Wednesday, March 30, 2011

البيه ديموقراطي ..اديني جرعة حرية في العضل





عايز ديموقراطية ؟؟ كلنا محتاجين ديموقراطية..بس احنا اتربينا علي الديكتاتورية في كل شئ..من اول المدرسة لحد ما بعد الجامعة..محتاجين نغير كل ده فعلا ..عشان ندوق طعم الديموقراطية اللذيذ..
شوف ازاي بقي في مصر الطفل لازم يطلع ديكتاتور اما يكبر لانه مفروض عليه كل حاجة طول عمره واول ما ينفجر هيبقي ديكتاتور كبير :




من وانت صغير مبتختارش اي حاجة حتي انك تلعب هجوم في حصة الألعاب الا لما تكون صاحب الكورة غير كده هيرموك حارس مرمي ونفسك تلعب في مركز الهجوم بس هييجي الواد التخين صاحب الكورة يلعب هجوم ودفاع وكل حاجة في الملعب !

هتروح مع ابوك تجيب شنطة المدرسة عجبتك شنطة معينة لونها حلو ابوك هيقولك "لا دي خامتها متستحملش" انا هاجيبلك التانية دي امتن منها ! يا عم طيب ما تسيبني اختار انا تستحمل ايه هو انا طالع الجبل ؟
هتروح المدرسة هيختارولك "زي موحد" تلبسه وتفضل تلبسه كل يوم ده بعد مرحلة المريلة اللي كنت بتلبسها في حضانة وكأنهم بيقولوا الطفل ده اهبل يا جدعان لبسوه المريلة .

هتنط مرحلة لفوق بقي وتدخل اولي اعدادي بقي هتقول انا كبرت وعايز اختار ..مافيش فايدة كان غيرك اشطر ..المدرس هيقولك هات لون جلاد معين للكشكول وحجم الكشكول حتي مش في اختيارك ساعات بيحدوا انهم عايزين كشكول 60 ورقة ولو جيبت كراسة تنضرب ! تعليم سوبر لوكس ع المفتاح يعني في مصر .
مش هتاخد درجات اعمال السنة الا لما تعمل لوحة للفصل ..اعمل لوحة للفصل ؟؟ مش دي تبقي رشوة ؟؟ هيقولك لا اصل جدران الفصل مقيحة ومتهالكة طيب وانا ذنبي ايه هو انا مجلس المدينة يا عم انت ؟ ماتروحوا تعالجوا ام الفصل المعفن ده هو ده فصل ينفع معاه لوحة ده ايل للسقوط اصلا .

هتسأل الأبلة "أبلة انا ليه بحفظ الجهاز التنفسي للبطة ؟؟ هو انا هشتغل فرارجي ؟؟ ده حتي افرارجي المتخصص ميعرفش هو بيدبح وخلاص" هتقولك "احفظ من سكات عشان الامتحان "
دخلت الثانوي بقي وعايز تفكر بقي وبتاع بدل الحفظ ..هتروح تاخد درس عند مدرس انجليزي سألني سؤال في القصة قولتله رأي الشخصي قاللي "ايه ده ؟ ايه اللي انت بتقوله ده ؟ "
قولتله "ده راي في القصة ؟ " هيقول "رأيك ؟؟ أنت هتتفلسف ؟؟ سمع من سكات "..!!!

هتدخل الجامعة بقي وبتاع وعايز احس براي الشخصي عايز جو ديموقراطي بقي يا جدعان عارف هيحصل ايه ؟؟..هتلاقي الناس بتقولك انت مالك يا عم ومال الكلام ده ؟ العيال بتاعة اتحاد الطلبة دول بيتراقبوا خلينا في الطيب احسن وفي الجانب الامن بلاش وجع دماغ..!

مش هتختار اي حاجة في الجامعة الا بس تاكل هامبورجر معفن بالطين بتاعه تقريبا من الكافتيريا اللي ريحتها عرق السنين من العمال اللي فيها ..وجبة كاملة قوي ان الناس تفطر هامبورجر في الجامعة !
وعايزهم بعد كده يفهموا المحاضرة ؟؟ ده بيقولك اللي بيفطر فول ما بيعرفش يركز طيب دول بقي بيفطروا هامبورجر ..لحوووووم يا بشررررر ع الصبح ؟؟؟

طيب خلصت بقي مرحلة الجامعة عايز ديموقراطية بقي ومجتمع حر وتقول رايك بكل حرية ..مافيش فايدة هيقولولك الأحزاب دي سكتها مش تمام وبلاش منها احسن او لو عايز متتجوزش هتفضل الناس تسألك يا ابني هتتجوز امتي بقي ؟ اما بالنسبة للبنت يقولوا عليها لفظ "عانس" مع ان كتير منهم اختاروا عدم الجواز بس برضه الناس هتفرض رايها بديكتاتورية ويقولك دي عانس يا عم !

عايز ديموقراطية بقي يا حلو ولا خلاص استكفيت ؟؟ لو طلعت ع المعاش بقي ورايح تنضم للعمل السياسي هيقولوا ايه عليك "بعد ما شاب ودوه الكتاب " ..تاني الناس بتفرض رأيها بديكتاتورية عليك مافيش فايدة..مهما قولت ان دي كانت رغبتك من زمان بس كنت مستني تطلع ع المعاش وكده هيقولوا ياعم "ما هو بقي راجل فاضي فقال يشغل نفسه بشوية سياسة " !

حتي النادي بتاعك ديكتاتورية كاملة لو ابوك اهلاوي هتطلع اهلاوي عافية يعني ولو عيلتك زملكاوية غالبا هتبقي زملكاوي طبعا يعني مش هتختار اي حاجة يا عم الديموقراطي .
ولو قولت وانت صغير "بابا بابا ام كلثوم دي صوتها وحش قوي ايه القرف ده متجيب شيرين ولا حد بيفهم في الغنا " هتلاقي الاجابة لا تحمد عقباها وغالبا هيتهموك انك "خرونج" مبتفهمش في الطرب ..
طيب افرض يا اخي ده راي انا ..انا شايف ان صوتها وحش ايه مشكلتك يعني ! الناس حافظة ان صوتها حلو معدش ينفع المناقشة خلاص زي ما كانوا حافظين ان حسني يعني الريس مافيش مناقشة خلاص مشنفعش ريس تاني !

"مبحبش اروح افراح " هيقولوا انت مش مجامل وقاطع الرحم !!..يا سيدي انا مبحبش اروح افراح ايه مشكلتك انا شايفها مناسبة مزيفة لا تستحق كل هذه الفرحة المبالغ فيها اول مرة اشوف واحد بيرقصوله عشان هيتفشخ في حياته !!

كمان في مرحلة الجامعة تقدر تدخل المكتبة تزود معلوماتك في موضوع معين ؟؟ هيقولوا عليك بتشتت نفسك وبتخرج عن المقرر وغالبا هتشيل المادة ..لان لازم تحفظ الكتاب يعني حتي الكتب اللي بتيجي من امريكا عشان الفهم احنا بنحفظها واكبر دليل علي كده كلمة "ملغي"..الفصل ده ملغي يا ولاد هيييييه..يعني قصده متحفظهوش مع انه مرتبط جدا بباقي موضوع الكتاب بس هو حافظ مش فاهم برضه .


الحياة كلها ديكتاتورية من اولي حضانة لحد اخر عمرك ..الديموقراطية قليلة ونادرة قوي في حياتنا خصوصا واحنا صغيرين والتحكم الكامل فينا من الابوين والمدرسة والناظر اللي عايز ساندوتشات فول عشان يخليك تغيب براحتك "ايه سفن ايه" يا بشر واللهي ! تعليم من اللي بالك بالك من نوع "من ده بكرة بقرشين " .


حتي لو في عزومة تلاقي ناس تحلف عليك عشان العشم وكده يقولك "كل دي انا حلفت" "عليا الطلاق لانت واكل الفرخة دي" ..ارحموني يا عالم وانت بتحلف ليه يعني وتقولي انا حلفت ؟
وناس تقولك "يعني ينفع تسيب الطبق كده ؟ " ايه المشكلة ؟؟ الطبق هيحس بالوحدة ولا ايه مش فاهم ؟؟..ما هو انا معدتي هتنفجر هو لازم اكل اللي حطيتهولي بالعافية هو انا قطة وانتي رميتيلها
طبق لبن ؟؟

بتاع التاكسي يقولي "يا بيه معلش هنزلك هنا اصل ده معاد الغدا بقي وانت عارف وعموما المبني خطوتين اهو خلاص" يا عم غدا ايه دلوقتي الساعة 12 ؟ هو اي كلام ؟ لو قولتله لا هتلاقيه كأنه زعل مثلا وممكن يناقشك في الاجرة بقي بعد ما كان متسامح وبيبتسم !

"ماما انا هتغدي النهاردة تونة " هتقولي طليه يا ابني مافيه اكل في التلاجة "..طيب انا عايز اسأل سؤال..هي التونة دي شراب فوار مثلا ؟؟ ما هي اكل علي فكرة ..وبعدين هو انتوا ليه بتستحقروا التونة اوي كده وبتعتبروها انها بديل الاكل ؟؟ ليه ملهاش احترامها كوجبة يعني ؟؟ واللهي لاعمل جمعية الحفاظ علي التونة علي الفيس بوك عشان ترتاحوا ..هو انا لازم اكل الصنف الموجود بالعافية..؟ لااااا انا عايز تونة طلبت معايا تونة والتونة اكل ..وعباس الضو قال التونة دي اكل .

وعايزين تبقوا ديموقراطيين ؟؟ دي الحياة كلها ديكتاتورية يا جدعان..ده انا خايف حد يختارلي الملابس الداخلية..مع ان ممكن واحد يقولك "خد البوكسر ده يعجب المدام" او لو واحدة ست البياعة تقولها "خدي البتاع ده يعجب البيه" ..يا ستي المهم يعجبني انا ..بوكسر ايه اللي يعجب المدام ؟؟ هي المدام كمان هتتحكم في البوكسر ؟؟ وبعدين مافيش مدام اصلا الحمد لله يا اخي .


كلها فترة بقي ونعيش في مجتمع ديموقراطي ونشوف شعبولا يعمل حزب سياسي ولا حاجة بس شكلها كده هتفرط منا ديموقراطية زي ما فرطت مننا ديكتاتورية كاملة ..واديها كمان حرية يا عم الحاج .

Monday, March 28, 2011

نبضة قلب جنية في ضباب أحلام







قابلت جزيرة في عيونك وأنا بغرق..
وشهد أحلامي يتمسكن في بحر أزرق..
وكنز الحسن عديته ولا بسرق..
قابلت جبينك السابح في ليل ممدود..
ورمل الشعر يسحبني وانا مخضوض..
اتاري الرجل دي مايلة عشان ما تعود..
قابلت الرمشة في عيونك نعيم بينام..
ونبضة قلب جنية في ضباب أحلام..
لأول مرة اشوف قوة في الإستسلام ..
رأيت من نظرتي الاولي انفجار الكون..
وجوة البسمة لو صافية حداد اللون..
وميت شاعر بيتوضي بكلام مجنون..
قابلت في عينك القاتلة وصيفة قصر..
ورايحة تبلغ الملكة بفرحة نصر..
خطفت الورقة بعيوني وخطفت النصر..
قابلت انا فيكي صوت ادم مع شجرة..
وكام تفاحة مسكونة بزهور حمرا..
غريب المشهد ان شفته بعين حوا..
غريبة اللحظة في عيونك نداها سيول..
طيور بتزقزق الملكوت بريش مبلول..
وريدي بينطق النبضة ولا بيقول..
هاسيب في عيونك الكلمة دهب مطلي..
ولو محتاجة لبريقها هتندهلي..
اجيلها بطرحة الأشعار علي مهلي..
اطير في القلب سجادتي الف بلاد..
اسير ولا موت علي عيونك ولا استشهاد..
ونبضي يبوس جبين صبحك في حلمه ساعات..
قابلت في عينك الدنيا ملايكة وحور..
وشعر اتبل من بحره في وسط سطور..
جناح ممدود علي قلبي لكن مكسور..
مشيت في عنيكي اترهبن في تفسيرها..
وتوهت ما بين حقيقتها وتمثيلها..
وتاه قلبي اللي بيسبح بطلتها..
رقيت الشعر من عينك حروف وحروف..
حشدت الحرف ع الورقة الوف والوف..
وداب الحرف ع الورقة ياقوت مصفوف..
حبيبتي اتغطي من ضلعي في ليلة زهر..
وشوفي الدنيا من عيني رسالة بحر..
وحني الدهشة في عيوني بشبكة ومهر..!

Sunday, March 27, 2011

ثورة عالمية علي ارض مصرية







بعد الثورة العالمية المصري بقي حاجة تانية خالص..سمعته ومكانته ارتفعت في العالم كله وبقي اسم او كلمة "مصري" ليها قيمة بجد يستاهلها واكبر بكتير من قيمة المصري اللي كان في عهد مبارك طبعا..
بقينا حديث الجرايد العالمية ووكالات الانباء وكمان الوسط الفني في هوليود وحتي لعيبة الكورة في العالم كله وكتير اتكلموا عن الموضوع ده وبعض المواقع تكلمت عن بعض الاقوال وجئت الان ببعض الاقوال والجمل الجديدة عن الثورة المصرية وبعض الكتب اللي هتصدر او صدرت حديثا وبتتكلم عن الثورة المصرية :



* المذيعة الشهيرة اوبرا كان من المحتمل انها تعمل حلقة في ميدان التحرير لكن القرار اتأجل من فترة واحتمال تعيد التفكير تاني في الحلقة دي لان طبعا ده سبق ليها لو لحقت قبل ما تنهي برنامجها


* فرحة هيلاري كلينتون وهي بتاخد صور في ميدان التحرير كأنها بتزور معالم اثرية وابتسامتها ملئ الوجه عشان هي فخورة انها في ميدان التحرير


* المجريون من فترة طلعوا في مظاهرة بسيطة وقالوا "يمكننا ايضا ان نكون مصريين" طبعا بقينا مثال للثورة والمطالبة بالحقوق والتخلص من الظلم والقهر


* حفيد المهاتما غاندي بيقول ان الثورة المصرية الهمت العالم كله


* المطربة الشهيرة "اليشيا كيز" قالت ثورة المصريين نتيجة الكبت والحرمان من الحرية "


* باولو كويلو الكاتب الكبير بيقول للمصريين في رسالة خاصة "لا تنسحبوا عانوا الان وعيشوا حياتكم كأبطال "


* وايضا رئيس الوزراء التركي اردوغان قال في تصريح لموقع "تركيا اليوم" :

" ولذا فنحن أكثر الشعوب إدراكا وفهما لمشاعر ومطالب ورغبات الشعب المصري وصرخاته في ميدان التحرير، وكنا نعرف جيدا أنه لا قبل لأي قوة في أن تقف حائلا بين الرغبة في التغيير، وأنه لا يمكن للقهر أن يظل مهيمنا إلى الأبد، من أجل هذا لم نسكت وعبرنا عن رأينا إزاء الوضع في مصر في وقت سكت فيه الجميع، ولم ننتظر على حين انتظر الجميع، لقد تحركنا بقلوبنا وأفئدتنا وضمائرنا، ولم ننتظر النتيجة التي سيسفر عنها الوضع وحددنا موقفنا، وبيَّنا أننا لن نتخلى عن دعمنا لمصر وشعبها".



* في 21 ابريل القادم يصدر الكتاب الامريكي
Tweets From Tahrir
وهو عن بعض الاراء التي وردت من ميدان التحرير اثناء الثورة المصرية وبعض ما قالوه الشباب وتناولوه عن الثورة في موقع تويتر رسائلهم واخبارهم


* اثارت الثورة المصرية والثورات العربية فزع اسرائيل وعقدوا اكثر من اجتماع طارئ لمناقشة الاوضاع في المنطقة لانهم يشعرون بقوة مصر القادمة بدلا من الخنوع والاستسلام في العهد السابق


* المطرب "نيك ليتشي" كتب ايضا علي موقع تويتر احساسه عن الثورة المصرية ويقول :

"يوم كبير لمصر..مبروك لكل المصريين وصل صوتكم للعالم "


* جائزة نوبل للسلام من الممكن ان تذهب للشعب المصري حسب بعض الترشيحات


* وائل غنيم يحصل علي جائزة "جون كينيدي" للشجاعة في امريكا


* توماس فريدمان الكاتب الشهير قال عن الثورة المصرية : " ثورة المصريين أعظم مما يتصور أي خبير في الشرق الأوسط"


* اوباما عمل خطاب كامل للشعب المصري عن الثورة وقال للمصريين لكم الحق ان تفخروا لانكم ابطال وقال :

"شاهدنا ظهور جيل جديد لديه قدرته الخاصة بالإبداع والموهبة والتكنولوجيا بحيث نطالب الحكومة بأن تتجاوب مع آمالهم، موضحا أن هذه هي قوة الكرامة الانسانية والتي لا يمكن إنكارها على الشعب المصري الذي ألهمنا بفكره أن العدالة لا تتحقق عن طريق العنف ولجأ للاعنف عن طريق القوة الاخلاقية "


وكثير من المقالات في معظم الصحف الامريكية والانجليزية تتحدث عن الشباب المصري وقوته وكانت مقالة قوية في موقع "ايه بي سي نيوز" تتحدث عن جيل الشباب المصري وقوة تاثيره





وفعلا لابد ان يفخر المصريين بانهم مصريين ..دائما نحن فخوريين بمصريتنا ولكن الان فلنفخر اكثر واكثر بمصر الديموقراطية القادمة ان شاء الله

Saturday, March 26, 2011

فتــاة البــورنو..قصة قصـيرة






لم يكن هشام أول من رحل بعيدا عن حبه الأول وان كان الحزن داخله يخبره بأنه الوحيد !
وكأنه دخل في مرحلة "الملاذ الأمن" بعد الهجر ..والتي يبحث فيها العاشق عن نصف جنونه او نصف حياته المفقود او إمرأة أخري..
فمن يترك حبه الأول فكأنما "سندريلا" تركته في حفلة منتصف الليل ومازال يمسك حذائها في يديه محاولا العثور عليها ولو في إمرأة أخري مشابهة..

كان "هشام" شاب يقارب الثلاثين من العمر لا يقتنع كثيرا بمبدأ الحب الثاني فالحب أولا وأخيرا في نظره وما غير ذلك محاولات لإستمرار الحياة فقط اما الحب الأول فلا مساس له في رأيه.
في يوم قارص البرودة استيقظ في وقت الفجر تقريبا ليجلس أمام شاشة الكمبيوتر كعادته..فلا يستطيع ان يحصل علي قسط من نوم هادئ اذا تذكر حبه الأول او جائته في الحلم فجأة ..
جلس طويلا امام الجهاز بلا شئ يفعله ..وفجأة رأي اعلان جانبي في احد مواقع الانترنت وفتحه..لم يكن إلا موقع من مواقع "البورنو" ..!!
"هشام" لم يكن من المعتادين علي ارتياد مثل هذه المواقع ولكن دفعه الفضول لبعض التأمل لأن الموضوع ليس احدي هذه المواقع بالمعني المألوف ولكن اشخاص حقيقية علي كاميرات يحاولون عرض اجسادهن مقابل المال فاستغرب هشام من هذا ودفعه فضوله الي الدخول اسرع ..اعتدل في جلسته وبدا التركيز واضحا عليه وكأنه يقوم بعمل مهم..

اشرقت شمس الصباح ومازال هشام يجلس وكأنما يهرب من "الحلم" الذي باتت عليه ليلته متأملا حبيبته الأولي..وفي احدي لحظات الهروب هذه استوقفته فتاة علي الكاميرا لم تكن كغيرها من السابقات ..

لم تكن اشراقة شمس الصباح صدفة..فكأنما اشرقت الشمس من عينيها ايضا !..بدا هشام كأنه مومياء محنطة لفترة من الوقت امام تلك الفتاة العشرينية ذات الجسد ذو الحمم الأنثوية الفائرة كبركان وذات العينين التي يشبهان فرمانين بالعشق وذات الشعر الطويل الذي تري فيه سر الليل وقمر يدفن سره عن البشر..تعجب هشام كثيرا في البداية ثم بدأ بكتابة اول حرف واستغرب قليلا حينما دفعه جنونه امامها لكتابة اول جملة : "من أنتي" ؟ ولماذ جئتي في هذا الوقت تحديدا ؟
تعجبت الفتاة كثيرا من السؤال حيث انها معتادة علي كلمات تتغزل في جسدها او في عينيها ولكن ما جعلها تعتدل في جلستها فجاة غرابة السؤال واحساسها باختلاف كامل

اجابت السؤال باجابة اغرب لم يتوقعها هشام من فتاة في موقع بورنو كانت في نظره رخيصة وقالت : "انا نصف إمرأة تجمع المال تحتاج ولو لنصف رجل يفهمها دون ان تتعري امامه " !
قال هشام "علي فكرة انا لست معجب بكي ابدا.."
قالت" لماذا تهرب ؟ اجابتك تدل علي انك لا تريدني عارية ولكن تريدني إمرأة "
قال" انتي جسد..يالله بماذا افكر اللعنة "
قالت " تستحقرني ؟ "
قال "اعذرك.."
قالت" هل أحببت من قبل ؟ "
قال " بل مت عشقا ومازال جرحي يندمل فلماذا اصبحتي فجاة نارا علي جرحي تريدين ان تفتحيه مرة اخري "
قالت " شهور ولم يخاطبني احد ابدا..الكل يخاطب صدري او جسدي ويرمون لي المقابل ..انت شخص اخر"
قال" لا انا مثلهم..انتي مجرد جسد امام عيوني ولا اري شئ اخر يستحق الانتباه..انتي فتاة بورنو "
قالت " تقولها لتهرب ؟ ام انك تشعرها ؟ "
قال" لا لا مما اهرب ؟ انها الحقيقة ..انا لن اخرج من حب لكي ادخل الي..."
قالت "حب جديد ؟؟"
قال "ماذا تقصدين ؟..هل تظنين اني وقعت في حبك ..انك تحلمين "
قالت " ام تقصد انك تحلم بي الأن ؟ "
قال "انك مغرورة ملعونة..لابد ان ارحل الأن "


وبعد مرور أيام عاد مرة أخري في نفس غرفة البورنو ولكنه كان مختبئا لم يكتب حرفا واحدا ..والمفاجأة انها كانت تعرف انه موجود في الغرفة في وسط الزحام من عاشقي الجسد ولكنها كانت تلحظ اسمه المكتوب دون ان يعرف هو انها تعرف وفجأة :

قالت " عدت مرة اخري ؟ "
قال " لا انه مجرد حب استطلاع "
قالت " استطلاع لجسدي ام لعيوني ؟ اكثر من ساعتين الحظ وجودك هنا وانت مختبأ "
قال " لا اعرف ماذا يحدث لي..ماذا فعلتي بي ايتها ال..
قالت " عاهرتك سيدتي ..تريد ان تنتقم من الحب او تراه في صورة عاهرة كي تخرج من حبك الأول ؟ "
قال " ياليت هذا كان تفكيري..بل ينتقم مني الحب ويذلني لأني هجرته "
قالت "انها عصا الحب السحرية ؟ "
قال " انها ليست عصا سحرية انها عصا الموسيقار كيوبيد يريد ان يعزف اغرب الحانه واكثرها نشاذا "
قالت " هل شعرت السهم في اضلعك ؟ "
قال "اريني جسدك ايتها العاهرة "
قالت "حسنا تريد ان تهرب مرة اخري مما تشعر به..حسنا سأريك عيوني "
قال "بل جسدك"
قالت "بل عيوني انظر جيدا..شئ ما في مقلتي يرتجف ويقول انك تشعر بما اشعر به "
قال "وهل تشعرين بشئ ايضا ؟ "
قالت " الان عرفت الحقيقة..لقد قلت "ايضا" ..اذن انت تشعر بشئ "
قال "انا مضطر للخروج الأن "



شهور عديدة وحوارات دائمة بين الطرفين دون ان يعرف هشام انه يوقع نفسه تلقائيا في شئ جديد..شئ يشبه الحب ..لا يحاول ان يسميه حب لانه يهرب دائما من فكرة الحب الثاني فما بالكم انه مع "عاهرة"

هرب هشام من هذا الفخ محاولا ترك كل شئ وراء ظهره فاغلق الكمبيوتر تماما ونزع كافة الأسلاك ولم يكلمها لمدة شهر او اكثر وبعد ان فتح صندوق رسائله وجد اكثر من خمسة رسائل منها تسأل هل انت بخير ؟ ..كانت العلاقة قد توطدت بينهم في الفترة الاخيرة اكثر فأكثر ولكن هرب هشام فجأة ..هرب ما بين مرحلة الحب والولع..لم يريد ان يصل لهذه المرحلة معها ليس لانه لا يحبها ولكن لانه ينتصر لمبدأ الحب الأول..ليس لانه ينتصر لفتاته الأولي ولكن لانه ينتصر لحبه الأول..فالمبدأ عنده اكبر كثيرا من الاشخاص ..كان يغلق الكمبيوتر بعنف شديد ويقول صائحا "هراااء لا يوجد ما يسمي بالحب الثاني..اللعنة..لا يوجد ما يسمي بالحب الثاني "

لم تكن احدي افلام الخيال العلمي ولكن في يوم ما بعد مرور شهور وجد رسالة علي صندوق رسائله بعدما فتح الكمبيوتر مرة اخري عنوانها "مرة اخري انتصر "
كان العنوان غريبا جدا علي هشام فهو لم يكن في عداوة مع احد معين كي يجد هذا العنوان المستفز ولكن وجد الرسالة من "ايميل" مجهول..لا يعرفه وتقول الرسالة :

"اهرب حيثما شئت ولكني هزمتك مرة اخري ..حيثما ستذهب ستجدني وحتي لو كنت في بروجا مشيدة ..لا لا انا لست الموت..ولكني الحب..انا اول وثان وثالث والي الابد وسأهزم مبدأك في فكرة الحب الاول خالد ..كما هزمتك في اول مرة حينما قلت لن احب ابدا فالحب ضعف..انا المنتصر مرة اخري.."
التوقيع...كيوبيد


كيوبيد ؟؟ ماهذا الهراء ..ماذا يحدث..؟؟ هل هي فتاة يختبئ فيها كيوبيد ليقهرني ام هي حرب غير معلنة بيني وبين السماء ؟؟
ذهب هشام سريعا الي الموقع ليبحث عن فتاته فلم يجدها وقالوا رحلت منذ شهور عن الموقع بدون سبب واضح .ماذا يحدث ؟؟ هل هي فعلا موجودة ام انها هي نفسها "الحب الثاني" او احدي خدع كيوبيد السحرية ؟؟


جن جنون هشام وعلق لافتات في غرفته "الحب اول للابد يا كيوبيد ولن تهزمني ..لن تهزمني "

ومازال كيوبيد يضحك في سمائه ومالزالت الملائكة تستجديه ان يرحم هذا العاشق والا يلعب بالعشاق بقسوة مثلما يفعل ..ومازال هشام حائرا ومرت عليه سنوات وخاطبته احدي الفتيات في احد المطاعم ونظر الي عينيها وكانت تشبه كثيرا فتاة البورنو ..نفس العيون تقريبا ..
قالت " ممكن أن استعير منك قائمة الطعام فانا لا اجدها علي منضدتي"
قال " ممكن.. ولكن لا يوجد ما يسمي بالحب الثالث "
قالت " عذرا ؟؟ "



هل انتصر كيوبيد ؟؟ ام انتصرت فكرة خلود الحب في قلب هشام ؟؟
مازال السؤال يدور..ومازال كيوبيد يضحك في الاعلي..!

Friday, March 25, 2011

الجـــواز من وجهة نظر أفلام هوليود





الزواج ..عندما نتحدث عن الزواج بنكهة ورائحة هوليود فان له طعم ومذاق مختلف..سواء افلام تحببك في الزواج او افلام تجعلك كارها لكلمة زواج او افلام تجعلك في حيرة شديدة هل اتزوج ام اظل عازبا !

افلام متعددة تناولت هذا الموضوع سواء في مشاهد بسيطة منها او في مجمل الفيلم او في شجارات عابرة بين الزوجين في الفيلم ولكنها شجارات عنيفة جدا !
ونبدا بتفصيل الافلام لثلاث نوعيات واول نوع هو الافلام التي تجعلك تكره فكرة الزواج :



1-
Revolutionary Road

فيلم رائع وابطال نار علي علم "ليوناردو دي كابريو" و "كيت وينسلت" يقدمان ملحمة فنية في هذا الفيلم ..ولكن مشهد الشجار الدائم في وسط الفيلم الذي يستمر طويلا ان شاهدته اكثر من مرة ربما يصيبك احباط رهيب من فكرة ان تكون زوج اصلا..
مش اي خناقة زوجية تبقي زي الخناقات اللي جوة الفيلم ده .صراخ وبكاء وتهديد بالانتحار وطلب طلاق وكل حاجة تعيسة في الحياة الزوجية ممكن تشوفها في مشاهد الفيلم للي عايزين يتجوزوا نصيحة متشوفهوش احسن !



2-
The Heartbreak Kid

لو اتسرعت في الجوازة..كبرت في السن فقولت اتجوز وخلاص ولم تحسن الاختيار..الفيلم ده هيخليك تعرف انك هتندم علي اختيارك..خصوصا لو حبيت فعلا بعد ما اتورطت خلاص في واحدة كل صفة فيها لا تناسبك ابدا
فيلم رومانسي كوميدي لذيذ ولكنه بيبرز ازاي تقع في مطب اختيار سئ جدا وتكتشف ماضي رهيب لزوجتك وانها شخصية مستحيل تعيش معاها ويخليك الفيلم ده تفكر الف مرة في الجواز من خوفك لتقع في نموذج زي ده


3- افلام الخيانة الزوجية :


دي كمان مجموعة تكرهك في الجواز وهي مجموعة الخيانة الزوجية
تعددت الافلام اللي بتتكلم عن موضوع الخيانة الزوجية سواء خيانة من جانب الزوجة او مجموعة لخيانة الزوج من المجموعة دي :


All the Good Ones Are Married
في الفيلم ده الزوج هو اللي بيخون الزوجة وفي بيتهم كمان وهي بتكشفه لانه بيقيم علاقة مع شابة مراهقة

Shattered
طبعا ده فيلم رائع من بطولة "بيرس بروسنان" ومجموعة ابطال وقصته ان طرفين في الموضوع حسوا بالخيانة فبيلعبوا لعبة علي الزوج الخاين للانتقام منه في اطار غموض ومفاجاة في النهاية


Married Life
فيلم ايضا جيد جدا عن الخيانة الزوجية وبرضه من ابطاله "بيرس بروسنان" وكأنه متخصص خيانة زوجية وهنا الزوجة هي اللي بتخون زوجها الاكبر سنا بفارق عمري كبير


Separate Lies
اداء متميز ورائع للمثل "توم ويلكينسون" الذي اعشق ادواره دائما..يكشف خيانة زوجته ايضا بعد شك عميق ينتابه لفترة


The Other Man
انطونيو بانديراس وليام نيسون واداء متميز جدا من الطرفين في هذا الفيلم اللي بيكرس الزوج حياته لكشف خيانة زوجته عن طريق تعقب الراجل المشكوك في امره ولو سافرله بلاد عشان يعرف حقيقته


Chloe
تاني "ليام نيسون" ومعاه "جوليان مور" المرة دي هي اللي بتكرس حياتها عشان تكشف خيانة زوجته عن طريق الاستعانة بعاهرة عشان تفشح امره ولكن الغريب انها بتقع في علاقة مع العاهرة دي في اطار عجيب في الفيلم وتتدمر حياة الاسرة بسبب الحكاية دي والزوج مظلوم


Eyes Wide Shut
نيكول كيدمان و توم كروز في فيلم من اروع افلام الدراما في التاريخ ..ماذا لو اكتشفت ان زوجتك لها ماضي قذر ؟ انها كانت فتاة ليل ؟؟ كيف ستكون حياتك وكيف سيكون الشك داخلك ؟
هذا هو اطار الفيلم


The Truth

فيلم جيد عن لص يقوم بالاستيلاء علي منزل ليكتشف الزوج ان هذا اللص كان له علاقة قديمة مع زوجته اصلا وانهم متفقين معا علي السرقة بتخطيط الزوجة





افلام تحببك في فكرة الزواج :



My Big Fat Greek Wedding
فيلم رومانسي كوميدي عن الجواز ولكنه هيحببك في الفكرة وممكن يكرهك برضه في الجواز حسب رؤيتك للفيلم لانه من منظورين مختلفين ممكن يتشاف


I Me Wed
كانت بنت عايزة تعمل تجربة غريبة جدا "تتجوز نفسها" وفعلا عملت كده وعزمت الناس واتشهرت في وسائل الاعلام في الفيلم ولكنها وقعت في الحب وعرفت ان حالها ده مش هيدوم وانها لازم تتجوز من حب حياتها الاول وتسيبها من فكرة جواز نفسها


Little Miss Sunshine
الفيلم ده يحببك في الجو العائلي نفسه مش فكرة الجواز ..يحبك في لمة الاسرة علي هدف واحد وحلم واحد ومساعدتهم ومساندتهم وشد ازر بعض


Confessions of an American Bride
عروسة بتجهز لتفاصيل فرحها وسط خلافات متعددة مع الطرف الاخر قد تنقلب لانفصال ولكن الحب بينهم يعيد شملهم مرة اخري في اطار رومانسي جميل


Fireproof
من اروع الافلام الدرامية ..خلاف شديد بين زوجين يمتد لطلب الطلاق ولكن الزوج بيمشي علي نصيحة والده في اجندة لمدة اربعين يوم كل يوم يعمل حاجة عشان يستعيد زوجته مرة اخري وفعلا بترجعله في النهاية في فيلم قد يملأك بالدموع



Wedding Crashers
رومانسي كوميدي عن شابين بيقوموا دايما بتخريب حفلات الزواج او بيروحوا عشان يسهروا مع البنات اللي في الفرح بس ولكن في النهاية يقع في الحب ويعرف قيمة الجواز بجد بدل اللعب اللي كان بيلعبه طول الفيلم


License to Wed
رومانسي كوميدي من بطولة روبن ويليامز وماندي مور في اطار اتفاقية يضعها روبن ويليامز لازم يمشي عليها الطرفين لمدة معينة وينفذوا بنودها قبل الزواج وتحصل الخلافات ولكن يتم الزواج في النهاية وينتصر الحب


This is not a test

فيلم كوميدي عن خلافات بين طرفين ايضا ولكن في وقت الخطر يهب لنجدتها ولا ينسي الايام الجميلة التي قضوها معا ويتناسي كل الخلافات لان خطر حقيقي يهدد البلدة





Up in the Air

ده بقي فيلم يحيرك في فكرة الجواز نفسها ..ده واحد طول عمره مسافر في الطيارة اللي هو "جورج كلوني" وبيشوف كل المتزوجين اللي يعرفهم ودايما يسخر من الزواج ومن الحب حتي

ولكن في النهاية يقع في الحيرة وبييجي مشهد وكل طرفين بيتكلموا عن اهمية الاسرة وهو راكب برضه طيار ولسه في حياة العزوبية لسن كبير ويترك المخرج النهاية مفتوحة لتتوقع انت ماذا حدث..هل سيتزوج ؟




بعد الجواز بقي تيجي مرحلة الاطفال..في افلام هوليودية تحببك في العلاقة مع الاطفال وتحب وجودهم في البيت وافلام تانية تكرهك اصلا في الاطفال ومتبقاش عايز تخلف ولا طفل واحد!



أفلام تحببك في فكرة اطفال داخل البيت
:

big daddy
about a boy
Hearts in Atlantis
Dear Frankie
Martian Child

طبعا دي افلام درامية عن العلاقة اللي بتنشأ بين طفل وراجل وازاي بيكون الراجل ده مبيحبش الاطفال ولكن مع التعود علي وجود الطفل تنشأ علاقة جميلة انسانية بينهم




افلام تكرهك في الاطفال واللي جابوهم ههههههههه :


دي نوعية كوميدية موجود منها كتير في هوليود عن شقاوة الاطفال في البيت ولكن انا اخترت منها نموذجين بس من الافلام دي :

Old Dogs
Cheaper by the Dozen





واللي بيفكر في الجواز ياريت يشوف مجموعة الجواز اما اللي مبيفكرش في الموضوع ده عليه بقي بافلام اللي تكرهك في الجواز..وانت وذوقك بقي ! وربنا يسترها معاك لو اتجوزت "ابعد عن الجواز وغنيله يا عم






















Wednesday, March 23, 2011

كلمات الشعب المصري قبل الثورة





ألفاظ كتير قوي لازم تتنسف في مرحلة بعد الثورة..لو ناويين نتغير فعلا يبقي لازم الألفاظ دي تنتهي من حياتنا في مصر تماما..




1- لاغيني :

الموظف في اي مصلحة حكومية دايما يستخدم الكلمة دي اما ييجي يخلص اي مصلحة من حق المواطن اصلا..ممكن يفتحلك الدرج ويقولك "لاغيني" وممكن يغمزلك كمان وعلني قدام الناس عشان تدفعله ويخلصلك الورقة في ثواني



2- دخاني :

الكلمة دي بتستخدم احيانا بشكل عادي مش رشوة ولا حاجة بس كتير في الاوقات بتبقي كلمة لتخليص حاجة مش من حقك برضه
وتحس ان اللي بيقولك "دخاني" دايما حشاش لان اول حاجة فكر فيها من اجره هو السجاير والدخان وكانه هيصرف كل الفلوس علي السجاير بس



3- عبد المأمور :

دي الكلمة اللي من اسباب قيام الثورة في مصر اساسا.هو كل واحد تكلمه يقولك عبد المأمور ؟؟ هو لسه في عبودية يا ولاد ال...
وبعدين هو انت يقولك المامور ده اي حاجة تعملها زي اللطخ وخلاص ؟ مافيش تفكير مافيش مسئولية..يعني لو قالك اقتل نفسك هتقتل !
ودايما الكلمة دي اكثر الاماكن استخداما فيها "الامن المركزي" بتوع "ممنووووووع يا بيه"..



4- هي الدنيا هتطير :

اه هي طارت خلاص ..انت معندكش خبر ؟؟ هي خلاص طارت من كام سنة واحنا لسه بنحبو فياريت نلحق اي حاجة من الدنيا التانية دي
كل ما تدي ورقك لحد في شباك حكومي يقولك "اصبر هي الدنيا هتطير ؟" وكأنه مش حاسس ان كل البلاد طارت لفوق فعلا واحنا لسه ع الارض..
وبعدين طيب سا سعادة الموظف ما تقول لنفسك الكلام ده..هي يعني الدنيا هتطير ع الشاي ده ولا البسكوت اللي في ايدك ده ؟
هو انت بتاخد مرتبك عشان شاي وبسكوت ؟؟ يعني اللي بيسقي الشاي في البسكوت بيدوله فلوس في البلد دي ؟ طيب دي شغلانة حلوة قوي وممكن نجيب صينين يعملوها
ويعملولنا ماكينة كده تسقي الشاي في البسكوت كل يوم !




5- روح لأستاذة ميرفت :

دايما تسمع الكلمة دي في كل مكان ودايما في استاذة ميرفت في كل مصلحة وكأن الاسم ده حكومي !
ودايما بتكون قاعدة في الاوضة اليمين ولابسة نضارة كوباية وتبصلك من تحت النضارة وهي شايلة طاجن ستها
وحتي لو الراجل ده يقدر يخلصلك ورقك من عنده انما لازم تفوت علي كل الاوض اللي جمبه برضه ماهو الرياضة للجميع يعني
واستاذة ميرفت طبعا هتقولك الورق مش كامل وروح فوت ع الاوض تاني كمل ورقك وتعالي لان استاذة ميرفت هي تقفيلة اللعبة الحكومية في اي مصلحة !




6- فوت علينا بكرة :

اشهر جملة في تاريخ مصر ..يا تري هتتكرر بعد الثورة ؟؟
الشعب يريد اسقاط كلمة "فوت علينا بكرة" !
افوت عليك بكرة ليه ؟ ما انا ورقي كله خلصان وممكن تطلعلي الوصل حالا ؟
اصل استاذ مدحت مجاش النهاردة ..ومجاش ليه ؟ اصل عنده ظروف عزاء
مع انه كل اسبوع عنده ظروف عزاء..ده لو عيلة استاذ مدحت الف فرد كان زمانهم خلصوا
وبعدين هو عيلته ماتوا في حادثة طيارة ولا ايه ؟؟ كل اسبوع بيعزي في واحد ؟؟



7- استني ادورلك ع الملف :

ويقعد الموظف يدور ع الملف في الف رف معفن وعليه تراب الدنيا كله
يا جدعان فيه اختراع اسمه "الحاسوب" ..! مش ممكن لحد دلوقتي ماشيين بطريقة افلام نجيب الريحاني "روح يا سبتمبر تعالي يا سبتمبر " !
لسه بتبل صباعك وتقعد تقلب في ورق اصفر قديم عشان تطلع ورقتي ؟؟
امال شركات الكمبيوتر بتبيع لمين بقي ؟ ولا انتوا مسمعتوش عن الاختراع ده ؟
حتي الكمبيوترات في المدارس بيلعبوا عليها جيمز والابلة بتشرف علي فن الاطفال في اللعب بس !



8- هأحولك ع القسم المختص :

يا عم انت القسم المختص..ده انا جايلك من ميت جهة وقالولي انت القسم المختص ازاي هتحولني ؟
قصدك هتطرأني ع القسم المختص..وطبعا لو طلعت عشرين جنيه حالا هتبقي انت القسم المختص بالقوي قوي اكيد



9- صورة البطاقة وتعالي :

عايز ليه صورة البطاقة ؟ ما هي البطاقة ذات نفسها قدامك اهي ؟
عايز تدبسها في الملف؟ هو لسه في كده في الدنيا ؟؟ يا جدعان في كمبيوتر ابوس ايديكم
وبعدين انت مكتب محترم المفروض انت تصورلي البطاقة في ماكينة تصويرك
مش اطلع برة واسيب الطابور ده كله عشان اصور البطاقة وارجع اقف فيه ! حرررام !



10- الأسعار بقت نار :

يا عم ايوه بقت نار بس انا اعملك ايه دلوقتي ؟
تيجي تركب تاكسي يقولك "يا استاذ واللهي الاسعار بقت نار انت عارف البنزين بكام النهاردة ؟ "
يا عم شايفني ببيع جاز وانا مال امي ؟؟ عايزني ازود الاجرة يعني بالكلمتين دول ما تقول م الاخر




11- مطرح ما ترسي دقلها ياعم :

الكلمة دي كانها قاعدة للشعب المصري ..تحس بان كل حاجة ماشية بظروفها
مافيش حاجة متخططلها اصلا ..هي البلد مش ماشية علي خطة هي ماشية علي "مطرح ما ترسي دقلها"



12- حودة فرج :

كابتن ممدوح التخين.ممدوح فرج واعلاناته بتاعة التخسيس واشبه الاعلانات دي
لازم دي اول حاجة تتشال تماما بعد الثورة وياريت يشيلوا كابتن ممدوح نفسه باي ونش



13- سعادة الباشا :

دي كلمة لازم تتلغي برضه في تعاملات الشعب مع الشرطة او مع الشعب وبعضه
بعد الثورة لازم الكلمة دي تتشال تماما من قاموس حياتنا اصلا كل الناس باشا حتي بياع الجاز بيقولوله "باشا" !!
ماشي هو راجل كويس علي عيني وعلي راسي انما كلمة باشا دي واسعة شوية ؟
البشوية دي كان بيدفع فيها الوف دلوقتي بقت لقب مجاني الناس مش طايقاه من كتر ما بقي رخيص


14- إبرز :

إبرز الجنيهات ..قب..خرج..طلع..السبوبة..الأبيب..كلها مصطلحات لتخليص المسائل والمصالح برضه
وبتكون الكلمة لايقة اما يقول "ابرزلي البنكنوت" ..او "اديني كام جندي"
والجندي ده يعني فلوس يعني طبعا



15- المخلصاتي :

وظيفة في كل مكان ..مرور او شهر عقاري او غيره..
تلاقي واحد واقف كده ياخد فلوس اسمه "المخلصاتي" يخلصلك الطوابير في ثانية بالكوسة طبعا
ودي اهم وظيفة لازم تتلغي بعد الثورة وكل واحد يخلص لنفسه في سهولة ويسر
والغريبة ان المخلصاتية دول من تخليص الطوابير في منهم بني عمارات !!




وياريت كل الكلمات دي تتلغي بقي ونتغير تغير كامل والي الامام علي راي الحاج القذافي "لا رجوووع الي الامام الي الامام ثورة ثورة " !

Monday, March 21, 2011

مشـروب اللحظة من شهـد لقاء






في احدي الغرف السرية بقلبي..
باب من "سندس" منقوش عليه حروف من اسمك..
ما بين صرير الباب وهمهمات الملائكة..يوم..كألف سنة مما تعدون !

لم اعشق الوجود حين وجدتك..بل عشقتك حين عشقت الوجود..
حين احتضنت القمر وضربني اول "تسونامي" أنوثة..
حين ابتسم لي "نزار" في فنجان الشاي ..
حين قالت لي الازهار "كن عاشقا تري الوجود جميلا" !

حين وجدتك احمرت وجنتي الشمس خجلا ..
وغني لي الكروان "الحب لك الحب لك "..
ودخل القمر غرفتي السرية يحضر لي "الرقية العشقية " الشافية من عينيك !

سيدتي لا تتحيري ان بكيت امام عينيك ضعفا..
فالحب لا يلهم العشاق الا الوجع ولا يستجديهم الا الدمع ولا يهديهم الا الضعف..
ان بكيت فلا تتعجبي..
فانتي لا تري جناجيك الابيضين يطرفان عيوني..ولا تري النور الصارخ من ملكوتك ..ولا تري كيوبيد يحضر في الثانية الف "غارة" عشق علي قلبي..!

ملكتي لا تتحيري ان تأخرت عن موعدنا لساعات..
فانا من موعدنا السابق الملم المرمر
وادهن اجنحة فراشات الحب وارقص مع غزلان هربت من عينيك
واجاذب السماء اطراف الجنون عن عينيك..

في احدي الغرف السرية بقلبي..
احضر مشروب "اللحظة" من "شهد" لقائك الي "انشودة" رحيلك..
واحضر وصفة إمرأة من فصيلة البنفسج..اصنع اقوي ما فيها من اضعف ما فيكي..!

في احدي الغرف السرية بقلبي..
ملف "سري للغاية"..
استعيذ في كل ورقة منه من امراء ينافسونني في عشقك وأن يحضرون !
واستعيذ من اوقات لا افكر فيها في عينيك..ولا اتغني بحضرة عبيرك..

في تلك الغرفة أتوضأ بالوحدة لأصلي صلاة غياب في عينيك..
والمس علي جفنك خاتم سليمان ليأخذني الي "سدرة منتهي" جمالك في لحظة..
فدعيني اتصوف في عينيك قرونا..كي اشعر فيها بسكينة الربيع وسكينة روحي..

صنعت لكي في قلبي سريرا من شعر ومن كلمات..
فبعثري حروفه بخطواتك اغان وابتهالات ..
ودعيني اصنع من "همجية" الحروف سلالم تعبرين بها القمر وما اعلاه !

في كل ليلة كنتي تراقصين "رغبتي"..
وبعد رحيلك..احتاج اليك اكثر..فمن يراقص "غربتي"..!

في عينيك شنقت نفسي بحبل من "كلمات"..
ولكني وجدت ان في عينيك العاشق ب "سبعة ارواح"..!
وفي عينيك القدر ب "سبعة اقدار" .

كلما رايتك استلقت علي أناملي ملائكة تجعلني اعزف علي النسيم..
وتجعل من اسراري المكنونة نشيد سماء مفضوح..
وتجعل من "رعشة" قلبي لحظة.."عشرة والفة" مع عينيك سنينا وسنين..!

كلما تذكرتك احتجت لصنع "عيد للرحيل" كما "عيد الحب"..
ولصنع غرفة سرية اخري في قلبي..
اكتب عليها "ماضي سيعود"..!





Sunday, March 20, 2011

دليل الشـاب الندل في هديـة عيد الأم






اهلا بيكوا في دليل الابن الندل لهدية عيد ست الحبايب..طبعا عيد الام قرب وبتفكر تجيب ايه لمامتك او ساعات حماتك كمان مش عارف ليه بتجيب لحماتك اصلا في عيد الام ؟ بس ما علينا ده في ناس بتجيب لمراتها هديةفي عيد الام كمان وبرضه شئ عجيب قوي هو اسمه عيد الام ولا عيد الاسرة ؟ وليه الابن مهضوم حقه اوي كده ؟ فيه عيد ام وعيد اب ومافيش عيد الابن ؟؟

الابن يكع فلوس بس عشان الهدايا انما مالوش عيد الا عيد ميلاده وخلاص علي كده .
ياتري قررت هتجيب ايه ولا لسه ..؟ لو لسه مقررتش تعالي معايا عالم الندالة عشان تجيب هدية بارخص سعر او بدون سعر خالص اساسا ونشوف الهدايا المقترحة :



الهدايا المقترحة لو عايز تدفع يعني :


1- حلة :

مش عارف ليه دايما كل تفكيرنا في الام اننا نجيبلها حاجة مطبخ ! وكاننا بنقولها بالهدية دي انتي دايما بتفكريني بالمطبخ..كتير قوي بيروحوا يجيبوا حلة او طاسة او حتة عصارة ويديها لمامته طيب ما انت كده جايبها لنفسك اساسا عشان انت اللي هتاكل فيها بعد كده دي مش هدية ام اصلا.
وبعدين هتقولك حلة ايه شايفني شغالة في قناة فتافيت ؟؟
يعني هي عشان الام مثلا دايما بتطبخ تجيبلها حلة ؟؟ يعني هي دي كل الفكرة ؟؟ يعني هل عشان الام مدرسة مثلا اروح اجيبلها طباشير ؟؟ هو الموضوع مش كده ..المفروض نشوف حاجة تليق بيها ..وياحبذا لو حاجة موفرة



2- موبايل :

موبايل ؟؟ ده انت كده دخلت في فلوس كتير بقي ؟ ولا ناوي تجيب موبايل عرة من ابو ميت جنيه ده ؟ وبعدين موبايل ايه يا عم هو انت رايح تجيب هدية لخطيبتك ؟
دايما الخاطب بيجيب هدية لخطيبته موبايل علي اساس تكلمه يعني وبلاش تستخسر في امه المكالمة ..! انما هدية لمامتك موبايل ؟ مش لايقة وبلاش الفكرة دي.


3- برفان :

ياعم برفان ايه ؟ هي مامتك في التلاتينات ولا ايه ؟؟ وبعدين هي لو في التلاتينات او العشرينات يبقي انت ياللي بتقرا الموضوع دلوقتي عندك سبع سنين ولا ايه ؟؟
البرفان ده معروف انه هدية واحد لمراته وليه معاني تانية كتير ..زي مثلا البرفان بيوجه رسالة وبيقول "ابقي استحمي وحياة ابوكي لان ريحتك فاحت" ..!!



4- خاتم :

خاتم ؟؟ وبالمرة ابقي افتح موسيقي هادية وانت بتلبسهولها ..دي امك يا عم الحاج ..خاتم ايه انت كمان ..!! اصل اللي بيجيب خاتم برضه لازم يغمي عين اللي بيلبسهولها ويقولها مفاجأة والحوار الحمضان ده ..انما مع الام مش هينفع..يبقي شوف فكرة تانية



5- برواز ؟ :

طيب انت حاطط علامة تعجب فوق ليه ؟ انت بتسألني ؟؟..طيب ده انت تبقي عيل رزل اما تجيب برواز وخصوصا لو حاطط فيه صورتك !!
او تجيبلها برواز عليه اية الكرسي..هدية حلوة بس فكست من زمان..



6- طقم فناجين :

اه..بالمرة قوم هاتلها دومينو وطاولة وافرش الطرابيزة وافتح ام كلثوم واقلبها قهوة بقي..!! او هاتلها جمب الهدية كيس شاي فتلة مع الطقم واكتبلها في الكارت "مزاجي عال العال" !!
فناجين ايه يا عم الفناجين ؟؟ دي حاجة انتهت من ايام رفعت الفناجيلي تقريبا ..


7- فازة :

لا هاتلها قلة عشان تكسرها وراك احسن وانت خارج..الفازة دي برضه من ايام رد قلبي اما كانوا يخرجوا الجنينة يجيبوا الورد ويحطوه ع الترابيزة دلوقتي في سحابة سودا يا عم الحاج
ومافيش فازات بتشيل اي ريحة ولا ورد ليه ريحة اساسا ..الحكومة منعته باين انه يطلع ريحة.




طيب احترت خلاص ؟؟ انا هاقولك بقي ازاي تكون ندل وتفكك م التكاليف دي وتجيب حاجة موفرة قوي قوي..شبه مافيش حاجة تقريبا :



1- وردة :

اهو كده تبقي متكلفتش مليم وخش قولها كل سنة وانتي طيبة يا ست الحبايب ويبقي كده جيبت هدية ومدفعتش ولا مليم اساسا من اي جنبنة في الشارع اقطف وردة صغيرة كده بس تكون بريحة لان في كتير من غير ريحة وفي ورد بريحة دخان في الشوارع ..اختار بعناية وردة تكون ليها ريحة



2- كلها بكلمتين :

زي مثلا "انتي هديتي يا ست الكل" او اي كلام من ده قال يعني بيغني عن الهدية بس قولها انك عارف ان النهاردة عيد الام وخلاص بدل ما تحلق خالص..او ممكن تقولها "هو احنا في بينا هدايا ؟" وممكن تقولك اه يبقي انت لبست في مطب



3- عمل يدوي :

يعني اعرض عليها انك هتساعدها في المطبخ لمدة شهر ..ودي بتفكرني بالقهوجي اللي حاجز واحد عشان مدفعش تمن المشاريب فبيضطر يمسح المحل عشان يسدد ديونه..اهو نفس الفكرة
امسحلها الشقة او ساعدها في الطبخ فترة كهدية وساعتها مش هتدفع حاجة



4- هدية قديمة غير ملحوظة :

لو كنت مرة جيبت حاجة قديمة وجربتهاش وركنتها في الدرج..دلوقتي جه وقتها ..طلعها ولفها في ورقة هدايا واديها لست الحبايب وتبقي استخدمت الشئ المركون ده وفي نفس الوقت جيبت الهدية ..بس دي حركة مش لذيذة لو مامتك عرفت !



5- فسحة :

خدها فسحة ..بس مش علي الكورنيش يعني ممكن تروحوا اي مكان وخلاص مع العيلة ويبقي اقصي تكلفة هي حاجة ساقعة وكلام مش هيكلفك حاجة



6- ابعتلها نغمة عن عيد الام :

دي هدية غريبة قوي ..نغمة ؟؟ اه اي نغمة بتاعة ست الحبايب وخلاص افتح البلوتوث وابعتلها وخلص يا عم واهي تعتبرها هدية فيها مشاعر برضه



7- كيلو برتقال :

ليه هو انت جاي تزور عيان ؟؟ بلاش موضوع الفاكهة ده لان انت مش رايح مستشفي وده مش منظر هدية وحياة ابوك





يعني ممكن بكلمة توفر تمن الهدية وخليك الشاب الندل الكول ..اما لو عايز تدفع فكر كويس قوي قبل ما تجيب هدية غريبة وكل سنة وانتوا طيبين .









Saturday, March 19, 2011

نعــم أو لا ..ليست تلك هي المسألة








انا قولت لا.بس لو انت قولت نعم انا مش هاخونك..هو ده صوت العقل من ناس كتير قوي..انتشرت في الفترة الاخيرة موجة من التخوين والهجاء والسب وحاجات كتير من دي رغم اننا بقالنا فترة طويلة بننادي باحترام الرأي الاخر وعدم التعدي علي حرية الاخرين..
بعد موضوع الثورة والقوائم السوداء حصلت برضه نفس القصة في نعم ولا وبعدين هتحصل تاني في موضوع برادعي ولا نور ولا غيرهم ..هنفضل كده لحد امتي ؟..لحد امتي هنمشي بقاعدة "الكل خائن الا ان يثبت العكس"..والعكس ده انه يكون من وجهة نظري..يعني انا هانتخب كذا ولو انت مرشحتهوش يبقي انت ملكش فيها وخاين وعميل كمان..ده فكر بعض الحمقي بجد وموجود فعلا رغم اني ظننت انه انقرض من فترة طويلة..!


الكل بينادي بالديمقراطية واحترام رأي الاخر حتي لو عكس رأيك
وزي ما قال الامام الشافعي "رأيي صواب يحتمل الخطأ , و رأي غيري خطأ يحتمل الصواب" ..
لكن في ناس بتتعامل علي اساس ان رايها هو الصواب وبس..ودول لازم تاخدهم واحدة واحدة وتاتا تاتا وتعرفهم معني الديموقراطية واحترام الاراء ونبدأ معاهم من الاول خالص ولا تيأس منهم هو بعد وقت ممكن ييجي منهم !

انا قولت لا..لكن لو انت قولت نعم انا هاحترمك..ايوه واناقشك بهدوء بس مش عشان ااثر عليك لا عشان اعرف وجهة نظرك ويمكن استفيد منها ويمكن تكون مقنعة اكتر من وجهة نظري انما مش جاي اسالك عن رايك عشان اهاجمك..هنا هنذكر امثلة للكلام ده بامثلة..اللي هو نظام التفكير في اتجاه واحد وتطبيق الرأي الواحد علي الكل والحكم من منطقك فقط لا غير..




اولا : المكارثية:


كتير قوي اتكلموا عليها في الفترة الاخيرة من صحفيين وفي التليفزيون وغيره دي نسبة الي شخص اسمه جوزيف مكارثي الراجل ده كان بيعمل قوايم سوداء زي اللي شوفناها الفترة الاخيرة لبعض الناس هو عملها لناس عشان يضعف الثقة فيهم ويوقعهم ويتهمهم انهم ليهم علاقة بالشيوعية وبدون اي دليل واضح وبكده يكسب ثقة الناس علي حساب الاخرين بالقوايم السوداء اللي عملها ..
دي حصلت في مصر وفي دول تانية كتير قوي بالذات ايام الانتخابات ان مرشح يبدأ يتهم المرشح التاني وكل اعوانه ان ليهم علاقة بحاجة معينة تكون كريهة عند الناس فيدمر ثقة الناس فيهم ويوقعهم بذكاء ودي من اقذر اساليب العملية الانتخابية .




ثانيا : انماط التفكير :


في نوعين مشهورين اسمهم
Convergent thinking and divergent thinking

هي اصلا معناها انك بتدي اجابة محددة لحاجة من غير ما هي محتاجة تفكير او ابداع زي سؤال اختياري مثلا ده حسب تعريفها الرسمي..
والنوع التاني بالعكس تماما يعني كل اجة قابلة للتفاوض والتفكير والاخد والعطا..انما النوع الاول في اتجاه واحد
وهو ده نمط التفكير السائد عند المخونين كانهم بيحلوا سؤال اختياري وهي اجابة واحدة اللي صح مافيش تفكير او سؤال غير قابل للنقاش
او زي سؤال صح وغلط..يا اما انت صح يا اما غلط مافيش حاجة اسمها وجهة نظر..
وانتشار النوع ده من التفكير ممكن يودي البلد في مرحلة خطيرة جدا لو كل الناس وقعت في بعضها وشككت في بعض هتبقي الحياة صعبة جدا .




ثالثا
The Hollywood blacklist


دي قايمة سودا كانت معمولة لكل من يخصون الوسط الفني في هوليود برضه عشان ليهم علاقة بالحزب الشيوعي زمان حتي لو بدون دليل يعني نفس نظام المكارثية برضه..
عملوا قوايم سودا لكل الفنانين والكتاب والمخرجين او كل من هو في الوسط الفني عشان بيقول رايه او اظهر تعاطف حتي مع الحزب الشيوعي او افكاره فاعتبروهم خونة فورا بدون حتي دليل واضح وانتشرات القوايم علي نطاق واسع قوي في كل هوليود واتحرموا من اعمالهم فنانين كتير في امريكا


رابعا :
Fruit machine


دي بقي كانت حاجة في كندا زي جهاز كده عشان المفروض انه بيكشف عن المثليين الجنسيين عشان يعزلوهم عن بقية الناس برضه بدون دليل واضح لان الجهاز زي ما قالوا كان بيكشف غلط وبيطلع استنتاجات غلط وكانوا بيعزلوا كل الناس دول عن اعمالهم لان النتيجة طلعت ايجابية ..يعني نوع من تصنيف الناس ووضعهم في قوايم برضه وعزلهم عن الخدمة او كره الناس ليهم لما يتحطاول في قايمة سودا يعني




خامسا :
Moral panic


دي بقي القايمة الاشمل من المكارثية ..تصنيف مجموعة من الناس ان فكرهم خطر علي العادات او التقاليد في المجتمع لتحقيق اغراض معينة..زي القذافي مثلا بيقول علي الثوار مدمنين مخدرات عشان يكره الناس فيهم بالتصنيف ده ويعمل حالة فزع منهم يكسب بيها مصالحه..
او زي بتوع القوايم السودا عملوا القوايم عشان دايما تبقي قدام الناس فيكرهوا اللي فيها دول لان افكارهم خطر ع المجتمع وكده ودي طبعا حيلة رخيصة تصنيف اي انسان عشان معارض فكرك حتي لو معارض فكرتك بنسبة 200 في المية لازم متصنفوش




سادسا : الفزع الاحمر:

دي اتكلمنا عليها قبل كده في موضوع سابق وقولنا انهم كانوا بيصيوا الناس بالذعر من الشيوعية كنوع من شن الهجوم عليها ودي انتشرت في فترة الشيوعية ما كانت في عزها




خلاصة ان تصنيف الناس حسب ميولك واهوائك هو نوع من الجهل واحنا استعرضناه علي مدار التاريخ عشان نبين ازاي الناس طول عمرها بتحب تصنف وتعمل قوايم سودا لكل من يعارض في الفكرة بطريقة هوجاء وحمقاء..
دايما قول رايك متخافش..حتي لو ضد المجتمع كله..ما هو كل فلاسفة زمان قالوا اراء لو قريتها تقول "ايه الهبل ده" زي نيتشة او غيره ..انما لازم تحترمه وتقدر فكرته حتي لو هي ضد كل حاجة انت شايفها صح..المهم تحترم الفكرة نفسها واحترامك لافكار الاخرين هيجلب احترام الناس ليك بدل ما يقزموك ويهملوك.

احترام المعارض قبل المؤيد هي اهم دعائم الديموقراطية الحقيقية.




Friday, March 18, 2011

هو بجد كل حـاجة هتتغـير يعني ؟؟






بعد الثورة ياتري كل حاجة هتتغير ؟ هل فعلا اخلاقيات ما بعد الثورة هتتغير عن اخلاقيات ما قبل الثورة ؟هل الفاظنا هتتغير وحياتنا هتتغير ؟ طيب فاضل كام سنة ونبقي زي ما نكون مجتمع اوروبي بايجابياته مش بسلبياته ؟

تغيير اخلاقنا بالكامل غير تغيير عاداتنا او تقاليدنا..تغيير الاخلاق اللي اتربينا عليها بيكون اصعب ولكن في نفس الوقت جائز وممكن ولكنه بيكون اسهل بكتير لو كنا اتربينا عليها من الاول في مرحلة الطفولة
مثلا عندك الماوردي بيقول :
"فأما التأديب اللازم للأب، فهو أن يأخذ ولده بمبادئ الآداب ليأنس بها، وينشأ عليها، فيسهل عليه قبولها عند الكبر، لاستئناسه بمبادئها في الصغر، لأن نشأة الصغير على شيء تجعله متطبعاً به، ومن أغفل في الصغر، كان تأديبه في الكبر عسيراً".

ولذلك مع الوقت لو بدأنا فعلا نهتم بمرحلة التربية في الصغر من خلال التعليم بالذات هنطلع اجيال افضل واكثر اخلاقا ووعيا ..يعني "التوجيه الأخلاقي" شئ واجب وضروري في مرحلة الطفولة من خلال التعليم في مدارسنا في النهاية تلاقي جيل فاضل وعلي خلق كبير ينفع مجتمعه ويفيده.

في ناس بتقول ازاي..الاخلاق صعب قوي تتغير ده احنا اتربينا عليها وكل واحد حسب تربيته من صغره والتغيير مستحيل..ولكن في اراء الكثير ان التغيير ده جائز جدا مثلا عمرو خالد كتب في مقالة بيقول :

عن الذي يدعي أن أخلاق الإنسان غير قابلة للتغيير واحد من اثنين، إما إنسان - جاهل – بحقيقة النفس وبطريقة سياستها ، وإما مستثقل للمجاهدة، باحث لنفسه عن تبرير مريح لمسلكه في الحياة حتى لا يشعر بالذنب ويحيا كما يريد بغير ضبط ولا ربط. إن رسول الله صلى الله عليه وسلم بيّن أن الأخلاق قابلة للتغيير إذ قال: إنما الحلم بالتحلم وإنما الصبر بالتصبر وإنما العلم بالتعلم ، فالذي يريد أن يكون كريماً عليه أن يحمل نفسه على بذل المال، والذي يريد أن يربأ نفسه عن الغيبة عليه أن يلزم نفسه الصمت ويلجم لسانه متى أراد الكلام!

وبيقول كمان عن الاخلاق وتغييرها في نفس المقالة :

"إن الذي يتأمل النواة والنخلة ويحاول أن يفهم العلاقة بينهما سيظهر له، ويخلص إلى أن النواة خلقها الله خلقاً جعل فيه قابلية النمو، حتى تكون نخلة، شريطة أن تتعاهد وترعى. كذلك الأخلاق سلباً وإيجاباً! من الممكن لخلق إيجابي ضامر أن يرعى وينمى حتى يؤتي ثماره ناضجة طيبة ظاهرة ومن الممكن كذلك لخلق سلبي متأصل في النفس بالمجاهدة والتربية أن يضمر ويذبل حتى تيبس أوراقه وتسقط ثماره الخبيثة، وينتفي من صاحبه!لو كانت الأخلاق غير قابلة للتغيير لما كان لتنزيل الشرع معنى"



وبيرجع المارودي تاني ويقول في كتابه :

"لأن الأدبَ مكتسبٌ بالتجربة، أو مستحسنٌ بالعادة، ولكلِّ قوم مُوَاضعةٌ، وكل ذلك لا يُنالُ بتوقيفِ العقل ولا بالانقيادِ للطبع، حتى يُكْتسب بالتجربة والمعاناة ويستفادَ بالدُّرْبَةِ والمعاطاة، ثم يكونُ العقل عليه قيّماً، وزَكِىُّ الطبع إليه مُسلِّماً"


يعني بيقولك لازم منسيبش النفس دون توجيه لان ده مهم جدا لان الادب مكتسب بالتجربة عكس الناس اللي شايفة انه فطرة وفي فلاسفة كتير شايفة الادب فطرة وفي ناس شايفة انه وراثة والكثير يختلف معهم بالطبع.

جون لوك مثلا كان بيقول ان هدف التربية غرس الفضيلة في النفوس..وفعلا دي حقيقة عملية التربية وعشان كده بنقول ان دور المدرسة في الصغر هو اهم دور زي ما فرويد مثلا كان بيتكلم ان اول خمس سنين في حياة الطفل بتحدد حاجات كتير في حياته وتربيته ..وكتير من علماء النفس اتكلم عن مرحلة الطفولة طبعا كأهم مرحلة لتشكيل الوعي وكل حاجة في شخصية الانسان.
يعني لو عايزين نغير المجتمع المصري فعلا يبقي عايزين توجيه اخلاقي دائما للناس لحد ما تبقي اخلاق مكتسبة بالتجربة زي ما قال الماوردي وفي نفس الوقت نغرس الفضيلة في النفس من مرحلة الطفولة في المدارس بتاعتنا زي ما قال جون لوك ولازم نهتم بالخطين دول مع بعض علي التوازي.

العالم الكبير "فرويد" بيقول
moral development is the product of aspects of the super-ego as guilt-shame avoidance


يعني من جواك انت بتحس بتانيب لما تعمل حاجة غلط او احساسك بالخجل من الذنب اللي اقترفته .


وفي علم النفس الاخلاقي الحديث :

morality is considered to change through personal development

يعني كل حاجة جوانا قادرين نغيرها اي اخلاق سيئة او عادات سلبية علي مجتمعنا او اي شئ بيخلينا نبعد عن بعض قادرين نغيره.

ساعات بيتعارض مع الاخلاق اللي بنحاول نزرعها الاشخاص نفسهم..يعني مثلا انت بتقولي لازم تحب صاحبك..طيب ولو صاحبي ده قاتل او حرامي ؟ عشان كده لازم نغير الاشخاص ونوجه سلوكهم لان ده هيوقعنا في حاجة اسمها
ethical paradox

يعني مش هاعرف ازاي احب صاحبي وهو حرامي لازم هو يتغير..او مش هاعرف ازاي مسرقش في مجتمع كله بيسرقني او ازاي مخونش حكومة كل يوم بتخونني
وعشان كده التغيير لازم يشمل الجميع في المجتمع من اول الاطفال لحد الكبار.

زي ما بنقول ان الاخلاق ممكن توجيهها لكن برضه في جانب فطري زي مثلا قريت في موضوع عن الاخلاق من فترة حديث الرسول "الناس معادن كمعادن الذهب والفضة، خيارهم في الجاهلية خيارهم في الإسلام إذا فقهوا" الحديث مشهور طبعا لكن صاحب المقالة اللي كاتب بيستشهد بالحديث ده علي ان اكيد فيه اخلاق بالفطرة تختلف من شخص لاخر وقال كمان ان مثلا ابو بكر مكانش بيشرب الخمر حتي في الجاهلية !

الغزالي بيقول " أن بعض الناس قد وُلد حسن الخلق بالفطرة وأن السبيل لتربية الخلق هو التخلق، ترويض النفس على مكارم الأخلاق"
واحد زي شوبنهاور مثلا بيقول ان الانسان يا اما بيتولد خير او شرير يعني الموضوع كله بالفطرة.!

اما طبعا اراء "نيتشة "من خلال كتبه وافكاره ه فده بيخليك تحط الكتاب علي جنب وتقول لا تعليق ..وطبعا احنا عارفين مأساته وادمانه الدائم اثناء كتابة كتابه عن الاخلاق ويمكن احسن كتبه هو "هكذا تكلم زرادشت" رغم طبعا الافكار العجيبة اللي فيه برضه واللي بتناقض احيانا حقيقة العالم اللي عايشينه.



طيب احنا محتاجين ايه ؟ :


أولا : هدف واحد يجمعنا :

كان كل واحد ماشي بطريقة يلا نفسي بدون مشروع يحطه الحاكم ويلتف حواليه المصريين جميعا لتحقيقه ..حلم بلد كاملة اننا نبقي زي نمور اسيا مثلا ونتقدم ونحط مصر في مكانة عالية جدا ..ويؤتي ثماره حتي لو بعد كام سنة



ثانيا: المحاسبة والمسئولية :

الاحساس بالمسئولية مش انك بتأدي وظيفتك وخلاص وانت زهقان منها ..وده مش هيحصل طول ما الاجور الموجودة دي ضعيفة جدا ومتبنيش اي حياة كريمة للفرد وفي نفس الوقت لازم كل واحد يعرف انه هيتحاسب طبعا عشان حتي لو مش حاسس بالمسئولية يخاف من العقاب



ثالثا : تغيير شامل للتعليم :

العملية التعليمية لازم تتغير بالكامل ..الكتب والمناهج والفصول وطريقة شرح المعلمين ومرتبات المعلمين ومنع الدروس الخصوصية وكل حاجة من الالف للياء في العملية التعليمية لان هي دي اللي هتقوم عليها مصر في الفترة الجاية اكيد



رابعا : المشاركة الفعالة :

من هنا ورايح لازم كله يروح يحط صوته ولازم فعلا تعرف ان صوتك امانة في اي انتخابات او استفتاء لان عصر الصناديق المتظبطة خلص خلاص ودلوقتي عصر جديد فيه بجد صوتك ليه قيمة


خامسا : الاهتمام بجميع الافكار :

واحد زي الباز مثلا او محمود عمارة او ممدوح حمزة عندهم كمية افكار وغيرهم من الشباب ومكانش اي حد بيهتم بدراسة الافكار دي او انه يبص عليها حتي دلوقتي لازم نهتم بفكرة كل شاب وكل عالم من دول عشان نبص للمستقبل صح



سادسا : تعميق الاحساس بالانتماء :

فعلا في عندنا في مصر شباب مبيحسش بالانتماء لبلده وده اكبر خطر علي مصر وعشان كده لازم نفهمهم ونعرفهم تاريخ بلدهم ونعرفهم قيمة بلدهم ونزرع فيهم افكار حب البلد والانتماء ليها تحت مقولة "متقولش ايه اديتنا مصر قول هتدي ايه لمصر" عشان نطلع جيل واعي ويقدر يدي بلده باخلاص وتفاني





المهم بعد ده كله اننا مش هنتغير بين يوم وليلة..يعني طريق التغيير لسه قدامه كتير عشان نغير اخلاق شعب كامل دي رحلة عمل شاقة جدا..عشان نعمل الرشوة والتكاسل وكل الصفات اللي كانت موجودة في بعضنا ده محتاج سنين ..يعني عشان كده انا لا اؤمن بكلمة "اخلاق ما بعد الثورة" هي كلمة ممكن تكون صحيحة لكن بعد سنين طويلة هتتحقق ومخطأ جدا من يظن ان الناس اتغيرت خلاص بدليل كمية السرقة والنهب اللي بتحصل من ساعةالثورة..طبعا الثورة مش هي السبب في ده ولا هي اللي هتغير ده..لازم نتغير من جوانا ولازم نسعي لده كويس جدا طوال السنين الجاية دي.


Thursday, March 17, 2011

الأمــل والكفـاح والسينما العـالمية







انا بسميها "مجموعة التنمية البشرية" ..هي مجموعة افلام بتديك امل في بكرة..بتزرع جواك الامل في كل مشهد منها مع خيط درامي جميل وهادي في وسط الفيلم
في منها كتير في هوليود وفي الافلام الاوروبية لكن انا نقيت مجموعة من افضلها ..لان تجديد الامل زي تجديد الدم ..

قصص مؤثرة جدا من واقع افلام هوليود انا اخترتها من وسط مشات الافلام اللي من النوعية دي عشان في راي انا هي الافضل وهي الاقوي في توصيل الرسالة ..رسالة "لا تيأس" ابدا

ومهما طال الليل فالنور مسيره يهل..في عالمنا العربي عندنا مجموعة برضه من النوعية دي زي مثلا فيلم "النمر الاسود" للفنان احمد زكي وغيرها من الافلام لكن انا بستعرض مجموعة هوليود الرائعة والمبهرة جدا




1- million dollar baby

اربع جوايز اوسكار تتحدث عن نفسها ..يكفي ان اذكر كلمة السر "كلينت ايست وود" تمثيلا واخراجا وابداعا..المدرب للملاكمة الشابة التي ارادت ان تتعلم الملاكمة والذي كان لا يؤمن بقدراتها في البداية ثم وجد منها اصرارا غير معقول فبدأ بزرع الامل فيها وبدأت القصة العظيمة للفيلم ..والفيلم بيوريك ازاي وصلت للقمة بسبب اصراراها وعزيمتها علي تحقيق الهدف
وهي طبعا الممثلة الرائعة "هيلاري سوانك" وانا من اشد المعجبين بتمثيلها اللافت وشوفت تقريبا كل افلامها لانها موهبة تمثيلية فذة فعلا..ومعاها 2 اوسكار



2-The World's Fastest Indian

انتوني هوبكنز ..دقيقة صمت عند وصف اداء هذا الرجل..صاحب اجمل مجموعة فيلمية تقريبا بلا خطأ واحد وقع فيه انتوني هوبكنز في اختياره لاعماله..من اول "صمت الحملان" وما قبله وفيلم نيكسون وصولا الي افلامه الحالية..لم اره يخطأ فعلا ..مجموعة مبهرة لممثل قدير فاقت امكانياته التمثيلية جميع التصورات..
هذا الفيلم يتحدث عن رجل عجوز صاحب موتسيكل يريد ان يحقق حلمه بعد ان وصل الي مرحلة سنية متقدمة ويساعده طفل صغير في اطار صداقة بينهم وتمر عليه تحديات وظروف صعبة جدا ليثبت نفسه بانه يملك الموتوسيكل الاسرع بكل ارادة وتحدي وادار راقي من انتوني هوبكنز



3- cindrella man

رشح لثلاثة جوائز اوسكار..فيلم من اجمل الافلام التي تبث فيك روح الامل والاصرار .."راسل كرو" بتمثيله الرائع يبهرك باداء الملاكم في هذا الفيلم بعد ان كان لا يستطيع ان يجد ثمن الرغيف حتي ولكنه اصر علي تحقيق حلمه ليصبح من اشهر الملاكمين في العالم بل اعظمهم في فترة ما في التاريخ لانه اتبع حلمه..ومن يتبع حلمه لا يضل ابدا
ومن اشهر الجمل في هذا الفيلم

My heart is for my family. My brains and my balls are for business
فيلم يستحق المشاهدة ويستحق ان يحصل علي اوسكار لا ان يرشح لها فقط




4- little miss sunshine

2 اوسكار..طفلة صغيرة لذيذة جدا تدخل في مسابقة في بلدها ترقص رقصة غريبة..تتلاحم معها الاسرة بالكامل هذا مشهد في النهاية ولكن الفيلم ككل يتحدث عن التلاحم الأسري وكيف تكون الأسرة لها الأولوية الأولي حتي وان حدثت بين افرادها بعض المناوشات ولكنها تكون مناوشات لذيذة وفي وقت الخطر او وقت يحتاجون فيه لبعضهم الكل يتكاتف كما ظهر دور "ستيف كارل" الذي كان من اغرب ادوارة واقواها




5- We Are Marshall

اعشق هذا الفيلم جدا..طائرة الفريق تحطمت ولكن الأمل مازالم موجود..هل نلغي الفريق تماما؟ ام ننشأ فريق جديد وننافس كي تستريح ارواح من ماتوا ؟
هذا هو الجو العام للفيلم الرائع وقصة التحدي للمجموعة التي ارادت انشاء الفريق من جديد وكيف تجمعوا جميعا محتجين امام مجلس الادارة الذي كان سيلغي النشاط الرياضي بعد حادثة الطيارة ولكن اجتمعوا جميعا وصاحوا انهم جميعا "مارشال" وهو اسم الجامعة




6- The Pursuit of Happyness

رشح لأوسكار..فقط ؟؟ اراه يستحق اكثر بكثير من هذا بالطبع كما يري الكثير معي ..قصة امل ..لا قل قصة كفاح وصمود اكثر منها أمل..يريك الفيلم كيف تكون جميع الظروف ضدك تقريبا وكأن ا لعالم كله قد حاك مؤامرة ضدك ولكنه يتصدي ويواجه كل هذا بابتسامة وابن صغير يريد ان يري اباه في احسن حال لانه يحبه بصدق مهما كانت الظروف..فيلم مؤثر جدا.وقد يبكيك في كثير من مشاهده وسط تألق رهيب من "ويل سميث"




7- Where God Left His Shoes

تقريبا نسخة مكررة من الفيلم الماضي مع اختلافات بسيطة ولكنه بطعم ونكهة مختلفة قد يجدها البعض الذ او ان الفيلم السابق افضل فهي اختلاف اراء في قصتين متشابهتين ولكن الحديث في هذا الفيلم عن ملاكم سابق وليس كما كان عمل "ويل سميث" في الفيلم الأخر




8- Resurrecting the Champ


من اقوي الافلام الدرامية عن كاتب رياضي يري متسول في الشارع ليكتشف انه بطل رياضي بل اسطورة سابقة في عالم الملاكمة..تري في اطار الفيلم الكثير من الحوارات الرائعة بين البطل والكاتب اثناء حكايته عن قصة حياته وكيف يعتقد البعض انه مات ولا يصدقون الكاتب..فيلم من الافلام الدرامية العظيمة




9- Trainwreck: My Life as an Idoit

فيلم ممتاز عن قصة شخص يعاني من مشاكل واضطرابات شخصية وكيف شق طريقه ليصبح كوميدي استعراضي شهير في النهاية ..من اكثر الافلام التي ظلمت ولم تأخذ حقها فعلا في الايرادات رغم انه من اجمل افلام الامل والتحدي




10- 7 pounds

ويل سميث من جديد ..يتألق كالعادة ..كيف تغير حياة اشخاص..كيف تكون اليد الممدودة للناس لمساعدتهم وتغيير كامل حياتهم..هذا هو الاطار العام للفيلم الرائع
ومن الجمل الشهيرة في الفيلم

In seven days, God created the world. And in seven seconds, I shattered mine





11- the fighter

مارك ويلبيرج وكريستيان بل وايمي ادامز و مليسا ليو
ملحمة تمثيلية حصدت الجوائز والاوسكارات عن قصة ملاكم ايضا وكأن معظم افلام الامل والتنمية البشرية كما اسميها في الملاكمة والرياضة
فيلم حصد الاوسكارات واعجبتني جدا الموسيقي في هذا الفيلم وكنت اري ان تحصد الاوسكار هي الاخري




12- The Bucket List

لم يحصد الأوسكار؟؟ ..ليست نكتة ولكنها الحقيقة ولا اعرف كيف حدث هذا فعلا
هرمان في التمثيل "جاك نيكلسون" و "مورجان فريمان" عن قصة عجوزان مصابان باسرطان يريدان تحقيق باقي احلامهما او قائمة الاحلام قبل ان يموتا ويفارقا الدنيا ويمدان بعضهما بالأمل دائما طوال الفيلم حتي فارق مورجان فريمان الحياة بعد ان جمعتهما صداقة وطيدة جدا ورحلات عديدة
فيلم اكثر من رائع




13- Into the Wild


من الافلام التي رشحت لجائزتي اوسكار وكان يستحقها..شخص ترك حياته تقريبا واتجه لعالم الحياة البرية ليقابل ما لم يراه طوال عمره ويري الحياة من منظور مختلف تماما..فيلم ممتاز
وقصة جديدة وغريبة والاغرب انها حقيقية !






تحدثنا كثيرا عن كلمة تنمية بشرية ولكن هناك افلام فعلا سخرت من شخصية محاضر التنمية البشرية مثل "ابراهيم الفقي" مثلا عندنا في العالم العربي وغيره في الغرب ومن هذه الافلام
التي سخرت من هؤلاء بشكل مبالغ فيه



yes man
للنجم جيم كاري والذي سخر من كتاب بهذا الاسم فعلا



The Love Guru
من اسوأ الافلام وايضا من الافلام التي سخرت من شخصية المحاضر في التنمية البشرية



I.Heart.Huckabees

ايضا سخر من هذه الشخصية بطريقة مبالغ فيها


Man About Town

سخر في بعض المشاهد من الفيلم ايضا من المحاضر



Mama's Boy
ايضا من الافلام التي سخرت في بعض المشاهد من هذه الشخصية




وبالطبع انصحكم بمشاهدة الافلام في القائمة الاولي بينما افلام القائمة الثانية التي سخرت هي افلام سيئة للغاية ولكن كانت للاستشهاد فقط لا اكثر.


وكم هي ممتعة هوليود عندما تتحدث عن الامل والصمود والوصول للهدف .



Wednesday, March 16, 2011

عن المسـلم والمـسيحي ومـصر الحبـيبة






بداية اقول "بسم الله..و بسم الحرية..وبسم كل مصري" ارفع علم بلادي فوق كل ماذنة وكنيسة..
ارفع علم مصر علي صدر كل مسلم ومسيحي..واقول امين..امين يا مصر..لتشقي السما حرة ولا تخافي..ونفضل احنا يا مصر حلاوة حضنك الدافي..
علي اسم مصر التاريخ يقدر يقول ما شاء..مصر اللي يهوي الغنا طعمها ويهوي الكلام رسمها..
مصر اللي من مهدها كاتبة التاريخ لقرون..ولا همها البغددة ولا يعني ملك قارون..
نغني مصر ونعيش لمصر ..حلاوة شمسنا ..وتاريخنا ومجدنا ..ومصر عندنا..عظيمة الي الابد..
مصر المسلمة القبطية..العجوزة والصبية..الجارحة والمداوية..الصابرة والمنادية..
يامصر.. اغنيلك ربابة واعزف علي نبضي الوانك الحرة ..واحني ايدك بلون سمرتي الحلوة من شمسك القاسية..قسوتها حنية..وولادها خمرية..
هتعيشي مرفوعة الجبين ولا تشيبي..شيبتك شبابنا وحنيتك قومة..ارواحنا ليكي يا مصر وضلوعنا مرسومة..علي خيط ملامحك يا بلدي الحرة
يا مصر..



انا حبيت اقول لمصر الكلام ده قبل ما ابدأ ..عشان مصر مش هتصدق ان لسه في علي ارضها فتنة..مصر مش هتصدق ان لسه في علي ارضها ناس بتتكلم عن الفتنة بعد ما عاشوا من خير ترابها سنين وسنين..الفتنة لازم تموت..ما بين مسلم ومسلم..مسلم ومسيحي..وكل الاتجاهات والطوائف اللي علي ارضها لازم تتوحد تحت علم واحد وتلات حروف..
الفتنة اللي بتظهر ما بين الحين والاخر لازم تموت..احنا اللي بنصنعها واحنا اللي بنصدقها واحنا اللي بنتخنق منها زي الغاز الفاسد..

طول عمر المسلم والمسيحي ايد واحدة ده مش كلام شعارات دي حقائق وتاريخ..ومهما حاول مثيري الفتن يحرقوا مصر هيتحرقوا..هيشوفوا عارهم بين ايديهم

من خلال قراءة متأنية عن موضوع الفتنة الطائفية ومتابعة قضاياها لسنوات اعرف جيدا انها مؤامرة ..ولكن هي ليست فقط مؤامرة بالطبع فهناك اسباب واخطاء اخري داخلنا نحن نصنع هذه الفتنة ولكن لماذا قلت مؤامرة ؟ لان هناك اطراف خارجية واطراف داخلية تشعل الفتنة بكل وضوح من اول اسرائيل الي جهاز امن الدولة السابق والذي انتهي بلا عودة ان شاء الله.



سنتحدث اولا عن تاريخ علاقة المسلمين والمسيحيين من قديم الازل :


في كتابه الشهير تحدث "محمد جلال كشك" في فصول كتاب "الا في الفتنة سقطوا" عن الفتنة بالتفصيل وتاريخ العلاقة بين الطرفين منذ عصور قديمة واوضح قائلا :

"مصر لم تكن دولة مستقلة بل فقدت استقلالها قبل العرببما يقرب بسبعة قرون وفقدت تميزها الحضاري قبل ذلك بعدة قرون بالغزو الفارسي الذي خلصها منه اليوناني ثم الروماني
ومن ثم لم تكن هناك هزيمة قومية للفتح العربي بل علي العكس كان تحريرا للمصريين"

ومكانش الاقباط في نعيم او هناء وجاء الاسلام غازيا مثلا بل علي العكس الاسلام جاء محررا طبعا زي ما احنا عارفين وعاملوا الاقباط كأخوة وعاملهم الاقباط كأخوة ايضا :

"الاقباط لم يكونوا مجرد خاضعين لحكم اجنبي وقت الفتح ا لعربي بل كانوا في ثورة ضد هذا الحكم ويتعرضون لعمليات ابادة حقيقية سجلها عصر الشهداء ..ورغم مقاومةالاقباط الباسلة والتي لم يسبق لها مثيل الا ايام الحرب ضد الهكسوس الا ان تفوق الامبراطورية البيزنطية ومن قبلها الرومانية جعل حصة الاقباط من المعركة هي الاستشهاد تحت ضرب السياط وابشع ما تفتق عنه العقل من وسائل التعذيب وقد قتلوا شقيق البطريرك القبطي بارسال شحمه بالشموع المشتعلة ثم وضعوه في جوال مثقوب وانزلوه الي البحر عدة مرات يطلبون منه الرجوع عن
دينه فلم يفعل .."


وحتي اما حصلت حروب وفتن بعد ذلك بين المسلمين نفسهم ولكن الاقباط كانوا هادئين ولم ينقضوا عليهم مثلا او يحاولوا ياخدوا الحكم مستغلين الفتنة لانهم كانوا يعاملون افضل معاملة من هؤلاء المسلمين :

"وفي هذه الظروف جاء العرب وما كان يمكن ان يصنفوا من قبل المصريين الا محررين
وكانت البشري التي انتظرها الاقباط الصالحين عن الخلاص القادم وهذه الروايات اثبتت في التاريخ القبطي "

"ولم يمر علي الفتح اكثر من عشرين سنة حتي كان الفاتحون يخوضون حروبا دموية ضد بعضهم في فتنة عثمان ثم علي ومعاوية ومع ذلك لم تقع ثورة ولم ينقض عليهم اهل البلد الاصليين"


هي دي العلاقة من ايام فتح مصر ..علاقة طيبة جدا بين الطرفين وحتي موضوع الجزية فكانت معروف انها بديل عن الجهاد لحمايتهم او تقدر تقول انها ضرائب ويتم بالجزية الاستعداد والدفاع عنهم وفي اوقات مكانتش الجزية بتتدفع يعني مش دايما بتتدفع وخلاص لا
وقال احد الخلفاء "ان الرسول لم ياتي جابيا" لان كان واحد عايز ياخد الجزية بدون سبب واضح فقاله كده ..لان الجزية كان ليها اصول وقواعد وكان الكل بيدفعها وبتستخدم في الاعداد للحروب وحاجات تانية كتير مهمة للدفاع عن الارض فاللي مشتركش في الحرب بيدفع فلوس ع الاقل عشان
يقدروا يدافعوا عن الارض مش زي كلام بعض المغرضين..

وكان عمرو بن العاص ياخذ الضرائب ولم ياخذ ولم ياخذ شيئا من مال الكنائس ولم يرتكب اي شئ وحافظ عليها طوال الايام



العلاقة الطيبة بين المسلمين والمسيحيين :


سأتطرق هنا لاجمل مواقف الوحدة الوطنية بين المسلمين والمسيحيين :


1- ذكر ايضا محمد جلال كشك موقف رائع من ايام عرابي تتجلي فيه الوحدة الوطنية يقول :

"كان عرابي حامي الديار مارا ذات يوم في خط النار بجهة كفر الشيخ فاستوقف نظره شيخ هرم قد حنت الايام ظهره فاستدعاه اليه وقال له : يا ابت انا اري شيبك لا يسمح بوجودك بين صفوف المقاتلين فلك ان تستريح كما تشاء قال له الرجل كيف تحرمني من ان اجود بدمي فدية عن بلادي من المغيرين عليها وانا وان كان كل اولادي هنا ايضا في ميدان القتال وكلني اود ان اشترك معهم فقبله عرابي وسأله عن اسمه فقال :جرجس بقطر من اهالي مركز ملوي بالمنيا


2- الحقيقة التاريخية التي نعتز بها انه كان قبطيا من صاغ فكرة الاسلام الحضاري في اوضح صيغة الا وهي مقولة وليم مكرم عبيد الخالدة "انا مسلم وطنا نصراني دينا"


3- مقولة محمد خالد والتي ذكرها ايضا "محمد جلال كشك" :

خالد محمد خالد "هل من سكان الارض جميعا من يستطيع ان يشطر الشعرة شطرين طولا وعرضا ..كذلك لن يستطيع احد ان شاء الله ان يشطر وحدتها وشعبها حتي نصرخ في هياج احمق :ادركوا الوحدة الوطنية


4 - وعمرو بن العاص اول لما جاء "استدعي "بنيامين" البطريرك الذي اختفي من ايام هرقل ملك الروم فكتب امانا يدعوه الي الحضور فلا خوف عليه ولا تثريب ولما حضر وذهب لمقابلته ليشكره علي ها الصنيع اكرمه واظهر له الولاء واقسم له بالامان علي نفسه وعلي رعيته "


5- وقال مكرم عبيد العظيم احد ابطال الثورة "المصريون عرب..وتاريخ العرب سلسلة متصلة الحلقات لا بل هو شبكة محكمة العقد ورابطة اللغة والثقافة العربية والتسامح الديني هي الوشائج التي لا تقضمها الحدود الجغرافية"


6- الأنبا موسي في الكنيسة الارثوذكسية "نحن كأقباط لا نشعر اننا اقلية لانه ليس بيننا وبين اخواننا المسلمين فرق عرقي "اثني" لاننا مصريون واتجاسر واقول : كلنا اقباط بمعني انه يجري فينا دم واحد من ايام الفراعنة ووحدة المسألة العرقية تجعلنا متحدين مهما اختلفنا "


7- الانبا يوحنا قلته : " اوافق تماما علي ان اكون مصريا مسيحيا تحت حضارة اسلامية "


8- الاب متي المسكين الرجل الحكيم اللي حذر كتير جدا من موضوع الفتنة


9 - من علماء الغرب الذين شهدوا لتحرير الفتوحات الاسلامية سير "توماس ارنولد" وقال : "انه من الحق ان نقول ان غير المسلمين قد نعموا بوجه الاجمالي في ظل الحكم الاسلامي بدرجة من التسامح لا نجد لها معادلا في اوروبا قبل الازمة الحديثةوان دوام الطوائف المسيحية في وسط اسلامي يدل علي ان الاضطهادات التي قاست منها بين الحين والاخر علي ايدي المتزمتين والمتعصبين كانت من صنع الظروف المحلية اكثر مما كانت عاقبة مبادئ التعصب وعدم التسامح"







أسباب الفـــتنة :



1- أسباب الفتنة قديما :

في كتاب محمد عمارة عن الفتنة تحدث عن سبب للفتنة زمان وبيقول ان في كذا سبب حسب كلام جورج قرم :

جورج قرم بيقول "اسباب الاضطهاد : مزاج الخلفاء الراشدين :اخطر اضطهادين حدثوا في عصر "المتوكل العباسي" و "الحاكم بأمر الله" وكلا الحاكمين ايضا عم اضطهادهما كثير من المسلمين
العامل الثاني :تردي الاوضاع الاقتصادية لمعظم المسلمين والظلم الذي يمارسه احيانا بعض الذميين المعتلين لمناصب عليا
اما العامل الثالث :فترات التدخل الجنبي وقيام الحكام الاجانب باستدراج الاقليات معهم ضد المسلمين


طيب وهنا هنتكلم عن موضوع نابلوين علي سبيل المثال بيقولك وهو في طريقه من مرسيليل الي الاسكندرية قال انه هيجند 20000 من ابناء الاقليات المسيحية في مصر والشرق ليتخذ منهم مواطئ اقدام لغزوته وفعلا سقط البعض مع بونابرت وكان قائدهم "يعقوب حنا" اللي بقي جنرال في الجيس الفرنسي الغازي وسماه الجبرتي المؤرخ العظيم "يعقوب اللعين"


يعني فترات التدخل الاجنبي مش بتنقذ حد ولكن بتزيد الفتنة عشر اضعاف بعد ما كانوا عايشن في سلام دائم .

جائت ثورة 1919 وداوت الكثير من هذه الفتن الطائفية القديمة وتم النص علي ذلك في دستور 1923 "ان الاسلام هو الدين الرسمي للدولة واللغة العربية هي لغتها العربية والقومية"





2- أسباب الفـتنة حديثا :



1- خطباء بعض المساجد وخطب بعض الكنائس :

طبعا دول ليهم اول دور لازم يحافظوا جدا علي كلامهم ويتكلموا في الدين بدل ما يقعدوا يتكلموا عن بعض بلهجة غير حضارية علي الاطلاق ودول ليهم اليد الاقوي في اشعال الفتنة لاننا عارفين دور رجل الدين وتأثيره علي عقول الناس وازاي يقدر يحركهم بكلمة ويوقفهم بكلمة واحدة وممكن تسمع خطبة في مسجد مستفزة جدا عن المسيحيين وبرضه جوة الكنيسة ممكن تسمع كلام مستفز جدا عن الاسلام وفي بعض القنوات الفضائية كمان كلام لا يصدق يقال من الطرفين علي الاخر..اوقفوا هذه المهزلة



2- تصريحات بعض الشيوخ او القساوسة:

مثلا زي تصريح الانبا بيشوي الشهير "احنا استقبلنا المسلمين كضيوف" ! تصريح غريب جدا ومثير للناس ومستفز جدا ..يعني ايه ضيوف ؟ احنا عرقنا واحد من ايام الفراعنة بصرف النظر عن الديانة وبعدين التغيرات دي حصلت في كافة الدول مش في مصر بس مثلا في امريكا او اي دولة اوروبية يطلع بقي سكانها القدام يقولوا "انتوا ضيوف" ؟؟ ده كده التاريخ كله هيقع بقي بالمعني ده ..!
في حقائق وفي تغيرات حصلت في كافة الدول والمجتمعات ودي حقيقة ثابتة والامثلة كتير جدا

وتصريحات اخري لشيوخ يقولك مثلا في قناة تليفزيونية دينية "المسيحيين خدوا حقهم وزيادة" ! ..ده كلام فارغ ازاي شيخ يطلع يقول كده في قناة قدام الناس ويثير الفتنة !! عيب عليك يا شيخ انك تقول كلام زي ده قدام الوف مين اللي بيسمعوك وتنمي الاحساس عند الناس ان دول عايزين اكتر من حقهم ودي مش حقيقة..المسيحي مواطن وليه حقوق زي المسلم تمام لانه مصري.
يعني انا بلوم الطرفين طبعا لانهم بيشعلوا الفتنة بتصريحات مستفزة.



3- مشعلي الفتنة :

في مقالة لعادل البياتي قال :

"والبعض الآخر يتهم أطرافا من الداخل بل من داخل النظام، تريد استمرار وتصعيد الفتنة من أجل أهداف أهمها استمرار حالة التوتر والاضطراب الداخلي، مما يضمن استمرار حالة الطوارئ التي تحكم البلاد بقانونها سيئ الصيت منذ نحو ثلاثين عاماً، كما يرى البعض أن القصد هو إلهاء الشعب عن أزماته الداخلية الخانقة مثل ارتفاع الاسعار وشيوع البطالة والفقر"

ويقول ايضا بلال فضل انه حصل علي مستندات من الوثائق المسربة من امن الدولة ولقي فيها دول امن الدولة في اشعال الفتنة و تفجير كنيسة القديسين !!


مؤامرة داخلية قذرة لاشعال الفتنة بين المسلمين والمسيحيين لاسباب كتير عشان يلهوا الناس عن السرقة وغيره ..يعني المؤامرات مش بس خارجبية لا وكمان من جوة مصر.



4- اقباط من الخارج :


دول ليهم دور كبير قوي بتوع المهجر في اشعال الفتنة وحاولة الاستقواء بالخارج علي مصر..ومحاولة صب البنزين علي النار اكتر واشعال اي موقف مهما كان صغيرا عشان يستقوا بقوة خارجية وفي كتاب يقول الكاتب :


"والبابا شنودة يعترف بانعدام السيطرة علي هؤلاء الذين اغتصبوا حق النطق باسم الاقباط في الخارج يقول البابا "بالنسبة لاولادنا في الخارج ..هناك اقباط مرتبطون بالكنيسة نستطيع ان نسيطر عليهم ونؤثر فيهم واقباط لا علاقة لهم بالكنيسة هم سبب هذا الاشكال"


وايضا الكنيسة زمان كان ليها موقف نشرته في الاعرام عن هؤلاء وقالت :

" بيان في الاهرام في عام 1980 تقول عن الاقباط في الخارج "ان الكنيسة القبطية الارثوكسية وقد سائها جدا التصرفات التي تقوم بها جمعية في امريكا تسمي نفسها "الجمعية الاقبطية الامريكية" وفروعها ..وما تنشره وما تنشره في مجلتها المسماة ب "الاقباط" لتستنكر بكل شدة ما تقوم به هذه الجمعية من تصرفات وكتابات وشتائم الي وطننا لا تتفق ومبادئ الكنيسة "





المؤامرات التي تتدبر للوطن العربي ومصر من اجل اشعال الفتنة :


ناس كتير قوي مبتصدقش موضوع المؤامرة ويقولك هو انت كل حاجة ترميها ع المؤامرة..ايوه لازم افكر في المؤامرات لانها حقيقة واقعة والعدو مش ساذج بل بيفكر وبيدبر ليل ونهار وحاطط خطط لخمسين سنة قدام كمان :


1- كشفت الوثيقة المتبادلة بين "بن جوريون" و "شاريت" كيف بدأت محنة لبنان باقتراح من بن جوريون باثارة فتنة في لبنان

2- سينمائيا من عهد الشاة قد انتج فيلما سينمائيا عن مصر يدور حول مذابح طائفية مزعومة تقع في مصر بين المسلمين ..فحلم تمزيق السنة ايضا هو حلم ايراني قديم من ايام الشاة..


3-كتب "برنارد لويس" في مجلة البنتاجون -مجلة وزارة الدفاع الامريكية داعيا الي مزيدا من التفتيت للعالم الاسلامي من باكستان الي المغرب علي اسس دينية وقومية ومذهبية ودعا الي تقسيم العراق ولبنان ومصر والسودان ليصبح العالم الاسلامي علي حد تعبيره "برجا ورقيا
moasaic society
"من كتاب محمد عمارة "الفتنة متي وكيف ولماذا؟"


4- طبعا مؤامرة تقسيم السودان اللي اتكلم عنها رئيس موساد سابق في كتاب ليه وكتب عن الكتاب ده فهمي هويدي


5- في لبنان "اليد الثالثة" كانت عبارة عن عناصر مجهولة كانت تفجر الفتنة كلما هدأت واعتمدت علي القناصة يطلقون الرصاصا علي المارة من اماكن عالية فيقتلونهم وتنشب الفتنة بين اكثر من طرف " وتحدث عنها ايضا الكاتب بلال فضل


يعني المؤامرات موجودة قطعا لتقسيم كل البلاد العربية لان ده حلم اسرائيل بالتأكيد وكان في كتاب "الصهيونية والنازية ونهاية التاريخ" للكاتب الكبير عبد الوهاب المسيري ذكرت فيه ايضا العديد من المؤامرات من الغرب علي الدول العربية






أقوال عن مصر وعن العلاقة الطيبة بين المسلمين والمسيحيين :



من كتاب محمد عمارة هناخد السطور دي اللي ذكر فيها الاقوال والاحاديث عن المسيحيين :



قال رسول الله :"ستفتح عليكم بعدي مصر..فاستوصوا بقبطها خيرا فان لكم منهم صهرا وذمة "

وفي بعض الجمل المأثورة عن مصر واللي يريدها بسوء :

جاء في المأثورات : "من ارادها بسوء كبها الله علي وجهه"
سفيان بن عيينة قال " انها كنانة الله يحمل فيها خير سهامه "


وطبعا احنا عارفين ان مصر ذكرت كتير في القرأن وايضا في الانجيل :

من بعض الايات التي وردت عن مصر :

"ادخلوا مصر ان شاء الله امنين"
"اهبطوا مصر فان لكم ما سألتم "
"واوحينا الي موسي واخيه ان تبوءا لقومكما بمصر بيوتا واجعلوا بيوتكم قبلة "


يعني في النهاية نقول ان اعلاقة تاريخية وهتفضل ابدية ان شاء الله..وشوفنا كمية المؤامرات اللي بتتدبر ضد مصر عشان تقسيمها طرفين ودخولها في صراعات طائفية..يعني الناس نيتها صافية بس المؤامرات هي اللي بتوقع..فاعقلوا هذا ايها المسلمون والمسيحيون ولا تعطوا الفرصة لكلاب تشعل الفتنة ان تنجح في مهمتها..



"المسلم والمسيحي ايد واحدة ووطن واحد "

Tuesday, March 15, 2011

شـمس وقـمر..27






**كم أشتاق لحلم يجمعنا..
فكأني حلمت بشوق يفرقنا !


**حتي ان تنكرت مشاعرنا في لعبة "كوتشينة"..
ستظلين "البنت" وأظل" الولد" ..ويظل بيننا "زمان ..شايب".


**كانوا دائما يتهمون العاشق بأنه "رحال" في عيون من يحب..
ولكن لم يروا بعد من "ترهبن" في عيون من يحب دون "ترحال".


**ليس الحب لحنا يقدس..
ولكنه قدسية نلحنها بنبض ..ونصليها بنظرة..


**الوداع هو لحظات انتظار.. وراء شباك عودة جديدة..!


**قالت : هل تراني جميلة... فصمت..قالت: لماذا لا تجيب ؟..قلت: اعطي الجمال اخر فرصة ليعترف انك تملكين براءة الإختراع..!


**نولد جميعا من "رحم" لنصل الي "رحمة".. كل ما ينقص "تاء تأنيث" في حب تحياه..


**ليس للحب مواعيد..فمن الغريب جدا ان تسأل "متي يقبلني القمر؟ " !


**قالت: لماذا اري في نظراتك الدهشة الكاملة ؟ ..قلت: بل هي ربع دهشتي...قالت : واين بقيتها ؟..قلت : ربع اخر يبكي بجوار ملائكة تداعب رموشك..وربع يتستر علي جربمة "حب مع سبق الاصرار والترصد" ..وربع دهشتي الأخير علي انوثة اعلنت انتحارها علي عينيك ..فصبت دموعها السحرية علي جسدك لتخلق ملكة..!


** لم اقل لكي ابدا كلمة "منتهي" في اي حوار بيننا..فكيف اتحدث عن "منتهي جمالك" وانا لا اعرف حتي "خارطة بدايته" ..!


**سألت عيناكي في مرة "اذا كنت انا شهريار..فلماذا تملك شهرزادك سياف لي دائما ؟ " !


**لم اراك علي سرير تملأ الزهور أركانه..فليس سريرك الزهور..بل الزهور سريرها جسدك وعينيك !


**لا تتوقع الأمان الكامل في كون بدأ بإنفجار عظيم وينتهي بحرب


**المجنون ينكر دائما جنونه ..بينما العاشق لا ينكر عشقه..فالعشق ليس حالة جنون ولكن قد يكون الجنون بعض العشق !



Monday, March 14, 2011

الحـرق بالجــاز في لــيالي الجــواز..الجــزء التاسـع عشر





الكل اتأثر بالثورة بس التأثير ع المتجوزين اكتر وبالذات اللي عندهم اطفال..وبدأت بقي تطلع دراسات وتقولك تاثير الثورة علي العلاقة الزوجية وعلي القدرة الجنسية وحاجات كتير من دي ..ولكن في تاثير كبير قوي ع الاطفال في كل بيت مصري وممكن القصة دي تحصل في اي بيت :


سامح : بابا ..

الاب: نعم يا حبيبي ؟

سامح: انا مش فاهم امتي بقي هقسم الاوضة مع اختي انت قولتلي اما اكبر والكلام ده من سنين يعني انا لسه مكبرتش مثلا ؟

الاب: قريب يا حبيبي

سامح: بقالكم سنين بتقولوا كده لكن انا وحمادة اوضتنا ضيقة ولازم ناخد موقف لان دي مش ديموقراطية

الاب: ديموقراطية؟؟ موقف؟؟ لاااا يا عنيا الكلام ده قدام ماسبيرو هناك انما هنا اياك تقول الكلام ده



تعود اختهم سلمي من الجامعة لتتفاجأ بجدران اوضتها مليانة ورق مكتوب عليه "الشعب يريد انفصال الجنوب"


سلمي: يا سااااااااامح..انت يا حيواااااان

سامح: متشتميش بقولك والا هنتخذ حفنة قرارات بشأنك

سلمي: قرارات يا دغف ؟ ايه اللي انت كاتبه في اوضتي ده ؟

سامح: دلوقتي حان الوقت اننا نقسم الاوضة زي ما وعدونا من زمان

سلمي: طيب ماشي انا هاوريك


وراحت سلمي علي اوضة سامح عشان تبهدلها عقابا علي اللي عمله ولكن ..


سلمي: ايه ده يا حمادة ؟ انت نايم علي بابا الاوضة؟ اوعي خليني ادخل

حمادة: ممنوع دي لجنة حماية

سلمي: لجنة ايه يا حيوان فوق احنا في البيت

حمادة: ايوه انتي بالذات مش هتعدي الا لما نحقق المطالب


سلمي: يا مامااااااا تعالي شوفي حل في ولادك العبط دول

الام: في ايه يا واد انت وهو وهي ؟

سلمي: بيقولك عايزين انفصال الاوضة وتقسيمها وبيهددوني

الام: ينفع كده يا حمادة انت وسامح؟؟ يلا امشوا دلوقتي

حمادة:مش هنمشي هي تمشي..مش هنمشي هي تمشي


الام لسامح علي قفاه : طرااااااااااخ
حمادة: خلاص نمشي المرة دي



وخرجت سالي الي الصالة وبتفتح التليفزيون ومسكت الريموت وفجأة

حمادة : البيت يريد تغيير سلطة تداول الريموت كنترول

سلمي: نعم يا عنيا ؟؟؟ لاااااا ده انا اقولك بقي شعار من عندي "سلمي والريموت ايد واحدة " يا عين ماما

سامح: لكن ده ظلم انك تمسكي الريموت واحنا نشوف بمزاجك احنا عايزين الماتش

سلمي: مافيش ماتش

حمادة: في ماتش

الام : منكوا لله قرفتوني في عيشتي في ايه تاني ؟

سلمي: قال ايه عايزين الريموت وبيطالبوا بمداولته بينهم

الام "متقمصة دور مبارك" : ها ها ها خليهم يتسلوا


واثارت الكلمة دي الاولاد وجددوا المطالب لليوم التاني ورفعوا سقف المطالب قوي وكقعدوا في الصالة معتصمين وكتبوا ورقة "البيت يريد تزويد المصروف"


ولكن سلمي المؤيدة لنظام البيت معجبهاش الحال فلجأت لموقعة "الجمل" او موقعة "اللعب" وقعدت تحدف اللعب علي اخواتها وهم في الصالة عشان يقوموا والموضوع قلب لضرب بالمخدات والشبشب ولكن حمادة وسامح كانوا صامدين قوي


الأب : يا حمادة وسلمي عيب انتوا اخوات وبعدين البيت كله ميت متر يا ولاد المهفوفة نقسم ايه بس ؟

سامح: كل حاجة ممكن تنفصل حتي لو اتنين في لباس زي ما حصل بين فتح وحماس

الاب: لباس؟؟ فتح وحماس؟؟ ايه الشعر والالفاظ الرقيقة دي يا عم سامح

سامح: اه حاجة بسيطة كده يعني و..

الاب: اخررررس



وقعد الب يفكر يعمل ايه يعمل ايه وتشاور مع الام كمان وجاتهم فكرة عبقرية من افكار الحزب الوطني الشيطانية ..الحل في الافراج عن المساجين وتريع الأمنين..يبقي ايه الحل :


الام: وجدتها

الاب: ايه الحقيني

الام: نجيب ولاد عمهم شديد وعفت

الاب: يا ساتر دول عالم بلطجية

الام: ايوه نقعدهم في اوضة حمادة وسامح كام يوم عشان يتربوا


وفعلا جه حمادة من المدرسة ولقي اللي بيفتحله شديد ابن عمه

شديد: خش يا حيوان

حمادة: شديد ؟؟ ايه اللي جابك؟؟

شديد: هاقعد معاكوا كام يوم في مانع ؟؟

حمادة : احم احم لا طبعا انت تنور انا اقدر اتكلم


ومارس شديد وعفت كل اعمال البلطجة في البيت من استيلاء علي الريموت وقزقزة لب ع السجادة واخذ البطاطين عليهم دون تغطية الاخرين وكل اعمال ترويع الامنين ..ترويع عبيط يعني ..

وجه اليوم ومشي شديد وعفت ولكن بقت مطالب حمادة وسامح زي ما هي وكتبوا ورقة جديدة "عايزين نرسم شريط حدودي"


الاب: انت يا زفت يا سامح..شريط حدودي؟؟ انت بتيجب الكلمات دي منين انا معدتش هافرجك ع الجزيرة علي فكرة..وبعدين انتوا اخوات يعني بعد ما كنتوا زي ديانا ودودي عايزين ترسموا شريط حدودي

سامح: ديانا ودودي وشريط حدودي ؟ ده شعر ولا ايه ؟

الاب: مش احسن من لباس وفتح وحماس بتاعتك ؟

سامح : لا طبعا بتاعتي احسن ..المهم لازم شريط حدود بين الاوضتين لما تمارسه سلمي من اعمال استيطان وبتزود مساحة اوضتها كمان بانها بتحط حاجات في اوضتنا بما يشبه استيطان

الاب: استيطان ؟

وبدأت الامور تاخد منحي اخر بسبب عدم الاستجابة للمطالب ووصلت الي "البيت يريد اسقاط سالي"

الام: لااااا اسقطكوا انتوا ماشي انما سالي لا دي دراعي اليمين في المطبخ..خلاص احنا نسقط سلطة سالي بس انتوا مش هتدوقوا اكل بقي يا حبيبي انت وهو

حمادة: موافقين


وبعد شهر "البيت يريد محاكمة سالي"

الاب: لااا تصدقوا بقي انتوا زودتوها وانا شايف ان "موقعة الشبشب" لازم تشتغل حالا..انتوا فاكرين نفسكوا في التحرير ولا فين

سامح: احنا عايزينها تتحاكم وتتعاقب علي جريامها الماضية في حقنا من كسر لعب واخفاء ريموت ومصادرة جرايد ومجلات وبتخبيها تحت مخدتها عشان تقراها هي بس

الاب: لا تصدق جرايم حرب يلا ؟ بس انا شايف ان الديكتاتورية حلوة قوي ..سلممممممي

سلمي: عنيا يا بابا

الاب: الشبشب جاهز ؟

سلمي: وسخن وجاهز للعمل


طرااااخ ..بوووم ...طراااااخ..بوووووم


ولم تنتصر ثورة سامح وحمادة في البيت زي الثورات ولكن كانت النتيجة "شبشب" جامد ومتينوعادت سلمي للسلطة ومسكت الريموت في تحدي واضح وحرمتهم من الماتشات كلها
وتم حرمانهم من المصروف كمان


ودي قصة ثورة جوة بيت مصري..من يوميات الجواز واللي عايزين يتجوزوه

Sunday, March 13, 2011

في حاجات م الغرب تسـر القـلب..الجـزء الثاني





اتكلمنا عن حاجات م الغرب تسر القلب او حاجات ياريت لو نعمل زيها هنكون في وضع تاني..لكن مش كل حاجة عندهم بالطريقة دي طبعا زي اي حاجة "الحلو ميكملش" نشوف

بقي ايه بعض السلبيات الخطيرة اللي عندهم




سلبيات المجتمعات الغربية :


1- اشياء مقززة للانسان الطبيعي يعتبرونها نوع من الحرية زي مثلا الوزير الألماني اللي اعلن انه اتجوز صاحبه او التون جون وخبر زواجه برضه بنفس الطريقة ويجيبولك حتت من الفرح كمان علي جرايد رسمية شهيرة وكأنها حرية بس النوع ده من الحرية بيأذي الوف من الأسر المحافظة او العادية حتي

2- الفضايح في امريكا واوروبا تشمل جميع المهن فمافيش مهنة مقدسة هناك او لا يشوبها شائبة زي القضاء مثلا وشوفنا فضيحة القاضي اللي بيرشي عاهرة امريكية بمخدرات
يعني جنس ومخدرات ورشوة في وقت واحد ومن مين ؟؟ قاضي !!


3- العنصرية الرهيبة اللي بتظهر للمسلمين والاقليات بوجه عام زي القسيس في كاليفورنيا اللي طلع من فترة وهدد بحرق المصحف في يوم ويعمل كده كل عام ويسميه "يوم حرق المصحف" والقرارات اللي كل شوية تطلع في دول اوربية حول الحجاب والنقاب وغيره واضطهاد المسلمين في الوظائف في فرنسا اللي حصل من فترة وتعيين ذوي الخبرة الاقل فقط لانهم فرنسيين واهمال المسلمين من خلال معرفة اسمهم فقط


4- تسيب او خلل امني رهيب اما نشوف واحد يقتل مصرية جوة المحكمة بطعنات عديدة ومافيش حراسة جوة المحكمة تشيله او تبعده يعني لأما تواطؤ ودي فضيحة إما تسيب امني ودي فضيحة برضه


5- الشركات العملاقة اللي يظنها البعض كاملة ومنظمة وخالية من العيوب مليانة خلل فني وعدم مراقبة وخلل صناعي كامل زي شركات تويوتا وغيرها من شركات السيارة اللي كل شوية تسحب ملايين السيارات بسبب الخلل وايضا شركة نوكيا وغيرها من شركات الهواتف لوجود عيوب بالجملة


6- الازمة الاقتصادية العالمية وضحت ان في عيوب واخطاء فادحة في النظام الاقتصادي الامريكي والعالمي وعدم القدرة علي توقع السيناريوهات لما هو قادم وحتي الخطط اللي اتحطت كان في بعضها خطط فاشلة غير قادر علي تدارك الموقف


7- الفضايح المخلة في الغرب اللي بتطلع كل يوم زي فضايح ساركوزي او برلسكوني مع عاهرات وكلينتون ومونيكا زمان وفضائح لاعبي كرة القدم الجنسية الكثيرة جدا جدا


8- الفضيحة الحديثة جدا من فترة قريبة التصنت علي المكالمات في انجلترا لبعض الوزراء وغيرهم


9- الفيفا تلك المنظمة المليئة باوكار الفساد والغش والمناورات والرشاوي ظهرت فيها العديد من قضايا الفساد والرشوة


10- قضايا فساد شركات عملاقة في امريكا وتلاعب بالميزانيات وغيره منها ابسون وكثير من الشركات


11- فضيحة "كراتشي " في فرنسا وان ساركوزي قال لبعض الصحفيين "يا شواذ" عندما سألوه عن تورطه في القضية


12- الفساد والرشاوي في المجتمعات الاوروبية وحتي في كرة القدم زي الدوري الايطالي وسقطوط اندية كبري لتورطها في فضائح الرشاوي علي نطاق عالي


13- تم فصل غاليانو من "ديور" بسبب معاداته السامية ويتشدقون بحرية الرأي والتعبير


14- الإهتمام بقضايا علي حساب قضايا حسب المصلحة زي ما شوفنا ازاي يهتموا باي قضية وتقديم يد المساعدة الا القضية الفلسطينية حيث تجد التلاعب والبطئ وعدم تقديم الحلول ومساندة كاملة لاسرائيل


15- فضائح زي جوانتنامو وانتهاك اعراض البشر والمعتقلات السرية والتعذيب والتنكيل بالجثث في العراق لجنود امريكيين ويتحدثون عن حقوق الانسان


16- تقريبا كل ممثل او مطرب او مطربة امريكية واوروبية لازم يدمن المخدرات ويدخل مصحة عشان ياخد اعتماد انه مطرب شهير ..فضائح النجوم والمخدرات لا تعد ولا تحصي زي ايمي واين هاوس وبريتني سبيرز والمئات غيرهم وايضا الشرائط والفيديوهات الجنسية لهم


17- مخططات كاملة لاحتلال دول عشان البترول يتم فضحها تباعا من صحفيين امريكيين زي ما فضحوا موضوع احتلال العراق وضرب برجي التجارة العالمي


18- الفساد الرهيب اللي بيكشفه "مايكل مور" في افلامه وفي موقعه الرسمي كل فترة في امريكا زي فساد قطاع التأمين الصحي اللي هز امريكا وغيره من القطاعات


19- كل يوم حادثة تقشعر لها الابدان في امريكا زي الام اللي بتقتل بنتها عشان الفيس بوك والام اللي بتقتل ولادها الاربعة كل واحد بثمانية طعنات والطلبة اللي بيمسكوا رشاش ويموتوا زمايلهم بالكامل في مدرسة او معهد


20- تحرشات الأطفال وعامل نوادي كاملة للعراة ومتاجر للجنس واخرها فضيحة ملهي كامل لاعمال سادية جنسية وخرج منه الامير هاري في انجلترا وغيره من المطربين المشهورين وكانت فضيحة مدوية


21- الإستهزاء الكامل بالدول الاخري في افلام هوليود حيث يتم السخرية من كل الدول تقريبا بعبارات عنصرية


22- وثائق ويكليكس اللي بينت فضايح العالم كله المستخبية حتي الدول اللي كنت تظن ان مالهاش فضايح ويكليكس كشفت الجميع من رشاوي وحفلات جنس ومتاجرة بالاسلحة وصفقات مشبوهة




يعني زي ما في حاجات م الغرب تسر القلب في حاجات تخليك تشمئز فعلا وكتير قوي





Saturday, March 12, 2011

في حاجات م الغرب تسـر القـلب





كان في مثل زمان يقول "مافيش حاجة م الغرب تسر القلب" لكن اظن ان دلوقتي في جيل بيقول "كل حاجة م الغرب تسر القلب" لكن المقولتين مش صح..الغرب زي ماله مميزاته الكتير اللي دايما نستشهد بيه في كل المواقف ونقول الجملة الشهيرة "برة بيعملوا كذا" عشان ناخدهم المثل والقدوة ونشوف هم ليه سبقونا في كل المجالات
لكن برضه كمية العيوب والفضائح والثغرات اللي عندهم موجودة بشكل رهيب يعني مافيش حاجة كاملة زي ما الناس فاكرة ان الغرب ده عشان سابقنا هو سابقنا في كل حاجة ..لا مش في كل حاجة طبعا
في مجموعة قيم مفقودة تماما واخلاقيات واشياء اخري هنتكلم عنها هنا


هنشوف مع بعض من خلال بعض الوقائع عندهم ازاي ممكن ناخد منهم ايجابياتهم ونستعرض برضه سلبياتهم :



أولا :إيجابيات المجتمع الغربي :


1- التخطيط لكل حاجة ولو جتي بعد عشرين سنة او خمسين سنة كمان و كل حاجة عندهم ليها دراسة ويقولك في امريكا عملوا دراسة إن بعد خمسين سنة مثلا هنقدر ناخد كاس العالم..بيشوفوا قدرات اللاعبين والناشئين بتوعهم ويعرفوا من خلال احصاءات يعرفوا بعد عشرين سنة او اكتر الوضع ممكن يكون عامل ازاي وطبعا الدراسات دي كمن علي
البترول والقطاعات الهامة ويشوفوا ممكن يحصل ازمة بترول بعد كام سنة في المستقبل.


2- محاسبة الفاسد لو حتي علي حاجة نعتبرها بسيطة زي الدفيدي اللي اجره مسئول كان مكلف ميزانية الدولة عشرة جنيه استرليني واعتبروها قضية فساد !! لأن الفساد مش بالرقم المهم انه خد ولو جنيه استرليني واحد


3- الاعتذار بعد الخطأ ولو رئيس الجمهورية نفسه لازم يعتذر..اوباما مرة كان في خطاب قال جملة في النص "بيمشي زي المعاقين "..اعترض علي الكلمة دي مجموعة في اولمبياد المعاقين طلع اعتذرلهم فورا وقال مكنتش اقصد


4- في فرنسا اعترض المجتمع الفرنسي بالكامل علي تعيين ابن ساركوزي في وكالة التنمية العمرانية هناك وقالوا ايه مؤهلاته عشان يمسك حاجة زي دي ؟؟ يعني مافيش حاجة اسمها ابن رئيس وكده لازم كل واحد يفصح ليه يستحق المهنة دي


5- في انجلترا كان فيه مشكلة عشان مسئول كبير دخل الخدامة بتاعته من غير ما تخلص ورقها في المطار وكده


6- قيمة التواضع عندهم هم فاهمينها كويس زي اما تشوف اوباما بيرقص في برنامج "الين دي جينريس" وسارة بالين تسخر من نفسها وتقلد حركاتها هي نفسها في برنامج "ساترداي نايت لايف"



7- كان في قضية في امريكا ان طفل كان عنده هوس بالقراءة وبيروح المكتبات يسرق كتب هم طبعا مش اعتبروه حرامي بقي ورموه في السجن لأ هم قالوا نستفيد من امكانياته دي ان واحد في السن ده بيموت في القراءة كده طيب ما يمكن يطلع عالم كبير لو وجهناه صح..فاستضافته اوبرا في برنامجها وبدأ الجميع يدله ويبعتله كتب بكميات ضخمة يقراها


8- مافيش درس من الغرب كان في الفترة الاخيرة اهم من درس حفار شيلي وازاي الرئيس اهتم بعمال المنجم ونزل بنفسه ولبس زيهم وقعد يحضنهم واحد واحد وكانت قصة انسانية هزت العالم كله


9- الملكة في انجلترا أجلت عيد ميلادها عشان حالة اقتصاد البلد في فترة


10- رئيس وزراء بريطانيا مرتبه اقل من اعوان ليه في الوزارة !


11- استقالة وزيرة خارجية فرنسا عشان موقفها ضد ثورة تونس واللي عرضت علي زين العابدين مساعدة عشان يتخلص من الثورة هناك..يعني المسئولين اما بيغلطوا او اما بيكون ليهم موقف سلبي وخطأ بيستقيلوا فورا


12- استقالة رئيس البورصة الانجليزية لعلاقته بالقذافي


13- وزير خارجية فرنسا قبل كده اللي ساركوزي كان عايز يطعم بيه حكومية يمينية رغم انه يساري من فترة طويلة جدا فاعتبره الجميع تناقض لان ازاي اجيب واحد بافكار يسارية في حكومة يمينية وده زي موضوع شفيق اللي كان من افكار الحزب الوطني وعايز يمسك حكومة عكس افكار الحزب الوطني وكان لازم يستقيل طبعا


14- تحقيق في دكتوراة سابقة لوزير دفاع المانيا وازاي حصل عليها .يعني كله خاضع للتحقيق والمحاسبة


15- في ماتش كورة في كولمبيا لاعب شاط بومة برجله عشان يخرجها من الملعب حققوا معاه والجماهير صاحت ضده وكانت قصة طويلة عشان مجرد بومة !


16- في ناس برة من كتر حب الحيوانات والرحمة بيهم بيسيبوا وصيتهم لكلب او قطة..وعاملين جايزة اسمها الرحمة في قتل الفئران !!


17- ساعات يعملوا مسيرات تعاطف مع قضايا تهم الرأي العام زي مسيرة هوليودية في الفترة الاخيرة تسمي "مسلم ليوم واحد" تعاطفا ودعما للمسلمين في العالم



18- طرد احد المذيعين في راديو امريكي عشان سب الاسلام


19- تشوف قمة الديموقراطية في جلسات سحب الثقة مثلا من رئيس وزراء زي برلسكوني


20- الدورة الاولمبية في الصين حديث العالم كله خرج منظمها وقال "لا برضه مكانتش كاملة كان في احسن من كده" رغم انها كانت مذهلة بس هم عايزين عمل فوق الكمال كمان


21- عملوا قرار في المانيا ان التجنيد يكون اختياري


22- ازاي يكون في احترام للناس وعاملين في انجلترا مكان مخصوص للمظاهرات والرأي ويحضرها شخصيات عامة كتيرة


23- حتي الشحاتة عندهم بأسلوب محترم مثلا الشحات يعزف موسيقي في مترو الانفاق ويلم فلوس


24- شوف مخالفات القاء الزبالة في العالم كله مثلا بلد زي الفلبين المخالفة فيها عالية جدا لو رميت حاجة ع الارض


25- كلينتون كان واقف في طابور لدخول ماتش هو وبنته وبيقطعوا تذكرة مش كوسة يعني وهيصة


26- المناظرات الرئاسية المحترمة وحوار العقول الحقيقي وظهور الرئيس الامريكي الدائم في التليفزيون لالقاء الخطابات وهيلاري كلينتون كمان مش زي عندنا كان حسني مبيطلعش الا في عيد العمال بس !!




وفي الجزء التاني هنشوف بقي السلبيات الكتير جدا للمجتمعات الغربية برضه لان مافيش حد كامل