Saturday, August 11, 2012

رمضانيـــــــات في عصر الكهرباء المقطوعة






**  الابتذال في الاعلانات باين في تحوله من زمن اعلانات كان بيتقال فيه باناقة "انا فودافون" الي زمن "انا قطونيل" .


** كم الفلول اللي في الحكومة الجديدة يوضح ان مرسي عملها بدل "تكنوقراط" خلاها" فلو قراط"  او "فلوقراطين" !


** كمية الالفاظ والشتايم داخل المسلسلات السنة دي غير طبيعي وبقت شتيمة "ابن الكلب" و "وسخة" هي الشئ الطبيعي دلوقتي والباقي اكبر واقذر..قعدوا يقولوا الرقابة هتضيعنا في زمن الاخوان الظاهر ان اللي حصل العكس او مشي اهل الفن بمبدأ "خدوهم بالقباحة لحسن يغلبوكوا"


**خبر بيقول الكهربا قطعت في منطقة كبيرة حول بيت "قنديل" الا منطقة بيته ..يمكن مقطعوش النور عليه علي اساس انه كان بيذاكر مع مرسي مشروع النهضة اللي مشوفناش منه غير كشاف وشمعة وتخبيط في الحيطان والظاهر ان مرسي ماشي بنظام المشهد اللي عامل ضجة في مصر مش عارف ليه بتاع مصطفي شعبان  "أحبوش" بس هو بيقول للشعب بالعافية "أحبيه" !


** ابراهيم عيسي اليومين دول بيثير لغط كبير في برنامجه علي القاهرة والناس بتصريحه في الحلقة اما قال " الحجاب مالوش وجود في الاسلام " !
يعني زي ما انت يا استاذ ابراهيم كنت بتقول ايه اللي دخل اهل الدين في السياسة وكنت بتلوم عليهم دلوقتي الطاولة اتقلبت عليك لانك دخلت في سكة مش سكتك خالص وبداوا يعملوا عليك حفلة فتاوي اليومين دول !


**الفاجومي بيقول "الجنس بالنسبة لي صلاة" !! واحب اقوله زي ما قال سامي العدل في الاعلان "ده انت منتهي من السبعينات يا راجل" ! قوم اصلب طولك بس يا حاج .


** بعد تصريح فيفي عبده انها قالت ل "بيجين" اتنيل ياروح امك..ياريت الحكومة تشوفلها شغلانة في وزارة الخارجية وهي اللي تنفع وتوريهم العين الحمرا فعلا ما هي "كيداهم" !


** سوسن بدر طالعة في اعلان فودافون وزعلانة ان "درة" بتقولها يا طنط !! هو فعلا دي غلطة من درة الظاهر ان سوسن بدر مش واخدة بالها انها "تيتا" مش "طنط" !


** من افضل مسلسلات السنة دي "الخواجة عبد القادر" قصة جديدة وشيقة جدا ومن اقوي ممثلات السنة دي هي الفنانة "سلافة معمار" بدور زينب في الخواجة عبد القادر ولكن لو اخترت اسوا ممثل هاحتار قوي بين تامر هجرس وتامر هجرس !


** رغم تنوع الاعلانات وافكارها وكتير منها حلو لكن من اقوي الاعلانات تأثيرا هو اعلان موبينيل باالاغنية الجميلة اللي فيه "عشان لازم نكون مع بعض" كلماتها مؤثرة والتنوع بين اهالي مصر في الاعلان رائع جدا وملفت واختار اسوأ اعلان مجموعة دنيا سمير غانم كلها .


** سامي مغاوري الشاب الجرئ كل ما اجيب مسلسل الاقي واحدة بترقصله في اوضة النوم وهو بيشد حجر ويرقص معاها ونفس الحكاية في صلاح السعدني برضه في مسلسل الاخوة اعداء..
واضح ان الصحة بتيجي بعد السبعين مع انهم منظرهم كأن "الديكور وقع عليهم" من زمان قوي والعضمة كبرت وفلطحت !


**توفيق عكاشة طلع في رسالة علي قنواته اشبه برسالات بن لادن اما كان مستخبي وبيقول "اغيثوني" ! ..الظاهر انه افتكر انه له شعبية بجد مش مجرد "بهلوان" او "اراجوز" للتسلية !
والمفروض بعد فضيحته فضيحة "البطة المتطاهرة يوم طلوعها علي المعاش" في برنامج الحكم بعد المزاولة يغير اسم برنامجه الموقوف الي "اسرائيل اليوم" بدل مصر اليوم.


** الهام شاهين في مسلسل قضية معالي الوزيرة ليها مشهد بتتكلم فيه عن ايام الصحابة وانهم مكانوش محتاجين حراسة وعايزة توفر فلوس الحراسة ليها كوزيرة في المسلسل !
من الغريب ان واحدة من زعماء الفلول تبقي عارفة المعلومة دي وتفضل علي نفس الموقف والكوميدي انها طلعت في برنامج تقول "ان عصر مبارك مش كله فساد ده 15 سنة بس" !!!
ياااه ده علي كده مقياس الرئيس الفاسد انه يكون فترة فساده 25 سنة من 30 انما كده حسني عدي علي الحركرك في وجة نظر زعيمة الفلول اللي قدوتها عكاشة.


** ابن الرئيس مصري متقبلش في الجامعة الالمانية لانه معرفش يتجاوز الاختبارات ..!..أخيرا بنشوف ولو صورة بسيطة من صور العدالة اللي كانت مفقودة كليا ايام المخلوع..
لو كان ده جمال مبارك كان خد شهادة تخرجه يوم دخوله اول اختبار علطول ..او كان جمال يقول لادارة الجامعة "إما انا او الفوضي"..بلطجة ..او علي طريقة مبارك الاخري "هو انا لسه هاعمل اختبارات قبول..ياراجل كبر مخك" .


1 comment:

Sarkozayas said...

انت لخصت شهر رمضان كله وبجد ضحكتنى وبالمناسبه حسبى الله ونعم الوكيل فاللى نكدوا علينا فى رمضان "اهى فرصه اتحسبن "