Thursday, December 30, 2010

تــانجو مــع الأشــباح







كلم لغات الريح..
شاف الغرام تفاريح..
سكن العذاب خطوة..
صلي الغرام تراويح..
كان حلمه إنسية..
مسكونة مروية..
بالشهد والبستان..
وبلمسة سحرية..
شرب الهزايم يوم..
علشان يعدي اللوم..
من قلبه وجنونه..
لكنه دام اليوم..
قلبه انتفاضة ليل..
من كحل غرقان ويل..
في عيونها بيمطر..
وفي بيته رمح السيل..
شاف الغرام سفاح..
سارق معاه مفتاح..
قلبه وحكاياته..
وجريمته عطرها فاح..
شاف الغرام مجنون..
وملايكة شايلة الكون..
وضلوعه وانينه..
نبضاته ميت مليون..
كلم لغات الروح..
"فودو" بطرب مدبوح..
رقصتله أفكاره..
قالت خلاص هتبوح..
يرقص في حلم جراح..
"تانجو" مع الأشباح..
ليلته نامتله سنين..
تكتبله في الأفراح..
شاف الورق أكفان..
مدفون مع الأجفان..
في عنيها سر قتيل..
ماتحس فيه بأمان..
شاف الجدار مكسوف..
والوحدة فيه بتطوف..
علي كعبته ولونه..
والوعد فيه مقطوف..
طفله شرب شريان..
عاش في الجمال هذيان..
شمس وقمر مقلوب..
بصموا عليه انسان..
والتهمة فيه عشقان..
قالب علي ولهان..
طاعة الغرام عمية..
والذنب فيه إدمان..
خد من الحنان قوة..
ومشافش فين هو..
الا اما بصتله..
حوا وعيون حوا..
ده قريني مش نفسي..
سيبته يعيش أمسي..
وهاعيش انا يومي..
وابوس جبين شمسي..
سكن العذاب خطوة..
صلي الغرام تراويح..
عاش الغرام تسابيح..

Tuesday, December 28, 2010

إديني شفــطة وبعدين إديني أطــة





في كل بلد وحدات قياس زي مثلا كلمة "قطعة" او "جزء" مثلا يعني كلمات مستحدثة بنقيس بيها مقاس الحاجة او كميتها انما عندنا كل حاجة من دول ليها كذا مقياس وبألفاظ تحس انها من كوكب تاني ولغة تانية مش مصرية :

ودي بعض ادوات القياس المصرية والفاظ القياس لحاجة معينة والاكثر انتشارا والأغرب قي نفس الوقت واللي بنتميز بيها عن باقي الدول العربية واكيد العالمية :


1- حتة - حتة دين : لو قلت دي حتة بنت تبقي بنت جامدة قوي او حتة بسكوت مثلا يبقي عايز جزء منه لكن لو قلت "حتة دين" عربية مثلا يبقي دي بقي بمواصفات العصر "جامدة/فاجرة/جاحدة" بالوصف العصري الحديث وترجمة كلمة "حتة دين"

2- زغروف-جوان"جوينت"-قرش-تربة-سطر : دي مقاييس برضه عصرية لكن للمحششين بس قرش حشيش او تربة حشيش هي مواصفات الكمية المطلوبة من الكيف اما الجوينت بتكون سيجارة ملفوفة او محشية ومتختخة..وسطر دي للمخدرات البيضاء بس

3- سلهوب/صرصور : دي بتتقال علي الهوا دايما يقولك "اقفل الشباك لحسن يخشلك سلهوب هوا" والسلهوب بيكون كمية صغيرة بتتسحب من ورا الازاز وتخش تجيبلك برد بس معرفش ليه اتسمت سلهوب !وده بيختلف عن الصرصور اللي بيخش من تحت عقب الباب ويبرد الشقة برضه.

4- مرزبة/فرقلة : في واحد ايده زي المرزبة وواحد تاني ايده زي الفرقلة واكيد ابو ايد مرزبة اقوي لكن دي المواصفات الموجودة لقياس قوة الايد في اللغة الحديثة

5- لحسة/ بق/شفطة/قطمة : ودي وحدات قياس الاكل وخصوصا ان لحسة بتتقال غالبا علي الايس كريم وشفطة علي اي عصير لكن هي كلمة بيئة حبة ممكن تقول عايز شوية عصير مش شفطة عصير لان الكلمة دي تحس ان انت خارج من ملجأ

6- فسوة : ودي ظهرت في افلام احمد حلمي زي مثلا انا هأتاخر فسوة عليكم معلش او اتاخر كده فسوتين

7- أطة : ودي في مصر بمعني "بوسة" اديني أطة كلمة شائعة الاستخدام

8- حتة-نتفة-ستفة : ودي للمبالغة في ما شاهدته ..مثلا تقول "شوفت حتة نتفة ستفة عربية ملهاش حل "

9- جندي-أوبيب-معلوم: ودي كلها بتتقال علي الفلوس زي "ناولني الأوبيب" او اديني المعلوم

10- غلوة : ودي يعني معناها اتعملت بسرعة فما تاخدش غلوة مية

11-نفس-شدة-سحبة : برضه دي مقاييس للمحششين عشان ما نزعلهمش ودي بتكون ع الجوزة او الشيشة

12- نفحة : ودي بتختلف معناها كتير في مصر ممكن تعني حبة من حاجة او تعني سيجارة او اصطباحة او فلوس

13- عدي الفلنكات : ودي بتتقال علي اي حاجة زادت قوي زي مثلا "ده انت كرشك عدي الفلنكات" و قزح كمان

14- فوريرة-حمامة : ودي مقاييس السرعة لواحد رايح مشوار

15- دخاني-شاي-قهوتي : دي بقي مقاييس الرشوة او التخليص لأمر ما في مصر




وكل شوية بتظهر مقاييس جديدة في مصر وادوات قياسها اللولبية والفاظها الغريبة دي .

Sunday, December 26, 2010

بــابا نـويل فــي شـوارع إمــبابة







السنة الجديدة جاية وكل سنة وانتوا طيبين لكن عندي سؤال مهم قوي هو ليه مافيش شخصية زي بابا نويل ظهرت في مصر ؟ بشكله بلبسه الاحمر بدقنه بكل حاجة فيه ؟في اي منطقة ولتكن إمبابة مثلا ؟وليه مافيش ماما نويل وهل هو عازب ولا متجوز ؟

لكن في اسباب كتير قوي للموضوع ده اللي تؤكد استحالة وجود بابا نويل الاصلي في مصر مش ناس لابسة بابا نويل يعني :




اولا : الامن في مصر هيمسكه ويقولك ايه الدقن دي يا برنس ده اخوان يا عم الحاج

ثانيا : العربية بتاعته بيجرها غزلان او كلاب فخمة كده مش زي كلابنا البلدي انما عندنا هيجرها حصان بيعرج من بتوع الحناطير

ثالثا : مافيش تلج اساسا هنضطر نمشيه علي شوية التلج اللي حيلتنا في المولات بس اللي بيتزحلق عليها الناس ويقع يلف حوالين نفسه زي العبيط

رابعا : عدم وجود التباع في العربية اللي سايقها بابا نويل زي عربيات الاجرة عندنا لازم وجود تباع وراه يوزع الهدايا او يكون ليه دور

خامسا : لو مشي في الشارع بعربيته دي هيقف كتير في الاشارات وهيتخنق ومش هيوزع هدايا الاطفال

سادسا : لو فكر يطير زي الافلام بعربيته في السما هيتخنق من السحابة السودا ودخان المصانع

سابعا : ممكن يمسكوه ويقولك ده المختل اللي قتل او اللي اتهجم ع السيد الوزير يوم كذا او اي جريمة يلبسهوله ويقولك من المختل ده

ثامنا : ممكن يقع في اي بلاعة بكل الهدايا اللي معاه لان كل البلاعات بدون غطا طبعا وده شئ اساسي في مصر

تاسعا : الالتراس الابيض هيقولك ده اهلاوي يا عم ولابس احمر فاقع وينزلوا فيه ضرب وعلقة سخنة

عاشرا : المطبات اصلا هتدغدغ عربيته دي حتت قبل ما يفكر يوصل للناس

حادي عشر: الاطفال هيجروا وراه والاهلي كمان بس في بعض المناطق عشان رغيف العيش حتي بسبب افعال الحكومة المصرية

ثاني عشر : برة بيشرب بابا نويل فنجان الخامسة هنا هيدوله شاي الخمسينة

ثالث عشر : لو عدي قدام النقابة هيلاقي عربيته مليانة ورق اتلزق عليها من حركات سياسية كل حركة هتلزق علي عربيته شعار بالعافية

رابع عشر : هيموت من الجو اصلا والتراب لان عربيته مش مكيفة ومفتوحة والعربيات المفتوحة في مصر تنفخك فترة العصر من الجو

خامس عشر : عيال صغيرة هتجري وراه ويقولوا العبيط اهو العبيط اهو

سادس عشر : الامن المركزي هيرمي عليه قنابل لو دخل في وسط انتخابات مصرية وهو ماشي

سابع عشر : لو قعد طفل صغير علي رجله وساله امنيتك ايه هيسمع كلام ميسرش

ثامن عشر : ميكروباص او عربية مقطورة هتزنق عليه وتلبسه في اي شجرة او يعمل حادثة ع الدائري من عربية نقل



وعشان كده مينفعش بابا نويل يمشي بعربيته في شوارع القاهرة














Saturday, December 25, 2010

عـاشق عــينيك المخــتار





لن تمضي بعيدا ..
فأنا في عينيك قتلت كل تعاليم القصيدة وتفوهت النثر في لحظة فطام من أشجار التفاح..
ساعات وستحتاجين الي عاشق مثلي..يصطفي من رموشك ما تتكحل به الدنيا لتري
ويصطفي من شفاهك ما تتجمل به الدنيا لتقبل العشاق..
ويطير في نبضك ويبحر بمراكب وطائرات ورقية من فترة طفولة عاشق..الي ان يصل في عينيك ل "سن الرشد"..!

لن تمضي بعيدا..
فأنا لم احتل فيك ما أعيده اليك..فما احتلته عيوني فيك اشياء تخرج عن لغة "الحرب والسلام" للعنة الحب والاستسلام..
ساعات ويعود الحمام الزاجل الي ببشارة النصر علي رحيلك..وأخرج من طرف فمه ورقة عشق وردية تبشر بالعودة..
انا لم اعشق فيك ما أتركه..فأنا اصبحت "نشيد وطني" لأنوثتك..ولغة وطن قلبك الرسمية..
فان حاولتي الخروج مني ..هجرتك انوثتك الي روحي ..وتركتك بصفة "العادية"..ووهبتني "الامتياز"..منك !

قد يعجبك الرحيل ساعة ولكن لغة الحب دهر..فلا توهبي الرحيل متعته كي لا يقتص من جمالك داخلي..
لا تهجري الجنة التي خلقتها لك وجعلت اشجارها تطرح كلمات حب تقول "نعم الجمال وحسنت مرتفقا" ..!
لا تتركي عيوني التي اضحت كالكروان تغني كل ليلة "العشق لك..العشق لك.."..
لا تتركي خطك الفاصل في حياة الحب..بين بشر يتحدثون عن الحب وبشر يتحدث عنهم الحب..!
لا تهجري قتلك الرحيم لي بقتل لا يعرف اي رحمة في هجرك..

ولا تتركيني بنصف إمرأة داخلي وتمضي بعيدا..فقلبي لم يتعلم ترويض أنثي راحلة..ولكنه تعلم فقط منك رحلة الانوثة..
لا تطلبي من قلبي الصبر..فأنا كسجين هارب وقلبي هو المكان المشتبه الاول للتفتيش..
اجعليني اختبأ ولو ساعة واحدة اخيرة في دمائك..أستتر فيها من وجع يبحث عني وعاشق يريد سكب الندم المغلي فوق رأسي..
لا تتركي نافذتي التي تعودت ان تراك بنصف رئة ونصف حلم ونصف نظرة الي خطواتك..
لا تجعليني أعيد رحلتي التي بدأتها الي "سدرة منتهي" الجمال بطيفك الي هجر من طيف وجودك..
لن ارحل من تحت غطاء القمر "المخسوف" من حسنك..والشمس "المكسوفة" من عاطفتك والأرض التي تدور سكرانة منك وبك ..

ان هجرك لي اعادة اختيار فإهجريني ..جددي أختياري "عاشق عينيك المختار" ..كي تتجدد اناملي ذهبا يلقي علي الاوراق سفن النبيذ..
اغرقي في اخر نبضة لي سفينة كما "تايتانيك" ..فلا احاول انقاذ احد..بل اغرقوا جميعا انتي وجمالك وذكائك وعاطفتك داخلي..
استدعي فراشك وطيورك وسناجبك ليصنعوا لكي فستان اخر ل "سندريلا" احمل طرفه ونذهب لحفلة عشق جديد..بلا امير غيري..ولا حصان غير جنوني..

ابدعي في حبي كما تبدع اسنان المشط في رقصتها حين تمشط شعرك ..ولا تخدعيني كما يخدعك سريرك كل ليلة ويطير بك دون شعور الي السماء لكي تنام الملائكة وتقر عينا..

لن تمضي بعيدا..
فالخدعة أكبر منك ومني..
فكل ما فيك حتي رحيلك متفق عليه..
هي مؤامرة عشقية كبري صنعتها مع عينيك ونبضك دون حضورك..ولذلك اقول دائما..لن تمضي بعيدا..
فرحيلك ليس قدر ..بل قدرة وحيلة مني ..تفطر قلب الساعة احيانا ولكن رحيلك مني بأمر مني..
وعودتك الي قلبي ستكون بأمر أكبر منا..أمر من ملائكة الحب لكي تمسحي دموعهم مرة ثانية..وتحكي لهم عن أميرك همسا..

لن تمضي بعيدا..



Thursday, December 23, 2010

اللغــة المخفــية في الشــوارع المــصرية






ايه الحاجات المجهولة في لغتنا اليومية؟..الحاجة اللي بتتحط مكانها نقط وانت تكمل بقي ودي موجودة في كلمات كتير عندنا في مصر علي افتراض ان اللي قدامك فهمك توماتيكي توماتيكي يعني وبالنظرة بيفهمك علطول
زي مثلا واحد يقولك "وكده يعني" بعد الجملة ..وكده يعني ايه ؟ هو انت ليه خليت الموضوع قاعدة وان الحكاية دي و "كده يعني" او واحد يقولك "ما هو رايح زي ما انت عارف" زي ما انا عارف ايه؟؟ انا اول مرة اسمع القصة دي منك يا عم انت انت لبستني وخلتني عارف القصة كلها وانها منتشرة كمان ؟

وواحد تاني يقولك جاب هدومه وكيت وكيت" طيب انا خرجت بايه من الجملة غير انه جاب هدومه ؟ ما انا معرفش كيت وكيت دي اللي في بالك المعني في بطن الشاعر ..
او الجملة الشهيرة "وكده يعني ودياولو" ومش عارف بصراحة هي كلمة دياولو دي كلمة عربي ولا اجنبي ؟ جابوها منين دي اصلا "دياولو" !
وساعات بنعمل الحركات دي في بعض الامراض حتي منقولش اسم المرض ونقول "اصله جاله المرض الوحش" ..!او "المرض البطال" تحس انه جاله مرض قليل الادب ..

وواحد كمان يقولك "ماهو راح اسكندرية واسماعيلية ومش عارف ايه " طيب يعني انا اللي اعرف اذا كنت انت بتحكي القصة ومش عارف ايه امال مين اللي يعرف ؟
وفي كمان من لغة المجهول المصرية كلمة "فلان وعلان وترتان" او تلتان مش عارف..يعني دول تلات مجاهيل في جملة واحدة المفروض تفهمها..!

وفي بعض الاغاني برضه زمان بيستخدموا اللغة دي زي مثلا "ياللي ظلمتوا الحب وقولتوا عليه مش عارف ايه" وبرضه ام كلثوم كررتها تاني وقالت "ازاي يا تري اهو ده اللي جري" وكمان قالت "هو صحيح الهوي غلاب؟؟ معرفش انا" ..يا سلام اما جملة مفيدة صحيح متعرفيش انتي؟؟ طيب هاروح اسأل ماما..!


واحيانا تقول لحد فين يا عم المقص مش لاقيه يقولك هتلاقيه هنا ولا هناك ! او انت منين يا عم الحاج يقولك انا م النواحي دي..! ودي بتتقال في بعض القري "انا م النواحي دي"
وطبعا في العصر الحديث انقلبت لغة المجهول الي كمان جملة "بس يا سيدي وقامت معيطة" او "بس واتكسرت المركب ميت حتة" ..!
ومن اهم سمات اللغة دي جملة "ولا كاني ولا ماني ولا دكان الزلاباني" او جملة "ولا عيل ولا تيل" .


تقريبا الناس بتتطلع باللغة دي بسبب دلعهم وهم صغيرين بجمل مجهولة اكثر زي مثلا "كوتي كوتي" او "انكغة انكغة" والطفل يقول ع الكبير "ماله العبيط ده؟" ..!
او اللي قول "يا ختي كميلة" او " يلاااا الكورة رايحة فين ..يلااا المعلقة رايحة فين ؟ " وطبعا الطفل بيفتح بقه ويقول "هاه رايحة فين يا ابن العبيطة؟ " !

وبدأ الموضوع يتتطور يوم بعد يوم لحد ما وصل لخدمة العلماء وتقولك "هذه المكالمة قد تكون مسجلة" او "هذا الهاتف قد يكون مغلقا" يعني حتي الست اللي بتتكلم مبتقدرش تجزم بحاجة او خايفة توعدك ومتوفيش تقولك فيه تلاقي مافيش .

وبدأ الموضوع يتتطور اكتر واكتر لحد ما وصل للوحات المرور ساعات تمشي في طريق تلاقي "المنصورة 47 كيلو" وواحد ممكن يسأل ياه هي المنصورة كلها علي بعض 47 كيلو طبعا ده ترميه م العربية علطول ..المهم تلاقي اليافطة مكتوبة "المنصورة 47" تمشي بعدها بشوية تلاقي "المنصورة 48 كيلو" تقول علطول ربنا يخليلنا الحكومة دي عاملة الطرق بالورب يا عم الحاج مش طوالي يعني هو الطريق بيطول ولا مين اللي بقي فين بالظبط ؟؟ ودي ياما شوفتها في يفط كتير في امكان كتير تلاقي الطرق بتتطول وساعات لوحة مشاورة مدينة نصر يمين وشوية ولتاقي يافطة غلط وتلاقيها شمال وتلف حوالين نفسك ساعة علي ما توصل.

ووصل الامر للخطابات الحكومية ويطلع رئيس الوزراء يقولك "وكما تعلمون فان في الخمس سنوات الماضية حققنا ..." ويقول اي حاجة ..يعني برضه مشي علي نفس النظام وقال "كما تعلمون" لا واللهي يا حبي انت ماقلتلناش قبل كده حاجة من دي ..!

ووصل استخدام اللغة دي للشوارع والحارات زي كلمة "عندها" وكله نفسه يعرف هي مين طبعا..فبدأوا يحددوا الموضوع بقت "عند ام بودرة" او "عند ام ترتر" ودول اكيد قرايب ام بودرة وام ترتر هاعمل زي كابتن محمود بكر "واحد هيقولي انت بتقول اييييه؟ اسكت..اقوله طيب".

يعني اللغة المخفية انتشرت قوي سواء بالتلميحات او علي افتراض انها حاجة معروفة يعني ..زي كمان كلمة "احمد ومحمد واسمه ايه دهون" ..او الكلمة الشعبية الشهيرة رائدة اللغة المخفية "أبصر ايه" يقولك "الواد سعيد واحمد وابصر ايه" ..او مثلا جملة "هتجيب شنطة وجزمة و بتاع"..مش عارف ايه البتاع اللي في الاخر ده ؟

لغة شهيرة قوي وليها زبونها دايما خصوصا في التصريحات الحكومية كمان شغالة قوي وواكلة معاهم يعني ..زي ما انتوا عارفين..!



Tuesday, December 21, 2010

عــاشق مــبني للمجـــهول







سنوات تتلي كما صوت الحب علينا..
ومازالت اصنفها "ميلادية" و"هجرية" و"عشقية"..!
مازالت أتوسل كل نهاية عام الي كيوبيد حين يلملم أوراقه ..
أقبل يديه لكي لا يبدأ عام جديد بدوني..
لا توجد أشجار السنة الجديدة ولا "سانتا كلوز" بدون عينيها..
هي "سانتا كلوز" الذي يفاجأ كل نبضة قلب بعام جديد..ولحن جديد..!

سنوات تتلي ومازالت أعيش علي مد البقاء في عينيها وجزر هجرتي منها..
مازال فنجاني الأبيض في غيبوبة الشمس والقمر حين أحتسي منه الحب حنانا وأنينا..
مازال القلب يطوف علي عينيها كما الصفا والمروة..ولا اتطهر من خطايا الحب والامه..
مازالت حواء تمارس فقرة "السيرك" علي نبضي ..بلا جمهور يصفق او ستارة تغلق..!
سنوات تلبس فستان السهرة وتضع زينتها وتطرق كأسها فوق رأسي وأنا مستسلم..

طوفان عشقي لم أتحصن منه بمدينة أو اصنع له من اضلعي سفينة..
"تسونامي" أنوثة لم أهرب منه إلا وتأرجحت بداخله وشربت من ملحه البحري العاصف داخل سكره..
فما أسهل أن تقول لمن تحب قصيدة وما أصعب أن تقف أمام القصيدة ذاتها لتصف حروفها ..
ما أسهل ان تتجاذب اطراف الحديث مع إمرأة علي ان تتجاذب معك إمرأة أطراف الجنون والحياة معا..
ما أسهل أن تعشق علي أن تتعمد بالعشق وتزرع شجرة مباركة في قلبك منه..
وما أسهل أن تعلن الرحيل..وأصعب أن تتيقن منه..
فأسهل ما في الوداع كلمة..وأصعب ما فيه أنه لا يجلس علي طاولة المفاوضات..!

سنوات لأمارس فيها طقوس المسجون بدون أن اري ساجني..
وأنام مع إمرأتان في كل ليلة..إمرأة الأمل وإمرأة الحلم..
تعطيني الأمل مع الحلم في كأس وهمي دون أن تحضر لي حتي العشاء او فنجان الخامسة !
سنوات أستوليت فيها علي كنوز كسري وسليمان بكلمة سرية "افتح يا قلبي"..دون ان اجد صندوقا واحدا بالداخل ولكن تعجبني الرحلة..!
سنوات أسافر فيها علي وسادتي علي براق اليقين في رحلة داخل عقلي ..أفتش عنها وحين أجدها تفر إلي قلبي..

سنوات أنتظر إجتماع ملائكتي وشياطيني خارج الغرفة لأعرف قراراتهم السنوية..
وفي كل عام يكون عقاب نهاية العام من كيوبيد "سهم أخر"..!
أصبحت مثقلا بسهامي وأسير كجرحي الحرب إلي ان اصل سريري أو أمسك قلمي العاشق..
جريح معركة بلا عدو..لاسير الي معركة بلا جراح..
سنوات القي حبالي سرا الي القمر كل ليلة لا لكي اصعد اليه بل لكي يدنو الي ونتشارك سر الحياة..
ولكني لم اجلس معه أبدا..فكلما اقترب وزاد وهجه اصبحت كعاشقة السر وقلت اليه "انصرف الان ستفضحني" ..!

سنوات تأكلني حواء كتفاحة ستعطيها جنة أخري..وتعتبرني حتشبسوت سفينة لأدوات زينتها.. وتلبسني كليوباترا كثعبانها المدلل..
سنوات يبنيني الحب ولكن "مبني للمجهول"..!
عام يأتي واقدامي لا تحملني اليه الا عاشق كسيح..بألام المسيح..!
أمشي في اخر صف الزفة لألقي بعض الحلوي علي رحيل عام وقدوم عام ..دون ان يرحل مني الحب..
أستعيذ كل مساء من أطياف الحب وان يحضرون..كي لا القي عذابي السريري المعتاد واربط من اطرافي ليمارس الحب طقوسه..
القي كما السحرة بعض الاشعار علي سريري قربانا للحب لكي لا يقتلني..
كي لا يأتي "سانتا" هذا العام بعربته ويلقي عليا تعاويذه واحلام قلبه ويمطرني بحب جديد وألم جديد..!

عام جديد أتمني أن يتركني عاشقا..ولا يسكنني عشقا..
وان يعطيني بساطي السحري الذي سحبه مني منذ عدة أعوام..لأطير مرة أخري ..
وأتحرر كليا الي عالم الحب..دون أن يلتف الحب حول رقبتي كما "الأناكوندا"..
فأريد إستسلاما..أريدها إستسلاما..أعلنها إستسلاما..ولكن الغريب..
إني أريد إستسلاما بإرادتي..!

Sunday, December 19, 2010

الحـرق بالجــاز في لــيالي الجــواز..الجــزء الخـامس عـشر






المتزوجون في نعيم ولا ده كان فيلم واسمه المجانين في نعيم ؟ ..وليه كل ما واحد يقول لواحد صاحبه انا اتجوزت تكون الجملة الافتراضية "الهبل زادوا واحد" بقت جملة شبه رسمية في مناسبات الجواز وبقت شبه قاعدة مع الزمن ان اللي بيتجوز اهبل !

وواحد تاني يقولك "ليه يا ابني مكنت كويس" واجابة تانية للمتجوزين اما حد يقول انا اتجوزت يقولوله "لا حول ولا قوة الا بالله " أو "ايه اللي رماك ع المر" واللي امر منه اللي هو الوحدة وفيه اختلافات جذرية بين الناس هل الوحدة اشد ام القتل ؟ الوحدة هي العزوبية والقتل هو الجواز !


الشاب العازب :


الشاب العازب بيكون شاب عادي جدا لكن مع الوقت بيلاقي الاتهامات كل ما يكبر بالذات زي ما البنت بيتقال عليها عانس الراجل بقي مبيلاقوش حاجة يقولوها عليه فبيقولوا كلام علي العزاب غريب جدا ومنهم وزراء وفنانين وغيره اما بيكبروا في السن بدون جواز تبدأ الألسنة تقول "اسكت مش طلع اللهم احفظنا" وكلمة اللهم احفظنا دي تعني حاجات كتير ياما بيلعب بديله او عنده المرض الخبيث او الوحش زي ما بيقولوا الناس عليه المرض الوحش "الكخة" يعني..او اللهم احفظنا تعني انه من اياهم يعني مش بتاع ستات انما بتاع رجالة او ممكن الكلمة تعني انه "ملوش في الصنف" او عنده زهد في الموضوع يعني او مالوش في الجواز لانه لا مؤاخذة ..!

وعلي النقيض تماما ساعات بدل الاتهامات يتقال كلام اغرب من الاتهام زي مثلا "هيتجوز ليه ما هو مقضيها" .."وده هيتجوز ليه ما عايشها بالطول والعرض"..ما هو مروق ولا علي باله ولاهمه الدنيا..وهنا سؤال بيطرح نفسه طالما المتجوزين بيقولوا كل ده ع العازب طيب اتجوزوا ليه طالما الموضوع كله مزايا بقي ؟وبعدين مش كل العزاب كده تماما بل ان في متجوزين ولا همهم ولا علي بالهم وزوجاتهم بتبقي عايزة تطفش من البيت لانه عايش حياة العازب ولا معبرها تماما وكأنها مش موجودة ..ولا بيشوفوا واجباتهم الزوجية علي الاطلاق ولا المسئوليات ودول ازواج كمان ودول بيكونوا العن من العازب لان العازب مبيضرش حد انما ده بيضر اسرة كاملة !



تصنيف الزوجات :

لو عملنا جدول تصنيف الزوجات هيكون ازاي ؟ وهيكون ايه اوجه المقارنة وايه نقاط الضعف والقوة في كل زوجة ولا علي حسب الزوج وطلباته ؟
ودي شوية تصنيفات كده حسب مجموعة ازواج :


1- تصنيف الزوجة وفقا للأطعمة :

الزوجة الجيدة : تعمل اصناف صعبة ميعرفش يعملها كتير واهمها المكرونة الفرن والكريم كراميل والقرع العسلي وصنية البطاطا بالقرفة والكنافة بكل اشكالها والمحاشي بكل انواعها

الزوجة العادية : رز ومكرونة وبسلة وبامية وفاصوليا وفراخ

الزوجة التعبانة : شاي وقهوة وعصير ليمون وكوباية مياه



2-تصنيف الزوجة وفقا للتوافق مع الزوج :

الزوجة الجيدة : تحب الماتشات وتجيد لعب البلاي استيشن وتعشق الكمبيوتر وتحب قراية الجرايد وسهلة التعامل مع حياة الراجل عموما

الزوجة العادية : تحب ع الاقل حاجتين من دول او تحب حاجات بس متكونش قاصرة علي الستات زي قصات الشعر والكلام ده

الزوجة التعبانة : مبتحبش اي حاجة بيحبها الراجل وبتتضايق وتتخنق اما تشوف ماتش كورة قدامها او جرنان رياضي بيتقري


3- تصنيف الزوجة وفقا للعادات :


وانا بقي مش تصنيف ولكن انواع زي مثلا :

زوجة رانيا وميمي : ودي بتاعة شلتها كل ما ترجع م الشغل تلاقيها قاعدة مع تيتي وميمي وبينموا في اخبار المنطقة كلها وانت تستني لبعد الغدا عشان تاكل لان القعدة غالبا بتتطول مع صحباتها

زوجة شمهورش : ودي بتملا البيت بخور كل يوم جمعة وحابس حابس وترقيك م الحسد وتعطر البيت وتهويه وتهريك بخور طول اليوم بالذات الجمعة

زوجة المجلس : ودي سياسية بتتابع جلسات مجلس الشعب وكل الحوارات السياسية ع الجزيرة ولو جيت تلاطفها كلمها سياسة وقولها "يا معدية حدود قلبي" او "عيدي هيكلة حياتي" كده يعني

زوجة "اللي حصل كالأتي" : ودي اغنية لحمادة هلال ولكن في زوجات كده وكل ما تقعد تهريك بكلمة "شوفت اللي حصل؟"

زوجة شهريار : ودي كل ما تقعد تهريك خدمات وتقول "تحب تشرب شاي؟" "اعملك حاجة دافية" "اجهزلك الحمام" وكأنك شهريار وجبت واحدة تعيش ليك بكل ما فيها بمبالغات شوية



تجديد الحياة الزوجية :


احينا بنسمع الكلمة دي ودايما مطروحة للي مر عليهم اكتر من تلات اربع سنين يبدأ مصطلح "جدد حياتك" يظهر ع السطح ..واحد ذكي يسأل اجدد حياتي ازاي اطلقها ؟ واللهر اريح ..احم قصدي يعني ممكن تتفاعلوا مع بعض بشكل مختلف عن السنين الل فاتت عشان كأنك عريس جديد وهي عروسة جديدة يعني تحط شعارات في البيت مثلا لتجديد العلاقات الزوجية بانك تعلق ع الحيطة "عايز تهده هاتله جده" او "الاهلي فوق الجميع" او كده يعني وللشخص الرياضي قوي ممكن يستعمل الاساليب الرياضية زي "حساب نسبة الاستحواذ " في الشقة زي ماتشات الكورة او دخلات مصارعة وانت داخل الشقة زي مثلا دخلة البيج شو او الحانوتي .




الرومانسية المفزعة :

بلاش تستعمل الاساليب الرومانسية القديمة في تجديد العلاقة لانها استهلكت زمان وبقت بتخض لبنات الاجيال الجديدة او جيل المستقبل علي راي الحاج جمال يعني لو رجعت م الشغل وخبيت عينيها وقولت انا مييييييييييين ؟ ممكن تديك بالسكينة اللي بتعمل بيها البصل لانها هتتخض وتصرخ اااااااااااااااااااااااه من الخضة لو انت دخلت تتسحب علي رجلك للمطبخ
وممكن لو حطيت جنبها وردة الصبح لونها غريبة شوية واول ما تفتح عينيها تشوفها تصرخ برضه وتشيلها بسرعة تفتكرها حشرة او حاجة لانها مش متعودة منك علي كده

او لو رجعت م الشغل وفتحت الكاسيت علي اغنية رومانسية باعلي صوت برضه هتطلع مفزوعة من جوة وهتصوت حرااااااااااااااااامي مع ان المفروض تفكر ان الحرامي مش هيدخل يفتح الكاسيت او التلاجة او اي حاجة من دي يعني .

فيلاريت تبعدوا عن الاساليب اللي ممكن تقتل الاعصاب دي.



حق الفيتو في الجواز :

دلوقتي انت عايز وهي عايزة حاجة تانية مين الحكم ؟ ولا لازم يحصل خلاف ..لا في هيئة تحكيم كاملة ممثلة في ابوك وابوها وامك وامها لكن مين معاه حق الفيتو طبعا امها وساعات استعماله بيؤدي لازمات دبلوماسية تؤدي للانفصال ..ولكن حصولك علي حق الفيتو في صالحك ده بيكون عن طريق تثبيت حماتك اول باول ان شالله بالهدايا ماهي الرشاوي موجودة حتي في الفيفا جت علي دي طيب دي اهم حاجة دي حياتك الزوجية فلازم تكسب حماتك متين في المية بحيث انها دايما توفق بينك وبين بنتها لان صوت الام اللي هي امك في الموضوع اشبه بصوت مصر في مجلس الامن ملوش اي تلاتين لزمة لا صوت يعلو فوق صوت الحماة صاحبة الفيتو الكبير قوي


وتيجي معاك ازاي علي بنتها مثلا :

البنت : يا ماما ده مبيخرجنيش ...الحماة : يا عبيطة بيخاف عليكي

البنت : يا ماما ده شكله يعرف واحدة عليا..الحماة: يا عبيطة ده بيشكك عشان تغيري عليه

البنت : يا ماما ده بيراقب تليفوني...الحماة: يا عبيطة بيغير عليكي

البنت : يا ماما ده مش عايزني اقول راي وهو اللي يختار كل حاجة..الحماة: وماله جوز حمش

البنت : يا ماما ده بيخرج طول النهار وسايبني لوحدي...الحماة: وماله عشان توحشوا بعض


وده بيكون استخدام حق الفيتو والصوت المهم في صالحك لو انت مثبت حماتك فهي بتقدر تسك بنتها صح وهي صاحبة الصوت الاعنف داخل مجلس الزواج او القفص النحاسي اللي بيبدأ دايما ذهبي المهم انه قفص تفرق في ايه ذهبي ولا نحاسي اهي حبسة والسلام !

وفي الجواز الانسة تتحول لمدام..ولكن محدش سأل الراجل بيتحول لإيه ؟؟ الراجل مبيتحولش..الراجل بيختفي..









Friday, December 17, 2010

راهنت علي العـــالم







انا اللي بشد انفاسي حطام وبيوت
وانزل قلمي علي سطري كلام منقوط
واخط بدمعي ترحالي علي الدنيا
وارمي الهلب لاحلامي وانام مبسوط
انا اللي دهنت اشعاري علي الأحلام
وخدت رمادها دي بقايا من الإلهام
وعشت بحبي متحاصر من القمرة
وريم الكحل بيشيلني معاه لو نام
انا اللي صالحت اوهامي علي العشاق
وحضر الصلح كام جني في ضهر رفاق
وسكن الزهر متخدر من المشهد
ونبض القلب مع املي كانوا في سباق
انا اللي شربت من توبها غرام احمر
ومهما وصفت في رموشها بشوف اكتر
وعديت البحار سبعة في ضفايرها
ومن وحي الجمال فيها بتوه واسكر
انا اللي غزلت من ضلعي "سفينة بوح"..
وجمعت الغرام فيها وكام مجروح
وفصلت الأمل فيها طوفان ياخد
ويبني للهوي مدنة بصوت مفضوح..
انا اللي شربت من نورها في مشواري
وخدت البسمة من روحها لأحباري
وكان قلمي بيتمسكن عشان اكتب
كسرته بقولي عن عودها في اشعاري
انا اللي سكنت في عيونكم بشكل قتيل
وطرت مهفهفة روحي علي المنديل
ومت اميرتي بتبوسني اقوم احيا
دي بوسة وخمرة في عروقها بمسك اصيل
انا اللي سكنت في المينا بسفينة حطام
وقمت جمعت الواحها من الايام
وقولت اصلح الدنيا بكام خشبة
لقيت المينا محروقة بصوت دخان..
انا اللي راهنت ع العالم وع الأكتر
وكنت بسابق اللحظة وانا بسهر
زرعت الملح في الارض العمار دنيا
ومن يومها وبستني حياة سكر
انا انسان وبستموت علي نفسي
واحاول افر من يومي الي امسي
وناسي الغد مكتوبي مافيش مهرب
ولو محبوس هاشوف الغد ده في حبسي
انا انسان مسافر مش ساكن في العش
ومش طير كل همه القش
وايه همي في عشي الصلب
لو الشجرة بغصني الهش..!


Thursday, December 16, 2010

هو الإسبايكي في الحــلم خيــر ؟؟






مفسرين الأحلام البعض بيتهمهم بالدجل والبعض بيقول لا طبعا ده علم ولازم الكل يعترف بيه لكن دلوقتي بقت المهنة دي صعبة قوي في وجود الأحلام الغريبة بتاعة اليومين دول من جيل الشباب بالذات واللي اكيد مالهاش تفسير عند اكبر مفسرين الأحلام حتي :

في برنامج تليفزيوني سنفترض وجود الأحلام الجديدة بتاعة الألفينات ومحتاجين تفسيرها من عند الشيخ اللي حاضر في البرنامج :


الحلم الأول :

المتصل: الو السلام عليكم
المذيعة : وعليكم السلام اتفضل الشيخ معاك
المتصل: والله يا شيخ انا حلمت ان واحد بيحلقلي
الشيخ: اه قصدك يطنشك يعني يا بني ؟
المتصل: ايه الروشنة دي يا شيخ لا قصدي بيحلقلي بجد بالموس
الشيخ :اااه انا اقولك ..التقصير للشعر في الحلم معناه.....
المتصل: لا يا شيخ قبل ما تكمل هو مش تقصير
الشيخ: امال ايه يا ابني ؟
المتصل : هو عملهولي زي ما تقول كده سبايكي
الشيخ: عملك ايه ؟؟
المتصل: سبايكي يا مولانا وقمت مستغرب قوي لانها مش لايقة عليا خالص بصراحة
الشيخ: لا اعرف لها تفسير يا بني فالسبايكي التي تقول عليها لا توجد في امهات كتب مفسرين الأحلام
المتصل: ولا الكابوريا ولا غيره ؟
الشيخ: لا يا ابني مافيش ..
المتصل: ده انتوا لازم تعملوا ابديت بقي للكتب دي ياعمنا سلام


الحلم الثاني:


المتصلة :الو
المذيعة: وعليكم السلام ورحمة الله وبركاته
المتصة: ايه الرخامة دي ؟ انا مش مسلمة يا ستي
المذيعة : اه انا اسفة اتفضلي امال عايزة ايه حضرتك ؟
المتصلة: هو التفسير للأحلام للمسلمين بس ؟
الشيخ: لا يا بنتي اتفضلي قولي حلمك
المتصلة : شكرا يا شيخ..انا حلمت اني باكل وبشرب كتير قوي في الحلم
الشيخ: خير ان شاء الله..الطعام والشراب في الحلم لهم معاني كتير بس ما نوع الأكل ؟
المتصلة : هو مش اكل بمعني اكل ولكن حاجات خفيفة بس باكل منها كتير
الشيخ: زي ايه يا بنتي ؟
المتصلة : كنت باكل كيكة قرفة من عند سينابون وبشرب وراها موكا وطلبتها بالكراميل كمان
الشيخ : يا نعم ؟ ده اكل يا بنتي ؟
المتصلة : ايوه يا شيخ وكترت قوي من الكيك
الشيخ : كيك؟؟ بتحلموا بكيك يا ولاد المرفهة ..انا هاخلع ام العمة دي وقايم اروح
المذيعة : اهدي بس يا مولانااااا
الشيخ: بلا مولانا بلا بتاع ..ده بيحلموا بكيك يا معلمة
المذيعة : معلمة ايه شايفني قعدة معاك ع الغرزة احنا في برنامج محترم
الشيخ : بلا محترم بلا نيلة بقي ده انتي بتاخدي علي قلبك قد كده عشان تقولي اتفضل حضرتك ومساء الخير وانا اللي اتكلم
المذيعة: متحترم نفسك بقي يا شيخ
الشيخ : انا ماشي وادي دقني ان جيت هنا تاني ده حاجة تفور الدم قال كيك قال ..بتحلم بالكيك من سينابون ده اللي بتقول عليه وتقولك تقلت في الاكل معلش الحلم الجاي كمليه رجيم بروح امك


الحلم الثالث :


وبعد ان هدأ الشيخ وتمالك نفسه جلس وأكمل الحلقة بعد الفضيحة ع الهوا

المذيعة: احنا اسفين قوي يا جماعة بس الشيخ انفعل شوية
الشيخ: انا اللي اسف لحضراتكم يا ولاد اللذين
المذيعة: ولاد اللذين ايه متتكلم عدل بدل ما اكشحك م البرنامج ده
الشيخ: اكشحك ؟؟؟ ايوه بانوا بانوا يا بتوع كفر البلاص ياللي بقيتوا مذيعات
المخرج: ستوووووووووووووب احترموا نفسكوا لاما هاقفل الحلقة
المذيعة: اهلا بيكوا اعزائنا المشاهدين مرة تانية في برنامجكم "احلام اتجوزت"..وده الجزء التاني من البرنامج المتنوع "قشطة اتجوزت" السنة اللي فاتت
الشيخ : اتفضلوا حضراتكوا
المتصل: الو
الشيخ: الو يا ابني اتفضل
المذيعة: ده دوري علي فكرة
الشيخ: اتفضلي يا ختي قال يعني صعبة اني اقول الو
المذيعة : الو
المتصل: خلصونا بقي الو اقول الحلم ؟
المذيعة: اتفضل احكي للشيخ
المتصل: انا بحم كل يوم ان في واحد بيضرني قوي وبيعملي عمل سئ جدا
الشيخ: اااااه ده حلم له مدلولات كتير بس بيأذيك ازاي ده المهم..يعني بياذيك انت لوا حد من عيلتك وبيعمل ايه بالظبط ؟؟
المتصل: انا بحلم انه بيمسحلي حاجات من ع الوول بتاعي
الشيخ: عمل ايه تاني ؟
المتصل: في الفيس بوك بحلم انه بيمسح حاجات من علي الوول مع ان ده مينفعش
المذيعة : ليه ممكن يكون سرق الباص وورد ؟
الشيخ: انتي بتقولي ايه انتي كمان ؟؟؟ انتوا بتقولوا اييييييييه يا جدعااااان ؟؟ ده ام تفسير الاحلام ع اللي بيفسروه..دي احلام عايزة كتالوج يا ولاد الكلب انا ماااااشي ومش رررجع تاني اي برامج من دي انا رايح اقعد ع الفيس بوك اللي بيقول عليه احسن سلااااااااااااااام

المذيعة : بنعتذر لحضرتك انا مش عارفة هو متنرفز ليه..عموما ناخد اتصال تاني ونكتب في ورقة ونديله الاسئلة يجاوب عليها في البيت
المتصلة: الو
المذيعة: اتفضلي
المتصلة: اتفضل ايه ده الشيخ مشي
المذيعة : انا هاكتب حلمك عندي وهاديهوله اما يهدي شوية والحلقة الجاية هنجاوبك
المتصلة : طيب انا حلمت ان الشريحة بتاعتي....
المذيعة: استني متكمليش..والله الشيخ كان عنده حق ..انا كمان معتزلة من البرنامج الاهبل ده يا ولاد المرفهة يا دزم ..انا ماشية انا كمان شريحة ايه ياختي اللي بتحلمي بيها ..كفااااية بقي لحد كده





وتوقف البرنامج فترة طويلة لحد ما يمتلكوا نفسهم من احلام العصر الجديد المستفزة جدا ..واللي ميعرفش يفسرها ولا كبار المفسرين ..لانها احلام سيس قوي.





Tuesday, December 14, 2010

شهــــر القــرطسة..إهداء الي اعضاء المجلس الموقرين






غرق البلد..
مش بالمطر..
لا بالعصابة وبالفساد..
لا بالتقهقر والكساد..
غرق البلد ..
لما انهزمنا في جلدنا..
ورسمنا خوفنا في قلبنا..
ولبسنا ع العين "العصابة"..
كانت بأمر من "العصابة"..
اهي صفقة داخللنا البلد..
قالوا "العصابة" بخمسة صاغ..
هنجيب بيها ميت داغ وداغ..
وميت قانون يطلع جديد..
وفتوي حلوة في صبح عيد..
ان "العصابة" دي فرض عين..
وخلعها ده شئ يشين..
البس بأمر من "الولد"..
مين الولد؟
قالوا البلد عايزة ولد..
يقدر يأثر ع البلد..
قالوا قولولنا كمان عليه..
قاله يكون واد ايه حديد..
ويكون مؤثر او شديد..
جالكم وفعلا واد حديد..
لأ قول ده سلطان الحديد..
سموه كمان "عز" البلد ..
هاه لسه عايزين الولد؟
قالوا خلاص عايزين حريم..
دي بلدنا مش عايزة ولد..
عايزين حريم و يولولوا..
واشباه معارضة يدلدلوا..
نشطاء سياسة يمثلوا..
ومدد مدد مدد مدد..
انا عندي للبلد اقتراح..
هنسيب خلاص كل اللي راح..
ونخلي شهر مع "للفساد"..
بدل ما طول العام فساد..
ونسمي ده "شهر الكبار" ..
او قول ده "شهر القرطسة"..
ونمشي فيه الغطرسة..
واهو شهر وندوق الخازوق..
بدل ما طول العام ندوق..
ومسحراتي يطوف كمان..
ويصحي ناسه علي الفساد..
ويقول بصوت مليان فساد..
"اصحي يا فااااسد..
اصحي يا فاااسد..
لحزبك الفااااسد..
وفساااااد كرررررريم"
يصحوله من كل البلاد..
اللي يجهز رشوته..
واللي يجهز قبضته..
واللي يبيع قلب البلد..
ومتسألوش هيبيع بإيه..
قلب البلد يتباع بإيه ؟
ومتقلقوش..
البيعة دي عادلة قوي..
ده عضو مجلس فهلوي..
هيكون في بيعته هو الوسيط..
ولا بلطجة ولسان سليط..
مش بيعة قول بس "بدل"..
مصر تبدل قلبها..
بشاب بايع كليته..
وسياسي نازفة قضيته..
وقطر تايهة سكته..
وحاج ماتت بسمته..
عبارة قتلت فرحته..
وشريف بيقبض رشوته..
وعفيف بيبكي هتكته..
وخط فقر بيترسم..
يحضن فقيره ويبتسم..
ويقوله انا خط الشرف..
طول ما انت تحتي انت الشرف..
وطي رقبتك ع الخطوط..
متبصلوش ده اخطبوط..
وانت الشريف..
هو الحرامي انت العفيف..
مش خط فقر انا الشرف..
طب عندي للبد اقتراح...
قالوا وتااااني اقتراح؟؟
استنوا بس ده اقتراح..
هنسيب خلاص كل اللي راح..
ونخلي بلدين للفساد..
يتجمعوا فيها الحيتان..
ويخططولنا لحزبهم..
ويبخوا فينا سمهم..
واهو نبقي شايفينهم قوي..
بدل ما كل بلدنا ظلم..
نعرف منين هيجيلنا ظلم..
واهو نستعد لضربهم..
طب عندي للبلد اقتراح..
قالوا يا أم الإقتراح..
قولت خلاص اخر اقتراح..
مش دي بلدنا وللجميع..
نعلن كمان باسم الجميع..
ان الفساد ده للجميع..
ديموقراطية في الفساد..
مش بس حصري للحيتان..
واهو زي مشروع ال "سوزان"..
بس القراءة مش للجميع..
الواقع انه اكيد فساد..
حتي القراءة عن الفساد..
حتي الكتابة عن الفساد..
مقالتنا حاكية عن الفساد..
اعلامنا صورة للفساد..
وشبابنا محكوم بالفساد..
وانا شاب مصري من البلاد..
يبقي هقول
وانتوا ورايا بحسكم..
وبصوت كبير من قلبكم..
"يحيا الفساد"..
"يحيا الفساد"..
"يحيا الفساد"..



Sunday, December 12, 2010

إنفخــني ..شــكرا






ساعات الناس بتحط حاجات في البيت او بتعمل عادات معينة بتخنق بيها علي نفسها وتبقي عبئ عليها وخلاص مع انها في غني عنها تماما والحاجات دي كتير جدا زي مثلا :


1-جرس شخاليل علي باب البيت يعمل صوت كل ما حد يخبط فيه براسه وهو داخل وخارج

2- الناس الي بتبل صوابعها بلسانها قبل ما تعد الفلوس او تقلب صفحة الكتاب قال يعني ده هيسهل

3- الكلب الخنيق اللي بيحطوه سواقين التاكسي وبعض العربيات ويقعد يهز في راسه طول الطريق او تلاقيه لاعب بيسبول ماسك مضرب ويقعد يتهز قدام في صالون العربية

4- صوت زمارة حقيرة كده كل ما تيجي ترجع لورا او احترس من فضلك السيارة ترجع الي الخلف في بعض العربيات

5- واحد يقعد ينفخ بعنف في الأكل عشان جعان وميسيبوش لما يبرد شوية لأ بيكون من هواة النفخ

6- الأصوات والأدعية اللي بيحطوها في الأسانسير واللي بيكون صوتها عالي جدا وتصدع اللي طالع ونازل

7- اللي بيحطوا جراب للريموت جمب التليفزيون ويقوم كل ما يقلب يجيبه من جمب التليفزيون ..طيب ما تقلب يدوي وخلاص ما انت قمت ورحت عنده خلاص

8- منديل الجيب في البدلة اللي معمول عشان تقعد تعدل فيه وتعذب نفسك طول ما انت قاعد تلعب فيه

9- كتر الفازات والتماثيل في البيت اللي الستات بيعوزوها قبل الجواز وبعدين يشتكوا من انها محتاجة تنضيف طول النهار بعد الجواز

10- البنت اللي بتطلع حتة شعر من تحت الايشارب وطول ما هي ماشية تقعد تدخلها قال يعني الحشمة بقي طيب ما انتي اللي مطلعاها بمزاجك

11- الواد اللي لابس بنطلون ساقط وطول ما هو ماشي يشد فيه وبيكون منظره غريب جدا

12- تربية الحيوانات عموما في البيت من اكتر اساليب الخنق علي الذات زي حوض السمك مثلا اللي تحس انك شغال عند ام السمك ده مية واكل وتنضيف حوض وغيره

13- الناس اللي بتحط ساعات م الضخمة العقارب الكبيرة اللي بتكون طولك وتقعد تدق 12 دقة الساعة 12 بصوت مفزع لحد ما تكرهك في الوقت

14- الناس اللي بتشيل موبايلين في جيوبها وتقعد تبص فيهم طول النهار ومافيش رنة واحدة

15- البنت اللي لابسة بكعب وهي مش متعودة عليه وماشية كانها في عرض السيرك فقرة المشي ع الحبل..طب ما تلبسي جزمة عادية وخلاص دلوقتي

16- احيانا بعض الجرايد بتكون من الوسائل دي بأخبارها اللي تفور الدم بالذات اخبار الوسط الفني

17- اللي بيغلي مية في غلاية كهربا عشان الشاي ويفضل واقف جمبها بدون معني لحد ما تغلي طيب ما تخرج وتيجي هو مش شرط تفضل واقف هي مش هتسرع عشان انت واقف يعني

18- اللي بيستعملوا انواع غريبة من الشطافات في الحمام زي ابو دراع ده وبيعذبوا الناس بدون داعي

19- الحمام البلدي من اقوي انواع عذاب البشر وكأنك بتعمل في الصحرا تمام

20- المصالح الحكومية اللي لسه بتستعمل الاساليب اليدوية في البحث عن الملفات من بين الرفوف في عصر الكمبيوتر

21- اللي بيزنق عربيته في ركنة من قدام لازق في العريبة اللي قدامه وييجي واحد يقفل عليه من ورا يتضايق رغم انه هو اللي زنق نفسه بالركنة

22- الكاسيت اللي بينور كله انوار بكل الالوان في الميكروباصات لو قعدت جمب السواق وكمان نوعية الاغاني اللي شغالة

23- انك تدخل تعمل لايك عادي ع الفيس بوك تلاقي بعدك خمسين تعليق عند الاستيتس دي وتندم اتك عملت لايك

24- انك تلبس بنطلون طويل شوية وتنزل بيه والدنيا بتشتي وتقعد طول ما انت ماشي ترفعه لفوق عشان الطين

25- رباط الجزمة الكبير اللي بيخليك تدوس عليه ويتفك كل خطوتين

26- الأفراح عموما وخصوصا كل الفقرات اللي بتسبق البوفيه واللي بعدها يعني الفرح اصلا هو البوفيه والباقي خنق ع الذات

27- انك تقف في طابور حكمي طويل وكل مواطن يفرغ همه في ودانك

28- انك تكون في جامعة الزقازيق وهي اسوأ جامعة في الجمهورية حيث التراب والحر القاتل اشياء افتراضية يعني هي عكس استادات قطر في كل حاجة

29- انك تشوف فيلم هندي كامل ووراه فيلم الماني مثلا

30- انك تقعد مع عشر اطفال في وقت واحد



Friday, December 10, 2010

هم بجد مقتنعين اننا مصدقين ؟؟؟مش ممكــن






في حاجات الناس بتعملها او البرامج او الفنانين او غيرهم بيعملوها وفاكرين اننا مصدقين..او مقتنعين ان الكلام ده بجد بكل سذاجة بيعملوها واحنا المفروض نصدق علي اساس انهم مبيكذبوش ابدا واحنا لازم نقدملهم شروط الولاء والطاعة ونفترض فيهم الصدق دايما ودي بعض الحاجات :


هم بجد مقتنعين اننا مصدقين ؟؟ :


1 - ان برنامج ع القناة الاولي وبيعارض الحكومة ؟؟
2- ان المتصل ده بجد مش عارف عين مين دي في برامج المسابقات الوهمية ؟
3- ان التصريحات عن نزاهة الانتخابات دي احنا مصدقينها ؟
4- ان احنا مش عارفين ان انت لابس باروكة يا عم المذيع ؟؟
5- ان انتوا فعلا هتوصلوا لحل او اصلا عاملين القمة العربية عشان توصلوا لحل ؟
6- ان اما تقفلوا الفيس بوك ولا الانترنت الناس هتبطل معارضة ؟
7- ان كل سنة هتفضل تقول النادي قاااادم بقوة وميعملش حاجة والجمهور لسه مصدق ؟
8- ان انتي بجد كفنانة بتقولي كلمة "حبيبة قلبي" لكل فنانة تانية من قلبك ؟
9- ان انتي رقاصة ورايحة الحج عشان الحج مش عشان منظرك قدام الناس ؟
10 - ان انت اما تطلع في خطبة وتقول وضع مصر الاقتصادي بخير الناس مصدقة ؟
11- ان اما فنان يقول في تصريح في برنامج ان معندوش غير عربية بالتقسيط الناس مصدقة ؟
12- ان المكالمات الجاية للبرنامج دي كلها صحيحة مش ملفقة ؟
13- ان الفنانين بيعملوا الافلام عشان الفن رسالة ؟ طيب السبكي عايش ليه طالما الفن رسالة ؟
14- ان بجد الفنان بيقرا كذا دور عشان يشوف الأنسب ولا عشان يشوف اللي هيجيبله سبوبة اكبر
15- ان اللي داخلين احزاب وعملهم سياسي ده عشان خدمة مصر بس ؟
16- ان الزعيم ميعرفش الفساد اللي في مصر زي فيلم طباخ الريس ؟
17- ان مافيش مخططات للتوريث ؟
18- ان مدحت شلبي فعلا محايد او في اي برنامج رياضي محايد؟
19- ان هيفاء بتقرا قرأن قبل اي كليب فعلا عشان ربنا يوفقها ؟
20- ان رئاسة النوادي زي الزمالك والاهلي عمل تطوعي ؟
21- ان مصر ماشية نحو الطريق الصحيح ؟
22- ان التعليم في مصر محتاج تعديل بسيط ؟
23- ان جمال كل هدفه هو خدمة الشباب ؟
24- ان اعلانات التقديم للوظايف في الجرنان مش متطبخة وخلصانة م الاول اصلا وهي اعلانات صورية ؟
25- ان مصر دولة قانون ؟ ولا قانون بتاع الألاتية ؟
26- ان اي مبلغ بيتقال ع الهوا حقيقي سواء عقد لاعب او اجر ممثلة ؟
27- ان جرايد زي عين ووشوشة ليها اهداف ؟
28- ان جريدة الجمهورية او الاحرار بتحقق مبيعات ؟
29- ان مريم فارس مش عارفة الناس بتتفرج علي كليباتها ليه ؟ وهو سبب واحد
30- ان الوسط الفني مافيهوش اللي بالي بالك ؟ وانه زي اي وسط تاني فيه الحلو والوحش ؟
31- ان الوزير بيتعالج برة باستمرار لان الطب المصري بخير ؟
32- ان في حاجة اسمها تعليم مجاني ؟
33- ان المدارس الخاصة بتتطلع اجيال واعية ؟
34- ان الحكومة هتحقق مع الفاسد بس عايزة الدليل ؟
35- ان في حاجة اسمها هيبة الدولة ؟ ولا خيبة الدولة ؟
36- ان شعبان وسعد الصغير مبيشربوش حشيش كل ساعة ؟
37- ان في حاجة اسمها ممثلة شقت طريقها بعرق جبينها ؟
38- انهم يعملوا الفين مسلسل ويقولك رمضان شهر العبادة ؟
39- ان عمرو اديب وابراهيم عيسي وقفوا صدفة مش تخطيط ولا حاجة ؟
40- ان الزعيم فاهم اي حاجة م الي بيتقال لما بيقف قدام شرح خريطة كوبري جديد او خط غاز عن طريق وزير ؟
41- ان مصر ماشية بكفاءة الشباب مش بالواسطة ؟
42- ان الجهاز القومي للاتصالات معمول عشان ياخد حق الناس من شركات الاتصالات ؟
43- ان جرنان الاهرام جرنان محايد وبيقول الحق بس ورئيس تحريره مش حزب وطني ؟
44- ان كل ممثلة تقولك ترفض الاغراء مش هتجري تعمل الدور لو جالها اجر اعلي ؟
45- ان في حاجة اسمها شكوي في مصر او استجابة لشكوي ؟
46- ان عضو المجلس منكم واليكم ؟
47- ان الانتخابات كانت نزيهة ويشوبها بعض المخالفات البسيطة ؟
48- ان في حاجة اسمها انتماء لاعب كورة لناديه مش للقرش ؟
49- ان الحكومة مش مراقبة الناس ع النت ولا في التليفونات ؟
50- اننا في مجتمع ديموقراطي حر نزيه ؟
51- ان اي وزير بيقول "الفساد يجب بتره" بيكون صادق ؟
52- ان البنات بترفض التحرش وهي خارجة ببدي هيتقطع عليها وتقولك حرية ؟
53- ان اي مطرب بيحب المنافس بتاعه ؟
54- ان مصر ام الدنيا ؟
55- ان الطبيب المصري والمهندس المصري والاداري و المدرس و و و هم اكفأ ناس وكأن باقي العالم خراتيت ..لان احصائيتنا دايما مع نفسنا وعلي نفسنا بس ..
56- ان في ممثلات مش بتنام مع المخرجين ؟
57- ان حفلات عيد ميلاد الفنانة مش بيكون فيها خمور ومخدرات ؟
58- ان الوزراء مش بيعملوا ليالي حمرا ؟
59- ان في شيوخ مش بتكون فتوتها طالعة بامضاء الحزب ؟
60- ان مصر مافيهاش عنصرية ؟



ياريت يقنعونا بكلام نصدقه المرة الجاية لان لو هم مقتنعين ان احنا مقتنعين بالكلام ده يبقي عليه العوض..
العبوا غيرها

Wednesday, December 8, 2010

الـردود المصـرية الفـريدة من نوعها






دائما الردود المصرية ليها نكهة خاصة ساعات عدوانية وساعات غريبة وساعات ملهاش معني واغرب واشهر جمل مصرية او اشهر ردود في بعض الاماكن في مصر واللي صعب تلاقيلها ترجمة في لغات تانية هي الألفاظ دي :


في مصر ممكن واحد يقول لعمو "يا عمو" يقوله "عمي الدبب" ومش عارف ازاي التعبير ده اخترعوه اصلا واشمعني الدبب ؟؟
اما ردود الام والاب فهي في صيغة موحدة بتكون زي كده "جك مو" او "جك بو" ودي بتيجي اما تقول ماما او بابا لفترة طويلة وتزن علي ودانهم بجد..وانا معرفش هي بتتقال "جك" ولا "تك" زي مثلا "جك داهية" ولا "تك داهية" ؟

واحيانا بعض الناس ممكن لو قولت "هاقوم" يقولك "قامت قيامتك يا شيخ" ولو كنت جعان يقولك "تك جوع الاملة"
احيانا يستعملوا الفاظ تعبيرية معقدة زي "اسمع سمعت الرعد في ودانك" او "العب لعبت عليك نفسك"

وطبعا مش هينسوك حتي وقت النوم بجملة "نام نامت عليك حيطة"..او "اشرب شربت الدردي" او الدردة مش عارف يعني ايه اصلا بس موجودة في بعض القري
ولو عايز تخرج بعد ما قمت قامت قيامتك بقي يبقي "انزل نزل صف سنانك" ودي الاهالي بيدوها لولادهم اللي مبيذكروش وعايزين يخرجوا يوم الخميس في بيوت مصر
اما كلمات الدعاوي من العيار التقيل بتكون زي دي "جك ضربة في مصارينك" او "قبر يلمك" في الصعيد بتتقال او "الهي تنطس في نظرك" في الفلاحين بتتقال
وممكن كمان "انحش وسطك" او "الهي تنشك يا بعيد" ودايما كلمة "يا بعيد " دي بتقال في الشتايم ومش فاهم برضه استخدامها جه منين ولكن فيها معني جامد وقوي
ولو كنت هتقول حاجة معينة لواحدة ممكن تقول في الفلاحين "قول قالك القل وتعب السر" واحيانا في بعض قري مصر يدعوا عليك بامراض معينة كمان زي مثلا "تك داء المية"
او "الهي ما توعي تشوفها"..ووانت ماشي بقي يا سلام علي التعبيرات المصرية زي "وريني عرض قفاك" "طريق السلامة" "سكتك خضرا" "وريني عرض كتافك" "السكة اللي تودي"
او "في داهية" "في ستين داهية" "في خرارة"
اما دعوات الاكل في الشتايم بتكون زي "الهي تطفحه" "ربنا يجعلها اخر زادك" "الهي يطبق علي مراوحك" "بالسم الهاري"
وفي تعبير مصري بيقول "فشتك عايمة ليه يا خفيف" وده لفظ برضه من اللي عمرك ما هتلاقيله ترجمة اجنبية او مثيل له برة هو وكل الالفاظ اللي فاتت لانها تعبيرات مصرية متفردة واصيلة
وتعبير صعيدي اصيل برضه فيه صورة غريبة ومبتكرة وهو "يا واكل ناسك" دليل القطيعة والظلم لاقاربه واصحابه
او التعبير اللي فيه صورة جميلة برضه وبيتقال دايما "مقطوع من شجرة" او "انا بطولي في الدنيا" وده طبعا تعبير مش للقصيرين لانهم هيقولوله انت بتكدب.

وفيه صور اكثر روعة من الستات زي "حابس حابس" او "خش في عبي خش" او "الفار لعب في عبي" ولاحظ استخدام العب في كل حاجة وكمان بيحطوا فيه الفلوس احيانا
او التعبير الرائع "طيب ثانية واحدة اشتري بجنيه زغازيغ"

وتعبيرات الجواز اغرب من الغرابة في الوطن العربي عموما زي "انا ادخل من الباب مش من الشباك" ايه يا عم جو النجارة ده ؟ انت جاي تتجوز ولا جايب معاك منشار لزوم الشباك ؟
وكمان "انا اكلها بدقة معاك " عالم كحيتي خالص..او "عش العصفور..عش الزوجية" اهو اي عش وخلاص علي اساس انهم عصافير وتلاقيهم فوق المية كيلو..

اما استقبال الضيوف بقي فليه تعابير جميلة برضه زي "يا خطوة عزيزة" او "ان مشالتكش الارض نشيلك فوق عينينا" او "احنا زارنا النبي" مع ان تعبير مشالتكش الارض ده بحس ان فيه اهانة شوية وكأنه جاموسة ماشي ومش شايلاه الارض ..!
وفيه تعبير برضه من تعابير الصورة المركبة من دول بيقول "مش لابسة برقع الحيا" او "ضاربها السلك" وكلها صور غريبة وصناعة مصرية ومتلقهاش في اي دولة .

ومن اغرب الصور برضه "انت بتدن في ملطا" او "انت بتاكل في اتة محلولة" ..,وشك يقطع الخميرة م البيت برضه جملة صعبة قوي ومش عارف يقطع ازاي الخميرة يعني ؟
وكمان "مالك عامل زي قرد قطع"


كلها صور مصرية فريدة من نوعها فعلا وصعب ترجمتها واول ناس قالوها دول كانوا جامدين جدا..كيك يعني.





Monday, December 6, 2010

بيـــوت سكــنت ضــلع الدنيــا..البشـــر






فلان وفلانة..بشر لم يتسابقوا الي خير ولا الي شر..
بل تسابق اليهم الخير والشر بحبال وود واستباق..
بعضهم هم الي الجمال مناديا..والبعض هاجر الي وجنتيه الجمال مصليا..

احدثكم عن البشر..
عن لعبة الحب ومكيدة الخير الي الشر وانفاس العالم..
عن بيوت سكنت ضلع الدنيا فأراحتها وأوجعتها..

البشر طيور عدة ..منهم من تره كما "عصفور الجنة" ..يهبط ويقترب من الارض..
ولكنه لا يهبط تواضعا..ولا يهبط تحايلا..ولكن قد يكون طبع بشري خالص..
والبعض كما "النسر"..يرقبك بنظرات حادة ..يحتد بنظرته علي نظرة امالك..
ويقترب بجناحيه علي ما يجده قابل للإفتراس فيك..فينهشه..
والبعض كما "اليمام" ..طيور سلام ووئام تعرفها من اللون الابيض قبل القلب الابيض ولغة السنابل..
والبعض كما "العصفور" يحاول ان يبني العش حتي ولو حساب الأماكن..يصالح حتي اعدائه ان كان في مصلحته ..
ويبني العش ولو في غصن متهرأ كي يضحي بوطن وحصن جديد..

البشر كما خط الكف..وخط الكف..
خط الكف المكتوب..وخطوط الكف التي ترتديها الاوراق..
في خط الكف المكتوب..قد تجد منهم خط طويل يملأ كفك عمرا وأملا..
وقد تجد منهم خط قصير لا تأخذ من النظر اليه الي الحسرة والعبرة..
وقد يكون تائه من راحة يديك ..ولكن تحتاجه لراحة قلبك..
وهم ايضا كخطوط الكف علي الاوراق..
فمن البشر من تجده "نسخ" .مستقيم لا يتلوي ولا يتمايل كذبا..
صراحته تملأ اوراق القلب البيضاء..
ووضوحه يملأ تفاصيل حروفه..
ومنهم من تجده ك "الرقعة" ..يرقص فوق السطر ويمتهن السطر الاخر..
يتكبر أحيانا ..ينشذ أحيانا..ويصادقك القول قليلا..
ومنهم من هم كخط "كوفي" يتراقص حول نفسه..
يجد نفسه محور العالم..ولا يصبح صديقك الا ليكمل صورته..لا ليكمل الصورة..!


البشر هم اعضاء الحفلة التنكرية الكبري المسماة بالعالم..
وفي الحفلة انواع عدة..منهم "صانعي المكائد"..ومنهم "منتظري رقصة المساء" من يعشقون مصلحتهم فقط..
ومنهم "من صنعوا الزينة" الذين يحبون ان يلقوا نظرات الاستحسان..
ومنهم من يريد ان يفسد الحفلة بالكامل..او يخرجك منها بمنظر المفتور او المقهور..
ومنهم من يريد "رقصتك" حتي وان كلفته الكثير ..!

البشر هم نبض السماء..من يراهم في شمسه ويحتضن اسرارهم في قمره..
من ينتظر لقاء قلوبهم حين تصعد للسماء حين يعشقون
وارواحهم حين تصعد الي السماء ليودعهم الوداع الاخير..

والبشر لحظات انتظار ..
منهم من تنتظره طوال عمرك ولا يأتي..
ومن يأتيك في غفلة منك وتضيعه..
ومن يأتي كثيرا حتي تتعود ضياعه منك..

واجعل من اعين الناس منصات للتويج قبل ان تري منهم السهام القاتلة..
واصغر امام نفسك لكي تكبر في اعينهم..
فان كبرت في اعينهم اكبر امام نفسك سرا ..فالكبير سرا اقوي من الكبير علانية..

فأنت قصيدة تحتاج لمن يقرأك ويقدرك..
وتحتاج لمن يزن القصيدة ويقفيها ..وهو الحب..
وتحتاج لمن يقرأها ليلا ويضعها في احضانه وينام.. وهو الأمل..
ومن يحاول ان يزيد سطورها وابياتها..وهم الأصدقاء..

فلابد ان تعرف الجميع حولك حتي وان كان اتقاءا لشر
فلا تعترف فقط بمن تعرفه بل حاول ان تعرف ما لم تعترف به ..
وحاول ان تغزل من البشر رداءا لحياتك..
لانك اذا تعريت..اصبحت رداءا للزينة في دولاب ملابسهم..!



Sunday, December 5, 2010

مذكرات زعــيم عــربي..يا تري بيفكر في ايه ؟






دي مذكرات حاكم عربي لقيناها تحت مخدته كان كل يوم بيكتب فيها بعد يوم حكم شاق ويملي جيبه بالفلوس ويرجع يكتب حصيلة يومه ايه النهاردة في المذكرات السرية دي
ودي حاجة كده زي "الويكيليكس" اليومين دول اللي طالعالنا في البخت..بس دي الويكيليكس بتاعة حاكم عربي وبخط ايده مش ناس كاتبة عنه



اليوم الاول :5 اكتوبر :

نفسي اركب حاجة غريبة..انا ركبت كل حاجة قدامي ..حتي الشعب بتاعي..عايز اركب كنغر في استراليا بس مش عارف هو بيتركب ولا بيتعمل فيه ايه ده..انا دايما في افلام الكارتون اللي بيفتحوهالي في القصر بشوف الكنغر ده بيلعب ملاكمة مش عارف ليه..هاتولي اي حاجة اركبها يا جدعان انا خرمان



اليوم الثاني: 6 اكتوبر :

ايه 6 اكتوبر ده بيفكرني بحاجة ..ااااه ده كوبري مشهور صحيح..المهم انا كل اما اقشر اليوسفندي يضرب في وشي عصيره ويلسعلي عيني لازم احاسب الوزير بتاع الزراعة لاما انا مش عارف اقششششششر..لاما هو فااااسد وانا هاحاسبه ..ازاي يخلي اليوستفندي بتاعي بيطلع عصير يضرب في الوش زي يوسفندي الشعب ؟؟؟



اليوم الثالث: 7 اكتوبر :

قالولي النهاردة جلسة مهمة عشان نحل مشكلة في المرور هههههههه اما عالم هتية صحيح ..مرور ايه اللي هنحله ؟؟ مش اما نأكل الشعب الأول ولا يعني نساعد بتوع العربيات وخلاص ..لاااااااا انا عادل قوي ..وظلمي ع الكل مش الفقرا اطلع ميتينهم والاغنيا ارصفلهم الطرق لاااااااا كله هيتفشخ..



اليوم الرابع : 8 اكتوبر :

انا عايز ادهن القصر من جديد وهاعمل بكرة عيني واوا واقول عايز عشرين مليون علاج علي نفقة البلد وادهن القصر واجيبلي كام عربية انا والعيال وربنا يجعله عامر



اليوم الخامس: 9 اكتوبر :

النهاردة خدوني لمنازل ولا مخيمات اللجئين واللهي..ايه ده ؟؟ ده ازاي يسيبوا الناس دي كده؟؟ ازاي الحال وصل لكده وسابوهم ع الوضع المخزي ده؟؟ ده الناس مش لاقية المياه يا جدعان..احمم ايه اللي انا بقوله ده؟؟ ده انا الحاكم..!!!!


اليوم السادس : 10 اكتوبر :

النهاردة جالي بتاع الاتصالات وطلبت منه انترنت سرعة اسرع م اللي عندي وشوية جيمز لان الوقت بيمر عليا بطئ قوي وانا وحيد ..اصل انا وحيد..رغم ان ولادي ومراتي حواليا
بس هم مش فاهميني شعبي بس هو اللي فاهمني بدليل انه بيجيب سيرتي ليل نهار..هو صحيح بيسب ليا ولأمي بس اهو بيجيب سيرتي ..مع ان امي دعيتلي وقالت "ربنا يحبب فيك خلقه" بس الظاهر انها كانت ولية مش تمام ودعوتها مش دعوة ام .


اليوم السابع : 11 اكتوبر :

كل يوم يقولك الاكل غلي والخضار غلي ..يا ولاد الكلب بتقارنوه بالسنة اللي فاتت؟؟ اللي فات مات يا حلوين ..هو ده قانوني انا "اللي فات مات" انسوا اسعار السنة اللي فاتت من النهاردة مافيش خضار انا الخضاااار ..ايه القرف اللي بقوله ده...اقصد ان من النهاردة هي دي اسعار الخضار واللي مش عاجبه يشرب م النيل بس النيل هيتاخد مننا هههههه يا ولاد المنحوسة هههههه


اليوم الثامن : 12 اكتوبر :

دخل عليا الراجل الطويل اللي ماسك الوزارة وبيقولي "كوبري جديد" ههههه بروح اهله يعني هو انا وظيفتي بتاع محارة هنا ولا ريس؟؟ كل شوية اروح افتح كوبري ؟؟ ولا خط مترو ولا سكة حديد؟؟
ههههه اما راجل ابن كلب قوي ..ده عمره ما قالي تعالي نعمل اجتماع ولا قالي تعالي نصلي علي راي تامر حسني



اليوم التاسع : 13 اكتوبر :

هم عاملين يعملوا كتب كلهم زي بتاع بريطانيا ولا بوش ولا كلينتون وانا ايه يعني مش هاعمل كتاب زيهم ؟؟ بس محتار اسميه ايه ؟؟ هو هتلر سماه "كفاحي" انا هاسمي كتابي "فسادي" واحكي كل حاجة بصراحة او ممكن علي وزن كفاحي اسميه "سفاحي" ما هو اللي بيحصل في البلد ده بيسموه "سفاح".


اليوم العاشر : 14 اكتوبر :

اقسم بالله لو عملوا التشكيل ده تاني لاهاوريهم العين الحمرا ولاد الكلب ..كل مرة نفس التخطيط الذكي ده وبيحرجوا وبيخلوا موقفي حرج جدا قدام عيلتي ..اعمل ايه احط قانون يمنعهم ؟؟ مش عارف ..واحد هيسألني تقصد التشكيل الحكومي؟ اقوله لا طبعا يا خفيف انا بتكلم عن تشكيل برشلونة اللي بيلعبوني بيه بلاي استيشن وبيروقوني كل مرة


اليوم الحادي عشر : 15 اكتوبر :

الحياة صعبة..ده اللي عرفته النهاردة فعلا بعد اما الكهربا رعشت رعشة كده في القصر انا قعدت اعيط واللهي قال وايه في ناس بتقطع عندهم بالشهور ده هي رعشت بس عندي قعدت اعيط نفس العياط اللي انا عيطته اما ريش النعام بتاع مخدتي حسيت انه هبط شوية وجبت المنجد من ايطاليا يظبطوا كنت حاسس ان حياتي بقت جحيم ومش هلاقي راحة تاني لو هبط ريش النعام


اليوم الثاني عشر : 16 اكتوبر :

عايزيني امشي في جنازة مش عارف مين ..ملعون ابوكوا انتوا كل شوية هتفكروني بالاخرة ؟؟انتوا هتقلبوا عليا المواجع ليه ؟؟ انا عارف اني هتروق فبلاش تفكروني بالحاجات دي وتقولولي جنازة ومش جنازة هو انا حانوتي يا ولاد الكلب ؟


اليوم الثالث عشر : 17 اكتوبر :

انا مش عارف اما ييجي في يوم شعبي يحتل القصر ويمسكوا المذكرات دي هيقولوا ايه؟؟ ده هيقعدوا يقروا عليا يا عم ويقولوا ايه ابن المرفهة ده ؟؟بس انا هاكومن هاجرت بقي بفلوسي علي سويسرا وانا جاهز لليوم ده من دلوقتي


اليوم الرابع عشر :18 اكتوبر :

الراجل بتاع الكلام مجاش وانا ورايا خطبة كمان شوية ع التليفزيون.طيب هاطلع اقول ايه ومحدش كتبلي الورقة ؟؟ده انا لو طلعت كده من غير الورقة اكني طالع ملط بالظبط اي واحد م الصحفيين هيثبتني بكام سؤال وانا مش هاحط منطق..لازم انفخ الصحفيين دول اليومين دول


اليوم الخامس عشر : 19 اكتوبر :

يا تري هاخد كام في المية الانتخابات الجاية ؟؟ رقم 99 بقيت بحس انه فقر وبيجيبلي الكلام انا هاخليه مية في المية وخلاص لان 99 مش مقنع خالص وتحس ان فيه شبهة تزوير كده يا اخي


اليوم السادس عشر : 20 اكتوبر :

النهاردة رحلة صيد البط بتاعي ..انا بحب الصيد قوي انما محبش حد يصطادني مينفعش اليمام يضرب الصياد ولا ايه ؟


اليوم السابع عشر :21 اكتوبر :

انا عايز اتجوز علي فكرة مراتي بقي عندها زهد شوية في موضوع ال.....ده... فبفكر اتجوز واحدة نغشة كده عرفي من بتوع قنوات الاغاني دول اما اقوم افتح القناة واختارلي واحدة تكون ملعب


اليوم الثامن عشر : 22 اكتوبر :

عايز واحد سيناريست يجي يفعد معايا يعمل فيلم من دلوقتي عن قصة حياتي لان بعد اما اموت هينفخوني وهيعملوا فيلم زبالة عني ولاد الكلب فانا الحق من دلوقتي اعمل فيلم فيه كل انجازاتي بصرف النظر عن الكباري يا جدعان ملعون ابو الكباري ع اللي بانيها ..هو ده انجاز اني ابني طريق او كوبري ؟؟؟؟؟



اليوم التاسع عشر : 23 اكتوبر :

المعارضة كترت قوي ع الشاشة ماشي ماشي ...انا هاعمل زي شهريار بقي ..يا مسروووووووووور..


اليوم العشرون : 24 اكتوبر :

انا عايزهم يكتروا قوي القنوات الدينية واهي بتلهي الناس وفي نفس الوقت يقفلوا المعارض منها او اللي بيخبط يعني وعايز اعمل قنوات تعارض وترسم انها بتعارض لكن اما ييجي سيرتي يحلو الكلام علي راي لطيفة ويقولوا لاااا الا الريس بحكمته العميقة المعهودة وبتاع فالناس تعرف ان انا العادل الحكيم والحكومة هي اللي ظالمة ههههه تخطيط شيطاني


اليوم الحادي والعشرون : 25 اكتوبر :

طول النهار يقولك فساد في التأمين الصحي وقرف ووجع دماغ مش كفاية مستحمل عددكم يا شعب مقرف ما يموت منكوا شوية يا اخي ايه القرف ده ..كل اما واحد يموت يقولك فساد..ونزيف الاسفلت..نزيف الاسفلت؟؟ معلش المرة الجاية هاحطله صبغة يود يا ولاد الظريفة



اليوم الثاني والعشرون : 26 اكتوبر :

بيقولك بطولة العالم في العاب عجيبة قوي بنكسبها انما الالعاب المهمة احنا زي خيبتها وحتي يعني لو كسبنا الالعاب المهمة ...هو ده اللي هيشرف البلد ؟؟ ههههه يا فرحة امك بيك يا خ.... علي راي الراجل اللي بيشتم


اليوم الثالث والعشرون : 27 اكتوبر :

انا سعيد قوي بان كل شوية مصطلح ييجي يداري علي اعمالي ويحصل حروب بينهم ويسيبوني ملك زماني..خلي العلماني مع رجل الدين مع السلفي مع البهائي مع الليبرالي مع مش عارف مين يخبطوا في بعض كلهم وانا اخرج منها زي الشعرة ...وده يقولوا "انتوا بتتمولوا م الخارج" والتاني يقولوا "انت عميييييل" ....تخطيط جااامد



اليوم الرابع والعشرون : 28 اكتوبر :

والحرب الجامدة كمان اللي مظبطة مزاجي الحرب الغنائية ده يقولك "الكينج" والتاني يقولك "الهضبة " وشوية حاجات تلهي الناس ويخشوا في صراعات والتاني يقولك "سنة" وواحد يقولك "شيعة" وانا عايش في قصري باشااااا علي ما يحلوا مشاكلهم ربنا يزيد الانشقاق اللي مظبطني ..



اليوم الخامس والعشرون : 29 اكتوبر :

انا زهقت م ام المذكرات دي انا النهاردة هاوقف مذكراتي فترة طويلة واروح اضرب كام دكتوراة فخرية مثقف بقي وبتاع ..اهو اعلقهم ع الحيطة جمب اخواتهم وصلوا بتاع 400 دكتوراة دلوقتي ده انا علي كده اخترع جايزة نوبل جديدة مش اخدها ههههه قال 400 دكتوراة قال.





دي كانت فقرة من ملف مذكرات الحاكم العربي ..المأنتخ..المنفخ..المريح..المسلطح..المفهيص..المشهيص..


Friday, December 3, 2010

نـهر لـم يعـشق أبدا..قـصة قـصيرة







لم يري سامي الشيخ العجوز الجالس عند النهر كل صباح منذ فترة طويلة..يظنه البعض مجنون ..والبعض يظنه من احكام العمر وكبر السن..والبعض لا يكترث لهذا الشيخ العجوز علي الاطلاق..ولكن سامي لم يكن ينظر الامور الا بنظرته هو وليس بنظرة الناس التي يري فيها الكثير من شباك الاحكام المسبقة..

كان سامي شاب ثلاثيني العمر حسن الطلة تحسبه اصغر من سنه بكثير ..وكانت كل هواياته متعلقة بالشمس ..سواء هواية التصوير في الشروق والغروب او الصيد او الحب بحكم غروب الشمس وانتهاز فرصته مع اسرار الليل والامه..
كان يؤمن بأن وراء كا واحد منا سر كبير سواء معلن او غير معلن ولكن البعض يحب ان يعلن سره الكاذب والاخرون يحاولون اخفاء سرهم الصادق احيانا..وكان يري في هذا الشيخ العجوز نوعه الثاني .

كان هذا الشيخ يأتي كعادته كل صباح بصنارة وبعض الاوراق وكتاب صغير وكان يثير استغراب سامي ما يفعله الشيخ هناك حيث انه يرمي الصنارة بعد خمس دقائق ويبدأ في النظر الي النهر لفترات تتعدي الخمس ساعات احيانا حتي اصبح مسار سخرية معظم فتيان المنطقة ولا يبعدهم عن الرجل المسكين الا سامي نفسه.

قرر سامي ان يقطع مع نفسه تلك الحيرة وان يعرف تفاصيل الرجل الغامضة وسره المتخفي في حركات المياه الراكدة الخفيفة ..اراد ان يعرف ما يحتوي هذا الرجل وما اخذه من النهر بعد هذه السنوات التي رأه فيها يأتي كل يوم.
وفي صباح من تلك الايام ذهب سامي الي الرجل واقترب منه وأمسكه من كتفه وقال : صباح الخير

ارتعد الشيخ المسكين فجأة ونظر : صباح الخير ..لقد افزعتني ..لم اتعود ان يلقي علي احدهم التحية
قال سامي: اسف جدا لم اقصد ..

الشيخ: اري في عينيك ما تريد ان تعرفه وما يريد الجميع ان يعرفه ولكن سري لا يخرج لاحد حتي ولو اتهموني بالجنون

جلس سامي بعد ان اطمأن الرجل اليه : حتي انا ؟

الشيخ: انت الوحيد الذي كنت تساعدني طوال هذه الفترة حتي ولو لم يدر بيننا حوار

سامي: ماذا فعل النهر لك حتي تعاتبه بعينيك كل هذه الفترة وتنظر اليه بكل هذا العمق ؟

الشيخ: لقد كنت اجالس هذا النهر منذ سن العشرين وتعودت علي هذا ومازالت اجالسه محاولا الوصول لحكمته عن الحب

سامي: ولماذا النهر تحديدا؟ لماذا لا يكون للزهر نصيب او للقمر او لغيرهم ؟

الشيخ: في كل شئ خلقه الله حكمة عن الحب وكأنه خلق كل هذه الاشياء لتحيا ولنعرف منها معني الحب والحياة..الزهر وانتمائه للشمس وكأنه ينحني لها تقديرا علي عمره التي اهدته اياه ..والقمر وغوصه في البحر كل غروب وكانه يحاول ان يتطهر من كثرة اسرار العشاق ويظهر كل صباح بفستانه التنكري المشرق الاصفر اللون..والطيور التي تغني كل
صباح لنعرف ان لكل شئ صوت وصوت الانسان الحب..والليل الذي ننام في حضنه كل مساء وينام هو في حضن اسرارنا وبوحنا له فيغزل من تلك الاسرار العشقية ردائه الابيض ليطل علينا صباحا يعرف اكثر عن معني الحب وينظر الينا بعينيه الشمسية فيكسر اعيننا في الارض خجلا وكانه يقول لنا "اعرف عنكم اكثر مما تظنون..فقد وشي بكم الليل"

سامي: وماذا رأيت في النهر ؟

الشيخ : لقد رايت في النهر المعني الكامل للعشق..المعني الحقيقي للغة القدر وهجر العشاق ..بعد كل هذه الفترة التي جالسته وكانه مل مني كثيرا وقرر ان يوحي بسره وحكمته الي اخيرا

سامي: وماذا قال لك ؟

الشيخ : ان انعكاس صورتنا فوق النهر ما هي الا انعكاسة الروح عليه وليس البدن..حالة صفاء كامل تتكسر فوق مياه تتمايل خوفا من ان تسقط تلك الصورة العذبة ..فاذا جلس عاشقان لم يخف النهر غيرته من المشهد فتجد ارواحهما العذبة في الصورة علي النهر في محاولات اغتيال دائمة..محاولات اغتيال عشقية تامة

سامي: اغتيال لهما؟

الشيخ: اغتيال لعشقهما ..فالنهر مدمن لتلك الصورة او متعاف من الادمان يحاول ان يرتشف صورة ارواحهما علي سطحه في كل لقاء بينهما

سامي: ولماذا يغتالهما اذا مادام وصل لحد الادمان للحظة عشق؟

الشيخ: الكل يغار من العشق ويحاول بكل وسعه ان يصل الي حالة الحب الكاملة والصوفية.

سامي: وكيف يغتالهما؟

الشيخ: انظر الي هذا المركب الصغير كلما مر بجانب انعكاسهما علي النهر هز الصورة قليلا ولم تظهر بل تتلاشي تدريجيا

سامي: نعم هذا ما يحدث

الشيخ: هذا هو الزمن..يحاول ان يغير الصورة في كل مرة ويعيد تشكيلها اما تعود تفاصيل روحهيما عشقا واكتمالا مرة اخري او تعود مللا وتعودا.

سامي: هذه المركب تمثل الزمن اذا

الشيخ: نعم وهل تري هذا الطائر الصغير بالاعلي الذي يحاول ان يقتنص الاسماك

سامي: نعم

الشيخ: هذا هو القدر يحاول ان يضرب سهامه بقرب صورة انعكاسهما علي الماء حتي ولو يقصد الصورة بالذات بل يقصد ما تحتها ولكن السهم يؤثر حتي وان كان قريب وليس في قلب الصورة

سامي: هل تقصد الهجر؟

الشيخ: الهجر والقدر عشاق..هل تري بعض الاطفال يلقون الحجارة علي الماء فتهتز الصورة قليلا؟

سامي: نعم

الشيخ: هؤلاء الاطفال يمثلون غيرة البشر وحقد الناس علي حالة العشق الكاملة احيانا .

سامي: اذا فقد عرفت ما هو النهر اذا

الشيخ: هذا النهر الي هو الدنيا ..ولهذا اهجر كل ما في الدنيا واجالسه لاني اري فيه دنيتي الحقيقية.ولكنك لا تعرف ما سلبني النهر ؟

سامي: هل سلبك النهر شئ من قبل ؟

الشيخ: اخذ مني حبيبتي منذ سنوات فجلست اتحداه باني ساخرج منه حكمته واعرفها يوما ما وها قد عرفتها ولم تعد سرا..قد اخذ مني الزمن والدنيا والقدر حبيبتي



ثم سارالشيخ بعيدا وودع سامي وكانه لن يعود ابدا حتي وان خرج سامي كل صباح ينظر من الشرفة هل عاد الشيخ العجوز بلا جدوي
ثم استيقظ في يوما ما علي صوت صراخ فقد وجدوا جثة في النهر ..وكانت جثة الرجل العجوز ذاتها..
وعرف سامي رسالته ..وعرف ان الرجل قرر ان ينام بجوار حبيبته او ان يثبت للنهر انه عرف حكمته..حتي وان لم يعرفها كاملة..
ام تري النهر ادمنه ايضا كما يدمن صورة العشاق عليه ؟
ولا اعرف اذا كنت في حالة تقمص كنت انا هذا الرجل العجوز وكان سامي هو قلبي ..لا اعرف..
ولكن ما اعرفه ان هذا النهر لم يعشق ابدا ..
نعم هو يقتل ولا يعشق ابدا ..!

Wednesday, December 1, 2010

تقول كلمة "يحرقك بجاز" لمين؟




يحرقك بجاز يا اخي هي كلمة احب اهديها لكل الشخصيات التالي ذكرها في الاسفل واللي غيروا عالمنا لكن تغيير سخيف قوي :


1- اقولها لاول واحد عمل تي شيرت بترتر ولبسه الشباب السيس

2- لاول شاب خرج بوكسره برة وبقت موضة مقززة

3- لاول واحد قال لازم تقول رايك بمطلق الحرية لانه خلي اي خرونج يقول رايه ويقولك احترمه بسبب حرية الفكر وهو بيتكرع رأي مش بيقوله

4- لأول واحد غني اغنية للرؤساء ويقولك دي اغنية وطنية وهي نفاق في نفاق

5- لمخترع الفيس بوك اللي خلي حياتي محصورة بين لايك وكومنت

6- لاول واحد بدأ الاعلام الرياضي عشان تبقي ساحة حروب وشتايم قذرة

7- للي خلي الجنيه فضة وخلي جيب الواحد يشخشخ طول النهار هي ناقصة صداع في الشارع

8- لمخترع الاسكوتر اللي قتل الطفولة وخلانا اكننا بنتفرج علي سبيس تون قدامنا لايف في الشارع بس بنتفرج علي كوكب الاكشن المقزز

9- لأول واحد قال "هي يعني جت عليا" خلي الانتخابات بالمنظر ده كل مرة

10- لمخترع الجواز العرفي ..ده كان شيطان بجد اول واحد عملها ده..جاب الفكرة منين

11- لمخترع فقرة "غني للعريس يا عروسة" و "غني للعروسة يا عريس" لانها بتفقعهم اوي..المرارة يعني ..علي راي تهامي باشا..لحسن حد يفهم غلط

12- اول واحد عمل الالتراس ومحسسني انه بطل قومي ويطلعله تصريحات كل شوية كمان في كل القنوات وكأنه بيفرض اتاوة عليهم

13- لأول واحد قال "خلاص نعديها المرة دي بس" وطبعا عدت منه كتير بعد كده وبقت البلد بالمنظر ده

14- لاول واحد فكر يدفع رشوة عشان يخلص مصلحة

15- لأول واحد عمل جروب اهبل ع الفيس بوك وطبعا باقي الناس قالت "يبقي حقي اعمل جروب واسميه اي حاجة اذا كان ده جروب "

16- لاول واحد عمل برنامج يقرا فيه الجرايد ..بقت كل البرامج دلوقتي تستسهل وتطلع تقرا الجرايد ع الهوا وخلاص

17- لاول واحد فكر في قانون الخلع وخلي الست تحط رجل علي رجل بعد ما كانت بريئة منكسرة بتحافظ علي بيتها

18- لاول عضو مجلس شعب رفع ايده علي قرار وهو مش فاهم ايه القرار اصلا خلي الحكاية دي عدوي وكله بيرفع ايده وخلاص وهو بيتاوب

19- لاول واحد فكر انه يستعين بمحمد نجم في مسرحية او العسيلي في اغنية او تمورة في اغنية دينية

20- لاول واحد فكر يعمل رمضان شهر مليان مسلسلات وفوازير وخلاص ومعرفش ايه اللي خلاه يفكر ان رمضان لازم تكتر فيه المساسلات وايه العلاقة اصلا

21- لاول شاب فكر ان زفلطة الشعر بالجيل روشنة وكتب علي تي شيرته رقم 77

22- لاول واحد استسلم ودفع لسايس فلوس عشان يركن العربية بدل ما يقوله لأ مش من حقك خلاهم يبلطجوا دلوقتي

23- لاول واحد قال كلمة "انجز" خلي كل حاجة تتكروت ومتتعملش صح

24- لاول واحد قال كلمة "دخاني" خلي كل شئ ماشي بالفلوس والدخان والكيف

25- لاول واحد كتب علي محله "بدون اسم" قال يعني جديدة وهي بي...........تييييييييييت

26- لاول سواق تاكسي قعد يرغي والزبون كان بيجاريه في الكلام خلاهم كلهم يستلموك اول ما تركب

27- لاول واحد عمل اغنية بيئة وسمها شعبية عشان يصنفها فنيا وهي تصنيفها من تصنيف ام عبده بتاعة الكلاب

28- لاول واحد فكر في عيد الجواز وسماه عيد اصلا واهي تكاليف وخلاص

29- لاول شاب جاب هدية لامه في عيد الام حاجة من حاجات المطبخ وكان الام دي هي المطبخ

30- لاول مطرب عربي فكر انه يغني راب ونسي انها مش لايقة تماما حتي لو اصطنع ميت مرة

31- لاول مخرج فتح سوق الاجسام الناعمة علي حساب الاصوات الوسخة

32- لاول واحد عمل القاب غنائية وقال الهضبة ونجم الجيل والكنج والسلطان والحاجات الهلس دي

33- لاول بنت قالت كلمة "خلينا اخوات احسن"

34- لاول ولد قال " كل شئ قسمة ونصيب"

35- لاول واحد كتب اسمه علي الفيس بوك "البرنس كذا" وكاننا قاعدين في ميكروباص وناقص يكتب طريق السلامة يا برنس حسين

36- لاول حاكم كذب وقال في بداية خطبته "شعبي الحبيب" وهو بيكره الشعب من كل قلبه وبيقلبه كل يوم


Monday, November 29, 2010

مــربي يا معــلمي مــربي..هم النم يا روحي..الجزء الثـاني




فعلا كل مصطلحات الشعب المصري تحسسك ان كل همه علي بطنه ودايما تفكيره في الوجبة الجاية ودي شوية مصطلحات تانية بتدل علي كده :


الطفل من صغره دايما نكلمه عن الغذا السليم وان اهم حاجة في الدنيا هي الاكل والأم لازم تعرف ان اهم حاجة الرضاعة الطبيعية وكل اهتمامات الام المثالية تكون عن طريق توعيتها بالاكل الصحي لولادها
وتغني الام لطفلها من صغره "نام نام وانا اجيبلك جوزين حمام" وكأن دي اكبر مفاجأة للطفل هي وجبة برضه مش مثلا لعبة او مرجيحة او كده لأ جوزين حمام لانه طفل انابيب كل همه علي بطنه
وفي اغنية تانية تقولك "وزمان قالوا الخضار ..بيخلينا كبار..واحنا بناكل هم النم" ..طيب يا ستي زمان قالوا الخضار بيخلينا كبار تلاقيهم بتوع سوق العبور بالذات اللي قالوا كده وهم اللي كتبوا الاغنية دي اصلا عشان يبيعوا علي قفا الطفل والام.
وكمان اغنية "مرة سألت الاستاذ ارنب ليه ما انتاش لابس نضارة ردلي رد لطيف ومهذب باكل من غير ما اعمل غارة" برضه اكل الطفل لازم ياكل لازم يشرب وكل الاغاني منصبة علي كده في الطفولة
واغنية تانية بتقولك "مبيشربش اللبن الصبح وكل اصحابه ضحكوا عليه" يا عم كفاية فجعنة بقي طيب ما هم ممكن يضحكوا عليه لو بغل من كتر الاكل برضه يا عم محمد فوزي ولا ايه ؟
وحتي الاغاني التانية للاطفال هتلاقيها بتتكلم عن غسيل الاسنان زي اغاني صفاء ابو السعود مثلا ..يعني برضه مراحل ما بعد الاكل اغسل سنانك وكده


وفي اشهر الردود المصرية هتلاقي برضه مصطلحات الاكل والفجع زي مثلا "يا اخي علي الطاسة" برضه ليها ارتباط بالاكل ومصطلح "انت بتخبط في الحلل" او الكلمة الشهيرة جدا "مش واكل معايا"

وفي الامثلة حدث ولا حرج زي مثلا "اقلب القدرة علي فمها" او "تعمل م الفسيخ شربات" او الكلمة الشعبية "انت شايل طاجن ستك "
وواحد يقولك "مش مبلوعة الحكاية دي" او "مش نازلي من زور الراجل ده "


وفي الخناقات حتي برضه اكل وشرب في الكلام زي "اكلك بسناني دول" او "اشرب من دمك" وفي التزوير كمان يقولك "انتوا سويتوا الحكاية مع بعض"
او واحد عملت فيه مقلب يقولك "شربتها يا مغفل"


وكلمة "كملت الطبخة" اما حاجة تكون حبكتها جامدة قوي وملعوبة يعني ..وممكن يقول كمان لفظ زي "كده العملية استوت ع الاخر" كل الكلام هتلاقي فيه اكل وشرب لحد ما تشبع من كلامك لدرجة ان في ناس كتير تقولك حتي "انا جعان نوم" يعني حتي وهو داخل ينام مش راحم برضه بيفكر في كلمة جوع واكل وغيره

وحتي في السياسة يقولك "العصا والجزرة" "التفاحة المحرمة" "المطبخ السياسي" يعني برضه السياسة دخلت في مصطاحات الاكل والشرب بتاعتنا وكان العرب همهم الاول وتفكيرهم وهم بيتكلموا الاكل والشرب اللي باهت اواي فوق كلامنا ومصطلحاتنا

وفي الكلمة المعروفة برضه "الدنيا زي الخيارة" او ا"العروسة زي البطيخة وانت وحظك يا تطلع قرعة يا تطلع تمام"

وحتي الاغاني كمان اللي بنسمعها زي كاظم الساهر اللي بيقول "تعالي اعد لكي الشاي فانتي خرافية الحسن هذا الصباح" ومحمد منير برضه اتكلم عن الشاي ومطرب عمل اغنية اسمها "واحد شاي"
وحتي الواحد بييجي من الغربة بيقول لامه في التمثيليات "نفسي اكل تاني من ايدك يا ست الكل" يا عم ده انت طفس طفاسة قول نفسي اكل ولخص مترسمش دور انها وحشاك بقي.

والست اللي بتعرف تطبخ يبقي "نفسها حلو" يعني عشان طبخها حلو قولنا نفسها حلو
وطبعا سعد غني للعنب وناس غنت للبلح وشعبان غني للطماطم ولسه هنغني للمحشي وغيره بعدين
والبنت تعمل شعرها "كحكة" والولد يعمل شعره "كابوريا" .

ولسه كل يوم هنشوف كلام واغاني هتتعمل للاكلات مع مرور الوقت ..وانا ماشي بقي رايح اكل اصلا لاني جعت بعد الموضوع ده




Saturday, November 27, 2010

إعــلام أم إسمـــاعيل للقاء التقـــيل







اللقاءات قدام الكاميرا في مصر بتتطور يوم بعد يوم بس في فضايحها مش بتتطور في تقنياتها يعني ..دايما اما تلاقي الضيف بيتكلم خصوصا في الاعلام الرياضي بتلاقي وراه ييجي عشرين واحد بيشاوروا للكاميرا بس دي قديمة قوي ..احنا سيبنا الوضع ده زي ما هو لحد اما اتطور تطور كلي لدرجة حاجة محدش هيصدقها..
ان الناس دي بقت بتعزم علي بعض
بالاماكن كانه صاحب بيت يعني ..
تلاقي واحد جاي بيزق من ورا خالص عايز يظهر والراجل اللي قدام ولازق في الضيف بيعزم عليه بعشم انه يدخل يلزق في الضيف والمذيع مش
عارف يعمل ايه هو اتخنق م الوضع ده بقاله سنين بس مافيش فايدة.

والنوع التاني الناس الي طالعة تتكلم في الموبايل مش بتشاور لاهلها زي النوع الأول قال يعني هو بيتكلم في الموبايل فعلا..! ده تلاقيه قافله وشايل البطارية اساسا وواحد منهم اتكشف والموبايل رن وهو حاطه علي ودنه وعامل نفسه بيتكلم وقدام الكاميرا وكانت فضيحة.

وناس كتيرة قوي من دول بيقعدوا ينفخوا في شعر اللي قدامهم او يدوا اللي قدامهم علي قفاهم وكاننا في العباسية او في فيلم اسماعيل يس في مستشفي المجانين ده بالظبط الموقف ورا المذيع "مستشفي مجانين"..

وزي ما في اوروبا في خلفيات للقاءات الصحفية يعني تلاقي اللعيب واقف في مكان محترم ووراه صورة اعلان او لوحة كبيرة وسجادة حمرا ومكان محترم جدا واقف فيه مخصص للقاءات الصحفية عندنا في مصر بقي وصل تغير الاماكن الي انه بقي قدام الحمامات تلاقي المذيع واقف مع اللعيب والخلفية حمام اللعيبة وخارجين منه بالفوطة كمان او ساعات
علي باب الاتوبيس ودي فضيحة عالمية المذيع بيفضل يجري ورا الضيف اللي هو اللعيب لحد باب الاتوبيس لدرجة ان الاتوبيس يتحرك وده لسه متشعبط هيموت علي كلمة او تصريح وطبعا اللعيب لو مغلوب في الماتش هيقوله بعدين ولو فايز هيرميله الكلمة كده من تحت لسانه كانه بيعطف عليه بجملة يعني.


وعندنا بيضطر ساعات المذيع اما مبيلاقيش حد مهم يرد عليه في اللعيبة ولا بيعبره انه يعمل اي لقاء وخلاص فبيروح يستضيف حرس المكان او اي اداري نفسه يعمل تصريح اصلا وكانه بيقول لنفسه "اخيرا هاطلع في ام التليفزيون ده..زغرطي يا امه" ..
وطبعا المذيع عارف الناس دول كويس وبيلجأ ليهم اما بيتزنق ومش لاقي تصريحات من لعيبة مهمة او
مدرب مشهور ..فده هو حله الاخير..يروح لواحد شرقان كاميرا ونفسه يظهر قدام التليفزيون بقاله سنين.


وبقت مهنة المراسل الرياضي دي او المذيع اللي بيجري الحوارات والمقابلات كانها زي الشحات اللي بتهرب منه لو جه علي قزاز عربيتك بتباتة ..كل اللعيبة بتجري والمراسل بيجري وراها طول اليوم والمدربين بيزعقوا احيانا ليهم ويقولولهم عيب وكانهم شغالين عندهم برغم اهتمام الغرب الشديد بجانب الاعلام وتخصيص اماكن محترمة للقاءات الصحفية طبعا

الغريبة بقي ان ده مش بس في الاعلام الرياضي ده برضه لو فنانين خارجين من مهرجان سينمائي احيان بيجروا برضه وميرضوش يقولوا تعليقهم ع العرض الخاص للفيلم مثلا وكانهم شافوا جوة فيلم سكس !

ونفس الحال في الحج اما الناس بتشاور للكاميرات وهي بتحج عشان تظهر في قناة السعودية اللي بتجيب الكعبة بث مباشر ...طب بالذمة انت مركز في الحج ولا جاي تبص للكاميرات وتشاور؟ ..وواحد منهم بيرفع المصحف قدام الكاميرا وكان حاج معاه مصحف دي تعتبر معجزو امال يعني المفروض في ايدك ايه ؟ كتاب مقدس ؟؟؟

وساعات تلاقي الناس اللي ورا الكاميرا في المقابلات التليفزيونية في الشارع من نوع الاطفال الرخمة اللي بيعملوا حركات رقص مستفزة براسهم وتلاقي المذيع بيبقي عايز يخلع الجزمة فعلا ساعتها وينزل ضرب فيهم..
او حاج كبير واقف يشاور هو كمان وكانه شاب بيبني نفسه يا حاج انت بتموت اكلينيكيا خلاص انت لسه بتشاور للكاميرا ؟

وفي الناس اللي بتلزق بوشها وصوابعها واحيانا تلاقي اللعيب واقف وفجأة راح ملطوع حتة بوسة علي خده تقرف بصراحة ..ايوه اسمها "ملطوع" بوسة لان اما حد يديك بوسة غير اما يلطعك بوسة وهم دايما في المقابلات مع اللعيبة اللعيبة بتتلطع بوسة لانها بصوت وريحة وطعم وحش واللعيب بيمسحها بسرعة ويبص باستغراب لصاحب البوسة وكانه بيقوله "هو انت بجد بتبوس كده علطول؟؟ ربنا يكون في عون مراتك واللهي" ..
بوسة وكانها ضربة بكف او اتقل شوية كمان خصوصا انها جاية من بق مشجع تخين وعرقان م التشجيع..



وساعات تلاقي فجاة اتلم عليه شوية اطفال ويقعدوا يصقفوا حوالين اللعيب اللي واقف في دايرة حواليه وكان اللعيب المفروض يرقص او يعملهم عرض حاوي في النص يعني انت تبقي واقف في امان الله تلاقي فجاة دايرة حواليك ناس بتصقف ..يعني انت المفروض تهز علي واحدة ونص ولا تعملهم اكروبات مثلا ؟

وساعت ناس من اللي ورا برضه تلاقيه فجاة وقف وضرب اللي قدامه في طرف ودانه وبعدين يوطي فجأة والتاني يقعد يتلفت وراه ..اي اعلام ده؟؟ اعلام باكستان يمكن انضف حتي واشيك من كده ..

ده ساعات حتي السياسيين بعد انتخابات مثلا او اجتماع مهم يخرج يقول "لا تعليق" مثلا او يجري من المذيع برضه ويهرب م الاعلام..وكانه كان في اجتماع لبان بم بم او بيخترعوا سر شويبس من جديد وخارج يجري ..
طيب ما تقول يا عم ايه اللي حصل جوة..لا تلاقيه بيجري وباصص في الارض وكانه اتضرب او شاف صور فاضحة لمراته ع الموبايل جوة
مثلا..



ياريت الاعلام يتتطور بقي وتظهر مناظر حضارية شوية بدل اللي احنا بنشوفه ده من اعلام "مستشفي العباسية"..!










Thursday, November 25, 2010

عـزمت عــيوني عـلي حفلة






عزمت عيوني علي حفلة ..
مكانها زمانها في عيونك..
في ليلة والسما صافية..
قضيت الليل علي جفونك..
وخيمنا انا وقلبي ..
في صحرا ريحها مش عاتي..
سرابها العشق والنبضة..
حنينها هيام في دمعاتي..
عزمت عيوني علي بسمة..
اسيرة في حضن ملكوتها..
وروح طايرة ومبتسمة..
بتنطق زهر في سكوتها..
عزمت عيوني علي نورك..
لقيت الضلمة غيرانة..
وقولت اعدي بين حورك..
لقيت انواري حيرانة..
وولعت الغرام شمعة..
لقيت الليل علي بابي
وفصلت الهوي دمعة..
هديتها لكل احبابي..
انا عاشق بلا منطق..
ولا غنوة ولا تراتيل..
لقيت في عيونك المنطق..
ده واقع جوة حلم قتيل..
خيال؟
لأ كلمتك أكبر..
جنون؟
لأ حكمتك أقدر..
انا في عيونك أترهبن..
وابقي الوعد والمواويل..
عزمت عيوني علي جنة..
ياريتني لو اموت فيها..
ما بين حراسها بتمني..
لو اقدر يوم اعديها..
عزمت عيوني علي غربة..
وقالت يلا غربني..
عنيكي فيهم الغربة..
نسيم ساحر يقربني..
عزمت عيوني بلا دعوة..
ولا انوار ولا معازيم..
كتبت بطاقة الدعوة..
برمشك اقوي م السكين..
لان الحفلة دي انتي..
وطعم الليلة دي انتي..
ستاير عشق علي قلبي..
فتحها لقاكي بصاله..
وصام النبض عن قلبي..
وأكل الحسن ده بداله..
انا جايلك علي الحفلة..
علي رقصة غرام وجنون..
انا جايلك علي الحفلة..
وبشهادة حياة مجنون..
جنوني عنيكي وروايتي..
وقلبي تيجان علي راسك..
هاقول في الحفلة دي حكايتي..
لو اقتل بس حراسك..
لو اقتل بس حراسك..


Tuesday, November 23, 2010

شمـس وقـمـر 26






** قالت لي :الحمد لله الذي الهمني الصبر لكي اجد من يحبني مثلك...قلت : الحمد لله الذي افقدني الصبر في عينيك والهمني البصر لكي اراهما..

** العشق كما الساحر..لا تستطيع ان تعرف هل يستخدم منديله كي يبهرك ام لكي يخفي فقط خدعته..

** لكي شئ صوت يسمعه البشر..الا النسيم والزهرة فلا يسمع صوتهم الا عاشق ..

** المرأة هي من تعطيك مفتاح الجنة عندما تحب..لتجد الجنة "ايجار جديد" عندما تتزوج..

** قصة حياة منديل..تعدل به المرأة مكياجها في فترة الخطوبة..ثم تضعه علي يديها عند الزواج..ثم تبكي فيه بعد الزواج..

** الحب هو الوحيد الذي اذا استتر فيك استترت به.. واذا صعد بروحك لم يقتلك ولكن صعدت معه..واذا ابكاك اشجاك..وهو الاحتلال الوحيد الذي ترفع بعده راية انتصارك..

** الغرور هو الجهل الكامل مغلف برداء الفضيلة الكاذبة

** قالت لي : احيانا اجد في رجولتك مساحة النفس الاخير بين ثقتي وغروري...قلت : واحيانا اجد في انوثتك مساحة حريتي الاخيرة بين حبسي الانفردي في عينيك وحبسي الاختياري داخل قلبك

** بعض القلوب لها رغبتان في الحب..رغبة كي تملكه ورغبة كي يملكها ..وما بين الرغبتين "نزوة منتصف العشق"..

** اختيار الفراغ ارحم كثيرا من فراغ الاختيارات

** الحب هو ان تجعل من الجنون إمرأة تستلهم من مأدبة عينيها..حكايات "العشاء الأخير"

** الوداع هو وعد لم يتحلي بالصبر ..وصبر لم يجلس علي طاولة المفاوضات مع اخر نظرة.

** الحب والحياة هي اشياء لم تبدأها بقوتك..ولكنك تنهيها بضعفك.

**اكتر كلمات يكرهها العاشق هي "فرصة اخيرة " و "قسمة ونصيب".

** المرأة والبدر هي الاشياء التي كلما اكتملت كلما اشتقت الي النقص فيها.



Sunday, November 21, 2010

فرصة سعـيدة قـوي يا حضـرت






واحد معرفوش..اول مرة اكلمه..التعارف في مصر غريب شوية وليه طابع شرقي جميل لكن احيانا بيكون مبالغ فيه وبتحابيش وبهارات مصرية

دايما تلاحظ ان اللي ميعرفكش يقولك "يا بشمهندس" ودي قاعدة مصرية ان الاصل في الانسان الهندسة الي ان يثبت العكس !
ولو بنوتة لذيذة كده ممكن تقولك اول مرة "هاي ازي اخبارك؟" ومش عارف الصراحة ازاي باظت يعني الجملة لغاية ما بقت مالهاش معني ويعني ايه "ازي اخبارك " ؟؟؟هي كانت بتتقال زمان "اخبارك ايه" او "ازيك عامل ايه؟" ولكن الظاهر دي جملة ميكس اتعملت جديد عندنا صناعة مصرية.

في بقي كمية ناس مبالغة في التعارف غير طبيعية زي بتوع "يا عمنا" "يا شيخنا" "يا سيدنا" وكأني مثلا لابس عمة وقفطان قدامهم ..

واحد مرة رايح انزله ويندوز ع الجهاز قالي "ازيك يا كبير" ايه يا عم شايفني جاي من الجبل علي اساس اني م المطاريد مثلا ؟؟ كبير ايه بس ؟

وساعات سواقين التكسي يقولك "يرضيك كده يا حضرت؟ " وكلمة حضرت دي بتخنقني قوي لانها بتفكرني ب "اكسلنس" والمفروض اني في زمن التمانينات بقي وارد عليه واقوله "اه موضوع بديع قوي..مدهش" وكاني يحي شاهين في افلام زمان


والشاب الكول بقي اللي اول مرة تكلمه اساسا يقولك "قشطة يا بوب" معرفش ايه كلمة بوب دي برضه مع ان البوب ده تقريبا بتاع الفاتيكان لو بينطقها بنطقهم مثلا بس اكيد مش مشتقة من كده !

والراجل الواقع بقي اللي ممكن يتعرف علي واحدة ومن ساعة ما يعرفها طول النهار يفضل يقولها "اتفضلي يا ست الكل"..."شرفتي يا ست الكل " .."تحت امرك يا ست الكل" وكأنه سايس جراج وهي نازلة م العربية !

وواحد تاني ممكن يتعرف عليك وفجأة يبص في الارض مكسوف ..ايه يا عم هو انا شاكيرا قدامك ؟ ولا انا بعض يعني؟ ولا وشي ميتبصش فيه ولا ايه بالظبط يا جدعان ..بتبص تحت ليه يا عم ؟
وفي الشاب اللي يحسسك انك مشهور قوي ويقول "اه انا سمعت عنه" وكانك بتيجي في مجلة كابتن ماجد او انك صنف جديد نازل في الاسواق مثلا ..سمعت عني ايه يا عم ؟ شايفني تمورة ولا الهضبة قدامك ؟

والراجل الكبير اللي يديك نظرة امل في بكرة ويبصلك بصة امل كده ويقولك "تشرفنا يا استاذ" وكانه شايف فيك امل مصر الخمسين سنة القادمة وهو بيبتسملك الابتسامة دي وناقص يقول ححححح وكانه واكل نعناع علي راي بوحة !


واحد تاني بتاع تعارف الكلمة الواحدة زي مثلا يقولك اول ما يتعرف بيك "عمي" او "باااااشا" وكانه برضه شايفني بطربوش او اني اكبر منه كتير


اما ابن المبالغة التاني اللي اول ميعرفك يقول كلمتين "حبيب قلبي" وهو لسه عارفني من ساعة بس واضح اني عشان حاطط اكس تحت باطي ولا حاجة وده تاثير الاكس زي الاعلان

يمكن اكون اثرت عليه وفجأة بقيت حبيب قلبه..مع ان الاعلان ده ان الاكس كان بيجيب حريم مش رجالة بس واضح ان النوع ده مغشوش !

ولو واحد سياسي يقولك في اول تعارف "تمام تمام" كانه بياكد علي قرار خده مش واحد بيتعرف بيه..
وممكن واحد تاني متشيك كده ومدي الدنيا حقها يقول "جميل جميل" وكانه بيتحرش بيك اصلا مش بيتعرف بيك

وفي ابن المبالغة الكبير بقي بتاع "اجدع ناس" لو اربعة واقفين يقولهم كلهم "اجدع ناس" وهو ميعرفش مين اجدع ناس اصلا او هو اكيد معتبر نفسه برضه من اجدع ناس دول
ده الناس كلها جدعان يا جدعان امال مين الهفأ في البلد دي ؟؟



وواحد ممكن اول ما يتعرف بيك يضحك ويهز راسه وكاني اتشقلبت قدامه بس هي دي طريقة تعارفه علي الناس اصلا .

وممكن عم المشغول بقي قدام ماتش ولا حاجة لو لسه صاحبك بيعرفك بيه يقولك "طيب اقعدوا اقعدوا دلوقتي" ويرمي الفول السوداني في بقه ويبص ع الماتش وبعديني بقي يكملالتعارف بعد الماتش
وكان معرفتك جت في وقت ضايع او مجرد استراحة ...حاجة مش مهمة يعني م الاخر.

وواحد تاني يسلم علي ايدك كده وكانه بيحسس عليك او بيشوف في جلدك اذا كنت بشري ولا لأ زيهم..وواحد تاني بدل ما يلمس من بعيد كده وكانه قرفان لا يقعد يفعص فيك وكانه بيتعرف ع الناس من جسمهم مش من وشهم ..
ايه نظام التفعيص ده؟؟ امال بتتعرف ع البنات ازاي يا اخ انت ؟؟

وفي الناس الغير مهتمة اصلا لو تلاتة بيلعبوا كوتشينة وجه واحد جديد يقول "انا..." يقوله فجأة "طيب اقعد اقعد..هتلعب بمين" يعني هو عايز بس دراعات تلعب وخلاص مش واحدجديد يعرفه.

وفي بتوع "انا كان نفسي اتعرف عليك من زمان" وهو ولا يسمع عنك اصلا في حياته بس اهي تثبيتة حلوة منه

وفي بتوع المحققين الدوليين اما تقوله "انا." يقولك "ياراجل قريب محمود؟؟..ابن خال سعيد؟؟ وكنت مع سامح في الجامعة ؟؟؟"" يا عم ارحم امي اه انا كل دول في ايه انت عايزنيولا عايزهم ؟؟ اروح اجيبلك امهم وامشي انا ؟؟

وطبعا اكثر الانواع انتشارا هم جماعة "فرصة سعيدة" قبل مايعرف هي سعيدة ولا لأ بس اهو ذوق منهم يعني



يعني عندنا انواع تعارف كتير قوي في مصر لكن معظمها مبالغ فيها




Friday, November 19, 2010

الحـلـم إمـرأة لـها قـلبان





الحلم إمرأة ..لها يدان تدعو بهما أن تتحقق..
ولها قلبان ..قلب رجل يصر..وقلب إمرأة يسترها من اليأس..
فأنت لا تحقق بالحلم كيانك فقط..بل تحقق كيان الحلم..
فإن أوجدته..رد لك الجميل ونثر عليك زهره وصفاته كما وصفات السحرة..
لا تجعل من الحلم سندا لك..بل عش حياتك سندا للحلم وإبنا بارا له..

فإن مات في داخلك نور الحلم..فإدفنه في قلبك..فنور الحلم المقتول أفضل من ظلام اليأس المنتشي..
وتيمم منه لصلاة حياة ووجود..

فالبشر هم "الكلمة" والحلم هو "المعني"..وشوقنا للحلم شوق كلمة لمعناها..وشوق الحلم الينا شوق وجود الي واجده..
ولا تقل الحلم كبير جدا فهو يفتح ذراعيه كل صباح فقط كي تدخل بينهما ..ولا يكلفك عناء بان تفتح ذراعيك لكي يدخل بينهما..

فلا تجعل منه وسادة تهرب به لعالمه..بل اجعل من نفسك وسادة للحلم يهرب بها من عالمه لواقعك حين ينام..ومن خياله الي حقيقتك التي تتمناها حين يستيقظ..
ولا تتمني..فالأمنية هروب والحلم قدر..
ولا تجعل قدوتك بشر قد حلموا ..بل اجعل قدوتك الحلم ذاته..
فان هرب اليك الحلم كما إمرأة مبتلة من ليلة ماطرة الي بيت قلبك..فاشعل لها اليأس حطبا كي تتدفأ..وصب لها الجمال كاسا كي تهنأ..
وغطها بعباءة جسدك كي تهرب من خوف المطر..

ففي رحلة الدنيا لا تثقل ظهورنا حقائب الحلم..بل هي زاد يعين علي شقائها..فمن اثقلت ظهره الحقيبة فكيف هي الرحلة اذا !

واعلم ان الحلم ابدا لا يتم..فالحلم ناقص كما البشر..
فن انتهيت منه إبدأ بأخر..فقلبك يسع إمرأة قلب واحدة..والف إمرأة حلم..
فان وقفت علي خشبة مسرح الحياة..فاجعل الحلم هو الملقن وفاتح الستار والبطل الثاني..
او البطل الاول في حياتك ..ان ارتضيت بدور غير البطل..

الحلم إمرأة تجد فارس أحلام مختلف كل صباح بلا خيانة لكل فارس منهم ..
ولكن إمرأة الحلم تعشق كما يعشق الألف منا..
وتعانق كما تعانق السماء النجوم..
فإن كانت احلامك صوب نجمة منهم فأنت في اتجاه حضن السماء الاوسع والاكبر..
وان تكون فارس احلام جديد..

البشر ماء بحر تغرب فيهم شمس الحلم كل مساء وتشرق من اعينهم..
وما بين الشروق والغروب يبقي البشر في الماء الدافئ من شمس الحلم..
او في ماء بارد تنتظر الدفئ عند الغروب..

فهروبك من الاحلام يجعلك مطارد من ظلك ومن قرينك ومن ضلوعك..
تهرب من اشياء تملكك كهروبك من حلم تملكه..
وفي الحالتين لا هروب من امتلاك..ولكن يوجد امتلاك مع هروبك..
كي تصبح ظل لانسان طريد وطريد لظلك..

الحلم لحن واحد..
ولكن البشر الف اغنية والف كلمة تغني علي نفس اللحن..
فغدا ستسمع موسيقاه لتعزف الملائكة علي فيولين قلبك اعذب الاغاني..

واعلم ان الاحلام طيور ترقص فوق اغصان شجرة بناها قلبك ..
فان كسرت اغصانها طارت كالمجنونة تتخبط في ضلوعك وتؤلمك..
وهذا هو انتقام الحلم من قاتله..وانتقام الامل من اليائس..
فالأحلام ايضا تنتقم..
وتغضب..وتتألم..كما البشر..
فان المت حلمك جعل من وسادتك قاعة محكمة مسائية للندم وقاضيها الحلم وسجنها الحسرة..

فارهن ايامك للأحلام ..
واقترب من الحلم ومن يحلمون..
واحلم كانك تموت غدا ..
فنحن لسنا وحدنا في الحياة فمعنا الله والحب والحلم..


Thursday, November 18, 2010

مجلس "يا عزيزي كلنا لصوص


عايزين نشرة حقيقية واخدة حبوب صراحة لمجلس الشعب ولا كلام هجايص من بتاع النشرات اللي بتتوزع وتطلع في التليفزيون وخلاص؟ انا هاقولكوا النشرة الحقيقية الغير معلنة لكن الصريحة للانتخابات:


عزيزي الناخب ..اختي الناخبة..ان انتخابات مجلس شعب وصوتكم فيها امانة من اجل مصر ومن اجلكم..
وهي حق اصيل من حقوق المواطن واحد واجباته..
من اجل انتخابات شريفة نظيفة ومن اجل مستقبل افضل لمصر ..نهديكم بعض النصائح لاتمام العملية علي اكمل وجه باذن الله :


أولا: لازم تختار المرشح اللي هيمنجهك ويزبط معاك الامور ويفيش الهوامش واللي ممكن يقبل رشوة عشان يعملك اي حاجة .اي حاجة.انما المقفل بقي اللي هيقولك حلال وحرام ابعد عنه خالص لانه لو مشي بمنطق الحلال والحرام في مصر يبقي مش هيعمل حاجة خالص لان مصر الحرام فيها اتعمله اغنية من كتير ما هو منتشر


ثانيا: حاول تروح الانتخابات بدري عشان تلحق الناس اللي بتوزع الفلوس وشوف اعلي اجرة للصوت كام واتكل علي الله


ثالثا: اللي هيوزع برنامج انتخابي عليك يبقي هو ده الكذاب اللي مبيوزعش في مصر برنامج واللي معندوش رؤية اصلا هو ده اللي ممكن يعمل حاجة لاننا جربنا كتير قوي موضوع الرؤية والبرنامج والوضع زي ما انتوا شايفين


رابعا: المرشح اللي في ايده سبحة هو ده اللي مش هيعمل حاجة خالص لان صدقوني مافيش متدين ماشي بسبحته في ايده طول اليوم الا "مختار باشا " وامثاله


خامسا: شوف مين الافيد لمنطقتك مش مهم البلد مين اللي هيرصفلك البلد بتاعتك ويظبطها انما من اجل مصر والكلام ده كله في الهجايص فالانتخابات من اجل المرشح بس


سادسا: اوعي تصدق انه عشان اسمه مجلس الشعب انه بيكون لاجل الشعب هو اسمه الحقيقي مجلس مليونيرات الشعب والصوت معروف تمنه والمرشح معروف بيدفع كام للحزب


سابعا: حاول تتمحك وتلزق لاحد المرشحين وتجمعله اصوات وبتاع عشان ينوبك م الحب جانت بعد الانتخابات


ثامنا : بالنسبة لكل الشعارات اللي في الانتخابات خليك انت مع شعار واحد وفكك م الباقي "الفساد هو الحل" وخليك ناصح


تاسعا : عشان تحمي نفسك من بعض موجات الديموقراطية العالية حاول تشيل مطوة في جيبك او مسدس لو امكن او ازازة ملتوف لزوم الديموقراطية اللي هتحصل يعني


عاشرا: "ابدأ بنفسك اولا" و "من اجلك انت" و "مصلحتك اولا" هش شعارات حكومية اصيلة وعشان كده شوف مصلحتك فين وظبط امورك في المرشح اللي هيظبطك ان شالله حتي يكون مش هيعمل حاجة لغيرك خالص


حادي عشر: ابدا شوف مين مرشحين الحزب الوطني واختار بينهم انما طبعا بالنسبة للاحزاب التانية ولا تفكر فيهم اصلا واعتبرهم ناس جاية تهرج هم والاخوان لان مافيش غير حزب واحد في مصر والباقي طبعا خدام الست


ثاني عشر : يمكن المرشح ميظهرش تاني خالص بعد ما ينجح ولا يخدم حتي اللي انتخبوه ولكن متلموش هو ده بس مبدأ "انكار الذات" بس هو مزودها شوية في المبدأ ده


ثالث عشر: بالنسبة ل "كوسة المرأة" اللي طالعة في البخت فمش فارقة مين فيهم ينجح اصلا اذا كان الرجالة خاربينها يعني جت ع الستات ..اختار المزة وخلاص واهي تدي شكل حلو للمجلس



ودي بعض النصائح لكم ايها الاخوة والاخوات ..ويارب يعدي الانتخابات علي خير وعلي فلوس كويسة وبطاطين للناس