Thursday, October 25, 2012

الفرق بين أطفال زمن ماما نجوي واطفال زمن الواوا أح








الأطفال اختلفت كتير قوي عن زمان سواء في اجابة اسئلة او حتي الأسئلة اللي بيسألوها لأهلهم ودي بعض الاختلافات :


1- السؤال : مين هو سعد ؟
طفل زمان : سعد زعيم الثورة
طفل دلوقتي : سعد بتاع العنب


2- مين مصطفي كامل ؟
طفل زمان : زعيم مناضل
طفل دلوقتي : مطرب شعبي شديد


3- مين الحسن والحسين ؟
طفل زمان : شخصيات اسلامية عظيمة واحفاد الرسول
طفل دلوقتي : طعم ما يختلفش عليه اتنين


4- تعرف الملتوف ؟
طفل زمان : يعني ايه ملتوف ؟
طفل دلوقتي : اه بحضره مع بابا ساعات


5- طفل زمان كان بيسأل : هو انا جاي منين ؟
طفل دلوقتي : هو انا هاروح فين بعد ما اتخرج ؟


6- قول شخصية مشهورة اول اسم منها توفيق.
طفل زمان : توفيق الحكيم
طفل دلوقتي : توفيق عكاشة


7- سمعت عن الجدول الدوري ؟
طفل زمان : بناخده في العلوم
طفل دلوقتي : اه طبعا وبشجع مانشستر يونايتيد


8- ركبت الحنطور قبل كده ؟
طفل زمان : مرة ركبته مع بابا
طفل دلوقتي : وبتحنطر


9- قبل ما تنام بتعمل ايه ؟
طفل زمان : بشرب اللبن
طفل دلوقتي : الأستاذ ابو الليف علمني اني قبل ما انام في حاجات لازم اعملها .


10- بتقول لمامتك ايه قبل ما تنام ؟
طفل زمان : تصبحي علي خير
طفل دلوقتي : مساء الانوار


11- مين موسيقار الأجيال ؟
طفل زمان : عبد الوهاب
طفل دلوقتي : محمود العسيلي


12- انت بتحترم الكبير ؟
طفل زمان : طبعا احترام الكبير واجب
طفل دلوقتي : أكيد يعني ده عمدة المزاريطة


13- تعرف مين هي الست ؟
طفل زمان : ام كلثوم
طفل دلوقتي : الست لما


14- الطفل كان يسأل عن الحنية..
دلوقتي يسأل يعني ايه لجنة تأسيسية  !!


15- شخصية فنية محترمة تبدأ بحرف الألف
طفل زمان : أسمهان
طفل دلوقتي : السبكي


16- تعرف ابو فراس الحمداني ؟
طفل زمان : لأ
طفل دلوقتي : اعرف ابو وديع


17 - اجمل اغنية اطفال سمعتها ؟
طفل زمان : اغاني صفاء ابو السعود
طفل دلوقتي : بوس الواوا


18- طفل زمان كان بياكل رز مع الملايكة..
طفل دلوقتي بياكل ممبار مع الشياطين  .


19- تعرف مكان الدول علي الخريطة ؟
طفل زمان : بعضها
طفل دلوقتي : اعرف "الألماني" و"خالتي فرنسا" و"ماما امريكا"  !!


20- برنامجك المفضل ؟
طفل زمان : ماما نجوي وبقلظ
طفل دلوقتي : هزي يا نواعم


21- وفي النهاية خد كيس الشيبسي ده
طفل زمان : شكرا ياعمو
طفل دلوقتي : لا اصحي معايا متنامشي انا مباكلشي كرانشي  !




Saturday, October 20, 2012

هوليود..هروب وحنين الي الماضي..لعشاق السينما







الماضي في أفلام هوليود كان محور افلام كتير عظمية في تاريخ السينما ..سواء الماضي بذكرياته المؤلمة او الحنين الي الماضي او الرغبة في الهروب منه مهما كان التمن..

هنستعرض مجموعة من اجمل الافلام الشهيرة جدا اللي كانت محورها الموضوع ده وطالما اتكلمنا عن الذكريات والماضي يبقي اكيد هنتكلم عن الفيلم العبقري
Nuovo Cinema Paradiso
فيلم من اروع الافلام القديمة من سنة 1988  وبيتكلم عن طفل صغير اتعلق بالسينما من صغره وكان ليه صديقه شغال في قاعة العرض وتربط بينهم علاقة قوية جدا وكبر الولد ودخل في قصة حب
لكن مع بنت من عيلة غنية وزي كتير من العلاقات انتهت القصة نهاية غير سعيدة ونصحه صديقه الاكبر سنا انه يهجر المدينة تماما وميرجعش الا لما يكون ناجح جدا وفعلا ضحي بكل شئ حتي بسعادته وهجر صاحبه وامه وكل شئ والسينما اللي بيحبها عشان ينسي قصة الحب دي ويسمع النصيحة وميرجعش الا لما يكون غني وناجح وفعلا اتحقق الحلم ده ورجع بعد سنين طويلة جدا لقي السينما بتتهدم ومعاها كل ذكرياته القديمة  وصديقه العامل في صالة العرض توفي وكان اعز اصدقائه..
الفيلم بيبدأ بحاضر الشاب ده وهو كبير وبيبدأ في الرجوع لرحلة الماضي ويتذكر لما كان طفل وذكرياته الجميلة في بلده قبل ما يهجرها ..
الفيلم تقدر تقول انه من اروع ما قد تشاهد علي كل الاصعدة سواء موسيقي او اخراج او تمثيل ومن اكثر الافلام تأثيرا وعمقا وحزنا في نفس الوقت.


طبعا من اعظم الكلاسيكيات منقدرش نسيب الفيلم العملاق Citizen Kane  فيلم من سنة 1941  لكن فيلم عايش جوة كتير مننا لحد دلوقتي
تم تصنيفه من قبل علي انه اقوي فيلم في العالم وينافس دائما فيلم
Vertigo
المواطن كين فيلم من اخراج  المخرج القوي
Orson Welles
وده اللي اخرج الفيلم اللي اتكلم عن فساد في قطاع الشرطة اللي كان اسمه
Touch of Evil
والفيلمين مصنفين من اقوي الافلام علي imdb  من اقوي 250 فيلم .

الفيلم ماشي علي طريقة اسمها
chronological order
الطريقة دي زي اللي شوفناها في الفيلم الشهير
Memento

بيكون في طريقة عرض الفيلم اتجاه لعرض الحاضر وفي نفس الوقت اتجاه تاني في الفيلم لعرض الماضي بالكامل لحين التقاء الطريقين مع بعض في نهاية الفيلم ..وممكن كمان نعتبر الفيلم ماشي في اتجاه تاني شبيه بفيلم
Who's Afraid of Virginia Woolf?
بتاع الثنائي الهوليودي الشهير اليزابيث تايلور وريتشارد برتون الل كانوا مع بعض برضه في الفيلم القوي كليوباترا.

ووجه الشبه هنا انك بتكون امام الشاشة تبدا تتكشف الاحداث قدامك تدريجيا يعني كأن الفيلم بيبدا من النهاية وانت عايز تعرف ايه هي البداية وايه اللي وصل الامور لكده ودي في الأفلام بتكون قمة الاثارة والتشويق .
فيلم
Citizen Kane
من اقوي الافلام اللي بتتكلم عن الحنين الي الماضي البرئ..بعد ما تشوف قسوة الحياة وقمة المال والمجد لكن برضه نقصاك حاجة..نقصاك البراءة اللي كانت بتشوفها وانت طفل وبتشوفها في عيون الناس..الفيلم بيتكلم عن عملاق من عمالقة النشر والنفوذ السياسي بعد نسبه السياسي من جوازه لابنة زعيم وقائد سياسي ويبدا يدخل في قصة حب جديدة والقصة تنتشر عن فضيحته لحد ما يتجوز الحب التاني ده ويفتكر ان دي نهايته السعيدة لكن برضه ميلاقيش السعادة الكاملة معاها وتهجره ويموت وحيد ويدور الفيلم كله عن سر اخر كلمة نطق بيها وهو بيموت ويتضح في النهاية ان الكلمة دي كانت مكتوبة علي "زلاجة" كان بيلعب بيها وهو طفل وبتعبر عن شوقه للطفولة وقال المخرج نفسه في شرحه لنهاية الفيلم ان الحاة دي اسمها
transference


لو اتكلمنا عن افلام الماضي بخيره وشره من الأفلام المأخوذة عن قصص شهيرة جدا يبقي اكيد هنتكلم عن قصتين هما
Wuthering Heights
القصة الشهيرة للكاتبة ايميلي برونتي والفيلم الماخوذ عنها من انتاج  1939
وكمان فيلم
les miserables
قصة فيكتور هوجو الشهيرة والفيلم المأخوذ عنها انتاج سنة  1998

في الفيلم الأول بنشوف الماضي وذكرياته ورجوع الحب من الماضي مرة اخري بعد قصة حب قتلها الزمن ازاي الحب ده بيتجدد مرة اخري اما يعود مرة اخري
Heathcliff
اللي بيقوم بدوره الممثل الكبير
Laurence Olivier
يعود مرة اخري لصديقة طفولته وحبيبته  Cathy
اللي بتقوم بدورها الممثلة
Merle Oberon

يعود البطل والحبيب القديم من ذكريات الماضي بعد ما تكون اتجوزت ولكنه يرجع غني واقوي مما كان وكانه بينتقم من الظروف اللي خلته يخسر حبه الاول ولكن البطلة تكون اتجوزت ويبدأ يدب الحنين مرة اخري في قلبها وتموت علي ايديه في نهاية الفيلم من عذاب الحب في نهاية مؤلمة وحزينة جدا ..وهو من اروع الافلام الرومانسية .

في فيلم "البؤساء" اللي اتعمل كذا مرة طبعا لكني بحب نسخة  1998 بطولة "ليام نيسون" و "اوما ثورمان"
بيتكلم عن صراع بين بطل الفيلم
Jean Valjean
اللي كان محبوس زمان لكنه اصبح شخصية شهيرة جدا في المجتمع ولكن يعود محقق قديم عارف تاريخه كله ويواجهه بتاريخه ويحاول حبسه مرة اخري وهو الشرطي اللي اسمه
Javert
وطول الفيلم صراع ما بين الاتنين وهروب بطل الرواية وطبعا الفيلم ملئ بالدراما في احداثه ومنها رعايته لطفلة عاملة قديمة عنده ماتت ووصته ببنتها ورباها معاه رغم ظروفه الصعبة وكمان احداث ثورة تم قمعها في فرنسا من قبل النظام..وفي النهاية يعيش البطل حرا طليقا بعد انتحار المحقق .


فيلم الدراما واالمغامرات الرائع
hugo
الفائز بخمسة جوائز اوسكار من اخراج العبقري مارتن سكورسيزي ..ايضا يدور في نفس الفلك عن الماضي والهروب منه والرجوع اليه مرة اخري ..الفيلم عن نجم من نجوم السينما قديما ومن عمالقة انتاجه وهو شخصية
Georges Méliès
الذي يقوم بحرق اعماله بعد نجاحه الساحق قديما محاولا الهروب من هذا الماضي ويقابل الطفل الصغير هوجو اليتيم الذي يترك له والده انسان الي يحاول الوصول الي سره والحصول علي المفتاح الذي يحرك هذا الانسان الالي ويكتشف ان صانع هذا الشئ هو نجم السينما نفسه ويسترجع معه الذكريات القديمة عن اعماله السينمائية .


ونتحدث عن الفيلم الدرامي الرائع المبهر
Sunset Blvd
الفيلم من الخمسينات سنة 1950  وهو عن النجمة السينمائية القديمة التي تسمي في الفيلم "نورما" التي قامت بدورها الممثلة الرائعة
Gloria Swanson
وهي تعاني من العيش في نجومية الماضي من ايام الافلام الصامتة وتتناسي دائما ان شعبيتها قد انتهت تماما لدرجة ان خادمها يرسل لها رسائل معجبين وهي تظن ان الناس يتذكرونها حتي الأن وتعيش في نجوميتها الزائفة وتدخل في قصة حب مع مؤلف اصغر سنا وتحاول ان تأسر قلبه وتخطفه من حب فتاة في سنه الي ان تقتله في النهاية وتخرج امام الكاميرات والشرطة وهي تحضر نفسها كأنها ذاهبة الي فيلم جديد لها ..من اروع افلام العقد النفسية .


اما عن فيلم الرومانسية المذهل
The English Patient
فانا اعتبره افضل افلام التسعينات بلا منازع حاصل علي 9 جوائز اوسكار من بطولة رالف فينيس وجوليت بينوتشي .
عن ممرضة تحاول انقاذ حياة مريض حالته خطرة جدا ويحاول ان يسترجع معها ذكريات ماضيه  وقصة حبه الاليمة وكيف ماتت حبيبته وهو يحاول ان ينقذها ثم يطلب في النهاية من الممرضة ان تزيد له الجرعة كي يرتاح من عذابه بعد ان يتذكر القصة كاملة .
والفيلم يسير بطريقة "الفلاش باك" وهو يتذكر كل تفاصيل حياته..فيلم من اعظم افلام السينما.


وهناك الفيلم الدرامي
A History of Violence
حيث يتورط رب الاسرة في عملية انقاذ تجعل منه بطلا ولكن تكتشف الاسرة فجاة ماضي هذا الأب العنيف وغرقه في نزاعات وخصومات قديمة .
والفيلم تم ترشيحه لجائزتي اوسكار .

The Son of No One
فيلم من بطولة الباتشينو و تشانينج تيتوم ..حيث تقوم مجموعة بمحاولة النيل من شرطي وكشف ماضيه القديم امام الجميع اذا لم ينفذ شروطهم كاملة .

ونفس فكرة الفيلم تنطبق ايضا علي فيلم
Linewatch
حيث تطلب العصابة من شرطي كان معهم قديما العودة اليهم في عملية ولكنه يرفض وهنا تبدا بداية المشاكل في حياته لانه يرفض العودة الي ماضيه .


اما عن فيلم
On the Waterfront
الحائز علي 8 جوائز اوسكار بطولة النجم العملاق
Marlon Brando
فهو من اجمل واقوي اعمال السينما عن فساد النقابات العمالية القديمة ودخولها في حروب مع من يعاديها وقتلهم ويتورط البطل في احدي عمليات القتل ولكنه يقع في حب اخت الضحية ويعترف لها بذنبه ويحاول التطهر من ماضيه ولكن العصابة لا ترضي بهذا ويحاولون تصفيته بعد قتل اخوه ولكنه يثبت علي موقفه وينتصر في النهاية ويشهد في المحكمة علي زعيم العصابة نفسه بلا خوف ولا تردد.


فيلم
American History X
بطولة ادوارد نورتون هو من الافلام التي توضح لك كيف ينتقم منك الماضي ويحاول القضاء عليك حتي وان اعلنت التوبة عن اخطائك ..بطل الفيلم عنصري ونظم جماعة عنصرية تقتل وتسرق وتستحل اعراض الاجناس والاعراق الاخري في بلده لانه يراها هجرة دمرت بلاده بسبب مقتل والده في قصة قديمة من احدهم ولكنه يسجن في مرة ويتوب عن ماضيه ويحاول ابعاد اخيه عن نفس الطريق العنصري الخطير ولكن يتم قتل اخوه علي يد من عاداه قديما في مشهد مؤثر يبكي له الاخ الاكبر وتكون نهاية الفيلم الدرامية الحزينة .




هوليود مليئة من سنين طويلة بافلام عن الحنين الي الماضي والهروب من الماضي ايضا ..وفي كلتا الحالتين تحافظ هوليود علي رونقها وروعة افلامها وابداعها دائما .
وتبقي افلامهم عن الماضي.ماضي وحاضر ومستقبل يعيش في قلوب عشاق السينما وعشاق زمن الفن الجميل .

Wednesday, October 17, 2012

شـمـس وقمــر 37






** الرَجٌل لا يٌريْد إمرَأة تَبحَث فيْه عَن "الأمَان"
بل يُريدُ إمرَاة تَبْحث مَعهُ عَن "الحُب والإيمَان"


** لا تَخفْ..حتي وان فَشَلت فيْ البدَاية
فالخَوفُ من فَشَل البدَايَة..هُو بدَايَة الفَشَل .


**قَالوا " اضْحَك تَضْحَكلك الدُنيا"
والحَقيْقة هي "اعشَق تعْشقك الدُنيا"


** مَدرَستان في الهَجْر :
ان تَترُك الأمْر للقَدَر
او تَسْعي الي حَبيبَك مَرة أخْري بكُل طَاقتك
وكلا المَدْرَستين بلا مُعَلم  ..
يَبْقي الحُب هُو المعَلم الأوَل.


** من مَكر الانْسَان ..
إنهُ حَتَي حيْن يَتَجمل.. يقُول "سَأضعُ قنَاعا" !



** قَالت : حُبُك يُعَذبني ..
قلتُ لهَا : اما انَا ..فحَتَي عَذَابي يُحبُك  !



** المَرأة تَسأل في شجَارَها معَ مَراة مثْلها  "مَن الذي بَدأ" حَتي يُصْبح اعتذَارها بكَرامة..
اما في الحُب فتَسأل "مَن الذي أنهاه" كي يُصْبح رَحيلهَا بكَرامة..
فهي دَائمَا تَجد في الأعذَار حَياة جَديدة .



** جَمَال العَاشق انهُ يَري نفْسَه "عشْق القَدر"
وليس فَقط انهُ  "قَدَر العشق" .



** الرَجُل يَتألم مَرتَين :
عندَمَا يَنزل عَن عَرشه امَام عُيون إمْرأة..
وعندَمَا تَصعَد هي عَلي هَذا العَرش بكَعب حذَائها للمَرة الأولي..
وفي الحَالتَيْن يَكُون "الألَم اللذيذ" .

** القَوي يَسأل "كيَف تُريدها"
والضَعيف" كَيفَ سافعَلها"



**الكَلمَات دائمَا تلمسُ الجرَاح ونَادرا مَا تُعَالجها ..
ولذلك تَسمَع دائمَا جُملة "جيت علي الجرح"



** قُلوبنا مَرسُومة في قَاع الفنجَان
الحلمُ يَشْربه ..
والحُب عَرافة تَقرأه .


** لن نَكون أبَدا اقوَي من القَدر ..
ولكن نَسْتَطيع بقُلوبنَا ان نكسَب تعَاطفه عَلي الأقَل !


** الحُب لا يؤمن بشَرف المُحَاولة..
الحبُ يُقَرر ..لا يُحَاول..
فطَعنَته الأولي هي الأخيرَة .



** قَالت : أحيَانا أشعُر انك تَعيش في عُيوني
قلت : رمشَك "بَسمَلة" تَحفَظني وقَلبي في عُيونَك أية نُور ..



** يَفقد الرجُل نصف رَاحته حينَ يُحب..
ويفقد نصفَ قَلبه حينَ يَهْجر..
ويفقد كل عَقله حينَ يَتَزوج !



** من يُؤمن بالحُب الثَاني..
هوَ نَفسَه مَن يَري الحُب مُجَرد "تَجربة حيَاة".
مع ان الحُب حَياة كَاملة..


** الحَاكم العَادل يَقفُ امَام الشاشات ويُعلن "ظهُور الحق"
بينما الحَاكم الفَاسد كل ما يُطَالب به عَلي الشَاشات هُو "ظهُور وجهه"



** الحُب أعمَي..
ولكنَ الله يُنير طَريقَه الي قُلوبَكم .


** قَالت : هَل أحضَرت لي تلكَ الزَهرة ؟
قلتُ : هي ليسَت لك تحديدَا..هي شَاهد كيوبيد عَلي مَا تفعَله بي عَينيك !



** الوُعود كمَا الزُهور..
اذا ذبَل وَعد فَلا تُحَاول احيَائه مَرة أخرَي..
فالوُعُود النصفَ مَقتُولة لا تَتَحقق..



** لأننَا لا نَعرف أين يَضْربنا الحُب تَحديدا ولكنهُ يَتَفلت في أجسَادنا..
ولذلك دَائمَا يقُول العُشَاق "احبُك من الوَريد الي الوَريد"



** قالوا كيفَ لا تأمَن لهذا..انهُ مَلاك..
قلتُ : لا أأمن لبَشري بجنَاحين ..ولا لمَلاك يَمشي عَلي قَدمَين..
فالخداعُ دَائما يَأتينا بفُستَان السَهْرة !!



** الأرواحُ لهَا ثَلاثة حَالات :
في الصَدَاقة تَجْتمع..
في الارتيَاح تتَرقب..
في الحُب تَتلاشي..وتُصبُح واحدة..



** قَالت : هَل سَتُمطر الأن ؟
قلتُ : كَيف اشعُر بالمَطر وانا امَام فُصول الحُب الأرَبَعة ..

Sunday, October 14, 2012

الحرق بالجاز في ليالي الجواز..الجزء الثاني والعشرون..جوزي مدمن فيس بوك






سعيد من بعد ما عمل الاكونت علي الفيس بوك وحياته اتغيرت تماما..كان في الاول عمره ما اقتنع انه يعمل كده لكن اصحابه اقنعوه انها فكرة جامدة وفعلا سمع نصيحتهم لكن جت علي دماغ الكل في الأخر وحياته اتلخبطت جدا لانه بقي مدمن فيس بوك وبقي لازم ياخد الجرعة اليومية ويمكن كل دقيقة كمان ومعادش بيقدر يقوم من عليه :



وفي منزل حماته :

سمية : مش قادرة يا ماما خلاص سعيد اتجنن رسمي من الفيس بوك .

ام سمية : انا يا بنتي اعرف دكتور مسالك كويس

سمية : مسالك ايه يا ماما ؟؟ ده موقع ع الانترنت بقي بيقعد عليه طول النهار ومبيقعدش معايا طول اليوم واهو جاي دلوقتي وهتشوفي بنفسك ايه اللي بيحصله اان مش قادرة اعيش معاه خلاص.


ويرن جرس البيت :

ام سمية : اتفضل يا سعيد يا حبيبي ازيك ياخويا ؟

سعيد : it's complicated

أم سمية : لا حول ولا قوة الا بالله يا ابني ده واضح ان موضوع الفتيس ده مأثر عليك

سعيد : فتيس ايه ؟؟ كنتي عايزاني في ايه يا سمية ؟

سمية : انا حامل يا سعيد

سعيد : وااااو حامل ؟ لايك..لايك

ام سمية : انت بتعمل ايه بصابعك علي بطنها يا ابني بتزغزغها ؟

سعيد : لا يا حماتي انا بعمل لايك بصابعي عليها

ام سمية : وماله مايضرش يا ابني المهم تكون مبسوط

سعيد : الا مبسوط يا حماتي ده انا طاير من الفرحة خدي ال "بوك" دي ..اوووعي

ام سمية : لا بغير يا ابني من البوك بتاعك ده اللي معرفوش..

سعيد : بتغيري يا حماتي.؟ لول..وميت لول عليكي

ام سمية: ربنا يشفيك يا ابني واضح ان الموضوع كبير

سعيد : بتقولي حاجة يا حماتي ؟

ام سمية: لا يا ابني بقول ربنا يسعدك

سعيد: انا كده يا حماتي  اقدر اغير صورة البروفايل بتاعتي واحط اي صورة اطفال وكده يعني واكتب استيتس جديدة النهاردة اني بقيت اب

ام سمية : دي حاجة تبع السونار يا حبيبي ؟

سمية : لا يا ماما دي حاجة تبع الجنان الرسمي اللي انا عايشة فيه ..

ام سمية : ربنا يشفيك يا حبيبي




وبعد تدهور الحالة بعد سنتين :

طبيب نفساني : واضح ان الحالة خطيرة مضحكش عليكي يا استاذة سمية ودي الظاهر انها قلبت بحمي ونزلة فيسبوكية حادة ومزمنة
 حاولي تبعدي عنه الكمبيوتر فترة لانه بالطريقة دي كام شهر وهيكلم نفسه في الشارع

سمية : حاضر يا دكتور بس وطي صوتك هو جاي علينا اهو تاني

سعيد : خد يا دكتور النتيجة دي بتاعة المكتب بتاعي "انشرها ولك الأجر"

سمية: شايف يا دكتور اهي دي من جمل الفيس برضه واضح ان الحالة مستعصية قوي

الطبيب : استاذ سعيد انت حضرتك بتقعد كام ساعة علي الفيس يوميا ؟

سعيد يتقمص دور الشيخ حازم صلاح ابو اسماعيل  : "أنا سعيــد انك سألت السؤال ده"

الطبيب : ايوه يا سيدي يعني كام ساعة تقريبا ؟

سعيد : بسيبه ساعتين واقعد طول اليوم..ما تضيفني حضرتك عليه

الطبيب : طيب ممكن تقلل الوقت شوية لان كده غلط عليك

سعيد : لا يا دكتور اسمع مني الكومنت ده

الطبيب : اتفضل يا سيدي قول الكومنت

سعيد : انا ورايا الف جروب وميت ارض مزروعة ازاي عايزني اسيب كل ده ؟

الطبيب : حضرتك شغال في الاراضي ؟

سمية : لا يا دكتور هو فعلا شغال في الاراضي بس هو يقصد المزرعة السعيدة للأسف

الطبيب : المزرعة السعيدة ؟

سعيد : ايه الهبل ده اسمها فارم فايل

سمية : معلش يا سيدي مغلطناش في البخاري

الطبيب : وده أثر علي شغله كمان اكيد

سمية : طبعا يا دكتور ده راح للعمال وقالهم انا عايز الزرع يطلع كل عشر ساعات بأي طريقة تخيل ؟؟

الطبيب : اشمعني كل عشر ساعات يعني ؟

سمية : زي اللعبة الزفت اللي بيلعبها يا دكتور وبدا يزين المكان كله بتكاليف ملهاش لازمة ويقول عشان الارض تبقي منظرها حلو والمزرعة تبقي جامدة

الطبييب: لا ده كده الحالة فرطت خالص

سمية : تخيل يا دكتور انه وهو نازل الصبح بيسيبلي ايه علي التلاجة ؟

الطبيب : ايه ؟

سمية : بيسيبلي ورقة فيها ملحوظات ومكتوب عليها
notifications

الطبيب : يا ساتر

سمية : ده بيعزمني علي العشا من مكتبه ويعملي
event
بدل ما يكلمني علي التليفون !!

الطبيب : وقدرتي تستحملي ده كله ؟

سمية :لا والادهي من كده ان اي زوج بممكن يهدد زوجته بالطلاق في حالة الخلاف الكبير انما المحروس هددني مرة بعد خناقة كبيرة انه هيعملي ""بلوك" !!!

الطبيب : وعملك بلوك ؟

سمية : لا صالحني وجابلي هدية

الطبيب : طيب دي حاجة ممتازة

سمية : لا هدية علي الفيس بوك صندوق بيطلع فيه حظك ايه.. لعبة يعني

الطبيب : يعني حتي الهدايا بقت ع الفيس ؟

سمية : ده مرة ادي فلوس للشحات وقاله خد "الجيفت" دي وانت وحظك !! طبعا الشحات تنح

الطبيب : قال للشحات "جيفت" ما هو لازم يتنح طبعا

سمية : مرة قاللي هاجيبلك دهب ..لقيته باعتلي دهب وبترول في اللعبة وقالي مبروك يا حياتي !! ومرة جيت اديله بوسة ..قالي ابعتيهالي علي الوول ع الفيس  !!

الطبيب : بصي يا استاذة سمية الحالة مستعصية قوي بس هنحاول فيها ..ياريت تحاولي تبعدي عنه الجهاز فترة اسبوع علي الاقل حتي مهما كانت الاعراض عليه بس لازم يبعد فترة..



وبعد مرور اسبوع :

سعيد "متقمص دور احمد مكي" :  يا سمييييييييييية..عايز الفيس بوك حالا لاما هارتكب جريمة ..

سمية : لول

سعيد : لول ؟؟ انتي اتعديتي ولا ايه ؟ هو فيروس في الجو ؟؟

سمية : انا سعيدة انك سألت السؤال ده..ممكن أعمل "كومنت" ؟

سعيد : لا حول ولا قوة الا بالله ..ايه اللي حصل يا حماتي لبنتك ؟؟

ام سمية : هي يا ابني قعدت طول الاسبوع متواصل علي الفيس زفت ده وهي حرماك منه ادمنته هي وجاتلها الحالة

سعيد : يعني اخف انا تجيلها هي ؟

ام سمية : دي جت كمان لابوها وماشي يقولي خدي "البوك" دي ويزغزغني ..

سعيد : ده الموضوع معادش يتسكت عليه بقي..وادي الكمبيوتر كله بووووووووووووم طررررررررراخ..




وبعد فترة وفي سبوع طفلهم الجديد :

رجع الادمان تاني لكل الاطراف لدرجة انهم كتبوا كارت السبوع بالشكل ده :

notification :

اسمع كلام امك ..ما تسمعش كلام  أ "poke"
lol  علي كل الحاضرين

  

Thursday, October 11, 2012

مولاتــي..سيدة الممــالك الأربعـة






أكتبُ كَلماتي عَلي ضوء شُمُوع..
كي تَبقَي عَلي نصْف ظَلام يشْتاقُ الي نُور عَينيها..
كي تتعانقُ كَلماتي معَ هَدهدة الشَمْعة ورهْبة الظلام .

أسَافرُ  في مَكاني بالقَلم فيْ كُل زمَان ..
واجعَلهُ ريشَة عُود وسطوري أوْتار..
كي أجمعُ لحْن أنُوثتها مَع لحن حروْفي وتَبدأ حَفلة رَقص كيوبيد مَع نَبضي ..

سأسَميها مَجازا ً "سيدةُ المَمالك الأربَعة" ..
مَملكةُ الجَمال والرقةُ والأنوثة والسحر...
قالوا : هل هَذا الاسمُ حَقيقي ؟
قلت : سأقولُ كمَا الأفلام "ربما تَشابهت بَعض تفاصيْل الوَصف مَع الواقع" ..
ولكنها أكبرُ منْ أي وَاقع ..وأعْظم من أي حلم..

هي..
مُخضبةُ بدمَاء وبَصَمات الزَهر عَلي جَسَدها..
حين يحجُ الياسَمين اليهَا ويرفعُ القَمر عبَارة "عشقُ مَبْرور" ..

 فوَاحةُ سُبل للتَائهين..
ولا سَبيل منهَا الا اليهَا ..
ولا طريقُ لعَينيهَا الا عَلي اجْنحَة الفَرَاشات أوْ مَوكب أحْلام ومَجَاذيب غَرام ..

"كلاَسيكية" النَظْرة والهَمْسة..
"فاجُومية" في جُنونها وعُنفوَانها..
"نزَاريَة"  في رقَتها وسحْرها..
وكأنها رَوْح الشعْر حينَ تَغرق"بُحوره" فيْ أبديَتها ..

أنَا وهي "قصَة حُب"
ولكني "القصَة" فَقط..وهيْ "الحُبُ" ذاته..


تَزور في عَينْيها "نهرَ الغَفْران"
تَتطهَرُ خَطايا قَلْبك بالجَمَال..
والقُبْحُ فيكَ بالحُسْن فيهَا..
ويكونُ قَلبَك بَعْدها "العَارفُ بالله وبالحُب"
ويظلُ وجْهَها "العارفُ بالجَمَال"  !


شَفتاهَا سرير للقَمَر..
حينَ يَعُود مُصَابا ًكُل ليلة من النُور الصَارخ فيْ شُرفتَها ..
وعَيناها أكْسيرُ للجَمَال..
يُدَاوي به غيرتهُ
وينتحرُ به عَلي جَسَدها ويكتبُ عَلي قَبْره "هُنا وُلدتُ وهُنا أرقدُ فيْ سَلام" !

ليْسَت تلميذة الرَوْعة..
بل تُقَلدُها الروْعَة..
 وتُصبحُ مثل ابنَتها التيْ تُقلدها حَتي في وَضْع المكياج فيْ شَكل عَبَثي أمَام المَراة كَمَا الاطْفال..
فَتَحتضنها فيْ شَفَقة..
ويَكاد يَنفجرُ القَلب فيْ وَهَج مَشْهد لا يُصَدق.. ولا تَعْرفُ هَل هُو "دراما" "أم كُوميديا عشْق سَوداء" !
ويَبْقي مَشهد للتَاريخ فيْ عَينيها ..لا "فنُ سَابع" او ثَامن..
بَل هي "الفَنُ الأوَل" ..

حينَ أراهَا..
يُصْبحُ جَسَدي جذْع شَجرة..
تكتبُ رُمُوشهَا فَوْقي "للذكْري الخَالدة"
وتظلُ الحيْرَة فيْ عَقْلي بينَ "خُلود الذَكري"..و "ذكرَي الخُلوْد" فيهَا..

حينَ أرَاهَا..
لا يكونُ لقَائَنا وجْه لوجْه كأي لقَاء..
بل يكونُ قَلبْا لقلْب..
روحا ًلرَوح..
عَقل لعَقْل..
جُنون لجُنون..
ولا تَعْلم رَوْحي بأي أرْض تَمَوت فيهَا..
ولا تَعْلم بأي أرْض تَعْشق..
فأينَمَا أكونُ أمَامَها.."يُدركُني العشْق" ..


حينَ أراهَا..
تلتفُ "نُون النسْوَة" حَوْلَ رَقَبتي كَطَوق الاعْدَام..
وتُحَالُ أوْرَاق عشْقي اليْ القَمَر..
ولا حُكمُ الا قَتْلي بصَاعقَة النَظَرات والهَمَسات..
ويظلُ قَلْبي مُسْتسلم للقَضَاء والقَدَر..
قضاء عينيها وحسنها وقدر السماء والحب ..

قالوْا انَ "الصَمْتُ فيْ حَرم الجَمَال جَمال"
ولكن الصَمْت فيْ حَرم جَمَالها تقديْس ورَهْبة..
تَشعرُ مَعهَا برَوْعة الخَوف..وفيْ نَفْس الوَقْت الخَوف منَ الرَوْعة ..

حينَ تَراهَا ..
تَشعرُ انكَ وَصَلت لسدْرة مُنْتهَي الجَمَال..
وصلتُ لأعْمَق دَرجَات فلسَفة الجَمال..
وصلت لسَبب خَلق الله للجَمَال..
ومَا أقوَي وأصْعَبُ أنْ تَصل بضَعْف أدَميتك وانْ تَقفَ فيْ حَضْرة الجَمَال بذَاته..
لوْ كَانت فيْ زَمَن الاغْريق لمَا تَحدثوا عنْ الهَة الجَمال..
ففي حُضُور عَيْنيها تَخرُ الهَة الاغريق صَريعَة وعَاشقَة..
وفي عَيْنيها..تَنْتحر "فينُوس"  !


حينَ اقفُ بينَ يَديهَا..
أنظرُ الي السَمَاء..
أنتظرُ سقُوط تُفَاحة أدَم..
فالأن أنا أسقُط منْ جَنتي الي جَنَة عَيْنيها..
وانا امَامَها الان فيْ لحظَة سقُوطي منْ جَنة واقعي الي جَنَة خَيَالها وحُسْنها..
سقطتُ..ومَازالت يَدي مَمْدوُدة الي الشَجَرة لأقطفَ تُفَاحة أخيْرة
تخْرجني منْ عَذاب جَنْتها..


 سيدةُ المَمَالك الأربَعة..
لا سَيْف لي ولا سُلْطان..
ليسَ لي الا عَذَاب عَيْنيك والف سَجْان..
ليسَ لي الا مَزَامير عشْق ترَاقص فيْ عَقْلي الف شَيْطان وجَان..
ليسَ ليْ الا كَأسي وبضْع حكايات هَوَي..
وخَنْجر اتَسَلق به عَلي كُحْل عَيْنيك واسقطُ "شَهَيد غَرَام"..
سأقفُ امَام عَيْنيك كمَا الشَحَاذ أقُول بصَوْتي :
 "اعْطيني ممَا أعطَاك الحُب"
"اعطيني ممَا اعطَاك الجَمَال"
"اعطيني ممَا اعطَاك الخُلود"..
لله درك أقفُ سَاعَات ومَا اخَذت منْك شَئ ..
لأني حيْن أقف أمَامك..أكون مَلكْت الدُنيا وما فيهَا ..

دعيْني اصنعُ للشَمْس ردَاءا منْ حُمْرة خَجَلك..
وأصنعُ للقَمر وسَادة منْ نُور طَلتك..
واصنعُ لكيوبيْد نبَيذه المُفضل من دمُوعك..


دعي الايَام فيْ أصَابعي كمَا الخَاتم السحري..
كلما مَسَحت الخَاتم رأيْت أيَامي تَتحني بعَينيك..
وتعودُ سنيْني كمَا أمْواج البَحْر ..
لتشْرق منْهُم شَمْس جَمَالك..
وتغربُ فيهُم ألحَان ليْلك ..


دعيْني اخْلق منْ حُروف اسْمك سَيفا أغْزو به كُتُب الشَعْر..
وطَوْق نَجاة كي لا اغْرَق بينَ حُرُوف "الحَاء" و "البَاء"
وأفتحُ ذرَاعي ما بينَ طَرف الدُنْيا وطَرف فُسْتانك..
فأكون حضنت العالم أجمع ..


دَعي بَرائَتك تَحْضنُ طُفُولتي..
لتعيدي الي نَبْضي "بَرَاءة الطفُولة"
وتعيدي الي العشْق "طُفُولة البَراءة " المَفْقودة ..

دعي "بَنَات" أفْكَاري..
ترتبُ لكي سَريْرك..
وتغزلُ خصَالَ شَعْرك عَاج وعَسْجد..
وتخيطُ لكيْ فَسَاتينك من حَبَال القَمَر..
وتبحثُ فيك عنْ حلمي الغَارق كمَا سَفينة "تايتنيك" ما بَين ضلُوْعك..


كونيْ نبُوءة ولوْ حَزينَة فلَنْ أبْكي..
كوني وَحْي السَمَاء الي صَدْري ولنْ اصيحَ ألمَا.ً.
كوني أحْزَان شكْسبيرية عَلي قَلَمي..
حركي الغَابَات تُعْلن هَزيمتي امَامك..ولنْ اصْرُخ كمَا فَعَل "مَاكْبث"
ولن اقوْل كَما قال هَامْلت "اكونْ او لاَ اكون"
بل ساصيحُ "تَكونينَ فيْ قَلْبي أوْ لاَ اكُون"


"سَيْدة المَمَالك الأرْبَعة" ..
في غسَق رَحيْلك..
دَعي صبَايا بينَ يَدَيك
وشَبَابي بينَ نَبَضَات قَلْبك
وشَيْخوختي بينَ خصَال شَعْرك..
فاذا ما رَحَلتي تَبَقي لي جَسَدي النَحيْل..
واذا مَا عُدتي..عَادوا جَميعَا ..رجُلا جَديدا..وأمَلا جَديدا..وأدَم جَديد..

Monday, October 8, 2012

مبارك ونظامه..سنوات من الفساد بالأرقام







"قوة الشعب مثل الشمس..لا أثر لها اذا تفرقت اشعتها وتشتت ..ولكنها تعمل عملها اذا تجمعت وتكتلت ونظمت "

توفيق الحكيم



ساعات بستغرب قوي من بعض كلام الناس عن مبارك كأنه فعلا كان رئيس له تجربة رائدة بل ان البعض بيدافع عنه علي اساس انه كان في عدالة "عمر بن الخطاب" والناس مش واخدة بالها مثلا !!!..
او ان مصر كانت من اعظم دول العالم واحنا مش واخدين بالنا..مش شايفين تقييمات مصر في اي استطلاع سواء من الاكثر فسادا او الاقل شفافية او علي مستوي الجامعات كان ترتيبنا فين ..

ناس كتير بتحاول تقلب الحقائق وتدافع عنه باستماتة وكانه فعلا "أب" مش رئيس طبعا عندنا احنا فقط في دول العالم الرئيس اب انما في اي دولة بيتم توجيه نقد له وبيتعصر في الاسئلة زي ام بيحصل في اي انتخابات برة والناس بتحرجه بوابل من الاسئلة في كل الاتجاهات والنشاطات لدرجة حتي اسئلة عن هيعمل ايه لخدمة الحيوانات لو مسك رئيس او جمعيات حماية الحيوانات للناس اللي بتدافع عنهم باستماتة او نجوم زي باميلا اندرسون اللي بتدافع عن الحيوانات كأنهم قرايبها بالظبط .

دلوقتي بيظهر ناس كتير ومنهم لميس جابر تدافع باستماتة عن كل ما هو مباركي لدرجة انها في اخر حوار ليها علي قناة المحور كأنها مش عاجبها اي حكم وبتقول كل الناس دي المفروض مكانتش تتسجن وحاجات من النوع ده وتتحجج بقراءة التاريخ !!

مش عارف من امتي كانت قراية التاريخ حافز للدفاع عن الطغاة !!! شئ مش منطقي وغريب جدا والمذيعة احرجتها اكتر من مرة وقالتلها ازاي ده في منهم خد احكام بالفعل ترد وتقولها "اي كلام"

الفكرة في لميس جابر وكل اللي بيتكلم علي طريقتها ان خلاص "سبق السيف العذل" يعني هم حتي لو عرفوا وتيقنوا بالأدلة ان مبارك ونظامه فاسد تماما ومسرطن بالفساد برضوا هيفضلوا يدافعوا زي ما تقول نوع من العناد او "المقاوحة" يعني مستحيل بعد دفاع كل الفترة اللي فاتت دي فجاة يتقلب موقفه تماما ويطلع انه كان غلطان ووجهة نظره كلها فاسدة فهيفضلوا يدافعوا ويقاوحوا حتي لو كل الناس عرفت الحقيقة كاملة وبانت زي الشمس .


وهأذكر بعض النقط عن الفساد المالي في عصر مبارك طبعا من غير ما نتكلم عن الفساد في التعليم والصحة والمرافق وغيره من الوف الحاجات اللي انتوا عارفينها لكن هنتكلم عن شوية ارقام واحكام واخبار من الجرايد هي بمثابة فضيحة لمبارك وحاشيته الفاسدة :



1-  لنقرأ الخبر ده بعناية وتدقيق ..خبر بيقول :

كشفت هيئة '' الأمن القومي '' بالمخابرات العامة بعد إجراء التحريات عن الرئيس السابق محمد حسني مبارك وأسرته أنه أسس مع رجل الأعمال الهارب حسين سالم ومنير ثابت شقيق زوجته شركة ''وايت وينجز'' بالعاصمة الفرنسية باريس للإتجار بالأسلحة.
وذكرت المخابرات العامة - حسب عدة تقارير صحفية - بأنها قامت بفحص البلاغات التي قدمت إليها والبالغ عددها نحو 19 بلاغا في القضية رقم 1 لسنة 2011 والذي يباشر التحقيق فيها المستشاران عاشور فرج واحمد حسن المحاميان العامان بالمكتب الفني للنائب العام حيث تواصل النيابة العامة تحقيقاتها في وقائع الفساد المثيرة للرئيس السابق وعائلته

ورصدت التحقيقات من خلال تلك البلاغات مجموعة من التهم في حق الرئيس السابق محمد حسني مبارك تتمثل في بلوغ ثروة مبارك 70 مليار دولار بالبنوك السويسرية والبريطانية والأمريكية وأنه قام بتهريب معظم أمواله عن طريق مجموعة ايكوتريد المصرفية بسويسرا.
وذكرت التحقيقات أن مبارك قام بفتح حساب مصرفي ببنك باركليز الدولي لصالح المدعو بيتر اسكويرتيد  قائد القوات الجوية السابق بسلاح الجو الملكي البريطاني ومدير مصرف المركز الخليجي،

حيث قام بتفويض الأخير بإيداع جميع ودائعه البنكية بمجموعة ايكوتريد المصرفية.
و بتاريخ 25 يناير 2011 حول مبلغ مالي يقدر بحوالي 50 مليار جنيه مصري بأسماء مستعارة بخلاف امتلاكه ثروة عقارية بمصر تقدر بمبلغ 35 مليار جنيه تم جمعها نظير استغلال نفوذه وهو أسرته.



2- حتي اموال الزلازل لم تسلم واتحقق مع مبارك في اتهامه بالاستيلاء علي اموال الزلازل .



3- مبارك استولي علي اراضي لهيئة الثروة السمكية والخبر المنشور بيقول :

قال محمد فتحى عثمان ، رئيس الهيئة العامة للثروة السمكية ، في اقواله امام جهاز الكسب غير المشروع إن الأراضي البالغ مساحتها 119 فدانا تتبع هيئة الثروة السمكية وانها كانت مخصصة للمنفعة العامة , غير انه جرى توزيعها على الضباط الطيارين أعضاء الجمعية دون وجه حق.
وأوضح عثمان أن الرئيس السابق حسنى مبارك أصدر قرار جمهوريًا باستقلال الهيئة ، حتى يتمكن من الاستيلاء على أراضيها بمعاونة أركان النظام البائد.



4- من البجاحة ان سوزان ثابت تطلع وتتهم بنوك سويسرا بنهب 240 مليون دولار من اموالها ده بدل ما تداري علي فضيحة المبلغ الضخم ده اللي طبعا عارفين هي جابته منين .



5- جمال زهران حسب تصريح ليه بيقول :٣٣٤ مليون دولار في بنك القاهره باسم سوزان مبارك



6- اما عن فضيحة التبرعات وسرقتها كمان يعني حتي فلوس التبرعات والخير بتتسرق ..هتلاقي خبر بيقول :

كشفت مستندات ومخاطبات رسمية بين وزيرى الصحة والمالية بالنظام السابق، ومسؤولى البنك المركزى، عن أن سوزان ثابت، زوجة الرئيس السابق حسنى مبارك، جمعت تبرعات من جهات خارجية وداخلية، بملايين الجنيهات لصالح مرضى الفشل الكلوى، وأنها أودعت تلك الأموال فى حسابات سرية خاصة بها فى بنوك مصر الدولى ومصر لتنمية الصادرات والأهلى المصرى.

وبينت المستندات والمخاطبات، التى حصلت «المصرى اليوم» على نسخة منها، أن «سوزان» جمعت تلك التبرعات قبل وبعد عام 2006 دون الحصول على موافقة من وزارة الصحة، وأنه فى عام
2009 خاطبت وزارة التضامن الاجتماعى للحصول على تصريح بجمع التبرعات. وأوضحت المستندات التى تلقتها نيابة الأموال العامة للتحقيق فيها أن المسؤولين فى وزارتى الصحة والمالية، خاطبوا محافظ البنك المركزى لاستثناء حسابات زوجة الرئيس السابق من ضمها إلى البنك كباقى الصناديق الخاصة بالوزارات والهيئات الحكومية، ووافق محافظ البنك على ذلك.

وأفادت بأن يوسف بطرس غالى، وزير المالية الأسبق، أصدر قراراً بوضع جميع حسابات الصناديق الخاصة بالوزارات والهيئات الحكومية وكذا الحسابات الخاصة بالتبرعات، فى حساب «الخزانة الموحد» بالبنك المركزى، وهو ما أثار غضب «سوزان»، ورفضت تطبيق القرار على حساباتها الخاصة، وأصدرت تعليمات ـ بحسب الخطابات المتبادلة بين مسؤولى الوزارة ـ بموجبها أرسل ممتاز السعيد، وزير المالية الحالى، وكان وقتها رئيس قطاع مكتب الوزير، خطاباً إلى نبيل عبدالعال، وكيل محافظ البنك المركزى وقال فيه: «إلحاقاً لكتبنا لسيادتكم بشأن فتح حسابات جديدة بحساب الخزانة الموحد، وحيث ورد إلينا كتاب السيد الأستاذ رئيس الإدارة المركزية لشؤون الأمانة العامة بوزارة الصحة والسكان والذى يشير إلى أنه توجد حسابات تبرعات خاصة بالسيدة الفاضلة حرم رئيس الجمهورية بالبنك الأهلى المصرى، وبنك مصر الدولى وبنك مصر لتنمية الصادرات، وأن أرقام هذه الحسابات معروفة لدى جمهور المتبرعين ويطلب سيادته الموافقة على استمرار العمل بهذه الحسابات فى البنوك التجارية المذكورة أعلاه، وذلك حفاظاً على استمرارية التبرعات، وفى هذا الصدد أتشرف بالإحاطة بأنه نظراً للاعتبارات التى أبداها السيد وكيل وزارة الصحة، فإنه من الرأى أن يستمر العمل بهذه الحسابات فى البنوك التجارية المذكورة على النحو المعمول به حالياً. وتفضلوا بقبول فائق الاحترام»، وحمل الخطاب توقيع «السعيد» وخاتم شعار الجمهورية بتاريخ 19 ديسمبر 2006.






7- من اهم اعوان مبارك كان احمد عز في لجنة السياسات واللي ثبت خلاص بالدليل القاطع فساده وتورطه في جرائم مالية وغسيل اموال مش عارف ازاي لسه في ناس بتقول اصل مافيش ادلة علي فساد النظام .. وكان الحكم بالسجن 7 سنوات لأحمد عز وتغريمه 19 مليار جنيه لادانته بغسل الأموال



8- الحكم علي بعض الشخصيات البارزة في الحكومة السابقة زي الاحكام الصادرة ضد زهير جرانة الوزير السابق والحكم بحبس أحمد نظيف ثلاث سنوات وتغريمه 9 ملايين جنية .



9- في مقالة الاستاذ فهمي هويدي اللي هي مقالة بمثابة قنبلة مدوية اسمها "بلايين مصر المنهوبة"  بيقول الاستاذ فهمي في مقالته الشهيرة عن فضائح النظام بالارقام :

نشرت صحيفة «الجارديان» تحقيقا حول النتائج التى توصل إليها مندوبو هيئة الإذاعة، ومن البرنامج والتحقيق المنشور، عرفنا الكثير الذى ظل مسكوتا عليه طوال الأشهر الماضية. فى المقدمة من ذلك ما يلى:

•أن قادة ست دول عربية نهبوا نحو 300 بليون دولار من ثروات بلادهم على مدى الأربعين سنة الماضية. والدول هى مصر والعراق (فى ظل صدام حسين) وتونس وليبيا واليمن وسوريا، وهذه الأموال كان يمكن أن تزيد خلال تلك الفترة إلى أكثر من تريليون دولار، لو استثمرت فى التنمية البشرية والصناعية والبنى التحتية.


صدر قرار بريطانى بتجميد أصول بقيمة 85 مليون جنيه إسترلينى يملكها مبارك وزوجته ونجلاه، إضافة إلى 15 آخرين من الأعوان. إلا أن تحقيقات الـ«بى بى سى» بينت أن ممتلكات وأصولا أخرى لم يشملها التجميد، منها منازل فاخرة فى منطقتى «تشيلسى» و«نايتس بريدج» الراقيتين فى لندن. إضافة إلى شركات تجارية ظلت تمارس نشاطها لعدة أشهر بعد صدور قرار التجميد.

أثناء التحقيقات التى أجريت حول تصرفات أسرة مبارك فى جنيف، تبين أن قرينة الرئيس، السيدة سوزان مبارك كانت تقيم فى جناح ملكى فى فندق فور سيزونز، بكلفة 15 ألف دولار فى الليلة الواحدة (أكثر من 90 ألف جنيه مصرى).





10- في الموقع العالمي "ياهو" نشروا تقرير مهم جدا اسمه
8Of The Richest Dictators In History

وكان طبعا حسني مبارك من ضمن اهم اغني ثمانية ديكتاتوريين في العالم .




11- ملفات البورصة المصرية والتلاعب فيها السنوات الماضية ومن ضمن المتهمين بالتلاعب جمال مبارك وعز وغيرهم من اللي استباحوا فلوس الشعب المصري ونهبوا حتي صغار المستثمرين
وكان هناك اكثر من ملف للفساد والتلاعب بالبورصة المصرية في السنوات الماضية .



12-  اما عن قنبلة اخري مدوية فهو الفيلم التسجيلي اللي عرضته قناة الحياة بإسم "مليارات مصر المنهوبة"  ومن الحقائق اللي هلخصها من الفيلم ده وملخص سريع للمعلومات في الفيلم :

أولا : مصادر مقربة من البنك الدولي   بتقول  54    مليار دولار لم يستدل عليها في ال 8 سنوات الاخيرة في مصر

ثانيا :  الخبراء في البنك الدولي يقدرون الاموال المنهوبة في مصر ب  134 مليار دولار علي مدي ثلاثين عام

ثالثا :  في مايو 2012  صدر حكم قضائي في سويسرا قد اكتسب التوصيف القانوني لجهة تمارس "الجريمة المنظمة"

رابعا :  صرح المستشار عاصم الجوهري ان الاسرة الحاكمة كانت اسرة فاسدة وبالتالي فالفساد متأصل في كل المؤسسات وهو فساد مؤسسي ..
افادت التقارير ان الاصول المصرية عرفت طريقها الي الرياض والدوحة ودبي ونيقوسيا ولندن ومدريد وبانما وسويسرا




13-  وشوف الخبر ده كمان :

قال محمد الغيطى عن كواليس فيلم  "حائط البطولات" وأنه لم يرى النور حتى الآن لأن حسنى مبارك لم يذكر فى سيناريو الفيلم، وأضاف الغيطي أن الحفلات والأوبريتات التي كان يتم عملها أمام مبارك في نصر أكتوبر يعد إهدارا للمال العام وإهانة لنصر أكتوبر وكل ما صرف عليها كان يمكن أن يصرف على عمل فيلم ضخم يوثق لحرب أكتوبر.





دي بعض الحقائق للمدافعين عن نظام مبارك البائد ..وحتي لو كنا مش مع النظام الحالي او معاه ..فده مش مبرر ان النظام السابق كان يستمر في طغيانه ونقول "اصلهم خبرة"  مش لسه ناس هتجرب فينا !!

يعني النظام القديم خبرة بس خبرة في الفساد فعلا ..لازم كل مصري يتعلم يتعامل مع النظام بالارقام والورقة والقلم مش بالعواطف واصله كان بتاع الضربة الجوية وكانه حارب لوحده مثلا ومكانش فيه عبقري زي الشاذلي او عبقري اخر زي السادات اللي كان بيتجاهل دورهم ويكون الاوبريت عليه لوحده !!


نظام فاسد بكل ما تحمله المعني من كلمة والغريب ان يبقي فعلا من يدافع عنه بدون اي سبب او دليل ..اللهم ارزق مصر بمن يصلح دائما ومن يحكم بعدل عمر .

Saturday, October 6, 2012

رسالــة من الجنــدي المجهـــول









عربي الصفات مصري الهوي..
دمي ده من النيل ارتوي..
لو يوم يا بلدي تتعبي
النصري ليكي اعظم دوا..
عربي الصفات مصري الخلود..
أسدك وواقف ع الحدود..
عرقي علي رملك دهب..
وجبيني رملك م السجود..
مصري وبخلق عزتي..
وكرامتي تاج حريتي..
مش "جندي مجهول" انما..
في القبر بادفن كسرتي..
يا بلدنا مش ليكي النشيج..
ارواحنا الحان في النشيد..
مهما الاعادي يفكروا..
هنكونلك الحلم الوليد..
الفكرة مش فكرة قنال..
ولا كل جندي ودم سال..
القصة عشق لأرضها..
وحب فاق الاحتمال..
هجموا وقالوا "اسرائيل"..
وهيعمل ايه الشعب الاصيل ؟
يمكن يكون "واقع" قوي..
لكن احنا ذات "المستحيل" ..
فاكرينا قصة من التاريخ..
او شعب عاشق للصريخ..
هجموا في يوم علي ارضنا..
خرجوا ما بين قبر وجريح..
أنا مصري م السما للتراب..
أحلامي عديتها الضباب..
مهما العدا راح يحلموا..
انا صحرا ليهم لون سراب..
لو شيلتوا نسري من العلم..
هأرسم مكانه بميت قلم..
والحبر دمي ونشوتي..
ولو اتعصرت من الالم..
لو شيلتوا ساري مرفرفة..
روحي مكانه مهفهفة..
لو قطفوا وردة في ارضها..
من دمي وردة مصفصفة..
انا ليكي صوت نصر واذان..
انا ليكي حرية في ميدان..
انا ليكي مصري وبافتخر..
دمي سنابل م العيدان..
ده عدو صهيوني وغبي..
ولا يعرف الشعب الأبي..
ولا يقرا يوم مصر التاريخ..
او قاله ايه سيدنا النبي..
قال اننا خير الجنود..
مش زيكم عاد أو ثمود..
صهيون بيبحث عن وطن..
واحنا عشان مصر نموت..
دي حروفكوا طينة مبعترة..
وحروفنا عربي منورة..
ولا ليكوا حاضر او تاريخ..
صهيون ابالسة مصورة..
احنا علي قبر الشهيد..
ندعيله بالعمر المديد..
لانه عايش وسطنا..
مش زيكم مات ع الحضيض..
احنا اتخلقنا وده الوطن..
وانتوا اتخلقتوا بلا وطن..
يا طيور شريدة ولحمها..
طعمه ولا ريحة كفن..
أنا مصر "حي علي الفلاح"
وانتم ولاد ليل او سفاح..
الجندي فينا كالأسد..
جنديكوا لو في الشمس ساح..
بتقولوا انتوا "المختارين"
والله شوية نصابين..
بتقولوا كذبة تصدقوا..
لكن صلاتكوا بدون "أمين"..
مكتوب في مصر اطنان ورق..
وانتوا تاريخكم من ورق..
احنا النهار علي دنيتي..
مش شعب علي حافة غرق..
القدس راجعة اوطان ودين..
مهما يمر من السنين
افتكروا اكتوبر قوي..
علشان هيرجع بعد حين..
مصري وبخلق عزتي..
وكرامتي تاج حريتي..
مش "جندي مجهول" انما..
في القبر بادفن كسرتي..
في القبر بادفن كسرتي..

Friday, October 5, 2012

شمـس وقمـر 36









** قالوا "الناس معادن" ..
ولهذا لن يظهر الصدأ في بعضهم..إلا إذا عرضته ل"عوامل التعرية"..أو الحقيقة .


** في الدرَاما يُفَضلون البُكاءَ تحْت المَطر..
ولكن دراما الحُب عَلمتنا ان السَماء تُمطر دُموعنا..


** لو كانَ الحُب رَجلا ً..لمَزقني أربا ً  !


** لن يأتي اليك الحب علي طبق من "ذهب" ..
الا اذا كان قلبك "فص ألماس" .




** الحب مسرحية..كلما نزل الستار ظننت انها النهاية..
بينما هو مجرد استعداد لفصل جديد .


**النسَاءُ نَوْعين :
واحدة تَعيشُ عُمْرها بحثا ً عن فَارس الحلم
وواحدة تَعيشُ عُمْرها لتحْقيْق حلمُ الفَارس ..!


**قالت : عشْتُ في عَيْنيك الفَ سَنة وعُدتُ اعدُ سَنواتَ عُمْري عَلي اصَابع اللهْفة..
قلت لها : عشْتُ في عَينيك عُمْري وعُدتُ طفلا ً لا اعْرف حَتي لُغة العَد الا علي رمُوشَك..!



** الزهُور لا تُحب الا لحَظات اللقَاء وتكرهُ الوَداع
لذلكَ لنْ تَري في الحَدَائق زُهورا سَوْداء بلون ِ الحُزن


** خلق الناس كأسنان المشط في البداية..
ولكن قصف بعضهم شعر الحياة ..


** البَشرُ زُهورُ في الحَياة..
الأَصْدقَاء ماءُ الزُهور..
والأعداءُ اقْتَطاف من الجُذور..


** كلما عشق الناس قالوا "نشعر اننا نطير"
ولكننا لا نطير..انها اجنحة الحلم اطاحت بذراعي الواقع..
انها "جاذبية" العشق..أطاحت بجاذبية الأرض.



** قالت : أشعرُ مَعكَ بإني أحْتَضنُ العَالم كُله ..
قلت : أما أنا طفْل عَينْيك المُدلل..لا اتْعب كي احْتَضن العَالم كُله..فالعَالم كُله يَحْتضنَني في عَيْنيك .


** سألني أحَدهَم وقال :ما هُو الخَيال..؟
قلت :  انه واقع العَاشقين  !!


** قالت : حَقا ً تَطُول ليالي الشِتَاء ..
قلت : ولَكنَ لَيال العَاشِقين لا تَقصر ولا تَطُول..انا اعيشُ في لَيل ابَدي في عَينيكْ..


** قالوا "من قال لا ادري فقد افتي"
قلت "من قال لا ادري فقد عشق"


** الديكتاتور لا يقتل شعبه فجأة..
ولكنه يقتل الاحلام فيهم أولا..


** الشَيطَان لا يَشْرب من خَطَاياكم..
بل يسْقيكم من رَغْبتكم فيْها..


** عشًقُك للقَمر فَقَط..
لن يجعلْ "بدرك" يكْتمَل..


** العازب يري فوق رقبة المرأة لافتة تقول "خطر الاقتراب"
بينما المتزوج دائما ما يري فوق رقبتها "مغلق للتحسينات"  !


** الشجاع يعترف بالهزيمة..والجبان يري في الاعتراف هزيمة .


** قالت : هلْ الحُبُ شَك ام يَقينْ ؟
قلت : حُبي شَك ببقَائك ويَقيْن بحُسنك ..



** يخرج الرجل من بطون النساء في لحظة ثم يشتاق الي وجودها عمر كامل
وتخرج النساء من ضلع الرجال ثم تشتاق الي وجوده
ويولد الحب في لحظة نقصهما وبحثهما عن الاكتمال في عيون بعضهما..


**الواقعي قد يسأل "اين البحر الميت ؟ "
والرومانسي سيسأل "لماذا مات البحر؟"


** في اي زَمن حينَما تُصْبح القَباحَةُ فَضيلة..سَتُصبح بعْدَها اي فَضيلة قَباحَة ..


** من اجمل تناقضات الحب..
ان الحب الذي في قلوبنا جميعا..احيانا يكون بلا قلب ..!


** الغيرة تخلق المرأة بكل اتقان..
ولكن المرأة تخلق الوعود بكل عبث..


** اذا كانَت حَياتًك مثل الدَمْعة فدعْهَا تَسْقُط علي الازْهَار..
فطَالما لمْ تُكرمهَا في الاخْتيار فعَلي الاقَل اكْرمهَا في الانْكسَار !


** الناسُ مثْل العُطُور..
بعْضَهم يَكفيكَ منهُ "شمة"
والبَعضُ مثل "العُطور المركبة" يَطيرُ سَريعا ً..
وبعضُ العُطور "ادمان" .


** المتزوجون غير قادرون حتي علي رفع الراية البيضاء
فقد ملوا اللون الابيض يوم الزفاف !


** سؤال غريب يسأله العاشق ويقول :هل استطيع ان انزع هذا العشق من صدري ؟
حتي الاجابة ستكون عند الحب لانه تزع منك صدرك في البداية ..فكيف تنزع شئ نزع منك كل شئ !


** قالت : في طَريق حُبنا سَنجدُ كنْز الحَياة
قلت: انَا عَنْ نَفْسي وَجَدته ..وأنتظرك أمَامهُ الأن ..


** الهَجْرُ هُو لحْظَة شَك البَشَر بالحُب ولحْظة كُفر الحُب بالبَشر


** البَشر اصَابع بيَانُو..
يعزفُ عَليهُمَا القَدر والحُب لحنا ً واحدا..

Wednesday, October 3, 2012

مطلوب رقــاصة ..





كل فترة ليها اعلاناتها اللي تناسبها وتتماشي مع عصرها وعشان كده الايام الجاية مش بعيد تشوف الاعلانات دي في الجرايد :




* حـزب :
حزب سياسي تشطيب سوبر لوكس..
المكتب لسه بورقه لم يقم بأي نشاط يذكر..
ليه صفحة علي الفيس بوك وبيحط لينكات كمان..
داخل في خمس تحالفات وعشر كتل سياسية ..
الحزب لسه بشوكه ..مش استعمال طبيب..ده استعمال "ناشط سياسي" .
لأعلي سعر التفاوض معنا عن طريق التليفون او التويتر كمان..
يلا يا ناشط يلا يا ناشطة اشتري حزب وهاتي الشنطة .




* الألمانــــي :

الشاب اللي مأخوذ عنه فيلم الالماني..
يعني لا حكومة تهم ولا بوكس يلم..
تقفيل افراح وكراسي في الكلوب وتقفيل ندوات ومؤتمرات سياسية جماهيرية..
الملتوف علي صاحب الطلب..
ليس له اي ميول سياسية..
جاهز للنزول في الماتشات وقت اللزوم ولبس الجلابية كمان في قلب الاستاد..
ممنوع القتل لانه عنده مبدأ !!
للتواصل : عبده زقلة اول حارة الأمبولأ سيري القطة عطفة العنبة خربوش ..
رقم التليفون : لسه رايح يسرق عدة قريب
صفحة الفيس : أخربش



* مذيعين :

مذيع رياضي طالب وظيفة..
يقدر يصوت ويقول "ليييييه" احسن من شوبير ..وليه وجهة نظر مالهاش قيمة زي مدحت شلبي كمان..
محلل بول سابق ودلوقتي محلل ماتشات معتمد من جمعية "واحد يقولي" للكابتن محمود بكر..
يقدر يعلق علي الماتشات كمان وقت اللزوم ويهري طول الوقت ويقول "شوف الحطة والبطة والنطة"
له القدرة في الجلوس في الاستديو حتي الفجر رغي في رغي..
يقرا الرسايل علي اللاب توب بسرعة عشرين رسالة في الدقيقة عشان السبوبة..
خبرة في الردح تلميذ "خالتي فرنسا" ..
للتواصل : حارة "الخيار بقي بستة" .




* المناظرجي :

خبرة في مناظرات والشتايم علي الهوا وعمل مشاهدات وشو اعلامي كبير علي اليوتيوب والفضائيات..
له القدرة علي قلب الحقائق في ثانية..
متلون متفشخ متبعثر متلولو وكل اللي بالك فيه..
شعاره السياسي ومبدأه العام "ابجني تجدني" و "خشي ع البلوزة يا لوزة"
اما عن الايدلوجية الخاصة به فهي "معادتش تفرق سينا من سونيا"
له صوت اقوي من سامي العدل واسلوب اعفن من مذيع قناة الحلبة..
الردح علي التليفون بأسعار لا تقبل المنافسة ايضا..
حزب منحل ولا بيختشي ولا عنده ريحة الدم..
للتواصل : عصابة النظام القديم ورا مصنع الكراسي.




* مطلوب ناشئين :

شركات "المنحط" تطلب..
للعمل في قنوات الرقص الشعبي
خبرة لا تقل عن خمسة سنوات في قناة التت ..
دبلومة "رعش" وماجستير "قلة حيا"
المرتب حسب الخبرة ..فهماني يا حلوة ؟؟ "حسب الخبرة !!
تعويض اذا لم يتم القبول في القناة بالعمل في احدي القنوات المجاورة وعمل كليب للمتقدمين مجانا ..
معنا الرعاية والحنان والامان..



* توتو للزواج :

مكتب توتو للزواج يقوم بتزويج الراغبين من سن 9 الي سن 99
الان مفاجأة مكتب توتو بعد الاخبار الجديدة عن سن الزواج خصم خاص للمتقدمين في سن 10 سنوات..
يقوم المكتب بالتزويج في ايام العطلات من المدارس والحضانات ..
المصاصة علي العريس والشوكولاتة علي العروسة..
تجهيز خاص للافراح في حوش المدارس وتجهيز "المريلة" للاطفال سن 9
"كل المصاصة وخد القرار ..ومافيش احسن م الاستقرار"



* الطرف الثالث :

شركة "الطرف الثالث" لتحضير الملتوف والخرطوش..
خرطوش ماركة "ابو حامد" بأرخص الاسعار..
لدينا اقوي المسجلين ومقتحمي الاقسام من كل المحافظات..
سرقة بالاكراه ..خطف..تهريب سلع في البطون..وكل اللي تحبه..
لدينا كل انواع الصواعق وقرون الغزال..
خبرتنا من ايام عصام شرف ..
خصم خاص لاستعمالنا اطفال الشوارع..
مع الطرف الثالث "البلطجة في افاق جديدة"




* توك توك الرئيس :

تكاتك من اللي وصي عليها الريس
قابلة للاستخدام في اغراص الاغتصاب والبلطجة علي خلق الله..
اشتري التوك توك واحصل علي مسجل خطر مجانا يقوملك بالشغل كله..
توك توك رخيص من غير ترخيص اركب وهيص..
قابل للالتحام مع عساكر المرور وتخطي الاكمنة بكارت "تحية مرسي"




* حامدون للتحول السياسي :

شركة حامدون للتحول السياسي قادرة علي زرع اي متحول في اي حزب بعون الله..
التخلص من الحزب القديم ثم مهاجمته علي كافة القنوات وبكافة السبل رغم انتمائه السابق
كوادر نفاق شابة وكبار في السن ايضا
اللعب مع كل الاطراف واهو كله مصلحة..
شركة حامدون شعارنا .."يا واكل قوتي يا ناوي علي موتي"




دي بعض الاعلانات اللي ممكن تشوفها بعد كده في الجرايد الفترة الجاية ..وكله علي عينك يا تاجر ..