Monday, February 23, 2009

حشـــيشة وأفـــيونة

لم أزرع لغما تحت سريري أو أسأل أوردتي عن سكين أحلامها..
لم أشتاق ليوم لا غربت فيه الشمس ولا يسأل عن نور الصبح..
لم أحتد علي فنجان القهوة بكذب قرائته ولم أسأل يوم عرافة..
هل هو مثل الحب خرافة؟

حشيشة:
راقصة شرقية تتحدي الرغبة فيك وتعميك ولكن لن تغنيك..
ترقص وتهلل ثم ما تلبث أن تفضي الك بشقوتها ..قد ماتت فيه شقاوتها..
بعد دقيقة..
أفاقت ثم أفاقت ثم أفقت..ولم يمض الوقت..
وتمر الأشخاص أمامك مثل جنازة رسمية يبدأها الصمت ويختمها الكتمان..
وتابوت يجري سريعا..قالوا إلي جنته..قلت وبعد !!
يخرج منه الأشباح تقول"لن تنساها مهما شربت"


رئة:
الأن أنا في حالتي الطبيعية وبعيدا جدا عن حد جنوني بحد جنوني..
لن أسأل عن ساعة إلي يوم الساعة..
لن اتقيأ هذا الشئ..سيظل الطعم في فمي ولن أنساه..
"سيجموند فرويد"..فسر ما تراه..وإليك كل أشعاتي..
أشعة اكس وكل جنوني علي طاولتك..
فسرني الأن..لن أهرب منك ولكن الي صنف أخر..


أفيونة:
وسأنسي الأمس..
هكذا تحدثت الي نشوتي وإنتشائي..فقلت سأنساها..
ملعون هذا الأفيون..لا يغمض جفنا إلا وفيه تفاهات الماضي..
أذكر مثلا هذا الرجل بقميصه الأحمر وقفت بجانبه كثيرا كي أرسم بعض الأزهار علي الجدران..
فوجدت..
فوجدت...
إه ماذا وجدت ..يا الله..لقد وجدتها مرة أخري..
تتحدث تلك الأزهار علي الجدران وقالت باللون الأحمر "لن تنساها"


رئة:
الأن أنا في حالتي الطبيعية..وبعيد جدا عن حد جنوني بحد جنوني..
وسأدع الدهشة علي علتها..وسأترك وجهي مجروحا من وجعي بمعصيتي..
وسأمشي في الشارع مثل اللص..كي لا أشعر مثل الأمس..


كوكايين:
تحسبه ملاك أبيض لكن تنبض فيه النار..
تتجلي في ملامحه علانات النسيان..ولكن هو نفسه لا ينسي..
هو أرض ثلجية مثل مشاعر أصحابه..
هو حضن إمراة بيضاء وشهية..
لن أهمس كلمة الأن..دعوني أجرب كل جنونه وشجونه..
دعوني أوقع معه عقد للصلح..
الأن نسيت..
نعم بالله نسيت..
أنا من أحببت؟..أنا من أحببت؟
شعور رائع ..أن أنساها..


رئة:
الأن أنا في حالتي الطبيعية وبعيدا جدا عن حد جنوني بحد جنوني..
الأن عرفت بأني مريض جدا..كل المحاليل وكل الحقن بأوردتي..
قالوا "عناية مركزة"...
قال الطبيب "ومن هي تلك التي تتحدث عنها في غيبوبتك"
وتغير عنوان الغرفة الي "حب مركز"
للأسف تذكرت..

Tuesday, February 17, 2009

حلم الغرفة الوحيد









ثلاثة للحيرة..أولنا القلب..وأخرنا الجدران..
لا تشغل بالك عن معني الوحدة..
حين أكون أنا..حلم الغرفة الوحيد..
حين يخرج الصبار من حلمي..
وتعزف الوسائد أناشيد وجودي..

أولنا القلب..
لم يخرج للنور منذ سنين..
في ظلمته بصيرته وفي كهنوته وجود..
خير ما بين الموت وما بين حواء..
فأختار الموت..أو أيهما أقرب..
لم يشعل في الظلمة نور..
وأستتر بقفص صدري زائف..
ظل إلها للحب بداخلي..
يبعث من يشاء من مشاعري..
ويحاسب من يشاء..
دون قيامة واحدة..لحب أخر..

والثاني أنا..
حلم يرتعش في عقل صبي..
لا يعرف هل سيحققه أم يخرجه من داخله..
وما بين حيرته وارادته..
اظل خيال..
او وجود اخر..يحلم بولادته ولو مستعصية..

وثالثنا الجدران..
أخر وطن للصلصال..
تتشكل من نظراتي قصورا وحدائق ان شئت..
جنتي التي لا املكها..
وحلمي الذي لا أصلي لأجله..
وعلي الجدران..
تتناثر كلمات الحب..
التي خلقت النساء لأجلها..
وخلق الرجال لقولها..
وخلق الحب ليطفئ فيها غروره..

لا أري الأن من شرفتي إلا الزيف..
"فالنتين" خرج من قلوبنا وأستتر بدمية..
لا أري من نافذة الوحدة..إلا الحب الخالص..
علمتني هي..
كيف أحب بإخلاص..ولكن نفسي..
أن أقبل يدي كل صباح..وأتغزل بعيوني..
أن أنثر نفسي كل صباح كما الكلمات..
لتلملمني في أخر ليلي..
ولكن "كلمة فراق"

لا أعرف أي قوة تملك هي..
كي تجعل من حلمي قاتل مأجور..
يقتلني بحب..ويذلني بكرامة..
كي تجعل جبل من ثلج فوق القلب ..
ويخرج من جبل الثلج البركان..
وتجعلني حلم أنثوي..
تغنيه لفترة ويلفظ أخر أنفاسه فوق ضفائرها..

أنا رجل قدر للوحدة كصديق..وقدرت له الوحدة كقدوة..
أنا كهف يعشقه الضوء ويكرهه المطر..
أنا سكن لعيون الناس وأصوات الطير..
أنا مراية جحا..يري كل منكم في نفسي شئ مختلف منه..
من أنا؟
أنا لا أعشق الوحدة..
أنا الوحــدة..




Tuesday, February 10, 2009

بصوا..مش فاضي

كل متقابل واحد يقولك"لخص..انجز ..قصر..هات م الأخر"..كلمات مصرية صميمة ..بس غريبة قوي ع الشعب المصري ..
بيختصر ليه؟طيب ما الوقت مرطرط زي الجزر ع الطريق..وبعدين الاختصار وصل لحاجات كتير جدا حتي وصل للصلاة مثلا
اه واللهي خش اي جامع واسمع اللي جنبك بيقول ايه وهو ساجد
هتلاقيه بيقول بسرعة رهيبة "سو سو سو سو"
ودي معناها ايه؟ هو بيقول سبحان ربي الاعلي عادي ولكن بسرعة رهيبة فتحس انه بيقول كده..طيب وراه ايه مستعجل قوي كده
ولو الشعب كله مستعجل..طيب مين اللي فاضي؟..وطالما كلنا مش فاضيين طيب ليه مصر من العالم الثالث؟
مرة شوفت شحات واقف مع عسكري ع الطريق وواقفين احنا مستنيين القطر يعدي..وكان ده لقاء السحاب..
العسكري بيعد في رشاويه النهارية والشحات ماسك جعبة فلوس..ولكن مش دي المشكلة ..الكارثة ان العسكري قال للشحات
مستعجل ليه..الشحات قاله مش فاضي..!!!!!!!!!!!!!!!!!!!!!!!!!!!
يعني ايه الشحات مش فاضي؟حد يفهمني دي..يعني حتي الشحات مخلص لعمله مثلا..؟ده احنا شعب جامد واللهي..
واحد قريبي قاعد م الصبح بيلعب ع الكمبيوتر ..قولتله تعالي ننزل شوية..قالي مافيش وقت !!!!!!!!!!!
يعني ايه؟هي ازمة استثمار الوقت ولا احنا بنستعبط؟..

واكتر حاجة تستفزك ساعات في المصالح الحكومية بقي تقول للراجل سلاموا عليكم يقول و"عليكم"..
الراجل مش فاضي بقي ..لسه هيرد السلام كله ..متجيش برضه..اصله وراه حاجات كتير جدا وعلي رأسها حل السودوكو..
المواطن المصري اترقي جدا وبدل مبقي بيحل الكلمات المتقاطعة بقي دلوقتي بيحل السودوكو علي مكتبه..
والاهرام والجرايد التانية جزاها الله خير استثمرت فضي الناس وزودت لعبة جديدة اللي هي السودوكو عشان الموظفين اشتكوا
قالوا بعد منخلص الكلمات المتقاطعة هنعمل ايه..الجرايد طبعا استجابت للطلب وزودت السودوكو..والجرايد اليومية كترت..
والاسبوعية زادت وبقت الحكاية بظرميط..

وصل الاستفزاز ان هيفاء وهبي بتقول انها مش لاقية وقت تهرش فيه !!!..وهي هتهرش ليه اصلا مش فاهم ..
وفيفي عبده بتقول ان كل وقتها في الخير..!!قشطة ع الخير..صباح الخير..

الموظف مرة في شبكة المياه بقوله امضيلي هنا..قالي روح للأستاذ حاتم..قولتله فين الاستاذ حاتم..
قالي هتلاقيه تحت الشجرة هناك..قولتله تحت الشجرة؟؟؟بيعمل ايه هناك؟؟
قالي روح شوفه بس لسه قاعد تحتها ولا دخل نام في الجامع.....!!!!!!!!!!!
يا نهار بتنجان..نام في الجامع وتحت الشجرة؟؟..ده ابي فوق الشجرة بقي..
المهم انا لاقيته فعلا نايم في الجامع..سألت الشيخ قولتله "هو نايم من زمان؟"..
ولاحظ الجملة "هو نايم من زمان؟" ..الجملة دي ممكن تتسأل في فندق او مستشفي بس غير كده تبقي معجزة واللهي..
الشيخ قالي "اصله منامش من انبارح"...
صباح السكلانس..ومنامش من انبارح ليه يا عم الشيخ..كان وراه ايه هو كمان؟؟؟
قالي الشيخ"بس حاول تصحيه بالراحة"
ولو شفت الموقف تموت م الضحك..مواطن اللي هو انا في جامع..بيصحي موظف بالراحة ..بعد ما دور عليه تحت الشجرة ملقهوش..
ايه البـــــــلد دي؟؟؟؟؟؟؟؟؟؟؟
زغردي يا أم انعام..البلد دي فيها حكومة..
وبعدين واحد بيعاكس واحدة قدام سيتي ستارز الساعة 8 ..بتقوله وسع كده انا فاضيالك..
ايوه فاضية ..امال يعني نازلة سيتي ستارز الساعة 8 تعملي ايه تحضري ندوة ثقافية؟
قوليله اي حاجة تانية الا الجملة دي..قوليله يا رخم مثلا يا بايخ..انما متقوليش الجملة دي..
يعني الشعب ده مش فاضي ولا بيزنق نفسه جامد لحد ما يبقي مش فاضي؟..
المهم انا ماشي بقي..بصوا...مش فاضي..

Monday, February 9, 2009

شبــاك رحيـــلك

"الموت علي نبض الحياة..
او وردة موتها الرحيق..
والصبر في الغربة النجاة..
لو غربتك مليون صديق.."
وكمان زمان قالي الغرام..
دور لنفسك عن قناع..
تخبي فيه لون غربتك..
دور لنفسك عن قناع..
وتخبي فيه امنيتك..
تبقي الفرح وسط الدموع..
تبقي الضلام وسط الشموع..
تبقي بنورك ضلمتك..
تسألني ليه الحلم مات..
تسالني ليه الحب مات..
الحلم مش سامعك قوي..
صوتك خرس..
صوتك جرس..
بيرن للوعد الضرير..
بيحب من غير الضمير..
دور لنفسك عن وطن..
تتلاقي فيه مع دنيتك..
تتجلي انوار سكتك..
تعرف تنام..
من غير عذاب..
من غير ما تحسب ميت حساب..
طمن ورودك ع الربيع..
الحلم مش لازم يضيع..
لو حتي مش سامعك قوي..
لو حتي مش حاسك قوي..
بص في عيون..
جدران وجودك وحدتك..
شاكس في حلم مخدتك..
خبط علي باب الأمل..
و قوله عاشق لو سأل..
الجرح فيك..
عايز يبوح..
عايز ينوح..
حزنك يتيم..
جرحك قديم..
الأهة فيك مستشهدة..
دور لنفسك عن وجود..
جايز تعود..
خلي انفصامك عبقري..
نصك أمل..نصك وجود..
نصك حياة..نصك عهود..
خلي انكسارتك مذهلة..
لو جيت تقع..
تسقط بطل..
وتقوم بطل..
شباك رحيلك نبضتك..
اخر ما تسمع نبضتك..
او صوت حبيب..
وسألت مين قالك كده؟
او انت مين؟
باسني بحزن علي الجبين..
قالي بصدق..
"أنا القـــدر"..

Sunday, February 8, 2009

Slumdog Millionaire


هذا الفيلم يحطم كل الأرقام ويحصد كل الجوائز..هذا الفيلم الرائع اخراجا وتمثيلا وموسيقي لا حد للأبداع فيه..ها هو يحصد المزيد من الجوائز كما فعل في الجولدن جلوب واليوم في البافتا فعل المستحيل وحطم الأرقام انه فيلم

Slumdog Millionaire


وهذه قائمة بكل الجوائز في المهرجان والتي فعلتها مرة اخري الممثلة الرائعة كيت ونسلت بجائزة اخري ومهرجان اخر


Thursday, February 5, 2009

الحــــب أول لــــلأبـــد


لأن الحب واحد..والحب أول..والحب لا يخضع لمبدأ الترقيم..والحب الثاني هو كذبة الكبت لضياع الحب الأول..ونصدقها لكي تستمر الحياة..وتستمر الحياة..ويتوقف الحب..ويتوقف النبض..عند أخر نظرة..لأول حبيب..وفي تضاد الكلمتان"اول واخر"..نبضة اخيرة ووحيدة مثل الحب..



جايز يقولوا الحب مات..
وبأعلي صوت..
ده مالوش وجود..
ضيعته من عمري اللي فات..
ولقيت في حب جديد حياة..
ولقيت في حب جديد نجاة..
راح اقول كلام ..
جايز هيعجب بعضنا..
جايز هيجرح بعضنا..
لكن هأقول..
بإسم الحياة..
بإسم اللي نور شمسنا..
بإسم اللي خالق قلبنا..
بإسم الوجود..
وبأعلي صوت..
مكفاية نخدع نفسنا..
مكفاية نكبت قلبنا..
علشان نعيش..
ونعيش ونخلق حبنا..
انا عايز اقول..
ان السعادة متتخلقش..
ان الحكاية متتكتبش..
ونعيشلها..
الحب لو ما خلقش فيك..
انسي ان انت هتخلقه..
الحب لو ما سكنش فيك..
انسي ان يوم هتصدقه..
"حبيت جديد"..
ونسيت بحبي حبيبتي انا..
كداب كبير..
صدقت كدبة صغيرة..
علشان تعيش..
ابدا ما فيش..
الحب مش نمرة وعدد..
لو كان في يوم فيك اتولد..
لو مت فيه..
ميموتش فيك..
لو عشت ليه..
هيعيش اليك..
ولو انت حاسس لعنته..
عمره في يوم ما هيلعنك..
ويقول في حب اهو جديد..
الحب شمس بدون غروب..
عمرك سمعت البدر مات؟
عمرك سمعت الحبر مات؟
واقفين علي جبين الحياة..
من حبنا..
ناس فينا هتحب الحياة..
تفضل حياتها علي الجبين..
ناس فينا تسكن في العينين..
ناس فينا راح تسقط دموع..
ومافيش رجوع..
بعد اما وقعت من عينين..
وبدل متتعذب بصمت..
تفضل تقول "ده كلام ووهم"
ومافيش حبيب..
وانا اقوله اتعذب بصمت..
يرجع يقول ده مافيش حبيب..
يصرخ يقول ده مافيش حبيب..
ولحد ما يحين الصباح..
يفضل يدوي في صرخته..
يفضل يردد غنوته..
وييجي بعد الكبت وهم..
وييجي بعد الوهم وهم..
وييجي بعدالوهم حب..
سماه حبيب..
علشان يكمل رحلته..
علشان يصدق كدبته..
ويقول كمان..
الحب كدبة وعيشتها..
وحب تاني هو الحياة..
ده مالوش نجاة..
يفضل يكابر للأبد..
جواه جبال هم وكبد..
غمت عينيه..
والناس دي عايشة في حبها.
مش حاسة بيه..
نفضل نصلي علي الجبين..
الحب زي الرب واحد..
الحب زي العمر واحد..
الحب زي الكون ده واحد..
يفضل يصرخ لأ كتير..
ويعيش حزين هم وسكير..
خمرة دموع..
خمرة ملامح وحدته..
مع ان قلبه التاني دق..
والحب لأ..
وبصوت حزين..
يدي اعتراف..
ان في عمره ما يوم ما شاف..
حبه الجديد..
وان الحبيب..اول حبيب..
وساعتها بس نقدره..
يرجع يعيش فوق الجبين..
او يبقي فرحة في العينين..
لحن الحياة..
اغنية حلوة مسكرة..
جوة القلوب..
وفرحة حلوة مكررة..
نبض القلوب..
ونعيش ويفضل ميت حوار..
الحب اول ولا لأ..
لو قلب دق..
هيقول اكيد..
ونقول نردد ميت اكيد..
الحب مش لعبة ولد..
الحب ميت بسمة ولد..
او بنت حلوة مضفرة..
اللعبة ممكن تتكسر..
ونجيبله غيرها ويبتسم..
لكن ابتسامته الصادقة فيه..
احلي ولا يمكن تتوصف..
الحب مش صورة وعدد..
الحب أول للأبد..


Tuesday, February 3, 2009

طب قولي ايه المعجزة

مستني تحصل معجزة..
جايز تكون مش معجزة..
ممكن تقول واقع محال..
بالذمة في واقع محال؟
دول كلمتين مش عكس بعض؟
لكن مسيرهم يوم لبعض..
لما القمر يرسم نهار..
والشمس ترفض الإنتحار..
في غروب يتيم..
مشهد جميل..لكن أليم..
والضل يرفض وحدته..
تبقي الخطاوي مخدته..
والصوت يطل..
من الف وردة والف ضل..
ويقول"بحب"..
واهو يبقي ده واقع محال..
بالذمة في واقع محال؟
يمكن تقول دي معجزة..
لكن هأقولك معجزة..
أما حبيبتي بتبتسم..
صورة في عيوني بتترسم..
وانسي الوجود..
وبشوف ولادتي في لحظتي..
بالذمة مش دي معجزة؟
خد دي كمان اهي معجزة..
اديتها وردة لضيها..
انا قولت يمكن زيها..
اتاريها ضحكت ع الشذي..
رسمت جمالها علي الندي..
والزهرة ماتت من هنا..
وربيع جديد جه من هنا..
بالذمة دي مش معجزة؟
واللهي اكبر معجزة..
واهي دي كمان ميت معجزة..
بصت في ساعتي في يوم كده..
والساعة وقفت للأبد..
مش عايزة تنسي اللحظة دي..
قولتلها كام؟
قالت سكوت..
مش لازمة تعرف وقتي انا..
سيبني في حبي وهمي انا..
يكفي عليك اللحظة دي..
بالذمة دي مش معجزة..؟
طب شوف كمان دي معجزة..
نزلت دموعها في يوم كده..
علي ارض محرومة الدموع..
من يومها مش شايف رجوع..
م الحتة دي..
الا وايدين متشبكة..
وقلوب كمان متشبكة..
بركة حلاوة دمعها..
خلت مكانها بذور لعشق..
والعشق حافر اسمها..
بالذمة دي مش معجزة؟
طب شوف يا سيدي المعجزة..
مسكت في يوم مني القلم..
كتبت كلام مش شايفه انا..
حبر الغرام السري ده..
ورق الغرام الوردي ده..
من يومها وبنفس القلم..
برسم دموعي علي الورق..
ولحد ما الورق اتحرق..
وحريق ونار..
خدت القرار..
جبت القلم..
طفي الحريق..لكن اتحرق..
بالذمة دي مش معجزة؟
طب قولي ايه المعجزة..

Sunday, February 1, 2009

قرارها الأول الدمعة





حزين الحب يا ليلي..
مسامح كل أحزانه..
ومستسلم لغنوة ليل..
ومش حاسس بمواله..
ودقة قلبي يا ليلي..
قرارها الأول الدمعة..
قرارها التاني تهجرني..
تسيبني اكون انا دمعة..
ولا حاسة في ملكوتك..
ولا كان العذاب قوتك..
عشان نبني بأحلامنا..
بيوت اليأس..
عشان نهجر بأوهامنا..
نحيب الشمس..
وكان الحلم نور الشمس..
وكان الحلم نور الشمس...

عيون باكية علي الماضي..
وصوتي بيعلي وينادي..
بإسم الحب..
لحد متهدي رحلتنا..
وجوايا الرحيل هادي..
ومن نبضي عذاب هادي..
بإسم الحب..
وألفة سكة مجنونة..
بداية خطوة مجنونة..
لقتل القلب..
هدوء للحب مش عادي..
بيسبق فيا عاصفته..
ويرحل زي اغنية..
ويدبل زي أمنية..
ويقرا الكون علي كفي..
يقول عادي..
ولكن مش هأقول عادي..
أنا من حب يا ليلي..
وهو قدوتي ومجدي..
لو انتي رحلتي مش هقدر..
يكون البعد من عندي..
سكون ليلك علي ميلك..
وضلمة صبحي من ويلك..
ده مش عادي..
وضل أنيني مناني..
اعود للحب من تاني..
وانا باكي..
وشادي زي طير الحب..
وعاشق زي وصف الحب..
انا من حب..
انا من حب يا ليلي..
لو انتي رحلتي مش قادر..
اكون غنوة ومتغنتش..
اكون فكرة ومتكتبتش..
ولكن ع الهوي قادر..
ومهما كتبت وبقوة..
تعالي وشوفي من جوة..
ضلام كامل..
وعضمي مزاحم الحيرة..
وحلمي يموت علي السيرة..
ضلام كامل..
وراحل فيا شئ منك..
وبيصليلي شئ منك..
في عيد الحب..
انا فيكي مكفيكي..
وشمعة ليل مدفيكي..
بنور الحب..
انا بايس جبين حلمك..
وضامم ريحته لشعوري..
محني غربتي بنبضك..
وحابس نفسي من سوري..
انا للحب يا ليلي..
انا من حب يا ليلي..
لو انتي الهجرة والوجعة..
لو انتي الضلمة والشمعة..
هأكون الحب..
انا بسمة في نور شمسك..
وحاضن يومي من أمسك..
هأكون للحب..
انا ضحكة علي عيونك..
ورحلة صبر لجفونك..
هأكون للحب..
هتفضل مني أحلامي..
وتهرب فيا أوهامي..
ليوم الحب..
وهأفضل فيكي طعم الحب..
وهأفضل فيكي حلم الحب..
انا رحال رموش عينك..
مغرق قلبي ضمتهم..
مفرح نبضي نظرتهم..
انا والحب..
وبتقمص انا ضيك..
عشان أحياكي هالة نور..
عشان الحب كان زيك..
مكان ما تروحي كان بيدور..
وفين قلبي وفين ليلي؟
مماتش الحب يا ليلي..
لأن الحب زي الشمس..
مكان ما بيختفي بيظهر..
مكان مبيتدفن بيعيش..
هأحب وأعيش..
ولكن انتي يا ليلي..