Wednesday, March 24, 2010

تلاتة مـش كـفاية






طول عمرنا نسمع ان المستحيلات تلاتة لكن في الايام الاخيرة بيتهيألي الناس غيرت رأيها تماما في المقولة دي وبقوا حوالي عشرين او قول مية حتي او متعدش خالص
لان المستحيلات كل يوم بتتثبت وبتزيد في جميع نواحي حياتنا في العالم العربي سواء فنية او سياسية او غيرها

وانا هاثبتلكم انهم مش تلاتة ولا حاجة:


1-ان شعبان عبد الرحيم يلبس كلاسيك

2-ان محمد منير يحلق شعره زيرو

3-ان الريس يتعالج في القصر العيني

4-ان مرتضي منصور يصلح بين خصمين

5-ان رامي لكح يطلع في برنامج عم يتسائلون

6-ان ماجدة الرومي تعمل دويتو مع هيفاء وهبي

7-ان انعام سالوسة تاخد جولدن جلوب

8-ان سامي العدل يعمل بطولة فيلم رومانسي

9-ان عمرو اديب يبطل يقول فلة شمعة منورة

10-ان كاظم الساهر يعيد توزيع اغنية ايظن لبعرور

11-ان يطلع برنامج توك شو من غير اخبار اعتصامات واضرابات

12-ان يطلع ميكروفون يقول "تبرعوا للحزب الوطني"

13-ان الدعم يصل لمستحقيه

14-ان الاتحاد ياخد الدوري سنتين ورا بعض

15-ان مدحت شلبي ميقولش مساء الانوار وهلا هلا هلا

16-ان منتخبنا ياخد كاس العالم

17-ان محمد هنيدي يقود حملة لتغيير مصر

18-ان الاعلانات تقول حقيقة المنتج اللي بتعرضه

19-ان الاحزاب المصرية تنتصر علي الحزب الوطني

20-ان مصر تبقي عالم اول

21- ان البنات تكره تمورة ومهند

22- ان مانشسيتر يتغلب من الزمالك اربعة صفر



ولو قعدت تعد مش هتخلص يمكن توصل لرقم متين او اكتر يعني مش تلاتة بس
وسلملي علي تمورة


Thursday, March 18, 2010

قلب البـني ادم رحـيل










(1)

عينك دي مفتاح عدن
منحوت علي ضلوعي
بستان بنات اترسم
علي حيلي وقلوعي
والحب قدر.قسم
لونك علي دموعي


(2)
قلب الكريم وارف
تسكن علي ضله
قلب اللئيم خايف
من توهة هتذله
خليك مع السمحين
تغرق في بحر الكرم
يبعد لئيم الاصل
لا في يوم كده تبله


(3)
قلبي انهزامة ليل
راكع علي حكايتك
رعده العذاب والضني
برقه علي مرايتك
وبدايته لون دنيتك
ونهايته في نهايتك



(4)
الحب اصبح تمن
مكتوب علي الاوراق
قيد مصيره الزمن
ضيع كتير عشاق
عمر الغرام ما ايموت
لو حتي كام ورقة
ولو الغرام انتهي
راح تفضل الاشواق


(5)
وكأني وشك في السما
بنبض علي قمرك وانام
قدرك يمامة في دنيتي
بايديها ترسمله السلام
لكن في شئ منا اختفي
ومات كمان سرب الحمام


(6)
ابكي الدموع مش شئ يشين
لو كان علي حبك زمان
متشيلش في القلب الحنين
ويضيق عليك حمل المكان
قلبك خلاص فاض بالانين
فرغ حموله علي اللي كان
قلب البني ادم رحيل
دمعك بيرسمله الكيان
قلب البني ادم سكوت
انت اللي هتكونله اللسان



(7)
انا قلبي نسمة في خطوتك
مجد الجمال فيه اترسم
شايل حنينه لدمعتك
وحضن مشاعرك وابتسم
وقسم وجوده لدنيتك
حرفين عليه لما اتقسم
هو ابتسم اصله افتكر
انه انتصر
لكن انهزم !



(8)
مولود علي جبينها
حبي قدر وصديق
وبقلبي بحكيلها
اني حبيب وغريق
قال الجبين بعدها
حبك ده مكتوبي
مش كل ما مكتوب
عليا يبقي طريق

Saturday, March 13, 2010

انا جـاي اشـرب قـهوة







اما تيجي تخطب او تناسب احترس من خطيبتك لو كانت من النوع "القليش" لان ساعات كتره والمبالغة فيه تسبب مشاكل خصوصا لو كانت العيلة كلها قلشة كبيرة

في احد الكافيهات:

محمود: نهلة انا ...

نهلة: مالك يا محمود انت عايز شحن ولا ايه ؟

محمود: لا انا عندي ليكي سر خطير

نهلة: ازاي يعني ؟ بتسيحوا زبدة ولا ايه ؟

محمود:يا نهلة انا عايز اخرجلك اللي جوايا

نهلة: انت حامل وانا معرفش ؟

محمود: باختصار انا عايز اجي اشرب قهوة عندكم

نهلة: اما طفس صحيح ما القهوة هنا في الكافيه

محمود: يا نهلة لا انا مش جاي عشان القهوة انا جاي عشان العش اللي هيجمعنا

نهلة: عش ايه يا عم شايفني بصوصو قدامك

محمود: يا نهلة فلقتيني الليه يحرقك انا عايز اخطبك باختصار

نهلة: ااااااه قول كده انا موافقة بس كلم بابا


وفي بيت الاسرة:

محمود: يا عمي انا جاي اطلب ايد بنتك نهلة

الاب:ايدها بس ؟ بس هتكلفك جامد ؟خدها علي بعضها اعملك خصم ههههههههههههه

محمود: احم..اه ده العيلة كلها بقي ..يا طنط انا يشرفني يكون دمنا واحد

الام: ليه يا ابني هو انا خلفتك ونسيتك ؟

محمود: لا حول ولا قوة الا بالله يا عالم ارحموني

نهلة: متقلقش يا محمود هم بيهزروا معاك بس بابا موافق مش كده يا بابا

الاب: طبعا يا ابني انت طالب ايه؟

محمود: طالب القرب

الاب: الله الله ده انت بتقلش اهو امال مش عاجبك ايه بقي هههههههه

محمود: لا مش قصدي انا..

الاب: لا يعني طالب لسه ولا ايه ؟

محمود: لا مخلص خالص

الاب: لاحول الله مشحر يعني ده انا كنت فاكرك لسه شباب ههههههههههه

محمود: بقولك ايه يا نهلة هو الوضع ده هيستمر كتير ؟

نهلة: لا ممكن نقعد ع الكنبة التانية هههههههههه

محمود: حراااااااام بقي انا تعبت كفااااااااية يا طنط انجديني

الام: انجدك ايه يا ابني هو انت مرتبة ؟ ههههههههه

محمود: لاااااااااااااااااااااااااااااااااا




وبعد سنين طويلة وبعد ما خلفوا صبيان وبنات كبرت بنتهم "سلمي" ودخلت الجامعة وجالها واحد يتقدملها


وفي نفس الكافيه:

عادل: سلمي انا ..

سلمي: ايه يا عادل عايز لبان؟

عادل: انابحس وانا شايفك اني مش قادر اغمض عيني

سلمي: ليه روتانا سينما قدامك؟

عادل: انتي يا سلمي ناعمة وفي نفس الوقت قوية

سلمي: متمسح بيا الطرابيزة وخلاص يا عم ..هو انا باكو مناديل؟

عادل: انا حاسس معاكي بالأمان

سلمي: لا كده عيب بقي هو انت شايفني....؟

عادل: يا سلمي افهميني انا عايز اكلم والدك

سلمي: هو مش معاه موبايل بس موجود ع الفيس بوك علطول ممكن تضيفه

عادل: اضيفه ايه؟ انا عايز اجيلكم البيت

سلمي: تعالي بس بلاش يوم الاتنين عشان بننضف الشقة

عادل: تنضفوا ايه هو انا جاي اقعد معاكوا؟

سلمي: امال عايز ايه؟

عادل: انا جاي عشان هنبقي اهل

سلمي: انت هتزور بطاقتك ولا ايه ؟

عادل: حراااااااااااام كفاااااااااااااااااية بلاش انا غلطان




وانتهت الخطوبة بين عادل وسلمي قبل ان تبدأ بسبب الوراثة القلشية البحتة
وحاسبوا من النوع ده
..

Tuesday, March 9, 2010

أبوها أرنــب يا عـــم














حضرت شات بجد ممكن تعتبره اغرب شات في الدنيا كان نفسي اسجله بس ملحقتش طبعا الانترنت مليان بحوارات عجيبة "فكسانة" بنشوفها كل يوم
ومتسالنيش ايه فكسانة دي ..لاني بسمعها برضه ومش عارف ايه ده بالظبط ..ساعات تدخل الشات تلاقيه معظمه عبارة عن حوارات تظبيط ولا اكتر

ونادرا اما بيكون هادف او ليه مغزي اساسا لكن حوارات العرب والاجانب بتكون رهيبة وساعات تموتك من الضحك شوف الشات اللي انا كنت فيه ده

انا كنت بكلم واحد في نفس الغرفة ولكن ده الحوار اللي كان بيدور في الغرفة العامة او اللي كله شايفها بين هشام "مصري" وواحدة اسمها شانون رابيت "امريكية"

طبعا انا هكتب اسمها بالعربي هنا بدل عشان يبقي الحوار سليم انما الاسامي ع الشات كانت بالظبط shanon rabitوhisham lover




شانون: hi

هشام:hi where are you from ?

شانون:usa

هشام: i want to eat your father

طبعا هو كان قصده علي اسمها اللي هو رابيت هوفاكره ان هو ارنب بس الاسبيل كان مختلف اصلا


شانون: what???/?/

طبعا كانت مذهولة ايه اللي عايز ياكل ابوها ده ؟ مصاص دماء ولا ايه ؟

هشام: your father is a rabit

شانون: no you misunderstand

هشام: ok darling

طبعا الكلمة دي لاتنين عارفين بعض قوي يعني فهي استغربت

شانون: darling?? i don't even know you

هشام: i am egyptain pharoh bb you love pharohs of the river?

شانون: what are you talking about ?

هشام: you are a very good creature

بيقولها انتي مخلوقة كويسة هههههههه فهي مش مصدقة التعبير

شانون:creature ?? what the fuck !!

هشام: fuck? youinsult me?? why ?? what is your wallpaper about me to insult me

ايه خلفيتك ؟كانها يعني خلفية كمبيوتر "وول بيبر"

شانون: omg plz shutup and leave to the river again

هشام: iam a good pharoh

شانون: isee that you must be a pharoh or from the time of pharohs

هشام: h3 h3 h3 h3 h3


بيضحكلها بالصعيدي

شانون: what do you mean by h 3???

هشام:i laugh

شانون: i must go now really bye

بعدين انا دخلت كلمته

انا: ايه يا عم هشام ده يخربيتك ده انت موتني م الضحك
هشام: يا عم دي بت رخمة وجيت اظبطها مش راضية
انا : هع هع هع بجديا هشام ايه الحوار ابن الكلب ده يا ابني فرعون ايه بس ونيل ايه
هشام: ايوه ياعم انا ظبطت واحدة قبل كده من سلوفاكيا كده
انا:هههههههههه اه سلوفاكيا يمكن انما تقولها هاكل ابوكي؟ ههههههههه
هشام: ماهو ابوها ارنب ده اسم يعني
انا : طيب انا ماشي عايز حاجة
هشام: شكرا


وبجد الشات ده قتلني وكانت من اكتر لحظات النت امتاعا هع هع هع بالصعيدي

Saturday, March 6, 2010

مذكـــرات أحاســيس تحـــترق





الاحتراق الأول :

تحت نهار حارق لا يلهب قلبه بما فيه ،
يغتسل من الهجر بالماء والثلج والبرد كما الأثم ،
ينظر للشمس بتحد صارخ حتي تلمع دمعته ،
ثم يعاود سيره في طريق لا يعرفه لمكان لا يعرفه ولكن يهديه الحب ،
يمشي في الطرقات كما رقع الشطرنج..خطوات بيضاء وسوداء بلا ملك ولا وزراء ،
تتحني اذانه من صوت انينه فتقطع اخر اوتار القلب ليخر اللحن الابيض صريعا ،
ويسير الزمن وراءه كطبيب نفسي ويكتب في اوراقه ،
" هي حالة هجر مستعصية ،
وصعوبتها ان الجرح اتي في لحظة اندمال الجرح ،
حين يندمل جرح الوحدة اتي جرح الهجر فزاد الجرح اتساعا والما ،
وسيظل يهيم في كوكبه الدري باكيا صارخا ،
ويظل الالم هو توأمه الملتصق طوال حياته ، "



الاحتراق الثاني:

رجل ذو شعر ابيض يجلس علي منضدة بيضاء ،
يكتب مذكراته وتسد الاوراق اذانها من جهش بكاءه ،
يعد سنين العمر علي الاوراق ويحاول ان يبحث فيها عن الحب الضائع منه ،
ولا تجد الاوراق مصيرا الا انتظار حكم الاعدام كما كل الاوراق لديه،
ويرمي القلم بعيدا حين يكتب اسم حبيبته في الماضي ،وكأنه يرمي الحقيقة ،
التي طالما هرب منها ،
ويجلس معه الزمن كطبيب نفسي ويكتب في اوراقه ،
" هي مسودة وداع ،
يحاول فيها ان يودع شبابه كل ليلة ويعيش اخر لحظة جميلة في حياته ،
حينما كان الحب لغته الام والحنين هو لسانه ،
وستبقي الاوراق الملقية علي الارض تعيش ،
الي ان تتحول لسفينة كبيرة يهجر فيها الارض ومن عليها ،
الي ماضيه وحبه الأول والحقيقي،
حتي ولو علي مركب من ورق . "



الاحتراق الثالث :

تجلس علي شاطئ بحر وتمزق عقد يخنقها ،
واساور في يدها تهديها لبطن البحر ،
تحاول ان تهرب من قلبها بأشياء تمس قلبها ،
ولكن كيف ستهرب من قلبها والنور الساكن فيه يعيش في لحظات سكون واستقرار ،
وفي الخارج لحظات جنون واستنفار ،
ويمر الزمن عليها ويمسك قلمه ويكتب ،
"كيف يظن البعض طعم هروبهم من الحقيقة له نكهة ،
وكيف ستهرب من الوان الطيف الساكنة علي قلبها بالقاء بعض كنوزه في البحر ،
لا يوجد حل الا العودة او الذكري او الكتمان لكن لا يمكن ان تمحي الحب باسورة او خاتم ،
لانه لم يلبس يوما اسورة او خاتم ،
بل يلبس خاتم الشغف واسورة اللهفة ولا يمكنك الخلاص منهما مهما حاولت ، "



الاحتراق الرابع :

احتراقي انا،
الزمن،
هو احتراق الوقت ،
وطاعون الحرب الدائرة ما بين الحب وما بيني،
أمر عليكم سنوات ام ثوان ،
حائر ما بين عشقكم الخالد وما بين هجركم اللحظي ولا اعرف لي تاريخ او محل ميلاد ،
فاخترت ان اكتب مذكراتي ،
علي قلوبكم،
واتخذ صفحات من شرايينكم و مشاعركم ،
لعل الوقت يمر علي قلبي طيبا حانيا ،
ولعل الحب يمارس طقوسه واحلامه بداخلكم ،
فلا تحترقوا الان ، ودعوني أحترق قليلا من أجلكم ،
ومن أجل الحب .


Wednesday, March 3, 2010

الخــــتم في الـــدرج





عندنا الناس مش محتاجة وزارات ولا اي حاجة كل قرارتنا بايدنا وبنطلعها في لحظة ما نكون عايزين مش مستنيين قرار ولا حكم من حد
يعني في حالة تقمص لدور هيئات تشريع وغيرها لكل المواطنين
زي مثلا البقال بديله نص جنيه فضة
بيقولي "لأ ما معاكش ورق ؟"
قولتله "ليه ده ماله؟"
قالي "ده مبيتصرفش" ..
وطبعا المفترض اني ابدي دهشتي واقول والله مبيتصرفش؟..محدش قالي انه مبيتصرفش انا اسف خد الورق اهه
علي طريقة محمد سعد "والله ما اعرف ان الختم في الدرج"

وهو هنا تقمص دور وزير المالية وطبعاكتير بيتقمصوا دور وزارة التخطيط
واحد يقعد ع القهوة يقولك "انت فاكر انهم كده خلصوا حفر في البلد ! ابدا.استني شهر وهيحفروا تاني اللي حفروه ...دي فوضي يا محترم "

ومتعرفش هو جاب القرار ده منين مع ان دي بتكون خطة دولة ومحدش يقدر يعرفها بصراحة ولكن ساعات يطلع كلامه صح وتقعد تضرب كف بكف
الظاهر انها خبرة ومعايشة الشعب للحكومة خليتهم حافظين كل تصرفاتهم زي الواحد ومراته كده.

اما بقي عن تقمص دور الازهر فحدث ولا حرج طبعا كله بيتقمص الدور ده
لدرجة ان واحد بتاع ميكروباص بيقول "واللهي نظام الكارتة ده حرام "
فافتكرت بيقول حرام يعني ظلم يعني طلع قصده حرام بجد
وقال" يعني لو سألت اي شيخ هيقولك ده منه مال حرام للناس دي من قوتنا وعرقنا "
المهم وقعد يفسر يمين وشمال عشان يريح ضميره ان نظام الكارتة حرام ..
وانا كنت مذهول ماهو اكيد مافيش اي فتوي او حديث عن الكارتة يعني !
يبقي هو جاب منين كلامه ده ..اهو كله بيفتي.


اما فتاوي بقي وزارة الصحة فمئات والاف زي "خد بس الحباية دي واسمع كلامي " او " دي فيها الشفا ومتجربة "
وطبعا مؤامرات وزارة الصحة
زي واحد يقولك "ده هما اخترعوا انفلونزا الطيور عشان واحد عنده شحنة فراخ متجمدة عايز يبيعها " !!!
طيب يا تري اخترعوا انفلونزا الخنازير ليه ! هل فيه واحد عنده شحنة زبالة عايز يبيعها مثلا ولا ايه !
وهم مين اللي اخترعوا مع ان المرض ده في العالم كله !
ودايما ينهي الكلام بجملة "اسمع كلامي بس "
واكنه في مجلس اتخاذ القرار ودايس في موضوع المؤامرات ده يعني.


وحتي التاكسيات اللي عايزين يجددوها يقولك دي شحنة هيونداي عايزين يبيعوها !
يا عم يخربيت افلام الاكشن اللي بتشوفوها ..يعني لو التاكسيات وحشة يقولك ايه الارف ده ولو نضفت تبقي مؤامرة !

اغرب حاجة بقي اما تلاقي بقال بيفتي في بضاعته ..تقوله "عندك شاي كذا..."
لو مش عنده يقولك "لا بطل ينزل "
يعني ايه بطل ينزل مش فاهم ؟ الشركة قفلت فجاة كده ده انا لسه جايبه اول امبارح قررت بعد ما انا دقته انها تقفل يعني ولاايه !
ولو عايز تغيظه متاخدش شاي تاني قوله "طيب هاستني اما ينزل تاني "


او اللي يكلمك بقي عن ماركة عالمية في العربيات مثلا ويقولك "اوعي تجيب المتسوبيشي ..دي عرة "
كلمة واحدة توصف ماركة عالمية زي المتسوبيشي او غيرها بسهولة فائقة عند اللي بيفتي
يعني مجهود الشركات دي كله يتوصف بكلمة واحدة بسهولة كده
وتيجي تقوله "ايه اللي مش عاجبك فيها"
يقولك"هي علي بعض كده عرة " !


اما القهاوي المصرية فالمفروض اعادة تسميتها الي "دار الافتاء "
بجد بيعاد عليها تشكيل حكومات ووزارات وهيئات كتير مش بعيد تسمع وانت قاعد "لا يا عم اوباما ده يتشال واللهي "

وواحد مرة قالي جملة عجيبة قوي وسكت قاللي "الريس بتاعنا ده غلبان قوي "
وياتري ايه مغزي الجملة دي ؟ وهل كان الريس بيستلف من خالته مثلا ولا عرف منين انه غلبان وازاي ريس غلبان اصلا !
طيب حيث كده بقي يا عالم تبرعوا للحزب الوطني في حملة وطنية كبيرة عشان الراجل الغلبان ده .


وبجد مكنتش اعرف ان الختم في الدرج.

Tuesday, March 2, 2010

سعــيد بــوتر والشــيشة الذهــبية




في احدي القهاوي المصرية فترة العصرية كده وانت طالع :



سعيد المرعب: ايه الفيلم اللي شغال ده ياد ؟

عطية القهوجي: ده فيلم هريهم بوتر يا برنس

سعيد: هاريهم بوتر ازاي يعني؟

عطية: بيهريهم بالمقشة السحرية يا معلمي ده فيلم واخد جوايز نوبل للافلام وجائزة ايمان للافلام

سعيد: نوبل وايمان ؟ وماخدش جايزة جيرمين؟

عطية: لا يا برنس اسمها جرامر للافلام

سعيد: اه لا مؤاخذة ..طيب ما احنا عايزين نعمل فيلم ياد يا عطية

عطية: لا اللي يفيدك بقي استاذ ايوب السناريست بتاعنا

استاذ ايوب: ازيك يا سعيد..بتشرب ايه ؟ حشيش ده ؟

سعيد: اه حشيش اتفضل معانا وقول بسم الله

ايوب: بسم الله ايه ع الحشيش يا عم انت ..المهم انت عايز ايه ..الواد عطية قاللي انت عايزني

سعيد: عايزين نعمل فيلم جديد يا برنس ايوب الموضوع سهل وهاريهم بوتر فيلم سهل بشوية المقشات دي

ايوب: اه انا بقالي 45 سنة بكتب سيناريو وان شاء الله هيبقي فيلم مبهر

سعيد: خمسة واربعين سنة؟ ده هيبقي فيلم عشرين جزء ولا ايه ؟ ده يشوفوه ولاد ولادك بقي

ايوب: يعني ادينا بنحاول

سعيد: طيب خد سيناريو مني بقي ما يخرش المية

ايوب: اشجيني

سعيد: احنا هنعمل فيلم سعيد بوتر والشيشة الذهبية

ايوب: برضه بوتر طيب غير اسم الفيلم عشان ما يقولوش غشه

سعيد: لا ده مش غش ده اقتناص

ايوب: اقتناص ؟

سعيد: المهم احنا هنجيب سعيد بوتر اللي هو انا وهيبقي في سبع شيشات بيجمعهم لحد ما يوصل للشيشة الذهبية ويحكم العالم

ايوب: ها ا هاهاهاهاه يحكم العالم بالشيشة الذهبية ده انت محشش لحد النخاع واللهي وبعدين ده قصة فيلم تاني كان بيجمع خواتم ومالوش علاقة بسعيد بوتر

سعيد: ماهو هيكون قوي الخير والشر زي الافلام اياها وانا الخير اللي بيحاول يجمع الشيشات دي لاهداف نبيلة

ايوب: وهيكون في قصة حب عشان الحبكة وكده ؟

سعيد: طبعا بين سعيد بوتر والبت بتاعة القهوة اللي بتعمرله الشيشة

ايوب: وهي ليها دور في الشيشات وتجميعها ؟

سعيد: اكيد ده هي اللي هتساعده في تجميع الشيشات السبعة العظيمة

ايوب: ده هيبقي فيلم هيرج مصر

سعيد: (يشد نفس): يرج؟ بس علي الله متفورش هع هع هع هع هع

ايوب: اديني نفس معاك عشان اكتب السيناريو


وبعد مرور اسبوع

سعيد: استاذ ايوب اتاخر ليه ومقاليش عمل ايه

عطية: تلاقيه بس مشغول في السيناريو يا برنس متقلقش


ويدخل استاذ ايوب

سعيد: ايه يا استاذ ايوب انت فين يا عم

ايوب: انا كنت بعرض فيلمك في مكان كده اسمه الساقية ولاقي استحسان رهيب هناك وشالوني علي الاعناق

سعيد: ساقية؟

ايوب: ده مكان للمثقفين الكبار اللي بيحبوا التغيير والافكار العظيمة

سعيد: وعجبهم الفيلم

ايوب: دول كانوا بيسقفوا علي كل مشهد وبالذات مشهد الحصول علي الشيشة الذهبية في النهاية واخر نفس في الفيلم

سعيد: وانا ليا دور؟

ايوب: دول عايزينك تديهم ندوة في الابداع اللا متناهي في حيثيات الزمن البغيض

سعيد: يا سلام عز الطلب ده تخصصي الزمن البغيض ده




وبعد مرور سنوات اصبح سعيد المرعب المحشش اسما كبيرا في الساقية واصبح الحشيش هو السمة المتداولة هناك
واصبح شعار المكان هو الشيشة الذهبية والتعميرة وافكار سعيد دائما ما تلاقي رواج واستحسان هناك
وحضر كل رواد المكان العرض الخاص لفيلم "سعيد بوتر والشيشة الذهبية"
وكان الماسترسين هو تجميع الشيشة الاخيرة وشد النفس بلهفة وشوق كبير
ودي كانت قصة سعيد المرعب ..وازاي بقي مشهور كيك

Monday, March 1, 2010

خــايف أقــابل الــراجل ده













كل ماالسنين بتمر ببتغير قوي مخاوف الشباب والبنات يعني في الجاهلية كانوا يخافوا يهجم عليهم ديب او يطلع عليهم تعبان في الخيمة مثلا
دلوقتي الواحد بيخاف لحسن التكييف يبوظ او الهارد يتفرمت ومن احد كوابيس الشباب الجديدة كوابيس الامتحانات الشهيرة اللي هي بتبقي مش لاحق تخلص الامتحان والحاجات دي

وفي كمان كابوس "الهارد ديسك" يمكن ده احدث نوع نازل من الكوابيس ..ممكن تحلم بجهازك بيبوظ او هاردك او موبايلك

ومن مشاهد الحلم :

واحد بيعدي من جنبك وانت نايم بليل وفجأة "طخخخخ"
انت : انت مين وعايز ايه ؟

الحرامي: انا جاي اقتلك واسرق فلوسك نياه نياه

انت:ايه نياه نياه دي ؟ ده انت شرير كيك.. وهتاخد الموبايل ولابيس يعني عشان عليه رسايل عايزها وكده

الحرامي: لا مش طالبة موبايل

انت: طيب اتكل علي الله

الحرامي: ايه ده ده انت بارد قوي..طيب هارفمتلك الهارد بتاعك واخد حاجتك كلها منه

انت: لا وحياة ابوك بلاش اقتلني بس سيب الهارد

الحرامي: وكمان هاخد كلمة سرك في الفيس بوك واديها لدار ايتام يخشوا كلهم علي حسابك

انت: ابوس ايدك يا مستر حرامي ..انا غلبان وحرام عليك اقسي عذاب ده الا هاردي الا هاردي الا هاردي اااااااااااااه


وبعدين تصحي وتجري تتطمن علي الجهاز ! وده حلم "سيس قوي"




وطبعا البنات ممكن تعيط لسبب تاني خالص
تلاقي بنت بتعيط عشان موبايلها اتسرق وتقول
"في داهية الموبايل انا كنت عايزة الرسايل والاسامي اللي عليه اهئ اهئ "
وولد ممكن ينهار لو الكوليكشن بتاع اسطواناته جه عليه مية وباظ
وتجد معالم الحسرة كأن بالظبط حد ماتله ..يعني الالكترونيات دي جت تكحلها عمتها زي ما بيقولوا
وخلت الواحدخايف علطول

وفي المشهد الشهير بتاع فيلم "اوقات فراغ" كان بيقولك "خايف اقابله " وكان مشهد مؤثر
ولكن دلوقتي في ناس بتقول نفس الجملة بس من منطلق تاني خالص :


واحد موبايله باظ وبتاع الصيانة جايله عشان يقوله هينفع يحافظ علي الحاجة اللي عليه ولا هتروح وهيتفرمت فيقعد يقول "خايف اقابله..خايف اقابله"

وواحد تاني رايح انترفيو يبقي برضه خايف يقابل المدير الجديد

وتلاقي مشكلة تؤرق كل الناس اما ييجي يشتري موبايل جديد لسه هنقل الاسامي والرسايل والله ما انا شاري يا اخي
وكأن مكانش في ورقة وقلم زمان ولا نوتة تليفونات !



ونفس الكابوس يتكرر تاني نياه نياه :

انت: عايز ايه تاني ؟

الحرامي: يا عم انا واحد تاني

انت: مش انت بتاع الكابوس اللي فات؟

الحرامي: لايا برنس انا جديد لسه

انت: وعايز ايه يا عم الجديد

الحرامي: انا بقي هاسرق كل اساميك من الموبايل وهاخد رسايلك ونغماتك وفيديوهاتك وصورك واسيبلك الموبايل ب "اعدادات المصنع" زي ما بيقولوا

انت: هم مين اللي بيقولوا؟

الحرامي: يعني ده اللي همك يا لوح ؟

انت: اه معلش ارجوك متعملش كده اديك قد تمنه مرتين بس يبه ارجوك

الحرامي: نياااااااااااااه نياااااااااااااااه هااااااااااااااااااااااااا

انت: ياه ده انت شرير قوي المرة دي استر يارب


وطبعا تصحي تجري ع الموبايل ولو "سيس" قوي ممكن تحضنه وتبوسه



ويخرج مجموعات الشباب الي الشارع او المدرسة لتحية الهارد الكبيرة والتكنولوجيا الحديثة :

" كله الا هاردي..
هاردي هو عرضي..
ابرته في سماي
ا
وجيجاته في ملامحي
حتي لوني قمحي
لون خيرك يا هارد
..
هارد..اااه هارد.."


واغنية تانية للفيس بوك :

"مشافش الرجال اااااااه
في كتاب الوجوه
ولا شاف الصور "واحد يقول : امال شاف ايه يا حاجة ؟ "
مشافش العيال
واستيتس كتيييييييييير
والفيديو اترفع "هو كل حاجة مشافش؟ هو اعمي ولا ايه؟ "
اصله معداش ع الفيس بوك
اصله معداش ع الفيس بوك
يا حبيبي يا بوك يا بوك
يا حبيبي يا بوك
يااااا بوك "



و الفيس بيه اصملة عليه ..وسلملي علي فيسك يا اسماعيل بيه ..