Monday, January 28, 2013

معتــز و نــادية..قصة قصيرة






"نادية"
"خدي يا نادية"

هكذا كان يناديني خالي منذ سنوات طويلة في طفولتي ..لم يشكل الأمر مشكلة لانه بغرض المزاح فقط ..كنت خجولا جدا في صغري من "الشورت" القصير الذي كنت أرتديه في نفس الوقت كان الجميع يشاهد أفلام للنجمة في هذا الوقت "نادية الجندي" ..

بالطبع لم نكن حينها أي منذ حوالي عشرون عام نشاهد علامات هوليود الخالدة بل كل ما كنا نحصل عليه من نوادي الفيديو المنتشرة في هذا الوقت هو أفلام نجمة الافلام البوليسية وافلام الجاسوسية نادية الجندي..

لا أعرف ما هو سر الخجل الدامي والذي كان يتسلل في عروقي كما لصوص الليل حينما أشاهد نادية الجندي ..والذي دفع الجميع الي مقارنة الشورت الذي ارتديه بملابس نادية الجندي ليثيروا في نفسي مزيدا من الخجل لدرجة ان أهرب الي غرفتي او احاول شد الشورت قليلا لعله يصبح أطول كما كنت أتخيل !!

يشرب غليونه في هدوء حذر ويشير بأصبعه الي وجهي : يعني الكلام ده مأثرش فيك ؟؟

قلت له : الكلام ده من عشرين سنة وكنت بشوفه نوع من الهزار مش مشكلة يعني

قال : انا مقولتش انه حالة
Dissociative identity disorder
انك ساعات بتكون نادية ..وساعات بتكون انت..انت ليه اتعصبت ؟؟

قلت : الفكرة عندي بعقدة الذنب حاليا اتجاه نادية..مش اني بكون نادية..ساعات بقول انا كنت ليه بتكسف قوي كده ؟؟ هو ليه اما واحد يقولك "يا نادية" بتحس بالجرح؟؟ هو كونك تتقمص دور أنثي ده شئ عيب ؟؟هي الأنوثة جريمة في مجتمعنا ؟؟ كل ما كنت بغطي جزء من رجلي انا كنت بحاول استر علي المرأة مش علي نفسي..حاسس انها فضيحة اني اكون "ست"  رغم انها كل المجتمع ونصه العاشق..

قال : وده أثر عليك أما حبيت ؟ يعني حبيت بدافع الحب وكمان بدافع تعويض المرأة عن اللي انت بتعتقد انه اهانة ليها اما كنت بتشد الشورت في طفولتك ؟

قلت : الاغرب من كده لعبة القدر والحروف ..يوم ما حبيت حبيت بنت لو بعثرت حروف نادية هتلاقيها فيها ..تقدر تقول فصام الفصام ..وبقت عملية الشخصيات هنا اشبه بخلية نحل ..!!

قال : فصام الفصام ؟؟ طيب هي حست بيك كعاشق ولا كمان كمدافع عن المرأة او حست انك بتحاول تعوض حاجة فيك عن طريقها او بتحاول تعوض بيها ذنبك اتجاه خجلك من المرأة وانت طفل ؟؟

قلت : بالعكس البنت مش عايزة مدافع عن الحريات ..البنت عايزة تشوف فيك انت الحرية وفي الحب الحرية اللي ممكن تكون اتحرمت منها وممكن تكون عايزة تكملها ..هي عمرها محست بشخصية تانية جوايا بتحاول تدافع ولكن انا كنت بحس بالشخصية دي اما بأكتب ..

قال : ازاي ؟

قلت : يعني كنت في كتابتي ساعات كتير بتغاضي عن الهجر اللي كان بينا او بحاول أبرره وساعات بدور ليها علي حق فيه وساعات كنتبحاول اقول انا السبب الوحيد مش القدر ولا هي مسئولين بنصيب فيه..وساعات كنت بصور انه محصلش اصلا ..

قال : يعني بتهرب من مجرد تصور الفكرة ؟

قلت : انا لحد دلوقتي بكتب لها كأنها قدامي بالظبط..عارف قصة "بجماليون" انا حاسس اني قاعد ارسم تمثالها ليل نهار علي أمل انه يتحول إمرأة حقيقية والقصة تكتمل من جديد..

قال : لكن يوم ما حسيت بببداية الانفصال هل ظهرت عليك شخصية نادية ؟؟او بلاش شخصية نادية عشان انت بتتضايق..هل ظهر عليك دور المدافع عن المرأة ؟؟

قلت : يوم الهجر هو يوم خروج الروح من الجسد الأخر وهو يوم الحزن الوحيد لأن اول ما بيحب الانسان بتخرج روحه وتسكن في محبوبه فبيكون من المشهد غرقان في الحب والعشق ومش شايف روحه وهي بتخرج ولكن يوم الهجر بيشوف روحه وهي بتطير بعيد وبتخرج من جسد محبوبته فبيكون اصعب يوم..عارف زي ما قال خليل مطران :

فَـكَـأَنَّ آخِـرَ دَمْـعَةٍ لِلْكَوْنِ قَدْ    **    مُـزِجَـتْ بِـآخِـرِ أَدْمُعِي لِرِثَائِي
وَكـأَنَّـنِـي آنَـسْتُ يَوْمِيَ زَائِلاً    **    فَـرَأَيْـتُ فِي المِرْآةِ كَيْفَ مَسَائي


قال : اه قصيدة المساء لخليل مطران ..ذوقك حلو..دي من اجمل ما قرأت ..

قلت : محدش بيحس بمساء مطران الا اما يعيش لحظة هجر حقيقية لأن دي لا يمكن تخيلها علي الورق..هي لحظة السكر الحقيقي ولا كل خمور الدنيا ممكن توريك سكر لحظة هجر وفراق

قال: لكن انت بتلتمسلها العذر ؟

قلت : ساعات بفكر انها عاشت حالة "نادية" زي ما انا عيشتها ..ممكن يكون برضه عندها نفس القصة بإسم رجالي مثلا ..عارف زي قصة عينيك قدري لغادة السمان قريتها ؟

قال : لا بصراحة.

قلت : هي برضه كانت بنت من صغرها معيشينها حياة الراجل لحد ما كبرت وحبت فبدأت تهرب من الحب لكن في النهاية اعترفت ان عيون حبيبها هي القدر ..

قال : اه انت بتحاول تدورلها علي مبرر انها سابتك لدرجة انك تنسبلها عقدك نفسها ..انت مضحي قوي مش كده ؟
ده بيسموه
.remorse
انت ندمان كأنك عامل جريمة مش بحس احساس بالذنب انت حاسس بالندم علي خجلك من نادية زمان وكأنك دلوقتي عايز تعترف بيها كأبنه شرعية لروحك

قلت : تقدر تقول مش عايز اتخيل انها غلطانة لأني مستني يوم الرجوع وده بيحصل بين القلوب اللي انفصلت عن بعضها في حالة انهم فعلا كانوا قلب واحد وانا مؤمن تماما اننا كنا قلب واحد ..

قال : انت جاي هنا دلوقتي عشان عايز تخرج من شخصية نادية اللي ساعات بتكتب بيها وتكتب بشخصية تقدر تلوم علي الحبيبة ..انت عايز تلوم عليها لكن المرأة اللي جواك او جزء منها جواك مخلياك مش قادر تلومها انما بتلوم نفسك بس..دي حالة عكس الكبرياء لكن مش ذل ..صراحة انا مستغرب..

قلت : أنا نفس ألومها وأكتب موضوع كله قسوة في حقها لكن مجرد ما ببدأ في ده القلم مش بيطاوعني وببدا أدافع عنها أو أبدأ في حالة غزل مجنون معرفش اقوم الا اما اخلصه..

قال : هتجيلي تاني جلسة واتنين وعشرة لحد ما نقدر نخرج منك روحك المستسلمة دي لروح تقدر تهاجم وتقدر تشوف مين اللي هجر ومين اللي لازم يعاتب بعين مجردة ..


وبعد عشرين جلسة أحسست بموت نادية تماما وبدأت أتذكر يوم الفراق الذي لا نعرف كلانا سببه حتي الأن..
حاولت أن أهاجمها علي الورق في احدي كتاباتي..
مسكت القلم وبدأت أحرق نادية تماما

كتبت أول سطر..أحسست بفرحة عارمة..كتبت "أيتها المرأة اللعينة..أيتها الماكرة ال....
فجأة توقف قلمي..

شطبت كلمة "اللعينة"
وكتبت من جديد "ايتها المرأة الجميلة..أيتها الماكرة الحسناء"

لا أعرف كيف أقتلها داخلي ان كانت هي تقتل كل كلماتي..
ومازالت حالة "نادية" تعاود قلمي
ومازلت جسد رجل تسكنني روح إمرأة..

Sunday, January 27, 2013

شمـــس وقمـــر 40







**هي مجرد شعرة..
بين الحياة والموت..وبين الحقيقة والسراب..
المتفائل يظل يتحسس نعومتها..
والمتشائم يحاول شدها كل يوم..
والعاشق يسير عليها كل يوم.."مخاطرا"ما بينهما..و "خاطرا" في عقلهما..



**الفن هو حياة الاستلهام من اجل استلهام كل معاني الحياة.


** معركة الحياة لن يربحها معسكر الخير او الشر
بل من ينتظر النتيجة بقلب مطمئن.



* لا تكن كما الفارس اذا انظلمت المعركة اعلن استسلامه ..
بل كن كما السيف يملك لمعة في الهزيمة كما يملكها عند النصر .



**هناك فرق بين الاعجاب والحب..
الاعجاب هو شراهة القلوب الي الجمال..
بينما الحب هو شراهة الجمال الي القلوب.



**المرأة هي من تفقد كل العالم بحثا عنها..
ثم تستعيد كل العالم بحبك لها !



** ليس الحب في ان يري الله دموعك..
بل ان ينعكس ضيائه علي كل دمعة منها.



** الحكم كما اوراق الكوتشينة
الحاكم دائما "الشايب"
 والشعب دائما  "يبحث عن الولد"  !!



** من يقتلوا ارادتك واحلامك
 اخطر ممن يريدون قتلك.



** الزوجة الصالحة هي من تري زوجها هو كل الناس..
وليست من تري زوجها في كل الناس .



** الحب عش والزواج عش
 ولكن الزواج عش في مواسم الهجرة الدائمة !!



** قالت : الا تخاف مني حينما تسمع جملة "العذاب إمرأة"  ؟؟
قلت :  ولماذا أخاف منك ؟؟.."العذاب إمرأة نعم..ولكن لليس للملائكة نصيب من الصفة" !!




**يتعذب الرجل حتي يجد حبه..
وتحب المرأة حتي لو وجدت فيه عذابها..



** تظن بعض الزوجات ان الزوج يفقد احساسه بالغيرة..
فتقول سأكلم فلان وفلان من الرجال بإسم الصداقة..بينما أترك لك جسدي منزه عن الخطأ ..
هي لا تفهم ان كل الرجال يرون ان عذرية الروح في اهمية عذرية الجسد ..!!




** قالت :  هل رأيت في عيني جمال الخلود فعلا ؟
قلت: بل رأيت في عينيك خلود الجمال .


Saturday, January 26, 2013

معرض الكتاب في مصر..حالة من الفوضي وانعدام التنظيم





كنت في زيارة لمعرض الكتاب اول يوم وتاني يوم وهاقول لكم ملاحظات علي المعرض ولماذا يبقي الحال كما هو عليه ولا نستطيع تنظيم معرض دولي او اي محفل علي مستوي لائق طالما ادارة التنظيم بهذا المستوي :



1- المعرض اول ما تيجي تدخله هتدخل من الباب اللي هو قريب شوية من فتحة شراء التذاكر ودي غلطة قديمة اساسا في تصميم المعرض بحيث ان اللي بييجي من الناحية التانية كل شوية يخترق الطابور ويقول "لو سمحت يا جماعة اعدي بس رايح اشتري تذكرة" !!


2- مافيش اي خريطة عليها القيمة جوة المعرض وبشكل واضح وكبير عشان نعرف فين الصالات وفين الندوات وتواريخها


3- لو سألت عن اي ندوة في سراي 6 اكتوبر ابقي قابلني..كنت رايح احضر ندوة في سراي 6 اكتوبر قعدت 3 ساعات أسأل واحد يقولي "دي اتهدت اساسا" وواحد يقولي أسأل الأمن وواحد يقولي في الأخر إسأل المبني اللي هناك ده ده بتاع الاستعلامات.واول ما تروح الاستعلامات تشوف الروتين بعينه ورقة وقلم بطريقة "روح يا نوفمبر تعالي يا نوفمبر" في الفيلم القديم وفي الاخر تقولك مافيش ندوة اسمها كده اتأكد من الاسم رغم ان الندوة شغالة اساسا !!


4- مافيش اي لوحات وانت ماشي فوقك زي المولات كده يعني اسهم ترشدك علي اتجاهات المناطق حتي بلاش الصالات يعني اعرف ان دي منطقة سور الازبكية ولا فين بالظبط


5- سور الازبكية اللي فيه كنوز ونوارد من الكتب مشكلته الرئيسية النظام يعني ممكن تلاقي كتاب العقاد جنب مجلة ازياء وتقعد تقلب وخلاص لكن دي مش هيقدروا عليها لانهم بياعين بس مش مجموعة مثقفين منظمين المكان


6- عن المطاعم والأكل حدث ولا حرج لو بيعتبروا ان ده معرض دولي للكتاب وحاشا لله انه يكون "دولي" بالمستوي ده هتلاقي مطعم كشري علي مطعمين تعبانين ومافيش كراسي تكفي ربع العدد حتي ولا صالات محترمة لوفد مثلا او ناس عايزة تقعد في مكان محترم تاكل فيه بعد تعب اللف علي الكتب.


7- النصب قدام المعرض عيني عينك للناس اللي بتخليك تركن ..تقطع ورقة الاول وبعدين تدفع بقشيش جوة وانت داخل ووانت خارج او تتخانق مع السايس اللي بيحاول سرقتك بشكل رسمي وبورقة مضروبة كانت في يومها الاول بخمسة جنيه وتاني يوم غيروا الورقة بقت ب 7 جنيه !!


8- الندوات والخيم الابداعية كأنك قاعد في الشارع ولا ليها باب ولا ليها احترام بسبب ان اي حد يخش يقاطع في اي وقت يشد باب الخيمة ويخش ويقطع حبل افكار الناس اللي قاعدة بدل ما يكون في مواعيد واحترام للندوة


9- مافيش اي حد يرشدك جوة ويكون ليهم زي موحد عشان يوجهوا الناس ولكن بتعتمد علي نظام التجربة والخطأ


10- المعرض للأسف وصمة عار من الناحية التنظيمية ويجب انهم يشيلوا كلمة دولي من وصف المعرض ..وكانت السنة دي ضيف الشرف ليبيا ودي الصالة الوحيدة اللي ممكن تلاقي فيها بعض الاهتمام عشان ضيف شرف اما باقي الصالات حدث ولا حرج.



11- المعرض شبه خالي من الأمن يعني لو تحصل اي مشادة او مشكلة جواه سيبهم يتصرفوا مع بعض !!




معرض الكتاب في مصر محتاج تطوير لسنين وسنين لأن بالمستوي ده ميبقاش معرض كتاب انما تقدر تقول سوق كتب في مكان شعبي ده اقصي طموحه وخروج المعرض بالصورة الفوضوية الغير منظمة دي مسئولية كل القائمين عليه ولابد من وقفة لاعادة احياء المعرض بشكل اكثر تحضرا.

Sunday, January 20, 2013

أوسكار 2013 ولا صوت يعلو فوق الدراما..الجزء الثاني








في الجزء التاني ده هنكمل موضوع الافلام المرشحة لاوسكار وتفاصيل عنها..





5-Argo

الفيلم مرشح ل 7 جوائز اوسكار

الفيلم عن عملية بتتنفذ بذكاء شديد من القوات الامريكية عشان ينقذوا 6 رهائن محبوسين في ايران بعد الثورة الايرانية ..وكان الايرانيين خدوا رهائن كتير بعد اقتحام السفارة الامريكية لكن في 6 قدروا انهم يهربوا ويستخبوا ومطلوب من القوات انها تشوف حل وتخرجهم من ايران في مهمة صعبة للغاية قدروا ينفذوها عن طريق مساعدة مخرج اتفق معاهم انه هيخش ايران بحجة فنية لاخراج عمل وكده.

الفيلم من الافلام السياسية اللي بقينا بنتعود نشوفها في الاوسكار زي مثلا فيلم
the hurt locker
من اخراج كاثرين بيجلو اللي فاز ب 6 جوائز اوسكار.
وكان معاه في نفس التنافس فيلم
Inglourious Basterds

والسنة دي برضه 3 افلام سياسية واحد منهم سيرة ذاتية وهم
argo
lincoln
zero dark thirty







6-Django Unchained


فيلم رائع من بطولة نخبة من النجوم ومرشح ل 5 جوائز اوسكار .

الفيلم من افلام "الويسترن" وطبعا لو شوفت كمية افلام الويسترن في قائمة افضل 250 فيلم علي مستوي العالم في موقع
imdb

هتعرف ان الافلام دي محبوبة جدا وليها جمهور عريض ومن اشهر الافلام دي :

The Good, the Bad and the Ugly
Once Upon a Time in the West
For a Few Dollars More

اما من اشهر اقوي افلام الويسترن واللي فاز ب 4 اوسكار هو
Butch Cassidy and the Sundance Kid

نرجع للفيلم بتاعنا ونقول ان قصته بتدور حول "دكتور كنج" اللي هو اصلا محقق للعدالة او صائد مكافأت زي ما بيسموه في افلام الويسترن وهو بيصطاد المجرمين مقابل مبلغ من المال يعني بيقبض دايما علي اللي صورهم بتلاقوا مكتوب عليها
wanted

والدكتور كينج ده راح حرر عبد اسود اسمه "جانجو" وساعده في اصطياد بعد الرؤوس اللي كان عارفهم جانجو وبعد كده دار الفيلم حوالين ازاي يدخلوا علي "ليوناردو دي كابريو" رجل الاعمال الغني المهووس بالعبيد ومصارعة العبيد وازاي يجيبوا زوجة جانجو المحبوسة جوة قصره ويخرجوا بيها في عملية معقدة للغاية.
ويدخلوا عليه بحجة انهم خبراء في عمليات شراء وبيع العبيد وعايزين يشوفوا افضل ما عنده لكن هم في الاصل داخلين بيته عشان ياخدوا زوجة جانجو ويخرجوا بيها..ويعرف ليوناردو دي كابريو الحيلة دي ويثور ويتجنن عليهم للغاية ويبدأ في اداء مشهد عنصري شديد ضد السود ويمسك جمجمة عبد اسود ويبدا يكسرها قدامهم وهو عنصري درجة اولي في الفيلم لدرجة انه بيسيب الكلاب تنهش في العبيد السود في مزرعته وبيضربهم بالكرباج.

ويكتب معاهم عقد بتمن رهيب مقابل زوجة جانجو ولكن تتطور الاحداث بعد اما يقوم دكتور كنج بقتل ليوناردو دي كابريو بعد ما كتبوا العقد عشان تقوم مجزرة جوة البيت تنتهي بمقتل عدد كبير ويمكسوا جانجو ويعذبوه ولكن يهرب منهم ويرجع البيت تاني ويقتل الجميع ويخرج بمراته في نهاية سعيد بعد قتل حفنة العنصريين كلهم.

الفيلم رائع جدا ومشوق من اول دقيقة ويستحق المشاهدة ويستحق الجوائز المرشح لها.







7-Zero Dark Thirty

فيلم سياسي عن عملية تصفية بن لادن وتحديد موقعه والفيلم مرشح ل 5 جوائز اوسكار.

تاني بترجع لنا المخرجة اللي غاوية افلام سياسية وهي المخرجة "كاثرين بيجلو"  اللي اخرجت فيلم
the hurt locker

وبيبدأ الفيلم بعملية تعذيب من القوات الامريكية لبعض العناصر اللي مسكوها عشان يبدأوا يعرفوا منها بعض الخيوط ويوصلوا لمرسال بين بن لادن واكبر مساعديه عن طريق الصور والوصف احيانا لحد ما يحددوا موقع بن لادن ويشكوا انه يكون جوة البيت اللي راقبوه فترة ويبداوا عملية اقتحام رغم عدم ثقتهم الكاملة الا فقط ثقة مطلقة انه جوة البيت من قبل بطلة الفيلم
Jessica Chastain

وكانت بتؤكد بعد سهرها ليالي علي خيوط الموضوع انه جوة المنزل ده وفعلا قدروا يوصلوا في النهاية ل بن لادن ويقتلوه .






8-Amour


الفيلم مرشح ل 5 جوائز اوسكار

فيلم درامي رائع ومؤثر للغاية من افضل افلام السنة وهو بيحكي عن زوجين عاشوا معا حياة مليانة حب لحد ما فجأة الزوجة اصابها مرض ادي بيها لحالة شلل وهي عايشة فقط مع زوجها ويبدأ زوجها يرعاها ويأكلها ويشربها ويعملها كل حاجة وهي حاسة انها عبئ عليه وبتبكي كل يوم علي حالها اللي وصلت ليه وجوزها يضحي بايامه كلها من اجل زوجته المريضة وبدأت ترفض الشرب والطعام وبدأت تقبل علي فكرة الموت وفجأة في مشهد غريب يقوم الزوج بخنقها بالمخدة عشان يريحها من المعاناة اللي هي عايشاها لانها فقدت الحركة والكلام وبدأت ايامها كلها عذاب وبكاء ففضل الزوج انه يريحها من المعاناة دي ومات هو ايضا في نهاية الفيلم.

الفيلم حزين للغاية وبطئ الاحداث ولكنه قصة تضحية وقصة حب بين زوجين حتي اخر عمرهم.






9-Anna Karenina

يالها من قصة وياله من فيلم..الفيلم مرشح ل 4 جوائز اوسكار

من اروع روايات "تولستوي" رواية "انا كارنينا" ضحية الحب ام ضحية المجتمع ؟ ضحية الطبقية؟ ضحية الاهمال ؟ ام ليست ضحية علي الاطلاق بل مذنبة..وفقط مذنبة ؟
ده اللي بيدور حوله الفيلم والرواية حول زوجة متزوجة باحد السياسيين في بلدها عايش حياة تقليدية تحكمها التقاليد ولا يحكمها الحب بشكل كامل ..تخرج زوجته لمحاولة الصلح بين اخوها وزوجته الا انها تقع في حب شاب يعيش حياة عسكرية احبها من اول نظرة وهام بجمالها وتبدأ تقع في علاقة معاه يرفضها المجتمع وتعترف لزوجها بحبها لشاب اخر وتبدا حياتها المعذبة بين حصولها علي الطلاق اللي هيجعلها بلا زوج ولا مأوي وساقطة في نظر المجتمع او اكمال حياتها مع زوجها او مع حبيبها ..

ويبدأ المجتمع بالكامل في البعد والنفور عنها باعتبارها "اثمة" لدرجة ان محدش عايز يقعد جنبها وبدأت تشك في كل حاجة حتي حب حبيبها ليها انه اتغير وان امه بتنظر ليها نظرة مش سليمة زي المجتمع وعايزة تجوزه بنت سمعتها افضل..لدرجة ان تنتحر في النهاية تحت عجلات القطار وفي النهاية يرعي الزوج ابنه وكمان بنتها من العشيق في وقت واحد ويربيهم مع بعض.


الفيلم بيوريك خطيئة ولكن بيوريك برضه المجتمع الذي لا يغفر ولا يسامح ..المجتمع السريع في اطلاق الاحكام وتعميمها والنظرات الطبقية في روسيا في الفترة دي.

طبعا تمثيل "كيرا نايتلي" اكثر من عبقري كالعادة وانا باعتبرها من افضل الممثلات في العالم باقتدار عن مجمل ادوارها وما اجمل لكنتها الانجلييزية الجميلة الناعمة السلسة.
هي من اكتر الناس اللي بيمثلوا ادور تاريخية او قصص وروايات شهيرة زي فيلمها زمان
pride and prejudice

وحكم المجتمع عموما وسيفه الحاد ممكن يفكرك بقصة "حادثة شرف" ليوسف ادريس او رواية "البؤساء" لفيكتو هوجو او الفيلم الدرامي الرائع
Chocolat





10-Beasts of the Southern Wild

الفيلم مرشح ل 4 جوائز اوسكار.

فيلم رائع بيتكلم عن حياة الفقر اللي بتعيشها بعض المناطق المنكوبة وازاي طفلة صغيرة عايشة مع والدها في منطقة غرقانة بالفيضانات والعواصف لكن كانوا سعداء في مجتمعه بل بيقيموا الحفلات

اكتر من المدينة وكان فرحهم وحفلاتهم اكتر بعيدا عن المدينة والمها ووجعها لحد ما جه الفيضان الاخير وبدأت المستشفيات تاخدهم للعلاج كمتضررين من الحادث لكن بيهربوا وبيحنوا لمكانهم القديم في حضن الطبيعة وسط وحوش برية كبيرة وضخمة هي اسقاط علي من اهملوهم وتركوهم في الحالة دي .

فيلم عن السعادة تحت اصعب الظروف وان السعادة مش بس بالحياة في رغد وترف المدينة بل بالسعادة الداخلية والاطمئنان والحب..حتي ان والد الطفلة في الفيلم كان دايما يقولها ان البلد اللي انتي شايفاها هناك دي بتحتفل اقل مننا ..وكان يقصد ان هم عايشين في سعادة اكتر من بعض الناس اللي عايشة في المدينة .





ودي مجموعة افلام الاوسكار وننتظر حفل الاوسكار في فبراير ونشوف مين اللي هيحصد اكبر عدد منها .




Thursday, January 17, 2013

حارسة الفردوس ونهر المرمر وأبدية الحب







علي حافة نهر المرمر في زمن ما..
بين جحيم الحب و "غفران" عينيها..
أصابتني الصاعقة الأولي..



قالت : احذر يا هذا..الحذر الحذر من نهر المرمر..ظاهره الصفاء وباطنه صراخ ودماء..

قلت : لا عاصم لي اليوم من عينيك..لا اهتم بنهر المرمر ..فالغارق في نهر عينيك أولي بتحذيرك..

قالت : كيف إقتحمت عالمي ؟

قلت : لم أفعل..بل إقتحمني عالمك..فجعل من أوردتي خطوط طول وعرض علي خريطة فردوسك..

قالت : أخاف من كلمات الغزل ..أخاف أن تسحبني معاها الي غياهب نهر المرمر ..ليس لي فردوس ..انا حارسة الفردوس..

قلت : أولي لألف فردوس أن يصبحوا حراس رموشك..ان حراستك للفردوس لهي كحراسة ملاك خالد لبشر فان..أه يا حبيبتي لو أستطيع أن أهبط معك الي عالمي..
أخاف أن أبقي في عالمك..فالمثالية فيه ترهب حتي طموح الكمال في نفسي..

قالت : سأدلك علي سر نهر المرمر..وقد أصبح حبيبتك ونهرب بقبس من الفردوس الي عالمك وعالم الحب..

قلت : وما هو السر يا مالكة الاسرار ونوارة الأقمار..

قالت : تقسم للنهر..
تقسم للنهر علي حبك..

قلت : أقسم

وفجاة انشقت السماء وقالت لي الملائكة : اتقسم يا هذا علي عشقك لحارسة الفردوس ؟

قلت : أقسم

قالت : ومن انت لكي تحيا في خلود الفرسان وسحر الغزلان ؟

قلت : انا صنف من الالم وصنفان من العذاب واربعة من الدهشة..صاعقة القدر حاضرة في وبشدة..

وكاني أصبحت كما كأس الخمر..أحمل كل خمور الحب ولا أسكر..
وقلت :

اقسم يا أميرتي بتلك الزهرة..
 ان اكون مفسر احلامك وساحر أيامك..
ساكون لكي كما تولستوي ..حرب الكلمات وسلامها

أقسم ان تكون فتوحات غرامي بين عينيك
أقسم أن أبني في قلبك ممالك أتغرب ما بينهما كما تغربت بين الرغبة والرهبة أمامك..

أقسم بالبنفسج أن أستكين حين تقول لي عينيك :
"إخلع نعليك انك بوادي جمالي"

اقسم علي شقائق النعمان
وعلي قلبي الذي لم يمسسه انس قبلك ولا جان
أن أعيش في محراب أمنياتك حياة الرهبان
وأن أسير بقدسية حسنك بين الزهور والغدران..

أقسم أن اصطاد الغزلان في الغابة المسحورة لافرش جلدها قربانا لخطوتك..
وأن أسير بمصباحي كما "ديوجين" أبحث في نورك عن الحقيقة والأبدية..

وأن أنحت أول حرف من إسمك في نصف عقلي الأيمن..
وأخر حرف من إسمك في نصف عقلي الأيسر..
لتلتقين في كياني كحالة لقاء بين إبداعي وقدرتي..

يا مليكتي..يا عنفوان السماء..
يا أول فكرة خلقت جلال الحب..
إعتبريني أولي محاولاتك الشعرية..
اعبريني بكل اشكال الشعر وجنونه..
عمودي تخترقين به خلجات نفسي
أو شعر حر يقتلني من رأسي إلي إخمص قدمي..
أو إنطقيني إرتجالا وزجلا..أخرج من بين لسانك نشوان بالحروف ومخدر بين الواصف والموصوف..


أقسم أن أتوه في عينيك كما تاه القوم في "سنوات التيه"
وأن أصبح أمام عينيك "نشيد الأنشاد"
وسفر "الحب" في كتاب عينيك المقدس..

أقسم أمام نهر المرمر..
أن يصبح قسمي  "الله ..أنتي..قلبي"

يا تاج قلبي ..
قرأت أشعار الجاهلية ولم أزل أجهل جنون هالتك..
وقرأت اشعار صدر الاسلام ولم ازل انام علي صدر الشعر أتعزي من أنفاسه الخائفة لخوف روحي..
وأشعار درويش ولم أزل درويشا في حضرة صفاتك..

أقسم أن أجعل ألسنة الحب حبلي بالزغاريد..
وأوردته وشرايينه حبلي بقصص غرامي..

أقسم إني في عينيك عرفت حل ألغاز الأدب
عرفت "لماذا لا تنام الإسكندية"
و "لماذا يضحك البحر؟"
و "من الذي لا يحب فاطمة"
وعرفت لماذا قال "ايليا ابو ماضي"  "لست أدري" !!


أقسم أن لا أكون كما الفراعنة جزء من "كتاب الموتي"
بل أموت أفضل في كتاب الحب..

أقسم أن اجعل نبضك داخلي "حفلة أوبرا"
ونظل نتهامس ب "نوستالجيا" أيام المجد في عشقك..

أقسم أن لا أصبح مثل الفيلم الرومانسي
فلا يموت البطل كي يصبح الفيلم اكثر رومانسية
ولا يعيش البطل كي يعاني مرارة الهجر
بل أن أصبح معلقا في عينيك بين الخلود والفناء..

أقسم أن أفرش لكي طريق الحب بالسجاد الدمشقي..
وأن ازين كل طرائقه بالعسجد والاحجار الكريمة..
وأن أضع علي جنباته حمام زاجل يحمل رسائل الحب والغرام..


أقسم أن أصبح وحيدا متوحدا فيكي..
"مقطوع من شجرة"  فردوسك
"لقيط" أمام حنان عطرك..
"منفي" في ساحات قتال روما بين أسود رموشك التي لا أستطيع ترويضها..



وجف نهر المرمر..وقالت الملائكة كلمتها في النهاية :

" بالعشق عيشوا وللعشق موتوا..
مدوا حبال أرواحكم بين قلب الحياة وحياة القلب..
اليوم يا حارسة الفرودس نعفيك من موقعك لتعشقي هذا الفاني ولتعيشي معه حياة الخلود في أرض الفناء
اليوم أقسم وأنتي قسمه وقسمته..
عيشوا بالحب عيشوا في روح الحب "


ومازلت حتي اليوم أعيش مع حارسة الفردوس..
حتي وان كانت فقط في خيالي..
فكثيرا ما نهجر "رومنطيقية" الأرض
الي أرض "الرومانسية" الخالدة
ولو كانت في فرودس الخيال..
أو حتي قطعة من خيال الفردوس..

أحبك يا حارسة الفردوس..
وأهيم علي نهر المرمر..
للأبد..

Monday, January 14, 2013

أوسكار 2013 ولا صوت يعلو فوق الدراما..الجزء الأول







من ترشيحات الاوسكار رقم 85 اللي هيكون في 24 فبراير القادم تعرف ان لا صوت يعلو فوق صوت الافلام الدرامية..
الأفلام المرشحة لأفضل أفلام العام هي :

Amour
Argo
Beasts of the Southern Wild
Django Unchained
Les Misérables
Life of Pi
Lincoln
Silver Linings Playbook
Zero Dark Thirty


سنة مميزة جدا في الافلام الدرامية وافضل الروايات اللي اعيد احيائها من جديد زي رواية "البؤساء" لفيكتور هوجو او "انا كارنينا" لتولستوي وهم من اعظم الروايات العالمية .


هأبدأ الأول في ترتيب الافلام دي علي حسب من الاكتر منهم اللي اترشح لعدد من جوائز الاوسكار :



1- lincoln

اكتر الافلام ترشيحا السنة دي هو فيلم السيرة الذاتية للرئيس الامريكي السابق "ابراهام لينكولن" واترشح الفيلم ل 12 جائزة اوسكار والفيلم من بطولة "دانيل داي لويس" ومن اخراج المخرج الرائع "سبيلبرج" اللي تم ترشيحه الاوسكار اللي فات برضه لجائزة الاوسكار.

الفيلم  سيرة ذاتية لرئيس عظيم في التاريخ الامريكي وخاض حرب شرسة في فترات الحرب الاهلية عشان اصدار قانون لتحرير العبيد وهو بيعتبر في نظر الكثير من الامريكيين انه من اعظم رؤساء امريكا علي الاطلاق.
افلام السيرة الذاتية ليها نصيب مهم من جوائز الاوسكار زي مثلا الفيلم اللي اتعمل عن "غاندي" سنة 1982 وفاز ب 8 جوائز اوسكار ..وكمان فيلم
amadeus
وهو عن سيرة ذاتية لقصة حياة الموسيقار العبقري "موزارت" وبرضه فاز ب 8 اوسكار سنة 1984

او فيلم
The Elephant Man
اللي تم ترشيحه ل 8 اوسكار سنة 1980


ومن المؤكد ان فيلم لينكولن هيكون ليه نصيب هام من الجوائز السنة وطبعا اداء الممثل الرائع "دانيل داي لويس" في الفيلم ده تم ترشيحه لجائزة افضل ممثل وهو اصلا فاز ب 2 اوسكار قبل كده لانه من افضل الممثلين فعلا .
وكمان من نفس الفيلم اترشح الممثل "تومي لي جونس" لجائزة افضل ممثل مساعد .





2- Life of Pi

هنا بقي دخلنا في الافلام المأخوذة عن رواية وهو هذا الفيلم الرائع الشبيه الي حد ما بفيلم توم هانكس
cast away

الفيلم هنا اترشح ل 11 جائزة اوسكار وهو من بطولة الممثل الهندي الشهير "عرفان خان" اللي كان من ضمن افلامه الفيلم الرائع
Slumdog Millionaire

هو عن عائلة كان الاب فيها بيشتغل "حارس حيوانات" وقرروا يهاجرو علي ضهر سفينة ومعاهم بعض الحيوانات وغرقت السفينة واللي نجا كان الابن ومعاه بعض الحيوانات علي ضهر مركب صغير للانقاذ وماتت كل الحيوانات ولم يتبقي الا الشاب ونمر مفترس معاه وتبدأ هنا انسانية الشاب تبان اما النمر اللي يحاول يأذيه اكتر من مرة كان بيغرق ومع ذلك الشاب انقذه وبدأ يدربه ويصطادله سمك كمان وبعد العديد من الصراعات مع الطبيعة طول الفيلم من عواصف وامطار ينزل علي جزيرة ومعاه النمر ويمشي النمر في الغابة في مشهد مؤثر والبطل يلاقي اللي ينقذه ومع ذلك يبكي بحرارة ويقول ان سبب بكائه ان النمر مشي وسابه من غير وداع في علاقة رائعة جمعت بين انسانية الشاب مع حيوان مفترس .

والفيلم كله علي شكل حكاية بيحكيها البطل لكاتب قاعد معاه بعد سنوات من انقاذه علي الجزيرة بيحكيله كل تفاصيل اللي حصل وهو دلوقتي عايش مع اسرته في امان.

الفيلم عن رواية هي الاكثر مبيعا طبعا لو رجعنا لزمان فاكرين الافلام اللي عن روايات او حتي عن قصص قصيرة ومن اشهرها اكيد فيلم
The Shawshank Redemption
كان عن قصة قصيرة ل "ستيفن كينج"

وفيلم
Forrest Gump
اللي فاز ب 6 جوائز اوسكار برضه كان مأخوذ عن رواية وطبعا غيرهم من الافلام الكتير اللي اقتبست من اعمال زي كمان
Who's Afraid of Virginia Woolf?
للنجمة اليزابيث تايلور بس كان مأخوذ عن مسرحية وفاز ب 5 اوسكار.


الفيلم من الافلم المتميزة جدا هذا العام ويستحق الترشيحات دي كلها لانه من اكثر الافلام تاثيرا ودراما مميزة.






3- Les Misérables

"البؤساء" لفيكتور هوجو..نهر الابداع المتجدد الذي لا يموت ..رواية من الروايات التي اثرت وهزت العالم بأسره..
الرواية دي اتعملت فيلم اكتر من مرة من اول سنة 1935 لحد دلوقتي وكل مرة بتاخد تقييم عالي لكن المرة دي جه الفيلم علي شكل
musical movie

واه من الافلام الموسيقية لو تعرفوا تاريخها..شئ من وراء الخيال فعلا ..الافلام الموسيقية تحصد الجوائز بشكل جنوني..توصل الفكرة بسحر غريب..تشعل فيك الروح والأمل بطاقة غير منظورة..
يكفي اننا نعرف ان من اكثر الافلام فوزا في تاريخ الاوسكار كله 7 افلام منهم افلام موسيقية ومن اكثرهم حصدا للجوائز افلام :

West Side Story
اللي فاز بعشرة جوائز اوسكار
وفيلم
Gigi
اللي فاز ب 9 جوائز اوسكار
وفيلم
My Fair Lady
اللي فاز ب 8 جوائز اوسكار

وافلام كتير مميزة موسيقية طبعا زي فيلم
Cabaret
 An American in Paris
Chicago
Moulin Rouge

انا بعشق النوعية دي من الافلام الموسيقية اللي بتاخدك فيها لعالم خاص تستمتع بعالم الايقاع وسحر الموسيقي مع الحركة الرشقة المبهرة.
ومن اجمل وافضل النجمات اللي حبيتهم في الافلام الموسيقية الفنانة المميزة في الاستعراض
Leslie Caron


طبعا رواية فيكتور هوجو اما اتعملت بشكل موسيقي ازدادت رونق وشباب عن الافلام اللي اتعملت قبل كده عن نفس القصة الرواية دي مليئة بالحب والحياة والثورة واليأس والفقر والأمل في وقت واحد.

رواية كاملة تاخدك لعالم الفقر مرة والحب مرة والثورة في فرنسا مرة كل ده في وسط الصراع الشهير بين المحقق "خافيير" اللي قام بدوره الممثل المبهر "راسيل كرو" وبين الخارج من السجن "فالجان" اللي قام بدوره "هيو جاكمان" .
وهو الصراع بين الرحمة والقانون..القانون الصارم اللي عايز يطبقه المحقق بلا شفقة والرحمة اللي بيقوم بدورها "فالجان" اللي كان محبوس سنوات طويلة بسبب رغيف خبر فقط بسبب الفقر والحرمان..وادي العقوبة ومع ذلك يفضل العار يلازمه لحد ما يلاقي "قس" يساعده في طريقع ويديله بعض الفضيات تساعده في الحياة ويبدأ حياة جديدة ويبقي عندة مدينة فرنسية رحيم بالناس وعادل ويرجع تاني المحقق يطارده ويفتكر ان ده كان مسجون قديم مع انه قضي فترة عقوبته كاملة..وتبدا شفقته علي البطلة اللي قامت بأفضل ادوارها "انا هاثاواي" اللي قامت بدور بنت فقيرة ليها بنت صغيرة بتحاول تصرف عليها وتبعتلها الفلوس كل شهر ومع ذلك اتهموها في سمعتها وبدأ المجتمع يقوم بدور الجلاد لحد ما باعت شعرها واتجهت كمان للعمل كعاهرة عشان تساعد بنتها وقامت باكتر من استعراض غنائي في الفيلم باداء ابهرني وهز كل المشاهدين لادائها وتشبيهها في الاغنية للزمن والفقر بنمر يقفز علي احلامها اللي عاشت تحلمها وقالت احيانا العواصف بتكون اقوي منا ولازم يكون علينا الاستسلام .

وبدأ مشوار العادل "فالجان" انه يساعد البنت الصغيرة اما امها ماتت من كتر الفقر والاهانة وكانت وصيتها ل "فالجان" انه يلاقي البنت ويرعاها ويحافظ عليها وفعلا هرب من المدينة اما المحقق عرفه وراح يدور علي البنت ورباها معاه لسنوات معزول عن الناس عشان المحقق ميمسكوش تاني.
وبدات مرحلة الثورة في الفيلم  وقام الامن بقمعها بالمدافع رغم تخطيط الشباب ليها من فترة وقاموا بيها في وسط جنازة شخصية سياسية شهيرة وفي وسط الاحداث بيدور من جديد الصراع بين المحقق و"فالجان" ويقع المحقق في ايد فالجان ويبقي قادر علي قتله ورغم كده يعفو عنه ويحس المحقق بالقهر والتخبط الواضح وصراع الرحمة والقانون جواه خلاه يقوم بالانتحار في النهاية

وفي وسط الاحداث دي كلها تنشأ قصة حب جميلة بين احد الشباب الثوري والفتاة "كوزيت" اللي كان فالجان بيربيها من صغرها
وقام بدور "كوزيت" الممثلة
Amanda Seyfried

ويعترف فالجان بماضيه للشاب عشان يبقي عارف كل حاجة ويسيب البنت امانة في ايد شاب بيحبها ويتجوزها..ولكن من اكثر المشاهد تأثيرا في الفيلم مشهد موت فتاة كانت بتحب الشاب الثوري اللي بيحب "كوزيت" وكانت بتحبه من زمان وخايفة تصرحله بكده ووهي بتموت قالتله "انها مش حاسة بأي حاجة ولا بالجرح طالما هو حاضنها"
وماتت في حضنه في مشهد واستعراض درامي مؤثر للغاية

ومن اجمل جمل الفيلم في نهايته اما غنوا مع بعض وقالوا "أن تحب شخصا أخر فكأنما رأيت وجه الله"

الفيلم رائع جدا ويستحق العديد من الجوائز التي رشح لها وأظن ان "هيو جاكمان" من الممكن ان يحصل في الدور ده علي اوسكار افضل ممثل .والممثلة "انا هاثاواي" ممكن تفوز بافضل ممثلة مساعدة عن دورها وادائها البارع في الفيلم .






4- Silver Linings Playbook


هنا بقي ندخل علي فيلم رومانسي كوميدي ودرامي في نفس الوقت ومرشح ل 8 جوائز اوسكار.
الفيلم شيق جدا ويستحق المشاهدة عن قصة حب تنشأ بين اتنين عندهم اضطرابات في الشخصية اوما يسمي بالظبط
Bipolar disorder

حالة من التأرجحات المزاجية الحادة اللي بتجيلهم هو بسبب خيانة مراته وهي بسبب وفاة جوزها وخرج البطل اللي بيقوم بدوره "برادلي كوبر" من المصحة وبدأ يتعرف علي "تيفاني" اللي بيقوم بدورها الممثلة "Jennifer Lawrence"
وهو من اجمل ادوارها علي الاطلاق.

وبدات البطلة تغير حياتها تماما وبدأت تحبه بدون ان تصرح له بكده لانها عارفة انه بيحب مراته لدرجة انه قعد يوصيها انها تبعت الجواب لمراته وهي مستحملة كل ده وبتحبه سرا.

ويبدأ "برادلي كوبر " في البداية بداية صعبة جدا مع عيلته وخناقات كل يوم في بيته لأسباب تافهة جدا ويقوم بدور الاب الممثل الرائع "روبرت دي نيرو" وهو مهووس بالمباريات والرهان عليها مع اصحابه وكمان عنده "وسواس قهري" وتبدأ صراعات بين الاب والابن ولكن في نفس الوقت يقوم بتشجيعه في مسابقة رقص اما يرقص "برادلي كوبر" مع "جنيفر لورانس" ويكون الرهان علي الماتش والرقص كمان مع صاحب روبرت دي نيرو ويربح روبرت دي نيرو الرهان بالفعل وفي نهاية الفيلم تظهر زوجة "برادلي كوبر" اللي قعد يتكلم عليها طول الفيلم من غير ما تظهر ويروح لها البطل ويهمس في ودانها ببعض الكلمات ويجري بسرعة علي حبيبته "جنيفر لورانس" وهي بتبكي وفاكراه هيرجع لمراته ولكن المفاجأة ان هو كمان كان بيحبها الفترة اللي فاتت ومقالهاش وينتهي الفيلم علي انتصار قصة الحب بينهم وان كل منهم نشل التاني من مشكلته النفسية والحب هو المنقذ في النهاية .

كان في فيلم اسمه
Mozart and the Whale
كان برضه فيه البطلين عندهم مشكلة نفسية في نفس الوقت لكن كان عندهم حاجة تانية خالص اسمها
Asperger's syndrome
زي فيلم
adam

البعض اعتبر الفيلم رومانسي كوميدي والبعض قال درامي والبعض قال لا ده التلاتة مع بعض درامي رومانسي كوميدي.
الرومانس كوميدي عموما كان ليه تاريخ مشرف في الاوسكار من زمان ومن ابرز افلام الرومانسي كوميدي في عالم الاوسكار سواء علي سبيل الترشح او الفوز بالاوسكار زي افلام :


the apartment
Four Weddings and a Funeral
As Good as It Gets
Little Miss Sunshine
Juno
When Harry Met Sally

اما عن موضوع ال
Bipolar disorder

فده كان برضه موجود في احدي شخصيات فيلم رائع اسمه
the hours

الفيلم ده رائع جدا كفيلم رومانسي وواخد تقييمات عالية جدا من النقاد في معظم الصحف العالمية وبعضهم اداله 100/100



ونكمل باقي الافلام في الجزء التاني .


Sunday, January 6, 2013

باسم يوسف وشعر الفرزدق والخطوط الحمراء السياسية






في نفس السياق ده كتبت قبل كده موضوعين بعنوان "الحكام والخط الأحمر" وموضوع "سخرية العالم بلا خطوط حمراء" والمرة دي هازود بعض التفاصيل عن فن السخرية خصوصا في عالم السياسة
زي برنامج "باسم يوسف" عندنا في مصر او البرنامج العالمي الشهير
The Daily Show with Jon Stewart


الفكرة في السخرية قديمة جدا وتوصيل المعلومة بل احيانا توصيل الحكمة لجماهير ممكن يكون عن طريق جمل ساخرة زي مثلا اما الفيلسوف العظيم سقراط حب يسخر من الزواج فقال الحكمة دي بطريقة ساخرة :

"تزوج يابني فإنك إن رزقت بإمرأة صالحة.أصبحت أسعد مخلوق على وجه الأرض.
وإذا كانت شريرة..صرت فيلسوفا"


وكان السخرية فيها كتير من سرعة البديهة في مواقف شهيرة زي موقف المتنبي اما واحد قاله : رأيتك من بعيد فظننتك إمرأة..
رد عليه المتنبي في سرعة بديهة وقاله : ورأيتك فظننتك رجلا !!


وكان الشعر مفرود ليه مساحات كبيرة لشعر من نوع خاص أقرب الي السخرية وهو شعر الهجاء..وعشان تعرفوا روح التسامح الغريبة اللي كانت موجودة ايه رأيكم ان الفرزدق قعد يهجو ويشتم جرير في شعره خمسين سنة وفي الاخر بعد ما مات قال فيه جرير شعر رثاء  !! تخيلوا الموقف..واحد بيشتمك او بيهجوك خمسين سنة وفي الاخر يموت تقوم انت تكتب فيه شعر !!
ايه الروح دي ؟؟ بجد فين احنا من الروح المتسامحة العظيمة دي ؟؟


الناس اللي مش بيعجبها سخرية باسم يوسف وبيقولوا عليه "اراجوز" ميعرفوش ان السخرية فن منذ قديم الأزل وان الفرزدق الساخر اللي كان مشهور بشعر الهجاء كان من عباقرة زمانه بشهادة شعراء كتير جدا اتكلموا عنه وعن عبقرية شعره وسرعة بديهته..

ولأن جرير كان فاهم ان ده فن وان الهجاء فن في حد ذاته عشان كده اما مات الفرزدق رثاه لانه قدر يفصل بين الهجاء والمحبة الشخصية ..انما انا في عصرنا ده بنعتير اي حاجة "اهانة للرئيس" !!!


ومن الابيات الشهير جدا اللي هجم بيها جرير علي الفرزدق هجوم كبير في شعر الهجاء قال :


   أَعدَّ الله للشُّــعراء مني             صَواعِقَ يَخْضَعُون لها الرِّقابا
  قَرَنْت العبدَ عبدَ بني نميرٍ          مع القينين إذ غُلِبا وخــابا
  فلا صـلى الإله على نمير         ولا سقيت قبورهم السـحابا
 ولو وزنت حلوم بني نمير         على الميزان  ما وزنت ذبابا



في قصة شهيرة قوي بتتقال وهي قصة توفيق الحكيم والفنان الكوميدي شكوكو ..حاجة غريبة انك تقارن المقارنة دي لكن نشوف روح السخرية عند العبقري توفيق الحكيم :

القصة بتقول انهم سألوا توفيق الحكيم وقالوا : "مين أشهر أنت و لا شكوكو؟؟ "
قالهم "مين شكوكو ؟؟"
راحوا قالوا لشكوكو "توفيق الحكيم ميعرفكش واول مرة يسمع عنك"
قال شكوكو "طيب احنا نروح التحرير وكل واحد يقف علي رصيف ونشوف مين تعرفه الناس اكتر"
راحوا قالوا الكلام ده لتوفيق الحكيم قالهم في سخرية وتهكم  "خلوا شكوكو يقف علي ناحية ورقاصة عريانة تقف علي ناحية وشوفوا مين هتتلم عليه الناس اكتر "  !!!



وطبعا روح السخرية موجود بقوة في كتابات ومقولات العبقري برنارد شو وغيره من الكتاب اللي اتشهروا بالسخرية في كتاباتهم وادبهم.

ولو روحنا لمنطقة تانية غير منطقة الادب هنلاقي فنون تانية فيها الهجاء والسخرية ضلع اساسي زي فن "الراب" والراب اصلا كان منتشر في افريقيا بل يعتبر العرب اساسا اول من ابتدعوه وان كان بطريقة تانية ولكن كان شبيه بيه من حيث الفكرة.
والراب بيكون قصص ومواقف بيغنيها المطرب وكتير منه بيكون حروب كلامية بين مطربين بيتطرق فيها حتي لحياته الشخصية بل ساعات بيوصل التطرف بيهم لحد التهديد بالقتل في حروب الراب في الاغاني بل ان في مطرب راب بالفعل اتقتل بسبب السخرية القوية منه تجاه واحد متعصب مقدرش يستحمل فضرب عليه نار.
وفي مطربين كتير جدا مشهورين في الراب زي "ايمنيم" او "توباك" او "ليل واين" وغيرهم.



اما عن عالم السياسة فاتكلمنا عن مواقف كتير ساخرة سياسية في موضوعات سابقة واحب اضيف بعض المواقف الساخرة الشهيرة في الايام دي ..
من فترة غنت مطربة اسمها "نيكي ميناج" اغنية بتهاجم فيها بشراسة اوباما لدرجة الشتيمة وقالت في الاغنية :

I’m a Republican voting for Mitt Romney
You lazy b-tches is f-cking up the economy

طبعا دي شتيمة جريئة قوي علي رئيس دولة ومع ذلك طلع اوباما في برنامج وقال انه متفهم للنوع ده من النقد وطلعت المطربة علي حسابها علي تويتر وشكرت اوباما علي تفهمه  وقالت :

Ha! Thank you for understanding my creative humor & sarcasm Mr. President

ولكن طبعا ده لو عندنا في مصر يبقي "اهانة فخامة عظمة جلالة الرئيس" طويل العمر يطول عمره هاي هئ..


فن الكاريكتير لم يسلم منه اي رئيس دولة ولا شخصية عامة وده من فنون السخرية الشهيرة جدا واللي دايما بيوصل فكرة عن طريق رسمة كوميدية وساعات بتكون "كوميديا سوداء"
لدرجة ان اوباما طلعت عليه مش بس رسوم كاريكاتير لا دي طلعت عليه كاريكاتيرات عنصرية وقالوله في الرسومات "ارجع الي كينيا" وبيسخروا من لونه واصله !!
يعني لو بحثت علي الانترنت علي جملة
Racist Cartoons
هتلاقي كتير من الرسومات العنصرية ضد شخصيات شهيرة ورؤساء يعني السخرية هنا وصلت منحي خطير .


واحنا عارفين ان اوباما بيروح كل البرامج الساخرة وبيكون ضيف فيها رغم انها بتبهدله وتطلع عينه نقد لكن في النهاية هو بيروح ويطلع فيها كضيف زي برامج المذيعين "ديفيد ليترمان" و "جون ستيوارت"
اللي يتفرج علي بهدلة جون ستيوارت لاوباما ميتخيلش انه ممكن يلع في برنامجه لكن هم عندهم عقلية الفصل بين السخرية والتجريج وان مش كل سخرية تعتبرها تجريح ولكن ده نوع من الفن.



برنامج المذيع جون ستيوارت اللي بيعمل زيه باسم يوسف ياما عمل مواقف جريئة جدا في برامجه وفي الفترة الاخيرة كان مم اشهر هجومه اللاذع اما جاب اوباما في مناظرة رومني وكان سرحان وقال جون ستيوارت "انا مش عارف انت سرحان في ايه يا اوباما"  وبعدين جاب صورة اوباما "صورة تمثيلية طبعا"  وهو بيرسم رومني وهو عريان وقال "اااه دلوقتي عرفت السبب" قصده يعني ان اوباما كان سرحان في جسم رومني وبيتخيله عريان   !!!


واكيد المناظرة بين اوباما ورومني لم تسلم من ايد البرنامج الساخر الشهير جدا
saturday night live
وعملوا المناظرة كاملة بين ناس بتمثل شخصية الرئيس بشكل ساخر جدا.

ومش بس الرؤساء دول بيسخروا في البرامج دي من كل حاجة حتي وسائل الاعلام زي هجوم جون ستيوارت القوي علي شبكات سي ان ان وفوكس نيوز في قضية التأمين الصحي عندهم وقال ان اخبارهم مفبركة وكذابة.



وجريدة زي واشنطن بوست بتهاجم الرئيس وبتقول انه محظوظ في عنوان بيقول "أوباما رئيس محظوظ وفضيحة بتريوس لم تمسه بسوء"


يعني ياريت عندنا في مصر يبطلوا بقي موضوع رفع القواضي عمال علي بطال علي اي برنامج ينتقد او يسخر والكوميدي فعلا اما مذيع زي عماد اديب المفروض انه اعلامي ضخم يقول ان برة مبيحصلش كده ويهاجم باسم يوسف !! هل هو مثلا مش متابع الكلام ده ولا ميعرفش ان باسم يوسف محترم جداااااا بالنسبة للي بيحصل برة في البرامج والاغاني من شتايم عنيفة جدا جدا.

السخرية السياسية نوع من الاعتراض وهي ضرورة من ضرورات المناخ الديمقراطي بدون ان تتعرض لأي ضغوط وهو نوع من التنفيس عن المواطنين والترويح عنهم ..وياريت يكمل باسم يوسف بدون اي خطوط حمراء سياسية .

Tuesday, January 1, 2013

أقوي أفلام هوليود في عام 2012







عام 2011 كان عاما اخر من اعوام هوليود المتميزة وشاهدنا فيه العديد من الافلام ذات المستوي الفني الشيق ودخلت بعض افلام هذا العام في قائمة افضل 250 فيلم علي مستوي العالم حسب ترتيب موقع
imdb
مثل فيلم
Life of Pi

وايضا الفيلم الرائع
the dark knight rises
ومعهم فيلم
The Hobbit: An Unexpected Journey
الذي حصل علي تقييمات عالية جدا منذ اليوم الأول لظهوره في السينمات حول العالم .
والفيلم الرومانسي الدرامي الرائع
The Perks of Being a Wallflower


وهذه قائمة بأفضل أفلام العام حسب افئة التي تنتمي لها سواء دراما او اكشن او غيرها من الفئات :






drama :


The Grey
Meeting Evil
The Lucky One
Bel Ami
Jeff, Who Lives at Home
Big Miracle
Life of Pi
Flight
The Perks of Being a Wallflower
Lincoln
Argo
The.Girl.
Moonrise Kingdom
Seeking a Friend for the End of the World
The Raven
To Rome With Love
Red Lights
Being Flynn





romance comedy and romance :

This Means War
The Vow
Wanderlust
Safety Not Guaranteed
Love and Other Troubles
The Five-Year Engagement
Upside Down
What to Expect When You're Expecting
Lay the Favorite





action:


Safe House
Get the Gringo
BattleShip
deadfall
end of watch
Killing Them Softly
Jack Reacher
Fire with Fire
Universal Soldier
Freelancers
Arbitrage
Taken-2
Savages
Safe





fantasy &Adventure & Sci-Fi  :

The Hobbit: An Unexpected Journey
The Dark Knight Rises
Underworld Awakening
The Hunger Games
John Carter
Grimm's Snow White
Mirror Mirror
The Avengers
Journey 2 The Mysterious Island
Men in Black III
Snow White and The Huntsman
Cloud Atlas
Total Recall
Wrath Of The Titans
Looper
Dark Shadows
Chronicle




horror :

The Woman In Black
Prometheus
sinister
The Possession
Scary Or Die
Silent Hill Revelation



comedy :
The Dictator
The Watch
Here Comes the Boom
The Campaign
That's My Boy
Iron Sky
One for the Money
A Fantastic Fear of Everything
21 Jump Street




animation :

Hotel Transylvania
Paranorman
Dr. Seuss' The Lorax
Brave
 Wreck-It Ralph