Sunday, May 31, 2009

حــمــادة يا مــــــولعها

بعد كل التكنولوجيا اللي بقينا فيها دي مش متخيل ان يحصل في الحقيقة احداث فيلم لنهاية العالم زي اللي بنشوفها دي لأن الناس هتنهار قبلها بكتير..
يعني هي الناس من كتر الرفاهية التكنولوجية دلوقتي مش هتستني اصلا لما تبقي الارض صحراء او فيضان يحصل لأ ده قبل كده بكتير الناس هيجرالها بلاوي..

وده من كتر التعلق بالاشياء..يعني مثلا اول ما يعلنوا ان خدمة الموبايل وقفت تماما عن العالم هتلاقي الشلل بقي والقئ في الشوارع بعيد عنك وهتشوف العجب..
ويكون سيناريو نهاية العالم اغرب كتير من اللي بنشوفه في الافلام..



نشرة الاخبار: ( وردنا الان ما يلي..يؤسفنا ان نبلغ سيادتكم ان ابتداءا من اليوم سيتم قطع كابلات الانترنت عن البلاد لظروف طارئة ونوافيكم بالتطورات في انباء اخري)


وتعقيبا علي الاحداث في احد البيوت :

مروي: يا نهار اسود يعني ايه؟ حسابي ع الفيس بوك راح؟؟ ده انا لسه مضفتش صور مارينا اللي هاوريها لوائل..

محمود: انا مش متخيل اننا هنقدر نعيش ..انا حاسس ان دي نهاية العالم..مش هاقدر انزل نغمات تاني ؟؟انتهي عصر النغمات ولا ايه؟؟امال هاعمل ايه طول اليوم وانا مبسمعش النغمات الجديدة..

حمادة: لأ والكارثة ان معدش ميل ولا شات ..ايه الوجع اللي في كتفي ده انا هتشل ولا ده كلابي ده ولا ايه؟



نشرة الاخبار العاجلة: عذرا لمقاطعة الفيلم..عموما هو فيلم بايخ المهم ( وردنا الان ان هناك عدة اماكن في العالم ضربها الفيرس في موجات الموبايل وسيتم قطع شبكات الموبايل لعدة ايام)

مروي: كمان الموبايل ..هنعيش ازاي؟؟..ازاي ابسط مواطن يقدر يعيش من غير المويايل والفيس بوك؟؟ الحياة مش عادلة..مش عادلة

محمود:احنا مش لازم نسكت ونعرف ايه اللي بيحصل للعالم بالظبط هي دي النهاية ولا ايه ..انا سمعت ان نهاية الفيس بوك في العالم دي من علامات النهاية..

حمادة: لأ ما فيش نهاية ولا حاجة لسه نقدر نستمتع بالشاشات بتاعتنا البلازما والاي بود..


وبعد فترة تم قطع الكهرباء علي العالم لسبب غير مألوف وغير مفهوم وفشلت كل محطات توليد الكهرباء سواء عادي او قيصري حتي..

نشرة الاخبار: (بلغنا الان ما يلي قطعت الكهرباء عن كل انحاء العالم تقريبا لسبب غير مألوف..واحد مشاهد ابن ذكية بقي هيقولي امال انا شايفك ازاي يا مذيع ..اقوله ما هي هتقطع حالا يا خفيف ..زووووووووو)


وكانت النهاية الحقيقية حيث خرج الناس في الشوارع مثل الزومبي بدون كهرباء يتخبطون في الارصفة ورفع لافتات مثل
(لابد من الاي بود)
(الفيس بوك هو الحل) ..(كيف هي الحياة بدون الجوال)


وفي دول الخليج كانت المظاهرات اكثر رفاهية وعنفا مثل
(كيف اعيش بلا تكييف في الكاديلاك حقي)
(اقدر اعيش بلا نسوان بس دون فيس بوك انا غلبان)
(ما نقدر حتي نسوي الكبسة والله هذه هي النكسة)


وبدون فيضان ولا اي شئ انتهي العالم..تشرد الناس المتعلقين بالاي بود ومات بعض الاشخاص اثناء رقص التكنو في الشوارع بعدما تذكروا الاي بود وماتوا من الحسرة..

اما المتعلقين بالفيس بوك كانوا بيتعرفوا علي بعض في الشوارع بالطريقة دي:

اسامة: هل تقبلني كصديق؟

احمد: تمت اضافتك

اسامة: لقد تمت مهاجمتك من احد افراد العصابات شاركنا التحدي..
احمد:اديني كويز

اسامة:عندما تتذكر الاي بود تبكي ام تتشل ام تقطع هدومك؟

احمد:اقطع هدومي

رانيا: ما مدي معرفتك برانيا؟
احمد:ارحموني انا حاسس اني ماشي مع الفيس بوك نفسه الله يحرقكم يا شيخ..


اما المتعلقين بالموبايل اتجننوا في الشوارع وبدأوا يألفوا النغمات ببقهم :

محمود: اسمع دي ..تيت تيت دوم دوم لا لا لا لا تك تك
عماد: جامدة جدا انبارح الواد سعيد قالي دي بك بك لالا اه دي وووو سي سي تك تك..
محمود: رهيبة بجد ايه الجمال ده


اما مدمنين برامج المسابقات فانتشروا في الشوارع كالمجانين :

سمير: عين ميـــــن دي؟
داليا: اوعي ايدك يا حمار دي عيني طبعا جتك نيلة


جاسر: تعالي يا محمد الاكل جاهز
محمد: الاكل جاهز امممممم ..طيب بتكلمنا منين يا جاسر ياريت توطي التليفزيون
جاسر: تليفزيون ايه يا ابن المجنونة متيجي تتنيل تاكل..

واحد تاني ماشي في الشارع بيقول:

حمادة:والنبي يا حاج تقولي شارع الشيخ خليل منين؟
الحاج: تمشي قدام علطول يمين
حمادة: ووووووووووو برافو عليك يا حاج تكسب دولارات دولارات مع حمادة هتكسب دولارات دولارات..بس قول حمادة يا مولعهاااااااااااااااا..
الحاج: الناس اتجننت ولا ايه ابعد عني يا د يا ابن الكلب بدل ما اديك علي دماغك..



واللي تشردوا في الصحراء بدأوا يعملوا شات بعصاية علي الكثبان الرملية لأ وكمان يرسموا الرموز بتاعة الشات علي الرمل..


وانتشرت الحالات بين الناس بسبب التعلق الزائد وانتهي العالم بلا فيضان ولا حاجة ولكنها نهاية من نوع جديد


Monday, May 25, 2009

هو العذاب هو الملك









الحب غيرلي الحياة
غيرلي تعريف الوجود
غير بدايته ومنهاه
شربني أكسير الخلود
هو العذاب هو الملك
حكمه في حنينه وقوته
تاجه جنونه ورهبته
سره الحياة
لازم تعيش سر الحياة
علشان تحس بمتعته
عايش معاه حالة رحيل
ميت الف شخص بيتخلق
جوا الحبيب
ميت الف شخص بيتولد
ويعيش حبيب
واهي الف ليلة في حبنا
وفي كل ليلة جنون جديد
وفي كل ليلة بعيش وحيد
ومعايا أنا
واحد جديد
راهب ضميره في دمعها
مجنون وعقله في نبضها
سكران يفوق علي ضحكها
صوتها يرن في جتته
" هنعيش لبعض..
ونموت في بعض ..
وجوا بعض ..
نقول كلام..
أخضر بلون حنيتك.."
يفضل يخربش في الجدار
وف قلبه نار..
ومكانه يفضل بيه يضيق
لما الوريد يفضله بس..
يهمسله همس
لكن وريده يعذبه
يرسم صورتها علي الجدر
شوفت المرار
بيموت كتير قلب الحبيب
في الحب موت
في الهجر موت
في الدمعة موت
في الضحكة موت
وكأن قلبه سبحته..
تسبيح بإسم الموت وبس
لو هي مش سامعة
قلب الحبيب دمعة
قلبه ورق سلوفان
حواليها ميت شمعة
قلبه في يد ملاك
مع انه وش هلاك
قلبه ابتسامة ولد
محبوس في أحلامه
حلمه رحيله دخان..
بتغني أوهامه..
قلبه ملاك بيطير..
ويغني للعصافير..
ويقول كلام عاشق..
قلبه سحاب ابيض..
مطره في عيد الحب..
عيده في يوم الحب..
قلبه ورود حمرا..
منثورة في جنينة..
شعر لفراشة نور..
تيجي عليه وتدور..
وكانه كوكب نور..
يفضل كده سهران..
نايم علي جفونها..
ضامم شذي عيونها..
متحني بيه سكران..
وهو ده العاشق..
وهو ده العاشق




Saturday, May 16, 2009

القــاك فــي عــزلة أخــري









قال قريني في لحظة لي وانا أجلس عند البحر الوهمي الذي اصنعه في غرفتي:




بماذا تفكر الأن؟فيها؟ام في نفسك؟
لا تجيب الأن دعني أحدثك عن شئ ما أحاول منذ فترة أن اجلس معك وانت في حالة وحدتك الخالصة القوية وأن أصبح كل صديق وكل حبيب وكل أخر..
تحاول من فترة ليست بقليلة ان تهرب مني وكأني سأحاول أن أحاسبك علي ما فرطت من الحب ومن نفسك ولكن لا..
سأحاول ان أنصحك وأصبح بك أقوي ومعك القوة..وسأبلغك نصائح دائما أذكر بها نفسي..
لا تحاول أن تهرب من التفكير في الموت فالموت هو رؤية الحياة بإسلوب مختلف وليس نهاية الحياة..ان فكرت في مرة بالإنتحار فلا تلم نفسك
بل ثق انك تفهم الحياة اكثر ..من لم يفكر في الموت مرتين في عمره لم يفهم المعني الدقيق للحياة ولكن اخذ الفكرة بسطحية..
اعرف ان كلامك ليس صنعة لسانك بل هو صنعة بدنك بالكامل ان خير فخير وان شر فشر..واعرف ان عينيك تتنفس ايضا ..تتنفس جمال
تحتاج اليه ووجه تحن وتشتاق اليه..وقلبك يتنفس الحب..واعرف ان الجمال هو ما خلقت اعيننا لكي تراه في هذه الحياة ..
واعرف ان رحيلك في شبر من تلك الأرض قد يكون اقوي من رحلة الي كوكب أخر لو كان رحيلا من اجل الحب..
واعرف ان الحب هو أمنية إن وجدتها بدأت التمني..وهو الحقيقة الوحيدة التي لا تتكسر علي كذبة ولا تتبدد علي سراب..
واعرف ان رفضك لنفسك أحيانا هو شفقة عليها وقد يكون إحساسا بقيمتها وقد يكون تساميا بقدرها..
وان الانسان مغرور جدا كي يتذكر تاريخ ميلاده ولا يتذكر تاريخ وفاته..
وان عيوبك لا تستقيها فقط من طباعك ولكن من تفكيرك الدفين فيها..
واعرف انك عندما قررت الرحيل لم تكن متهورا ولا دجالا ولكنك منطقت الخيال وتخيلت الواقع الأخر..
انا لا اتهمك ولكن اليوجا الحسية التي تمارسها كل صباح لن تفلح في استعادة شئ فقدته..
وانك لو فكرت في غدك ونسيت يومك هذا سيصبح كل غد هو اليوم..فالماضي لا يعيد نفسه إلا اذا اعدت الحاضر..
خذ من ماضيك خبرته وليست مأسيه وفرحه وليس دموعه..
اجعل حنينك حي لا تحن ابدا لشئ مات فحنينك له احد تعريفات الموت..
واعرف ان الصحراء واسعة جدا كي تملأها بدموعك فلا تفكر ابدا ان الأرض ضيقة كي تبكي فيها بل هي واحة دموع..
وتدبر نفسك واستحضر رائحة الندرة في قلبك كي يصبح هذا العود الأخضر بقوة الحب وبصبر المحبة..
ولا تحتاج ولكن تمني فان هربت من حاجتك الي امنيتك تجد شئ قد يتحقق..لأن الحاجة ابعد من التمني عن تحقيق الرغبة..
وانا اعرفك جيدا ..عشقت ورحلت وصبرت وتعلمت وبدأت وإنتهيت في مكانك..ولكن لا بد ان تعلم..خير من ان تكون امرأة في قلبك ان تكون في قلب إمرأة..
فتعلم وحدك وابكي وحدك ولكن عشقك وحدك لن يخلو من الدمع ومن التعذيب..
واعلم ان كل واحد منا يسير الي نوره ولا يعلم ..حتي وان كانت كل الطرق ظلام فخلاصك في النور ولكن يبقي سؤالك متي..
واعلم ان بكائك ليس نهاية هذا العالم ولكنك ستجد حقيقة العالم في احدي اللحظات عند انتهائك من البكاء..
فصدقني هي البداية..
واعرف ان الحب حقيقة كما الجنة حقيقة والنار حقيقة والله حقيقة والكون حقيقة ..فلا تدع رحيلك عن عالم الحب يهدد افكارك عنه..
واعلم ان المال هو السلطان وما لا يشتري بالمال يشتري بالزيادة فيه وما لا تحققه بالمال لن تحققه بغيره..
واعلم ان الكل مخلوق يريد الحب ولكن الحب يريدنا كل في وقته وكل في لحظة ما..
واعلم ان كل من رحل عن الحب الاول يؤكد كذبه وكل من فيه يؤكد صدقه وفي ذلك خير للعالم كي يبقي الحب الاول والثاني والأخير هو الحب..
واعلم ان طريقك لو مفروش بالصدق فقد سار عليه الشيطان أيضا ..فالشيطان رغم قبحه يعشق الورود..
ستظل طوال عمرك تبحث عن طرف الخيط وتبحث عن من يجدك الكمال ومن تجده الإكتمال ولكن لن يوجد ابدا هذا الكمال..
فالحب جنون ولكن المشكلة ان الحقائق في هذا العالم عاقلة جدا..
مفتاح القوة كلمة لا ..
لا ترحم لا تبكي لا تترك لا تشفع لا لا لا..فهل انت لا ام نعم..
واعلم ان الكون كله يقول حبي هو الأعظم ولهذا الحب مغرور جدا وشخصيته هي الأقوي ..بسبب اعتقادات شخصية..
ولا تتمني الموت كثيرا ولكن فكر فيه فالموت يذهب لمن يريده كما الأمنيات..
جددد أملك كما تتجدد فيك دمائك ولا تعتزم النهاية قبل أن تبدأ..
في عالمك أنت لا شئ أفضل ولهذا الكرة الأرضية دائرية لأنها تنحني لكل منا علي حدة..
لا تموت قبل ان تعيش ولا تعيش باحث عن شئ ما فبحثك عنه دائرة مفرغة فلابد ان تعرف ان بعض الأشياء تبحث عنك وبهذا تزيد ثقتك أكثر..
لا تجعل من الحب وجبتك المفضلة لأن المجاعة قادمة لا محالة..
وستبقي وحيدا مرة أخري لأني راحل الأن..
صديقي العزيز..دعني صوتا مخلصا يفكر معك..قبل ان تصل الي مرحلة لا رجعة فيها..
القاك في عزلة أخري..

Thursday, May 14, 2009

حفــاضة الســلام









نشرات الاخبار بقت عبارة عن تلات حاجات :مصرع او اعاصير وظواهر طبيعية او اعتداءات سياسية وبعد كده بيدخلوا في الاقتصاد والرياضة للترفيه
مع ان الاقتصاد مبيرفهش خالص..وزادت نسبة التبول اللارادي بسبب الاخبار السيئة المنتشرة في العالم كل يوم قتل وخلافه ..

وياريت قطاع الاخبار المصري يقوم بالمبادرة وينتج اول حفاضة لنشرات الاخبار لمواجهة التبول اللارادي ويسموها "حفاضة السلام"
وصدقوني هتعمل رواج هائل في اول يوم بيع ليها ..كل يوم واحد يقعد قدام الاخبار ابوه يسأله :مستعد؟ معاك حفاضتك؟"
ويقولوا بقي اخبار زي ما هم عايزين قتل وسرقة وفساد وزي ما هم عايزين "حفاضتك في جيبك يبقي انت في أمان"

ولو عايزين نرفه اكتر يجيبوا بنات زي اللي بيشجعوا في كرة السلة الامريكية اللي في ايديهم ريش دول وبين كل خبر وخبر يطلعوا يرقصوا رقصة
وده لتخفيف اثار الخبر علي الواحد ولو قسموا الاخبار يبقي احسن بدل ما هو كل سايح علي بعضه ..يعني يبقي في اخبار عن الفساد وبعدين الفساد السياسي
وبعدين الموت وخلافه وبعدين اخبار مرتضي منصور في فقرة خاصة ..


وممكن كمان واحد يطلع يقول نكت خاصة بالخبر ونشوف النشرة دي:

المذيع: "غرق حوالي 1000 وتشرد 3000 في اعصار يضرب مدينة كاليفورنيا"
يطلع بتاع النكت بعده عشان يرفه عن الناس : "بيقولك واحد نزل بسين..طلع بشين " ههههههههه
المذيع: "ترشيد الاستهلاك اصبح ضرورة لمواجهة اخطار الازمة الاقتصادية"
يطلع بتاع النكت: "بيقولك واحد بخيل قوي خلف واد حطه في البنك"


وهكذا ولو مشينا بالاستيل ده هنشيل عبء الاخبار عننا وهتبقي اخبار خفيفة بس ده ميغنيش عن الحفاضة لأن ممكن يجي خبر عاجل يبهدلك..
وياريت مذيعات النشرة الجوية برضه يحاولوا يرفهوا عن المشاهدين شوية وتبقي النشرة الجوية الحديثة موجهة لإنعاش المواطن


النشرة الجوية:

"الجو حر طحن بكرة في كل حتة وده طبعا هيخليك تسأل اشرب كولا ولا بيبسي ..اقولك مزمز ميراندا او خلي قلبك جامد واشرب موانتن ديو..امممم"


الاعلانات:
"قطاع الاخبار يقدم.......حفاضة السلام..الاختراع الأمثل لمواجهة الكوارث واخبار العالم..
عندك خبر مضايقك..بيجيلك تبول لا ارادي من اخبار الفساد..قمح فاسد دخل بلدك وخلافه..ولا يهمك..اضرب حفاضتك وعيش براحتك..
الأن الحفاضة بسعر مغري جدا يناسب جميع افراد الأسرة..وحفاضة خاصة جدا لمواجهة اخبار الازمات الاقتصادية ..
والمفاجأة .."حفاضة فلسطين" تحميك من كل الاخبار المفزعة عن القتل والحرب في فلسطين مبطنة بجدار عازل..يمنع التسرب..

Monday, May 11, 2009

جواز الشوبــنج

الكسل عامل عمايله في الشعب المصري وانا اولهم والله..
بس اكتر حاجة من مظاهر الكسل مجنناني في الفترة الأخيرة هو برنامج جديد نزلوه للموبايل اسمه برنامج السبحة
تخيل هتكسل تعد علي صوابعك او بالسبحة فهيبقي في عداد الكتروني عشان يعدلك طيب ما اجيب واحد يسبحلي وخلاص..

ويا اخي تبقي قاعد في مكان تلاقي جنبك واحد بيقرا قرأن علي الموبايل والتاني بيسبح علي الموبايل وبما ان العصر تتطور قوي كده بدل ما تقوله حرما تقوله "سبح سبح يا عم الحاج"

بصراحة كنت بسأل نفسي سؤال غريب شوية هو احنا ممكن نعدل في كل حاجة ولا ايه يعني بما ان السبحة بقت في الموبايل هو صلاة السنة بعد الصلاة هييجي يسموها خدمة "صلاة بلس" مثلا
ولا هنوصل لحد فين من تعديل الامور الدينية والاجتماعية؟

والفتوي بقت بتجيلك وانت في البيت بتتصل برقم مختصر ع الموبايل واسأل في اي هنتريش محيرك .."كان في شعراية في مراخيري اشيلها ولا حرام" ويجيبك الشيخ فورا علي سؤالك
وحتي الاسئلة بقت فيها كسل يعني تخيل يبقي اصعب سؤال يواجهك هو سؤال المفتش كرومبو يعني هيوصلونا حتي لكسل في التفكير..
بدل ما يحطوا في المسابقات اسئلة صعبة بيحطوا اسئلة تافهة عشان يكسبوا ملايين..
واللي عايز يخس بدل ما يتحرك ويعمل رياضة لا الكسل واكله فبيجيب سماعة التليفون ويكلم برنامج التخسيس


المتصل:الو يا دكتور انا وزني غير منطقي ومش قادر اتحرك يا دكتور والله
الدكتور:ان شاء الله هنمشيك علي نظامنا الغذائي يا ابني هو انت بتكلمنا منين صوتك بينهج..وممكن توطي شوية
المتصل:............
الدكتور:الو الو
المتصل:ايوه يا دكتور مش قولتلي وطي
الدكتور:انا قصدي وطي التليفزيون يا اخي
المتصل:لا مؤاخذة افتكرت ده تمرين رياضي ولا حاجة..عموما انا بكلم حضرتك من المطبخ دلوقتي مش قادر اخرج منه
الدكتور:لا حول ولا قوة الا بالله ربنا يسهلك يا ابني

وتلاقي كل اللي بيتصلوا بينهجوا او تعرف انهم لازقين ع الكنبة مش قادرين يتحركوا يدوب ماسكين سماعة التليفون قال يعني التخسيس هييجي بالتليفون

حتي الجواز يا جماعة بقي ب "كلك شمال" بالماوس وتختار عروستك.. "كلك بالماوس" وتتجوز يا سلام فين ايام زمان اما كانوا بيسافروا بلاد ويجيبوا جمال وحاجات غريبة عشان يتجوزوا
وعشان نسهلك العملية تختار جواز عادي ولا مسيار ولا مصياف ولا سوبر لوكس ولا ايه وياريت يعملولنا بقي جواز الشوبنج يعني يا دوب تخرجوا مع بعض تعملوا شوبنج لمدة سنة وخلاص
بدون بيت ولا مهر ولا نيلة تضييع وقت وخلاص حتي تلاقي حد يختار معاك هدومك
او يعملوا الجواز علي شاشة البورصة وتلاقي بدل اسامي الاسهم "رانيا ..دينا..رشا" وقدامها سعر المهر والشبكة


تلاقي العريس يقول:ياااا رانيا غليت اوي النهاردة ايه الحكاية؟
عريس تاني: بيقولك جايلها عرض من امير عربي يا سيدي وعايز يخلص عملية الاندماج دي باسرع وقت
العريس الاول: ومن ساعة الحكاية دي عدد الطلبات زاد قوي
العريس التاني: سيبها بكرة تنزلها عشرة في المية ولا حاجة واشتري يا معلم
العريس الاول: بس رشا سعر مهرها في النازل ومافيش مضاربات خالص
العريس التاني:بيقولك عليها اخبار مش كويسة ..يدوب ممكن تعمل عملية وخلاص يعني تخرج معاها وبس ..انما منصحكش بالجواز منها دلوقتي
العريس الاول:يا سلام ده انت دايس في السوق..انت متجوز؟
العريس الثاني: لا انا متابع بس عشان اعرف اخر الأسعار..


وكل ما تنتظر اكتر فرصتك في الفوز تكتر يا عم الحاج

وكمان جابول الحلل والترابيزات والسراير لحد البيت من خلال البرامج الاعلانية اللي كل شوية تيجي علي القنوات كلها ويقعد يوصفلك في الحلة ساعة ويكلمك علي مزايا الحلة ومزايا السرير
عشان متتحركش خالص من البيت ويوم ما تفكر تتحرك كلم تاكسي العاصمة يجيلك تحت بيتك بدل ما تطلع علي اول الشارع تدور علي تاكسي
ولو مش عارف عنوان خش علي الجي بي اس ودور علي المكان اللي انت عايزه بدل ما تحرك جسمك التقيل وتروح تسأل حد ..

ده عصر تقيل اوي يا اخي الواحد مش عارف يتحرك انا شكلي لزقت في الكرسي ولا ايه ..
الحقوووووووووووني

Friday, May 8, 2009

اعلانات البطــاطس المحمرة

ساعات تفتح اهرام الجمعة اللي هو مبيتفتحش اصلا تلاقي في اعلانات وظايف بس مضحكة جدا يعني تلاقي الاعلان مثلا صفحة كاملة كلها دش وفي الاخر يديك شروط وناقص يكتبلك بين قوسين "ممكن تتوظف بس عند امك هناك"..

وغالبا بتبقي الصفحات دي لوضع البطاطس المحمرة في المطابخ ومش عارف ليه الامهات بتحط البطاطس فوق الجرايد اصلا هي فكرة سيئة جدا
طيب هو الاعلان ده عايز ايه وهل هو كافي بنفسه يعني اللي يقراه اصلا يبقي كويس ولا لازم يفهم الوظيفة ؟ولو مفهمش الوظيفة ازاي هيشتغلها؟
تيجي تسأل واحد يقولك نائب قسم الادارة لشئون الامور الشبه مالية عبر البحار..تقوله طيب حضرتك بتشتغل ايه يعني يقولك والله ما انا عارف.


وتخيل المدير بيعملك انترفيو يقولك:وحضرتك بقي قريت الاعلان بتاعنا اللي في الجرايد؟

تقوله:طبعا يا افندم امال جيت هنا ازاي

المدير:بس ده كان صفحة ونص يا ابني

تقوله: انا قريته ومش بس كده ده انا فهمت معظمه وقعدت اعلم عليه بقلم فسفوري كمان

المدير:هايل يا ابني انت اتعينت خلاص

يقوله:الحمد لله يا افندم

المدير:وانت كلية ايه بقي

يقوله:اداب يا افندم
المدير:غريبة مع ان الاعلان طالب مهندسين اساسا !



وبتلاقي في شرح الوظيفة سطور بالعبيط تحس ان اللي هيشتغلها اقل حاجة سبايدر مان عشان يبقي بالشروط دي ويقولك خبرة 15 سنة
طيب هو الراجل الخبرة 15 ده ما خلاص اتجوز وخلف واستقر هو لسه هيعمل انترفيو اساسا ده زمانه اتخنق من ام الشغل اساسا ..


المدير:انت اللي متقدم للوظيفة بقي..

الموظف:اه انا وخبرة 15 سنة يعني بروح امك يا تديني الوظيفة يا تقولي لأ وكلمة ورد غطاها بدين أمك

المدير:طيب تعرف تعرفلي ميزان المدفوعات؟

الموظف: ده انت بتهرج بقي ..انا ايه اللي جبني ام الشركة دي اساسا واحد لسه بيقولي عرف ده ناقص يقولي علل بعد شوية الله يخرب بيتك يا سميحة..

المدير:سميحة مين

الموظف:اخرس


وغالبا بيتعاملوا معاك بأسلوب الصدمة والرعب يقعدوك برة شوية قدام واحدة زي القمر تسيح اللي انت كنت داخل تبخه جوة لحد ما المدير ينادي عليك


المدير:انت ليه متقدم للوظيفة دي بالذات؟

الموظف "وهو سرحان في السكرتيرة اللي كانت برة": عشان شفايفها يا افندم..تهبل..تجنن..

المدير: بررررررررررررررررة


وطبعا اللي برة دي اساسا هي خدت الوظيفة دي بشفايفها او بعيونها او بمؤهلات تانية انما متقوليش علميا وحياة ابوك ودي حية البنات يا تقعد وواحد يصرف عليها
يا تنزل تشتغل وتكلفة الوظيف كام صابع مكياج وبودرة وتاخد عليها الوف


واعلان الوظيفة:

مطلوب للعمل في شركة خليجية كبري

موظف ايوني فلذي
يجيد التعامل مع الظروف المتغيرة مثل الزلازل والأعاصير وياحبذا لو كان خريج من اكاديمية ارض الخوف
..حسن المظهر يعني اقل حاجة براد بيت

ولبق لباقة الإبل وجميل وجنتلمان وياريت يكون معاه عشر لغات اولها الهيروغليفية

ويكون بجسم جورج كلوني وعيون كاترين زيتا جونس..
خبرة يعني متقلش عن 34 سنة كده والشركة يا تقبله يا ترفضه..

الشروط انه يكون معاه كل شهادات ميكروسوفت ومحضر الزمالة علي الأقل
يجيد التعامل مع السكرتيرات والمزز"لأن الشركة ولا زنقة الستات اساسا"

الشرط البديل: "الواسطة"..ولو كنت زي البحار الغبي

علي من يريد التقدم للوظيفة الذهاب الي المطار وقطع تذكرة لمقر الشركة الرئيسي في لندن ودفع دم قلبك للانترفيو فقط

وابقوا قابلوني




Wednesday, May 6, 2009

خــيانة نــبيلة










للحب حواس خمس..أضعفها الحنين وأقواها الرهبة"



في بعض الوقت نخاف من الحب..
نخاف من قلوب نعشقها وتعشقنا..
نخاف من انحناءة الزهور للسيد كيوبيد..
وانحناء كيوبيد للقمر..
وانحناء القمر للعشق..

نخاف الوصول الي المثالية بقلب نصف مثالي..
او الوصول للكمال مع عالم ينقصه شئ ما..
يرهبنا الحب..يقتلنا الحب..

نتصيد أخطاء قلوبنا ونبحث عن النهايات السعيدة..
دائما نبحث عن النهاية بسرعة..
وإن لم تأتي قتلنا البداية بسرعة..

وعندما نريد الحب وطن للخوف..يصبح الخوف فينا وطن للحب..
فنحب الخوف ونحب الدمعة..
نتأمل عين الخوف بشفاه مرتعشة كطفل مندهش جدا..
حتي نطمأن اله ..ثم نصدقه..ثم نصاحبه..
ثم نقع في غرام معه..
فيصبح كل غرام فينا بختم السيد خوف..
بأمر السيد خوف..

ويصير الحب الخافت داخلنا مكياج للخوف..
فالخوف عدو الحب المقرب وصديقه البعيد..
حاذر منه علي استحياء..

حاول ان تجعل من خوفك باقة ورود..
فتصير القوة داخلك أيادي تمتد الي عالم أفضل..
ودماء تحن الي قلب أرق..
هي تنتظر اللحظة ..وتخشاها أنت..
صارحها بحبك..كي لا يمتعض الوقت..ولا يغضب منك حنينك..

وقبل أن تصارحها..صارح خوفك..
اجعله صديقك لفترة ثم خنه..
ستكون خيانة نبيلة..ومعصية طاهرة..لأنها بإسم الحب..

خن خوفك مرة وصارحها..
ولكن لا تقتله فقد تحتاجه مرة اخري ..ان لم تكتمل القصة..
وقد تحتاجه ان اكتملت ايضا في لحظات تخيل الفراق..

فالعاشق له ثلاثة أكفان..أولها الخوف وثانيها الحيرة وأخرها الفراق..
فحاول ان تخرج من اول كفن ولو عدت اليه مضطرا..
فستكون رحلتك بين الفراق والخوف ..رحلة حيرة..
حيرة تمتد في اوردتك ليظل ذهابك وايابك في داخل فكرة..
في داخل قلب..

ولكن حاول..فالمحاولة في الحب وصول..
والوصول الي الحب الكامل اقوي من الف محاولة..

فحاول..لو مرة واحدة..

Monday, May 4, 2009

جنـــاح فــــراشة

الحب الأول لذة لا تكرر..والحب من بعده تكرار لا يلذ"


أحببتها كي أخرج من دمي ..
ليصير حنيني اليه غرام..
ووصولي اليه حلم..
وغربتي بين عيونها لهفة لنفسي..


أنا لم أولد كي أحبها..ولكني أحبها كي أولد كل لحظة..
أنا رجل رجعي جدا ..حين اسافر ابعد من لغة رموشها..
انا ليست لي مدينة وليس لي سن ولا عنوان..
فمدينتي الحلم..وعنواني الخرافة..وسني شئ سيكون..
حياتي بلا حبها عذاب مقيم ..
وسفن العبرات في عيني بلا ميناء ولا انثي..

كان رحيلي اليها العودة وعودتي منها هو الرحيل..
والأن انا رحال..
من ضلعي لضلعي ..
اقوم بدور سفير نوايا بين وريدي وشرياني ..
من يسأل عنها ومن يهدد بالموت اذا لم يراها..

احاول ان العب دور وسيط روحاني بين الحلم وبين الواقع..
لعلي اراها في لحظة ضبابية من خواطر الحلم..
ولكن للأسف في زماننا..حتي الحلم..واقعي جدا..

من مات اليوم؟
غير الحب وغير الناس اليومية وغير بضعة زهور..
اسأل نفسك من مات اليوم..
ستجد اجابتك في عين حبيب غاب حبيبه...
لو كانت نشرات الموت ستحسب من مات من العشق..
لن تجد مساحة من الورق الابيض كي يحفظها بين ضلوعه..

من عاش اليوم؟
غير الله وغير الشمس وغير القمر..
ستجد العشاق وبعض الناس..
من يعشق يحيا ..
الحب كما الدمع يحاول ان يحيا وحيدا..
بعيد عن عين الناس ولغة المارة وعيون البصاصين..
هل تضحك وحدك؟
ابدا..
هل تبكي وحدك؟
احيانا..
ولهذا العشق حزين..
العشق هو الفلسفة الأولي حين يتقمص دمعك دور ارسطو..
هو الملكوت الاول حين تخلد فيك الدنيا راحتها..
لتصبح علي كف الدنيا ريشة..لينفخ كيوبيد الريشة متي شاء لتظل تطير بلا وطن..
وتطير تطير..لتهبط بين حديقة زهر او جناح فراشة..
وفي كلتا الحالتين ستهبط لون ثالث..غير الزهر وغير الفراشة..
لون يثير فضول الزهرة..وهمهمة الياسمين والبنفسج..
وستعرف يوما انك تعشق حين يصير الشارع اوسع والغرفة اوسع والبحر اوسع..
وتصير خطاك علي الأرض تنقيب عن معني اخر للحب..
وتصير كما الدخان بلا هواء يحملك ولا نار تأويك..
فتظل تبحث عن النار وتفتش عن الهواء بلا جدوي..
لأنها نارك وهوائك..
وستظل قافية الشعر تعيش علي كف الحب..
وسيظل الحب يعيش علي شعر القلوب