانه افقد امريكا معظم أصدقائها..وقالت في تصريح اخر لها عن اسرائيل : "هؤلاء الناس محتلون وعليهم ان يرجعواالى ألمانيا أو بولندا...أخبرهم أن يخرجوا من فلسطين» وهذا التصريح كلفها الكثير حيث اعتبره الكثيرون تصريح عير مسئول في وجهة نظرهم.



2- ريتشيل كوري :

امريكية ويهودية ولكنها كانت تدافع عن القضية الفلسطينية بكل قوة وكانت توصف انها "شهيدة الدفاع عن حقوق الفلسطينيين" ..
قتلتها جرافات الإحتلال الاسرائيلي عندما حاولت ايقاف الجرافات التي تهدم منازل الفلسطينين
وتركت مذكرات لها تروي فيها عن مأسي الشعب الفلسطيني من طغيان الاحتلال.



3- وفي كتاب للدكتور عماد نصر ذكرى ذكر مثالين علي نفس الفكرة وهم :

الكاتب الرائع برنارد شو عندما كان له موقف شجاع وهاجم المحكمة واللورد كرومر بسبب حكمهم الظالم علي مصريين في حادثة دنشواي
وايضا الكاتب البير كامو الذي دافع عن حق الشعب الجزائري في الاستقلال.



4- إميل زولا :

كانت له رسالة بعنوان "اني اتهم" وهي رسالة ارسلها للرئيس الفرنسي لتتهم احد شخصيات الجيش في هذا الوقت بانه منحاز وعنصري ضد اليهودي "دريفوس" والتي عرفت بقضية دريفوس الشهيرة التي كان بطلها زولا وضحي بمستقبله من اجل العدالة.



5-نعوم تشومسكي :

من اكثر الامريكيين نقدا لسياسة امريكا تجاه العالم وتمحورت عدد من اعماله حول نظريات المؤامرة سواء من جانب الاعلام الغربي او من جانب سياسة امريكا الخارجية والتي عراها تماما في كتابه الشهير والذي فضح فيه الولايات المتحدة "ماذا يريد العم سام" .



6- جان بول سارتر :

فيلسوف وروائي فرنسي شهير كان له دور هام في حصول الجزائر علي استقلالها من خلال كتاباته.




وممن دافعوا عن الحق حتي ولم تكن قضيتهم في هذه الايام :

1- رغم ما نراه من احداث عنصرية تجاه لاعرب والمسلمين احيانا في امريكا والغرب الا ان احيانا نري بعض الصور المشرقة فمثلا رأينا مبنى "إمباير ستيت" في نيويورك باللون الأخضر احتفالا بعيد الفطر للمسلمين .


2- رغم وجود العديد من الصحفيين ذوي الاراء العنصرية الا ان في حادثة اهانة الرسول الاخيرة ظهرت صحيفة الجارديان لتافع عن الرسول وتكتب عنه مقالة لرد الاتهامات ضد الفيلم المسئ للرسول
وفردت الصحف الغربية مساحات لمسلمين وعرب ليكتبوا مقالاتهم دفاعا عن الرسول ومنهم مفتي مصر.


3- متحف في لندن بعنوان "الف اختراع وواحد" ليظهر اسهامات الحضارة الاسلامية للعالم .


4- شركة "أودي" لتصنيع السيارات توقف تضامنها مع الاسد تضامنا مع الشعب السوري .


5- اما علي الصعيد الرياضي فرأينا العديد ممن ساهموا في قضايا لا تخصهم ولكن لانهم رأوا الحق فقط ووقفوا في جانبه مثل :

* كريستيانو رونالدو يتبرع لأطفال غزة.

* كانوتيه ونجوم اوروبا يعترضون علي تنظيم اسرائيل لبطولة اوروبا لسن 21 وقالوا انها تعتبر مكافأة لهم علي قتل اطفال فلسطين .

* نجم يوفنتوس الإيطالي فيدال قال في احد تصريحاته : لا لاسرائيل ولا للصهيونية نعم لغزة




6- المانيا  ترفض السماح للقس الاميركي المتطرف تيري جونز بدخول اراضيها





رأينا العديد من المواقف والشخصيات التي حاولت بكل جهدها نصرة الحق حتي وان لم يكونوا معنيين بالقضية ولكنهم معنيين بالانسانية ..فالحق اقرب احيانا من القضية ..والانسان أقرب من الجنسية واللون والديانة..
كن دائما مع الحق تنتصر .


Wednesday, December 12, 2012

عربية ام حسين..عربية مصرية جداااا






كل فترة واحد بيطلع يقول احنا عايزين نعمل اول سيارة مصرية ..دول كتير عملت عربيات واحنا قادرين اننا نصنع عربية مصرية ..لكن السؤال ايه مواصفات عربية مصرية ؟؟
كلنا عارفين عربيات مواصفات خليجي مثلا لكن لو عملنا عربية مواصفات مصري تليق بالطرق والمرور المصري ازاي نحل المعادلة دي ؟
كلنا عارفين حسين .."قولهم حاجة انت يا حسين" ..عشان كده قررت ان العربية تبقي اسمها "عربية ام حسين" ونشوف ايه المواصفات اللي ممكن تكون في عربية مصرية :



1- مستشكف بلاعات :

طبعا في مصر "في كل شارع في بلادي تلاقي بلاعة ده شئ عادي"..وعشان كده اللي بيعملوا عربية مصري المفروض يحطوا مستكشف بلاعات بدل الجي بي اس ..
وتحديد نوع البلاعة اذا كانت عالية ولا مخفية ولا خازوق كبير في الارض.



2- زمارة ياسر جلال :

كلنا عارفين الكوميك الشهير بتاع ياسر جلال بتاع "يا حارة وسخة"..انا بقترح ان المقطع ده يكون صوت الزمارة في العربية بسبب الزحمة والاختناقات المرورية الدائمة اللي مش عارف يحل المشكلة دي كل خبراء المرور في مصر من سنين طويلة لان مصر محتاجة تخطيط من جديد لعشرين سنة قدام ..

مصر هي البلد الوحيدة اللي ممكن تلاقي حاجات مش باينة في المراية جنبك لان الموتوسيكل ممكن يكون لازق فيك بالفعل لدرجة انه مش باين في المراية اصلا..
واحنا البلد الوحيدة اللي عندنا الخطوط اللي علي الارض بتاعة عبور المشاة بتخلينا نهدي السرعة مش عشان الناس تعدي ولكن عشان بنفتكرها مطب مفاجئ كعادة الشوارع والمطبات اللي بتيجي علي سهوة وتلبس المطب..

واحنا المكان الوحيد اللي بتلاقي اللوحات الارشادية فيه عايزة تحيرك ..في يافطة شهيرة علي الطريق لو سافرت اي مكان ورجعت القاهرة تاني هتلاقي يافطة بتقول "بنها 5 كيلو" 
وبعديها بشوية وبعد ما تمشي كتير هتلاقي "بنها 6 كيلو"  !!!!
يعني المسافات بتزيد ودي معجزة اصل الارض دائرية والمسافات بتتغير علي الطريق..



3- زقاقة كهربا :

تدوس علي زرار صغير جوة يطلع دراعين من العربية يزق الناس اللي عمالة تلحوس العربية بايديها في كل مكان ..
عادة غريبة عندنا عند بعض الناس تلاقيهم طول ما هم ماشيين جمب العربية في الزحمة يحسسوا عليها وهم ماشيين كأنها وحشاهم قوي ..شعب عشري بطبعه..
وده دور الزقاقة الكهربا في العربية المصرية انها هتزق الناس بعيد وتنفع كمان في زق البياعين الغريبي الاطوار زي بياعين الجزر علي الطريق ولا اللي بيبيعوا "ليفة" كاني هنزل استحمي في ترعة مثلا ايه القرف ده.

وكمان الناس اللي بتمسح العربية بالعافية ويقولك انا مسحتها يا بيه ده محتاج قفا كبير من الزقاقة دي بدراع متعدد المقاسات ..



4- تنفس صناعي :

زي اللي بينزل في الطيارات في حالة الطوارئ انت في مصر هتحتاجه في عربيتك لان ساعات وانت مسافر علي طرق معينة بتحتاج فعلا تنفس صناعي من كتير الروايح الغير معلومة المصدر روايح مريخية بكل المقاييس..
مش بس قش الرز اللي بيفشخ الناس علي الطرق لكن كمان الشكمانات بتاعة الرعبيات اللي بقالها خمسين سنة اللي بتعيم الواحد وهو سايق وتخليك تقفل القزاز بسرعة رغم ان المفروض اني افتح القزاز عشان اتهوي لكن عندنا بنقفل القزاز بسرعة ونحاول نتنفس ونشم هوا نضيف جوة العربية عشان كده محتاجين جهاز التنفس الصناعي..
يعني مش غريبة انك تقف في اشارة وجمبك عربية نص نقل عليها بقر مثلا ده مشهد نادر الوجود في العالم..



5-  صاعق :

بعد ما تركن العربية برضه بتفضل المأساة ..تقفل وتركن وتطلع بيتك ممكن تنزل تلاقي العربية متعلم عليها بمفتاح او كاتبين عليها قصة حياتهم لو كان عليها تراب واكيد هيكون عليها تراب طحن طبعا من الجو الرائع والبديع والغير ملوث المحيط بينا..

من غرائب الشعب المصري انه بيعامل العربيات علي انها شجرة ..وتلاقي "للذكري" وقلوب واسامي وساعات شتايم طبعا علي التراب اللي علي سطح العربية كله..

والعربية في مصر ليها استخدامات اخري كتير ..ممكن تنزل تلاقي ناس فارشة عليها اكل وبتاكل ده شئ طبيعي جدا او واحد نايم علي الكبوت ومأنتخ ما هي تكية ابوه ..
ولو سألت واحد منهم "ينفع كده؟" ممكن يقولك "اه ينفع"  .."احم طيب انا بسأل بس" !!
وعشان كده العربية محتاجة تكون متوصلة بسلوك كهربا عشان اللي ييجي يلمسها يتنفخ كهربا في ساعتها..



6- جهاز الاعتصامات :

طبعا في كل شارع في مصر بقي فيه اعتصام او اضراب او مظاهرة صغيرة..
يبقي انت مينفعش معاك غير عربية مواصفات مصري يكون في جهاز لتحديد اماكن وتجمعات المتظاهرين باليوم والتاريخ عشان تتحاشي المكان ده وتروح تلعب بعيد..
لانك لو دخلت في وسط مظاهرة بالغلط وخبط واحد في عربيتك غصب عنك يبقي هتتفشخ ويقولوا عليك بتدهس المتظاهرين وتلبس تهمة يبقي الافضل انك تعرف كل الاماكن قبل ما تنزل من بيتك..

طبعا مش محتاج تسمع النشرة المرورية اللي بتيجي في الراديو لانها هتقولك كل الشوارع مقفولة "لف وارجع تاني..لف وارجع تاني"
كل ما تفتح الراديو تلاقيهم بيقولوا "يا جماعة المحور واقف ومختنق تماما وكل الشوارع المحيطة بيه"  ربان يطمنكوا ع الصبح ده يوم زي الفل..وتحس انك ساعتها عايز تقول بصوت عالي "لقد وقعنا في الفخ" زي عادل امام..



7- شتامة كهربا :

طبعا مش غريب ابدا انك تكون ماشي في امان الله وسايق تمام التمام وتلاقي واحد فاتح ازازه وبيقولك "يا حماااااااار"
والغريب انه هو نفسه ماشي مخالف وبرضه بيشتم ..وعشان الشتايم مستويات ومراحل لازم يكون عندك "شتامة كهربا " بكل المستويات..
المستوي الاول : "بيبي فيس"  ده اول ما تدوس عليه يشتم الناس الراقية ويقولها يا وحش..يا ندل..
المستوي الثاني : عربية ملاكي  ..دول يتشموا بالفاظ متوسطة زي يا حمار يا غبي
المستوي الثالث : نص نقل ..ممكن تشتمهم بالفاظ زي ابن الكلب او خلافه لو شتموك يعني..
المستوي الرابع : توكتوك..لو ظبطت الجهاز علي المستوي ده يبقي هو كفيل بالتعامل مع كافة الالفاظ وصولا الي "يا ابن الم.."





ودي مواصفات عربية "ام حسين" المصرية ..ومع الطرق المكسرة والمرور اللي في مصر يبقي فعلا "قولهم حاجة انت يا حسين" ..
الومفروض تبقي في يفط قبل المطبات او البلاعات مكتوب عليها  "بلاعة بعد 100 متر..بالهنا والشفا يا جميل..البس"  !!

Wednesday, December 5, 2012

هتقول نعم ولا لأ للدستور الجديد..المزايا والعيوب في دستور مصر







هتصوت بنعم ولا لا علي الدستور الجديد لمصر ؟؟

ده السؤال اللي كتير منا بيسأله في الفترة الاخيرة البعض محتار والبعض مقراش الدستور كله والبعض حسم موقفه من فترة وعارف هو هينزل يقول نعم ام لا ..
قبل ما تدي صوتك وعشان تعرف ايه اللي اتغير وايه اللي لسه ما تغيرش من الدساتير اللي فاتت لازم تدي لنفسك وقت كافي وتقرا مثلا دستور 23 و كمان دستور 71 وتقارنهم بدستورك الجديد..

في ناس ممكن تقول لكن دستور 71 اقراه ليه وهو اصلا عليه معترضين كتير ؟ لكن الفكرة تعرف ايه اللي تم تعديله بالكامل وايه اللي بقي زي ما هو حتي لو اتعدلت الصيغة وايه المواد اللي كنت تتمني تتغير لكن فضلت زي ما هي في الدستور الجديد .

الدساتير في دول العالم توافقية ..سواء تركيا او اول دستور امريكي في 1784 عن طريق جميعة تأسيسية ..او دستور زي اللي حصل في اندونيسيا واللي اتكلم عليه الصحفي وائل قنديل وقال ان بعد الثورة هناك واما جم يعملوا الدستور كانت المفاجئة ان مسيحي يرأس لجنة الدستور في اكبر دولة اسلامية !!
يعني مش فكر اقصائي او تحكم مجموعة معينة بدستور البلاد ..وده نفس اللي حصل في تركيا رغم ان حزب ليه الاغلبية الا انهم اما جم يعملوا الدستور الكل اتجمع من أجل دستور توافقي للبلاد
رغم انه كان يقدر يسيطر ويحط دستور احتكاري لكن التوافق في وضع دستور للبلاد هو الحل.


الدستور زي ما احنا عارفين هو ابو القوانين وهو اللي بيحدد نظام الحكم والحكومة ..وعشان كده لازم نقراه بتأني ونحدد قرارنا السليم لانه مستقبل البلد.


في مقالة قرأتها ل "محمد زكريا توفيق" في "الحوار المتمدن"   يذكر فيها بعض من اقوال الاباء المؤسسون للدستور الامريكي ..وفي الاقوال دي هتلاقي دروس كتير مستفادة في كيفية التوافق في وضع الدساتير :

جننج بدفورد:
إذا امتلكت الأغلبية كل السلطة، من الذي يمنعها من تدميرنا جميعا؟

روجر شيرمان:
أنا ضد تمكين أي فرد من فرض سلطته على الكل. لأنه لم يوجد حتى الآن من فاقت حكمته وعلمه الجميع.


جون ديكنسون:
لا أوافق على مزج السلطة القضائية بالسلطة التنفيذية. الأولى تشرح القوانين، والثانية تنفذها.



لكن هل الدستور المصري توافقي بدرجة كبيرة بلاش نقول مية في المية لان مافيش توافق هيكون بالنسبة دي لكن علي الاقل 80 في المية ؟؟
بعض المنسحبين من اللجنة التأسيسية كانت ليهم اسبابهم منها مصلحة شخصية ومنها ناس خايفة علي البلد فعلا..



لكن ايه أبرز الاعتراضات علي الدستور المصري اللي ظهرت علي السطح ودارت حولها كل النقاشات الفترة الاخيرة ؟؟

1- العديد اعترض علي المادة رقم 198 الخاصة بالمحاكمات العسكرية واللي كان عندهم أمل ان الكلام ده يتلغي تماما ولا لمحاكمة المدنيين امام القضاء العسكري واعترضت بشدة مجموعة "لا للمحاكمات العسكرية للمدنيين" علي المادة وقالت ان المادة مبهمة وتسمح باستمرار محاكمة المدنيين امام القضاء العسكري .


2- اما المادتين 195 و 147 قال عنهم الخبير العسكري محمد بلال في جريدة الدستور :  ان المادة التي تنص " علي أن  وزير الدفاع هو القائد العام للقوات المسلحة ويعين من بين ضباطها "، تعد مادة عائمة ومطاطة وفضفاضة وقابلة للتأويل والتفسير، حيث أن المشرع لم يحدد أي من الضباط يعين وزيراً للدفاع، مشيراً إلى أنه هناك ثلاث فصائل لضباط القوات المسلحة، وهم الضباط العاملين وضباط الاحتياط والضباط العسكريين المتقاعدين.


3- وجدل كبير بيدور عن حرية تكوين النقابات ان المادة 52 بتدي الحق في تكوين النقابات لكن نبيل الصياد احد رؤساء النقابات المستقلة بيقول ان رغم الحرية دي الا انهم اهملوا حق الاخطار زي الجمعيات والاحزاب السياسية وكمان قال الصياد :  هل يعقل بعد مطالبة العمال بحد أدنى وحد أقصى للأجور أن يوضع فى المادة (14) ربط العمل بالإنتاج ودون تحديد ساعات عمل، عن أى فوارق بعد ذلك يتحدث فى ذات المادة موضحا أنه لو قرر صاحب العمل التوقف عن الإنتاج دون سبب سيتم تشريد العمال وإغلاق منازلهم.



4-اما عن الصحافة وحريتها ففي جدل كبير دائر هل اعطي حقوق اكتر ولا بالعكس اخد من حرية الصحافة كتير ؟
صحفيين كتير اتكلموا ان لا يليق بدستور بعد الثورة يبقي علي امكانية حبس الصحفيين وفريدة النقاش قالت كمان ان المجلس الوطني للاعلام بيعينه رئيس الجمهورية فبيصبح خصم وحكم في نفس الوقت وتم ذكر تفاصيل المجلس الوطني للاعلام في المادة 215
واعتراضات بالجملة علي المواد الخاصة بالصحافة خلت الصحف تحتجب عن الصدور بسبب ما يرونه من تقييد ليهم في الدستور الجديد .



5- اما بالنسبة للكلام عن الاجور فان الكلام الدائر في برامج عدة ان المادة 14 لم تربط الحد الاقصي والادني للأجور وهي من اهم المطالب التي كانت الشغل الشاغل بعد الثورة ولا حياة لمن تنادي
وكمان النقطة بتاعة ربط الاجر بالانتاج دي نقطة خطيرة جدا ولا تحترم ادمية العمالة في مصر.



6- ازاي رئيس الجمهورية في الدستور الجديد ليه الحق ان يعفو عمن يشاء ؟؟ في اي دولة في العالم الكلام ده ؟؟ الدستور الجديد لم يراعي الفصل بين السلطات بل ان التدخل الرئاسي في القضاء وفي الأجهزة الرقابية واضح جدا في اكتر من مادة.



7- وطبعا الاحتجاج الاشمل ان الدستور اتعمل يعتبر من فصيل واحد بعد انسحاب عدد كبير برغم ان بعض المواد كان موافق عليها المنسحبين قبل الانسحاب..وقال حافظ ابو سعدة رئيس المنظمة المصرية لحقوق الإنسان في تصريح له : " الدستور المقترح أسوأ دستور كتب فى تاريخ مصر الحديثة ويأخذ مصر الى عصور الظلام"



طيب ايه مزايا الدستور ولا كله عيوب ؟؟

الاستاذ فهمي هويدي كتب مقالة بعنوان :"لنفصل بين الإعلان والدستور"  ذكر فيها بعض اهم الايجابيات من وجهة نظره في الدستور الجديد ومنها :
تقييد سلطات رئيس الجمهورية ــ ضبط العلاقة بين سلطات الدولة ــ التوسع في باب الحقوق والحريات الذي بمقتضاه أصبح تشكيل الأحزاب والجمعيات وإصدار الصحف مثلا، يتم بمجرد إخطار الجهات المعنية، ودون أية اشتراطات أو إجراءات أخرى مسبقة


كل دستور ليه مزاياه وعيوبه وكل واحد حسب قرائته للدستور ..حريتك انك تقول نعم أو لا لكن المم تقرا كل النقط بتركيز وتقاربن بين الدساتير وتاخد وقتك كامل في التفكير في قرار هيغير مستقبل مصر اللي كلنا عايزينه يكون للأفضل طبعا.

تقول نعم أو لا المهم يكون باقتناعك انت بضميرك انت وقرائتك انت للدستور مع الاستعانة اكيد برأي الخبراء في الاعلام والصحف واهل القانون والدستور طبعا لانهم بيزودونا بمعلومات وحقائق عن الدستور وتفاصيل مهمة جدا .

اسمع كل الاراء وكون وجهة نظر وقناعة شخصية بدون تحيز لاي فصيل او هوي سياسي معين ولكن خلي كل تفكيرك وولائك لمصر ..مصر فقط..مصر فوق الاهواء والمصالح الشخصية..
شارك في دستور بلدك بس عشان مصلحة بلدك.